Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem ib

MAS TAIS 21 1-11

1 – Thaum Yes Xus lawv tuaj yuav txog Yes Lus Xas Les, thiab twb
tuaj txog Npes Fas Zes ntawm lub roob txiv ntoo roj lawm, Yes Xus xa ob tug
thwj tim mus ua ntej.

2 – Nws hais rau nkawd tias :
“Neb mus hauv lub zos nyob tom neb hauv ntej, neb yuav pom ib tug maum luj

khi nrog nws tus me nyuam. Neb daws tus maum luj, neb cab ob niam tub luj los
rau kuv.

3 – Yog muaj neeg hais dab tsi rau neb, ces neb hais rau lawv tias :
“Huab Tais yuav siv. Ib me ntsis, nws yuav xa rov los.”
4 – Qhov ntawd tshwm sim tuaj raws li tus yaj saub xub hais tseg tias :
5 – Nej hais rau tus ntxhais Xis Yoos tias :
Saib, koj tus vaj tuaj cuag koj. Nws siab zoo. Nws zaum saum ib tug luj,
nws caij ib tug me nyuam luj, yog tus luj thauj nra tus me nyuam.
6 – Ob tug thwj tim mus ua raws li Yes Xus tau hais.

7 – Nkawd cab ob niam tub luj los. Nkawd muab nkawd ob lub tsho
tshaj sab pua luj nrob qaum, ces Yes Xus zaum saud.

8 – Muaj neeg coob coob hle lawv tej tsho tshaj sab los pua kev. Tseem
muaj lwm cov txiav ceg ntoo los pua kev thiab.

9 – Tas tsoom neeg uas mus ua Yes Xus ntej thiab lawv Yes Xus qab qw tias :
« Das Vis Leej Tub, thov koj cawm peb. Tus uas Huab Tais xa tuaj, nto koob
meej ! Tus nyob saum cov txheej ntuj siab, thov koj cawm peb !”
10 – Thaum Yes Xus los hauv Yes Lus Xas Les, mas tas lub nroog ua nphoo
ntxoj nphoo ntxuas. Lawv hais tias : “Yog leej twg ?”
11 – Tas tsoom sid hais tias : “Yog tus Yaj Saub Yes Xus, uas tuaj
ntawm Nas Xas Les, xeev Nkas Lis Lais tuaj.”

Yog Tswv Ntuj lo lus. Nws lub Txiaj Ntsim

Nkauj Paj Nruag 21

8 – Muaj tseeb ! Tus vaj tso siab rau HUAB TAIS,
tus Nyob Siab hlub tus vaj, Nws txuag tus vaj kom txhob ntog.
9 – Koj txhais tes yuav nrhiav tau cov ntxub koj tas huv tib si,
koj sab xis yuav nrhiav tau koj cov yeeb ncuab.

17 – Vim tias ib pab dev coob sawv ncig kuv;
ib pab neeg phem puav kuv kev: lawv nkaug kuv tej tes taw.
18 – Kuv suav tau kuv cov pob txha tas tib si.

19 – Lawv muab kuv cov khaub ncaws los sis faib,
lawv twv saib leej twg yuav tau kuv cov ris tsho.
20 – Hos koj, HUAB TAIS, thov koj txhob txav mus deb kuv !
Koj yog kuv lub zog, koj pab kuv mas! Tsuag tsuag tuaj pab.

22 – cawm kuv lub neej txom nyem ntawm twm hauv kub

24 – Nej cov uas hwm HUAB TAIS, nej cav lus zoo txog nws mog !

Zaj nyeem ob

FIS LIS POS 2 : 6-11

LUB NTSIAB LUS :  Yuav sib haum xeeb, thiab yuav nyiam ua tus me.

COV LUS PAJ LUG SAU TUAJ RAU COV NTSEEG NYOB FIS LIS POS.

6 – Yes Xus Pleev yog Tswv Ntuj,

      tiam sis nws tsis cia nws lub hwj chim Tswv Ntuj rau luag hawm : 

      nws muab nws lub hwj chim hle. 

7 – Nws yeem ua ib tug qhev, 

     nws yug los ua neeg xws li ib tsoom neeg. 

Luag pom nws tus yam ntxwv yog yam ntxwv tib neeg. 

8 – Nws txo nws qis : nws tuaj yeem mloog Ntuj lus mus txog qhov tuag,

thiab tseem xaiv txoj kev tuag saum ntoo cuam. 

9 – Vim li ntawd, mas Tswv Ntuj thiaj tsa Yes Xus ua ib tug loj nyob siab siab.  

    Tswv Ntuj muab lub npe uas nyob siab dua lwm cov npe rau nws. 

10 – Li ntawd, tus twg hnov tuav txog Yes Xus lub npe, 

tsis hais nyob saum cov txheej ntuj, los nyob ntiaj teb no, los nyob nruab yeeb,

mas tus ntawd cia li txhos caug hawm. 

11 – Txhua xeem lus yuav tsum cav tias Yes Xus Pleev yog Huab Tais :

Leej Txiv Tswv Ntuj thiaj muaj koob meej nto moo lug.

Yog Tswv Ntuj lo lus. Nws lub Txiaj Ntsim

Ntawv moo zoo

MAS TAIS 27 (11-54)

LUB NTSIAB LUS :  Yes Xus raug kev txom nyem raws li Mas Tais ntawv Moo Zoo

YES XUS KEV TXOM NYEM, RAWS MAS TAIS.

Nyob hauv pab kaum ob tug hauv paus xa lus, muaj ib tug nws hu ua Yus Das Kas Lis Yaus,

nws mus cuag cov thawj Leej Choj, nws hais rau lawv tias : Nej muab dab tsi rau kuv, ces kuv yuav muab Yes Xus rau nej ntes ?

Cov thawj Leej Choj muab peb caug lub txiaj nyiag rau nws. Txij ntawd mus, nws nrhiav ib lub sij hawm zoo muab Yes Xus rau lawv ntes.

Thaum hnub uas lawv noj cov mov tsis muaj poov xab, cov thwj tim tuaj hais rau Yes Xus tias :

Koj xav kom peb npaj noj Pluas Hla nyob qhov twg ? Yes Xus teb tias :

Nej mus tom tsheej hauv ib tug neeg tsev, nej hais rau nws tias :

Xib Hwb tso xov tuaj rau koj tias : Kuv lub caij txog ze lawm.

Kuv yuav nrog kuv cov thwj tim ua Hmoov Hla nyob hauv koj tsev.

Cov thwj tim ua raws li Yes Xus qhia rau lawv, lawv npaj ua Hmoov Hla.

Tsaus ntuj los, Yes Xus nrog pab kaum ob leeg nyob ntawm rooj mov, Yes Xus hais rau lawv tias :

Muaj ib tug nyob hauv nej, nws yuav muab kuv rau lawv ntes.

Cov thwj tim tu siab nrho, lawv nyias nug nyias zom zaws tias :

Huab Tais, puas yog kuv ? Yes Xus teb tias :

Tus uas nws tau nrog kuv cev tes rau hauv lub phaj, mas yog tus ntawd yuav muab kuv rau luag ntes.

Leej Neeg tus Tub yuav mus, raws li Ntawv xub hais tseg txog nws. Tab sis, tus muab Leej Neeg tus Tub rau luag ntes,

mas nws raug txoj hmoov phem ! Tus neeg ntawd tsis txhob yug los mas zoo dua.

Yus Das uas nws yuav muab Yes Xus rau luag ntes, nws kuj nug Yes Kus tias : Las Npis, puas yog kuv ? »

Yes Xus teb tias : Koj twb hais lawm !

Thaum lawv noj mov txog tog, Yes Xus tuav ib co mov mog, nws hais zaj foom hmoov zoo, nws muab lov,

nws muab faib rau nws cov thwj tim, nws hais tias : Nej txais, nej noj ! Qhov no yog kuv lub cev.

Yes Xus tuav lub ntim, nws ua tsaug, nws muab rau nws cov thwj tim, nws hais tias :

Nej saw daws haus, vim qhov no yog kuv cov ntshav. Yog cov ntshav cog lus uas yuav ntws los,

kom tau daws ib tsoon neeg cov txhaum. Kuv hais rau nej tias txij no mus kuv yuav tsis haus txiv cawv cov kua no ntxiv

mus txog hnub uas kuv yuav nrog nej haus cov cawv tshiab nyob hauv kuv Txiv lub Ceeb Tsheej.

