Nruab xyoo HNUB CHIV 28 XYOO A

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia (11/10/2026)

ZAJ NYEEM IB

HIS XAIS 25 : 6-10

LUB NTSIAB LUS: Tswv Ntuj xav pub kev lom zem kev kaj siab rau cov neeg tuaj
cuag nws. Nws so lawv cov kua muag.
COV LUS NYOB HAUV NTAWV HIS XAIS :
6 Nyob saum lub roob no, tsoom tub rog tus HUAB TAIS yuav ua ib rooj nqaij ib

rooj hno rau tas cov haiv neeg huv tib si, yog ib rooj qav muaj hlwb puv pob txha, ib rooj cawv ntshiab tsis muaj txo.

7 Nyob saum lub roob no, HUAB TAIS yuav yaws daim ntaub vov tsoom neeg tib si, yuav rhuav chaws ntaub qhwv tsoom kuj cuab.

8 Nws yuav rhuav kev tuag ib txhiab ib txhis. HUAB TAIS Tswv Ntuj yuav so cov kua muag ntws

saum sawv daws lub ntsej muag, nws yuav thau nws haiv neeg chaw poob tsim nyob thoob ntiaj teb,

vim HUAB TAIS tau hais li ntawd.

9 Hnub ntawd sawv daws yuav hais tias :

« Nej ntsia peb tus Tswv Ntuj uas peb vam tias nws yuav cawm peb, yog tus HUAB TAIS uas peb tos.

Peb kav tsij dhia hom khaj, kav tsij xyiv fab lom zem !

10 Vim HUAB TAIS yuav tso nws txhais tes nyob saum lub roob no.

Nkauj Paj Nruag KUV YUAV NYOB HAUV HUAB TAIS TSEV

(NPN 23-1) (Zaj 67)

Txais: Kuv yuav nyob hauv Huab Tais tsev mus tag kuv sim neej.

1. Huab Tais yog kuv tus tswv zov yaj, kuv tsis ntshaw dab tsi.

Nws tso kuv nyob hauv tej tshav zaub mos.

Nws coj kuv mus so nyob ze dej, nws rov ntxiv zog rau kuv tus plig.

2. Nws coj kuv mus taug txoj kev ncaj kom nws lub npe nto koob meej.

Tab yog kuv taug kev mus hauv lub kwj ha tsaus ntuj nti,

kuv tsis ntshai vim koj nrog kuv,

koj rab pas nrig yog kuv chaw tso siab.

3. Cov neeg ntxub kuv, lawv hnyos kuv.

Koj npaj ib roog qav rau ntawm kuv xub ntiag.

Koj pleev roj tsw qab rau saum kuv taub hau.

Koj hliv cawv puv lub ntim rau kuv haus.

4. Tas kuv sim neej, kev kaj siab thiab kev hlub nrog nraim kuv.

Tas kuv sim neej, kuv yuav nyob hauv Huab Tais tsev.

ZAJ NYEEM OB

FIS LIS POS 4 : 12-14, 19-20

LUB NTSIAB LUS : Peb yuav xyaum txais kev pluag ib yam li kev nyob zoo. Yog peb

pab cov txom nyem mas Tswv Ntuj pauj rau peb.

COV LUS PAJ LUG SAU TUAJ RAU COV FIS LIS POS :

12 Kuv txawj yoo mov, ib yam li kuv txawj noj kom tsau thaum

muaj txhiam xws txaus noj seem noj so. Tsis hais thaum twg, _kuv tau xyaum yoog lub caij muaj

noj muaj haus ib yam li yoog lub caij tshaib nqhis, kuv yoog txoj kev nplua nuj, ib yam li yoog txoj kev pluag.

13 Kuv ua tau tas puas tsav yam nyob hauv tus ua kom kuv muaj zog.

14 Tab sis, thaum kuv raug kev txom nyem, nej tau pab kuv, mas nej tau ua zoo kawg.
19 Kuv tus Tswv Ntuj pom tias, nej yuav tsum muaj dab tsi, ces _nws _thiaj _pub tej _ntawd rau nej,

nws yuav pauj qhov nej tau pub rau kuv, vim nws nplua nuj, thiab nws siab dav nyob hauv Yes Xus Pleev.

20 Tus Tswv Ntuj no yog peb Leej Txiv, nws muaj koob meej nto moo mus txog txhiab niag tim puas xyoo. _Ua li.

YOG TSWV NTUJ LO LUS. Nws lub txiaj ntsim.

NTAWV MOO ZOO

MAS TAIS 22 : 1-14

LUB NTSIAB LUS: Tswv Ntuj hu peb tuaj nyob hauv nws lub Ceeb Tsheej ua tej
yam hauj lwm lom zem thiab loj. Tab sis peb yuav tsum tso peb tej hauj lwm me tseg.
Peb yuav tsum hloov tswv yim.
COV LUS NYOB HAUV MAS TAIS NTAWV MOO ZOO :
1 Yes Xus tsa ncauj rov ua paj lug hais rau lawv ntxiv tias :

2 “Ntuj lub Ceeb Tsheej zoo li ib tug vaj uas nws ua tshoob rau nws tus tub.

3 Nws xa tub txib mus nqua hu neeg tuaj noj tshoob, tab sis lawv tsis xav tuaj.

4 Nws rov xa dua ib pab tub txib mus, nws hais li no :

“Nej hais rau cov raug caw tias : Nej saib, kuv twb npaj kuv rooj qav tiav tas,

kuv tej heev nyuj thiab cov tsiaj rog puav leej tua tas lawm.

Txhua yam npaj txhij tas. _Nej _kav tsij tuaj nrog noj tshoob !”

5 Tab sis cov neeg ntawd tsis quav ntsej, lawv nyias mus nyias : ib tug mus tom teb, ib tug mus ua luam.

6 Hos lwm cov tseem nthos nkaus cov tub txib ntes, hiam lawv, muab lawv tua pov tseg.

7 Tus vaj npau taws, nws xa nws cov tub rog mus tua cov neeg txo luag siav ntawd thiab hlawv lawv lub nroog.

8 Ces nws hais rau nws cov tub txib tias : “Rooj tshoob npaj tau txhij, tab sis cov neeg kuv caw tsis tsim nyog noj.

9 Nej mus tom tej ncauj ke, nej pom tsawg leej, nej nqua hu _kom tuaj noj rooj tshoob.”

10 Cov tub txib mus txhua txoj _kev, lawv sau tas txhua leej txhua tus uas lawv ntsib,

cov phem cov zoo tuaj huv tib si. Neeg tuaj puv nkaus lub tsev noj tshoob.

11 Tus vaj chaws los xyuas cov neeg tuaj koom lub ntees tshoob. Nyob ntawd, nws pom ib tug tsis hnav tsoos noj tshoob.

12 Tus vaj hais rau nws tias : “Npawg, koj tsis hnav tsoos noj tshoob, ua cas koj los hauv no ?”

Tus neeg ntawd nyob ntsiag to.

13 Ces tus vaj hais rau cov tub txib tias : “Nej muab nws pav tes pav taw, muab nws pov rau nraum zoov, hauv qhov tsaus ntuj : nyob ntawd, yuav quaj tom hniav nkawv.”

14 Vim tias Ntuj hu ntau leej tuaj, tab sis tsawg leej raug xaiv.”

HUAB TAIS PLEEV. Lub qab ntuj neeg cav txog koj.

Nruab xyoo HNUB CHIV 27 XYOO A

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia (04/10/2026)

ZAJ NYEEM IB

HIS XAIS 5 : 1-7

LUB NTSIAB LUS : Tus Yaj Saub His Xais hais zaj txhais piav txog Tswv Ntuj lub vaj txiv cawv.

COV LUS NYOB HAUV NTAWV HIS XAIS :

1 Kuv yuav hu nkauj rau tus kuv nyiam.

Yog kuv tus phooj ywg zaj nkauj hais txog nws lub vaj txiv cawv.

Tus kuv nyiam muaj ib lub vaj txiv cawv nyob saum ib plag toj av zoo.

2 Nws ncaws, nws dawj pob zeb pov tseg, nws xaiv ib co ceg zoo los cog.

Nyob nruab nrab, nws txhim ib lub sam thiaj. Nws khawb ib lub qhov xwv cawv.

Nws vam tias nws yuav tau sau ib co txiv zoo nkauj. Tab sis lub vaj txi ib co txiv caws maum.

3 Nyem no, cov pej xeem nyob Yes Lus Xas Les, cov neeg nyob Yus Das teb,

kuv thov nej txiav txim saib puas yog kuv txhaum, los yog kuv lub vaj txhaum ?

4 Tshuav dab tsi uas kuv tsis tau ua rau nws ? Kuv vam tias nws yuav txi tej ntwg txiv zoo nkauj,

vim li cas nws txi ib co txiv caws maum ?

5 Vim li ntawd, kuv qhia nej paub tias kuv yuav ua dab tsi rau kuv lub vaj txiv cawv.

Kuv yuav rhuav cov ntoo xov vaj, ces tsiaj yuav ntxo nws, kuv yuav rhuav nws cov laj kab, kom neeg tsuj nws.

6 Kuv yuav ua kom kuv lub vaj puas tsuaj. Yuav tsis muaj neeg tav ntsis, tsis muaj neeg dob nroj,

ces pos thiab nroj yuav laum, kuv yuav ua kom huab txhob tso nag los ywg lub vaj.

