Auteur

Vous trouverez ci-dessous ce qui a été publié par l'auteur que vous avez sélectionné

Author Archive by Cécile YANG

Nruab xyoo – HWM YES XUS LUB SIAB – XYOO A

Par Cécile YANG

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB             

PHAU TSIB 7 : 6-11

LUB NTSIAB LUS : Tswv Ntuj nyiam peb, tsis yog vim peb muaj nqes. Hos yog vim nws siab zoo. Nws xav pab ntiaj teb neeg xws li ib txwm nws cog lus.

COV LUS NYOB HAUV NTAWV PHAU TSIB HAIS TIAS:

6 – Mais Xes hais rau tsoom His Xas Lais tias : “Cov His Xas Lais, nej yog ib haiv neeg rau nej tus Huab Tais Tswv Ntuj.

Nej yog haiv neeg uas nej tus Huab Tais xaiv nyob hauv tas txhia haiv neeg nyob ntiaj teb los ua nws haiv neeg, ua nws tug.

7 – Tswv Ntuj npuab nej thiab xaiv nej tsis yog vim nej coob dua lwm cov haiv neeg. Nej twb yog haiv neeg tsawg dua cov.

8 – Hos yog vim Tswv Ntuj hlub nej, thiab vim nws xav ua raws li nws tau nrog nej cov yawg koob cog lus,

nws thiaj tau coj nej tawm hauv lub teb chaws ua qhev los, nws npo nej ntawm tus Vaj Hais Nkws Tos Fas Loos lub peev xwm.

9 – Ua li, nej yuav paub tias nej tus Huab Tais Tswv Ntuj yog tus tseem ceeb tiag. Nws yog tus Tswv Ntuj tsis fav xeeb. Nws cog lus ruaj.

Nws hlub cov neeg nyiam nws thiab coj nws cov lus qhia. Nws hlub lawv mus txog txhiab niag tim puas xyoo.

10 – Tab sis Tswv Ntuj muab txim rau cov ntxub nws. Tswv Ntuj ua kom cov ntxub nws lawv tuag sai.

11 – Li ntawd, nej yuav coj tej lus qhia tej kev cai lij choj uas hnub no kuv ceeb toom rau nej.

Yog Tswv Ntuj lo lus. Nws lub Txiaj Ntsim

Nkauj Paj Nruag             HUAB TAIS HLUB COV NEEG HWM NWS               

(NPN 103-1)

Txais: Huab Tais lub siab hlub roos cov neeg hwm nws mus ib txhiab ib txhis.

1 – Kuv tus plig, koj cav lus zoo txog Huab Tais. Kuv tej siab ntsws, nej cav lus zoo txog nws lub npe ntshiab.

Kuv tus plig, koj cav lus zoo txog Huab Tais. Koj txhob mom nws txheej. Koj yuav nco ntsoov nws tej txiaj ntsim.

2 – Nws zam koj cov txhaum, nws kho koj tej mob nkeeg. Nws muab nws lub siab zoo thiab khuv leej neeg roos koj.

Nws cawm koj txoj sia ntawm kev puas tsuaj.

3 – Huab Tais siab zoo, nws khuv leej neeg tas nrho. Nws hlub neeg mus li, nws tsis npau taws sai.

Nws tsis nplua peb raws li peb cov txhaum. Nws tsis pauj kev phem rau tej txhaum peb tau ua.

ZAJ NYEEM OB           

1 ZAM 4 : 7-16

LUB NTSIAB LUS : Cov paub Tswv Ntuj yog cov nyiam Tswv Ntuj. Thiab thawj txoj kev xyaum nyiam Tswv Ntuj yog xyaum nyiam tsoom txheeb ze.

COV LUS NYOB HAUV ZAM TSAB NTAWV IB

7 – Cov zoo nyiam, peb yuav sib nyiam sib hlub mog ! Vim  txoj kev nyiam tuaj ntawm Tswv Ntuj tuaj, ua li mas tus twg nyiam,

tus ntawd yug ntawm Tswv Ntuj los, thiab nws paub Tswv Ntuj. 

8 – Tus tsis txawj nyiam, mas nws tsis paub Tswv Ntuj, vim Tswv Ntuj yog txoj kev nyiam. 

9 – Tswv Ntuj txoj kev nyiam peb tawm los rau qhov muag pom xyeem li no : Tswv Ntuj xa nws Leej Tub Twm Zeej tuaj nyob ntiaj teb no,

kom peb ciaj nyob hauv nws Leej Tub. 

10 – Nws txoj kev nyiam yog zoo li no : tsis yog peb tau nyiam Tswv Ntuj, yog Tswv Ntuj tau nyiam peb,

thiab yog nws xa nws Leej Tub tuaj ua nqi txhiv peb ntawm peb cov txhaum. 

11 – Cov zoo nyiam, yog Tswv Ntuj nyiam peb npaum li ntawd, mas peb kuj yuav sib nyiam sib hlub thiab. 

12 – Tsis muaj leej twg tau ntsia ntsoov Tswv Ntuj ib zaug li. Yog peb sib nyiam sib hlub, mas Tswv Ntuj nyob hauv peb,

thiab nws txoj kev nyiam  uas zoo txhij zoo txhua hlob tiav nyob hauv peb. 

13 – Peb paub tias peb nyob hauv Tswv Ntuj, thiab nws nyob hauv peb vim qhov no : yog qhov nws pub nws Leej Ntuj Plig rau peb. 

14 – Ntawm peb, mas peb tau ntsia ntsoov, ces peb ua tim khawv zeem tias Leej Txiv tau xa Leej Tub tuaj cawm lub qab ntuj neeg. 

15 – Tus lees tias Yes Xus yog Tswv Ntuj Leej Tub, mas Tswv Ntuj nyob txawm hauv nws, thiab nws nyob hauv Tswv Ntuj. 

16 – Peb paub Tswv Ntuj txoj kev nyiam peb lawm, ces peb ntseeg. Tswv Ntuj yog txoj kev nyiam : tus twg nyob hauv txoj kev nyiam,

mas nws kuj nyob hauv Tswv Ntuj, thiab Tswv Ntuj nyob hauv nws. 

Yog Tswv Ntuj lo lus. Nws lub Txiaj Ntsim

NTAWV MOO ZOO             

MAS TAIS 11 : 25-30

LUB NTSIAB LUS : Cov neeg me yuav paub Tswv Ntuj lub siab kuj tau. Yog peb tuaj cuag Yes Xus, mas peb yuav paub Yes Xus lub siab.

COV LUS NYOB HAUV MAS TAIS NTAWV MOO ZOO

25        Lub caij ntawd, Yes Xus hais tias :  

« Txiv, kuv cav lus zoo txog koj, Huab Tais kav lub ntuj lub teb,

vim koj zais tej yam ntawd rau cov neeg thoob tsib thiab cov neeg ntse,

koj ho qhib rau cov me nyuam yaus. 

26        Muaj tseeb tiag, Txiv, koj lub siab nyiam li ntawd. 

27        Kuv Txiv muab tas ib puas tsav yam rau kuv. 

Tsis muaj leej twg paub Leej Tub, tsuas kawg Leej Txiv thiaj paub. 

Kuj tsis muaj leej twg paub Leej Txiv, tsuas kawg Leej Tub thiaj paub,

thiab tus uas Leej Tub pom zoo qhia rau kom paub.

28        « Tas nej sawv daws uas nej  khwv, thiab ris nra hnyav, nej tuaj cuag kuv  mog !

Kuv yuav cia nej so los siav.       

