Author Archive by Aumônerie catholique Hmong de France

Nruab xyoo HNUB CHIV 27 XYOO B

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

HAUV PAUS 2 : 18-24

LUB NTSIAB LUS : Tswv Ntuj tsim txiv neej thiab poj niam sib phim. Vim Tswv Ntuj
xav kom txiv neej thiab poj niam ua tej nkawm sib nyiam sib hlub tas ib sid.
COV LUS NYOB HAUV NTAWV HAUV PAUS :

18 – HUAB TAIS Tswv Ntuj hais tias : «

Cia txiv neej nyob ib leeg mas tsis zoo. Kuv yuav ua ib tug pab nws kom phim nws. »

19 – HUAB TAIS Tswv Ntuj thiaj muab av los puab tas puas tsav yam tsiaj qus thiab tas puas tsav yam noog ya saum ntuj. Nws coj los rau tus txiv neej xyuas saib nws yuav tis npe li cas rau.

Txhua yam tsiaj yuav muaj lub npe raws li tus txiv neej tis rau.

20 – Tus txiv neej tis npe rau tas txhua _hom _tsiaj _nyeg, tau _cov noog ya saum ntuj,

thiab rau tas txhua hom tsiaj qus, tiam sis nws nrhiav tsis tau ib tug pab nws thiab phim nws.

21 – HUAB TAIS Tswv Ntuj tso ib tug dab ntub hlob laum tus txiv neej, ces nws tsaug zog lawm.

Tswv Ntuj rho nws ib tug tav tawm los, nws rov kaw lub qhov zoo li qub.

22 – HUAB TAIS Tswv Ntuj muab tus tav uas nws rho ntawm tus txiv neej los puab ua ib tug poj niam.

Tswv Ntuj coj los rau tus txiv neej saib.

23 – Tus txiv neej nqua suab hlo tias :

« Zaum no, tus no yog tseem txha ntawm kuv txha thiab tseem nqaij ntawm kuv nqaij tiag !

Tus no yuav hu ua _’poj niam,’ vim tus no tawm ntawm txiv neej los ! »

24 – Vim li no txiv neej thiaj tso niam tso txiv tseg, mus npuab nws tus poj niam, ces nkawd ua ib lub cev nqaij xwb.

Yog Tswv Ntuj Lo Lus Nws lus txiaj ntsim

Nkauj Paj Nruag THOV TSWV NTUJ FOOM HMOOV ZOO

(NPN 128-2)

Txais: Thov kom Tswv Ntuj foom hmoov zoo rau peb tas peb sim neej.

1 – Cov neeg hwm Huab Tais thiab taug nws txoj kev, lawv txoj hmoov zoo.

Koj tau noj cov txhiam xws koj ob txhais tes khwv. Koj txoj hmoov zoo, koj tau lub neej kaj siab lug.

2 – Koj poj niam zoo li tsob txiv cawv txi nyob hauv koj tsev. Koj cov tub ki zoo li cov ntsuag txiv ntoo roj nyob ncig koj lub phaj tsum.

3 – Huab Tais foom hmoov zoo rau tus hwm nws. Thov kom Huab Tais nyob saum Xis Yoos foom hmoov zoo rau koj. Niaj hnub tas koj sim neej, koj yuav pom Yes Lus Xas Les vam meej.

4 – Koj yuav pom koj cov tub tej xeeb leej xeeb ntxwv. Thov kom kev thaj yeeb nyob hauv His Xas Lais!

ZAJ NYEEM OB

HES NPLAWS 2 : 9-11

LUB NTSIAB LUS : Vim Yes Xus yog tus yuav pab tas zeej tsoom mas Tswv Ntuj
thiaj kheev kom Yes Xus raug txom nyem, ces Yes Xus yog tus ntshiab thiab nws ua
kom neeg ntshiab tuaj.

TSAB NTAWV HES NPLAWS HAIS TIAS :

9 – Yes Xus tau txo nws qis dua cov Tshiab ib me ntu, ces peb pom nws tau lub hwj chim thiab lub koob meej roos nws, vim nws tau txais txoj kev tuag. Nws yuav tsum saj txoj kev tuag, nws thiaj pab tau txhua tus neeg. Tswv Ntuj lub txiaj ntsim mus li ntawd.

10 – Vim tias, tus tsim tas puas tsav yam los kom puas tsav yam ntawd tsob hwb nws,

mas nws xav coj neeg tej tub ki coob coob mus txais koob meej thiab txais kev cawm.

Phim nws yuav cia tus Ntaus Thawj raug txom nyem kom nws ntshiab tuaj.

11 – Vim tus ua tau kom luag ntshiab, thiab cov txais kev ntshiab, lawv puav leej tawm ntawm ib lub hauv paus los. Vim li ntawd, tus ua tau kom luag ntshiab, thiaj tsis txaj muag hu cov txais kev ntshiab ua nws cov kwv.