7 Tus HUAB TAIS kav tsoom tub rog lub vaj txiv cawv, yog His Xas Lais lub cuab, yog Yus Das lub yig,

lawv yog cov ceg txiv cawv nws hlub. Nws vam tias lawv yuav ua ncaj, tab sis nws tsuas pom lawv ua ntshav ntws.

Nws vam tias lawv yuav mloog Txoj Cai, tab sis nws tsuas hnov neeg ntshai lub suab quaj qw.

YOG TSWV NTUJ LO LUS. Nws lub txiaj ntsim.

Nkauj Paj Nruag HUAB TAIS LUB VAJ TXIV CAWV

(NPN 80-1) (Zaj 66)

Txais: Haiv His Xas Lais yog Huab Tais lub vaj txiv cawv.

1. Koj rho tsob txiv cawv ntawm Hais Nkws Tos teb los.

Koj coj los cog, koj ntiab ntau haiv neeg tawm mus.

Nws cab hmab mus txog ntug hiav txwv;

nws hlav ntsuag mus txog tus niam dej.

2. Ua cas koj rhuav lub laj kab xov nws,

cia cov neeg dua kev de nws tej txiv?

Tej tsiaj qus tuaj noj lwj ntsuav, tej tsiaj nyeg tuaj tshom lwj ntxaws.

3. Tswv Ntuj muaj hwj huam tas nrho, koj rov los mas!

Koj nyob saum ntuj dauv muag los ntsia, koj yuav pom.

Thov koj nqes los xyuas koj lub vaj txiv cawv;

koj nqes los xyuas tsob txiv uas koj txhais tes xis tau cog

thiab xyuas tus tub uas txais koj lub zog.

4. Peb yuav tsis txav mus deb koj ib zaug ntxiv.

Koj ua kom peb muaj txoj sia tshiab, peb yuav hu txog koj lub npe.

Tswv Ntuj muaj hwj huam tas nrho, thov koj coj peb rov los.

Thov cia koj lub ntsej muag ci tuaj rau peb

ces peb yuav tau txais kev cawm.

ZAJ NYEEM OB

FIS LIS POS 4 : 6-9

LUB NTSIAB LUS : Cov neeg ntseeg txog Yes Xus lawv niaj hnub yuav xav tswv yim
thiab txiav siab ua tej yam muaj tsim, tej yam ncaj.

COV LUS PAJ LUG SAU TUAJ RAU COV NTSEEG NYOB FIS LIS POS :
6 Nej tsis txhob txhawj dab tsi. Thaum nej thov Ntuj, thiab nej teev Ntuj,

mas nej kuj yuav ua Ntuj tsaug. Thiab tej yam nej xav tau, nej yuav hais rau Tswv Ntuj paub.

7 Tswv Ntuj txoj kev thaj yeeb zoo tshaj qhov yus xav tau :

nws txoj kev thaj yeeb yuav txuag nej lub siab thiab nej lub tswv yim kom nyob hauv Yes Xus Pleev.

8 Kwv tij sawv daws, tej yam muaj tsim, tej yam ncaj, tej yam huv,

tej yam zoo nyiam, tej yam tsim nyog hwm, tas txhia yam zoo uas neeg ua thiab neeg cav txog,

mas nej yuav ntshaw tas zog.

9 Txhua yam nej tau kawm ntawm kuv, thiab nej tau txais, los nej hnov ntawm kuv,

thiab nej pom nyob hauv kuv, mas nej yuav xyaum coj tas huv tib si.

Ces tus Tswv Ntuj pub kev thaj yeeb yuav nrog nej nyob.

YOG TSWV NTUJ LO LUS. Nws lub txiaj ntsim.

NTAWV MOO ZOO

MAS TAIS 21 : 33-43

LUB NTSIAB LUS: Tswv Ntuj muab nws lub Ceeb Tsheej rau ib co neeg saib. Nws
xaiv ib co neeg uas lawv yuav tu kom zoo.

COV LUS NYOB HAUV MAS TAIS NTAWV MOO ZOO :

33 “Nej mloog dua ib zag paj lug li no.

Muaj ib tug tswv teb, nws cog tau ib thaj txiv cawv. Nws xov laj kab ncig nws thaj teb.

Nws txaug ib lub zeb zom txiv cawv, thiab tseem txhim tau ib lub lawj siab siab cia.

Nws ntiav ib co neeg zov, ces nws tawm rooj mus kev deb.

34 Thaum yuav txog caij de txiv, nws xa nws cov tub txib mus nqa txiv cawv ntawm cov zov teb.

35 Cov neeg zov teb ntes cov tub txib, muab ib tug ntaus, muab ib tug tua, muab pob zeb los txawb lwm tus kom tuag.

36 Tus tswv rov xa _ib co tub txib coob dua thawj cov mus, cov zov teb kuj ua ib yam li lawv ua rau thawj cov.

37 Qhov kawg, nws _xa nws tus tub mus cuag lawv, nws xav tias : “Lawv yuav hwm kuv tus tub.”

38 Tab sis cov zov teb pom dheev tus tub, lawv sib tham tias : “Tus ntawd yog tus yuav txais cuab tam. Tsuag tsuag !

Peb muab nws tua. Lub cuab tam thiaj yuav yog peb tug.”

39 Ces lawv ntes ntho tus tub, coj nws mus pov rau tom ntug _teb _thiab muab nws tua.

40 Thaum tus tswv teb txiv cawv tuaj txog, nws yuav ua dab tsi rau cov zov teb ?”

41 Lawv teb rau Yes Xus tias : “Nws yuav ua kom cov zov teb siab phem ntawd tuag txom nyem ntsuav, ces nws yuav ntiav lwm cov neeg zov nws daim teb.

Thaum txog caij txiv cawv siav, cov ntawd yuav xa cov txiv rau tus tswv.”

42 Yes Xus hais rau lawv tias :

“Nej puas tau nyeem ib zaug li txog cov lus hauv Ntawv tias : Lub pob zeb uas cov tub txhim tsev muab pov tseg, yog lub pob zeb txheem lub ncov ruv tsev. Qhov ntawd yog tuaj ntawm Huab Tais tuaj.

Yog ib yam zoo nkauj zoo saib rau ntawm peb qhov muag.

43 Vim li ntawd, kuv hais rau nej : Ntuj yuav thau lub Ceeb Tsheej ntawm nej los cev

rau ib haiv neeg uas yuav muab siab rau tu kom txi txiv.”

HUAB TAIS PLEEV. Lub qab ntuj neeg cav txoj koj.

Nruab xyoo HNUB CHIV 26 XYOO A

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia (27/09/2026)

ZAJ NYEEM IB

ES XES KIAS 18: 25-28

LUB NTSIAB LUS : Thaum peb raug xwv txheej, peb txhob hais tias yog Tswv Ntuj tsis pov hwm. Peb yuav nco tias lub ntiaj teb neeg nws zoo tsis tas.

COV LUS NYOB HAUV NTAWV ES XES KIAS :

25 Tim li cas nej yuav muaj cuab kav hais tias HUAB TAIS ua tsis ncaj ?

His Xas Lais, nej mloog zoo zoo, puas yog kuv ua tsis ncaj ? Ntshai yog nej ua tsis ncaj los tsis sub ?

26 Tus neeg siab ncaj nws ncaim ntawm nws txoj kev tsis ncaj lawm,

nws ua txhaum, nws yuav tuag nyob hauv nws txoj kev ua txhaum.

27 Tus neeg siab phem nws tso nws txoj kev phem pov tseg,

nws los ua qhov ncaj qhov tsim nyog ua, nws txoj sia yuav nyob.

28 Nws pom dheev nws cov txhaum thiab nws tso nws txoj kev phem pov tseg, mas nws yuav tsis tuag.

YOG TSWV NTUJ LO LUS. Nws lub txiaj ntsim.

Nkauj Paj Nruag HUAB TAIS TXOJ KEV KHUV LEEJ

(NPN 25-1) (zaj 65)

Txais: Huab Tais, thov koj nco ntsoov koj txoj kev khuv leej neeg.

1. Huab Tais, koj ua kom kuv paub koj txoj kev;

qhia koj txoj xub ke rau kuv paub.

Koj coj kuv mus taug koj txoj kev tseeb.

Koj qhia kuv mas vim koj yog tus Tswv Ntuj cawm kuv.

2. Huab Tais, koj nco txog koj lub siab khuv leej neeg

thiab nco ntsoov koj lub siab nyiam uas koj ib txwm muaj.

Koj txhob nco txog kuv cov txhaum.

Huab Tais, koj nco txog kuv vim koj hlub kuv.

3. Huab Tais siab zoo siab ncaj tas nrho!

Nws qhia nws txoj kev rau cov neeg txhaum.

Nws coj cov neeg me mus rau txoj kev ncaj.

Nws qhia nws txoj kev rau cov neeg me paub.

ZAJ NYEEM OB

FIS LIS POS 2 : 1-11

LUB NTSIAB LUS : Cov neeg ntseeg yuav tsis txhob sib ncaim. Yus saib yus yog nws me, xws lis Huab Tais Yes Xus tuaj yeem ua tus me.