29        Nej  txais kuv tus quab.  Nej kawm ntawm kuv mog, vim kuv siab zoo, kuv tsis muab hlob,

nej tus plig yuav nrhiav tau chaw so los siav. 

30        Vim kuv tus quab kwv yooj yim, thiab kuv lub nra sib.

Huab Tais Pleev .  Lub qab ntuj neeg cav txog koj.

Mus Av Ntshiab 2023

Par Cécile YANG

Wb ob niam txiv xav tsis txog tias xyoo no wb yuav mus saib thaj Av
Ntshiab, Huab Tais Yes Xus lub teb chaws. Ib sij huam xwb twb ua dev
raws kev rov qab los txog vaj txog tsev lawm. Wb mus zaum no yog nrog cov phooj ywg Los Tsuas mus foom hmoov zoo rau lawv daim phiaj zeb Peb txiv nyob saum ntuj uas lawv twb npaj tau ntau xyoo los lawm.

Sij hawm dhau los lawm ntev yeej xav tias lawv twb mus los lawm. Ntshe yog Huab Tais Ntuj caw wb lod ? Xyoo not thaum lub 2 hlis ntuj, wb tau mus koom cov phooj ywg Los Tsuas lub thaj txi ntuj puag hli. Thaum wb nyuam qhuav mus txog hauv tsev teev ntuj xwb, txawm muaj ib tug poj niam (pom thawj zaug) cia li ncaj nraim los nug kuv tias : « koj mus Jérusalem thiab lov ? » Kuv teb tias:
« Tsis mus, lawv twb mus los lawm pob ! ». Ces nws cia li tig loo rov mus hu tau tus tuav ntaub ntawv los txog ntawm wb, ces nws hais tias: « tus no xav mus Terre Sainte thiab ». Tus tuav ntaub ntawv hais tias: «koj xav mus los tau tab sis yuav tsum teb tam sis no », ua rau kuv yoob tag. Kuv thiaj teb tias: « wb 2 leeg ».
Nws rov hais tias: « tiag mas tshuav ib lub chaw xwb tab sis yuav zam thiab txais kom tau ib tug ntxiv. Tab sis neb yuav tsum npaj ntaub ntawv kom tiav xa tuaj hmo no nawb ».
Wb yeej tsis npaj siab thiab xav tias yuav mus tab sis ua cia li teb tias MUS. Tsis ua xyem xyav li, yeej muaj ntau yam los ua kom wb pauv siab vim lub teb chaws tid tsis thaj yeeb. Txhua tus txheeb ze los yog phooj ywg tsis pom zoo wb mus tab sis muaj ib qho tseeb nyob hauv siab tias Tsis txhob ntshai mus kom tau.

Peb mus so nyob rau hauv cov leej phauj lub tsev « les sœurs de
Nazareth » uas yog leej Ntshiab Yos Xes lub ntxa nyob rau hauv.
Peb kuj tau mus teev ntuj ntxov ntxov nyob hauv lub Basilique de la
Sainte Marie los yog la grotte de l’annonciation, uas leej Ntshiab Nkas
Nplias tshwm sim rau niam Mab Liab pom.

Kuv hnov kuv lub siab lub ntsws nphau npog, zoo siab tshaj plaws ua
rau kuv lub kua muag poob ntav vim tsis yog kuv tab tom nyem phau
Ntawv Ntshiab los yog npau suav, zaum no kuv pom tseeb lawm tiag.
Peb teev ntuj thiab ncig xyuas cov phiaj zeb duab niam Mab Liab txhua lub teb chaws, tsuas yog tshuav tsis muaj Hmoob thiab Los Tsuas xwb. Ua rau peb 2 haiv neeg no ntshaw thiab kub siab lug hais zom zaws tias qhov no yog peb lub hom phiaj uas yuav tsum tshwm sim ib hnub rau peb xwb.

Tus txiv plig coj peb mus ntawd kuj nug tau tseeb lawm tias tseem tshuav chaws yog peb npaj tau. Cov phooj ywg Los Tsuas kuj qhia tau ib lub tswv yim zoo kom peb tsim 2 daim lag zeb (Peb Txiv nyob saum ntuj thiab Niam Mab Liab) ua ke, es peb thiaj li mus sib sau ib zaug
xwb. Vim lawv tsis paub lawv thiaj li tsis ua li ntawd.

Peb tau mus sib txoos thov Leej Niam
Ntshiab nyob hauv La chapelle saint Charles de Foucauld(*)
Txiv Plig kom hu zaj nkauj cav txog niam Mab Liab ua lus
Los Tsuas, lus Nyab Laj ces thaum kawg nws hais tias ua lus hmoob thiab.

Kuv paub tias Leej Ntuj Plig Ntshiab yeej nrog nraim wb, vim tias zaum no wb hu tau zoo tshaj txhua zaus tib si. Lub sij hawm ntawd xav kom nej saws daws nrog wb nyob mas ntshe peb haj tseem yuav zoo siab tshaj. Kuv zoo zoo siab kua muag rov qab poob ntav dua ib

zaug ntxiv. Hnub no yog zaum ob uas kuv tau quaj vim txoj kev zoo siab thiab kaj siab. Kuv paub zoo tias yog Leej Niam lub hwj chim tiag tiag thiaj li au rau peb feem coob zoo zoo siab nyias so so nyias kua muag. Thaum peb teev ntuj taug Huab Tais Yes Xus tus lw, tau tsuj Nws cov hneev taw, txog tej chaw nws ntog mas zoo xws li peb nrog Nws nyob sij hwm ntawd. Peb ntsiav ntsoov Nws raug tsim txom thiab peb hlub Nws heev… Txhua tsav txhua yam yeej muaj raws li Ntawv Ntshiab qhia tiag.

Peb ua thaj lub Txi ntuj “messe au couvent des bénédictines” mas ua rau wb ob niam txiv ntsuag ntsuag nos, nyob de tes nrho tsis muaj npoj. Vim tias cov phooj ywg Los Tsuas zoo siab, hom khaj sib khawm zom zaws, wb ces lam ua ntsej muag luag xwb tab sis lub siab mob tej niag zaj tias ua cas hov tsis yog peb cov hmoob? Wb nco txog nej txhua leej txhua tus, xav kom lub sij hawm no muaj nej sawv
daws mas ntshe peb yuav zoo zoo siab, sib khawm zom zaws thiab.

Txhua yam no, kuv paub zoo tias yog Huab Tais Ntuj xa wb tuaj kom paub rov qab los hais qhia rau nej, xws li 2 tug thwj tim mus Es mas ws, rov qab los qhia leej Ntshiab Pob zeb lawv. Txij thaum ntawd los ces wb yeej xav kom peb muaj ib yam li lwm haiv neeg ntseeg no thiab. Wb niaj hnub thov ntuj puag tim thaj Av Ntshiab rau peb tsoom
neeg ntseeg hmoob kom Leej Tswv Yim Ntshiab los tshoj peb txhua leej txhua tus, kom peb thooj siab kom ntswv tsim kom tau 2 daim phiaj zeb no ib hnub xwb. Tshwj xeeb tshaj thov ntuj rau cov yuav xub ntaus thawj, yuav xub los pib leg tej dej num (tho txoj hauv kev). Tam
li kuv pom muaj 3 leeg, xws li :