Yog Tswv Ntuj Lo Lus Nws lus txiaj ntsim

NTAWV MOO ZOO

MAS KOS 10 : 2-16

LUB NTSIAB LUS : Yes Xus tshaj tias Tswv Ntuj tsis kheev kom ob niam txiv sib
nrauj.

COV LUS NYOB HAUV MAS KOS NTAWV MOO ZOO :

2 – Ib cov Fas Lis Xais xav sim Yes Xus, ces lawv txav los nug nws tias :

« Ib tug txiv neej yuav nrauj nws poj niam puas tau ? »

3 – Yes Xus teb rau lawv tias :

« Mais Xes qhia dab tsi rau nej ? »

4 – Lawv teb tias : « Mais Xes kom ua ntawv nrauj tso thiaj nrauj tau. »

5 – Yes Xus teb rau lawv tias :

« Yog vim nej lub siab txhav dhau, Mais Xes thiaj sau txoj cai ntawd.

6 – Tab sis, thaum chiv lub keeb tsim neeg, Tswv Ntuj tsim nkawd ua txiv neej, thiab poj niam.

7 – Vim li ntawd, _txiv neej yuav tso nws niam nws txiv tseg,

8 – nkawd ob leeg yuav ua ib lub cev nqaij xwb. Ua li mas nkawd tsis yog ob leeg lawm, nkawd yog ib lub cev nqaij xwb.

9 – Yog vim qhov no, mas yam uas Tswv Ntuj muab sau los ua ke, neeg yuav tsis txhob muab cais.

10 – Thaum lawv rov los txog tsev, cov thwj tim rov nug Yes Xus txog qhov ntawd.

11 – Ces Yes Xus hais rau lawv _tias :

« Tus txiv neej twg nrauj nws poj niam, ho rov yuav dua lwm tus, mas nws yog ib tug muaj txij nkawm mus deev luag, nws ua txhaum rau thawj tug.

12 – Hos tus poj niam twg nrauj nws tus txiv, rov yuav dua lwm tus, mas nws yog ib tug muaj txiv mus deev hluas.”

13 – Luag coj ib co me nyuam _tuaj rau Yes Xus kom Yes Xus kov lawv, tab sis cov thwj tim cem lawv hnyav.

14 – Yes Xus pom li ntawd, nws npau taws, nws hais rau lawv tias :

« Nej cia cov me nyuam tuaj cuag kuv, nej txhob txwv lawv.

Yog cov neeg uas zoo li cov me nyuam no thiaj yuav tau Tswv Ntuj lub Ceeb Tsheej los ua lawv tug.

15 – Kuv hais tseeb rau nej :

leej twg tsis txais Tswv Ntuj lub Ceeb Tsheej zoo li ib tug me nyuam, mas nws yuav mus tsis tau hauv Tswv Ntuj lub Ceeb Tsheej.

16 – Ces Yes Xus puag cov me nyuam, nws tsa tes rau saum lawv, nws foom hmoov zoo rau lawv.

Huab Tais Pleev Lub qab ntuj neeg cav txog koj

Nruab xyoo HNUB CHIV 26 XYOO B

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

XAM PHAJ _11 : 24-29

LUB NTSIAB LUS : Leej Tswv Yim Ntshiab xav tuaj tshoj leej twg mas nws tshoj leej twg. Tab yog tej tus tsis ua thawj nyob hauv lub Koom Txoos, los Leej Tswv Yim Ntshiab kuj tuaj tshoj lawv.

COV LUS NYOB HAUV NTAWV XAM PHAJ :

24 – Mais Xes tawm mus hais HUAB TAIS cov lus qhia rau tsoom pej xeem.

Nws hu xya caum leej txwj laus tuaj sib sau nyob ntawm lub Tsev Tsam Phooj,

25 – HUAB TAIS nqes los nyob saum twv huab. Mais Xes nrog nws tham, ces _Tswv Ntuj tso nws lub Tswv Yim nqes los tsaws saum xya caum leej txwj laus ntawd. Thaum Tswv Ntuj lub Tswv Yim _nyob saum lawv,

mas lawv ua yaj saub thaum ntawd, tiam sis lawv tsis rov qab ua ntxiv lawm.

26 – Muaj ob tug txiv neej nyob hauv yeej, ib tug hu ua Es Das, ib tug hu ua Mes Das,

Tswv Ntuj lub Tswv Yim los nyob saum nkawd thiab, txawm tias nkawd tsis tuaj nyob ntawm lub Tsev Tsam Phooj, thiab nkawd tsis nrog lawv muaj npe. Tsis kav nkawd pib ua yaj saub nyob hauv lub yeej.

27 – Ib tug tub hluas khiav tuaj hais qhia Mais Xes tias :

« Es Das thiab Mes Das nkawd ua yaj saub nyob hauv yeej lawm. »

28 – Yos Xuas uas yog Nuv tus tub, _nws ib txwm pab Mais Xes txij thaum yau los,

nws teb ntua hais tias :

« Leej Hlob Mais Xes, koj tsis txhob pub nkawd ua li ntawd ! »

29 – Mais Xes teb tias : _“Koj puas sawv kuv chaw khib ?