Thaum lawv hu cov zaj nkauj ntxuag qeej tas lawm, lawv sawv kev mus pem lub roob txiv ntoo roj.

Ces Yes Xus hais rau lawv tias : Hmo no, nej sawv daws yuav ntog, yog vim kuv.

Vim Ntawv sau tseg tias : Kuv yuav ntaus tus zov yaj, ces pab yaj yuav tawg tas.

Tab sis thaum kuv sawv rov los, kuv yuav ua nej ntej mus Nkas Lis Lais teb.

Pob Zeb teb tias : Tab yog lawv sawv daws ntog vim koj,

mas kuv yuav tsis ntog ib zaug li !  Yes Xus hais rau nws tias :

Kuv hais tiag rau koj : Kiag hmo no ntag, thaum qaib tseem tsis tau qua, koj twb yuav tsis kam zeem kuv peb zaug diam !

Pob Zeb hais rau Yes Xus tias : Tab yog kuv yuav tsum nrog koj tuag mas kuv yuav zeem koj xwb !

Cov thwj tim tas tib si kuj hais ib yam. Ces Yes Xus nrog lawv tuaj txog ib thaj chaw hu ua Nkes Txes Mas Nis.

Nws hais rau cov thwj tim tias : Nej nyob ntawm no kuv yuav mus teev Ntuj nyob tod.

Yes Xus coj Pob Zeb thiab Ntxes Npes Dais ob tug tub nrog nws mus.

Yes Xus pib ntxhov siab, nws tu siab nrho. Nws hais rau cov thwj tim tias :

Kuv tu siab yuav tuag. Nej nyob ntawm no, nej nrog kuv zov hmo.

Yes Xus mus deb me ntsis, nws khoov ti av, nws thov Ntuj tias : Kuv Txiv ! Lub ntim no hla mus deb ntawm kuv puas tau ?

Tiam sis txhob ua li kuv nyiam. Koj ua li koj nyiam.

Yes Xus rov los ntawm nws cov thwj tim, nws pom lawv tsaug zog. Nws hais rau Pob Zeb tias :

Li ntawd, nej tsis muaj peev xwm nrog kuv zov hmo ib teev thiab lod? Nej zov hmo mas ! Nej thov Ntuj kom nej tsis txhob poob hauv txoj kev ntxias. Neeg lub siab kub, tiam sis neeg lub cev tsis muaj zog.

Ces Yes Xus rov mus thov Ntuj ib zaug ntxiv. Nws hais tias : Kuv Txiv ! Lub ntim hla ntawm no, yog kuv yuav tsum haus,

mas koj ua raws li koj lub siab. Yes Xus rov qab los. Nws pom cov thwj tim rov tsaug zaug, vim lawv qhov muag tawv.

Nws tso lawv tseg, nws rov qab mus teev Ntuj, yog zaum peb. Nws rov qab hais ib co lus zoo li puag ta.

Ces nws rov qab los ntawm nws cov thwj tim dua. Yes Xus hais rau lawv tias :

Zaum no, nej xav tsaug zog xav so kuj tau. Txog lub caij uas Leej Neeg tus Tub yuav poob hauv cov neeg txhaum txhais tes.

Nej saviv mas ! Tus yuav muab kuv rau luag ntes tuaj txog ze lawm.

Thaum Yes Xus tseem tab tom hais zoo li ntawd, Yus Das tuaj txog. Yus Das yog ib tug nyob hauv pab kaum ob leeg.

Muaj ib pab neeg coob tuav ntaj tuav qws nrog Yus Das tuaj. Yog cov thawj Leej Choj thiab tsoom txwj laug tso lawv tuaj.

Yus Das, tus ntxeev siab, nws tau xub hais rau lawv tias : Kuv nwj tus twg mas Yes Xus yog tus ntawd. Nej ntes nws.

Tam sim ntawd Yus Das los ze ntawm Yes Xus, hais Yes Xus tias : Las Npis, koj puas nyob zoo ?

Ces Yus Das nwj Yes Xus. Yes Xus hais rau nws tias : Npawg, koj tuaj ua dab tsi, mas koj ua zoj mas !

Pab neeg ntawd los tuav nkaus Yes Xus, muab Yes Xus ntes. Cov nrog Yes Xus, muaj ib tug nqa ib rab ntaj,

nws rho hlo rab ntaj tib ntag rau tus Tuam Leej Choj tus qhev. Nws txiav raug tus qhev ib sab pob ntseg.

Yes Xus hais rau tus thwj tim ntawd tias : Koj ntxig ntaj rau hauv hnab.

Tus muab ntaj los tua luag, nws yuav this rab ntaj tuag. Koj tsis paub tias yog kuv xav hu txog kuv Txiv tuaj pab

mas tam sim no nws yuav tso tshaj kaum ob vam tus Tshiab tuaj pab. Tiam sis yog kuv ua li ntawd

mas yuav tsis muaj raws li Ntawv xub hais tseg tias tej xwm no yuav tsum tshwm sim.

Yes Xus hais rau pab neeg nyob ntawd tias : Nej tuav ntaj tuav qws tuaj ntes kuv xws li ib tug tub sab.

Kuv niaj hnub nyob nruab nrab nej nyob hauv lub Tuam Tsev Teev Ntuj. Ua cas thaum ntawd nej tsis ntes kuv ?

Tej xwm ntawd tshwm sim tuaj kom tau muaj raws li cov Yaj Saub tej Ntawv.

Ces cov thwj tim saww daws tso Yes Xus tseg, lawv khiav. Pab neeg ntes Yes Xus,

lawv coj Yes Xus mus txog tus Tuam Leej Choj Kais Fas lub tsev.

Cov Thoob Xwm Ntawv thiab cov Txwj Laug tuaj sib sau nyob ntawd. Pob Zeb lawv Yes Xus qab nrug deb me ntsis

mus txog ntawm tus Tuam Leej Choj lub loog, nws nkag mus hauv thiab nws nrog cov qhev zaum.

Pob Zeb xav pom saib qhov kawg zoo li cas. Tas cov Thawj Leej Choj thiab cov Nom Txiav Txim

lawv nrhiav ib zag liam rau Yes Xus kom tau kev muab Yes Xus tua.

Muaj ntau tus tim khawv tuaj, tab sis lawv nrhiav tsis tau ib yam liam rau Yes Xus.

Nyob nyob, muaj ob tug tuaj hais tias : Tus ntawd nws tau hais tias :

Kuv yuav rhuav Tswv Ntuj lub Tuam Tsev kuj tau, thiab kuv ua peb hnub mas rov qab txhim tau.

Tus Tuam Leej Choj sawv, nws hais raus Yes Xus tias : Koj tsis teb dab tsi ! Cov tim khawv ntawd hais dab tsi txog koj ?

Yes Xus ua twj ywm. Tus Tuam Leej Choj hais rau nws tias : Kuv tuav txog tus Tswv Ntuj muaj toj sia :

koj qhia peb saib, koj puas yog Leej Pleev ? Koj puas yog Tswv Ntuj tus Tub ?

Yes Xus teb rau nws tias : Yog zoo li koj hais. Thiab kuv hais qhia nej tias txij no mus, nej yuav pom Leej Neeg tus Tub

zaum ze ntawm tus muaj hwj huam, thiab tuaj nyob saum cov huab nyob saum ntuj.

Tus Tuam Leej Choj dua nws lub tsho, nws hais tias : Nws thuam Ntuj ! Tsis tas yuav nrhiav tim khawv ntxiv !

Nej nyuam qhuav hnov nws cov lus thuam Ntuj. Nej xav li cas ? Lawv teb tias : Nws tsim nyog tuag !

Ces lawv nto aub ncaug rau saum Yes Xus ntsej muag, lawv tib ncuav pias rau nws.

Muaj ib txhia lawv ntaus nws thiab hais rau nws tias : Tus Pleev, koj ua Yaj Saub, koj qhia peb saib: Tus ntaus koj yog leej twg ?

Thaum ntawd, Pob Zeb zaum nyob nraum zoov, nyob hauv lub loog. Muaj ib tug ntxhais txib los hais rau Pob Zeb tias :

Koj kuj tau nrog tus Nkas Lis Lais Yes Xus ntawd nyob ! Tiam sis Pob Zeb tsis lees. Nws hais rau sawv laws hnov tias :

Kuv tsis paub koj xav hais dab tsi. Pob Zeb tawm mus txog ntawm lub rooj loog.

Tseem muaj ib tug pom Pob Zeb. Nws hais rau cov neeg nyob ntawd tias : Tus ntawd yog ib tug nrog Yes Xus Nas Xas Les ntag !