COV LUS PAJ LUG SAU TUAJ RAU COV _NTSEEG NYOB FIS LIS POS:

1 Kuv taij nej tsis tseg kom nej rov sib nplij nyob hauv Leej Pleev,

sib nres nyob hauv txoj kev nyiam, sib koom nyob hauv Leej Ntuj Plig,

kom nej muaj kev sib hlub thiab sib khuv leej.

2 Nej ua kom kuv txoj kev zoo siab puv phwj yaws :

ua li mas nej yuav muaj tib lub siab xav, tib lub siab nyiam, tib tug plig, thiab tib lub tswv yim xwb.

3 Nej tsis txhob swb txoj kev ua ob peb lub siab, txhob swb lub koob meej cuav :

nej nyias yuav saib nyias yog tus me dua cov, yuav saib luag tej loj dua nej.

4 Nej nyias txhob nrhiav yam zoo rau nyias ; yuav nrhiav yam zoo rau luag.

5 Nyob hauv nej, sawv daws yuav muaj tib lub tswv yim zoo li Yes Xus Pleev lub.

6 Yes __Xus _Pleev yog Tswv _Ntuj, tiam sis nws tsis cia nws lub hwj chim Tswv Ntuj rau luag hawm :

nws muab nws lub hwj chim hle.

7 Nws yeem ua ib tug qhev, nws yug los ua neeg xws li ib tsoom neeg.

Luag pom nws tus yam ntxwv yog yam ntxwv tib neeg.

8 Nws txo nws qis : nws tuaj yeem mloog Ntuj lus mus txog qhov tuag,

thiab tseem xaiv txoj kev tuag saum ntoo cuam.

9 Vim li ntawd, mas Tswv Ntuj thiaj tsa Yes Xus ua ib tug loj nyob siab siab.

Tswv Ntuj muab lub npe uas nyob siab dua lwm cov npe rau nws.

10 Li ntawd, tus twg hnov tuav txog Yes Xus lub npe, tsis hais nyob saum cov txheej ntuj,

los nyob ntiaj teb no, los nyob nruab yeeb, mas tus ntawd cia li txhos caug hawm.

11 Txhua xeem lus yuav tsum cav tias Yes Xus Pleev yog Huab Tais :

Leej Txiv Tswv Ntuj thiaj muaj koob meej nto moo lug.

YOG TSWV NTUJ LO LUS. Nws lub txiaj ntsim.

NTAWV MOO ZOO

MAS TAIS 21 : 28-32

LUB NTSIAB LUS : Cov neeg xub ntseeg txog Tswv Ntuj, thaum lawv pom tej uas ntseeg tom qab, mas lawv yuav tsum xav tswv yim zoo saib lawv puas mloog Tswv Ntuj raws li lawv lub ncauj hais kam los lawm.

COV LUS NYOB HAUV MAS TAIS NTAWV MOO ZOO :

28 “Nej sim hais saib, nej xav li cas. Ib tug neeg muaj ob tug tub. Nws hais rau thawj tug tias :

“Me tub, hnub no koj mus ua num tom teb txiv cawv.”

29 Tus tub ntawd teb tias : “Kuv tsis xav mus.”

Tab sis, ib me ntsis, nws khuv xim, ces nws cia li mus ua teb.

30 Leej txiv kuj hais rau lwm tus tub ib yam li rau thawj tug thiab.

Tus tub ntawd teb tias : “Huab tais, kuv yuav mus.” Tab sis nws tsis mus.

31 Ob tug tub no, tus twg tau ua raws li leej txiv xav kom ua ?

Lawv teb tias : “Yog thawj tug.” Yes Xus hais rau lawv tias : “Kuv hais tseeb rau nej,

cov sau se thiab cov niam ntiav xub mus hauv Ntuj lub Ceeb Tsheej dua nej.

32 Vim tias, Zam tuaj qhia Txoj Kev ncaj rau nej, tab sis nej tsis ntseeg txog nws.

Hos cov sau se, thiab cov niam ntiav ntseeg txog nws. Tab txawm nej pom lawv tus qauv zoo, tom qab no,

nej kuj tsis hloov siab los ntseeg txog nws.”

HUAB TAIS PLEEV. Lub qab ntuj neeg cav txog koj.

Témoignage de madame Yaj Txiaj Hawj

Par Aumônerie catholique Hmong de France

« Ntawm no yog phab 3 hais txog cov niam Xib Hwb lawv cov lus tim khawv. Cov lus tim khawv no sib lub caij lub nyoog thiaj li xam tau, nws tsom txog poj niam lub meej mom thiab nco pom zej zuag txog cov thawj pab pawg ntseeg hmoob uas cov txiv plig Oblats lawv saib xyuas. Ua tsaug rau cov niam tsev uas lawv txo lawv lub meej mom los qhib lawv lub siab qhia rau peb kawm paub txog haiv neeg Hmoob thawj kauj ruam nyob hauv kev ntseeg tim Los Tsuas Teb. »

Propos recueillis par Joanne Yang

Niam Xib Hwb Txiaj Hawj qhia txog nws tus kheej.

Kuv txiv yog Tooj Xeeb TSAB hos kuv niam yog Ntxhoo Yaj. Kuv txiv coj peb tsev neeg los ntseeg txog Tswv Ntuj xyoo 1963 nyob Los Tsuas Teb. Kuv niam kuv txiv hlub thiab saib me tub, me ntxhais muaj nqes ib yam.

Thaum kuv muaj 9 xyoos thiaj tau xa kuv nrog rau kuv ib tug niam laus thiab kuv ob tug nus peb mus kawm ntawv nyob pem lub nroog Luang Prabang Los Tsuas Teb. Peb cov ntxhais mus nrog cov Leej Phauj Italie nyob, hos cov tub mus nrog cov Txiv Plig Italie nyob. Kuv hu ua Npliaj Tsab, kuv yog niam Xib Hwb Txiaj Hawj Yaj. Kuv tus txiv wb sib qaws los ua txij nkawm nyob ua ke xyoo 1969 nyob lub xeev Sayaboury Los Tsuas Teb. Wb muaj 6 leej me nyuam, 3 leeg tub, 3 leeg ntxhais, muaj 14 leeg xeeb ntxwv thiab yog niam tais yawm txiv koob rau 2 leeg xeeb ntxwv. Wb lub neej los ua txij nkawm nyob ua ke sib hlub, sib pab tau 43 lub xyoos. Kuv tus txiv tau tso peb cov niam tub tseg, ncaim lub ntiaj teb no mus xyoo 2012 lub 11 hli nyob Fab Kis Teb, lub nroog Metz.

Peb lub neej thaum ub xyoo 1970.

Tam sim no kuv laus lawm kuv xav hais rau nej paub tias ua ib tug Xib Hwb tus niam tsev, yuav tau txhawb nws lub zog kom nws muaj siab rau leg nws txoj hauj lwm tshaj Tswv Ntuj Lub Moo Zoo rau peb tsoom hmoob thiab pab tsoom ntseeg nrog rau lub zej zog kev mob nkeeg. Xib Hwb tus niam tsev yuav tsum coj ib tug yam ntxwv zoo, txo nws lub meej mom, ua ib tug neeg siab ntev, siab loj siab dav, hwm nws tus txiv. Ua ib tug niam tsev nquag tu nws lub vaj lub tsev kom huv si.

Tu nws tus txiv thiab nws cov me nyuam kom hnav huv si, cob qhia nws cov me nyuam kom mloog lus, paub cai, hwm niam hwm txiv, hwm cov neeg laus, ua siab zoo rau cov me nyuam hauv lub zos, ua ib tug qauv zoo qhia rau cov me nyuam hauv zos nquag mus koom thaj mis xas hnub chiv. Thaum tus txiv muaj kwv tij neej tsa tuaj hauv lub tsev, yuav tsum hu luag ntxhi thiab ua zaub ua mov pub rau lawv noj.

Muaj tej zaum ntuj teb tag hmo muaj neeg mob, lawv tuaj tsa nws tus txiv, los nws yuav tsum tsis txhob yws, yuav tsum luag ntxhi txhawb cov neeg raug kev nyuaj siab lub zog. Xib Hwb tus niam tsev yuav tsum nyiam thiab hlub, tsis tas li yuav tau pab tsoom ntseeg nrog rau lub zej zog, tshwj xeeb tshaj plaws yog cov neeg txom nyem thiab cov me nyuam ntsuag uas tsis muaj niam muaj txiv hlub.

Nws yuav tsum paub cog kev phooj ywg rau cov niam tsev thiab cov ntxhais hluas hauv lub zos, tsis yog rau cov niam tsev los cov ntxhais ntseeg xwb, vim tias muaj tej lub zos mas tseem muaj cov kwv tij neej tsa uas tseem coj txoj qub kev cai thiab. Muaj tej zaum mas Xib Hwb thiab nws poj niam me nyuam tseem mus nyob tej lub zos uas tsis tau muaj ib yim neeg txais kev ntseeg txog Tswv Ntuj Lub Moo Zoo li.

Xib Hwb tus niam tsev yuav tsum zoo siab hlo qhib rooj lug rau kwv tij neej tsa tuaj tsham Xib Hwb. Muaj tej hmo, mas muaj neeg tuaj nyob hauv yus vaj yus tsev txog tsheej tag hmo, yuav tsum ua siab ntev.