Ntawm kuv, mas kuv xav kom tas HUAB TAIS haiv neeg txawj ua yaj saub,

kom HUAB TAIS pub _nws lub Tswv Yim rau lawv ! »

Yog Tswv Ntuj Lo Lus Nws lus txiaj ntsim

Nkauj Paj Nruag HUAB TAIS COV LUS QHUAB QHIA

(NPN 19-1) (zaj 87)

Txais: Huab Tais cov lus qhuab qhia yog lus ncaj, ua kom neeg lub siab kaj.

1 – Huab Tais txoj cai zoo tas nrho, nws ntxiv zog rau tus ntsuj plig. Huab Tais tus txhooj nyob ruaj nreb,

nws ua kom tus neeg tswv yim tsawg thoob tsib tuaj.

2 – Huab Tais cov lus qhuab qhia yog lus ncaj ua kom neeg lub siab kaj. Huab Tais lo lus qhia ntshiab si ua kom neeg pom kev.

3 – Kev hwm Huab Tais yog kev dawb huv. Kev hwm Huab Tais yuav nyob mus li.

Huab Tais txoj cai yog lus tseeb, yog cov lus txiav txim ncaj.

4 – Huab Tais txoj cai muaj nqis dua cov tseem kub thiab qab dua zib ntab zib mu.

ZAJ NYEEM OB

YAS KOS _5 : 1 – 6

LUB NTSIAB LUS : Cov neeg muaj yuav tsum ceev faj. Vim ntau zaus, tos lawv muaj yog vim tau noj cov pluag lub zog.

COV LUS UAS YAS KOS SAU TUAJ RAU TSOOM NTSEEG :

1 – Nyem no, hais rau nej cov nplua nuj. Nej yuav quaj ntsuag qees,

nej yuav seev kev tu siab. Vim xwv txheej tuaj raug nej.

2 – Nej tej cuab yeej cuab tam lwj tas, kas noj nej tej tsoos tsho.

3 – Nej tej nyiaj tej kub xeb tas : cov nyiaj cov kub xeb ntawd yuav ua tim khawv txiav txim rau nej,

thiab yuav tom nej tej nqaij. Nej ceev nyiaj zoo li ceev ib co hluav taws uas hnub kawg yuav hlawv nej.

4 – Cov tub zog uas sau nej tej qoob, nej tsis pub nqe zog rau lawv. Cov nqe zog ntawd qw,

thiab cov tub zog lub suab quaj nce mus txog tus Huab Tais kav cuaj txheej ntuj.

5 – Nyob ntiaj teb no, nej tau noj qab nyob zoo, nej tau kev ua si ntau kawg,

lub caij tua tsiaj nej tau noj tsau npo.

6 – Nej tau muab txim, nej tau muab tus siab ncaj tua pov tseg, vim nws tsis tiv nej.

Yog Tswv Ntuj Lo Lus Nws lus txiaj ntsim

NTAWV MOO ZOO

MAS KOS _9 : 38-43, 45-46

COV LUS NYOB HAUV MAS KOS NTAWV MOO ZOO :

38 – Zam hais rau Yes Xus tias :

« Xib Hwb, peb pom ib tug neeg hu txog koj lub npe los ntiab dab,

tab sis nws tsis yog ib tug nrog peb. Peb xav txwv nws, vim nws tsis nrog peb.

39 – Tab sis Yes Xus hais tias :

“Nej txhob txwv nws, vim tsis muaj ib tug neeg hu txog kuv lub npe los ua hwj huam yees ntxwv tas,

ho yuav hais lus phem txog kuv tam sis ntawd.

40 – Leej twg tsis tiv peb, mas nws tuaj peb tog.”

41 – « Leej twg muab ib khob dej rau nej haus, vim nej yog Leej Pleev tug,

mas kuv hais tseeb rau nej, tus ntawd yuav txais koob haum.”

42 – Yog leej twg coj ib tug neeg ntseeg me me no, kom ua txhaum, mas txhiaj khoov cia luag muab lub zeb uas luj zom mus dai ntawm nws caj dab, thiab muab nws pov rau hauv dej ntuj.

43 – Yog koj txhais tes coj koj mus ua txhaum, _muab txiav pov tseg :

txhiaj khoov koj tu ib sab tes mus hauv Txoj Sia, zoo dua koj muaj ob sab tes mus hauv dab phem teb,

Uas hluav taws tsis txawj tuag. [44].

45 – Yog koj txhais taw coj koj mus ua txhaum, muab txiav pov tseg :

Txhiaj khoov koj tu taw mus hauv Txoj Sia, zoo dua muaj ob txhais taw, Tab sis koj poob hauv dab phem teb [46].