Pob Zeb twv ntuj twv teb tias : Kuv tsis paub tus neeg ntawd ! Ib me ntsis, cov neeg nyob ntawd txav los ze Pob Zeb. Lawv hais tias :

Koj yog ib tug neeg nrog Yes Xus tiag ! Koj twb hais lus txawv ! Koj npog tsis tau.

Pob Zeb twv ntuj twv teb tias : Kuv tsis paub tus neeg ntawd tiag ! Tam sim ntawd qaib qua.

Pob Zeb rov nco dheev txog cov lus uas Yes Xus xub hais rau nws tias : Thaum qaib tseem tsis tau qua mas koj twb tsis zeem kuv peb zaug.

Ces Pob Zeb tawm mus nraum zoov. Nws tu siab, nws quaj. Thaum kaj ntug lawm,

cov Thawj Leej Choj cov Txwj Laus sab laj kom muab Yes Xus tua. Lawv muab Yes Xus khi.

Lawv cab Yes Xus mus rau tus nom tswj teb chaws hu ua Pis Las Tos. Thaum ntawd, Yus Das uas yog tus muab Yes Xus rau lawv ntes,

nws pom Yes Xus yuav raug txim mas nws rov khuv xim. Nws xa peb caug lub txiaj rov mus rau cov Thawj Leej Choj

thiab rau cov Txwj Laug. Yus Das hais tias : Kuv ua txhaum. Kuv muab ib co roj ntsha tsis phim raug txim rau nej ntes.

Lawv teb tias : Xij ! Tsis dua ntawm peb.

Yus Das muab nws cov nyiaj pov seg rau hauv chav tsev ntshiab. Nws tawm mus dai tuag. Cov Thawj Leej Choj khaws cov nyiaj, lawv hais tias :

Cov nyiaj ntawd yog nqe ntshav. Kev cai tsis kheev muab los rau hauv lub txhab nyiaj. Lawv tuav xam. Lawv muab cov nyiaj ntawd

los muas tus puab lauj kaub daim teb los ua toj ntxas rau pej kum neeg. Daim teb ntawd thiaj hu ua “daim teb ntshav” los txog tav no.

Lawv coj Yes Xus tuaj rau tus nom tswj teb chaws. Tus tswj teb chaws nug Yes Xus tias :

Koj yog cov Yus Das tus Vaj, puas yog ? Yes Xus teb tias : Yog koj hais li.

Thaum cov Thawj Leej Choj thiab cov Txwj Laug lawv liam rau Yes Xus ntawm tus tswj teb chaws,

mas Yes Xus tsis teb ib lo lus. Pis Las Tos hais rau Yes Xus tias : Koj tsis hnov tas txhia yam lawv liam txog koj lod ?

Yes Xus tsis teb dab tsi li. Mas Pis Las Tos xav tsis thoob. Kev cai, niaj xyoo, thaum txog lub hnub nyoog ua Hmoov,

tus nom tswj teb chaws tso ib tug neeg raug txim mus. Tsoom pej xeem nyiam tso leej twg mas nws tso leej twg.

Thaum ntawd, muaj ib tug neeg raug txim nto moo hu ua Npas Las Npas. Pis Las Tos hais rau cov neeg tuaj sib sau nyob ntawd tias:

Nej xav kom kuv tso leej twg ? Tso Npas Las Npas ? Los tso Yes Xus uas lawv hu nws ua tus Pleev ?

Pis Las Tos twb paub tias tos lawv ntes Yes Xus tuaj yog vim lawv khib rau Yes Xus.

Thaum Pis Las Tos tseem zaum hauv lub tsev txiav txim, nws poj niam xa lus tuaj rau nws tias :

Koj tsis txhob nrog lawv hais tus neeg siab ncaj ntawd rooj plaub. Hnub no, kuv ua npau suav pom nws. Ntxhov kuv siab kawg !

Tiam sis cov Thawj Leej Choj thiab cov Txwj Laug lawv cob sawv davvs kom saww daws qw tias tso Npas Las Npas mus,

hos muab Yes Xus tua. Tus tswj teb chaws rov nug sawv daws tias : Ob tug ntawd, nej xav kom kuv tso leej twg rau nej ?

Lawv teb tias : Tso Npas Las Npas !

Pis Las Tos hais rau law tias : Ua li Yes Xus, uas lawv hu nws ua tus Pleev,

kuv yuav ua dab tsi rau nws ? Lawv teb tias : Muab nws tua nyob saum ntoo cuam !

Pis Las Tos nug law v tias : Nws ua dab tsi phem ?

Tiam sis lawv pheej qw nrov dua tias : Muab nws tua nyob saum ntoo cuam !

Pis Las Tos pom tias nws ua tsis tau dab tsi. Sawv daws pheej ua ntxhov quav niab.

Pis Las Tos muab dej los ntxuav nws tes rau tsoom sid pom, nws hais tias : Kuv tsis kam ris cov ntshav ntawd. Nyob txij ntawm nej !

Tas tsoom pej xeem teb tias : Cia nws cov ntshav nyob saum peb, thiab nyob saum peb cov me nyuam !

Pis Las Tos tso Npas Las Npas rau lawv. Nws kom cov tub rog muab Yes Xus nplawm.

Nws tso Yes Xus rau lawv coj mus tua nyob saum ntoo cuam.

Tus tswj teb chaws cov tub rog muab Yes Xus cab los hauv tsev txiav txim. Lawv kom pab tub rog hiam Yes Xus.

Lawv muab Yes Xus ris tsho hle, muab ib lub tsho liab rau Yes Xus hnav. Lawv muab ib co pos los ua ib lub kauj tso rau saum Yes Xus taub hau.

Lawv muab ib tug pas txhiav rau Yes Xus txhais tes xis tuav. Cov tub rog los kim caug ntawm Yes Xus xub ntiag, lawv luag Yes Xus tias :

Vaj Yus Das, peb hawm koj ! Lawv nto aub ncaug rau Yes Xus.

Lawv muab tus pas txhiav los ntaus Yes Xus taub hau. Thaum lawv luag Yes Xus tas, lawv rov muab lub tsho liab hle.

Lawv muab Yes Xus cov ris tsho rov rau Yes Xus hnav. Ces law cab Yes Xus mus tua nyob saum ntoo cuam.

Thaum lawv tawm nraud, lawv ntsib ib tug neeg nyob Xis Les Nas teb tuaj. Tus neeg ntawd hu ua Xis Moos.

Lawv kom nws kwv Yes Xus tus ntoo cuam. Lawv mus txog ntawm qhov chaw hu ua Nkos Nkos Tas, txhais hu ua Khauj Khaum Taub Hau.

Lawv muab ib co cawv xyaw tsib rau Yes Xus haus. Yes Xus saj me ntsis, nws tsis xav haus.

Thaum cov tub rog muab Yes Xus tsa saum ntoo cuam tas, lawv muab Yes Xus cov ris tsho los twv los sib faib.

Lawv zaum nyob ntawd, lawv zov Yes Xus. Nyob saum Yes Xus taub hau lawv sau ntawv piav txog Yes Xus lub txim tias :

“Tus no, yog Yes Xus. Yog cov Yus Das tus Vaj. Lawv tseem tsa ob tug tub sab nyob saum ntoo cuam,

nyob ntawm Yes Xus sab xis thiab sab laug. Cov neeg dua kev co hau tsawm Yes Xus tias :

Koj yog tus hais tias koj yuav rhuav lub tuam tsev teev Ntuj thiab koj ua peb hnub rov tsa tau li qub, koj rov cawm koj mas !

Koj yog Tswv Ntuj tus Tub tiag mas koj nqes saum too cuam los mas ! Cov Thawj Leej Choj cov Thoob Xwm Ntawv

thiab cov txwj laug lawv kuj hnyos Yes Xus tias : Nws cawm tau luag tej, nws cawm tsis tau nws.

Yog nws ua His Xas Lais tus Vaj tiag, Mas kom nws nqes saum ntoo cuam los, ces peb thiaj ntseeg txog nws.

Nws tso siab rau Tswv Ntuj. Yog Tswv Ntuj nyiam nws tiag, mas cia Tswv Ntuj tuaj cawm nws.

Nws twb hais tias : Kuv yog Tsvw Ntuj tus Tub. Ob tug tub sab nyob saum ntoo cuam zoo li Yes Xus,

Nkawd kuj cem Yes Xus li ntawd thiab Txij thaum tav su mus txog hnub qaij peb teev, tas ntiaj teb tsaus ntuj nti.

