Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia (12/04/2026)

ZAJ NYEEM IB

HAUJ LWM 2, 42-47

42 Lawv nquag tuaj mloog cov Hauv Paus Xa Lus qhia lawv. Sawv daws
koom siab ua ib pab kwv tij, ua kab ke lov ncuav mov thiab teev ntuj ua ke.
43 Tas tsoom sid hwm, vim cov Hauv Paus Xa Lus ua ntau hom dej num zoo
kawg thiab ua ib co cim ntau.

44 Cov ntseeg muab lawv lub cuab tam los tso ua ke.

45 Lawv muab lawv tej cuab yeej cuab tam muag, lawv muab tus nqi los
faib rau sawv daws raws li nyias tej chaw siv.

46 Lawv niaj hnub koom ua ib lub siab, lawv nquag mus tom lub Tuam Tsev
Teev Ntuj. Lawv ua kab ke ntais ncuav mov nyob hauv lawv cov tsev, sawv daws
noj luag ntxhwb ntxhi, nyob muaj siab kaj lug.
47 Lawv cav lus zoo txog Tswv Ntuj. Tsoom pej xeem pom lawv zoo. Huab
Tais niaj hnub coj cov neeg uas Ntuj cawm tau lawv los ntxiv rau lub txoos.

YOG TSWV NTUJ LO LUS        Nws lub txiaj ntsim

Nkauj Paj Nruag            HUAB TAIS SIAB ZOO                

(NPN 118-2)

Txais: Peb ua Huab Tais tsaug vim nws siab zoo, nws khuv leej neeg mus ib txhiab ib txhis.

1. His Xas Lais, nej hais tias:

“Nws khuv leej neeg mus ib txhiab ib txhis!”

As Loos tsev neeg, nej hais tias:

“Nws khuv leej neeg mus ib txhiab ib txhis!”

Tsoom neeg hwm Huab Tais, nej hais tias:

“Nws khuv leej neeg mus ib txhiab ib txhis!”

2. Luag thawb kuv kom kuv ntog, tab sis Huab Tais pab kuv.

Kuv lub zog, kuv rab peev xwm yog Huab Tais, nws yog tus cawm kuv.

Cov neeg ncaj qw suab zoo siab hauv lawv cov tsev tsam phooj

vim lawv tau txais kev yeej.

3. Lub pob zeb uas cov txhim tsev muab pov tseg,

txia ua lub pob zeb txheem tsev.

Yam hwj huam loj no yog Huab Tais ua,

nws ua hwj huam muaj koob meej nto moo rau peb qhov muag pom.

Hnub no yog hnub Huab Tais tau tsim los rau peb, peb zoo siab hom khaj.

ZAJ NYEEM OB

POB ZEB TSAB NTAWV IB : 3-9

3 Peb cav lus zoo txog Tswv Ntuj, uas yog peb tus Huab Tais Yes Xus Pleev
Leej Txiv.
Leej Txiv lub siab khuv leej neeg kawg, nws thiaj ua kom peb rov yug los tshiab,
thiab muaj chaw tso siab nyob hauv Yes Xus Pleev txoj kev sawv ntawm cov tub
tuag rov los.
4 Tswv Ntuj xav pub lub cuab tam uas tsis txawj lwj, tsis tsuas, thiab tsis txawj
nphob rau peb. Tswv Ntuj tshwj zias lub cuab tam ntawd rau peb nyob saum Ntuj.
5 Yog vim nej ntseeg, mas Tswv Ntuj lub hwj huam thiaj txuag nej, kom nej tau
txais txoj kev cawm neeg, uas yuav tawm
tuaj hnub kawg.

6 Vim tej ntawd, mas tab nej txawm raug txom nyem, nej muaj kev tu siab, los nej

raug sim siab ib ntus ntxiv, los nej tseem zoo siab luag ntxhwb ntxhi.

7 Ntuj sim nej txoj kev ntseeg zoo li luag sim tej kub txawj puas nyob hauv hluav taws. Nej
txoj kev ntseeg muaj nqi dua kub, hnub Yes Xus Pleev yuav los, mas Ntuj yuav
cav lus zoo txog nej, Ntuj yuav pub koob meej rau nej, thiab yuav muab hwj chim rau nej.
8 Nej tseem tsis tau pom Yes Xus Pleev, tsis kav nej twb nyiam nws. Nej tsis tau
pom nws, tab sis nej ntseeg, mas nej yuav tau ib txog kev zoo siab uas piav tsis tau,
ua li mas nej hom khaj mog, nej twb muaj koob meej,

9 vim nej txais kev ntseeg tus nqi, uas yog txoj kev cawm nej tus plig.

YOG TSWV NTUJ LO LUS         Nws lub txiaj ntsim

NTAWV MOO ZOO     

ZAM 20 : 19-31

LUB NTSIAB LUS : Cov neeg ntseeg tias Yes Xus sawv rov los mas Yes Xus pub lawv nyob kaj lug.

COV LUS NYOB HAUV ZAM  NTAWV MOO ZOO.

19        Tib hnub ntawd thaum tsaus ntuj, uas yog thawj hnub pib lub lis piam, 

cov qhov rooj hauv qhov chaw cov thwj tim nyob kaw tas, vim lawv ntshai cov Yus Das. 

Yes Xus los sawv hauv nruab nrab, nws hais rau lawv tias :

« Nej nyob kaj lug. » 

20        Thaum Yes Xus hais lo lus ntawd tas, nws muab nws ob txhais tes thiab nws phab tav rau lawv saib. 

Cov thwj tim pom Huab Tais, lawv zoo siab kawg. 

21        Yes Xus rov hais rau lawv tias :

« Nej nyob kaj lug ! Kuv xa nej mus xws li Leej Txiv xa kuv tuaj. » 

22        Yes Xus hais li tas, nws tshuab pa rau lawv, nws hais rau lawv tias :

« Nej txais Leej Ntuj Plig Ntshiab. 

23        Nej daws txhaum rau leej twg, mas nws cov txhaum yuav daws. 

Nej tsis daws leej twg cov txhaum, mas nws cov txhaum yuav nyob. »

24        Tos Mas yog ib tug hauv pab Kaum Ob, nws tseem hu ua Dis Dws Mos thiab. 

Thaum Yes Xus tawm los, mas nws tsis nrog cov thwj tim nyob. 

25        Lwm cov thwj tim hais rau nws tias :

« Peb pom Huab Tais lawm ! » 

Ces Tos Mas hais rau lawv tias :

« Yog kuv tsis pom lub qhov txhab ntsia hlau nyob hauv nws ob txhais tes,

yog kuv tsis muab kuv tus ntiv tes ntxig lub qhov ntsia hlau,         

thiab yog kuv tsis muab kuv txhais tes rau ntawm nws phab tav, mas kuv tsis ntseeg. »

26        Yim hnub tom qab, cov thwj tim rov nyob hauv tsev dua. 

Tos Mas kuj nrog lawv nyob thiab. 

Cov qhov rooj puav leej kaw tas. 

Yes Xus tawm los sawv hauv nruab nrab, nws hais rau lawv tias :

« Nej nyob kaj lug ! » 

27        Ces  Yes  Xus  hais rau Tos Mas tias :

« Cev koj ntiv tes rau ntawm no, koj ntsia kuv ob txhais tes. 

Cev koj txhais tes los, muab rau hauv kuv phab tav. 

Koj txhob ua neeg tsis ntseeg ntxiv, koj ntseeg mog. » 

28        Tos Mas teb rau Yes Xus tias :

« Kuv tus Huab Tais, Kuv tus Tswv Ntuj. » 

29        Yes Xus hais rau Tos Mas tias :

« Vim koj pom kuv, mas koj thiaj ntseeg. 

Cov uas tsis tau pom tab sis lawv ntseeg, mas lawv txoj hmoov zoo. »

30        Yes Xus tseem tau ua lwm cov cim ntau nyob ntawm cov thwj tim xub ntiag,

uas tsis tau muab sau rau hauv phau ntawv no. 

31        Tau muab cov cim no sau tseg kom nej ntseeg tias Yes Xus yog Leej Pleev,

Tswv Ntuj Leej Tub. 

Nej ntseeg ces nej yuav muaj txoj sia nyob hauv nws lub npe.

HUAB TAIS PLEEV            Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia (05/04/2026)

ZAJ NYEEM IB                 

HAUJ LWM 10, 34a.37-43

LUB NTSIAB LUS : Tswv Ntuj tsa Yes Xus sawv rov los. Tus twg xav txais Tswv Ntuj cov txiaj ntsim nws yuav vam txog Yes Xus.

COV LUS NYOB HAUV NTAWV HAUJ LWM.

34 Ces Pob Zeb pib hais tias :

37         Nej twb tau hnov txog tej xwm uas tshwm sim tuaj nyob hauv xeev Yus Das :

yam li thaum Zam tshaj tias sawv daws yuav txais lub cim ntxuav,

mas nej kuj hnov hais txog Yes Xus nyob Nas Xas Les. 

Nws pib qhia hauv xeev Nkas Lis Lais. 

38         Tswv Ntuj tau pleev nws. 

Tswv Ntuj muab Leej Ntuj Plig Ntshiab thiab muab hwj huam rau nws. 

Nws mus ncig teb ncig chaw, nws ua zoo rau sawv daws. 

Nws kho cov neeg poob hauv dab phem tes kom lawv zoo. 

Vim Tswv Ntuj nrog nws nyob. 

39          Peb ua tim khawv pom tas puas tsav yam Yes Xus tau ua nyob hauv cov

Yus Das lub teb chaws thiab nyob Yes Lus Xas Les. 

Cov Yus Das tau ua phem rau nws :

lawv muab nws dai saum ib tug ncej kom nws tuag. 

40         Tab sis, hnub tim peb, Tswv Ntuj tsa nws sawv rov qab los lawm

thiab pub kom nws tawm los xyuas cov tim khawv uas nws xub tau xaiv ua ntej. 

41         Tsis yog tas tsoom pej xeem tau pom nws.

Cov tau pom nws yog peb. 

Thaum nws sawv hauv cov tub tuag rov los, mas peb tau nrog nws noj thiab haus ua ke. 

42         Nws qhia peb kom peb tshaj rau tsoom pej xeem thiab ua pov thawj zeem

tias nws yog tus uas Tswv Ntuj tsa los txiav txim rau cov neeg ciaj thiab cov neeg tuag. 

43         Tas cov yaj saub ua tim khawv txog Yes Xus tias leej twg ntseeg txog nws,

mas leej twg cov txhaum yuav daws tas nyob hauv nws lub npe. »

YOG TSWV NTUJ LO LUS.    Nws lub txiaj ntsim.

Nkauj Paj Nruag               HNUB NO YOG HNUB HUAB TAIS TSIM                 

(NPN 118-1)

Txais: Hnub no yog hnub Huab Tais tsim los rau peb, peb zoo siab hom khaj.

1. Peb ua Huab Tais tsaug vim nws khuv leej neeg mus ib txhiab ib txhis.

Haiv His Xas Lais, nej cav tias:

“Nws txoj kev hlub nyob mus ib txhiab ib txhis.”

2. Huab Tais txhais tes xis ua hauj lwm loj;

nws txhais tes xis muaj hwj huam.

Kuv yuav tsis tuag, kuv yuav muaj txoj sia nyob.

Kuv yuav cav txog Huab Tais tej dej num.

3. Lub pob zeb uas cov txhim tsev muab pov tseg,

txia ua lub pob zeb txheem tsev.

Yam hwj huam loj no yog Huab Tais ua,

yog yam zoo tshaj rau peb qhov muag pom.

ZAJ NYEEM OB        

KOS LOS XAIS 3 : 1-4

LUB NTSIAB LUS : Peb ntseeg txog Yes Xus, peb thiaj txais lub Cim Ntxuav. Yog lub cim tias peb nrog Yes Xus tuag thiab nrog Yes Xus muaj txoj sia.

COV LUS PAJ LUG SAU TUAJ RAU COV NTSEEG NYOB KOS LOS XAIS.

1            Nej pom xeeb nrog Leej Pleev sawv rov los lawm, mas nej nrhiav tej yam nyob txheej saud,

vim txheej saud yog Leej Pleev qhov chaw nyob, nws zaum ntawm Tswv Ntuj phab xis. 

2            Nej lub siab yuav dai dhuam rau tej yam nyob txheej saud, txhob dai rau tej yam nyob ntiaj teb no.

3            Vim tias, nej tuag lawm, hos nej txoj sia nrog Leej Pleev tsiv nraim hauv Tswv Ntuj. 

4            Leej Pleev yog nej txoj sia :

thaum nws yuav tawm los rau pom xyeem, mas nej kuj yuav nrog nws tawm los muaj hwj chim.

YOG TSWV NTUJ LO LUS.    Nws lub txiaj ntsim.

NTAWV MOO ZOO

ZAM 20 : 1-9

LUB NTSIAB LUS : Yog vim Yes Xus sawv rov los peb thiaj tso siab tias nws pub txoj sia rau peb tau.

COV LUS NYOB HAUV ZAM NTAWV MOO ZOO.

1            Thawj hnub pib lub lis piam, thaum sawv ntxov, ntuj tsis tau kaj,

Mab Lias Mas Ntas Las mus tom ntxa. 

Nws pom daim txiag zeb tshem ntawm lub ntxa lawm. 

2            Mab Liab Mas Ntas Las khiav mus cuag Xis Moos Pob Zeb thiab lwm tus thwj tim,

uas yog tus Yes Xus nyiam.  Nws hais rau nkawd tias :

« Lawv nqa Huab Tais tawm hauv ntxa lawm, peb tsis paub xyov lawv coj nws mus tso qhov twg lawm. »

3            Pob Zeb tawm plaws mus, lwm tus thwj tim kuj tawm plaws thiab, nkawd mus tom ntxa. 

4            Nkawd ob leeg ua ke khiav mus, tab sis lwm tus thwj tim khiav nrawm dua Pob Zeb,

nws khiav ua ntej, nws xub mus txog tom ntxa. 

5            Nws khoov mus xauj, nws pom tej hlab ntaub nyob ntawd ;

tab sis nws tsis chaws mus hauv. 

6            Ces Xis Moos Pob Zeb lawv tus thwj tim qab mus txog, nws chaws mus hauv lub ntxa. 

Nws pom cov hlab ntaub nyob ntawd, 

7            hos daim ntaub qhwv taub hau kauv cia nyob lwm qhov, tsis xyaw cov hlab ntaub. 

8            Ces lwm tus thwj tim uas xub mus txog ntawm lub ntxa mam li chaws mus hauv. 

Nws pom ces nws ntseeg. 