Huab Tais Pleev Lub qab ntuj neeg cav txog koj

Tshaj moo qaij qaug nyob Caen

Par Aumônerie catholique Hmong de France

VAJ Txooj Hwm

Tshaj tawm rau peb ib tsoom ntseeg sawv daws paub tias VAJ Txooj Hwm nyob lus zos Caen tau tas sim neeg hnub tim 17/09/2024 Nws muaj li 86 xyoo.

Tsev xyom cuab yuav npaj nws lub pag lub xau rau lub week-end 28/09/2024 rau 29/09/2024 tuaj no:

Salle des fêtes d’Epaignes

120 La Ferme du Trèfle

27260 Epaignes

Samedi 28 Septembre 2024

15H00 : Pib kab ke xa plig pem lub chambre funéraire nyob Saint-Désir

5410 Route du Pré d’Auge

14100 Saint-Désir

Lundi 30 Septembre 2024

10H00 : Teev ntuj hauv tsev teev ntuj Saint-François-Xavier nyob Lisieux

162 boulevard de Lattre de Tassigny

14100 Lisieux

Peb ib tsoom ntseeg pab thov ntuj rau tsev xyom cuab thiab rau VAJ Txooj Hwm tus ntsuj plig.

Nruab xyoo HNUB CHIV 25 XYOO B

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

THOOB TSIB 2 : 17-20

LUB NTSIAB LUS : Thaum cov neeg siab ncaj ntuas luag tej mas ntau zaus luag tej muab cov neeg siab ncaj tua.

COV LUS NYOB HAUV NTAWV THOOB TSIB :

17 – Peb sim saib qhov nws hais saib puas muaj tseeb. Peb sim ntsia saib nws yuav tuag zoo li cas.

18 – Yog tus siab ncaj yog Tswv Ntuj tus tub tiag, mas Tswv Ntuj yuav pab nws,

thiab yuav npo nws ntawm cov ntxub nws txhais tes.

19 – Peb yuav sim nws, peb ua tub qaug nws, peb hiam nws saib.

Kom peb paub nws lub siab zoo npaum li cas, thiab saib nws puas ua siab ntev nyiaj kom dhau.

20 – Peb kav tsij txiav txim kom nws tuag raws ib txog kev poob koob meej, vim nws twb hais tias yuav muaj tus tuaj npo nws.

Yog Tswv Ntuj Lo Lus Nws lus txiaj ntsim

Nkauj Paj Nruag TSWV NTUJ TXHEEM KUV

(NPN 54) (zaj 129)

Txais: Huab Tais tuaj kuv tog, nws txheem kuv.

1 – Tswv Ntuj, koj lub npe cawm kuv; tso koj lub hwj huam los txheem kuv.

Tswv Ntuj, thov koj mloog kuv zaj thov. Koj tig ntsej los mloog cov lus tawm hauv kuv lub ncauj los!

2 – Cov neeg muab hlob sawv los tawm tsam rhuav kuv, cov ntxub kuv xav txo kuv txoj sia.

Lawv tsis saib tias muaj Tswv Ntuj li.

3 – Nej ntsia saib! Tswv Ntuj tuaj pab kuv lawm. Huab Tais txheem kuv, nws tsa kuv cai.

Kuv zoo siab cev ib co txim los txi rau koj.

Huab Tais, kuv cav lus zoo txog koj lub npe vim koj lub npe zoo tas nrho.

ZAJ NYEEM OB

YAS KOS _3 : 16-18, 4 : 1-3

LUB NTSIAB LUS : Leej twg ua kom muaj rog ? Yog peb sawv daws. Vim peb sib cav sib ceg nyob hauv peb tej tsev, yog kev ua rog cov cag.

COV LUS YAS KOS SAU TUAJ RAU TSOOM NTSEEG :

16 – Vim tias, qhov chaw uas neeg sib khib thiab sib ceg, mas muaj ntau yam kev ntxhov,

thiab ntau yam hauj lwm phem.

17 – Hos txoj kev thoob tsib nqes saum ntuj los, mas yog kev thoob tsib huv,

yog kev thoob tsib tseb kev thaj yeeb, kev thoob tsib tiaj tus, nws nrhiav kev sib zam, nws khuv leej, nws txi ntau yam txiv zoo, nws tsis tsa leej twg cai, tsis ua txuj yog neeg zoo.

18 – Cov neeg tsim kev thaj yeeb txi ib lub txiv phim kev ncaj nyob hauv kev thaj yeeb.

1 – Tej kev sib ntaus rog, thiab tej lus sib ceg hnyav hauv nej pab neeg, txhawv qhov twg los ?

Puas yog los ntawm tej kev ntshaw hauv nej pab neeg ?

2 – Nej ntshaw, tab sis nej tsis muaj. _Nej ntshaw, ces nej khib, vim nej tsis tau raws li lub siab ntshaw, nej thiaj sib ceg, thiab sis ntaus rog. Nej tsis muaj vim nej tsis thov.