Thaum yuav txog peb teev, Yes Xus qw ib suab nrov nrov tias : Es Lis, Es Lis, Las Mas Xas Npas Tas Nis, yam li :

Kuv tus Huab Tais aib ! Kuv tus Huab Tais aib ! Ua cas koj tso kuv pov tseg ?

Nyob ntawd muaj qee leej hnov Yes Xus hais li ntawd, law hais tias : Nws hu tus Yaj Saub Es Lis.

Ces muaj ib tug khiav mus nqa ib co rwb los tub cawv qaub. Nws muab chob rau saum tus ntsis pas txhiav cev rau Yes Xus haus.

Tiam sis luag tej hais rau nws tias : Koj tos me ntsis saib Es Lis puas tuaj cawm nws !

Yes Xus tseem qw ib suab nrov nrov ntxiv, ces nws txoj sia tu nrho.

Ces thaum ntawd daim ntaub thais qhov rooj nyob hauv lub Tuam Tsev Teev Ntuj ntuag phua rhe ua ob daig.

Lub ntiaj teb qeeg. Pob tsuas tawg. Tej ntxa qhib plho, cov neeg ntshiab tuag muaj ntau leej lub cev rov sawv.

Thaum Yes Xus sawv rov qab los lawm, cov neeg rov sawv tawm ntawm ntxa los, lawv mus hauv lub Tsheej Ntshiab,

lawv tawm tuaj rau ntau leej pom. Tus lwm txheeb thiab cov neeg nrog nws zov Yes Xus

lawv pom lub ntiaj teb qeeg thiab pom tej xwm tshwm sim ntawd mas lawv ntshai kawg. Lawv hais tias :

Tus ntawd yog Tswv Ntuj tus Tub tiag ! Nyob ntawd, kuj muaj ntau tus poj niam nyob deb me ntsis ntsia.

Yog cov poj niam uas lawv nyob Nkas Lis Lais teb, lawv nrog Yes Xus, lawv tsob hwb Yes Xus.

Cov poj niam ntawd, ib tug yog Mab Liab uas nyob Mas Ntas Las. Ib tug yog Mab Liab, Yas Kos thiab Yos Xes nkawd niam.

Ib tug yog Ntxes Npes Dais ob tug tub nkawd niam. Thaum yuav tsaus ntuj, muaj ib tug neeg nplua nuj nyob As Lis Mas Tias tuaj,

nws hu ua Yos Xes. Nws kuj yog Yes Xus ib tug thwj tim thiab. Nws mus cuag Pis Las Tos, nws thov nqa Yes Xus lub cev.

Pis Las Tos qhia kom lawv muab Yes Xus lub cev rau Yos Xes. Yos Xes muab Yes Xus lub cev los qhwv nyob hauv ib daig ntaub huv.

Nws tso Yes Xus lub cev nyob hauv ib lub ntxa tshiab tshiab uas nws kom luag txaug rau nws, nyob ntawm phab tsua.

Yos Xes muab ib daig txiag zeb dav dav dov los kaw rooj ntxas, nws thiaj rov qab mus tsev.

Nyob ntawd, muaj Mab Liab Mas Ntas Las thiab lwm tus Mab Liab. Nkawd zaum nyob ncaj lub ntxa.

Tag kis los, yog hnub lawv npaj ua Hmoov Hla tas lawm. Cov Thawj Leej Choj thiab cov Fas Lis Xais lawv ua ib pab mus cuag Pis Las Tos,

lawv hais rau nws tias : Huab Tais, peb nco tias tus neeg dag ntawd, thaum nws tseem nyob, nws tau hais tias :

“Dhau peb hnub mas kuv yuav sawv rov qab los.”

Thov koj qhia kom muaj neeg mus zov lub ntxa mus txog hnub peb, kom nws cov thwj tim txhob tuaj nyiag nqa nws lub cev

thiab mus hais rau tsoom pej xeem tias nws sawv ntawm cov tub tuag rov los.

Yog lawv tau ua li ntawd mas tseem yuav muaj lus phem dua thawj zaug thiab !

Pis Las Tos teb rau lawv tias : Nej twb muaj nej ib pab tub zov keeb !

Nej rov mus ! Nej zov lub ntxa raws li nej pom zoo !

Laww thiaj mus. Lawv npaj txhia yam zoo nyob tom ntxa. Lawv muab daim txiag zeb cam. Lawv tso ib pab zov keeb nyob ntawd.

Huab Tais Pleev .  Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1 

Es Xes Kias 37. 12-14

Ntsiab lus : « Kuv yuav tso kuv txoj pa mus hauv nej ces nej yuav rov muaj txoj sia »

12 – Vim li ntawd, koj thiaj yuav ua yaj saub tshaj rau lawv. Koj hais rau lawv tias : HUAB TAIS Tswv Ntuj hais li no : Nej ntsia saib ! Kuv haiv neeg, kuv yuav qhib nej cov rooj ntxas. Kuv yuav coj nej rov mus rau His Xas Lais thaj av.

13 – Kuv haiv neeg, thaum kuv yuav qhib nej cov rooj ntxas thiab kuv tsa nej sawv hauv qhov ntxa los, mas nej yuav paub tias kuv yog HUAB TAIS.

14 – Kuv yuav tso kuv txoj pa mus hauv nej ces nej yuav rov muaj txoj sia. Kuv yuav tsa nej nyob txawm hauv nej thaj av. Nej yuav paub tias kuv yog HUAB TAIS, kuv hais yam twg mas kuv ua yam twg. Yog HUAB TAIS hais lo lus ntawd. »

                 Yog Tswv Ntuj lo lus. Nws lub Txiaj Ntsim

Nkauj Paj Nruag 130

Thov kom Ntuj khuv leej thiab zam txhaum.

Ib zag nkauj nce.

1 – Kuv nyob hauv qab tiv txwv, HUAB TAIS, kuv hu txog koj :

2 – HUAB TAIS, thov koj mloog kuv lub suab, koj tig ntsej los mloog kuv lub suab taij.

3 – HUAB TAIS, yog koj nco ntsoov tej txhaum, HUAB TAIS, leej twg thiaj yuav nyob taus ?

4 – Tab sis, nyob ze koj muaj txoj kev zam, ces sawv daws hwm koj.

5- Kuv tos txog HUAB TAIS, kuv tos txog nws tas siab tas ntsws, kuv tso siab rau nws lo lus.

6 – Kuv tus plig tos txog HUAB TAIS heev dua tus zov keeb tos lub caij kaj ntug, heev dua tus zov keeb tos lub caij kaj ntug.

7 – His Xas Lais, koj tso siab rau HUAB TAIS mog, vim nyob ze HUAB TAIS, muaj lub txiaj ntsim, nyob ze nws, muaj kev txhiv neeg loj.

8 – Nws yog tus yuav txhiv His Xas Lais ntawm lub txim txhaum tas huv si.

Zaj nyeem 2

Los Mas 8. 8-11

« Tus tau tsa Yes Xus tuag sawv rov los, nws lub tswv yim nyob txawm hauv nej »

Kwv tij,

8 – cov neeg mloog lub cev, lawv ua xis Tswv Ntuj siab tsis tau.

9 -Ntawm nej, mas nej tsis zwm rau lub cev, nej zwm rau lub tswv yim, vim Tswv Ntuj Leej Tswv Yim nyob txawm hauv nej. Tus twg tsis muaj Leej Pleev lub tswv yim nyob hauv nws mas nws tsis yog Leej Pleev tug.

10 – Yog Leej Pleev nyob hauv nej, tab yog lub cev tuag vim kev txhaum, mas lub tswv yim muaj txoj sia vim kev ncaj.

11 – Yog tus tau tsa Yes Xus tuag sawv rov los, nws lub tswv yim nyob txawm hauv nej, mas nws yuav pub txoj sia rau nej lub cev tuag, vim Leej Ntuj Plig nyob txawm hauv nej.

                                    Yog Tswv Ntuj lo lus. Nws lub Txiaj Ntsim

Ntawv moo zoo

Zam 11.3-7.17.20-27.33b-45

« Kuv yog Txoj Kev Sawv Rov Los thiab yog Txoj Sia »

Lub sij hawm ntawd,

3 – Nkawd ob viv ncaus xa xov mus hais rau Yes Xus tias : « Huab Tais, tus uas koj nyiam, mas nws mob lawm. » 4 Yes Xus hnov li ntawd, Yes Xus hais tias : « Tus mob no tsis coj mus rau qhov tuag, nws yuav ua kom Tswv Ntuj nto koob meej, kom xwv Tswv Ntuj Leej Tub txais koob meej vim tus mob ntawd. » 5 Yes Xus nyiam Mas Tas, thiab nws tus niam hluas, thiab Las Ntxas Los lawv.

