Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia
ZAJ NYEEM IB
HAUV PAUS 12 : 1 – 4a
LUB NTSIAB LUS : Tswv Ntuj hu Has Nplas.
COV LUS NYOB HAUV NTAWV HAUV PAUS HAIS TIAS :
1 HUAB TAIS hais rau Has Nplas tias :
« Tso koj lub teb chaws tseg, tso koj tsev neeg,
koj tej txheeb ze thiab koj txiv lub vaj tse tseg,
koj mus nyob lub teb chaws uas kuv yuav qhia rau koj.
2 Kuv yuav tsa koj ua ib haiv neeg loj, kuv yuav foom hmoov zoo rau koj,
thiab kuv yuav ua kom koj lub npe nto moo loj.
Koj yuav nqa txoj hmoov zoo rau txhua leej txhua tus.
3 Kuv yuav foom hmoov zoo rau cov neeg uas foom hmoov zoo rau koj,
kuv yuav foom hmoov phem rau cov uas foom phem rau koj.
Tas txhua haiv neeg nyob ntiaj teb yuav muab koj lub npe los sib foom hmoov zoo.”
4 Has Nplas sawv kev mus raws li HUAB TAIS kom nws mus.
YOG TSWV NTUJ LO LUS. Nws lub txiaj ntsim.
Nkauj Paj Nruag PEB TSO SIAB RAU HUAB TAIS
(NPN 33-1)
Txais: Huab Tais, thov koj khuv leej peb mas ! Peb tso siab rau koj.
1. Huab Tais lo lus yog lus ncaj, nws cov dej num nyob ruaj nreb.
Nws nyiam kev ncaj thiab kev haum pheej.
Huab Tais txoj kev hlub ntws puv lub ntiaj teb.
2. Huab Tais zov cov neeg hwm nws.
Nws zov cov neeg tso siab rau nws lub siab zoo.
Nws npo lawv dim ntawm kev tuag.
Nws txuag lawv txoj sia thaum lub teb chaws raug kev tshaib kev nqhis.
3. Peb tus ntsuj plig tos ntsoov Huab Tais.
Nws yog tus pab peb, nws yog peb daim leem phiaj.
Huab Tais, thov kom koj lub siab hlub roos peb.
Peb chaw tso siab yog nyob hauv koj.
ZAJ NYEEM OB
2 TIS MOS TES 1 : 8b – 10
LUB NTSIAB LUS : Cov txiaj ntsim uas Tis Mos Tes tau txais.
COV LUS UAS PAJ LUG SAU TUAJ RAU TIS MOS TES.
8b Koj yuav zoo siab nrog kuv raug txom nyem vim lub Moo Zoo.
Koj muaj Tswv Ntuj lub zog nres koj.
9 Tswv Ntuj yog tus cawm peb.
Nws lo lus ntshiab hu peb, tsis yog vim peb cov dej num.
Nws hu peb vim nws pom zoo hu, thiab vim nws xav pub txiaj ntsim.
Tswv Ntuj twb pub nws cov txiaj ntsim rau peb txij puag hnub
txheej tshoj thaum ub nyob hauv Yes Xus Pleev.
10 Nyiam no, lub txiaj ntsim ntawd tawm tuaj rau pom xyeem
nyob hauv Yes Xus Pleev, tus cawm peb.
Yes Xus rhuav kev tuag, thiab nws lub Moo Zoo ua kom txoj sia tsis txawj tuag ci tuaj.
YOG TSWV NTUJ LO LUS. Nws lub txiaj ntsim.
NTAWV MOO ZOO
MAS TAIS 17 : 1 – 9
LUB NTSIAB LUS : Yes Xus lub hwj chim tawm los.
COV LUS NYOB HAUV MAS TAIS NTAWV MOO ZOO.
1 Tau rau hnub tom qab, Yes Xus coj Pob Zeb,
Yas Kos thiab nws tus kwv Zam mus rau ib qho,
ces lawv nce mus saum ib lub roob siab.
2 Yes Xus ib ce hloov tas nyob ntawm lawv xub ntiag :
nws lub ntsej muag ci ntsa iab zoo li lub hnub,
nws cov ris tsho ci dawb paug li qhov pom kev.
3 Ces Mais Xes thiab Es Lias nkawd tawm los rau lawv pom.
Nkawd nrog Yes Xus tham.
4 Pob Zeb hais rau Yes Xus tias :
« Huab Tais, peb nyob ntawm no mas zoo tas nrho.
Yog koj kheev no, kuv yuav ua peb lub tsev tsam phooj, ib lub rau koj,
ib lub rau Mais Xes, ib lub rau Es Lias. »
5 Pob Zeb tseem tab tom hais li ntawd,
ces muaj ib tw huab ci dawb paug los ntxoov npog nkaus lawv,
ces ib lub suab hais hauv twv huab tuaj tias :
« Tus no, yog kuv leej tub uas kuv nyiam,
nws yog kuv qhov chaw zoo siab, nej mloog nws mog ! »
6 Cov thwj tim hnov lub suab ntawd, lawv khoov ntsej muag ti av, lawv ntshai kawg.
7 Tab sis Yes Xus txav los plhws lawv, thiab nws hais rau lawv tias :
« Nej sawv, nej txhob ntshai. »
8 Ces lawv tsa muag ntsia, tsis pom leej twg li,
kawg tshuav Yes Xus tib leeg xwb.
9 Thaum lawv nqes saum roob los, Yes Xus txwv lawv tias :
« Nej txhob qhia qhov nej tau pom no rau leej twg li,
nej tos kom Neeg Leej Tub sawv hauv cov tuag rov los tso. »
HUAB TAIS PLEEV. Lub qab ntuj neeg cav txog koj.