  • Xaiv Tsom YAJ, uas yog tus Txiv Plig
    Neej Vaj ib txwm tso siab thiab xaiv
    nws los tuav lub aumonerie los txog
    ntua xyoo 2022.
  • Joanne, niam Ntsuab Xwm YAJ, yog
    tus muaj peev xwm los txais Xaiv Tsom
    txoj hauj lwm thiab tuav lub
    aumonerie ntxiv mus lawm yav tom
    ntej. Nws yuav yog tus sawv cev los lis
    cov hauj lwm no.
  • Voos XYOOJ nyob USA, nws kub siab
    xav kom peb haiv neeg Hmoob ntseeg
    muaj 2 daim phiaj zeb.
    Yes Xus
    lub ntxa

Thaum mus tsuj kiag daim Av Ntshiab lawm, txhua txhia ua rau lub
siab kaj lug xwb. Peb tau ua thaj txi ntuj nyob ntawm txoj kev 2 tug thwj tim taug mus rau Es mas ws, « messe mémoire d’Emmaüs ». Nyob ntawm qhov chaw no muaj ib tug leej phauj
nyab laj ua Huab Tais Ntuj tej dej num los tau 30 xyoo lawm. Peb tau
nrog nws txuas lus hais txog nws lub neej tso tseg los mus raws Huab Tais Ntuj, ua rau peb sawv daws txoj kev ntseeg loj hlob lawm ib qib thiab kaj siab lawm tas ntau. Lub sij hawm yuav khiav sai ua luaj li, twb txog lub caij peb rov qab los tom chaw so lawm, tab sis tsis xav ncaim qhov chaw no kiag vim zoo xws li Yes Xus cheem kom peb nyob nrog Nws vim tsaus ntuj lawm.

Yes Xus lub ntxa

(*) Charles de Foucauld (1858 -1916). Nws ua ntsuag
niam ntsuag txiv ntxov ntxov, ntsib teeb meem ntau tsav
ntau yam. Nws yog ib tug qub tub rog tsis ntseeg ntuj li.
Xyoo 1886, nws ntsib Huab Tais Ntuj thawj zaug nyob
hauv lub tsev teev ntuj Saint-Augustin (Paris), nws txaus
siab hlo los raws Huab Tais Ntuj. Nws sawv ua Leej choj
xyoo 1901, thiaj txiav txim siab los ua lub neej nrog Tswv
Ntuj raws Yes Xus qab nyob teb chaws suab puam pab
cov neeg txom nyem. Nws raug tub sab tua xyoo 1916.
Xyoo 2022, Vaj Qhia François tau tsa nws ua Lee

Cov phooj ywg sawv daws, yog kuv qhib tau kuv lub siab mas kuv yuav qhib rau nej saib kom nej thiaj li paub hais tias nws kub lug xav kom 2 daim phiaj zeb no tshwm sim tau xwb. Peb sawv daws thov ntuj tsis tseg los pab peb, txhawb cov peb lub dag lub zog, pab cawm lub cub tawg kom ciaj thiab txhua txhia yam mus tau raws li lub siab xav thiab ntshaw. Peb Hmoob thiaj li yuav tsis ntsuag no li wb 2 niam txiv zaum no.
Thov Huab Tais Ntuj nrog nej nyob pov hwm nej sawv daws. Ua li
Niam Zoov Tsu THOJ,
Chevannes (Essonnes)

phiaj zeb Peb Txiv nyob saum ntuj yaj tag dhau los

nyob ntawm tug dej Yos Las Das

phiaj zeb Peb Txiv nyob saum ntuj niaj hnub no

Leej Ntshiab Pob Zeb lub tsev

Tus leej phauj saib cov phiaj zeb

Leej Ntshiab Pob Zeb

Roob txiv ntoo roj

Tsev teev ntuj txiv ntoo roj

Mont de tentation

Nruab xyoo – HWM LUB CIM YUG – Xyoo A

Par Cécile YANG

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Ua hmoov Leej Ntuj Plig nqes los tas, yog hnub chiv ob tom qab.

ZAJ NYEEM IB          

 PHAU TSIB 8 : 2-3, 14-15

LUB NTSIAB LUS : Lub Cim Yug yog cov mov pab hla lub ntiaj teb, pab tiv tas puas tsav yam xwv txheej.

COV LUS NYOB HAUV NTAWV PHAU TSIB.

2 – His Xas Lais, koj nco ntsoov txog txoj kev uas koj tus Tswv Ntuj cia koj taug tau plaub caug xyoo

nyob hauv teb chaws suab puam. Vim Tswv Ntuj xav qhia koj kom koj nyiam ua tus me,

nws xav sim koj, thiab nws xav paub koj lub siab kom thoob. Nws xav saib koj tias koj puas coj nraim nws cov lus qhia los tsis coj.

3 – Tswv Ntuj tau tso koj ua tus me kawg, nws cia koj raug kev tshaib. Nws tau muab cov mov Mas Nas rau koj noj,

yog ib co mov uas koj thiab koj cov yawg koob nej tseem tsis tau paub ib zaug li.

Tswv Ntuj xav qhia koj tias neeg tsis yog noj mov xwb neeg thiaj nyob taus.

Neeg tseem yuav tas puas tsav yam tawm hauv Tswv Ntuj lub ncauj los tiab.

14 – Li ntawd mas koj yuav nco ntsoov tias :

Huab Tais Tswv Ntuj tau coj koj tawm hauv Hais Nkws Tos teb los, tawm hauv lub teb chaws ua qhev los.

15 – Nws coj koj mus hla lub teb chaws suab puam dav thiab txaus ntshai, Yog lub teb chaws muaj cov nab thiab cov laum kiv tshooj.

Yog lub teb chaws tshaib dej. Nyob hauv lub teb chaws qhuav qhawv tsis muaj dej,

yog Tswv Ntuj ua kom dej txhawv los rau nej haus, ua kom dej txhawv saum lub pob tsuas tawv tawm los.

Yog Tswv Ntuj Lo Lus.         Nws lus txiaj ntsim

Nkauj Paj Nruag:             YES LUS XAS LES, KOJ CAV TXOG HUAB TAIS                

(NPN 147-1)

Txais: Yes Lus Xas Les, koj cav txog Huab Tais mas!

1 – Yes Lus Xas Les, koj nqaum paj nqaum nruas rau Huab Tais. Xis Yoos, koj cav txog koj tus Tswv Ntuj

vim nws ua kom koj cov ntsia liaj rooj khov. Nws foom hmoov zoo rau koj tej tub ki hauv tsev.

2 – Nws pub kev thaj yeeb rau koj lub teb chaws; nws pub txhiam laj txhiam xws rau koj noj txaus siab.

Nws txib nws lo lus tuaj rau ntiaj teb ces nws lo lus khiav yeev tuaj.

3 – Nws qhia nws lo lus rau Yas Kos. Nws qhia nws cov cai lij choj thiab cov lus qhia rau haiv His Xas Lais.

Nws tsis tau ua li ntawd rau ib haiv neeg twg li; lwm haiv neeg tsis paub nws cov lus qhia.

ZAJ NYEEM OB

1 KOS LIS NTHOS 10 : 16-17

LUB NTSIAB LUS : Lub Cim Yug yog lub cim tshaj tias peb cov neeg ntseeg koom siab koom ntsw nyob hauv Yes Xus.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

16 – Lub ntim foom hmoov, uas peb cav  txog,

tsis ua kom peb koom siab nyob hauv Leej Pleev cov ntshav lod ? 

Cov mov uas peb muab ntais, tsis ua kom peb koom siab nyob hauv Leej Pleev lub cev lod ? 

17 – Muaj tib lub ncuav mov xwb, peb sawv daws koom ua ib lub cev xwb. 

Peb sawv daws koom ua ib lub cev, vim peb sawv daws txais tib lub ncuav mov. 