6 -Tab yog nws hnov hais tias Las Ntxas Los mob lawm, tsis kav nws tseem nyob qhov qub ob hnub ntxiv thiab.

7 – Ces Yes Xus mam li hais rau cov thwj tim tias : « Peb rov mus Yus Das teb. »

17 – Thaum Yes Xus tuaj txog, nws pom Las Ntxas Los twb zwm ntxa tau plaub hnub lawm.

20 – Thaum Mas Tas hnov tias Yes Xus tuaj, ces Mas Tas mus tos Yes Xus, hos Mab Liab zaum nyob hauv tsev.

21- Mas Tas hais rau Yes Xus tias : « Huab Tais, yog koj ntxov tuaj txog ntawm no, mas kuv tus nus yuav tsis tuag.

22 – Tsis kav, kuv paub tias nyem no, koj thov yam twg ntawm Tswv Ntuj, mas Tswv Ntuj yuav muab rau koj. »

23 – Yes Xus hais rau Mas Tas tias : « Koj tus nus yuav sawv rov los. »

24 – Mas Tas hais rau Yes Xus tias : « Kuv paub tias thaum txog Hnub Kawg, lub caij leej tib neeg lub cev ciaj rov los, mas nws yuav sawv rov los. »

25 – Yes Xus hais rau Mas Tas tias : « Kuv yog Txoj Kev Sawv Rov Los thiab yog Txoj Sia : tus ntseeg txog kuv, tab yog nws tuag lawm, nws yuav muaj txoj sia nyob.

26 – Leej twg ua neej nyob ntseeg txog kuv, nws yuav tsis tuag ib zaug. Koj puas ntseeg qhov ntawd ? » 27 Mas Tas hais rau Yes Xus tias : « Huab Tais, kuv ntseeg. Kuv ib txwm ntseeg hais tias koj yog Leej Pleev, yog Tswv Ntuj Leej Tub tuaj nyob hauv lub qab ntuj no. »

Yes Xus tu siab kawg nyob hauv nruab siab, nws ib ce qaub thoob tas.

34 – Yes Xus hais tias : « Nej muab nws tso qhov twg ? » Lawv teb tias : « Huab Tais, koj los tom no, koj yuav pom. »

35 – Yes Xus kua muag poob nthav.

36 – Cov Yus Das thiaj hais tias : « Saib, nws nyiam Las Ntxas Los kawg. »

37 – Tab sis muaj ib co Yus Das hais tias : « Nws yog tus uas qhib tau neeg dig muag qhov muag, nws ho ua tsis tau kom tus neeg no txhob tuag ? »

38 – Ces Yes Xus rov tu siab heev kawg nyob nruab siab, nws mus tom lub ntxa. Yog ib lub qhov tsua, muaj ib daim txiag zeb kaw lub rooj ntxas.

39 – Yes Xus hais tias : « Nej tshem daim txiag zeb. » Mas Tas uas yog tus tuag tus muam, hais rau Yes Xus tias : « Huab Tais, nws tuag tau plaub hnub lawm : nws twb tsw lawm. »

40 – Yes Xus hais rau Mas Tas tias : « Kuv tsis tau hais rau koj tias yog koj ntseeg, koj yuav pom Tswv Ntuj lub hwj chim lod ? »

41 – Ces lawv tshem daim txiag zeb, Yes Xus tsa muag ntsia saum ntuj, nws hais tias : « Txiv, kuv ua koj tsaug vim koj mloog kuv.

42 – Kuv paub tias koj yeej ib txwm mloog kuv, tab sis kuv hais cov lus no, kom tsoom neeg uas sawv ncig kuv ntseeg tias yog koj xa kuv tuaj. »

43 – Yes Xus hais li ntawd tas, nws hu ib suab nrov nrov tias : « Las Ntxas Los, koj tawm los nraum no ! » 44 Tus tuag tawm los, cov saw tseem pav nws tej tes taw, daim ntaub npog ncauj tseem vov nws lub ntsej muag. Yes Xus hais rau lawv tias : « Nej daws cov saw, nej cia nws mus nws. » Cov thawj coj Yus Das sab laj yuav muab Yes Xus tua.

45 – Coob tus Yus Das uas tuaj xyuas Mab Liab tau pom qhov uas Yes Xus ua ces lawv ntseeg txog Yes Xus.

                      Huab Tais Pleev. Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

1 XAS MUAS 16: 1b, 6-7, 10-13

LUB NTSIAB LUS: Xas Muas pleev Das Vis ua vaj.

Cov lus nyob hauv ntawv Xas Muas phau 1

01b – HUAB TAIS hais rau Xas Muas tias : « Koj ntim roj puv tus kub nyuj, koj mus.  

Kuv xa koj mus tom Yes Xes tsev nyob Npes Les Hes, vim nyob hauv nws cov tub kuv xaiv ib tug los ua vaj ».

06 – Xas Muas kom Yes Xes thiab nws cov tub huv tib si tuaj, ces nws caw lawv tuaj txi Ntuj. 

Thaum lawv tuaj txog, Xas Muas xub pom Es Lis, nws xav tias : « Yog HUAB TAIS tus pleev tuaj txog lawm ».  

07 – Tab sis HUAB TAIS hais rau Xas Muas tias : « Koj txhob saib nws tus yam ntxwv sab nraud los nws lub cev siab. Kuv tsis yuav nws.  HUAB TAIS nws ntsuas tas txhia yam, nws tsis ntsuas zoo li neeg. 

Neeg saib tus yam ntxwv sab nraud, hos HUAB TAIS saib hauv lub siab lub plawv ».

10 – Yes Xes coj nws xya leej tub ib tug zuj zus tuaj nyob ntawm Xas Muas xub ntiag, tab sis Xas Muas hais tias: « HUAB TAIS tsis xaiv cov no ib tug li ».

11 – « Koj puas tshuav tub ntxiv » ? Yes Xes teb tias : « Tshuav tus tub ntxawg.  Nws zov cov tsiaj nyob tom tshav zaub ».

Xas Muas hais rau Yes Xes tias : « Koj tso neeg mus hu nws los.  Peb yuav zaum ntawm tsum mov no tos nws los tso ».

12 – Yes Xes thiaj tso neeg mus hu tus tub ntxawg los. 

Tus tub ntawd cov plaub hau liab daj. Nws lub ntsej muag zoo nraug.  Nws sawm txhiaj kawg ! 

HUAB TAIS hais rau Xas Muas tias : « Yog tus no.  Koj pleev nws mas » !

13 – Xas Muas nthos nkaus tus kub ntim roj, nws pleev tus tub ntxawg nyob hauv nruab nrab nws cov kwv tij. 

Txij hnub ntawd los HUAB TAIS lub tswv yim ya los nyob hauv Das Vis.

Ces Xas Muas mam sawv kev rov mus Las Mas.

Yog Tswv Ntuj lo lus. Nws lub Txiaj Ntsim

NKAUJ PAJ NRUAG

Tus zoo tswv zov yaj (NPN 23)

Das Vis zaj nkauj paj nruag

HUAB TAIS yog kuv tus tswv zov yaj, kuv tsis tshaib tsis nqhis dab tsi.

Nws tso kuv nyob hauv tej tshav zaub mos; nws coj kuv mus nyob ze tus dej uas sawv daws so.

Nws rov ntxiv siav rau kuv tus plig.

Nws coj kuv mus taug tej kev ncaj, vim nws lub npe nto koob meej.

Tab yog kuv taug kev mus hauv lub kwj ha dub tsaus nti, kuv tsis ntshai dab tsi phem, vim koj nrog kuv ua ke, koj rab qws, thiab koj rab pas nrig yog kuv chaw tso siab.

Koj npaj ib roog qav rau ntawm kuv xub ntiag, nyob tom cov neeg ntxub kuv hauv ntej, koj muab roj tsw qab pleev kuv taub hau. Kuv lub khob phwj cawv.

Muaj tseeb tiag ! Txhua hnub hauv kuv sim neej, kev kaj siab thiab kev hlub raws nraim kuv.

Tas kuv sim neej, kuv yuav mus nyob tsheej hnub hauv HUAB TAIS tsev.