Xyoo 1970 ntawd kuv tus kheej kuv yog ib tug niam tsev los puas ib tug niam Xib Hwb tseem hluas heev. Txhua yam kuv piav no ces kuv yeej tau xyaum coj li hais. Lub caij thaum ntawd kuv tsis tau xav dab tsi li vim tej niam tej txiv txoj kev qhuab qhia me nyuam ua neej nws yeej mus zoo li. Los ua lub neej nyob rau teb chaws Fab Kis Teb no mam li xav tau tias tsis hais lub caij thaum ub los lub caij tam sim no, neeg ntiaj teb yeej saib cov poj niam lub meej mom, lub hwj chim qes tshaj cov txiv neej.

Yog ib qho tu siab rau peb ib tsoom poj niam Hmoob rau lub caij thaum ntawv. Cov Leej Choj Italie thiab Fab Kis lub caij ntawv lawv tsis nco tias yuav tau qhia cov Xib Hwb cov poj niam kom lawv pab tau lawv tus txiv thiab ; Yam li tias kom cov poj niam txawj coj cov ntseeg teev ntuj lub caij uas lawv tus txiv muaj chaw tawm rooj mus lawm, kom lawv txawj qhia ntawv hmoob, qhia xyaum nkauj teev ntuj, qhia cov niam tsev los cov ntxhais hluas xaws khaub ncaws, xaws tshuab. Vim tias lub caij ntawd mas cov niam tsev thiab cov ntxhais hluas nyob pem zos toj siab, lawv xuas tes xaws khaub ncaws hnab xwb.

Lub caij uas peb cov txiv tab tom kawm Tswv Ntuj Txoj Cai Lub Moo Zoo nyob hauv lub Tsev Hauv Paus, peb cov poj niam ces rau siab ntso mus ua vaj zaub, tu tsiaj txhu, ua zaub ua mov rau peb sawv daws noj, tu me tub me nyuam ib yam li ib tug niam tsev hmoob nyob pem zos toj siab xwb tiag.

Nco lub txiaj ntsim…

Kuv xav thiab kuv pom tau tias cov Leej Choj thaum ntawd lawv yeej yog peb niam peb txiv, peb yog lawv cov tub cov nyab, peb cov me nyuam yog lawv cov xeeb ntxwv. Peb muaj txog 70 tawm leej, peb tsis muaj kev txob, kev txhawj txog kev noj kev haus, lawv yog cov nres tas nrho, lawv tseem faib me ntsis nyiaj hnub nyiaj hlis los pab peb thiab. Kuv yuav ris cov Txiv Plig lawv tej txiaj ntsim mus ib txhiab ib txhis. Nco txog lub caij ntawd ces kuv tauv tsis taus lub kua muag li, saib zoo li yog nag hmo xwb.

Lub siab xav hais tias cas cov Leej Choj tsis muaj lub hom phiaj rau peb cov ua nyab, los ntshai lawv twb muaj kev nyuaj siab txaus rau peb lawm. Kuv yeej nco ntsoov lawv tej txiaj ntsim hlub peb, pab peb haiv Hmoob uas nyob pem tej zos toj roob hauv pes. Yog tsis muaj lawv ces yeej tsis muaj hnub no li.

Ntawv kuv txoj kev ntseeg thiab kev tso siab rau peb Txiv Tswv Ntuj…

Nyob hauv peb lub Tsev hauv Paus kawm los ua ib tug Xib Hwb tshaj Tswv Ntuj Lub Moo Zoo nyob rau nroog Luang Prabang Los Tsuas Teb, peb mus koom thaj mis xas txhua hnub thaum 8 teev sawv ntxov, thiab thaum yav tsaus ntuj peb mus hais Txoj Saw Mab Liab.

Txhua pluas mov, peb teev Ntuj ua Ntuj tsaug.

Yog li ntawd peb yuav tsum nco ntsoov txog peb tus Huab Tais Yes Xus cov lus hais qhia rau peb tias :

« Neeg tsis kawg muab mov xwb los yug txoj sia, neeg tseem muab txhua lo lus tawm ntawm Tswv Ntuj lub ncauj los yug txoj siab thiab. » (Mas Tais zaj 4 nqes 4)

Peb yeej yuav tsum mus khwv ua liaj ua teb, thiab ua hauj lwm, kom tau zaub tau mov los yug peb tsev neeg, kom tau nyiaj los siv rau peb tsev neeg thiab. Tiam sis peb kuj yuav tsum qee peb lub sij hawm los teev ntuj thiab mus koom thaj mis xas, yuav tsis tau txhua hnub, tiam sis kom tau rau hnub chiv, npaj siab mus txais lub Cim Yug los yug peb txoj sia thiab peb tus ntsuj plig, kom peb tau lub txiaj ntsim muaj hwj chim, muaj zog los nres peb lub cev.

Nyob hauv peb txoj kev ntseeg, kev tso siab, mas thaj mis xas thiab lub Cim Yug, yog lub txiaj ntsim muaj nqes thiab muaj hwj chim loj tshaj plaws. Peb muaj Huab Tais Yes Xus nyob nrog nraim peb, yog txoj kev uas taug tsis muaj xwm txheej, yog txoj kev coj peb tus plig mus txog pem Tswv Ntuj lub Ceeb Tsheej.

Thaum peb thov ntuj mas peb tsis txhob ua xyem xyav, peb yuav tsum muaj txoj kev ntseeg thiab txoj kev tso siab tiag2, yog peb thov ib yam kev pab ntawm peb Txiv Tswv Ntuj thiab peb tus Huab Tais Yes Xus, yog peb tsis tau txais yam peb thov ntawd mas txhob tag kev cia siab. Peb yuav tsum nco ntsoov tias peb Txiv Tswv Ntuj thiab peb tus Huab Tais Yes Xus paub tias yam twg zoo dua rau peb, mas Nws yuav pub yam zoo dua ntawd rau peb.

Peb yuav tsum nquag teev ntuj, tso peb lub siab npuab rau peb Txiv Tswv Ntuj thiab peb tus Huab Tais Yes Xus kom peb muaj peb Txiv Tswv Ntuj lub hwj huam thiab lub zog loj nyob nrog nraim peb thiab Nws yuav tso Leej Tswv Yim Ntshiab los coj peb txoj hauv kev ua neej, ces peb yuav yeej tas ib puas tsav yam kev nyuaj siab nyob hauv peb lub neej mog.

Peb yuav tsum nquag hais Txoj Saw Mab Liab, yog ib txoj kev teev ntuj tseem ceeb thiab muaj nuj nqes loj tas nrho. Thaum nej hais Txoj Saw Mab Liab, nej txhob xav tias cas yuav ntev ua luaj, nej xav tias txhua zaj Koj nyob zoo Mab Liab yog ib lub teeb ci lam lug coj peb txoj hauv kev mus cuag peb Txiv Tswv Ntuj.

Peb Niam Mab Liab yog peb ib Leej Niam nyob nrog nraim ntawm peb ib sab, Nws paub txhua yam kev nyuaj siab hauv peb lub siab, Nws pab peb daws txhua yam teeb meem nyob ntawm nws Leej Tub peb tus Huab Tais Yes Xus Pleev lub xub ntiag. Nws pab cev peb tej lus thov rau Nws Leej Tub peb tus Huab Tais Yes Xus. Thov kom Peb Leej Txiv Tswv Ntuj, thiab peb tus Huab Tais Yes Xus txoj kev Thaj Yeeb nyob nrog nraim nej mog.

Niam Xib Hwb Txiaj Hawj Yaj

Nruab xyoo HNUB CHIV 25 XYOO A

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia (20/09/2026)

ZAJ NYEEM IB

HIS XAIS 55 : 6-9

LUB NTSIAB LUS : Peb ua txhaum ntau, tab sis Tswv Ntuj siab dav kawg. Peb tso siab tias Tswv Ntuj xav coj peb mus taug tej txoj kev zoo tas nrho.

COV LUS NYOB HAUV NTAWV HIS XAIS :

6 Nej _nrhiav HUAB TAIS mog ! Nyem no yog lub caij zoo ntsib nws.

Nws nyob ze lawm, nej hu txog nws mog !

7 Tus siab phem, nws yuav tso nws txoj kev phem tseg.

Tus siab nkhaus tso nws lub tswv yim lim hiam tseg.

Nws yuav tig los cuag HUAB TAIS. _HUAB TAIS yuav khuv leej nws.

Nws cia li los cuag Tswv Ntuj, vim Tswv Ntuj lub siab zam dav.

8 Nej zaj tswv yim tsis zoo li kuv zaj. _Nej txoj kev tsis zoo li kuv txoj kev.

Yog HUAB TAIS lus ceeb toom.

9 Lub ntuj nyob siab dua lub ntiaj teb, kuv txoj kev nyob siab dua nej txoj kev npaum li ntawd.

Thiab kuv zaj tswv yim nyob siab dua nej zaj tswv yim.

YOG TSWV NTUJ LO LUS. Nws lub txiaj ntsim.

Nkauj Paj Nruag HUAB TAIS NYOB ZE

(NPN 145-3) (zaj 64)

Txais: Huab Tais nyob ze cov neeg hu txog nws.

1. Huab Tais, kuv yuav niaj hnub cav txog koj lub koob meej.

Kuv yuav cav lus zoo txog koj lub npe mus ib txhiab ib txhis.

Huab Tais loj tas nrho, tsim nyog cav txog nws.

