Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

XOS FOS NIAS 2 : 3, 3 : 12-13.

LUB NTSIAB LUS: Tswv Ntuj tsuas yuav cov neeg ncaj thiab tsis muab hlob los ua nws haiv neeg. Cov ntawd lawv txawj nrhiav kev so kev kaj siab lug nyob hauv Huab Tais.

COV LUS NYOB HAUV NTAWV XOS FOS NIAS.

3  – Nej sawv daws uas nej tsis muab hlob thiab nej ua raws Tswv Ntuj lus nyob ntiaj teb no, nej nrhiav Tswv Ntuj mog !

Nej nrhiav kev ncaj, nej nrhiav kev tsis muab hlob, ces thaum hnub Tswv Ntuj npau taws, nej thiaj yuav tsis raug dab tsi.

12 – Tswv Ntuj hais tias :

Cov neeg kuv yuav cia nyob hauv koj lub loog ntxiv mas yog ib haiv neeg tsis muab hlob, tsis khav.

Lawv yuav yog cov tseem His Xas Lais nrhiav chaw vam khom nyob hauv Tswv Ntuj lub npe.

13 – Lawv yuav tsis coj kev nkhaus ntxiv. Lawv yuav tsis hais lus dag lawm.

Luag yuav tsis pom ib tug nplaig nkhaus nyob hauv lawv ntxiv.

Lawv yuav tau kev nog zaub, tau kev so, tsis muaj leej twg ua ntxhov lawv siab.

Yog Tswv Ntuj Lo Lus        Nws lus txiaj ntsim

Nkauj Paj Nruag              COV TAU TXOJ HMOOV ZOO             

(NPN 146)

Txais: Cov tau txoj hmoov zoo yog cov pluag hauv nruab siab. Ntuj lub Ceeb Tsheej yog lawv tug.

1 – Huab Tais Tswv Ntuj nco ntsoov nws cov lus mus ib txhiab ib txhis.

Nws tswj txoj kev ncaj rau cov neeg uas raug luag hiam.

Nws pub rau cov neeg tshaib noj, nws tso cov neeg nyob txim.

2 – Huab Tais qhib cov neeg dig muag kom rov pom kev, nws tsa cov neeg qaug zog.

Huab Tais nyiam cov neeg ua ncaj, nws pov hwm cov pej kum neeg.

3 – Nws txhawb cov poj ntsuam thiab cov ntsuag nos. nws mooj cov siab phem kom lawv yuam kev.

Huab Tais yog tus vaj nyob mus li. Xis Yoos, nws yog koj tus Tswv Ntuj mus tiam dhau tiam.

ZAJ NYEEM OB           

1 KOS LIS NTHOS 1 : 26-31.

LUB NTSIAB LUS : Ntau zaus Tswv Ntuj xub hu cov neeg me los ua cov neeg xub ntseeg nyob hauv ib lub teb chaws. Tswv Ntuj pub nws txoj kev thoob tsib rau cov tsis muab hlob.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

26 – Kwv tij sawv daws, nej ntsia saib, Ntuj xaiv nej zoo li cas :

nyob hauv nej, tsis muaj ntau leej thoob tsib, tsis muaj ntau leej muaj hwj chim,

tsis muaj ntau leej yug los ua tub huab tais. 

27 – Cov neeg uas lub ntiaj teb saib lawv vwm, mas Tswv Ntuj xaiv lawv, kom cov neeg thoob tsib poob ntsej muag. 

Cov neeg uas lub ntiaj teb saib lawv tsis muaj zog, mas Tswv Ntuj xaiv lawv, kom cov muaj zog poob ntsej muag.

28 – Cov neeg uas lub ntiaj teb thuam  tias lawv yug los tsis nto npe, mas cov ntawd yog cov uas Tswv Ntuj xaiv. 

Cov neeg uas luag saib tsis muaj qab hau, mas Tswv Ntuj xaiv lawv kom cov muaj hwj huam poob ua neeg tsis muaj tsim. 

29 – Ua li mas tsis muaj ib tug neeg yuav khav tau tias nws muaj tsim nyob ntawm Tswv Ntuj xub ntiag. 

30  – Yog Tswv Ntuj tsa nej nyob hauv Yes Xus Pleev :

Yes Xus yog peb txoj kev thoob tsib, peb txoj kev ncaj, peb txoj kev ntshiab, peb txoj kev cawm. 

31 – Tej no muaj raws nraim li Ntawv hais tias :

‘Tus twg xav khav mas nws kawg yuav khav nyob hauv Huab Tais.’

Yog Tswv Ntuj Lo Lus        Nws lus txiaj ntsim

NTAWV MOO ZOO               

MAS TAIS 5 : 1-12.

LUB NTSIAB LUS : Cov neeg tau txoj hmoov zoo tuaj ntawm Yes Xus tuaj mas yog cov pluag,

 cov neeg me cov neeg ncaj.

COV LUS NYOB HAUV MAS TAIS NTAWV MOO ZOO.

1 – Yes Xus pom neeg coob coob tuaj, nws nce mus saum lub roob. 

Nws zaum. Cov thwj tim txav los ze Yes Xus. 

2 – Ces Yes Xus tsa ncauj qhia lawv hais tias :

3 – « Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li. 

4 – Cov tau txoj hmoov zoo, yog cov siab zoo, vim lawv yuav txais lub ntiaj teb los ua lawv tug.

5 – Cov tau txoj hmoov zoo, yog cov quaj ntsuag, vim Ntuj yuav nplij lawv. 

6 – Cov tau txoj hmoov zoo, yog cov tshaib thiab nqhis txoj kev ncaj, vim Ntuj yuav daws lawv qhov nqhis.

7  – Cov tau txoj hmoov zoo, yog cov hlub luag tej, vim Ntuj yuav hlub lawv.

8 – Cov tau txoj hmoov zoo, yog cov siab huv, vim lawv yuav pom Tswv Ntuj.

9  – Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam.

10  – Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug.

11 – Thaum luag thuam nej, hiam nej, thiab liam ntau yam phem rau nej vim kuv, mas nej txoj hmoov zoo.

12 – Nej zoo siab thiab nej hom khaj mog, vim nej yuav tau txais koob haum loj nyob saum ntuj. 

Cov yaj saub ua nej ntej, kuj raug luag hiam zoo li ntawd thiab.

Huab Tais Pleev      Lub qab ntuj neeg cav txog koj