9            Vim  lawv tseem tsis tau to taub tias Yes Xus yuav sawv hauv cov tuag rov los raws li Ntawv qhia. 

HUAB TAIS PLEEV.    Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB        

HIS XAIS 50 : 4-7

LUB NTSIAB LUS :  Lus paj huam cav txog Tswv Ntuj tus tub txib.

COV LUS NYOB HAUV NTAWV HIS XAIS.

4            HUAB TAIS Tswv Ntuj tau muab cov thwj tim tus nplaig rau kuv. 

Nws qhia kuv kom kuv txawj hais ib lo lus nplij tus qaug zog. 

Niaj tag kis nws tsa kuv pob ntseg kom kuv tsim dheev,

kom kuv mloog xws li cov thwj tim mloog.

5            HUAB TAIS Tswv Ntuj qhib kuv pob ntseg, mas kuv tsis npau taws,

kuv tsis yig, kuv tsis thaub qab. 

6            Lawv ntaus kuv, mas kuv tig kuv nraub qaum rau lawv ntaus. 

Lawv xav rho kuv cov hwj txwv, mas kuv tig kuv sab plhu rau lawv. 

Lawv xav ib tawg ncuav rau kuv thiab xav nto qaub ncaug rau kuv ntsej muag,

los kuv tsis fee plhu rau lawv.  

7            Tab sis HUAB TAIS Tswv Ntuj tsom kwm kuv,

vim qhov ntawd mas kuv tsis poob ntsej muag. 

Ces kuv ua kuv ntsej muag tawv li pob zeb. 

Kuv paub tias kuv yuav tsis raug kev txaj muag. 

YOG TSWV NTUJ LO LUS    Nws lub txiaj ntsim

Nkauj Paj Nruag                UA CAS KOJ TSO KUV POV TSEG?              

(NPN 22-1)

Txais: Kuv tus Huab Tais, kuv tus Tswv Ntuj! Ua cas koj tso kuv pov tseg?

1.           Leej twg pom kuv, lawv thuam kuv, lawv luag kuv.

Lawv co taub hau hnyos kuv tias:

“Nws tso siab rau Huab Tais, cia Huab Tais npo nws.

Nws nyiam Huab Tais, cia Huab Tais cawm nws mas!”

2.           Lawv zoo li pab dev sawv ncig kuv;

cov neeg phem ntawd puav kuv kev, lawv nkaug kuv tej tes taw.

Kuv suav tau kuv cov pob txha tas tib si.

3.           Lawv muab kuv cov khaub ncaws los sib faib,

lawv twv saib leej twg yuav tau kuv cov ris tsho.

Huab Tais, thov koj txhob txav mus deb kuv!

Koj yog kuv lub zog, koj tsuag tsuag tuaj pab kuv mas!

4.           Kuv yuav tshaj koj lub npe rau kuv cov kwv tij.

Kuv yuav cav txog koj hauv nruab nrab lub txoos.

Nej cov uas hwm Huab Tais, nej cav lus zoo txog nws mog.

Yas Kos tsoom tub ki, nej cav txog nws lub koob meej!

His Xas Lais tsoom tub ki, nej hwm nws mog!

ZAJ NYEEM OB        

FIS LIS POS 2 : 6-11

LUB NTSIAB LUS :  Yuav sib haum xeeb, thiab yuav nyiam ua tus me.

COV LUS PAJ LUG SAU TUAJ RAU COV NTSEEG NYOB FIS LIS POS.

6            Yes Xus Pleev yog Tswv Ntuj,

               tiam sis nws tsis cia nws lub hwj chim Tswv Ntuj rau luag hawm : 

               nws muab nws lub hwj chim hle. 

7            Nws yeem ua ib tug qhev, 

               nws yug los ua neeg xws li ib tsoom neeg. 

Luag pom nws tus yam ntxwv yog yam ntxwv tib neeg. 

8            Nws txo nws qis : nws tuaj yeem mloog Ntuj lus mus txog qhov tuag,

thiab tseem xaiv txoj kev tuag saum ntoo cuam. 

9            Vim li ntawd, mas Tswv Ntuj thiaj tsa Yes Xus ua ib tug loj nyob siab siab.  

               Tswv Ntuj muab lub npe uas nyob siab dua lwm cov npe rau nws. 

10         Li ntawd, tus twg hnov tuav txog Yes Xus lub npe, 

tsis hais nyob saum cov txheej ntuj, los nyob ntiaj teb no, los nyob nruab yeeb,

mas tus ntawd cia li txhos caug hawm. 

11         Txhua xeem lus yuav tsum cav tias Yes Xus Pleev yog Huab Tais :

Leej Txiv Tswv Ntuj thiaj muaj koob meej nto moo lug.

YOG TSWV NTUJ LO LUS    Nws lub txiaj ntsim

YES XUS KEV TXOM NYEM, RAWS MAS TAIS.

MAS TAIS         26 : 14-27,66.                                                                   

LUB NTSIAB LUS.      Yes Xus raug kev txom nyem raws li Mas Tais ntawv Moo Zoo.

P            Nyob hauv pab kaum ob tug hauv paus xa lus,

muaj ib tug nws hu ua Yus Das Kas Lis Yaus,

nws mus cuag cov thawj Leej Choj, nws hais rau lawv tias :

L            Nej muab dab tsi rau kuv, ces kuv yuav muab Yes Xus rau nej ntes ?

P            Cov thawj Leej Choj muab peb caug lub txiaj nyiag rau nws.

Txij ntawd mus, nws nrhiav ib lub sij hawm zoo muab Yes Xus rau lawv ntes.

Thaum hnub uas lawv noj cov mov tsis muaj poov xab,

cov thwj tim tuaj hais rau Yes Xus tias :

L            Koj xav kom peb npaj noj Pluas Hla nyob qhov twg ?

P            Yes Xus teb tias :

Y            Nej mus tom tsheej hauv ib tug neeg tsev, nej hais rau nws tias :

Xib Hwb tso xov tuaj rau koj tias :

Kuv lub caij txog ze lawm.

               Kuv yuav nrog kuv cov thwj tim ua Hmoov Hla nyob hauv koj tsev.

P            Cov thwj tim ua raws li Yes Xus qhia rau lawv, lawv npaj ua Hmoov Hla.

Tsaus ntuj los, Yes Xus nrog pab kaum ob leeg nyob ntawm rooj mov,

Yes Xus hais rau lawv tias :

Y            Muaj ib tug nyob hauv nej, nws yuav muab kuv rau lawv ntes.

P            Cov thwj tim tu siab nrho, lawv nyias nug nyias zom zaws tias :

L            Huab Tais, puas yog kuv ?

P            Yes Xus teb tias :

Y            Tus uas nws tau nrog kuv cev tes rau hauv lub phaj,

mas yog tus ntawd yuav muab kuv rau luag ntes.

Leej Neeg tus Tub yuav mus, raws li Ntawv xub hais tseg txog nws.

Tab sis, tus muab Leej Neeg tus Tub rau luag ntes,

mas nws raug txoj hmoov phem !

Tus neeg ntawd tsis txhob yug los mas zoo dua.

P            Yus Das uas nws yuav muab Yes Xus rau luag ntes, nws kuj nug Yes Kus tias :

L            Las Npis, puas yog kuv ? »

P            Yes Xus teb tias :

Y            Koj twb hais lawm !

P            Thaum lawv noj mov txog tog, Yes Xus tuav ib co mov mog,

nws hais zaj foom hmoov zoo, nws muab lov,

nws muab faib rau nws cov thwj tim, nws hais tias :

Y            Nej txais, nej noj ! Qhov no yog kuv lub cev.

P            Yes Xus tuav lub ntim, nws ua tsaug,

nws muab rau nws cov thwj tim, nws hais tias :

Y            Nej saw daws haus, vim qhov no yog kuv cov ntshav.

Yog cov ntshav cog lus uas yuav ntws los,

kom tau daws ib tsoon neeg cov txhaum.

Kuv hais rau nej tias

txij no mus kuv yuav tsis haus txiv cawv cov kua no ntxiv

mus txog hnub uas kuv yuav nrog nej haus cov cawv tshiab

nyob hauv kuv Txiv lub Ceeb Tsheej.

P            (Sawv daws zaum)

Thaum lawv hu cov zaj nkauj ntxuag qeej tas lawm,

lawv sawv kev mus pem lub roob txiv ntoo roj.

Ces Yes Xus hais rau lawv tias :

Y            Hmo no, nej sawv daws yuav ntog, yog vim kuv.

Vim Ntawv sau tseg tias :

Kuv yuav ntaus tus zov yaj, ces pab yaj yuav tawg tas.

Tab sis thaum kuv sawv rov los,

kuv yuav ua nej ntej mus Nkas Lis Lais teb.

P            Pob Zeb teb tias :

L            Tab yog lawv sawv daws ntog vim koj,

mas kuv yuav tsis ntog ib zaug li !  

P            Yes Xus hais rau nws tias :

Y            Kuv hais tiag rau koj : Kiag hmo no ntag, thaum qaib tseem tsis tau qua,

koj twb yuav tsis kam zeem kuv peb zaug diam !

P            Pob Zeb hais rau Yes Xus tias :

L            Tab yog kuv yuav tsum nrog koj tuag mas kuv yuav zeem koj xwb !

P            Cov thwj tim tas tib si kuj hais ib yam.

Ces Yes Xus nrog lawv tuaj txog ib thaj chaw hu ua Nkes Txes Mas Nis.

Nws hais rau cov thwj tim tias :

Y            Nej nyob ntawm no kuv yuav mus teev Ntuj nyob tod.

P            Yes Xus coj Pob Zeb thiab Ntxes Npes Dais ob tug tub nrog nws mus.

Yes Xus pib ntxhov siab, nws tu siab nrho. Nws hais rau cov thwj tim tias :

Y            Kuv tu siab yuav tuag. Nej nyob ntawm no, nej nrog kuv zov hmo.

P            Yes Xus mus deb me ntsis, nws khoov ti av, nws thov Ntuj tias :

Y            Kuv Txiv ! Lub ntim no hla mus deb ntawm kuv puas tau ?

Tiam sis txhob ua li kuv nyiam. Koj ua li koj nyiam.

P            Yes Xus rov los ntawm nws cov thwj tim, nws pom lawv tsaug zog.

Nws hais rau Pob Zeb tias :

Y            Li ntawd, nej tsis muaj peev xwm nrog kuv zov hmo ib teev thiab lod?

Nej zov hmo mas ! Nej thov Ntuj kom nej tsis txhob poob hauv txoj kev ntxias.

Neeg lub siab kub, tiam sis neeg lub cev tsis muaj zog.

P            Ces Yes Xus rov mus thov Ntuj ib zaug ntxiv. Nws hais tias :

Y            Kuv Txiv ! Lub ntim hla ntawm no, yog kuv yuav tsum haus,

mas koj ua raws li koj lub siab.

P            Yes Xus rov qab los. Nws pom cov thwj tim rov tsaug zaug,

vim lawv qhov muag tawv.

Nws tso lawv tseg, nws rov qab mus teev Ntuj, yog zaum peb.

Nws rov qab hais ib co lus zoo li puag ta.

Ces nws rov qab los ntawm nws cov thwj tim dua.

Yes Xus hais rau lawv tias :

Y            Zaum no, nej xav tsaug zog xav so kuj tau.

Txog lub caij uas Leej Neeg tus Tub yuav poob hauv cov neeg txhaum txhais tes.

Nej saviv mas ! Tus yuav muab kuv rau luag ntes tuaj txog ze lawm.

P            Thaum Yes Xus tseem tab tom hais zoo li ntawd, Yus Das tuaj txog.

Yus Das yog ib tug nyob hauv pab kaum ob leeg.

Muaj ib pab neeg coob tuav ntaj tuav qws nrog Yus Das tuaj.

Yog cov thawj Leej Choj thiab tsoom txwj laug tso lawv tuaj.

Yus Das, tus ntxeev siab, nws tau xub hais rau lawv tias :

L            Kuv nwj tus twg mas Yes Xus yog tus ntawd. Nej ntes nws.

P            Tam sim ntawd Yus Das los ze ntawm Yes Xus, hais Yes Xus tias :

L            Las Npis, koj puas nyob zoo ?

P            Ces Yus Das nwj Yes Xus. Yes Xus hais rau nws tias :

Y            Npawg, koj tuaj ua dab tsi, mas koj ua zoj mas !

P            Pab neeg ntawd los tuav nkaus Yes Xus, muab Yes Xus ntes.

Cov nrog Yes Xus, muaj ib tug nqa ib rab ntaj,

nws rho hlo rab ntaj tib ntag rau tus Tuam Leej Choj tus qhev.

Nws txiav raug tus qhev ib sab pob ntseg.

Yes Xus hais rau tus thwj tim ntawd tias :

Y            Koj ntxig ntaj rau hauv hnab.

Tus muab ntaj los tua luag, nws yuav this rab ntaj tuag.

Koj tsis paub tias yog kuv xav hu txog kuv Txiv tuaj pab

mas tam sim no nws yuav tso tshaj kaum ob vam tus Tshiab tuaj pab.

Tiam sis yog kuv ua li ntawd

mas yuav tsis muaj raws li Ntawv xub hais tseg tias

tej xwm no yuav tsum tshwm sim.

P            Yes Xus hais rau pab neeg nyob ntawd tias :

Y            Nej tuav ntaj tuav qws tuaj ntes kuv xws li ib tug tub sab.

Kuv niaj hnub nyob nruab nrab nej nyob hauv lub Tuam Tsev Teev Ntuj.

Ua cas thaum ntawd nej tsis ntes kuv ?

P            Tej xwm ntawd tshwm sim tuaj

kom tau muaj raws li cov Yaj Saub tej Ntawv.

Ces cov thwj tim saww daws tso Yes Xus tseg, lawv khiav.

Pab neeg ntes Yes Xus,

lawv coj Yes Xus mus txog tus Tuam Leej Choj Kais Fas lub tsev.

Cov Thoob Xwm Ntawv thiab cov Txwj Laug tuaj sib sau nyob ntawd.

Pob Zeb lawv Yes Xus qab nrug deb me ntsis

mus txog ntawm tus Tuam Leej Choj lub loog,

nws nkag mus hauv thiab nws nrog cov qhev zaum.

Pob Zeb xav pom saib qhov kawg zoo li cas.

Tas cov Thawj Leej Choj thiab cov Nom Txiav Txim

lawv nrhiav ib zag liam rau Yes Xus kom tau kev muab Yes Xus tua.

Muaj ntau tus tim khawv tuaj, tab sis lawv nrhiav tsis tau ib yam liam rau Yes Xus.