Nws loj tas nrho, neeg ntsuas tsis tau.

2. Huab Tais siab zoo, nws khuv leej neeg, nws tsis npau taws sai.

Huab Tais ua zoo rau txhua leej txhua tus.

Nws hlub thiab txuag nws tej dej num.

3. Huab Tais ua yam twg, nws ua ncaj.

Nws lim xeeb rau txhua txoj hauj lwm raws txoj kev ntshiab.

Huab Tais nyob ze cov neeg tuav txog nws lub npe.

Nws nyob ze cov neeg muab tas nrho lawv lub siab lub ntsws hu txog nws.

ZAJ NYEEM OB

FIS LIS POS 1 : 20-24, 27a

LUB NTSIAB LUS : Peb txiav tsis tau tias peb yuav nyob ntev los tsis ntev nyob ntiaj teb no. Tab sis peb txiav tau tias lub caij peb nyob ntiaj teb no mas peb muab siab rau ua cov hauj lwm Tswv Ntuj npaj rau peb ua.

COV LUS PAJ LUG SAU TUAJ RAU COV NTSEEG NYOB FIS LIS POS :

20 Kuv tso siab tas zog tias, yuav muaj li ntawd tiag :

tsis muaj dab tsi yuav ua tau kom kuv poob ntsej muag.

Kuv yuav muaj lub siab ruaj mus li.

Tab yog kuv ciaj los tuag,

mas Leej Pleev yuav muaj hwj chim nyob hauv kuv lub cev.

21 Kuv saib Leej Pleev yog kuv txoj sia.

Kuv saib txoj kev tuag yog ib yam paj tshab.

22 Tsis kav, yog kuv lub cev ua neej nyob ntxiv,

nws tseem yuav ua ib yam hauj lwm txi txiv ;

mas kuv tsis paub tias, kuv yuav xaiv txoj kev ua neej nyob ntxiv, los txoj kev tuag.

23 Kuv hnov ob lub siab ua xyem xyav muab kuv dua _ua ob sab :

ib lub siab xav mus nrog Leej Pleev nyob, 546qhov ntawd yog qhov kuv nyiam dua.

24 Tiam sis, yog kuv lub cev ua neej nyob ntxiv, mas yuav zoo dua rau nej.

27 Nej yuav coj ib lub neej kom tsim nyog Leej Pleev lub Moo Zoo,

txawm tias kuv tuaj txog hauv nej, los kuv tseem nyob deb nej kuj xij,

kuv yuav pom thiab yuav hnov tias nej koom ib lub tswv yim,

koom siab koom ntsws tawm tsam pab txoj kev ntseeg txog lub Moo Zoo.

YOG TSWV NTUJ LO LUS. Nws lub txiaj ntsim.

NTAWV MOO ZOO

MAS TAIS 20 : 1-16

LUB NTSIAB LUS : Tswv Ntuj yuav pub lub Moo Zoo los pub lub txiaj ntsim rau leej twg kuj tau. Tsis muaj leej twg yuav muaj cai yws yws vim nws txais tsawg hos luag tej txais ntau.

COV LUS NYOB HAUV MAS TAIS NTAWV MOO ZOO :

1 Vim tias Ntuj lub Ceeb Tsheej piv tau rau ib tug tswv teb uas thaum kaj ntug,

nws tawm mus nrhiav tub zog tuaj ua nws daim teb txiv cawv.

2 Nws nrog cov tub zog hais haum ib hnub ib lub txiaj nyiag, ces nws xa lawv mus tom daim teb txiv cawv.

3 Ze cuaj teev, nws tawm mus ncig, nws pom ib co neeg nyob dag tom tshav puam.

4 Nws hais rau lawv tias : “Nej mus ua num tom kuv daim teb txiv cawv,

kuv yuav muab nqi kom haum nej.”

5 Ces lawv mus. Kwv yees tav su, nws rov tawm mus ncig, thaum hnub qaij peb teev nws rov mus ua li qub.

6 Thaum hnub qaij ze li tsib teev, nws rov tawm mus ncig dua, nws tseem pom ib co nyob dag, nws hais rau lawv tias :

“Vim li cas nej nyob dag tas hnub ntawm no, tsis ua num dab tsi li ?”

7 Lawv hais rau nws tias : “Vim _tsis muaj neeg ntiav peb.”

Tus tswv hais tias : “Nej mus ua num tom kuv daim teb txiv cawv thiab mas.”

8 Thaum tsaus ntuj, tus tswv teb hais rau tus tswj nyiaj txiag tias :

“Koj hu cov tub zog los, koj muab nyias tus nqe zog rau nyias.

Koj xub hu cov tuaj tom qab zuj zus los xaus rau cov xub tuaj.”

9 Cov tub zog uas tuaj thaum tsib teev hnub qaij los txog, lawv ib leeg tau ib lub txiaj nyiag.

10 Cov xub tuaj los txog, lawv xav tias lawv yuav tau txais nqi zog ntau dua,

tab sis lawv ib leej kuj tau ib lub txiaj nyiag thiab.

11 Thaum lawv txais lawv tus nqi, lawv yws rau tus tswv teb tias :

12 “Cov tuaj tom qab ua num _ib teev xwb, koj muab rau lawv ib yam li muab rau peb,

hos peb, mas peb kwv nra thiab tiv tshav ib hnub.”

13 Ces tus tswv teb hais rau cov xub tuaj ib tug tias : “Npawg, kuv tsis tau ua tsis ncaj rau koj :

wb tsis tau hais haum tias ib hnub ib lub txiaj nyiag no lod ?

14 Txais koj tus nqi zog, koj cia li mus. Kuv xav muab rau tus tuaj tom qab no, ib yam li muab rau koj :

15 kuv tsis muaj cai rho kuv tej nyiaj txiag raws kuv siab lod ? Los yog koj khib vim kuv siab zoo ? »

16 Cov tuaj tom qab yuav tau ua ntej, hos cov ua ntej yuav tuaj tom qab zoo li no.

HUAB TAIS PLEEV. Lub qab ntuj neeg cav txog koj.

Nruab xyoo HNUB CHIV 24 XYOO A

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia (13/09/2026)

ZAJ NYEEM IB

NPES XIS LAS 27 : 30, 28 : 7

LUB NTSIAB LUS : Tus tsis zam rau luag, nws txhob vam tias Tswv Ntuj yuav zam rau nws.

COV LUS NYOB HAUV NTAWV NPES XIS LAS :

30 Kev cib nyeej kev npau taws yog tej yam phem tas nrho,

uas nyob hauv tus neeg txhaum lub siab.

1 Leej twg pauj rau luag mas nws yuav raug Huab Tais pauj rau nws,

vim Huab Tais suav ntsoov tsis nruam ib qho txhaum.

2 Yog koj zam tej yam phem uas luag ua rau koj, ces thaum koj thov Ntuj, Ntuj kuj yuav zam rau koj thiab.

3 Yog ib tug neeg npau taws tas zog rau lwm tus,

mas nws yuav ua zoo li cas thov Tswv Ntuj pab kho nws lub siab kom zoo tuaj ?

4 Nws tsis hlub ib tug neeg zoo li nws, nws puas tsim nyog thov kom Tswv Ntuj zam nws cov txhaum ?

5 Nws yog nqaij xwb, nws tseem cib nyeej thiab ! Leej twg yuav zam txhaum rau nws ?

6 Koj nco txog koj hnub kawg, ces koj yuav tsis ntxub ntxiv.

Koj nco txog tias koj yuav lwj, koj yuav tuag. Ces koj rau siab coj Ntuj cov lus qhia mas !

7 Koj nco txog cov lus qhia, tsis txhob cib nyeej rau luag.

Koj nco tias Huab Tais nyob siab tau cog lus, ces koj hla plaws txhob ntsia tej yam txhaum luag ua rau koj.

YOG TSWV NTUJ LO LUS. Nws lub txiaj ntsim.

Nkauj Paj Nruag HUAB TAIS KHUV LEEJ NEEG

(NPN 103-3)

Txais: Huab Tais siab zoo thiab khuv leej neeg, nws tsis npau taws sai.

1. Kuv tus plig, koj cav lus zoo txog Huab Tais!

Kuv tej siab ntsws, nej cav lus zoo txog nws lub npe ntshiab.

Kuv tus plig, koj cav lus zoo txog Huab Tais.

Koj txhob mom nws txheej.

Koj yuav nco ntsoov nws tej txiaj ntsim.

2. Nws zam koj cov txhaum, nws kho koj tej mob nkeeg.

Nws muab nws lub siab zoo thiab khuv leej neeg roos koj.

Nws cawm koj txoj sia ntawm kev puas tsuaj.

3. Nws tsis nrog neeg ua plaub, nws tsis cib nyeej.

Nws tsis nplua peb raws li peb cov txhaum.

Nws tsis pauj kev phem rau tej txhaum peb tau ua.

4. Huab Tais lub siab hlub cov neeg hwm Ntuj.

Nws tshem peb cov txhaum mus deb peb

npaum li sab hnub tuaj nyob nrug deb sab hnub poob.

ZAJ NYEEM OB

LOS MAS 14 : 7-9

LUB NTSIAB LUS : Peb ua yam twg mas peb yuav ua nyob hauv Huab Tais, thiab vim Huab Tais Yes Xus. Yes Xus yog peb tus Tswv.