3 – Nej thov, tab sis nej tsis tau txais, vim nej tsis ua tib zoo thov, nej tsuas xav tau nyiaj txiag siv rau nej lub cev _kom tau zoo.

Yog Tswv Ntuj Lo Lus Nws lus txiaj ntsim

NTAWV MOO ZOO

MAS KOS 9 : 30-37

LUB NTSIAB LUS : Tus xav ua tus thawj nyob pem Tswv Ntuj lub Ceeb Tsheej nws yuav tuaj yeem tuag. Yuav nyiam ua tus tub txib, nyiam ua tus me.

COV LUS NYOB HAUV MAS KOS NTAWV MOO ZOO :

30 – Yes Xus lawv tawm qhov chaw ntawd mus, lawv hla xeev Nkas Lis Lais,

Yes Xus tsis xav kom muaj neeg paub.

31 – Vim Yes Xus qhia nws cov thwj tim tias :

« Luag yuav muab Neeg Leej Tub muag rau hauv tsoom neeg txhais tes.

Luag yuav muab nws tua. Thaum luag muab nws tua tuag lawd,

peb hnub tom qab, nws yuav sawv rov los. »

32 – Cov thwj tim tsis to taub lo lus ntawd, tab sis lawv ntshai nug Yes Xus.

33 – Lawv mus Kas Fas Naus. Thaum lawv mus txog tsev, Yes Xus nug lawv tias :

« Nej sib cav txog dab tsi nyob tom kev ? »

34 – Lawv nyob ntsiag to, vim nyob tom kev, lawv sib cav tias leej twg yog tus loj dua cov.

35 – Yes Xus zaum, nws hu Pab Kaum Ob los, nws hais rau lawv tias :

« Leej twg xav ua tus thawj, mas nws yuav ua tus tuaj tom sawv daws qab,

thiab yuav ua sawv daws tus tub txib. »

36 – Ces Yes Xus coj ib tug me nyuam los sawv hauv nruab nrab lawv, nws puag tus me nyuam, ces nws hais rau lawv tias :

37 – « Leej twg txais ib tug me nyuam yaus zoo li tus no, vim kuv lub npe, yog nws txais kuv.

Thiab leej twg txais kuv, mas tsis yog nws txais kuv, yog txais Tus xa kuv tuaj.

Huab Tais Pleev Lub qab ntuj neeg cav txog koj

Niam Mab Liab tshwm nyob Medjugorje, Bosnie-Herzégovine teb

Par Aumônerie catholique Hmong de France

Rau Leej Tub Ntxhais uas Pom Niam Mab Liab nyob Medjugorje

Duab yees : hnub 27/06/2024 hmo 23/06/2024

MUS TEEV NTUJ TIM MEDJUGORJE.

Txij qhov nov mus yog kuv yuav los piav qhov peb 4 leeg hmoob tau mus teev Ntuj nyob qhov chaw Niam Mab Liab tau tshwm sim nyob Medjugorje, Bosnie uas yog puag ncig 43 xyoos. Peb mus hnub tim 22-28/06/2024.

Niaj hnub no lub Koom Txoos Catholique tseem tsis tau lees qhov Niam Mab Liab tshwm nyob Medjugorje, Bosnie teb tab sis neeg mus teev Ntuj coob coob tsis tu ncua txij thaum Niam Mab Liab tshwm thawj zaug los mus txog niaj hnub no. Ces txij li hnub Chiv, tim 12 lub 5 hlis 2019, tsev Xov Xwm Vatican tau tso cai rau sawv daws mus teev Ntuj. Txij thaum ntawd los lawv thiaj li pib txhim vaj tsev zoo raws txoj cai Européene los txais qhua. Thaum lub sij hawm uas Niam Mab tshwm ntawd mas Bosnie tseem nyob txoj kev tswj hwm Koom Tshas ( yog ib lub teb chaws ntawm peb lub teb chaws uas ua Ex-Yougoslavie), tom qab nov kuj hloov los coj kev tswj hwm ywj pheej lawm. Tab sis tseem tsis tau los koom ua Union Européenne. Li ntawd Vatican thiaj li kom lawv yuav tsum txhim tej vaj tsev, kev noj haus kom raws li Europe txoj cai los tos tsoom neeg mus teev Ntuj.

Mim twb tau txhais Soeur Emmannuelle cov lus hais txog lub hauv paus, hauv ntsis tag los saud lawm, kuv yuav tsis tham txog keeb kwm ntxiv. Kuv tsuas los tham txog peb kev mus teev Ntuj zaum no xwb.

Kuv twb xav mus teev Ntuj tim Medjugorje ntev los lawm, tab sis npaj tsis tau caij mus li. Xyoo no kuv thiaj li txiav txim siab mus thawj zaug no tab sis thaum kawg, peb muaj 4 leeg hmoob mus ua ke. Yog ib lub txiaj ntsim zoo kawg uas peb tseem mus rau lub caij uas puag ncig 43 xyoos Niam Mab Liab tshwm thiab mas peb kuj zoo siab kawg thiab.