Nyob nyob, muaj ob tug tuaj hais tias :

L            Tus ntawd nws tau hais tias :

Kuv yuav rhuav Tswv Ntuj lub Tuam Tsev kuj tau,

thiab kuv ua peb hnub mas rov qab txhim tau.

P            Tus Tuam Leej Choj sawv, nws hais raus Yes Xus tias :

L            Koj tsis teb dab tsi ! Cov tim khawv ntawd hais dab tsi txog koj ?

P            Yes Xus ua twj ywm. Tus Tuam Leej Choj hais rau nws tias :

L            Kuv tuav txog tus Tswv Ntuj muaj toj sia :

koj qhia peb saib, koj puas yog Leej Pleev ? Koj puas yog Tswv Ntuj tus Tub ?

P            Yes Xus teb rau nws tias :

Y            Yog zoo li koj hais. Thiab kuv hais qhia nej tias

txij no mus, nej yuav pom Leej Neeg tus Tub zaum ze ntawm tus muaj hwj huam,

thiab tuaj nyob saum cov huab nyob saum ntuj.

P            Tus Tuam Leej Choj dua nws lub tsho, nws hais tias :

L            Nws thuam Ntuj ! Tsis tas yuav nrhiav tim khawv ntxiv !

Nej nyuam qhuav hnov nws cov lus thuam Ntuj. Nej xav li cas ?

P            Lawv teb tias :

L            Nws tsim nyog tuag !

P            Ces lawv nto aub ncaug rau saum Yes Xus ntsej muag,

lawv tib ncuav pias rau nws.

Muaj ib txhia lawv ntaus nws thiab hais rau nws tias :

L            Tus Pleev, koj ua Yaj Saub, koj qhia peb saib: Tus ntaus koj yog leej twg ?

P            Thaum ntawd, Pob Zeb zaum nyob nraum zoov, nyob hauv lub loog.

Muaj ib tug ntxhais txib los hais rau Pob Zeb tias :

L            Koj kuj tau nrog tus Nkas Lis Lais Yes Xus ntawd nyob !

P            Tiam sis Pob Zeb tsis lees. Nws hais rau sawv laws hnov tias :

L            Kuv tsis paub koj xav hais dab tsi.

P            Pob Zeb tawm mus txog ntawm lub rooj loog.

Tseem muaj ib tug pom Pob Zeb. Nws hais rau cov neeg nyob ntawd tias :

L            Tus ntawd yog ib tug nrog Yes Xus Nas Xas Les ntag !

P            Pob Zeb twv ntuj twv teb tias :

L            Kuv tsis paub tus neeg ntawd !

P            Ib me ntsis, cov neeg nyob ntawd txav los ze Pob Zeb. Lawv hais tias :

L            Koj yog ib tug neeg nrog Yes Xus tiag ! Koj twb hais lus txawv !

Koj npog tsis tau.

P            Pob Zeb twv ntuj twv teb tias :

L            Kuv tsis paub tus neeg ntawd tiag !

P            Tam sim ntawd qaib qua.

Pob Zeb rov nco dheev txog cov lus uas Yes Xus xub hais rau nws tias :

Thaum qaib tseem tsis tau qua mas koj twb tsis zeem kuv peb zaug.

Ces Pob Zeb tawm mus nraum zoov. Nws tu siab, nws quaj.

Thaum kaj ntug lawm,

cov Thawj Leej Choj cov Txwj Laus sab laj kom muab Yes Xus tua.

Lawv muab Yes Xus khi.

Lawv cab Yes Xus mus rau tus nom tswj teb chaws hu ua Pis Las Tos.

Thaum ntawd, Yus Das uas yog tus muab Yes Xus rau lawv ntes,

nws pom Yes Xus yuav raug txim mas nws rov khuv xim.

Nws xa peb caug lub txiaj rov mus rau cov Thawj Leej Choj

thiab rau cov Txwj Laug. Yus Das hais tias :

L            Kuv ua txhaum.

Kuv muab ib co roj ntsha tsis phim raug txim rau nej ntes.

P            Lawv teb tias :

L            Xij ! Tsis dua ntawm peb.

P            Yus Das muab nws cov nyiaj pov seg rau hauv chav tsev ntshiab.

Nws tawm mus dai tuag. Cov Thawj Leej Choj khaws cov nyiaj, lawv hais tias :

L            Cov nyiaj ntawd yog nqe ntshav.

Kev cai tsis kheev muab los rau hauv lub txhab nyiaj.

P            Lawv tuav xam. Lawv muab cov nyiaj ntawd

los muas tus puab lauj kaub daim teb los ua toj ntxas rau pej kum neeg.

Daim teb ntawd thiaj hu ua “daim teb ntshav” los txog tav no.

Lawv coj Yes Xus tuaj rau tus nom tswj teb chaws.

Tus tswj teb chaws nug Yes Xus tias :

L            Koj yog cov Yus Das tus Vaj, puas yog ?

P            Yes Xus teb tias :

Y            Yog koj hais li.

P            Thaum cov Thawj Leej Choj thiab cov Txwj Laug

lawv liam rau Yes Xus ntawm tus tswj teb chaws,

mas Yes Xus tsis teb ib lo lus. Pis Las Tos hais rau Yes Xus tias :

L            Koj tsis hnov tas txhia yam lawv liam txog koj lod ?

P            Yes Xus tsis teb dab tsi li. Mas Pis Las Tos xav tsis thoob.

Kev cai, niaj xyoo, thaum txog lub hnub nyoog ua Hmoov,

tus nom tswj teb chaws tso ib tug neeg raug txim mus.

Tsoom pej xeem nyiam tso leej twg mas nws tso leej twg.

Thaum ntawd, muaj ib tug neeg raug txim nto moo hu ua Npas Las Npas.

Pis Las Tos hais rau cov neeg tuaj sib sau nyob ntawd tias:

L            Nej xav kom kuv tso leej twg ?

Tso Npas Las Npas ? Los tso Yes Xus uas lawv hu nws ua tus Pleev ?

P            Pis Las Tos twb paub tias tos lawv ntes Yes Xus tuaj

yog vim lawv khib rau Yes Xus.

Thaum Pis Las Tos tseem zaum hauv lub tsev txiav txim,

nws poj niam xa lus tuaj rau nws tias :

L            Koj tsis txhob nrog lawv hais tus neeg siab ncaj ntawd rooj plaub.

Hnub no, kuv ua npau suav pom nws. Ntxhov kuv siab kawg !

P            Tiam sis cov Thawj Leej Choj thiab cov Txwj Laug

lawv cob sawv davvs kom saww daws qw tias tso Npas Las Npas mus,

hos muab Yes Xus tua.

Tus tswj teb chaws rov nug sawv daws tias :

L            Ob tug ntawd, nej xav kom kuv tso leej twg rau nej ?

P            Lawv teb tias :

L            Tso Npas Las Npas !

P            Pis Las Tos hais rau law tias :

L            Ua li Yes Xus, uas lawv hu nws ua tus Pleev,

kuv yuav ua dab tsi rau nws ?

P            Lawv teb tias :

L            Muab nws tua nyob saum ntoo cuam !

P            Pis Las Tos nug law v tias :

L            Nws ua dab tsi phem ?

P            Tiam sis lawv pheej qw nrov dua tias :

L            Muab nws tua nyob saum ntoo cuam !

P            Pis Las Tos pom tias nws ua tsis tau dab tsi. Sawv daws pheej ua ntxhov quav niab.

Pis Las Tos muab dej los ntxuav nws tes rau tsoom sid pom, nws hais tias :

L            Kuv tsis kam ris cov ntshav ntawd. Nyob txij ntawm nej !

P            Tas tsoom pej xeem teb tias :

L            Cia nws cov ntshav nyob saum peb, thiab nyob saum peb cov me nyuam !

P            Pis Las Tos tso Npas Las Npas rau lawv.

Nws kom cov tub rog muab Yes Xus nplawm.

Nws tso Yes Xus rau lawv coj mus tua nyob saum ntoo cuam.

Tus tswj teb chaws cov tub rog muab Yes Xus cab los hauv tsev txiav txim.

Lawv kom pab tub rog hiam Yes Xus.

Lawv muab Yes Xus ris tsho hle, muab ib lub tsho liab rau Yes Xus hnav.

Lawv muab ib co pos los ua ib lub kauj tso rau saum Yes Xus taub hau.

Lawv muab ib tug pas txhiav rau Yes Xus txhais tes xis tuav.

Cov tub rog los kim caug ntawm Yes Xus xub ntiag, lawv luag Yes Xus tias :

L            Vaj Yus Das, peb hawm koj !

P            Lawv nto aub ncaug rau Yes Xus.

Lawv muab tus pas txhiav los ntaus Yes Xus taub hau.

Thaum lawv luag Yes Xus tas, lawv rov muab lub tsho liab hle.

Lawv muab Yes Xus cov ris tsho rov rau Yes Xus hnav.

Ces law cab Yes Xus mus tua nyob saum ntoo cuam.

(Sawv daws sawv)

Thaum lawv tawm nraud, lawv ntsib ib tug neeg nyob Xis Les Nas teb tuaj.

Tus neeg ntawd hu ua Xis Moos. Lawv kom nws kwv Yes Xus tus ntoo cuam.

Lawv mus txog ntawm qhov chaw hu ua Nkos Nkos Tas,

txhais hu ua Khauj Khaum Taub Hau.

Lawv muab ib co cawv xyaw tsib rau Yes Xus haus.

Yes Xus saj me ntsis, nws tsis xav haus.

Thaum cov tub rog muab Yes Xus tsa saum ntoo cuam tas,

lawv muab Yes Xus cov ris tsho los twv los sib faib.

Lawv zaum nyob ntawd, lawv zov Yes Xus.

Nyob saum Yes Xus taub hau lawv sau ntawv piav txog Yes Xus lub txim tias :

“Tus no, yog Yes Xus. Yog cov Yus Das tus Vaj.’

Lawv tseem tsa ob tug tub sab nyob saum ntoo cuam,

nyob ntawm Yes Xus sab xis thiab sab laug.

Cov neeg dua kev co hau tsawm Yes Xus tias :

L            Koj yog tus hais tias koj yuav rhuav lub tuam tsev teev Ntuj

thiab koj ua peb hnub rov tsa tau li qub, koj rov cawm koj mas !

Koj yog Tswv Ntuj tus Tub tiag mas koj nqes saum too cuam los mas !

P            Cov Thawj Leej Choj cov Thoob Xwm Ntawv

thiab cov txwj laug lawv kuj hnyos Yes Xus tias :

L            Nws cawm tau luag tej, nws cawm tsis tau nws.

Yog nws ua His Xas Lais tus Vaj tiag,

Mas kom nws nqes saum ntoo cuam los, ces peb thiaj ntseeg txog nws.

Nws tso siab rau Tswv Ntuj.

Yog Tswv Ntuj nyiam nws tiag, mas cia Tswv Ntuj tuaj cawm nws.

Nws twb hais tias : Kuv yog Tsvw Ntuj tus Tub.

P            Ob tug tub sab nyob saum ntoo cuam zoo li Yes Xus,

Nkawd kuj cem Yes Xus li ntawd thiab.

Txij thaum tav su mus txog hnub qaij peb teev, tas ntiaj teb tsaus ntuj nti.

Thaum yuav txog peb teev, Yes Xus qw ib suab nrov nrov tias :

Y            Es Lis, Es Lis, Las Mas Xas Npas Tas Nis, yam li :

Kuv tus Huab Tais aib ! Kuv tus Huab Tais aib !

Ua cas koj tso kuv pov tseg ?

P            Nyob ntawd muaj qee leej hnov Yes Xus hais li ntawd, law hais tias :

L            Nws hu tus Yaj Saub Es Lis.

P            Ces muaj ib tug khiav mus nqa ib co rwb los tub cawv qaub.

Nws muab chob rau saum tus ntsis pas txhiav cev rau Yes Xus haus.

Tiam sis luag tej hais rau nws tias :

L            Koj tos me ntsis saib Es Lis puas tuaj cawm nws !

P            Yes Xus tseem qw ib suab nrov nrov ntxiv, ces nws txoj sia tu nrho.

(Sawv daws txhos caug).

Ces thaum ntawd daim ntaub thais qhov rooj nyob hauv lub Tuam Tsev Teev Ntuj

ntuag phua rhe ua ob daig.

Lub ntiaj teb qeeg. Pob tsuas tawg.

Tej ntxa qhib plho, cov neeg ntshiab tuag muaj ntau leej lub cev rov sawv.

Thaum Yes Xus sawv rov qab los lawm, cov neeg rov sawv tawm ntawm ntxa los,

lawv mus hauv lub Tsheej Ntshiab, lawv tawm tuaj rau ntau leej pom.

Tus lwm txheeb thiab cov neeg nrog nws zov Yes Xus

lawv pom lub ntiaj teb qeeg thiab pom tej xwm tshwm sim ntawd

mas lawv ntshai kawg. Lawv hais tias :

L            Tus ntawd yog Tswv Ntuj tus Tub tiag !

P            Nyob ntawd, kuj muaj ntau tus poj niam nyob deb me ntsis ntsia.

Yog cov poj niam uas lawv nyob Nkas Lis Lais teb,

lawv nrog Yes Xus, lawv tsob hwb Yes Xus.

Cov poj niam ntawd, ib tug yog Mab Liab uas nyob Mas Ntas Las.

Ib tug yog Mab Liab, Yas Kos thiab Yos Xes nkawd niam.

Ib tug yog Ntxes Npes Dais ob tug tub nkawd niam.

Thaum yuav tsaus ntuj,

muaj ib tug neeg nplua nuj nyob As Lis Mas Tias tuaj, nws hu ua Yos Xes.

Nws kuj yog Yes Xus ib tug thwj tim thiab.

Nws mus cuag Pis Las Tos, nws thov nqa Yes Xus lub cev.

Pis Las Tos qhia kom lawv muab Yes Xus lub cev rau Yos Xes.

Yos Xes muab Yes Xus lub cev los qhwv nyob hauv ib daig ntaub huv.

Nws tso Yes Xus lub cev nyob hauv ib lub ntxa tshiab tshiab

uas nws kom luag txaug rau nws, nyob ntawm phab tsua.

Yos Xes muab ib daig txiag zeb dav dav dov los kaw rooj ntxas,

nws thiaj rov qab mus tsev.

Nyob ntawd, muaj Mab Liab Mas Ntas Las thiab lwm tus Mab Liab.

Nkawd zaum nyob ncaj lub ntxa.

Tag kis los, yog hnub lawv npaj ua Hmoov Hla tas lawm.