COV LUS PAJ LUG SAU TUAJ RAU COV NTSEEG NYOB LOS MAS :

7 Peb tsis muaj ib tug uas nws ua _neej vim nws xav rov tsob hwb nws xwb ;

tsis muaj ib tug tuag uas nws xav tuag rau nws xwb.

8 Yog peb ua neej nyob, mas peb nyob tsob hwb Huab Tais ;

yog peb tuag, mas peb kuj tuag rau Huab Tais.

Txawm peb ua neej nyob, los peb tuag, mas peb yog Huab Tais tug.

9 Vim Leej Pleev tuag, thiab nws rov muaj txoj sia kom tau ua tsoom neeg ciaj neeg tuag tus Huab Tais.

YOG TSWV NTUJ LO LUS. Nws lub txiaj ntsim.

NTAWV MOO ZOO

MAS TAIS 18 : 21-35

LUB NTSIAB LUS : Peb yuav tsum zam rau luag mus li, vim Tswv Ntuj zam rau peb mus li.

COV LUS NYOB HAUV MAS TAIS NTAWV MOO ZOO :

21 Thaum ntawd, Pob Zeb txav los hais rau Yes Xus tias :

“Huab Tais, yog kuv tus kwv ua txhaum rau kuv, kuv yuav zam pes tsawg zaus ?

Kuv puas yuav zam txog xya zaus ?”

22 Yes Xus hais rau Pob Zeb tias : _“Kuv tsis hais rau koj tias ‘xya zaus’.

Kuv hais rau koj tias, ‘xya caum xya zaus’.”

23 “Li ntawd, Ntuj lub Ceeb Tsheej yog zoo li ib tug vaj uas xav

nrog nws cov tub txib txheeb nws tej nyiaj txiag.

24 Thaum lawv pib txheeb, ces luag coj ib tug tub txib uas

tshuav nuj nqis ib vam nras nyiaj, tuaj rau tus vaj.

25 Tus tub txib tsis muaj dab tsi them, ces tus vaj kom luag muab nws thiab nws poj niam,

nws cov me nyuam thiab tas nws lub cuab tam huv si muag, los them cov nuj nqis ntawd.

26 Tus tub txib txhos caug ntua ntawm tus tswv ko taw,

nws pe tus tswv, nws hais tias : “Thov koj ua siab ntev rau kuv, kuv yuav them kom tas rau koj.”

27 Tus tswv hlub tus tub txib,

ces nws tso tus tub txib mus thiab tseem zam cov nuj nqis huv tib si rau nws.

28 Thaum tus tub txib tawm rov qab mus, nws ntsib nws ib tug npawg,

uas tshuav nqi ntawm nws ib puas lub txiaj nyiag. Tus tub txib ntawd nthos nkaus nws tus npawg caj dab,

zawm tus npawg caj pas, thiab hais tias : “Them koj cov nqi.”

29 Nws tus npawg txhos caug ntua ntawm nws ko taw thov tias :

“Thov koj ua siab ntev rau kuv, kuv yuav them rau koj.”

30 Tab sis tus tub txib ntawd tsis kam li, nws kom luag muab nws tus npawg

kaw hauv tsev loj faj mus txog hnub tus npawg them nuj nqis tas huv tib si rau nws.

31 Tus tub txib cov phooj ywg pom nws ua li ntawd, lawv chim kawg,

lawv mus qhia tej ntawd rau lawv tus tswv.

32 Ces tus vaj hu tus tub txib tuaj, nws hais rau tus tub txib ntawd tias :

“Tub txib siab phem dab tsi ! _Cov nuj nqis uas koj tshuav ntawm kuv, kuv twb zam tas huv si rau koj, vim koj thov kuv.

33 Ua cas koj tsis hlub koj tus npawg zoo li kuv tau hlub koj ? »

34 Ces tus vaj npau taws heev, nws muab tus tub txib rau cov tub hiam neeg mus txog hnub

nws them nws cov nuj nqis tas huv tib si.

35 Nej txhua tus, yog nej tsis zam hauv nruab siab rau nej ib tug kwv tij,

mas kuv Txiv nyob saum Ntuj kuj yuav ua ib yam li ntawd rau nej thiab.

HUAB TAIS PLEEV. Lub qab ntuj neeg cav txog koj.

Nruab xyoo HNUB CHIV 23 XYOO A

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia (06/09/2026)

ZAJ NYEEM IB

ES XES KIAS 33 : 7-9

LUB NTSIAB LUS : Peb tsoom neeg yuav sib pab mloog Tswv Ntuj lus. Yog yus tsis pab luag kom luag tso luag txoj kev yuam kev tseg mas yus nrog luag muaj txhaum.

COV LUS NYOB HAUV NTAWV ES XES KIAS :

7 Neeg leej tub, kuv tau tsa koj ua tus peeb zov His Xas Lais lub tsev.

Thaum koj hnov kuv lub ncauj hais ib lo lus mas koj yuav qhia lawv paub.

8 Yog kuv hais rau tus siab phem tias : « Neeg siab phem, koj yuav tuag ! »

Tab sis koj tsis qhia tus siab phem kom nws tso nws qhov phem tseg,

mas yog tus siab phem yuav tuag vim nws cov txhaum,

tab sis kuv yuav nug koj txog nws txoj sia, ces koj yuav tsum them.

9 Yog koj xub qhia tus siab phem kom nws tso qhov phem tseg thiab tig los yuav lub siab tshiab,

tab sis nws tsis tig los yuav lub siab tshiab, mas nws yuav tuag vim nws muaj txhaum.

Hos koj yuav cawm koj txoj sia.

YOG TSWV NTUJ LO LUS. Nws lub txiaj ntsim.

Nkauj Paj Nruag YOG NEJ HNOV HUAB TAIS LUB SUAB

(NPN 95)

Txais: Hnub no yog nej hnov Huab Tais lub suab lawm, nej tsis txhob cia nej lub siab tawv li pob zeb.

1. Nej tuaj, peb sawv daws hu nkauj zoo siab cav txog Huab Tais!

Peb qw suab zoo siab hawm lub Tsua cawm peb.

Peb txav los ntawm nws xub ntiag ua nws tsaug.

Peb npuaj teg hu nkauj cav txog nws.

2. Nej chaws los, peb khoov cev, peb pe.

Peb txhos caug hawm tus Huab Tais tsim peb los.

Nws yog peb tus Tswv Ntuj, peb yog nws haiv neeg,

yog pab yaj nws txhais tes hwj.

3. Hnub no, nej cia li mloog Huab Tais lub suab.

Nej tsis txhob cia nej lub siab tawv li pob zeb

zoo li thaum nej nyob Mes Lis Npas

thiab nyob Mas Xas hauv teb chaws suab puam.

Thaum ntawd, nej cov yawg koob twb pom kuv cov hauj lwm muaj hwj huam,

tsis kav lawv tseem twv kuv thiab sim kuv.

ZAJ NYEEM OB

LOS MAS 13 : 8-10

LUB NTSIAB LUS : Txoj cai yog ib lub laj kab uas peb yuav tsis txhob hla. Tab sis txoj kev peb yuav taug yog txoj kev nyiam. Tsis yog txoj kev taug laj kab.

COV LUS PAJ LUG SAU TUAJ RAU COV NTSEEG NYOB LOS MAS:

8 Nej tsis txhob tshuav luag nuj luag nqi.

Yam nuj nqis uas nej tshuav ntawm luag tej, mas yog lub siab nyiam luag.

Vim tus nyiam luag tej, mas nws ua raws li Ntuj Txoj Cai tas huv tib si lawm.

9 Ntuj cov lus qhia hais tias :

“Koj txhob zes luag txij luag nkawm, koj txhob tua neeg,

koj txhob ua tub sab, koj lub siab yuav tsis txhob ntshaw” : ;

cov lus qhuab qhia no thiab lwm cov lus qhia tas huv tib si lub ntsiab txhais tias :

“Koj yuav nyiam luag tej ib yam li koj nyiam koj.”

10 Tus twg -nyiam luag tej, mas nws tsis ua ib qho phem rau luag.

Ua li mas Txoj Cai lub ntsiab yog txoj kev nyiam.

YOG TSWV NTUJ LO LUS. Nws lub txiaj ntsim.

NTAWV MOO ZOO

MAS TAIS 18 : 15-20

LUB NTISAB LUS : Nyob hauv Yes Xus lub Koom Txoos peb ua ke ua tas puas tsav yam. Peb kuj ua ke sib pab dim ntawm kev txhaum.

COV LUS NYOB HAUV MAS TAIS NTAWV MOO ZOO :

15 “Yog koj ib tug kwv tij ua txhaum, koj yuav mus cuag nws.

Thaum neb ob leeg nyob ua ke, koj yuav ntuas nws. Yog nws mloog koj, mas koj pab tau nws lawm.

16 Yog nws tsis mloog koj, koj yuav coj ib leeg los ob leeg nrog koj mus dua,

kom ob tug -los peb tug tim khawv nrog tu tej lus ntawd.

17 Yog nws tsis mloog cov nrog koj thiab, koj yuav qhia lub Koom Txoos paub.

Yog nws tseem tsis mloog lub Koom Txoos hais thiab,

ces koj yuav saib nws zoo li ib tug neeg teev pej kum dab los ib tug sau se.