HUAB TAIS YOG TUS TSWV ZOV YAJ — le psaume en chant :(NPN 23-1)

Txais: Huab Tais yog tus Zoo Tswv Zov Yaj, nws zov kuv, kuv tsis ntshaw dab tsi li!

1 -Huab Tais yog kuv tus tswv zov yaj, kuv tsis ntshaw dab tsi.

Nws tso kuv nyob hauv tej tshav zaub mos.

Nws coj kuv mus so nyob ze dej, nws rov ntxiv zog rau kuv tus plig.

2 -Nws coj kuv mus taug txoj kev ncaj kom nws lub npe nto koob meej.

Tab yog kuv taug kev mus hauv lub kwj ha tsaus ntuj nti,

kuv tsis ntshai vim koj nrog kuv,

koj rab pas nrig yog kuv chaw tso siab.

3 -Cov neeg ntxub kuv, lawv hnyos kuv.

Koj npaj ib roog qav rau ntawm kuv xub ntiag.

Koj pleev roj tsw qab rau saum kuv taub hau.

Koj hliv cawv puv lub ntim rau kuv haus.

4 -Tas kuv sim neej, kev kaj siab thiab kev hlub nrog nraim kuv.

Tas kuv sim neej, kuv yuav nyob hauv Huab Tais tsev.

ZAJ NYEEM OB

ES FES XOS 5 : 8 – 14.

LUB NTSIAB LUS : Txoj sia tshiab nyob hauv Leej Pleev.

Cov lus paj lug sau tuaj rau cov ntseeg nyob Es Fes Xos.

Kwv tij,

08 – Yav thaud, nej yog qhov tsaus ntuj nti. Zaum no, nej nyob hauv Huab Tais, nej yog qhov pom kev nrig. 

09 – Nej ua lub neej phim txoj kev pom kev cov me nyuam. 

Cov txiv txi hauv qhov pom kev : yog lub siab zoo, lub siab ncaj, thiab lub siab zeem tau qhov tseeb. 

10 – Nej ua tib zoo nrhiav saib, yog dab tsi xis Huab Tais siab. 

11 – Nej txhob nrog luag koom tes ua hauj lwm hauv qhov tsaus ntuj, vim cov hauj lwm hauv qhov tsaus ntuj txi tsis tau cov txiv zoo, nej yuav muab qhib tawm los mas zoo dua. 

12 – Tej hauj lwm phem uas luag  nyiag ua, mas yus twb txaj muag hais txog.  

13 – Tab sis, thaum muaj tus muab qhib tawm los rau nraum qhov pom kev lawd, mas sawv daws nrog pom qhov tseeb. 

14 – Vim tas txhua yam uas tawm los rau qhov muag pom, yog qhov pom kev. 

Vim li ntawd thiaj muaj lo lus hais tias : « Neeg tsaug zog, koj tsim los mas !  Koj sawv hauv cov tuag rov los, Leej Pleev yuav ziab koj. » 

Yog Tswv Ntuj lo lus. Nws lub Txiaj Ntsim

NTAWV MOO ZOO 

ZAM 9 : 1, 6 – 9, 13 – 17, 34 – 38.

LUB NTSIAB LUS : Yes Xus kho tus dig muag nruab thiab.

Cov lus nyob hauv Zam ntawv moo zoo

01 – Nyob rau lub caij ntawd, Thaum Yes Xus mus kev, nws pom ib tug neeg ib txwm dig muag nruab thiab los. 

06 – Yes Xus hais li ntawd tas, nws nti qaub ncaug rau hauv pem teb, nws muab nws cov qaub ncaug ua ib qho av nkos. 

Nws muab qhov av nkos ntawd pleev tus dig muag qhov muag. 

07 – Nws hais rau tus dig muag tias : « Koj mus ntxuav qhov muag tom lub pas dej Xis Los Es », lo lus no txhais tias : tus Ntuj xa mus. Tus dig muag mus ntxuav tas, nws rov los, nws cia li pom kev lawm. 

08 – Cov neeg nyob sib ze thiab cov uas tau pom nws yav dhau los, vim nws yog ib tug neeg thov khawv, lawv hais tias : « Puas yog tus uas thaud zaum thov khawv ? »

09 – Ib txhia hais tias : « Yog tus ntawd ». Ib txhia hais tias : « Tsis yog, yog ib tug zoo li tus ntawd. »

Tus dig muag hais tias : « Yog kuv los mas. »

13 – Luag coj tus uas thaud dig muag mus rau cov Fas Lis Xais. 

14 – Hnub uas Yes Xus ua av nkos qhib tus neeg ntawd ob lub qhov muag yog ib hnub xas npas tos. 

15 – Cov Fas Lis Xais rov qab nug tus dig muag saib ua cas nws thiaj li pom kev. 

Tus dig muag hais rau lawv tias : « Nws muab av nkos pleev kuv qhov muag, kuv mus ntxuav muag tas ces kuv pom kev ».

16 – Muaj ib co Fas Lis Xais hais tias : « Yeej tsis yog ib tug neeg tuaj ntawm Tswv Ntuj tuaj, vim nws tsis caiv hnub xas npas tos ».

Lwm cov hais tias : « Ib tug neeg txhaum ua puas tau tej lub cim loj li ntawd » ? 

Ces lawv hais tsis sib haum. 

17 – Lawv thiaj rov hais rau tus dig muag tias : « Koj ne, koj hais dab tsi txog tus uas qhib koj qhov muag » ? 

Tus dig muag hais tias : « Yog ib tug yaj saub ».

34 – Lawv teb rau nws tias : « Txij koj yug los, koj yeej yog neeg txhaum, koj haj cav qhuab qhia peb thiab » ! 

Ces lawv muab nws thawb rau nraum zoov. 

35 – Yes Xus kuj hnov tias lawv muab tus dig muag thawb rau nraum zoov. 

Thaum Yes Xus pom nws, Yes Xus hais tias : « Koj puas ntseeg txog Neeg Leej Tub ».

36 – Tus dig muag teb hais tias : « Huab Tais, nws yog leej twg ?  Kuv xav ntseeg txog nws ».

37 – Yes Xus hais rau nws tias : « Koj twb pom nws.  Nws yog tus hais lus rau koj ».

38 – Tus dig muag hais tias : « Huab Tais, kuv ntseeg ». Ces nws txhos caug pe Yes Xus. 

Huab Tais Pleev .  Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zam Nyeem ib

Kev Tsiv, Zaj 17

3 – Tsoom pej xeem nqhis dej, lawv yws yws rau Mais Xes tias :
« Ua cas koj thiaj coj peb tawm HaisNkws Tos teb los ? Puas yog koj xav
kom kuv tuag dej, kuv thiab kuv cov me nyuam thiab kuv cov tsiaj peb sawv daws tuag dej ? »
4 – Mais Xes tsa suab hu HUAB TAIS hais tias :
« Kuv yuav ua li cas rau haiv neeg no ? Tshuav me ntsis xwb ces lawv yuav xuas
pob zeb txawb kuv. »
5 – HUAB TAIS hais rau Mais Xes tias :
« Koj mus ua tsoom pej xeem ntej, koj coj ob peb tug txwj laus His Xas Lais nrog
koj mus. Koj nqa koj rab pas nrig ntawm tes, yog rab pas uas koj tau siv los ntaus
tus niam dej nyob Hais Nkws Tos, koj mus.

6 – Kuv yuav mus ua koj ntej, saum lub tsua, nyob saum roob Hos Les tos koj
tuaj. Koj yuav ntaus lub tsua, ces dej yuav txhawv tawm los rau tsoom pej xeem haus. »
Mais Xes ua raws li ntawd, cov txwj laus His Xas Lais ntsia ntsoov nws ua.
7 – Mais Xes tis npe rau thaj chaw ntawd hu ua Mas Xas thiab Mes Lis Npas, vim
nyob ntawd, cov His Xas Lais nrhiav lus rau nws thiab lawv sim HUAB TAIS,
lawv hais tias :
« HUAB TAIS puas nrog peb nyob los tsis nrog ? »

Yog Tswv Ntuj lo lus. Nws lub Txiaj Ntsim

Nkauj Paj Nruag 94

1 – HUAB TAIS, tus Tswv Ntuj rob caub, tus Tswv Ntuj pauj qhov phem,
koj ua kom peb paub koj mas !
2 – Tus txiav txim rau ntiaj teb, thov koj sawv mas ! Koj muab tus nqe txhaum pauj rau cov neeg muab hlob.