Cov Thawj Leej Choj thiab cov Fas Lis Xais lawv ua ib pab mus cuag Pis Las Tos,

lawv hais rau nws tias :

L            Huab Tais, peb nco tias tus neeg dag ntawd,

thaum nws tseem nyob, nws tau hais tias :

“Dhau peb hnub mas kuv yuav sawv rov qab los.”

Thov koj qhia kom muaj neeg mus zov lub ntxa mus txog hnub peb,

kom nws cov thwj tim txhob tuaj nyiag nqa nws lub cev

thiab mus hais rau tsoom pej xeem tias nws sawv ntawm cov tub tuag rov los.

Yog lawv tau ua li ntawd mas tseem yuav muaj lus phem dua thawj zaug thiab !

P            Pis Las Tos teb rau lawv tias :

L            Nej twb muaj nej ib pab tub zov keeb !

Nej rov mus ! Nej zov lub ntxa raws li nej pom zoo !

P            Laww thiaj mus. Lawv npaj txhia yam zoo nyob tom ntxa.

Lawv muab daim txiag zeb cam. Lawv tso ib pab zov keeb nyob ntawd.

HUAB TAIS PLEEV.      Lub qab ntuj neeg cav txog koj !

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB  

ES XES KIAS 37 : 12-14

LUB NTSIAB LUS :  Cov pob txha neeg hauv lub vos hav.

COV LUS NYOB HAUV NTAWV ES XES KIAS.

12        « Vim li ntawd, koj thiaj yuav ua yaj saub tshaj rau lawv.

Koj hais rau lawv tias : HUAB TAIS Tswv Ntuj hais li no :

Nej ntsia saib ! Kuv haiv neeg, kuv yuav qhib nej cov rooj ntxas. 

Kuv yuav coj nej rov mus rau His Xas Lais thaj av.  

13        Kuv haiv neeg, thaum kuv yuav qhib nej cov rooj ntxas thiab

kuv tsa nej sawv hauv qhov ntxa los, mas nej yuav paub tias kuv yog HUAB TAIS. 

14        Kuv yuav tso kuv txoj pa mus hauv nej ces nej yuav rov muaj txoj sia. 

Kuv yuav tsa nej nyob txawm hauv nej thaj av.      

Nej yuav paub tias kuv yog HUAB TAIS,

kuv hais yam twg mas kuv ua yam twg.

Yog HUAB TAIS hais lo lus ntawd. »

YOG TSWV NTUJ LO LUS        Nws lub txiaj ntsim

Nkauj Paj Nruag          NYOB HAUV HUAB TAIS MUAJ KEV KHUV LEEJ                        

(NPN 130)

Txais: Nyob hauv Huab Tais muaj kev cawm thiab kev khuv leej neeg.

1.         Kuv nyob hauv qab tiv txwv, Huab Tais, kuv hu txog koj.

Huab Tais, thov koj mloog kuv lub suab.

Koj tig ntsej los mloog kuv lub suab taij.

2.         Huab Tais, yog koj nco ntsoov peb cov txhaum

mas tsis muaj leej twg yuav nyob tau.

Nyob hauv koj muaj txoj kev zam ces sawv daws hwm koj.

3.         Kuv tos txog Huab Tais, kuv tos nws tas siab tas ntsws.

Kuv tso siab rau nws lo lus.

Kuv tus plig tos Huab Tais heev dua tus zov keeb tos txog lub caij kaj ntug.

4.         His Xas Lais, koj tso siab rau Huab Tais mog

vim nyob hauv Huab Tais muaj lub txiaj ntsim thiab txoj kev cawm neeg.

Nws yog tus yuav txhiv His Xas Lais dim ntawm lub txim txhaum.

ZAJ NYEEM OB   

LOS MAS 8 : 8-11

LUB NTSIAB LUS:  Hais txog txoj sia tuaj ntawm Leej Ntuj Plig tuaj.

COV LUS NYOB HAUV NTAWV LOS MAS HAIS TIAS :

8          Cov neeg mloog lub cev, lawv ua xis Tswv Ntuj siab tsis tau. 

9          Ntawm nej, mas nej tsis zwm rau lub cev, nej zwm rau lub tswv yim,

vim Tswv Ntuj Leej Tswv Yim  nyob txawm hauv nej. 

Tus twg tsis muaj Leej Pleev lub tswv yim nyob hauv nws mas nws tsis yog Leej Pleev tug. 

10        Yog Leej Pleev nyob hauv nej, 

tab yog lub cev tuag vim kev txhaum,

mas lub tswv yim  muaj txoj sia vim kev ncaj.

11        Yog tus tau tsa Yes Xus tuag sawv rov los,

nws lub tswv yim nyob txawm hauv nej,

mas nws yuav  pub txoj sia rau nej lub cev tuag,

vim Leej Ntuj Plig nyob txawm hauv nej.

YOG TSWV NTUJ LO LUS       Nws lub txiaj ntsim

NTAWV MOO ZOO        

ZAM 11 : 1-45

LUB NTSIAB LUS : Yes Xus tsa Las Ntxas Los sawv rov los nyob Npes Tas Nias.

COV LUS NYOB HAUV ZAM  NTAWV MOO ZOO.

1. Muaj ib tug neeg mob hu ua Las Ntxas Los, nws nyob Npes Tas Nias. 

Yog Mab Liab thiab nws tus niam laus Mas Tas lub zos. 

• Mab Liab yog tus uas yav dhau los nws muab tshuaj tsw qab pleev Huab Tais

thiab muab nws cov plaub hau so Huab Tais ko taw.  Tus neeg mob,

yog Mab Liab tus nus Las Ntxas Los. 

• Nkawd ob viv  ncaus xa xov mus hais rau Yes Xus tias :

« Huab Tais, tus uas koj nyiam, mas nws mob lawm. » 

4          Yes Xus hnov li ntawd, Yes Xus hais tias :

« Tus mob no tsis coj mus rau qhov tuag, nws yuav ua kom Tswv Ntuj nto koob meej, kom xwv Tswv Ntuj Leej Tub txais koob meej vim tus mob ntawd. » 

5          Yes Xus nyiam Mas Tas, thiab nws tus niam hluas, thiab Las Ntxas Los lawv. 

6          Tab yog nws hnov hais tias Las Ntxas Los mob lawm, tsis kav nws tseem nyob qhov qub ob hnub ntxiv thiab.  7        Ces Yes Xus mam li hais rau cov thwj tim tias :

« Peb rov mus Yus Das teb. » 

8          Cov thwj tim hais rau Yes Xus tias : « Las Npis, ob peb hnub ntawd, cov Yus Das xav xuas pob zeb txawb rau koj.  Koj tseem yuav rov mus Yus Das teb thiab lod ? » 

9          Yes Xus teb tias :

« Nruab hnub tsis muaj kaum ob teev lod ?  Tus twg mus kev nruab hnub, nws tsis dawm taw, vim nws tau lub ntiaj teb qhov pom kev. 

10        Hos tus twg mus kev hmo ntuj, mas nws dawm taw, vim qhov pom kev tsis nyob hauv nws. »

11        Yes Xus hais li ntawd tas, nws thiaj hais rau cov thwj tim tias : 

« Peb tus phooj ywg Las Ntxas Los tsaug zog lawm ; tab sis kuv yuav mus tsa nws sawv. » 

12        Cov thwj tim hais rau Yes Xus tias : « Huab Tais, yog nws tsaug zog lawm, mas nws tus mob yuav zoo. » 

13        Yes Xus hais txog Las Ntxas Los txoj kev tuag, tab sis cov thwj tim xav tias yog Yes Xus hais txog kev pw tsaug zog. 

14        Yes Xus thiaj li ncaj qha qhia tias :

« Las Ntxas Los tuag lawm. 

15        Kuv tsis nyob ntawd, tsis kav kuv zoo siab, vim qhov ntawd yuav pab nej ntseeg.  Peb mus xyuas nws. » 

16        Tos Mas, tus uas hu ua Dis Dws Mos, hais rau cov npawg thwj tim tias :

« Peb kav tsij mus mas, kom peb nrog nws tuag thiab. »

17        Thaum Yes Xus tuaj txog, nws pom Las Ntxas Los twb zwm ntxa tau plaub hnub lawm. 

18        Npes Tas Nias nyob ze ntawm Yes Lus Xas Les, kwv yees li kaum tsib ncuas kev. 

19        Cov Yus Das coob leej  tuaj xyuas Mas Tas thiab Mab Liab nkawd, lawv tuaj nplij nkawd vim nkawd tus nus tuag lawm. 

20        Thaum Mas Tas hnov tias Yes Xus tuaj, ces Mas Tas mus tos Yes Xus, hos Mab Liab zaum nyob hauv tsev.

21        Mas Tas hais rau Yes Xus tias :

« Huab Tais, yog koj ntxov tuaj txog ntawm no, mas kuv tus nus yuav tsis tuag. 

22        Tsis kav, kuv paub tias nyem no, koj thov yam twg ntawm Tswv Ntuj, mas Tswv Ntuj yuav muab rau koj. » 

23        Yes  Xus hais rau Mas Tas tias :

« Koj tus nus yuav sawv rov los. » 

24        Mas Tas hais rau Yes Xus tias :

« Kuv paub tias thaum txog Hnub Kawg, lub caij leej tib neeg lub cev ciaj rov los, mas nws yuav sawv rov los. » 

25        Yes Xus hais rau Mas Tas tias : 

« Kuv yog Txoj Kev Sawv Rov Los thiab yog Txoj Sia : tus ntseeg txog kuv, tab yog nws tuag lawm, nws yuav muaj txoj sia nyob. 

26        Leej twg ua neej nyob ntseeg txog kuv, nws yuav tsis tuag ib zaug.  Koj puas ntseeg qhov ntawd ? » 

27        Mas Tas hais rau Yes Xus tias :

« Huab Tais, kuv ntseeg.  Kuv ib txwm ntseeg hais tias koj yog Leej Pleev, yog Tswv Ntuj Leej Tub tuaj nyob hauv lub qab ntuj no. »

28        Mas Tas hais li ntawd tas, nws  rov mus hu nws tus niam hluas Mab Liab.  Nws ntxhi twj ywm rau Mab Liab tias : « Xib Hwb tuaj txog tod lawm, nws hu koj. » 

29        Thaum Mab Liab hnov dheev li ntawd, nws sawv tsees mus cuag Yes Xus. 

30        Yes Xus tsis tau mus txog hauv zos. Nws tseem nyob ntawm qhov chaw uas Mas Tas tuaj cuag nws. 

31        Cov Yus Das uas tuaj nplij Mab Liab thiab nrog Mab Liab nyob hauv tsev, pom Mab Liab sawv tsees tawm lawm, lawv raws nws qab, vim lawv xav tias Mab Liab yuav mus quaj tom ntxa.

32        Thaum Mab Liab tuaj txog ntawm Yes Xus, nws pom Yes Xus, nws txhos caug ntawm Yes Xus ko taw, nws hais rau Yes Xus tias :

« Huab Tais, yog koj ntxov tuaj txog ntawm no, mas kuv tus nus yuav tsis tuag. » 

33        Thaum Yes Xus pom Mab Liab quaj, thiab pom cov Yus Das uas nrog Mab Liab tuaj sawv daws quaj, mas Yes Xus tu siab kawg nyob hauv nruab siab, nws ib ce qaub thoob tas. 

34        Yes Xus hais tias :

« Nej muab nws tso qhov twg ? » 

Lawv teb tias :

« Huab Tais, koj los tom no, koj yuav pom. » 

35        Yes Xus kua muag poob nthav. 

36        Cov Yus Das thiaj hais tias :

« Saib, nws nyiam Las Ntxas Los kawg. » 

37        Tab sis muaj ib co Yus Das hais tias :

« Nws yog tus uas qhib tau neeg dig muag qhov muag, nws ho ua tsis tau kom tus neeg no txhob tuag ? » 

38        Ces Yes Xus rov tu siab heev kawg nyob nruab siab, nws mus tom lub ntxa. Yog ib lub qhov tsua, muaj ib daim txiag zeb kaw lub rooj ntxas. 

39        Yes Xus hais tias : « Nej tshem daim txiag zeb. »

Mas Tas uas yog tus tuag tus muam, hais rau Yes Xus tias :

« Huab Tais, nws tuag tau plaub hnub lawm : nws twb tsw lawm. » 

40        Yes Xus hais rau Mas Tas tias : « Kuv tsis tau hais rau koj tias yog koj ntseeg, koj yuav pom Tswv Ntuj lub hwj chim lod ? »

41        Ces lawv tshem daim txiag zeb, Yes Xus tsa muag ntsia saum ntuj, nws hais tias :

« Txiv, kuv ua koj tsaug vim koj mloog kuv. 

42        Kuv paub tias koj yeej ib txwm mloog kuv, tab sis kuv hais cov lus no, kom tsoom neeg uas sawv ncig kuv ntseeg tias yog koj xa kuv tuaj. »

43        Yes Xus hais li ntawd tas, nws hu ib suab nrov nrov tias :

« Las Ntxas Los, koj tawm los nraum no ! » 

44        Tus tuag tawm los, cov saw  tseem pav nws tej tes taw, daim ntaub npog ncauj tseem vov nws lub ntsej muag.  Yes Xus hais rau lawv tias : 

« Nej daws cov saw, nej cia nws mus nws. »   

 45       Coob tus Yus Das uas tuaj xyuas Mab Liab tau pom qhov uas Yes Xus ua ces lawv ntseeg txog Yes Xus. 

YOG TSWV NTUJ LO LUS         Nws lub txiaj ntsim

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

1 XAS MUAS 16: 1b, 6-7, 10-13

LUB NTSIAB LUS:  Xas Muas pleev Das Vis ua vaj.

COV LUS NYOB HAUV NTAWV XAS MUAS.

1b        HUAB TAIS hais rau Xas Muas tias :

« Koj ntim roj puv tus kub nyuj, koj mus.  

Kuv xa koj mus tom Yes Xes tsev nyob Npes Les Hes,

vim nyob hauv nws cov tub kuv xaiv ib tug los ua vaj. »

6          Xas Muas kom Yes Xes thiab nws cov tub huv tib si tuaj,

ces nws caw lawv tuaj txi Ntuj. 

Thaum lawv tuaj txog, Xas Muas xub pom Es Lis, nws xav tias : 

« Yog HUAB TAIS tus pleev tuaj txog lawm. »  

7          Tab sis HUAB TAIS hais rau Xas Muas tias :

« Koj txhob saib nws tus yam ntxwv sab nraud los nws lub cev siab.

Kuv tsis yuav nws.  HUAB TAIS nws ntsuas tas txhia yam,

nws tsis ntsuas zoo li neeg. 