18 Kuv hais tseeb rau nej : nej khi yam twg nyob ntiaj teb no,

mas Ntuj yuav saib yam ntawd yog khi nyob saum ntuj.

Nej daws yam twg nyob ntiaj teb no, mas Ntuj kuj yuav saib yam ntawd yog daws nyob saum ntuj.”

19 “Kuv hais tseeb rau nej tias :

yog muaj ob leeg hauv nej koom suab thov dab tsi nyob ntiaj teb no,

mas kuv Txiv nyob saum ntuj yuav pub yam ntawd rau nkawd.

20 Thaum ob leeg los peb leeg sib sau ua ke tuav txog kuv lub npe, mas kuv nyob hauv nruab nrab lawv.”

HUAB TAIS PLEEV. Lub qab ntuj neeg cav txog koj.

Tshaj moo qaij qaug nyob Centre Val de Loire

Par Aumônerie catholique Hmong de France

Xa lub moo tu siab rau nej sawv daws paub tias : YAJ Txoov Yeeb nws tau tag sim neej rau hnub 28/08/2026 lawm.
Tsev xyom cuab yuav npaj ua nws lub ntees rau hnub 12-13/09/2026. Nyob rau lub salle La Ferme de Lorris, 112 Route de la Grange des Champs, 45260 Lorris, France.
Nej sawv daws cov uas txheeb ze, yog phooj ywg los yog paub txog nws. Yog nej xav tuaj koom nws lub ntees ua zaum kawg los tsev xyom cuab zoo siab txais nej sawv daws.
Yog tus uas nws tuaj tsis tau, ho muaj lub siab hlub tshua thiab xav pab nyiaj tshav ntuj tuaj txhawb nws lub ntees, los tsev xyom cuab qhib tau ib compte Leetchi tshwj xeeb rau YAJ Txoov Yeeb lub ntees. Nej xa ncaj qha rau raws li no : qhib cagnotte Leetchi http://urlr.me/RQTngj
Tsev xyom cuab ua nej sawv daws tsaug thiab yuav nco ntsoov nej tej txiaj ntsim, tej kev pab kev txhawb mus li mog.

Programme des funérailles :

Samedi 12 septembre:
-10h Cérémonie d’accueil du défunt
Kab ke txais tus qauv

-20h Prière et cérémonie funéraire
Kab ke Teev Ntuj xa plig

-21h30 Diaporama de la vie de Ya Tsong Yeng
Témoignages, suivis de la veillée

Dimanche 13 septembre:
-10h Célébration de la messe par Père Antoine Chi Yang /txiv plig Cwj Vuam Chiv

-14h Prière du Chapelet

Lundi 14 septembre:
-10h Cérémonie religieuse à l’église « des Bordes » 45460 Les Bordes
suivie de l’inhumation au cimetière

La famille vous remercie de votre présence et de vos prières

Témoignage de madame Vaj Nyiaj Lwm

Par Aumônerie catholique Hmong de France

» Txuas ntxiv no mus yog phab 2 nthuav txog cov niam Xib Hwb cov lus tim khawv. Cov lus tim khawv no qhia txog hais tias txoj kev thoob tsib nws muaj thiab loj hlob li cas los ntawm ib tug poj niam hmoob lub siab uas yog ib leej niam thiab ib leej txij nkawm Xib Hwb uas txo tau lub hwj chim « .

Propos recueillis par Joanne Yang

1/ Niam Xib Hwb Nyiaj Lwm qhia txog nws tus kheej.

Kuv yog nkauj hmoob Lauj. Kuv hu ua Maiv Yias.

Kuv niam hu ua Cib Xyooj, kuv txiv yog Tooj Txhim Lauj.

Kuv yug nyob lus zos Hav Tshauv teb chaws Noom Hej nyob Los Tsuas Teb. Kuv yug lub 5 hli ntuj hnub tim 12 xyoo 1952 . Ces kuv muaj 73 Xyoo.

Kuv yog tus me nyuam thib 4 ntawm kuv niam thiab kuv txiv.

Kuv muaj 2 tug ntxhais thiab 6 tug tub. Tam sim no kuv cov xeeb ntxwv muaj li 22 leej.

Tsis tau muaj cov xeeb leej xeeb ntxwv .

Thaum kuv los yuav txiv kuv muaj li 14 xyoo ntau. Kuv tus txiv wb los sib yuav cog lus thaum lub 2 hli xyoo 1967 nyob hauv lub tsev teev ntuj nyob Looj Ceeb.

Kuv lub neej nrog kuv niam kuv txiv lawv nyob mas kuv yeej tau mus ua luam los pab kuv tsev neeg.

2/ Txoj kev ntseeg nws loj hlob thaum los ua ib tug niam Xib Hwb

Thaum kuv me, kuv tsev neeg tsis yog neeg ntseeg.

Kuv los nrog kuv tus txiv lawm, kuv mam li los kawm kev ntseeg nyob rau Vientiane. Txais lub cim ntxuav thiab.

Lub caij thaum ntawv mas cov poj niam hmoob tsis muaj kev kawm dab tsi.

Tsawg tsawg tus thiaj li tau mus kawm ntawv nrog cov Leej Phauj.

Kuv yog ib tug ntxhais hmoob tsis tau mus kawm ntawv ces kuv yeej tsis paub sau ntawv thiab nyeem ntawv li.

Kuv nco hais tias kuv xav xav kawm ntawv, kuv tau thov txiv plig Nyiaj Pov kom tso cai rau kuv mus kawm.

Kuv taij dhau lawm ces txiv plig kuj kam tso kuv mus sim ib lub hli.

Kuv tau mus tiam sis kuv los tsis ncav cov hauj lwm nyob hauv txiv plig lub tsev ces cia li tso tseg lawm xwb.

Thaum ntawv Hmoob tseem muab poj niam tso qis qis. Poj niam Hmoob tsis muaj feem dab tsi .

Kuv tus txiv wb los mus nyob hauv txiv plig, kawm ua txoj hauj lwm Xib Hwb.

Muaj cov niam Xib Hwb tuaj nrog lawv cov txiv thiab.

Sawv daws tuaj nyob coob coob ua ke.

Kuv yog ib tug tsis paub ntawv ces cia li ua rau kuv muaj kev nyuaj siab. Tej yam no ua rau kuv qaug zog.

Kuv ua tsaug rau kuv tus txiv vim nws kuj tau hais ib lo lus txhawb kuv siab lub caij ntawd. Nws qhia kom kuv ua taus siab loj thiab ntseeg txog kuv tus kheej. Li no kuv thiaj li nthuav tau kuv lub peev xwm tawm tuaj no.

Dhau no mus ces wb tau mus nrog Hmoob nyob hauv lawv lub zos Roob Kuj Twm.

Kuv nco ntsoov txog kuv niam kuv txiv lawv txoj kev qhuab qhia yus thaum yus me : lawv qhia koj yus hais lus zoo rau lwm leej lwm tus, koj yus coj zoo rau luag tej.

Yog li no ces kuv yeej mus hais lus nrog cov niam tsev hauv zos, mus nrog lawv ua teb, thov lawv tuaj nrog kuv mus ua teb thiab, sib pab ua noj ua haus, muaj kev tso siab.

Cov Hmoob hauv zos cia li tsis pub wb ncaim lawv.

Txiv plig tsuas xa cov Xib hwb mus nyob ib thaj chaw rau ib lub sij hawm xwb. Dhau mus ces txiv plig xa dua lwm khub niam txiv Xib Hwb tuaj mus lawm.

Lo lus zoo muaj nyob hauv kuv lawm ces nws txhawb tau kuv txoj kev ntseeg kom ruaj khov hauv kuv lub neej.

Kuv yeej xav tau hais tias yuav tau hais lus zoo rau yus tej me nyuam, maj mam qhia rau tej me nyuam. Me nyuam yog me nyuam tiag tiag ces nws tsis nkag siab li tus neeg laus.

Tej me nyuam txais lo lus zoo zoo ces lawv thiaj li ncawg yus. Yog li no, kuv yeej tau hais rau kuv tus txiv hais tias kom tso txoj hauj lwm coj qhuab qhia me nyuam rau kuv mam li tuav.

Kuv tsis paub ntawv tiam sis kuv yeej ntseeg rau kuv tus kheej tias hais lus zoo yog ib txoj kev yuav pab tau lwm leej lwm tus kom nyiam mus xyaum rau qhov zoo xwb.

Muaj tej zaum, kuv tau mus txhaj tshuaj rau cov neeg nyob hauv zos thiab pab muab tshuaj rau lawv.

Cov Leej Choj tau qhia peb txhaj tshuaj. Yus npaj yus lub siab khov kho thiab xyaum ob peb zaug ces yus yeej txhaj tau lawm.

Xyoo 1974, wb rov qab los nram Vientiane.

Txawm li cas los, wb yeej tuav wb lub meej mom pej xeem xwb.

3/ Ua ib tug zoo « xib hwb » rau kuv cov me nyaum

Wb cov me nyuam coob coob thiab wb yeej muaj muaj qhua los kuv yeej cob kuv cov me nyuam kom nyob tau ntsiag to, nyob twj ywm.

Kuv tsis paub ntawv, tsis tau kawm ntawv ces yeej qhia tsis tau dab tsi pab kuv cov me nyuam. Tiam sis, kuv lo lus zoo rau kuv cov me nyuam kuv yeej muaj tas mus li.