Niam Mab Liab Medjugorje yog Niam Mab Liab Kev Thaj Yeeb. Nws kom peb teev Ntuj kom muaj txoj kev thaj yeeb :

Kev thaj yeeb txhua qhov, hauv lub teb chaws, hauv cov haiv neeg, hauv cov tsev neeg, hauv kev tshaj Ntuj Lus, mus ua Phauj ua Txiv Plig, hauv siab ntsws thiab cev nqaij daim tawv tib si.

Li ntawd thiaj li muaj neeg mus teev Ntuj coob coob vim mus teev Ntuj nyob tid mas coob leej tau kev thaj yeeb raws li qhov nws thov.

Nyob Medjugorje yog ib qho chaws daws txhaum. Vim cov neeg xav muab lawv cov txhaum daws kom tag rau tid thiab nqa kev thaj yeeb rov qab los vaj los tsev. Li ntawd sawv daws thiaj li mus daws txhaum coob, ib txhia mas ib lub lis piam ntawd xwb tseem daws txhaum ob zaug los peb zaug. Vim thaum mloog qhia kev cai, cov lus ntuas tej ces ua rau nws rov nco txog tej qhov txhaum uas nws tsis nco daws. Thaum muaj neeg daws txhaum coob ces lawv thiaj li ua txog 60-70 qhov chaw daws rau tid. Daws txhaum nruab hnub hmo ntuj tib si, ntuj teb tag hmo li 1-2 teev ib tag hmo dua los tseem muaj neeg tos daws txhaum thiab. Nyob Medjugorje mas teev Ntuj nruab hnub hmo ntuj tib si yog yus xav teev. Lawv kuj npaj ntau yam rau yus pab ua thiab ho mus koom nrog sawv daws tib si. Dua li tseem muaj hais tias nyias ho mus nyias ywj siab thiab.

Cov chaw tseem ceeb :

Nyob Medjugorje muaj ob peb qho chaw tseem ceeb xws li :

Lub tsev teev Ntuj Saint Jacques.
Leej Pleev Sawv rov los ( Le Christ Ressucité).
Txiv Plig Jozo Zovko lub ntxa.
Tus Ntoo Cuam Xiav ( La Croix Bleu).
Lub roob Niam Mab Liab tawm ( La coline des apparitions, Podprdo).
Lub roob Ntoo Cuam Dawb ( Krizevac ).

Tseem tshuav ntau lub Abbayes thiab ntau lub Monastères tseem ceeb nyob ib ncig ntawd thiab.

Lub tsev teev Ntuj Saint Jacques : Nyob Bosnie mas raug cov Ottomans tuaj tsuj teb txij thaum 1386 ces lawv tau muab cov tseev teev Ntuj rhuav tag vim lawv yuam tsoom pej xeem los ntseeg Islam tag lawm. Li ntawd thiaj li tsis muaj tsev teev Ntuj qub li lwm qhov chaw hauv Europe nov. Thawj lub tsev teev Ntuj uas rov tau kev tso cai txhim yog cov Txiv Plig Franciscains txhim xyoo 1897. Thaum ntawd mas lawv yuam kom cov Txiv Plig muab tag nrho lawv cov nyiaj txiag los ua lub tsev teev Ntuj, thiaj li ua taub lub tsev teev Ntuj loj dhau rau lub zos ntawd. Vim thaum lub sij hawm ntawd Medjugorje tsuas muaj 1.000 tus pej xeem xwb tab sis tseem ho yog ntseeg Islam coob xwb. Tab sis zaum no mas lub tsev teev Ntuj ho me dhau ces thiaj li ua ib lub tsev teev Ntuj kheej txuas rau nraum qaum tsev, ua tsev vov rau lub Thaj Txiv Ntuj nkaus xwb, dua li ces yog nraum tshav puam xwb. Ntim taus 10.000 leej, tab sis kuj muaj ib lub tiaj nyom dav dav txuas ntxiv kom neeg nyob tau tshaj 50.000 leej.

Leej Pleev Sawv rov los ( Le Christ Ressucité) :

Tus mlom Leej Pleev Sawv rov los yog ib tug mlom en bronze ( tooj daj xyaw kub), uas yog Andrej Ajdic nchuav thaum Hmoov Hla 1998. Tus mlom Leej Pleev Sawv rov los nov muaj hwj huam yees ntxwv ntau. Muaj ib cov dej tawm ntawm nws sab hauv caug xis ib sab li tej lub kua muag ntws los. Kuj muaj cov neeg so los pleev tus mob ces cia li ua rau lawv zoo kiag lawm. Cov dej nov tawm zoo nkaus li tej lub kua muag. Lawv muab tshuaj xyuas, cov dej nov tsis zoo li cov dej txawv hauv av. Neeg ua ko tw tos so cov dej nov nruab hnub hmo ntuj tib si.