Neeg saib tus yam ntxwv sab nraud,

hos HUAB TAIS saib hauv lub siab lub plawv. »

10        Yes Xes coj nws xya leej tub ib tug zuj zus tuaj nyob ntawm Xas Muas xub ntiag,

tab sis Xas Muas hais tias : « HUAB TAIS tsis xaiv cov no ib tug li. »

11        « Koj puas tshuav tub ntxiv ? » 

Yes Xes teb tias : « Tshuav tus tub ntxawg. 

Nws zov cov tsiaj nyob tom tshav zaub. »

Xas Muas hais rau Yes Xes tias :

« Koj tso neeg mus hu nws los.  Peb yuav zaum ntawm tsum mov no tos nws los tso. » 

12        Yes Xes thiaj tso neeg mus hu tus tub ntxawg los. 

Tus tub ntawd cov plaub hau liab daj. Nws lub ntsej muag zoo nraug. 

Nws sawm txhiaj kawg ! 

HUAB TAIS hais rau Xas Muas tias : 

« Yog tus no.  Koj pleev nws mas ! » 

13        Xas Muas nthos nkaus tus kub ntim roj,

nws pleev tus tub ntxawg nyob hauv nruab nrab nws cov kwv tij. 

Txij hnub ntawd los HUAB TAIS lub tswv yim ya los nyob hauv Das Vis.

Ces Xas Muas mam sawv kev rov mus Las Mas.

YOG TSWV NTUJ LO LUS         Nws lub txiaj ntsim

Nkauj Paj Nruag           HUAB TAIS YOG TUS TSWV ZOV YAJ                      

(NPN 23-1)

Txais: Huab Tais yog tus Zoo Tswv Zov Yaj, nws zov kuv, kuv tsis ntshaw dab tsi li!

1.         Huab Tais yog kuv tus tswv zov yaj, kuv tsis ntshaw dab tsi.

Nws tso kuv nyob hauv tej tshav zaub mos.

Nws coj kuv mus so nyob ze dej, nws rov ntxiv zog rau kuv tus plig.

2.         Nws coj kuv mus taug txoj kev ncaj kom nws lub npe nto koob meej.

Tab yog kuv taug kev mus hauv lub kwj ha tsaus ntuj nti,

kuv tsis ntshai vim koj nrog kuv,

koj rab pas nrig yog kuv chaw tso siab.

3.         Cov neeg ntxub kuv, lawv hnyos kuv.

Koj npaj ib roog qav rau ntawm kuv xub ntiag.

Koj pleev roj tsw qab rau saum kuv taub hau.

Koj hliv cawv puv lub ntim rau kuv haus.

4.         Tas kuv sim neej, kev kaj siab thiab kev hlub nrog nraim kuv.

Tas kuv sim neej, kuv yuav nyob hauv Huab Tais tsev.

ZAJ NYEEM OB

ES FES XOS 5 : 8 – 14

LUB NTSIAB LUS :  Txoj sia tshiab nyob hauv Leej Pleev.

COV LUS PAJ LUG SAU TUAJ RAU COV NTSEEG NYOB ES FES XOS.

8          Yav thaud, nej yog qhov tsaus ntuj nti.

Zaum no, nej nyob hauv Huab Tais, nej yog qhov pom kev nrig. 

9          Nej ua lub neej phim txoj kev pom kev cov me nyuam. 

Cov txiv txi hauv qhov pom kev : yog lub siab zoo,

lub siab ncaj, thiab lub siab zeem tau qhov tseeb. 

10        Nej ua tib zoo nrhiav saib, yog dab tsi xis Huab Tais siab. 

11        Nej txhob nrog luag koom tes ua hauj lwm hauv qhov tsaus ntuj,

vim cov hauj lwm hauv qhov tsaus ntuj txi tsis tau cov txiv zoo, 

nej yuav muab qhib tawm los mas zoo dua. 

12        Tej hauj lwm phem uas luag  nyiag ua, mas yus twb txaj muag hais txog.  

13        Tab sis, thaum muaj tus muab qhib tawm los rau nraum qhov pom kev lawd,

mas sawv daws nrog pom qhov tseeb. 

14        Vim tas txhua yam uas tawm los rau qhov muag pom, yog qhov pom kev. 

Vim li ntawd thiaj muaj lo lus hais tias :

‘Neeg tsaug zog, koj tsim los mas ! 

Koj sawv hauv cov tuag rov los, Leej Pleev yuav ziab koj.’ 

YOG TSWV NTUJ LO LUS         Nws lub txiaj ntsim

NTAWV MOO ZOO        

ZAM 9 : 1 – 41

LUB NTSIAB LUS :  Yes Xus kho tus dig muag nruab thiab.

COV LUS NYOB HAUV ZAM NTAWV MOO ZOO HAIS TIAS :                                       

1 Thaum Yes Xus mus kev, nws pom ib tug neeg ib txwm dig muag nruab thiab los. 

2          Nws cov  thwj  tim nug nws hais tias :

« Las Npis, leej twg ua txhaum : Puas yog nws los yog nws niam nws txiv ua txhaum,

nws thiaj dig muag txij nruab thiab los ?” 

3          Yes Xus teb tias :

« Tsis yog nws txhaum, thiab kuj tsis yog nws niam nws txiv txhaum,

tab sis nws yug los dig muag kom xwv Tswv Ntuj cov hauj lwm tshwm hauv nws tuaj rau luag pom.

4          Cheem tseem pom kev, peb yuav tsum ua hauj lwm li Tus Xa kuv tuaj, cov dej num. 

Thaum tsaus ntuj lawm, tsis muaj leej twg ua tau hauj lwm. 

5          Kuv nyob ntev npaum li cas hauv lub qab ntuj no, mas kuv yog qab ntuj neeg qhov pom kev. » 

6          Yes Xus hais li ntawd tas, nws nti qaub ncaug rau hauv pem teb, nws muab nws

cov qaub ncaug ua ib qho av nkos.  Nws muab qhov av nkos ntawd pleev tus dig muag qhov muag. 

7          Nws hais rau tus dig muag tias :

« Koj mus ntxuav qhov muag tom lub pas dej Xis Los Es », lo lus no txhais tias : tus Ntuj xa mus.

Tus dig muag mus ntxuav tas, nws rov los, nws cia li pom kev lawm. 

8          Cov neeg nyob sib ze thiab cov uas tau pom nws yav dhau los,

vim nws yog ib tug neeg thov khawv, lawv hais tias :

« Puas yog tus uas thaud zaum thov khawv ? » 

9          Ib txhia hais tias :

« Yog tus ntawd. » 

Ib txhia hais tias :

« Tsis yog, yog ib tug zoo li tus ntawd. »  Tus dig muag hais tias :

« Yog kuv los mas. » 

10        Luag  hais rau nws tias :

« Ua li cas koj ob lub qhov muag ho qhib lawm ? » 

11        Tus dig muag teb tias :

« Tus hu ua Yes Xus, nws ua ib qho av nkos, nws muab pleev kuv qhov muag,

ces nws hais rau kuv tias : « Koj mus tom lub pas dej Xis Los Es, koj ntxuav koj qhov muag. » 

Kuv thiaj mus tod, kuv ntxuav qhov muag tas, kuv cia li pom kev. » 

12        Lawv hais rau tus dig muag tias :

« Nws dua qhov twg lawm ? » 

Tus dig muag hais tias :

« Kuv tsis paub. »

13        Luag coj tus uas thaud dig muag mus rau cov Fas Lis Xais. 

14        Hnub uas Yes Xus ua av nkos qhib tus neeg ntawd ob lub qhov muag yog ib hnub xas npas tos. 

15        Cov Fas Lis Xais rov qab nug tus dig muag saib ua cas nws thiaj li pom kev.  Tus dig muag hais rau lawv tias : « Nws muab av nkos pleev kuv qhov muag, kuv mus ntxuav muag tas ces kuv pom kev. » 

16        Muaj ib co Fas Lis Xais hais tias : « Yeej tsis yog ib tug neeg tuaj ntawm Tswv Ntuj tuaj,

vim nws tsis caiv hnub xas npas tos. » Lwm cov hais tias :

« Ib tug neeg txhaum ua puas tau tej lub cim loj li ntawd ? » 

Ces lawv hais tsis sib haum. 

17        Lawv thiaj rov hais rau tus dig muag tias :

« Koj ne, koj hais dab tsi txog tus uas qhib koj qhov muag ? » 

Tus dig muag hais tias : « Yog ib tug yaj saub. »

18        Cov Yus Das tsis ntseeg tias thaud nws dig muag, zaum no nws pom kev,

ces lawv thiaj hu nws niam nws txiv tuaj. 

19        Lawv nug nws niam nws txiv tias :

« Tus no puas yog neb tus tub uas neb hais tias nws yug los nws yeej dig muag ?  Ua li cas nyem no nws thiaj pom kev ? » 

20        Tus dig muag niam thiab txiv teb hais tias :

« Wb paub tias nws yog wb tus tub, thiab nws yug los nws yeej dig muag. 

21        Tab sis ua cas nyem no nws ho pom kev, wb tsis paub.  Wb kuj tsis paub tias leej twg qhib nws qhov muag.  Nej nug nws mas, nws twb muaj hnub nyoog lawm : nws txawj hais nws. » 

22        Tus dig muag niam thiab txiv hais li ntawd vim nkawd ntshai cov Yus Das.  Vim  cov Yus Das tau hais haum tias leej twg lees tias Yes Xus yog Leej Pleev, mas lawv yuav ntiab nws tawm hauv lub tsev txoos. 

23        Yog vim li ntawd, nws niam nws txiv thiaj hais tias : « Nws twb muaj hnub nyoog lawm; nej nug nws. »

24        Cov Yus Das rov hu tus neeg uas thaud dig muag kom tuaj dua ib zaug ntxiv, lawv hais rau nws tias :

« Koj cav lus zoo txog Tswv Ntuj lub koob meej !  Peb paub tias tus neeg ntawd yog ib tug neeg txhaum. » 

25        Tus dig muag teb hais tias :

« Kuv tsis paub tias nws yog ib tug neeg txhaum los tsis yog.  Kuv tsuas paub ib qho xwb, yog qhov tias thaud kuv dig muag, nyem no kuv pom kev. » 

26        Lawv hais rau tus dig muag tias : « Nws tau ua dab tsi rau koj ? 

Nws qhib koj ob lub qhov muag li cas ? » 

27        Tus dig muag teb rau lawv tias :

« Kuv twb hais qhia nej tas lawm, nej tsis mloog.  Vim li cas nej xav rov mloog dua ? 

Puas yog nej xav ua nws thwj tim ? » 

28        Ces lawv cem nws tias :

« Koj thiaj yog tus neeg ntawd ib tug thwj tim ntag ; peb yog Mais Xes cov thwj tim. 

29        Peb paub tias Tswv Ntuj tau hais lus rau Mais Xes.  Hos tus ntawd,

peb tsis paub nws tuaj qhov twg tuaj. » 

30        Tus dig muag teb rau lawv tias : « Qhov no yog qhov nej ua kuv poob siab tas,

rau qhov nej tsis paub nws tuaj qhov twg tuaj, vim nws qhib tau kuv qhov muag. 

31        Peb paub tias Tswv Ntuj tsis mloog cov neeg txhaum. Tab sis yog leej twg teev nws thiab ua raws li       nws lub siab xav, mas Tswv Ntuj mloog tus ntawd. 

32        Tsis muaj leej twg tau hnov hais txog ib tug neeg qhib tau tus neeg yug los dig muag lub qhov muag.  33      Yog tus neeg ntawd tsis tuaj ntawm Tswv Ntuj tuaj, mas nws ua tsis tau dab tsi. » 

34        Lawv teb rau nws tias :

« Txij koj yug los, koj yeej yog neeg txhaum, koj haj cav qhuab qhia peb thiab ! » 

Ces lawv muab nws thawb rau nraum zoov. 

35        Yes Xus kuj hnov tias lawv muab tus dig muag thawb rau nraum zoov. 

Thaum Yes Xus pom nws, Yes Xus hais tias :

« Koj puas ntseeg txog Neeg Leej Tub. » 

36        Tus dig muag teb hais tias :

« Huab Tais, nws yog leej twg ?  Kuv xav ntseeg txog nws. »

37        Yes Xus hais rau nws tias :

« Koj twb pom nws.  Nws yog tus hais lus rau koj. » 

38        Tus dig muag hais tias : 

« Huab Tais, kuv ntseeg. » 

Ces nws txhos caug pe Yes Xus. 

39        Yes Xus hais tias :

« Kuv tuaj hauv lub qab ntuj no yog tuaj txiav txim : kom xwv cov uas qhov muag tsis pom kev,

rov pom kev tuaj ; hos kom cov neeg pom kev ua neeg dig muag. » 

40        Cov Fas Lis Xais uas nrog Yes Xus nyob ntawd, hnov cov lus no, lawv hais rau nws tias :

« Peb puas yog ib co neeg dig muag thiab ? » 

41        Yes Xus hais rau lawv tias :

« Yog nej dig muag, mas nej yuav tsis muaj txhaum. Tab sis nyem no nej hais tias :

Peb pom kev, mas nej cov txhaum nyob li qub.”

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

KEV TSIV 17 : 3 – 7

LUB NTSIAB LUS :  Dej txhawv ntawm phab tsua los.

COV LUS NYOB HAUV NTAWV KEV TSIV.

3          Tsoom pej xeem nqhis dej,

lawv yws yws rau Mais Xes tias : 

« Ua cas koj thiaj coj peb tawm Hais Nkws Tos teb los ? 

Puas yog koj xav kom kuv tuag dej,

kuv thiab kuv cov me nyuam thiab kuv cov tsiaj peb sawv daws tuag dej ? »

4          Mais Xes tsa suab hu  HUAB TAIS hais tias :

« Kuv yuav ua li cas rau haiv neeg no ?

Tshuav me ntsis xwb ces lawv yuav xuas pob zeb txawb kuv. » 

5          HUAB TAIS hais rau Mais Xes tias : 

« Koj mus ua tsoom pej xeem ntej,

koj coj ob peb tug txwj laus His Xas Lais nrog koj mus. 

Koj nqa koj rab pas nrig ntawm tes,

yog rab pas uas koj tau siv los ntaus tus niam dej nyob Hais Nkws Tos, koj mus. 

6          Kuv yuav mus ua koj ntej,  saum lub tsua, 

nyob saum roob Hos Les tos koj tuaj. 

Koj yuav ntaus lub tsua,

ces dej yuav txhawv tawm los rau tsoom pej xeem haus. » 

Mais Xes ua raws li ntawd,

cov txwj laus His Xas Lais ntsia ntsoov nws ua.           