Niaj hnub no, tej me nyuam twb laus tas los lawv muaj lus dab tsi nug ces lawv yeej tos hais rau kuv xwb. Kuv qhia qhov zoo, hais lus zoo txhawb lawv lub siab ces lawv cia li muaj siab rau lawv txoj kev kawm ntawv.

Kuv mus txog qhov twg los tej txheeb ze, tej kwv tij neej tsa, sawv daws xav tau kuv ib lo lus zoo qhuab ntuas rau lawv coj mus kho lawv lub neej…

Kuv twb tsis paub dab tsi los lawv hais tias lawv xav tau kuv ib lo lus zoo khaws mus ua neej.

Lawv yuav coj kuv lo lus mus hloov lawv lus siab lub ntsws… Lawv tsis taij kuv ib yam dab tsi lawv xav tau kuv lo lus zoo.

Kuv ib txwm xav hais tias yus yuav tau txo yus lub hwj chim kom leej twg los thiaj li cuag tau yus thiab nyob tau ze ntawm yus.

Txoj kev ua siab dawb nyuaj kawg tiam sis yuav tau ua kom tau kom tag yus lub neej.

4/ Sob lus khaws los ua neej

Ua qhov zoo thiaj li tau txais lo lus zoo thiab lub npe zoo tag yus lub neej.

Ua siab ntev thiaj yog qhov yeej.

Nyob hauv Lukas 8 : 15

« 15 Hos cov noob poob hauv thaj av zoo, yog cov uas tau hnov Lo Lus, lawv khaws Lo Lus rau hauv ib lub siab loj siab dav, ces lawv txi txiv vim lawv lub siab ruaj. »

Kuv ua tsaug rau Huab Tais Tswv Ntuj vim kuv ntseeg tau tias yeej muaj Leej Ntuj Plig nyob hauv kuv ; li no kuv thiaj li ua tau lub siab ntev . Yam no yog yam ua rau kuv zoo siab tshaj plaws.

Nruab xyoo HNUB CHIV 22 XYOO A

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia (30/08/2026)

ZAJ NYEEM IB

YES LES MIAS 20 : 7-9

LUB NTSIAB LUS : Nyob hauv tus ntseeg txog Yes Xus tiag mas Tswv Ntuj lo lus yog zoo li ib co hluav taws : tus ntseeg yuav nyob twj ywm tsis tshaj Tswv Ntuj cov lus tsis tau. Nws yuav tsum tshaj Tswv Ntuj cov lus.

COV LUS NYOB HAUV NTAWV YES LES MIAS :

7 HUAB TAIS, koj ntxias tau kuv lawm. Kuv mag koj ntxias.

Koj nthos tau kuv lawm, koj yeej kuv lawm. Luag niaj hnub thuam kuv, thiab hnyos kuv.

8 Kuv hais lus zaum twg mas kuv yuav tsum qw thiab tshaj tias :

« Peb teb chaws yuav raug luag ntaus, peb teb chaws yuav ploj mus. »

Tas niaj tas hnub HUAB TAIS lo lus uas kuv tshaj ua kom kuv txaj muag thiab raug luag thuam.

9 Ces kuv hais tias : -« Kuv yuav tsis nco txog HUAB TAIS ntxiv, kuv yuav tsis tuav txog nws lub npe lawm.

Tab sis nyob hauv kuv nruab siab thiab hauv kuv tej pob txha mas cuag li muaj hluav taws hlawv kuv. »

Kuv siv zog cheem kuv kom cov hluav taws ntawd txhob tshwm rau sab nraud, tab sis kuv nyiaj tsis taus li.

YOG TSWV NTUJ LO LUS. Nws lub txiaj ntsim.

Nkauj Paj Nruag KUV TUS PLIG SEEV YEES TXOG TSWV NTUJ

(NPN 63-1)

Txais: Kuv tus plig nqhis txog koj, zoo ~~pav~~ puav tam li av qhuav tsis tau dej yug.

1. Tswv Ntuj, koj yog tus kuv nrhiav! Kuv lub cev seev yees txog koj.

Kuv tus plig nqhis txog koj, puav tam li av qhuav tsis tau dej yug.

2. Kuv mus ntsia koj nyob hauv lub tuam tsev ntshiab, kuv pom koj lub zog thiab lub hwj chim.

Koj txoj kev hlub muaj nqis dua txoj sia, Kuv lub ncauj yuav cav txog koj lub koob meej.

3. Kuv yuav cav txog koj tas kuv sim neej.

Kuv yuav tsa tes hawm koj thiab hu txog koj lub npe.

Kuv tus plig zoo siab puav tam li tus tau noj ib roog qav.

Kuv di ncauj hom khaj, kuv lub ncauj yuav cav txog koj.

4. Koj tau pab kuv, kuv nqua suab hu nkauj nyob hauv koj phab tis qhov ntxoov.

Kuv tus plig nyob ruaj nreb hauv koj, koj phab xis hwj kuv.

ZAJ NYEEM OB

LOS MAS 12 : 1-2

LUB NTSIAB LUS : Peb txi Ntuj tau nyob hauv cov Txoos, yog vim niaj hnub peb muab peb lub siab los txi rau Ntuj, yam li niaj hnub peb xav xyaum ua ntxim Tswv Ntuj siab.

COV LUS PAJ LUG SAU TUAJ RAU COV NTSEEG NYOB LOS MAS :

1 Kuv tuav txog tus Tswv Ntuj khuv leej neeg lub npe,

kuv thov qhuab ntuas nej, kom nej muab nej lub cev los txi rau Tswv Ntuj,

zoo li ib co txim ntshiab muaj txoj sia ntxim Tswv Ntuj lub siab.

Qhov ntawd yog txoj kev teev Ntuj nyob hauv nruab siab.

2 Nej tsis txhob coj ib tug cwj pwm raws li lub ntiaj teb :

vim nej twb hloov ib lub tswv yim tshiab lawm.

Lub tswv yim tshiab ntawd yuav ua kom nej hloov txhua yam,

kom nej txawj tsom Tswv Ntuj lub siab xav, tsom qhov zoo,

tsom qhov ntxim Tswv Ntuj siab, tsom qhov zoo tshaj plaws.

YOG TSWV NTUJ LO LUS. Nws lub txiaj ntsim.

NTAWV MOO ZOO

MAS TAIS 16 : 21-27

LUB NTSIAB LUS: Tus xav ua Yes Xus thwj tim nws yuav zoo siab ua kom nws txoj sia ploj, nws thiaj muaj txoj sia nyob hauv Yes Xus.

COV LUS NYOB HAUV MAS TAIS NTAWV MOO ZOO :

21 Txij hnub ntawd los,

Yes Xus pib qhia nws cov thwj tim tias nws yuav tsum mus Yes Lus Xas Les.

Nyob ped, nws yuav raug cov txwj laus, cov thawj leej choj thiab cov Kws Ntawv Ntshiab tsim nws.

Lawv yuav muab nws tua. Hnub peb, nws yuav sawv rov los.

22 Pob Zeb rub Yes Xus los ntawm nws, nws nroo rau Yes Xus tias :

« Huab Tais, xav kom Tswv Ntuj txuag koj ! Tsis pub kom tej yam ntawd tuaj raug koj ! »

23 Tab sis, Yes Xus fee hlo, nws hais rau Pob Zeb tias :

« Xas Tas, koj lawv kuv qab. -Koj thaiv kuv kev. Vim qhov koj xav, tsis yog qhov Tswv Ntuj xav,

yog tej yam neeg xav xwb. »

24 Yes Xus hais rau nws cov thwj tim tias : “Yog leej twg xav los raws kuv, nws yuav tsum nrauj nws,

nws yuav kwv nws tus ntoo cuam, nws yuav lawv kuv qab.

25 Vim leej twg xav cawm nws txoj sia, mas nws yuav plam nws txoj sia.

Hos leej twg plam nws txoj sia vim kuv, mas nws yuav rov tau nws txoj sia.

26 Yog ib tug neeg txeeb tau tas lub ntiaj teb huv tib si los ua nws tug,

tab -sis yog nws txoj sia ploj lawm, mas nws tau dab tsi ?

Neeg yuav muab dab tsi los pauv tau nws txoj sia ?

27 Vim tias Neeg Leej Tub yuav nrog nws cov Tshiab los, muaj Leej Txiv lub hwj chim,

ces nws yuav pauj rau nyias raws li nyias cov hauj lwm.

HUAB TAIS PLEEV. Lub qab ntuj neeg cav txog koj.

Aumônerie catholique des Hmong de France

Auteur

Author Archive by Aumônerie catholique Hmong de France

Nruab xyoo HNUB CHIV 28 XYOO A

Nruab xyoo HNUB CHIV 27 XYOO A

Nruab xyoo HNUB CHIV 26 XYOO A

Témoignage de madame Yaj Txiaj Hawj

Nruab xyoo HNUB CHIV 25 XYOO A

Nruab xyoo HNUB CHIV 24 XYOO A

Nruab xyoo HNUB CHIV 23 XYOO A

Tshaj moo qaij qaug nyob Centre Val de Loire

Témoignage de madame Vaj Nyiaj Lwm

Nruab xyoo HNUB CHIV 22 XYOO A