Yog Tswv Ntuj Lo Lus.         Nws lus txiaj ntsim

NTAWV MOO ZOO         

ZAM 6 : 51-58

LUB NTSIAB LUS : Lub Cim Yug pub txoj sia rau peb. Yog vim peb niaj hnub tuaj txais lub Cim Yug peb thiaj nyob ruaj nreb hauv kev ntseeg.

COV LUS NYOB HAUV ZAM NTAWV MOO ZOO.

51 – Kuv yog cov mov muaj txoj sia nqes saum ntuj los.  Leej twg noj cov mov no, nws yuav ciaj nyob mus li.

Cov mov uas kuv yuav muab pub rau lub qab ntuj neeg noj kom lawv muaj txoj sia, yog kuv lub cev nqaij. »

52 – Ces cov Yus Das sib cav zom zaws tias :

« Tus neeg ntawd yuav ua li cas muab tau nws cev nqaij los rau peb noj ? » 

53 – Yes Xus thiaj hais rau lawv tias : « Kuv hais qhov tseeb tiag rau nej :

Yog nej tsis noj Neeg Leej Tub lub cev nqaij thiab tsis haus nws cov ntshav, mas nej yuav tsis muaj txoj sia nyob hauv nej. 

54 – Hos tus noj kuv lub cev nqaij thiab haus kuv cov ntshav, nws muaj txoj sia nyob mus li.  Hnub kawg, kuv yuav tsa nws sawv rov qab los. 

55 – Vim kuv lub cev nqaij yog ib co tseem txhiam xws noj, thiab kuv cov ntshav yog ib yam zoo haus. 

56 – Tus noj kuv cev nqaij thiab haus kuv cov ntshav, nws nyob hauv kuv thiab kuv nyob hauv nws. 

57 – Leej Txiv uas nws muaj txoj sia, nws xa kuv tuaj, ces kuv muaj txoj sia vim Leej Txiv.  Li ntawd, tus noj kuv, nws kuj yuav muaj txoj sia, vim kuv. 

58 – Cov mov nqes saum ntuj los yog zoo li ntawd. Cov mov no tsis zoo li cov uas cov yawg koob tau noj, tab sis lawv tuag tas lawm. 

Hos tus noj cov mov no, mas nws yuav ciaj nyob mus li. »

Huab Tais Pleev.      Lub qab ntuj neeg cav txog koj

Nruab xyoo -HWM PEB LEEG HUAB TAIS -Xyoo A

Par Cécile YANG

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Ua hmoov Leej Ntuj Plig nqes los tas, yog hnub chiv tom qab.

ZAJ NYEEM IB             

KEV TSIV 34 : 4-6, 8-9

LUB NTSIAB LUS : Tswv Ntuj hais rau Mais Xes tias Tswv Ntuj yog ib tug Huab Tais hlub neeg, nws tsis yog ib tug tswv qhia txoj cai nruj nruj.

COV LUS NYOB HAUV NTAWV KEV TSIV

4 – Mais Xes sawv ntxov mus pem lub roob Xis Nais, raws li Tswv Ntuj qhia rau nws. Nws tuav ob daig txiag zeb.

5 – HUAB TAIS nyob hauv ib twv huab nqes los, HUAB TAIS los nrog Mais Xes sawv ua  ke. Mais Xes hu txog HUAB TAIS lub npe. 

6 – HUAB TAIS hla ntawm Mais Xes xub ntiag, ces Mais Xes qw nrov nrov tias: 

« HUAB TAIS, HUAB TAIS, tus Tswv Ntuj uas lub siab hlub mos nyoos, thiab khuv leej neeg, tus npau taws qeeb, tus pub paj tshab ntau,

tus tsis fav xeeb.       

8 – Thooj txhij ntawd, Mais Xes txhos caug ntua pe hauv av pe. 

9 – Ces nws hais tias : « Huab Tais, yog koj saib kuv tsim nyog, thov koj nrog nraim peb mus, txawm tias peb yog ib haiv neeg xwb qwb txhav,

los thov koj zam peb qhov yuam kev thiab zam txhaum rau peb, koj muab peb los ua koj tug. »

Yog Tswv Ntuj lo lus. Nws lub Txiaj Ntsim

Nkauj Paj Nruag            PEB CAV LUS ZOO TXOG KOJ            

(Das Nias 3)

Txais: Lub koob meej thiab lo lus cav yog koj tug mus tas ib txhiab ib txhis.

1 – Huab Tais, peb cov yawg koob tus Tswv Ntuj, koj muaj koob meej nto moo,

tsim nyog peb cav lus zoo txog koj tas ib txhiab ib txhis. Koj lub npe ntshiab nto moo lug,

tsim nyog peb cav lus zoo txog koj tas ib txhiab ib txhis.

2 – Koj muaj koob meej nto moo lug hauv lub tuam tsev uas koj lub hwj chim ntshiab nyob,

tsim nyog peb cav lus zoo txog koj lub koob meej tas ib txhiab ib txhis.

3 – Koj muaj koob meej nto moo lug saum lub theej kiab uas nyob hauv koj lub Ceeb Tsheej,

tsim nyog peb cav lus zoo txog koj tas ib txhiab ib txhis.

4 – Koj muaj koob meej nto moo lug. Koj zaum saum lub theej kiab uas cov Tshiab Kes Lus Npis zov.

Koj tsom pom puag hauv qab tiv txwv,

tsim nyog peb cav lus zoo txog koj tas ib txhiab ib txhis.

ZAJ NYEEM OB         

 2 KOS LIS NTHOS 13 : 11-13

LUB NTSIAB LUS : Peb yuav niaj hnub nyob kaj siab lug nyob hauv peb leeg Huab Tais.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

11 – Kwv tij sawv daws, qhov kawg no, thov kom nej tau nyob kaj siab lug.  Nej yeej meem muab siab rau ua neeg zoo txhij zoo txhua. 

Nej sib yaum ua siab loj. Nej koom ua ib lub siab ib lub ntsws mog.  Nej coj nej lub neej nyob hauv txoj kev thaj yeeb.

Ces tus Tswv Ntuj pub kev nyiam thiab kev thaj yeeb yuav nrog nej nyob. 

12 – Nej rov sib foom lus hmov tshua, nej sib nwj nyob hauv txoj kev ntshiab.  Tas tsoom ntshiab foom lus hmov tshua rau  nej.

13 – Huab Tais Yes Xus Pleev lub txiaj ntsim, Tswv Ntuj txoj kev nyiam, thiab Leej Ntuj Plig Ntshiab txoj kev sib haum xeeb nrog nej sawv daws nyob.

           Yog Tswv Ntuj lo lus. Nws lub Txiaj Ntsim

NTAWV MOO ZOO

ZAM 3 : 16-18

LUB NTSIAB LUS : Peb tus Tswv Ntuj yog ib tug Tswv hlub lub ntiaj teb neeg, nws tso nws leej Tub tuaj pab lub ntiaj teb neeg.

COV LUS NYOB HAUV ZAM NTAWV MOO ZOO.

16 – Vim Tswv Ntuj nyiam lub qab ntuj neeg npaum no : 

nws thiaj muab nws Leej Tub twm zeej rau, kom xwv tus ntseeg txog Leej Tub txhob tuag,

tab sis kom nws muaj txoj sia nyob mus li. 

17 – Tswv Ntuj tsis xa Leej Tub tuaj hauv lub qab ntuj kom nws muab txim rau lub qab ntuj neeg,

nws xa Leej Tub tuaj cawm lub qab ntuj neeg. 

18 – Tus ntseeg txog Leej Tub, nws tsis raug txiav txim. Tus tsis ntseeg, nws twb raug txiav txim lawm,

vim nws tsis ntseeg txog Tswv Ntuj Leej Tub twm zeej lub npe. 