7          Mais Xes tis npe rau thaj chaw ntawd hu ua Mas Xas thiab Mes Lis Npas,

vim nyob ntawd, cov His Xas Lais nrhiav lus rau nws thiab lawv sim HUAB TAIS,

lawv hais tias :  « HUAB TAIS puas nrog peb nyob los tsis nrog ? »

YOG TSWV NTUJ LO LUS         Nws lub txiaj ntsim

Nkauj Paj Nruag        YOG NEJ HNOV HUAB TAIS LUB SUAB                   

(NPN 95)

Txais: Hnub no yog nej hnov Huab Tais lub suab lawm, nej tsis txhob cia nej lub siab tawv li pob zeb.

1.         Nej tuaj, peb sawv daws hu nkauj zoo siab cav txog Huab Tais.

Peb qw suab zoo siab hawm lub tsua cawm peb.

Peb txav los ntawm nws xub ntiag ua nws tsaug.

Peb npuaj teg hu nkauj cav txog nws.

2.         Nej chaws los, peb khoov cev, peb pe.

Peb txhos caug hawm tus Huab Tais tsim peb los.

Nws yog peb tus Tswv Ntuj, peb yog nws haiv neeg,

yog pab yaj nws txhais tes hwj.

3.         Hnub no, nej cia li mloog Huab Tais lub suab!

Nej tsis txhob cia nej lub siab tawv li pob zeb

zoo li thaum nej nyob Mes Lis Npas

thiab nyob Mas Xas hauv teb chaws suab puam.

Thaum ntawd, nej cov yawg koob twb pom kuv cov hauj lwm muaj hwj huam,

tsis kav lawv tseem twv kuv thiab sim kuv.

ZAJ NYEEM OB   

LOS MAS 5 : 1-2, 5-8

LUB NTSIAB LUS: Thaum ib tug neeg ncaj lawm nws nrog Tswv Ntuj nyob kaj siab lug.

PAJ LUG SAU TUAJ RAU COV NTSEEG NYOB LOS MAS TIAS:

1          Yog vim peb txais kev ncaj ntawm kev ntseeg tuaj,

mas peb thiaj nrog Tswv Ntuj nyob kaj siab lug nyob hauv peb tus Huab Tais Yes Xus Pleev. 

2          Yes Xus Pleev pub kev ntseeg,

ces peb tau txais txiaj ntsim ;

peb tau los nyob hauv lub txiaj ntsim ;

peb cav lus zoo thiab peb tso siab tias peb yuav txais Tswv Ntuj lub hwj chim. 

5          Kev tso siab ua kom peb tsis muaj chaw khuv xim, vim Leej Ntuj Plig Ntshiab,

uas Ntuj pub rau peb, nws hliv Tswv Ntuj txoj kev nyiam rau hauv peb lub siab.

6          Vim li ntawd, lub sij hawm peb tsis muaj zog, thaum txog lub hnub nyoog teem,

Leej Pleev thiaj raug luag tua kom tau pab cov neeg tsis hwm Ntuj. 

7          Yus yuav luag tsis kam tuag kom tau pab ib tug neeg ncaj ;

nyaj tej zaus yus yuav muaj peev xwm tuag kom tau pab ib tug neeg siab zoo. 

8          Yam uas zeem tseeb tias Tswv Ntuj

nyiam peb yog qhov tias thaum peb tseem yog neeg txhaum,

Leej Pleev tuag kom tau pab peb.

YOG TSWV NTUJ LO LUS       Nws lub txiaj ntsim

NTAWV MOO ZOO        

ZAM 4 : 5-42

LUB NTSIAB LUS:  Yes Xus nrog ib tug poj niam Xas Mas Lias tham

COV LUS NYOB HAUV ZAM NTAWV MOO ZOO.

5          Nws mus txog ib lub nroog Xas Mas Lias hu ua Xis Kes,

nyob ze thaj av uas Yas Kos muab rau nws tus tub Yos Xes. 

6          Yas Kos lub qhov dej nyob ntawd.

7          Yes Xus mus kev, nws sab, nws zaum ntawm lub qhov dej. 

Kwv yees tav su lawm.  Ib tug poj niam Xas Mas Lias tuaj ce dej. 

Yes Xus hais rau nws tias :

« Koj muab dej rau kuv haus. » 

8          Nws cov thwj tim mus yuav txhiam xws noj hauv nroog lawm. 

9          Tus poj niam Xas Mas Lias hais rau Yes Xus tias :

« Ua li cas ?  Koj yog ib tug Yus Das, koj tseem yuav thov dej haus ntawm kuv. 

Kuv yog ib tug poj niam Xas Mas Lias. » 

Vim tias cov Yus Das tsis nrog cov Xas Mas Lias sib fim. 

10        Yes Xus teb rau tus poj niam tias :

« Yog koj paub Tswv Ntuj lub txiaj ntsim, thiab paub tus uas hais rau koj tias :

‘koj muab dej rau kuv haus,’   mas yog koj yuav thov nws,

ces nws yuav muab ib co dej muaj txoj sia rau koj. » 

11        Tus poj niam hais rau Yes Xus tias :

« Huab Tais, koj tsis muaj dab tsi ce dej, hos lub qhov dej los kuj tob. 

Koj yuav ua li cas muab tau cov dej muaj txoj sia ntawd ? 

12        Koj puas loj dua peb yawg koob Yas Kos uas nws muab lub qhov dej no rau peb ? 

Nws thiab nws cov tub, nws cov tsiaj puav leej tau haus lub qhov dej no. » 

13        Yes Xus teb rau tus poj niam hais tias :

« Leej twg haus cov dej no tas tseem yuav rov nqhis dua. 

14        Hos tus haus cov dej uas kuv muab rau nws, mas nws yuav tsis nqhis ib zaug ntxiv. 

Cov dej uas kuv muab,

yuav txia ua ib tug dej txhawv muaj txoj sia nyob mus li nyob hauv nws. » 

15        Tus poj niam hais rau Yes Xus tias : « Huab Tais, koj pub cov dej ntawd rau kuv,

kom kuv tsis txhob nqhis dej ntxiv, kom kuv txhob tau rov tuaj ce dej ntawm no ntxiv. » 

16        Yes Xus hais rau nws tias : « Koj mus, koj hu koj tus txiv, koj rov tuaj ntawm no. » 

17        Tus poj niam teb hais tias : « Kuv tsis muaj txiv. » 

Yes Xus hais rau nws tias :

« Koj hais tias : ‘Kuv tsis muaj txiv,’ koj hais yog lawm, 

18        vim koj twb yuav tsib tug txiv,

hos tus uas koj muaj tam sis no, tsis yog koj tus txiv. 

Qhov koj hais no muaj tseeb. »

19        Tus poj niam hais rau Yes Xus tias :

« Huab Tais, kuv pom tias koj yog ib tug yaj saub. 

20        Peb cov yawg koob teev ntuj saum lub roob no, hos nej,

mas nej hais tias qhov chaw uas sawv daws yuav tsum mus teev Ntuj yog Yes Lus Xas Les. » 

21        Yes Xus hais rau tus poj niam tias :

« Phauj, koj ntseeg kuv mog, lub caij nyoog los txog lawm :

tsis yog nyob saum lub roob no los nyob Yes Lus Xas Les uas nej yuav teev Leej Txiv. 

22        Nej teev qhov uas nej tsis paub. 

Peb teev qhov uas peb paub,

vim txoj kev cawm tuaj ntawm cov Yus Das tuaj.

 23       Tab sis txog sij hawm lawm, yog tam sis no ntag,

uas cov neeg hawm Ntuj haum kev tseeb,

lawv hawm Leej Txiv nyob hauv lub tswv yim thiab nyob hauv txoj kev tseeb. 

Leej Txiv nrhiav cov neeg zoo li ntawd los teev nws. 

24        Tswv Ntuj yog tswv yim,

cov neeg teev Tswv Ntuj yuav tsum teev nyob hauv lub tswv yim thiab hauv qhov tseeb. » 

25        Tus poj niam hais rau Yes Xus tias :

« Kuv paub hais tias tus Mes Xias,

uas luag hu ua Leej Pleev, yuav tuaj.

Thaum tus ntawd tuaj txog, nws yuav tshaj ib puas tsav yam rau peb. » 

26        Yes Xus hais rau nws tias :

« Kuv yog tus ntawd, tus uas hais lus rau koj. »

27        Thaum ntawd, Yes Xus cov thwj tim los txog,

lawv poob siab rau qhov tias Yes Xus nrog ib tug poj niam hais lus. 

Tsis kav tsis muaj leej twg hais tias :

« Koj xav tau dab tsi ntawm nws? » los hais tias :

« Vim li cas koj nrog nws tham ? » 

28        Ces tus poj niam tso nws lub hub tseg rau ntawd,

nws rov mus hauv lub nroog. 

Nws hais rau zeej tsoom tias :

29        « Nej tuaj xyuas ib tug neeg saib,

nws hais tej uas kuv tau ua tas huv tib si rau kuv. 

Tej zaum nws yog Leej Pleev ? » 

30        Lawv tawm hauv nroog tuaj cuag Yes Xus. 

31        Thaum ntawd, cov thwj tim txhib Yes Xus hais tias :

« Las Npis, los noj mov. »

32        Tab sis Yes Xus hais rau lawv tias :

« Kuv muaj ib cov txhiam xws noj uas nej tsis paub. » 

33        Cov thwj tim sib tham tias :

« Ntshai muaj neeg nqa mov tuaj rau nws noj lawm ? » 

34        Yes Xus hais rau lawv tias :

« Kuv cov txhiam xws noj yog ua raws Tus Xa kuv tuaj lub siab,

thiab leg nws tej dej num kom tiav. 

35        Puas yog nej hais tias : Tshuav plaub hlis ntxiv, mam txog caij sau qoob ? 

Tab sis kuv hais rau nej : Nej tsa muag ntsia tej nras teb saib,

nplej siav daj vog, zoo hlais lawm. 

36        Tus sau nplej yuav txais nqi zog,

nws yuav sau cov qoob mus rau txoj sia nyob mus li. 

Tus sau nplej yuav nrog tus tseb nplej ib txhij zoo siab. 

37        Vim zaj paj lug no hais qhov tseeb tias :

tus sau nplej nws muaj nws ib tug, tus tseb nplej nws muaj nws ib tug. 

38        Kuv tau xa nej mus sau tej qoob uas nej tsis tau khwv cog. 

Lwm cov tau khwv, hos nej khaws xyeem qhov lawv khwv tau. »

39        Coob leej Xas Mas Lias hauv lub nroog no ntseeg txog Yes Xus,

vim tus poj niam lo lus ua tim khawv tias :

« Nws hais tas puas tsav yam kuv tau ua rau kuv. »

40        Thaum cov Xas Mas Lias tuaj cuag Yes Xus,

mas lawv thov kom nws nrog lawv nyob. 

Yes Xus thiaj nrog lawv nyob ob hnub. 

41        Ces haj yam muaj neeg coob ntseeg txog nws vim nws cov lus. 

42        Lawv hais rau tus poj niam tias :

« Tsis yog vim tej lus koj tau hais, mas peb thiaj ntseeg,

yog vim peb tau hnov nws hais kiag,

ces peb paub tias nws yog tus Cawm lub qab ntuj neeg tiag. »

HUAB TAIS PLEEV          Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB    

HAUV PAUS   12 : 1 – 4a

LUB NTSIAB LUS :  Tswv Ntuj hu Has Nplas.

COV LUS NYOB HAUV NTAWV HAUV PAUS HAIS TIAS :

1    HUAB TAIS hais rau Has Nplas tias : 

« Tso  koj lub teb chaws tseg, tso koj tsev neeg, 

koj  tej  txheeb ze thiab koj txiv lub vaj tse tseg, 

koj mus nyob lub teb chaws uas kuv yuav qhia rau koj. 

2     Kuv yuav tsa koj ua ib haiv neeg loj, kuv yuav foom hmoov zoo rau koj,

thiab kuv yuav ua kom koj lub npe nto moo loj. 

Koj yuav nqa txoj hmoov zoo rau txhua leej txhua tus. 

3     Kuv yuav foom hmoov zoo rau cov neeg uas foom hmoov zoo rau koj,

kuv yuav foom hmoov phem rau cov uas foom phem rau koj. 

Tas txhua haiv neeg nyob ntiaj teb yuav muab koj lub npe los sib foom hmoov zoo.”

4     Has Nplas sawv kev mus raws li HUAB TAIS kom nws mus.

YOG TSWV NTUJ LO LUS.         Nws lub txiaj ntsim.

Nkauj Paj Nruag   PEB TSO SIAB RAU HUAB TAIS  

(NPN 33-1)

Txais: Huab Tais, thov koj khuv leej peb mas ! Peb tso siab rau koj.

1.     Huab Tais lo lus yog lus ncaj, nws cov dej num nyob ruaj nreb.

Nws nyiam kev ncaj thiab kev haum pheej.

Huab Tais txoj kev hlub ntws puv lub ntiaj teb.

2.     Huab Tais zov cov neeg hwm nws.

Nws zov cov neeg tso siab rau nws lub siab zoo.

Nws npo lawv dim ntawm kev tuag.

Nws txuag lawv txoj sia thaum lub teb chaws raug kev tshaib kev nqhis.

3.     Peb tus ntsuj plig tos ntsoov Huab Tais.

Nws yog tus pab peb, nws yog peb daim leem phiaj.

Huab Tais, thov kom koj lub siab hlub roos peb.

Peb chaw tso siab yog nyob hauv koj.

ZAJ NYEEM OB

2 TIS MOS TES 1 : 8b – 10

LUB NTSIAB LUS :  Cov txiaj ntsim uas Tis Mos Tes tau txais.

COV LUS UAS PAJ LUG SAU TUAJ RAU TIS MOS TES.

8b     Koj yuav zoo siab nrog kuv raug txom nyem vim lub Moo Zoo. 

Koj muaj Tswv Ntuj lub zog nres koj. 

9      Tswv Ntuj yog tus cawm peb. 

Nws lo lus ntshiab hu peb, tsis yog vim peb cov dej num. 

Nws hu peb vim nws pom zoo hu, thiab vim nws xav pub txiaj ntsim. 

Tswv Ntuj twb pub nws cov txiaj ntsim rau peb txij puag hnub

txheej tshoj thaum ub nyob hauv Yes Xus Pleev. 

10     Nyiam no, lub txiaj ntsim ntawd tawm tuaj rau pom xyeem

nyob hauv Yes Xus Pleev, tus cawm peb. 

Yes Xus rhuav kev tuag, thiab nws lub Moo Zoo ua kom txoj sia tsis txawj tuag ci tuaj.