6 – Nej chaws los ! Peb khoov cev, peb pe ; peb txhos caug pe tus HUAB TAIS uas tsim peb los !
7 – Nws yog peb tus Tswv Ntuj. Peb yog nws haiv neeg, yog pab yaj uas nws zov rawv

8 – Hnub no, nej cia li mloog nws lub suab !

9 – Nyob ntawd, nej phaj yawg tab tom pom kuv cov hauj lwm muaj hwj huam,
tsis kav lawv tseem twv kuv thiab sim kuv.

Zam nyeem ob

 » Thaum peb tseem ua neeg txhaum, Yes Xus zoo siab tuag kom tau pab peb. »

PAJ LUG SAU TUAJ RAU COV NTSEEG NYOB LOS MAS TIAS:

LUB NTSIAB LUS: Thaum ib tug neeg ncaj lawm nws nrog Tswv Ntuj nyob kaj siab lug.

1 – Yog vim peb txais kev ncaj ntawm kev ntseeg tuaj, mas peb thiaj nrog Tswv Ntuj nyob kaj siab lug nyob hauv peb tus Huab Tais Yes Xus Pleev. 

2 – Yes Xus Pleev pub kev ntseeg, ces peb tau txais txiaj ntsim ; peb tau los nyob hauv lub txiaj ntsim ;

peb cav lus zoo thiab peb tso siab tias peb yuav txais Tswv Ntuj lub hwj chim. 

5 – Kev tso siab ua kom peb tsis muaj chaw khuv xim, vim Leej Ntuj Plig Ntshiab, uas Ntuj pub rau peb, nws hliv Tswv Ntuj txoj kev nyiam rau hauv peb lub siab.

6 – Vim li ntawd, lub sij hawm peb tsis muaj zog, thaum txog lub hnub nyoog teem, Leej Pleev thiaj raug luag tua kom tau pab cov neeg tsis hwm Ntuj. 

7 – Yus yuav luag tsis kam tuag kom tau pab ib tug neeg ncaj ; nyaj tej zaus yus yuav muaj peev xwm tuag kom tau pab ib tug neeg siab zoo. 

8 – Yam uas zeem tseeb tias Tswv Ntuj nyiam peb yog qhov tias thaum peb tseem yog neeg txhaum, Leej Pleev tuag kom tau pab peb.

Yog Tswv Ntuj lo lus. Nws lub Txiaj Ntsim

Ntawv Moo Zoo

« Yes Xus yog tus pub cov dej muaj txoj sia tuaj rau cov neeg ntseeg txog nws, cov neeg ntseeg thiaj tsis paub txoj kev nqhis tas ib sid. »

5 – Nws mus txog ib lub nroog Xas Mas Lias hu ua Xis Kes, nyob ze thaj av uas Yas Kos muab rau nws tus tub Yos Xes.
6 – Yas Kos lub qhov dej nyob ntawd.
7 – Yes Xus mus kev, nws sab, nws zaum ntawm lub qhov dej. Kwv yees tav su
lawm. Ib tug poj niam Xas Mas Lias tuaj ce dej. Yes Xus hais rau nws tias :
« Koj muab dej rau kuv haus. »
8 – Nws cov thwj tim mus yuav txhiam xws noj hauv nroog lawm. 9 Tus poj
niam Xas Mas Lias hais rau Yes Xus tias : « Ua li cas ? Koj yog ib tug Yus Das, koj
tseem yuav thov dej haus ntawm kuv. Kuv yog ib tug poj niam Xas Mas Lias. »
Vim tias cov Yus Das tsis nrog cov Xas Mas Lias sib fim.

10 – Yes Xus teb rau tus poj niam tias : « Yog koj paub Tswv Ntuj lub txiaj ntsim,
thiab paub tus uas hais rau koj tias : ‘koj muab dej rau kuv haus,’ mas yog koj
yuav thov nws, ces nws yuav muab ib co dej muaj txoj sia rau koj. »
11 – Tus poj niam hais rau Yes Xus tias: « Huab Tais, koj tsis muaj dab tsi ce dej,
hos lub qhov dej los kuj tob. Koj yuav ua li cas muab tau cov dej muaj txoj sia ntawd ?

12 – Koj puas loj dua peb yawg koob Yas Kos uas nws muab lub qhov dej
no rau peb ? Nws thiab nws cov tub, nws cov tsiaj puav leej tau haus lub qhov dej no. »
13 – Yes Xus teb rau tus poj niam hais tias : « Leej twg haus cov dej no tas tseem yuav rov nqhis dua.

14 – Hos tus haus cov dej uas kuv muab rau nws, mas nws yuav tsis nqhis ib zaug ntxiv.

Cov dej uas kuv muab, yuav txia ua ib tug dej txhawv muaj txoj sia nyob mus li nyob hauv nws. »
15 – Tus poj niam hais rau Yes Xus tias: « Huab Tais, koj pub cov dej ntawd rau
kuv, kom kuv tsis txhob nqhis dej ntxiv, kom kuv txhob tau rov tuaj ce dej ntawm no ntxiv. »

19 – « Huab Tais, kuv pom tias koj yog ib tug yaj saub.

20 – Peb cov yawg koob teev ntuj saum lub roob no, hos nej, mas nej
hais tias qhov chaw uas sawv daws yuav tsum mus teev Ntuj yog Yes Lus Xas Les. »
21 – Yes Xus hais rau tus poj niam tias : « Phauj, koj ntseeg kuv mog, lub caij
nyoog los txog lawm : tsis yog nyob saum lub roob no los nyob Yes Lus Xas Les uas
nej yuav teev Leej Txiv.

22 – Nej teev qhov uas nej tsis paub. Peb teev qhov uas peb paub, vim txoj kev cawm tuaj ntawm
cov Yus Das tuaj.

23 – Tab sis txog sij hawm lawm, yog tam sis no ntag, uas cov neeg hawm Ntuj haum kev tseeb, lawv
hawm Leej Txiv nyob hauv lub tswv yim thiab nyob hauv txoj kev tseeb. Leej Txiv
nrhiav cov neeg zoo li ntawd los teev nws.

24 – Tswv Ntuj yog tswv yim, cov neeg teev Tswv Ntuj yuav tsum teev nyob
hauv lub tswv yim thiab hauv qhov tseeb. »
25 – Tus poj niam hais rau Yes Xus tias: « Kuv paub hais tias tus Mes Xias, uas
luag hu ua Leej Pleev, yuav tuaj. Thaum tus ntawd tuaj txog, nws yuav tshaj ib puas tsav yam rau peb. »
26 – Yes Xus hais rau nws tias : « Kuv yog tus ntawd, tus uas hais lus rau koj. »

39 – Coob leej Xas Mas Lias hauv lub nroog no ntseeg txog Yes Xus

40 – Thaum cov Xas Mas Lias tuaj cuag Yes Xus, mas lawv thov kom nws nrog
lawv nyob. Yes Xus thiaj nrog lawv nyob ob hnub.

41 – Ces haj yam muaj neeg coob ntseeg txog nws vim nws cov lus.
42 – Lawv hais rau tus poj niam tias : « Tsis yog vim tej lus koj tau hais, mas
peb thiaj ntseeg, yog vim peb tau hnov nws hais kiag, ces peb paub tias nws yog
tus Cawm lub qab ntuj neeg tiag. »

Huab Tais Pleev .  Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1

Hnub Chiv 1 / Caij Plaub Caug / Xyoo A

Hauv Paus 2, 7-9; 3, 1-7a

2

7 – HUAB TAIS Tswv Ntuj muab ib thooj av nplaum los puab ua tib neeg. HUAB TAIS Tswv Ntuj tshuab pa rau hauv tib neeg qhov ntswg, ces tib neeg ciaj ua ib tug muaj sia.

8 – HUAB TAIS Tswv Ntuj cog tau ib lub vaj nyob Es Dees, nyob sab hnub tuaj. Nws muab tus txiv neej uas nws tau puab tso rau hauv lub vaj.

9 – HUAB TAIS Tswv Ntuj ua kom txhua yam ntoo uas zoo saib thiab zoo noj tuaj hauv lub vaj thaj av. Tus ntoo muaj txoj sia tuaj nyob hauv nruab nrab lub vaj, thiab tus ntoo uas paub qhov zoo qhov phem.