Huab Tais Pleev .  Lub qab ntuj neeg cav txog koj.

« Ua Tswv Ntuj ib tug tub txib… »

Par Cécile YANG

Nyob zoo txog peb ib tsoom ntseeg sawv daws,

Wb ob niam txiv tau mus nrog cov phooj ywg ntseeg los tsuas teev ntuj nyob hauv chav tsev ntawm Don Bosco, hauv lub nroog Orléans.

Tus leej choj Kiettisack (Antoine) nws yog cov phooj ywg los tsuas lawv tus txiv plig coj lawv teev ntuj tau ntau lub xyoo los.

Txiv plig Kiettisack yog ib tug leej choj txais lub cim tiag tes nyob rau tim teb chaws Los Tsuas.

Yog li no, nws tuaj kawm ntawv ntawm pab MEP ( Mission étrangère de Paris ) nyob pem Paris tas nws lub caij nyoog lawm,

nws yuav tau rov qab mus teb chaws Los Tsuas.

Nws yog ib tug txiv plig paub hais 3 hom lus xws li lus los tsuas, lus nyab laj thiab lus fab kis. 

Hnub tim 25 lub 6 hli ntuj no thaum 11h, hauv lub tsev teev ntuj Don Bosco, txiv plig Kiettisack tuaj ua lub txoos teev ntuj 

nrog tus txiv plig Jean-Louis Rodriguez.

Tom qab teev ntuj tas, yuav npaj khi tes rau txiv plig Kiettisack.

Thov caw sawv daws tuaj koom thiab tuaj pab txhawb. Tsis tas li thov sawv daws pab npaj khoom noj haus tuaj pab txhawb.

kuv pom tau tias txiv plig Kiettisack yog ib tug txiv plig txawj hu nkauj teev ntuj ua lus los tsuas. Nws kub kub siab txhawb thiab pab 

pawg ntseeg los tsuas nyob ntawm Orléans no. 

Nws yuav mus tsev yuav ua rau sawv daws uas tau paub txog nws muaj kev tshua txog nws ib ntus. 

Thov kom Huab Tais Yes Xus coj txiv plig Kiettisack nws txoj hauv kev kom mus txog nws lub teb chaws. 

Kom nws coj nws lub siab ruaj khov thiab kom nws txoj kev ntseeg loj hlob ua rau nws nyob kaj siab lug los ua Tswv Ntuj txoj hauj lwm.

Amen.

église saint Jean Bosco: 140, rue de l’argonne 45000 Orléans

Niam Ntsuab Xwm Yaj

Lub Caij Hla          Hnub Chiv 8      Xyoo A

Par Cécile YANG

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Hnub nyoog Leej Ntuj Plig nqes los.

ZAJ NYEEM IB        

HAUJ LWM 2 : 1-11

LUB NTSIAB LUS : Leej Tswv Yim Ntsiab yog zoo li cua : nws ua kom neeg lub siab muaj zog li cua hlob. Kuj yog zoo li hluav taws : nws ua kom neeg pom kev thiab kub siab.

COV LUS NYOB HAUV NTAWV HAUJ LWM.

1 -Thaum txog lub Hnub Nyoog Tsib Caug, tas cov thwj tim huv tib si tuaj sib txoos ua ke. 

2 -Ib sij huam, txawm muaj ib lub suab nrov saum ntuj tuaj xws li ib nthwv cua hlob hlob ntsawj,

lub suab ntawd nrov thoob plaws lub tsev uas lawv nyob. 

3 – Ces lawv pom tej ntshua nplaim zoo li nplaim taws, ncau ua tej tus nplaim me ya tuaj tsaws saum cov thwj tim txhua tus. 

4 – Lawv sawv daws tau txais Leej Ntuj Plig Ntshiab puv hauv lawv, ces lawv pib hais ntau xeem lus raws li Leej Ntuj Plig pub kom lawv hais tau.

5 – Thaum ntawd, muaj ib co Yus Das kub siab ntseeg tuaj ntawm tas cov teb chaws hauv lub qab ntuj khwb tuaj nyob Yes Lus Xas Les. 

6 – Thaum lawv hnov lub suab nrov, tas ib tsoom neeg tuaj ntsauv vij vog. Sawv daws ua siab poob nthav vim tias thaum cov thwj tim hais lus,

mas lawv nyias hnov hais nyias xeem lus.

7 – Lawv ceeb tas nrho, xav tsis thoob, ces lawv hais tias : « Tas cov neeg uas hais lus ntawd, lawv tsis yog ib co Nkas Lis Lais lod ?  

8 -Ua li cas peb thiaj nyias hnov lawv hais nyias xeem lus ? 

9 – Peb yog ib co neeg Pas Tos, Mes Dias, Es Las Mias, peb nyob Mes Xos Pos Tas Mias tuaj, Yus Das, Kas Pas Dos, Poos Tus, As Xias, 

10 – Fis Zias, Pas Fis Lias, nyob Hais Nkws Tos thiab Lis Npias teb chaws uas ze Xis Les Nas, peb yog neeg Los Mas tuaj nyob ntawm no. 

11 – Peb yog ib co Yus Das thiab ib co teev dab txais kev ntseeg, ib co Khes Tas, As Las Npias,

peb puav leej hnov lawv hais peb xeem lus cav txog Tswv Ntuj lub hwj chim. »

Yog Tswv Ntuj Lo Lus       Nws lus txiaj ntsim

Nkauj Paj Nruag :              LEEJ NTUJ PLIG NTSHIAB NQES LOS                      (NPN 104-2)

Txais: Huab Tais, thov koj xa Leej Ntuj Plig Ntshiab nqes los ua kom lub ntiaj teb rov tshiab tuaj.

1 – Kuv tus plig, koj cav lus zoo txog Huab Tais! Kuv tus Huab Tais Tswv Ntuj, koj loj tas nrho.

Koj hnav koob meej ci ntsa iab. Koj hnav qhov pom kev li lub tsho tshaj sab muaj hwj chim.

Koj nthuav lub ntuj zoo li ib chaws ntaub.

2 – Huab Tais, koj cov hauj lwm ntau tas nrho. Koj tsim tas txhua yam raws kev thoob tsib.

Koj tsim txhua yam tsiaj nyob puv ntiaj teb. Kuv tus plig, koj cav lus zoo txog Huab Tais!

3 – Txhua leej txhua tus tos koj yuav pub txhiam xws rau lawv raws caij nyoog. Koj pub rau lawv ces lawv cev tes txais.

Koj nthuav koj txhais tes ces lawv tau txais txhua yam zoo.

4 – Yog koj rho txoj pa ntawm leej twg mas lawv txoj sia tu, lawv rov mus ua av luaj.

Thaum koj xa koj lub tswv yim tuaj mas lawv rov tsheej xeeb muaj txoj sia.

Koj ua kom lub ntiaj teb rov tshiab tuaj.

ZAJ NYEEM OB         

1 KOS LIS NTHOS 12 : 3-13

LUB NTSIAB LUS : Leej Tswv Yim Ntshiab pab sawv daws kom nyias txawj ua nyias txoj hauj lwm nyob hauv lub Koom Txoos.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

3 – Vim li ntawd, kuv thiaj li hais rau nej tias :

Tswv Ntuj Leej Ntuj Plig tsis qhib ib tug qhov ncauj kom hais tias : ‘Muab Yes Xus rhuav pov tseg.’ Yog ib tug neeg tsis muaj Leej Ntuj Plig qhia nws, mas nws hais tsis tau tias : ‘Yes Xus yog Huab Tais.’