YOG TSWV NTUJ LO LUS.         Nws lub txiaj ntsim.

NTAWV MOO ZOO          

MAS TAIS 17 : 1 – 9

LUB NTSIAB LUS :   Yes Xus lub hwj chim tawm los.

COV LUS NYOB HAUV MAS TAIS NTAWV MOO ZOO.

1      Tau rau hnub tom qab, Yes Xus coj Pob Zeb,

Yas Kos thiab nws tus kwv Zam mus rau ib qho,

ces lawv nce mus saum ib lub roob siab. 

2      Yes Xus ib ce hloov tas nyob ntawm lawv xub ntiag :

nws lub ntsej muag ci ntsa iab zoo li lub hnub,

nws cov ris tsho ci dawb paug li qhov pom kev. 

3      Ces Mais Xes thiab Es Lias nkawd tawm los rau lawv pom. 

Nkawd nrog Yes Xus tham.

4      Pob Zeb hais rau Yes Xus tias :

« Huab Tais, peb nyob ntawm no mas zoo tas nrho.

Yog koj kheev no, kuv yuav ua peb lub tsev tsam phooj, ib lub rau koj,

ib lub rau Mais Xes, ib lub rau Es Lias. »

5      Pob Zeb tseem tab tom hais li ntawd,

ces muaj ib tw huab ci dawb paug los ntxoov npog nkaus lawv,

ces ib lub suab hais hauv twv huab tuaj tias :

« Tus no, yog kuv leej tub uas kuv nyiam,

nws yog kuv qhov chaw zoo siab, nej mloog nws mog ! » 

6      Cov thwj tim hnov lub suab ntawd, lawv khoov ntsej muag ti av, lawv ntshai kawg. 

7      Tab sis Yes Xus txav los plhws lawv, thiab nws hais rau lawv tias :

« Nej sawv, nej txhob ntshai. » 

8      Ces lawv tsa muag ntsia, tsis pom leej twg li,

kawg tshuav Yes Xus tib leeg xwb.

9      Thaum lawv nqes saum roob los, Yes Xus txwv lawv tias :

« Nej txhob qhia qhov nej tau pom no rau leej twg li,

nej tos kom Neeg Leej Tub sawv hauv cov tuag rov los tso. » 

HUAB TAIS PLEEV.          Lub qab ntuj neeg cav txog koj.

chiv no peb yuav mloog Tswv Ntuj cov lus qhuab qhia

ZAJ NYEEM IB    

HAUV PAUS 2 : 7-9, 3 : 1-7

LUB NTSIAB LUS : Lwm zaj piav txog Tswv Ntuj tsim ntuj tsim teb. Lub vaj Es Dees.

NTAWV HAUV PAUS HAIS TIAS :

7 – HUAB TAIS Tswv Ntuj muab ib thooj av nplaum los puab ua tib neeg. 

HUAB TAIS Tswv Ntuj tshuab pa rau hauv tib neeg qhov ntswg,

ces tib neeg ciaj ua ib tug muaj sia. 

8 – HUAB TAIS Tswv Ntuj cog tau ib lub vaj  nyob  Es Dees, nyob sab  hnub  tuaj. 

Nws muab tus txiv neej uas nws tau puab  tso rau hauv lub vaj. 

9 – HUAB TAIS Tswv Ntuj ua kom txhua yam ntoo uas zoo saib thiab zoo noj tuaj hauv lub vaj thaj av.  Tus ntoo muaj txoj sia tuaj nyob hauv nruab nrab lub vaj,

thiab tus ntoo uas paub qhov zoo qhov phem. 

1 – Tus nab yog tus ntse tshaj tas txhua hom tsiaj HUAB TAIS Tswv Ntuj tau tsim los nyob nruab nrag. Nab hais rau tus poj niam tias : 

« Li ntawd, Tswv Ntuj hais tias : 

Neb yuav tsis txhob noj  txhua yam txiv ntoo hauv lub vaj no puas yog ? » 

2 – Tus poj niam teb rau tus nab tias : 

« Wb noj tau cov txiv txi saum cov ntoo hauv lub vaj no tib si. 

3 – Tsuas tshwj cov txiv txi saum tsob ntoo nyob hauv nruab nrab lub vaj,

mas Tswv Ntuj hais tias : 

“Neb tsis txhob noj, tsis txhob kov, yog neb noj neb kov, mas neb yuav tuag. »     

4 – Tus nab teb ntua tus poj niam tias :

« Tsis  muaj  li ntawd  ib  zaug !  Neb yuav tsis tuag. 

5 – Vim Tswv Ntuj paub tias, hnub twg neb noj ces neb qhov muag yuav qhib,

neb yuav zoo li tej tus tswv ntuj uas paub qhov zoo thiab qhov phem. » 

6 – Tus poj niam pom hais tias tus ntoo ntawd yeej zoo noj thiab zoo saib kawg,

thiab yog tus ntoo uas yus ntshaw noj kom yus paub qhov zoo thiab qhov phem.

Nws de zoj lub txiv ntawm tus ntoo los noj. 

Nws kuj cev rau nws tus txiv uas nrog nws nyob, ces tus txiv kuj noj thiab. 

7 – Ces nkawd ob leeg qhov muag qhib plho, nkawd paub hais tias nkawd liab qab. 

Nkawd thiaj muab nplooj ncuav pias los ua tiab npua. 

Yog Tswv Ntuj Lo Lus        Nws lus txiaj ntsim

Nkauj Paj Nruag              THOV TSWV NTUJ KHUV LEEJ                      

(NPN 51-1)

Txais: Huab Tais, peb tau ua txhaum rau koj lawm, thov koj khuv leej peb mas!

1 – Tswv Ntuj, koj lub siab zoo, thov koj khuv leej kuv.

Koj lub siab dav hlub neeg, thov koj so kuv cov txhaum.

Thov koj ntxuav kuv qhov phem pov tseg,

yaug kuv cov txhaum kom kuv ntshiab tuaj.

2 – Kuv paub kuv cov txhaum,

kuv qhov yuam kev nyob ntawm kuv xub ntiag tsis tseg.

Huab Tais, kuv ua txhaum rau koj tib leeg xwb.

Kuv tau ua yam phem rau koj qhov muag pom.

3 – Tswv Ntuj, thov koj tsim ib lub siab huv rau kuv.

Koj tso dua ib lub tswv yim khov rau hauv kuv.

Koj tsis txhob ntiab kuv mus deb ntawm koj lub ntsej muag,

txhob thau koj lub tswv yim ntshiab ntawm kuv.

4 – Koj ua kuv lub siab kaj vim koj cawm kuv.

Koj nthuav kuv lub tswv yim kom dav.

Huab Tais, thov koj qhib kuv di ncauj,

kuv lub ncauj yuav cav lus zoo txog koj.

ZAJ NYEEM OB

LOS MAS 5 : 12 – 19

LUB NTSIAB LUS : Muab As Das thiab Yes Xus Pleev sib piv.

PAJ LUG SAU NTAWV TUAJ RAU COV NTSEEG NYOB LOS MAS TIAS :

12 – Yog vim tib tug neeg xwb, mas kev txhaum tau tshwm los nyob hauv lub ntiaj teb,

ces kev txhaum coj kev tuag los. Txoj kev tuag thiaj raug tas zeej tsoom, vim sawv daws ua txhaum.  

13 – Kev txhaum xub tshwm los nyob ntiaj teb ua ntej Txoj Cai, tab sis thaum tsis muaj Txoj Cai, mas yus tsis ris lub txim txhaum.  Txij As Das los txog Mais Xes, kev tuag ua vaj kav sawv daws : 

14 – tab yog cov neeg tsis tau ua tej yam txhaum zoo nkaus li As Das mas lawv kuj zwm rau kev tuag, vim As Das yog tus duab qhia txog tus yuav tuaj. 

15 – Tab sis lub txiaj ntsim tsis zoo li kev txhaum.  Vim ib tug xwb ua txhaum mas tas zeej tsoom tuag.   Nyem no Tswv Ntuj lub txiaj ntsim thiab cov paj tshab uas Ntuj pub nyob hauv Yes Xus Pleev haj yam ntws los ntau rau zeej tsoom. 

16 – Lub txiaj ntsim uas tau coj  yam zoo los, tsis zoo li yav thaum ub, uas ib tug neeg xwb ua txhaum : thaud, ib leej tib neeg tau ua ib qho txhaum xwb, mas Ntuj txiav tias neeg yuav raug txim ; hos nyem no neeg tau ua ntau yam txhaum ntev ntev los,  tsis kav lub txiaj ntsim ua kom neeg ncaj tuaj. 

17 – Vim ib tug neeg tau ua txhaum, ces kev tuag tau ua vaj.  

Nyem no, cov txais lub txiaj ntsim thiab txais kev ncaj tej paj tshab,

mas lawv haj yam yuav ua vaj nyob hauv txoj sia, vim Yes Xus Pleev tib leeg . 

18 – Li ntawd, ib tug neeg qhov txhaum pus tas ib zeej tsoom neeg mus rau kev raug txim ;

ib tug neeg txoj kev ncaj kuj pub kev ncaj thiab pub txoj sia rau ib tsoom neeg. 

19 – Vim ib tug neeg txoj kev tsis mloog lus, ces tas zeej tsoom thiaj ua neeg txhaum ;

vim ib tug neeg kev mloog lus, ces tas zeej tsoom yuav tau nce mus ua neeg ncaj. 

Yog Tswv Ntuj Lo Lus        Nws lus txiaj ntsim

ZAJ NYEEM OB 

LOS MAS 5 : 12, 17-19

LUB NTSIAB LUS :  Muab As Das thiab Yes Xus Pleev sib piv.

PAJ LUG SAU NTAWV TUAJ RAU COV NTSEEG NYOB LOS MAS TIAS :

12 – Yog vim tib tug neeg xwb, mas kev txhaum tau tshwm los nyob hauv lub ntiaj teb,

ces kev txhaum coj kev tuag los. Txoj kev tuag thiaj raug tas zeej tsoom, vim sawv daws ua txhaum.  

17 – Vim ib tug neeg tau ua txhaum, ces kev tuag tau ua vaj. Nyem no, cov txais lub txiaj ntsim thiab txais kev ncaj tej paj tshab, mas lawv haj yam yuav ua vaj nyob hauv txoj sia, vim Yes Xus Pleev tib leeg . 

18 – Li ntawd, ib tug neeg qhov txhaum pus tas ib zeej tsoom neeg mus rau kev raug txim ;

ib tug neeg txoj kev ncaj kuj pub kev ncaj thiab pub txoj sia rau ib tsoom neeg. 

19 – Vim ib tug neeg txoj kev tsis mloog lus, ces tas zeej tsoom thiaj ua neeg txhaum ;

vim ib tug neeg kev mloog lus, ces tas zeej tsoom yuav tau nce mus ua neeg ncaj. 

Yog Tswv Ntuj Lo Lus        Nws lus txiaj ntsim

NTAWV MOO ZOO        

MAS TAIS 4 : 1 – 11

LUB NTSIAB LUS :  Yes Xus yeej kev ntxias.

MAS TAIS NTAWV MOO ZOO HAIS TIAS :

1 – Thaum ntawd, Leej Ntuj Plig coj Yes Xus mus rau teb chaws suab puam kom raug dab phem ntxias.

2 – Yes Xus yoo mov tau plaub caug hnub plaub caug hmo, ces nws tshaib plab.  

3 – Ces niag ntxias neeg txav los, nws hais rau Yes Xus tias :

« Saib, koj yog Tswv Ntuj Leej Tub no, koj hais kom cov pob zeb no txia ua mov ! » 

4 – Tab sis Yes Xus teb tias : « Muaj lus sau cia tias :

neeg tsis kawg muab mov los yug txoj sia xwb, neeg tseem muab txhua lo lus tawm ntawm Tswv Ntuj lub ncauj los yug txoj sia thiab. »

5 – Dab phem tseem coj Yes Xus nrog nws mus hauv lub Nroog Ntshiab. 

Ces dab phem coj Yes Xus mus tso puag saum lub ruv Tuam Tsev Teev Ntuj, 

6 – dab phem hais tias : « Saib, koj yog Tswv Ntuj Leej Tub no, koj dhia lawm puag hauv, vim muaj lus sau cia tias :

Ntuj yuav txib nws cov tshiab, kom lawv nqa koj nyob hauv lawv txhais tes, kom koj ko taw txhob dawm ib lub pob zeb li. »

7 – Yes Xus hais rau dab phem tias : “Tseem muaj lus sau cia tias :

koj yuav tsis txhob ntxias koj tus Huab Tais Tswv Ntuj.”  

8 – Dab phem tseem coj Yes Xus mus txog saum ib lub roob siab siab. 

Nws taw cov ceeb tsheej muaj koob meej nyob ntiaj teb rau Yes Xus ntsia. 

9 – Nws hais tias : « Yog koj txhos caug pe kuv, mas kuv yuav muab tej ntawd tas huv si rau koj. » 

10 – Yes Xus hais rau dab phem tias : « Xas Tas, koj khiav mus !  Vim muaj lus sau cia tias :

tus koj yuav pe, yog koj tus Huab Tais Tswv Ntuj. Koj yuav teev nws tib leeg xwb. »

11 – Dab phem thiaj khiav ntawm Yes Xus mus. Ces cov Tshiab txav los tsob hwb Yes Xus.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB             

NPES XIS LAS 15 : 15-20.

LUB NTSIAB LUS : Tswv Ntuj pub nws lub txiaj ntsim pab peb mus taug txoj kev zoo.

Hos peb tseem yuav tsum txiav siab thiab : peb yuav tsum xaiv txoj kev peb taug.

COV LUS NYOB HAUV NTAWV NPES XIS LAS.

15 – Yog koj xav mas koj yeej coj cov lus qhia tau. Koj yuav ua xis Huab Tais siab. 

16 – Huab Tais tso dej thiab hluav taws rau ntawm koj xub ntiag. 

Koj xyab tes mus kov dej los kov hluav taws tau raws li koj nyiam.  

17 – Txoj sia thiab txoj kev tuag nyob ntawm neeg xub ntiag. 

Ntuj pub txoj sia thiab txoj kev tuag rau neeg raws li neeg nyiam. 

18 – Txoj kev thoob tsib loj tas nrho, nws muaj zog, nws muaj hwj huam. 

Nws pom tas ib puas tsav yam.  

19 – Huab Tais ntsia ntsoov cov neeg hwm nws. Nws paub txhua yam neeg ua. 

20 – Huab Tais tsis tau kom leej twg mus taug txoj kev tsis hwm Ntuj, nws tsis tau tso lus rau leej twg ua txhaum.