Txiv Plig Jozo Zovko lub ntxa :

Txiv Plig Jozo Zovko yog thawj tus Txiv Plig uas pom hais tias cov me nyuam hais tiag, lawv tsis dag. Nws yog thawj tug Txiv Plig uas saib xyuas tsom kwm cov me nyuam uas pom Niam Mab Liab. Vim nws tsom kwm cov me nyuam ces cov tub ceev xwm koom tshas thiaj li hiam thiab ntes nws mus rau txim tuag no tab sis Tswv Ntuj kuj tsis cia nws tuag. Lawv coj nws mus tsim thiab ua qhev nyhav heev tau peb lub xyoo ces nws kuj dim rov qa los. Txiv Plig Jozo Zovko lub ntxa kuj yog ib qho chaw mus teev Ntuj thiab tau txiaj ntsim thiab.

Tus Ntoo Cuam Xiav ( La Croix Bleue) :

Keeb kwm tus Ntoo Cuam xiav : Thaum Niam Mab Liab nyuam qhuav tshwm mas cov tub ceev xwm koom tshas ntev cov neeg uas mus teev Ntuj heev, ces cov me nyuam thiaj li pheej nce roob mus teev Ntuj kom lawv txhob pom. Ib hnub lawv nce mus ces Niam Mab Liab kom lawv txhob mus ntxiv lawm, kom los teev Ntuj rau ntawm taw roob nov xwb los lawv yuav tsis pom. Ces cov me nyuam thiaj li los nraim ntawm cov hav fab nov teev Ntuj. Ces Niam Mab Liab kuj tshwm rau lawv qhov chaw nov thiab. Lawv thiaj li tsa ib tug Ntoo Cuam cim qhov chaw. Tus me nyuam tub Ibvan thiaj li muab nws cov kob xiav los pleev tus ntoo cuam ces thiaj sia npe ua Ntoo Cuam xiav lawm. Neeg tuaj teev Ntuj coob heev rau qhov chaw nov vim thov tau txiaj ntsim thiab qhov chaw tus Ntoo Cuam xiav nov yog qhov chaw uas yus tuaj daws yus lub nras rau Niam Mab Liab.

Lub roob Niam Mab Liab tshwm ( La coline des apparitions, Podprdo) : Lub roob Podprdo yog lub roob uas Niam Mab Liab xub tshwm rau cov me yuam pom. Muaj neeg mus nce teev Ntuj coob heev tsis hais nruab hnub los hmo ntuj. Yog ib lub roob pob zeb xwb kuj muaj cov neeg mus ko taw pliab thiab cov muaj mob, tes taw tsis zoo los kuj yeej nce mus tib si. Muaj Ntoo Cuam Txoj Kev raws mus rau saum ib nta roob uas Niam Mab Liab tawm thiab. Nce lub roob nov teev Ntuj kuj tau txiaj sim heev thiab. Li ntawv txawm yog cov muaj mob, tsis zoo tes zoo taw los puav leej mus nce tib si.

Lub roob Ntoo Cuam Dawb ( Krizevac ) :

Xyoo 1933, txog rau 1900 xyoo uas Yes Xus Pleev raug ntsia saum ntoo cuam, zej zog tau txiav txim siab tsa ib tug ntoo cuam pob zeb, siab 8,50 m rau lub ncov roob Križevac, uas yog lub roob siab tshaj ib ncig ntawm Medjugorje. Thaum Vaj Qhia hnov, nws thiaj li muab Huab Tais Yes Xus tus ntoo cuam ib qho tuaj zwm rau hauv tus ntoo cuam Dawb nov lub plawv. Kuj yog ib qho chaw teev Ntuj nce rau saum roob thiab.

Tej yam yuav tsum paub ua ntej yog mus teev Ntuj tod:

Teeb nyem yog tsis muaj xov tooj, vim taug kev pem roob hmo ntuj.
Yuav ib lub radio FM me me noj roj los yog muaj batrie, nrog txoj hlua mloog vim ntau haiv neeg tuaj teev Ntuj ua ke ces lawv txhais raws Radio FM xwb. Yog xov tooj tsis muaj réseau, vim Bosnie tsis tau yog Union Européenne. Tod muaj muag tab sis yog cov nqe pheej yig ces tsis zoo thiab tsis nrov zoo.
Nqa khau kom khov thiab ruaj vim nce roob pob zeb ntse ntse xwb. Yeej muaj chaw muag tab sis yog yus khau ntuag ces yus yuav ncua ib qho tsis tau mus lawm.
Nyob hauv cov qab ntaiv hauv hôtel, qhov ntau yeej muaj cov pas nrig nce roob thiab ib cov planches de natation los yog cov dépliants en mousse tau coj mus zaum thiab tiag hauv caug pem roob, vim yog pob zeb xwb mas tsis tshua zoo txhos caug thiab neeg coob coob ces yus nyob tau qhov twg, yus zaum qhov ntawd xwb. Yog tsis muaj mus yuav los kuj tsis kim thiab.
Nqa tsho tiv nag mas yuav zoo dua, vim tod mas tej thaum los nag ces cua hlob heev, yuav tsis tshua zoo kwv kaus.
Nqa saw Mab Liab.
Npaj me ntsis txom ncauj taug kev, vim txog tawm ntawm tshav dav hlau Split kuj tseem tshuav kev deb tsawv taug tsam tshaib plab.