4 – Ntuj pub ntau yam txiaj ntsim, tiam sis yog tuaj ntawm Leej Ntuj Plig tib leeg tuaj xwb. 

5 – Muaj ntau txoj kab xwm, tab sis yog tuaj ntawm tib tug Huab Tais tuaj. 

6 – Muaj ntau txoj hauj lwm, tab sis yog tib tug Tswv Ntuj ua cov hauj lwm ntawd nyob hauv txhua leej tib neeg. 

7 – Ntuj pub Leej Ntuj Plig rau peb kom peb pab tau tsoom sid. 

8 – Ib txhia, Leej Ntuj Plig pub ib zaj lus thoob tsib rau lawv. Ib txhia, Leej Ntuj Plig pub ib zag txuj ci rau lawv. 

9 – Ib txhia, Leej Ntuj Plig pub kom lawv muaj ib lub siab ntseeg.  Ib txhia, Leej Ntuj Plig pub kom lawv txawj kho mob. 

10 – Ib txhia, Leej Ntuj Plig pub kom lawv txawj ua hwj huam yees ntxwv. Ib txhia, Leej Ntuj Plig pub kom lawv txawj ua Yaj Saub.

Ib txhia, Leej Ntuj Plig pub kom lawv txawj pom tias puas yog dab. Ib txhia, Leej Ntuj Plig pub kom lawv txawj hais ntau xeem lus.

Ib txhia, Leej Ntuj Plig pub kom lawv txawj txhais ntau xeem lus. 

11 – Tas ib puas tsav yam ntawd, yog Leej Ntuj Plig tib leeg ua, yog Leej Ntuj Plig tib leeg muab faib rau zeej tsoom sawv daws, raws li nws nyiam.

12 – Ib yam li neeg lub cev : neeg muaj tib lub cev xwb : tab sis muaj tes, muaj taw, muaj ntau yam :

txhua yam yog lub cev, txawm tias muaj ntau ces, los yeej yog tib lub cev xwb.  Nyob hauv Leej Pleev kuj zoo li ntawd. 

13 – Vim tias peb sawv daws tau txais lub Cim Ntxuav nyob hauv Leej Ntuj Plig tib leeg, thiab nyob hauv tib lub cev xwb. 

Tsis hais cov Yus Das los cov Hes Las, cov qhev los cov twj lij, peb sawv daws puav leej tau haus txaus siab ntawm Leej Ntuj Plig tib leeg. 

Yog Tswv Ntuj Lo Lus.         Nws lus txiaj ntsim

NTAWV MOO ZOO             

ZAM 20 : 19-23            

LUB NTSIAB LUS : Leej Tswv Yim Ntshiab yog tus tuaj tshoj neeg lub siab kom paub tias yam twg zoo, yam twg txhaum.

COV LUS NYOB HAUV ZAM NTAWV MOO ZOO.

19 – Tib hnub ntawd thaum tsaus ntuj, uas yog thawj hnub pib lub lis piam,  cov qhov rooj hauv qhov chaw cov thwj tim nyob kaw tas, vim lawv ntshai cov Yus Das.  Yes Xus los sawv hauv nruab nrab, nws hais rau lawv tias : « Nej nyob kaj lug. » 

20 – Thaum Yes Xus hais lo lus ntawd tas, nws muab nws ob txhais tes thiab nws phab tav rau lawv saib.  Cov thwj tim pom Huab Tais, lawv zoo siab kawg. 

21 – Yes Xus rov hais rau lawv tias : « Nej nyob kaj lug ! Kuv xa nej mus xws li Leej Txiv xa kuv tuaj. » 

22 – Yes Xus hais li tas, nws tshuab pa rau lawv, nws hais rau lawv tias : « Nej txais Leej Ntuj Plig Ntshiab. 

23 – Nej daws txhaum rau leej twg, mas nws cov txhaum yuav daws.  Nej tsis daws leej twg cov txhaum, mas nws cov txhaum yuav nyob. »

Huab Tais Pleev.      Lub qab ntuj neeg cav txog koj

Lub caij Hla / HNUB CHIV 7 / XYOO A

Par Cécile YANG

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Hnub nyoog Yes Xus mus saum ntuj.

ZAJ NYEEM IB           

HAUJ LWM 1 : 1-11

LUB NTSIAB LUS : Yes Xus rov mus nyob saum ntuj. Tab sis nws xa nws lub tswv yim los nyob hauv peb : yog Leej Ntuj Plig Ntshiab.

NTAWV PIAV COV HAUV PAUS XA LUS TEJ HAUJ LWM HAIS TIAS.

1 – Tes Os Fis Los, nyob hauv kuv thawj phau ntawv, kuv twb sau txog tas ib puas tsav yam uas Yes Xus tau ua thiab tau qhia txij lub hauv paus los,

2 – mus txog hnub uas Ntuj nqa nws mus saum ntuj.  Thaum nws yuav mus, Leej Ntuj Plig Ntshiab tshoj kom nws xub qhia cov Hauv Paus Xa Lus uas nws tau xaiv. 

3 – Thaum nws raug luag tsim txom tas, nws yees tawm los xyuas cov Hauv Paus Xa Lus. Nws ua ntau yam zeem tseeb tias nws muaj txoj sia, nws tawm los rau lawv pom plaub caug hnub, nws tham txog Tswv Ntuj lub Ceeb Tsheej rau lawv.

4 – Thaum Yes Xus nrog lawv nyob, nws hais rau lawv kom tsis txhob tawm hauv Yes Lus Xas Les mus, kom lawv nyob tos Leej Txiv lo lus cog tseg :

« Lo lus uas nej hnov kuv hais tias :

5 – Zam ua kab ke ntxuav nyob hauv dej.  Hos nej, mas tshuav hnub puav xwb, nej yuav txais kab ke ntxuav nyob hauv Leej Ntuj Plig Ntshiab. »

6 – Thaum cov Hauv Paus Xa Lus nyob ua ke, lawv nug Yes Xus tias : « Huab Tais, nyem no puas yog lub sij hawm koj yuav rov tsa tus vaj

His Xas Lais ? » 

7 – Yes Xus hais rau lawv tias : « Tsis yog nej hauj lwm yuav paub txog lub zim txwv thiab lub sij hawm uas

Leej Txiv siv nws lub hwj huam los teem cia.

8 – Tab sis, Leej Ntuj Plig Ntshiab yuav nqes los saum nej, ces nej yuav txais hwj huam, nej yuav ua kuv cov tim khawv nyob Yes Lus Xas Les, nyob thoob lub xeev Yus Das, thiab Xas Mas Lias, mus txog puag tim npoo ntiaj teb. »

9 – Yes Xus hais cov lus no tas, nws nce zuj zus ntawm lawv qhov muag. Muaj ib tw huab los thaiv ces lawv tsis pom nws lawm. 

10 – Thaum Yes Xus nce mus saum ub lawm, mas lawv nyob ntsia ntsoov lub ntuj, ces muaj ob tug neeg hnav tsoos dawb los cuag lawv. 

11 – Nkawd hais tias : « Cov Nkas Lis Lais, vim li cas nej nyob ntsia ntsoov lub ntuj zoo li no ?  Tus Yes Xus uas Ntuj nqa nws hauv nej mus rau saum ntuj lawd, nws yuav rov los zoo nkaus li nej pom nws nce mus saum ntuj thiab. »

Yog Tswv Ntuj lo lus. Nws lub Txiaj Ntsim

Nkauj Paj Nruag              TSWV NTUJ TSA NWS LUB THEEJ KIAB                 

Txais: Tswv Ntuj tsa nws lub theej kiab nyob hauv kev hom khaj, suab puab suab hom nrov nroo ntws cav txog Huab Tais.