Yog Tswv Ntuj Lo Lus        Nws lus txiaj ntsim

Nkauj Paj Nruag              COV TAU TXOJ HMOOV ZOO             

(NPN 119-1)

Txais: Cov tau txoj hmoov zoo yog cov ua raws Huab Tais txoj cai.

1 – Cov tau txoj hmoov zoo yog cov neeg coj tus cwj pwm ncaj ncees, yog cov ua raws nraim Huab Tais txoj cai.

Cov tau txoj hmoov zoo yog cov ua raws li Huab Tais lub siab xav, yog cov nrhiav nws tas siab tas ntsws.

2 – Koj tshaj cov lus qhuab qhia rau zeej tsoom kom muab khaws tseg. Thov kom kuv coj tau tus yeeb yam ruaj, kuv thiaj yuav ua tau raws koj cov cai. kuv yuav khaws koj lo lus.

3 – Thov koj ua zoo rau koj tus tub txib kom kuv muaj txoj sia nyob,

Thov koj qhib kuv lub tswv yim kom kuv ras txog qhov tseeb nyob hauv koj txoj cai.

4 – Huab Tais, thov koj qhia koj cov cai lij choj rau kuv. Kuv yuav ua raws nraim koj txoj cai.

Thov koj qhib kuv lub tswv yim kom kuv coj tau koj txoj cai.

Kuv yuav muab koj txoj cai cog rau hauv kuv nruab siab.

ZAJ NYEEM OB             

1 KOS LIS NTHOS 2 : 6-10.

LUB NTSIAB LUS : Txoj kev thoob tsib uas peb txais ntawm Yes Xus los yog ib txog kev thoob tsib txawv txoj kev thoob tsib uas lub ntiaj teb neeg nyiam.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

6 – Peb hais txog kev Thoob Tsib rau cov neeg zoo txhij zoo txhua. 

Txoj kev thoob tsib no tsis yog ntiaj teb kev thoob tsib, thiab tsis yog ntiaj teb cov vaj tej kev thoob tsib uas yuav  ploj. 

7 – Txoj kev thoob tsib uas peb hais txog, mas yog Tswv Ntuj txoj kev Thoob Tsib ;

yog txoj kev Thoob Tsib uas neeg tsis to taub, thiab tseem nyob zais ntshis txog tav no ;

yog kev Thoob Tsib uas Tswv Ntuj ib txwm tshwj zias rau peb txij lub hauv paus los,

kom peb muaj hwj chim. 

8 – Yog txoj  kev Thoob Tsib uas tsis muaj ib tug vaj nyob ntiaj teb no paub li :

yog lawv paub, mas lawv tsis muab tus Huab Tais muaj hwj chim tua saum ntoo cuam. 

9 – Peb ua raws li cov lus sau tseg tias :

 “Peb tshaj tej yam qhov muag tsis tau pom dua, tej yam pob ntseg tsis tau hnov dua,

tej yam tsis tau nce los txog neeg lub siab. 

Peb tshaj txhua yam uas Tswv Ntuj npaj tseg rau cov neeg nyiam nws.”

10 – Tswv Ntuj qhia tej yam ntawd rau peb paub nyob hauv Leej Ntuj Plig :

vim Leej Ntuj Plig tsom tau tas puas tsav yam, nws tsom tau tej yam tob nyob hauv Tswv Ntuj. 

Yog Tswv Ntuj Lo Lus        Nws lus txiaj ntsim

NTAWV MOO ZOO             

MAS TAIS  5 : 17-37.

LUB NTSIAB LUS : Yes Xus xav kom peb mus taug txoj kev nyiam Tswv Ntuj, txhob mus taug txoj kev ntsia txoj cai tas zog. Tus nyiam Tswv Ntuj nws ua zoo dua tus saib txoj cai.

COV LUS NYOB HAUV MAS TAIS NTAWV MOO ZOO.

17 – Nej txhob xav tias kuv tuaj rhuav Txoj Cai thiab cov Yaj Saub :

kuv tsis tuaj rhuav, kuv tuaj qhia ntxiv kom thoob. 

18 – Vim tias qhov kuv hais rau nej muaj tseeb :

lub ntuj lub teb yuav dua, tab sis tsis muaj ib tug txwm ntawv, los ib lub cim ntawv me me hauv Txoj Cai yuav ploj. Tas ib puas tsav yam nyob hauv Txoj Cai yuav tsum tshwm sim tuaj tso. 

19 – Tus twg hla ib txog cai me, thiab nws qhia kom luag ua xws li nws, mas Ntuj yuav saib tus ntawd qis tshaj cov nyob hauv Ntuj lub Ceeb Tsheej. Hos tus ua raws Txoj Cai tas huv si, thiab nws qhia kom luag ua xws li nws, Ntuj yuav saib nws yog tus loj nyob hauv Ntuj lub Ceeb Tsheej.

20 – « Kuv hais rau nej :

yog nej tsis ua siab ncaj dua cov Kws Ntawv Ntshiab thiab cov Fas Lis Xais,

mas nej yuav mus tsis tau hauv Ntuj lub Ceeb Tsheej.

21 – « Nej hnov cov lus qhia rau tej laus thaud tias :

« Koj tsis txhob tua neeg. Tus twg tua neeg, nws yuav raug luag txiav txim rau nws. 

22 – Hos kuv, mas kuv hais rau nej :

Leej twg npau taws rau nws tus kwv, nws yuav raug txim ntawm tsev hais plaub. 

Yog nws hais rau nws tus kwv tias « Niag ruam ! » mas nws yuav raug txim ntawm lub rooj txwj laus Xas Nes Nrees.  Yog nws hais rau nws tus kwv tias :

« Niag vwm », mas nws yuav raug txim nyob hauv dab phem cov hluav taws.

23 – Thaum koj cev ib co txim rau saum lub thaj txi Ntuj, yog koj nco dheev tias koj tus kwv tau muaj lus rau koj lawm. 

24 – Mas koj cia li tso koj cov txim rau ntawm lub thaj txi Ntuj, koj mus nrog koj tus kwv hais  kom haum tso, koj mam rov los cev koj cov txim. 

25 – Thaum koj nrog tus neeg ntxub koj tseem ua ke mus kev, koj kav tsij nrog nws hais kom haum, tsam nws coj  koj mus kom rau tus txiav txim, ces tus txiav txim muab koj cob rau tub ceev xwm kom muab koj kaw hauv tsev loj faj.     

26 – Kuv hais tseeb rau koj, koj yuav tawm tsis tau hauv tsev loj faj, mus txog thaum koj rho nyiaj qab nas txog npib kawg nkaus los them.

27 – Nej hnov tej lus qhia tias :

Koj yuav tsis txhob deev luag txij luag nkawm. 

28 – Hos kuv, mas kuv hais rau nej :

Leej twg ntsia ib tug poj niam vim ntshaw zes nws, tus ntawd twb deev tus poj niam ntawd hauv nruab siab lawm. 

29 – Yog koj sab qhov muag xis coj koj mus ua txhaum, mas kav tsij muab sab qhov muag ntawd kaus pov tseg deb koj :

txhiaj khoov cia ib sab qhov muag puas zoo dua tas koj lub cev poob hauv dab phem teb. 

30 – Yog koj sab tes xis coj koj mus ua txhaum, kav tsij muab txiav pov tseg deb koj :

txhiaj khoov cia tu ib sab tes zoo dua tas koj lub cev poob hauv dab phem teb.

31 – Tseem muaj tej lus qhia tias :

Leej twg nrauj nws poj niam, yuav tsum  muab ib daim ntawv nrauj rau tus poj niam.    

32 – Tab sis, kuv hais rau nej : Tus txiv neej twg nrauj nws poj niam, tus ntawd tso nws poj niam rau luag deev. Qhov no tsis yog hais txog tus poj niam uas mus ‘nrog lwm tus txiv neej ua dev ua npua.’ 

Hos leej twg yuav ib tug poj nrauj, mas tus ntawd yog ib tug deev luag txij luag nkawm.

33 – Nej tseem hnov cov lus qhia rau tej laus thaud tias :

Koj tsis txhob twv ntuj, koj yuav ua raws li cov lus koj tau cog rau Huab Tais.    

34 – Tab sis kuv hais rau nej, nej tsis txhob twv ntuj ib zaug li.

Txhob muab lub ntuj los ua tim khawv, vim ntuj yog Tswv Ntuj lub theej kiab ;

35 – txhob muab lub ntiaj teb los ua tim khawv, vim lub ntiaj teb yog Tswv Ntuj lub rooj tiag taw ;

txhob muab Yes Lus Xas Les los ua tim khawv, vim yog tus Tuam Vaj lub Nroog. 

36 – Txhob muab koj lub taub hau los ua tim khawv, vim koj ua tsis tau kom ib txog plaub hau dawb tuaj los dub tuaj.  

37 – Nej yuav  hais li no :

Muaj, ces hais tias muaj ; tsis muaj, ces hais tias tsis muaj. Cov lus hais tshaj, yog tuaj ntawm tus Phem tuaj.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB            

HIS XAIS 58 : 7-10.

LUB NTSIAB LUS : Yog peb taug txoj kev ncaj ncees mas peb tus yeeb yam kaj tas huv si cov neeg nrog peb nyob.

COV LUS NYOB HAUV NTAWV HIS XAIS.

7 – Yog koj muab koj cov mov los faib rau tus neeg tshaib noj,

yog koj cheem cov txom nyem tsis muaj chaw nkaum kom lawv nyob hauv koj tsev,

yog koj muab ris tsho rau tus koj pom liab qab hnav,

yog koj tsis tig nraub qaum rau tus muaj lub cev nqaij zoo li koj. 

8 – Yog koj ua li ntawd, mas qhov pom kev yuav txhawv xws li hnub tuaj. 

Koj lub qhov txhab yuav nqawm sai, koj txoj kev ncaj yuav mus ua koj ntej. 

HUAB TAIS lub hwj chim yuav hwj koj. 

9 – Yog koj hu mas HUAB TAIS yuav teb, yog koj qw tias :

« Tsuag tsuag tuaj tsom kwm kuv. »

Nws yuav hais tias : « Kuv nyob ntawm no. »

Yog koj tshem rab quab ntawm koj tsev mus, yog koj tsis tsa tes hem luag, yog koj tsis hais cov lus phem. 

10 – Yog koj faib koj cov mov rau tus neeg tshaib noj, yog koj pub dej rau tus neeg nqhis haus,

mas koj qhov pom kev yuav sawv nyob hauv qhov tsaus ntuj. Koj qhov tsaus ntuj yuav pom kev nrig li lub hnub thaum tav su.

Yog Tswv Ntuj Lo Lus        Nws lus txiaj ntsim

Nkauj Paj Nruag              TUS SIAB NCAJ CI HAUV QHOV TSAUS                   

(NPN 112)

Txais: Tus neeg siab ncaj yog lub teeb ci hauv qhov tsaus ntuj rau tsoom neeg siab ncaj.

1 -Tus neeg ncaj ci hauv qhov tsaus ntuj rau cov neeg siab ncaj.

Nws khuv leej luag, nws zam rau luag, nws ua txhua yam ncaj ncees.

Tus neeg txawj hlub luag thiab qiv rau luag mas nws txoj hmoov zoo.

Nws tswj nws tej nyiaj txiag raws kev ncaj.

2 – Tus neeg ncaj yuav tsis ntog;

sawv daws yuav nco ntsoov txog nws mus li. Nws yuav tsis ntshai cov lus luag liam rau nws.

Nws lub siab ruaj khov, nws tso siab rau Huab Tais.

3 – Tus siab ncaj lub siab tawv, nws tsis txhawj. Nws siab dav, nws pub ntau rau cov pluag.

Nws txoj kev ncaj yuav nyob mus li. Nws yuav tsa taub hau txais koob meej.

ZAJ NYEEM OB              

1 KOS LIS NTHOS 2 : 1-5.

LUB NTSIAB LUS : Tus tshaj Ntuj Lus rau luag, nws yuav tsis txhob ua tus neeg ntse dhau.

Nws tsuas muab siab rau cev Yes Xus cov lus thiab cev Yes Xus lub neej.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

1 – Kwv tij sawv daws, ntawm kuv mas, thaum kuv tuaj tim nej, kuv tsis tau siv ib co lus muaj hwj chim thiab ib co lus thoob tsib los tshaj Tswv Ntuj lub txiaj ntsim rau nej. 

2 – Thaum kuv nrog nej nyob, kuv tsuas xav paub Yes Xus Pleev, paub tus Yes Xus Pleev tuag nyob saum ntoo cuam xwb. 

3 – Thaum kuv tuaj cuag nej, kuv yog  tus tsis muaj zog, yog tus neeg txhawj tshee na. 

4 – Kuv tej lus, thiab lub Moo Zoo kuv xa tuaj, tsis zoo li kev Thoob Tsib cov lus txawj ntxias neeg. 

Kuv tej lus yog ib zag txuj tawm hauv Leej Tswv Yim thiab hauv lub Hwj Huam los, 

5 -kom nej txoj kev ntseeg txawb rau saum Tswv Ntuj lub hwj huam, tsis txhob txawb rau saum neeg kev thoob tsib. 

Yog Tswv Ntuj Lo Lus        Nws lus txiaj ntsim

NTAWV MOO ZOO         

MAS TAIS 5 : 13-16.

LUB NTSIAB LUS : Peb yog cov ntsev yuav ua kom zeej tsoom qab siab  nyob ntiaj teb no.

Peb yog qhov pom kev yuav kaj sawv daws.

COV LUS NYOB HAUV MAS TAIS NTAWV MOO ZOO.

13 – « Nej yog cov ntsev las lub ntiaj teb. Tab sis yog ntsev tsuag lawm, yuav muab dab tsi ua kom ntsev rov qab daw tuaj ? 

Ntsev tsuag tsis zoo ua dab tsi, tsuas kawg muab pov tseg nraum zoov rau neeg tsuj xwb.

14 – « Nej yog lub teeb ci rau lub ntiaj teb. Ib lub nroog txhim rau saum ib lub ncov roob, yuav muab zais tsis tau. 

15 – Hos, luag kuj tsis taws teeb coj mus zais rau hauv qab txee, luag muab txawb saum tus ncej  teeb,

lub teeb ci rau tas cov neeg nyob hauv tsev pom kev. 

16 – Li ntawd, nej lub teeb yuav tsum ci nyob ntawm zeej tsoom xub ntiag,

kom lawv pom nej cov dej num zoo, ces lawv yuav cav txog nej Txiv nyob saum ntuj.

Huab Tais Pleev      Lub qab ntuj neeg cav txog koj