3

1 -Tus nab yog tus ntse tshaj tastxhua hom tsiaj HUAB TAIS TswvNtuj tau tsim los nyob nruab nrag. Nabhais rau tus poj niam tias : »Li ntawd, Tswv Ntuj hais tias : Nebyuav tsis txhob noj txhua yam txiv ntoohauv lub vaj no puas yog ? »

2 – Tus poj niam teb rau tus nab tias : « Wb noj tau cov txiv txi saum cov ntoo hauv lub vaj no tib si.

3 – Tsuas tshwj cov txiv txi saum tsob ntoo nyob hauv nruab nrab lub vaj, mas Tswv Ntuj hais tias :

“Neb tsis txhob noj, tsis txhob kov, yog neb noj neb kov, mas neb yuav tuag. »

4 – Tus nab teb ntua tus poj niam tias : « Tsis muaj li ntawd ib zaug ! Neb yuav tsis tuag. 5 Vim Tswv Ntuj paub tias, hnub twg neb noj ces neb qhov muag yuav qhib, neb yuav zoo li tej tus tswv ntuj uas paub qhov zoo thiab qhov phem. »

6 -Tus poj niam pom hais tias tus ntoo ntawd yeej zoo noj thiab zoo saib kawg, thiab yog tus ntoo uas yus ntshaw noj kom yus paub qhov zoo thiab qhov phem. Nws de zoj lub txiv ntawm tus ntoo los noj. Nws kuj cev rau nws tus txiv uas nrog nws nyob, ces tus txiv kuj noj thiab.

7 – Ces nkawd ob leeg qhov muag qhib plho, nkawd paub hais tias nkawd liab qab.

Yog Tswv Ntuj lo lus. Nws lub Txiaj Ntsim

Nkauj Paj Nruag 51

3 – Tswv Ntuj, koj lub siab zoo, thov koj khuv leej kuv. 

 Koj lub siab dav tas nrho hlub mos nyoos, 

 koj so kuv qhov txhaum. 

4 – Thov koj ntxuav kuv qhov phem kom tag, 

 yaug kuv qhov txhaum kom kuv huv tuaj. 

5 – Kuv paub kuv qhov txhaum, 

 kuv qhov yuam kev nyob ntawm kuv xub ntiag mus li. 

6 – Kuv ua txhaum rau koj, txhaum koj tib leeg xwb, 

 yam phem ntawm koj qhov muag, kuv tau ua lawm.

13 – Koj txhob ntiab kuv mus deb ntawm koj lub ntsej muag, 

 txhob thau koj lub tswv yim ntshiab ntawm kuv.

14 – Koj ua kom kuv rov zoo siab, vim koj cawm kuv, 

 koj txheem kuv lub tswv yim kom dav. 

15 – Kuv yuav qhia koj txoj kev rau cov ntxeev siab, 

 cov neeg txhaum yuav rov los cuag koj. 

16 – Kuv tus Tswv Ntuj, tus Tswv Ntuj Cawm neeg, 

 thov koj npo kuv dim ntawm ntshav ; 

 kuv tus nplaig yuav cav txog koj txoj kev ncaj ! 

 17 -HUAB TAIS, koj qhib kuv di ncauj, 

 kuv lub ncauj yuav cav lus zoo txog koj.

Zaj nyeem 2

Los Mas 5, 12-19

Ntsiab lus : « Vim As Das ua txhaum, peb thiaj pheej xav ua txhaum. Tab sis nyob hauv Yes Xus peb tau Tswv Ntuj lub txiaj ntsim npo peb ntawm kev txhaum. »

Paj Lug sau ntawv tuaj rau cov ntseeg nyob Los Mas:

12 – Yog vim tib tug neeg xwb, mas kev txhaum tau tshwm los nyob hauv lub ntiaj

teb, ces kev txhaum coj kev tuag los. Txoj kev tuag thiaj raug tas zeej tsoom, vim sawv daws ua txhaum.

13 – Kev txhaum xub tshwm los nyob ntiaj teb ua ntej Txoj Cai, tab sis thaum tsis muaj Txoj Cai, mas yus tsis ris lub txim txhaum. Txij As Das los txog Mais Xes, kev tuag ua vaj kav sawv daws :

14 – tab yog cov neeg tsis tau ua tej yam txhaum zoo nkaus li As Das mas lawv kuj zwm rau kev tuag, vim As Das yog tus duab qhia txog tus yuav tuaj.

15 – Tab sis lub txiaj ntsim tsis zoo li kev txhaum. Vim ib tug xwb ua txhaum mas tas zeej tsoom tuag. Nyem no Tswv Ntuj lub txiaj ntsim thiab cov paj tshab uas Ntuj pub nyob hauv Yes Xus Pleev haj yam ntws los ntau rau zeej tsoom.

16 – Lub txiaj ntsim uas tau coj yam zoo los, tsis zoo li yav thaum ub, uas ib tug neeg xwb ua txhaum : thaud, ib leej tib neeg tau ua ib qho txhaum xwb, mas Ntuj txiav tias neeg yuav raug txim ; hos nyem no neeg tau ua ntau yam txhaum ntev ntev los, tsis kav lub txiaj ntsim ua kom neeg ncaj tuaj.

17 – Vim ib tug neeg tau ua txhaum, ces kev tuag tau ua vaj. Nyem no, cov txais lub txiaj ntsim thiab txais kev ncaj tej paj tshab, mas lawv haj yam yuav ua vaj nyob hauv txoj sia, vim Yes Xus Pleev tib leeg .

18 – Li ntawd, ib tug neeg qhov txhaum pus tas ib zeej tsoom neeg mus rau kev raug txim ; ib tug neeg txoj kev ncaj kuj pub kev ncaj thiab pub txoj sia rau ib tsoom neeg.

19 – Vim ib tug neeg txoj kev tsis mloog lus, ces tas zeej tsoom thiaj ua neeg txhaum ; vim ib tug neeg kev mloog lus, ces tas zeej tsoom yuav tau nce mus ua neeg ncaj.

Yog Tswv Ntuj lo lus. Nws lub Txiaj Ntsim

Ntawv moo zoo

Ntsiab lus : « Yes Xus tsis kam ua hwj huam yees ntxwv raws li Dab Phem ntxias kom nws ua. Yes Xus xaiv txoj kev mloog Tswv Ntuj lus. »

Mas Tais 4, 1-11

1 – Thaum ntawd, Leej Ntuj Plig coj Yes Xus mus rau teb chaws suab puam kom raug dab phem ntxias.

2 – Yes Xus yoo mov tau plaub caug hnub plaub caug hmo, ces nws tshaib plab.

3 – Ces niag ntxias neeg txav los, nws hais rau Yes Xus tias : « Saib, koj yog Tswv Ntuj Leej Tub no, koj hais kom cov pob zeb no txia ua mov! »

4 – Tab sis Yes Xus teb tias : « Muaj lus sau cia tias : Neeg tsis kawg muab mov xwb los yug

txoj sia, neeg tseem muab txhua lo lus tawm ntawm Tswv Ntuj lub ncauj los yug txoj sia thiab. »

5 – Dab phem tseem coj Yes Xus nrog nws mus hauv lub Nroog Ntshiab. Ces dab phem coj Yes Xus mus tso puag saum lub ruv Tuam Tsev Teev Ntuj,

6 – dab phem hais tias : « Saib, koj yog Tswv Ntuj Leej Tub no, koj dhia lawm puag hauv, vim muaj lus sau cia tias : Ntuj yuav txib nws cov tshiab, kom lawv nqa koj nyob hauv lawv txhais tes, kom koj ko taw txhob dawm ib lub pob zeb li. »

7 – Yes Xus hais rau dab phem tias : “Tseem muaj lus sau cia tias : Koj yuav tsis txhob ntxias koj tus Huab Tais Tswv Ntuj.”

8 – Dab phem tseem coj Yes Xus mus txog saum ib lub roob siab siab. Nws taw cov ceeb tsheej muaj koob meej nyob ntiaj teb rau Yes Xus ntsia.

9 – Nws hais tias : « Yog koj txhos caug pe kuv, mas kuv yuav muab tej ntawd tas huv si rau koj. »

10 – Yes Xus hais rau dab phem tias : « Xas Tas, koj khiav mus ! Vim muaj lus sau cia tias : Tus koj yuav pe, yog koj tus Huab Tais Tswv Ntuj. Koj yuav teev nws tib leeg xwb. »

11 – Dab phem thiaj khiav ntawm Yes Xus mus. Ces cov Tshiab txav los tsob hwb Yes Xus.

  Huab Tais Pleev .  Lub qab ntuj neeg cav txog koj.