1 – Tas ib tsoom haiv neeg, nej npuaj teg ntaug taw zoo siab cav txog Tswv Ntuj. Tus Huab Tais Nyob Siab yog tus muaj hwj chim tas nrho,

nws yog tus vaj kav lub ntuj lub teb.

2 – Tswv Ntuj tsa nws lub theej kiab nyob hauv kev hom khaj. Huab Tais nyob nruab nrab hauv cov suab hom.

Nej hu nkauj cav txog Tswv Ntuj! Nej hu nkauj rau peb tus vaj!

3 – Tus vaj kav tas ntiaj teb yog Tswv Ntuj, nej hu nkauj cav txog nws. Tswv Ntuj zaum saum lub theej kiab ntshiab ua vaj kav txhua haiv neeg.

ZAJ NYEEM OB      

 ES FES XOS 1 : 17-23

LUB NTSIAB LUS : Peb pom Tswv Ntuj lub zog, vim nws tsa Yes Xus sawv rov los, thiab tsa Yes Xus ua tus loj tshaj tas puas tsav yam nyob saum ntuj.

COV LUS PAJ LUG SAU TUAJ RAU COV NTSEEG NYOB ES FES XOS.

17 – Kuv thov kom peb tus Huab Tais Yes Xus Pleev tus Tswv Ntuj, Leej Txiv muaj koob meej, pub ib lub tswv yim thoob tsib,

thiab ib lub tswv yim txawj mem tau tej yam uas Ntuj qhib tawm los, nej thiaj yuav paub Tswv Ntuj tiag. 

18 – Kuv thov Tswv Ntuj tso qhov pom kev ci tuaj rau hauv nej lub siab, kom nej pom tias txoj kev tso siab uas Ntuj hu nej los nyob hauv, zoo npaum li cas, kom nej pom tias lub cuab tam nto koob meej nplua nuj npaum li cas nyob hauv cov ntshiab. 

19 – Nej tseem yuav pom Tswv Ntuj lub hwj huam uas peb ntsuas tsis tau. Nej thiaj yuav pom tias lub hwj huam no pab peb cov ntseeg heev npaum li cas, vim nws lub zog muaj peev xwm loj. 

20 – Tswv Ntuj nthuav nws lub zog nyob hauv Leej Pleev :  nws tsa Leej Pleev sawv hauv cov tuag los,

nws kom Leej Pleev zaum ntawm nws sab xis, nyob saum cov txheej ntuj, 

21 – nyob siab dua cov Tshiab ua vaj, siab dua cov Tshiab muaj hwj huam, siab dua cov Tshiab muaj zog, siab dua cov Tshiab ua huab tais, siab dua txhua leej nto npe,

hauv lub zim txwv no mus dhau txhiab tiam yav tom ntej. 

22 – Twv Ntuj tso tas puas tsav yam rau hauv Leej Pleev qab xib taws.  Tswv Ntuj tsa Leej Pleev ua lub Koom Txoos tus Hau siab dua txhua leej :

23 – lub Koom Txoos yog nws lub Cev.  Leej Pleev lub Cev Hlob Tiav, nws nyob puv hauv txhua leej txhua tus, nws nyob puv lub sim ceeb.  

Yog Tswv Ntuj lo lus. Nws lub Txiaj Ntsim

 NTAWV MOO ZOO            

MAS TAIS 28 : 16-20           

LUB NTSIAB LUS : Yes Xus rov mus lawm saum ntuj, nws hais nws cov lus kawg rau cov thwj tim thiab rau peb tsoom ntseeg.

COV LUS NYOB HAUV MAS TAIS NTAWV MOO ZOO.

16 – Pab Kaum Ib leeg mus txog Nkas Lis Lais teb. Lawv mus saum lub roob uas Yes Xus teem rau lawv. 

17- Lawv pom Yes Xus, lawv pe ; ib txhia tseem ua xyem xyav. 

18 – Yes Xus txav los ze lawv, nws hais cov lus no rau lawv :

« Ntuj pub ib puas tsav yam hwj huam rau kuv nyob saum ntuj thiab nyob ntiaj teb  no. 

19 – Nej mus, nej ua kom tas ib tsoom haiv neeg los ua kuv thwj tim.  

Nej hu txog Leej Txiv, Leej Tub thiab Leej Ntuj Plig Ntshiab lub npe, nej ntxuav lawv.  

20 – Nej qhia kom lawv coj tas puas tsav yam uas kuv qhia rau nej. 

Hos kuv, mas kuv niaj hnub nrog nej nyob mus txog lub zim txwv ntiaj teb kawg. 

Huab Tais Pleev .  Lub qab ntuj neeg cav txog koj.

Lub Caij Hla          Hnub Chiv 6      Xyoo A

Par Cécile YANG

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB       

HAUJ LWM 6 : 1-7

LUB NTSIAB LUS : Lub zos twg los lub tsheej twg muaj ib pab neeg ntseeg lawv yuav sib pab ua ob yam hauj lwm. Yam li hauj lwm tshaj Ntuj Lus, thiab hauj lwm tsob hwb tsoom txheeb ze.

COV LUS NYOB HAUV NTAWV HAUJ LWM.

1 – Lub caij ntawd, cov thwj tim huam vam coob zuj zus. Ces cov Hes Las yws yws cov Hes Nplaws. 

Lawv hais tias niaj hnub thaum faib mov mas tsis muaj neeg nco txog cov poj ntsuam Hes Las. 

2 – Pab Kaum Ob hu cov thwj tim tuaj sab laj, lawv hais tias :

« Tsis phim peb yuav tso Tswv Ntuj lo lus tseg, mus saib cov rooj noj mov. 

3 – Kwv tij, nej  nrhiav nyob hauv nej, xya leej txiv neej nto moo zoo, uas yog neeg thoob tsib,

thiab muaj Leej Ntuj Plig nyob puv hauv lawv.  Peb yuav tsa lawv tuav txoj hauj lwm ntawd. 

4 – Hos peb, mas peb yuav muab siab hlo npuab txoj kev teev ntuj thiab tsob hwb Lo Lus.”

5 – Cov lus no haum lub txoos siab, ces lawv xaiv Tes Fas Nos, uas nws yog ib tug neeg ntseeg ruaj, thiab muaj Leej Ntuj Plig Ntshiab nyob puv hauv nws. Fis Lis Pos, Plos Kos Los, Nis Kas Nos, Tis Moos, Pas Mes Nas thiab Nis Kos Las uas yog ib tug neeg ntseeg nyob As Nthias Kias tuaj. 

6 – Lawv coj cov neeg no los rau cov Hauv Paus Xa Lus.  Cov Hauv Paus Xa Lus thov ntuj tas, ces lawv tsa tes rau saum xya leej ntawd.

7 – Huab Tais lo lus hlob zuj zus.  Cov thwj tim huam vam coob kawg nyob Yes Lus Xas Les. 

Muaj ib co leej choj coob kawg los mloog txoj kev ntseeg.

    Yog Tswv Ntuj Lo Lus.         Nws lus txiaj ntsim

Nkauj Paj Nruag: PEB TSO SIAB RAU HUAB TAIS                       (NPN 33-2)

Txais: Huab Tais, thov koj khuv leej peb mas! Peb tso siab rau koj.

1 – Cov neeg siab ncaj, nej hu nkauj ntsuag qees cav txog Huab Tais. Nej cov lus cav ntxim Tswv Ntuj siab.

Nej ntaus nkauj nog ncas ua Huab Tais tsaug cav txog nws.

2 – Huab Tais lo lus yog lus ncaj, nws cov dej num nyob ruaj nreb. Nws nyiam kev ncaj thiab kev haum pheej.

Huab Tais txoj kev hlub ntws puv lub ntiaj teb.

3 – Huab Tais zov cov neeg hwm nws. Nws zov cov neeg tso siab rau nws lub siab zoo.

Nws npo lawv dim ntawm kev tuag. Nws txuag lawv txoj sia thaum lub teb chaws raug kev tshaib kev nqhis

ZAJ NYEEM OB          

1 POB ZEB 2 : 4-9

LUB NTSIAB LUS : Yes Xus yog lub pob zeb txheem lub Koom Txoos, yog tus nres cov neeg ntseeg.

Peb yuav ib rau Yes Xus, peb thiaj yog Tswv Ntuj haiv neeg ntshiab.

COV LUS NYOB HAUV POB ZEB THAWJ TSAB NTAWV.

4 – Nej kav tsij txav los ze Huab Tais mog, nws yog lub pob zeb muaj txoj sia,

uas zeej tsoom muab pov tseg, tab sis Tswv Ntuj xaiv nws, thiab saib nws muaj nqi kawg. 

5 – Nej kuj zoo li ib co pob zeb muaj sia, nej yeej meem rov sib txhim ua ib lub Tuam Tsev

muaj sia cia rau txoj kev ua Leej Choj ntshiab, nej yuav cev ib co txim muaj txoj sia rau Ntuj,

kom xis Tswv Ntuj lub siab, nyob hauv Yes Xus Pleev. 

6 – Vim muaj lo lus no nyob Ntawv Ntshiab :  “Nej ntsia ! kuv txawb lub pob zeb muaj nqis, uas kuv xaiv rau pem Xis Yoos,

yog lub pob zeb txheem tsev : leej twg tso siab rau lub pob zeb ntawd, mas nws yuav tsis poob ntsej muag.” 

7 – Vim li ntawd, nej cov ntseeg yuav muaj koob meej.  Hos cov tsis ntseeg, mas lub pob zeb uas yog lub txheem tsev 

8 – yuav ua chaw dawm lawv ko taw kom lawv ntog, vim cov txhim tsev muab lub pob zeb ntawd xyeeb pov tseg. 

Lawv dawm lub pob zeb, vim lawv tsis ntseeg txog Lo Lus.  Lawv raug txoj hmoov ntawd. 

9 – Tab sis nej yog tsav neeg Ntuj xaiv, yog tsoom Leej Choj ua vaj, yog haiv neeg ntshiab, yog tsoom pej xeem Ntuj txhiv,

kom nej tau tshaj lus txog tus hu nej ntawm qhov tsaus ntuj los nyob hauv nws qhov pom kev zoo saib. 

    Yog Tswv Ntuj Lo Lus.         Nws lus txiaj ntsim

NTAWV MOO ZOO        

ZAM 14 : 1-12

LUB NTSIAB LUS : Cov neeg ntseeg tsis pom Tswv Ntuj, lawv ua xyem xyav. Ces lawv vam txog Yes Xus, uas yog Tswv Ntuj tuaj nrog peb nyob. Peb lub zog nyob hauv txoj kev ntseeg txog Yes Xus.

COV LUS NYOB HAUV ZAM NTAWV MOO ZOO.

1 – Nej tsis txhob ntxhov siab mog. Nej ntseeg txog Tswv Ntuj, nej ntseeg txog kuv thiab mog. 

2 – Nyob hauv kuv Txiv tsev, muaj ntau chav. Yog tsis muaj, mas kuv yuav tsis hais rau nej tias kuv mus npaj ib qho chaw rau nej. 

3 – Thaum kuv mus npaj tau ib qho chaw rau nej lawm, kuv yuav rov los coj nej mus nyob ze kuv, kom xwv kuv nyob qhov twg,

nej nrog kuv nyob qhov ntawd. 

4 – Nej paub txoj kev mus txog qhov chaw kuv yuav mus.

5 – Tos Mas hais rau Yes Xus tias : « Huab Tais, peb tsis paub koj yuav mus qhov twg.  Peb yuav ua cas paub txoj kev ? » 

6 – Yes Xus hais rau Tos Mas tias : « Kuv yog Txoj Kev, yog Qhov Tseeb, thiab yog Txoj Sia. 

Tsis muaj leej twg mus cuag Leej Txiv tau, yog nws tsis los ntawm kuv. 

7 – Yog nej paub kuv, mas nej kuj paub kuv Txiv thiab.  Nyem no, nej twb paub nws thiab twb pom nws lawm. » 

8 – Fis Lis Pos hais rau Yes Xus tias : « Huab Tais, koj pub peb pom Leej Txiv, mas peb thiaj txaus siab. » 

9 – Yes Xus hais rau Fis Lis Pos tias : « Fis Lis Pos, kuv nrog nej nyob ntev npaum no, koj tseem tsis paub kuv thiab lod ? 

Tus twg pom kuv, mas nws pom Leej Txiv. Ua cas koj thiaj hais tau tias : ‘Koj pub peb pom Leej Txiv’ ? 

10 – Koj tsis ntseeg tias kuv nyob hauv Leej Txiv, thiab Leej Txiv nyob hauv kuv lod ?  Cov lus uas kuv hais rau nej, tsis yog kuv hais kuv ;

yog Leej Txiv uas nyob txawm hauv kuv nws ua nws cov hauj lwm. 

11 – Nej ntseeg kuv mog : kuv nyob hauv Leej Txiv, thiab Leej Txiv nyob hauv kuv.  Txawm li cas, los nej yuav tsum ntseeg, vim kuv cov hauj lwm.

12 – « Kuv hais qhov muaj tseeb tiag rau nej : Tus ntseeg txog kuv, nws kuj yuav ua cov hauj lwm kuv ua. 

Nws tseem yuav ua tej yam loj dua, vim kuv mus cuag Leej Txiv.”

Huab Tais Pleev.      Lub qab ntuj neeg cav txog koj

Tshaj moo qaij qaug nyob Rhône-Alpes

Par Cécile YANG

HAWJ Tswj Zoo

Tshaj tawm rau peb ib tsoom ntseeg sawv daws paub tias HAWJ Tswj Zoo ( HEU François) yug hnub tim 15 / 01 / 1954 Roob Loos Khais Nplog teb, tau tas sim neej rau hnub tim 06 / 05 /2023. Nws muaj li 69 xyoo. 

Tsev xyom cuab yuav npaj nws lub pag lub xau rau lub week-end 13 / 05 / 2023 rau 15 / 05 / 2023 tuaj no: 

Salle associative La Chaintre

71440 Lessard en Bresse

Samedi 13 Mai 2023

14H00 : Tos txais tus qauv

19H30 : Pib kab ke xa plig

Dimanche 14 Mai 2023

10:00 : Caij teev ntuj

19H30 : Teev saw Mab Liab

Lundi 15 Mai 2023

14H30 : Teev ntuj hauv tsev teev ntuj l’Assomption de Lessard en Bresse rau tus qauv

Peb ib tsoom ntseeg pab thov ntuj rau tsev xyom cuab thiab rau HAWJ Tswj Zoo tus ntsuj plig.

Lub caij COVID-19 no, nws tsev neeg yuav npaj cov ntaub npog ntsej muag thiab cov tshuaj ntxuav tes rau cov neeg yuav tuaj nrog lawv hlub lawv Txiv.