Tus sau : Maiv Tooj Lis.

Niam Mab Liab tshwm nyob Medjugorje, Bosnie-Herzégovine teb

Par Aumônerie catholique Hmong de France

Tus txhais : Mim Yaj, USA

Lawv Peb tug uas niaj hnub tsis pom Niam Mab Liab Lawm yog:
Jakov Colo yog ib tug tub, nws yog tus hluas dua lawv cov tas nrho. Nws nyuam qhuav muaj 10 xyoo xwb thaum nws pib pom Niam Mab Liab tim 25 lub 6 hli 1981.Txoj hauj lwm Niam Mab Liab muab rau nws yog kom nws thov ntuj pab cov neeg muaj mob.
Nws niaj hnub tau pom Niam Mab Liab txij tim 25 lub 6 hlis 1981 los txog hnub tim 12 lub 9 hlis 1998. Hnub ntawd Niam Mab Liab tau qhia qhov kaum uas qhia tsis tau rau nws, ces txij hnub ntawd los nws tsuas pom Niam Mab Liab ib xyoos ib zaug rau hnub hmoov Yes Xus Yug los xwb, uas yog tim 25 lub 12 hlis xwb. Nws yuav poj niam lawm thiab muaj 3 tug me nyuam. Nws nyob hauv Medjugorje.

Ivanka Ivankovic-Elez yog thawj thawj tug uas pom Niam Mab Liab hnub tim 25 lub 6 hli 1981, thaum ntawd nws tab tom muaj 15 xyoos xwb, nws yog tus hluas thib ob hauv lawv 6 leej. Nyob hauv lawv 4 leeg ntxhais uas pom Niam Mab Liab, nws yog tus hluas dua cov. Thaum ntawd nws niam nyuam tuag tuag thaum lub 5 hlis 1981 xwb, Ivanka thiaj nug Niam Mab Liab txog nws niam. Niam Mab Liab qhia nws tias nws niam nyob saum ntuj lawm. Txij thaum ntawd los txog tav no, Tswv Ntuj kuj pub kom Ivanka tau pom thiab tau nrog nws niam tham li 5 zaug thiab.
Nws niaj hnub pom Niam Mab Liab mus txog tim 7 lub 5 hlis 1985. Hnub ntawd Niam Mab Liab qhia qhov kaum uas qhia tsis tau rau nws, ces Niam Mab Liab hais rau nws tias txij no mus nws yuav niaj xyoo pom Niam Mab Liab ib xyoos ib zaug hnub tim 25 lub 6 hli lawm xwb. Niam Mab Liab muab txoj hauj lwm rau nws kom nws thov ntuj pab rau cov yim neeg (families/familles). Nws yuav txiv lawm thiab muaj 3 tug me nyuam. Nws nyob lub zos Medjugorje.

Mirjana Dragicevic-Soldo yog tus laus thib ob nyob hauv lawv 6 leej uas pom Niam Mab Liab. Nws kuj yog tus ob xub tau pom Niam Mab Liab hnub tim 25 lub 6 hli 1981 thiab. Nws niaj hnub pom Niam Mab Liab mus txog tim 25 lub 12 1982 xwb. Hnub ntawd Niam Mab Liab twb qhia yam kaum uas qhia tsis tau rau nws lawm. Nws yog thawj tug uas tau txais kaum yam uas qhia tsis tau. Txij tim 25 lub 12 hlis 1982 los txog tim 2 lub 8 hli 1987, nws tsuas pom Niam Mab Liab ib xyoos ib zaug hnub tim 18 lub 3 hlis, uas yog nws hnub yug xwb. Niam Mab Liab muab txoj hauj lwm rau Mirjana kom nws thov ntuj pab rau cov neeg tsis ntseeg Tswv Ntuj. Ces txij tim 2 lub 8 hli 1987 los txog niaj hnub no, Mirjana niaj hli pom Niam Mab Liab hnub tim 2 hauv lub hlis, thiab nws kuj niaj xyoo pom Niam Mab Liab ib xyoos ib zaug hnub nws yug uas yog tim 18 lub 3 hlis thiab. Mirjana kuj yuav txiv lawm thiab nws muaj ob tug ntxhais. Nws nyob Medjugorje thiab.

Lawv peb tug uas tseem Niaj Hnub pom Niam Mab Liab:
Vicka Ivankovic-Mijatovic yog tus laus dua cov nyob hauv lawv 6 leej tas nrho. Nws xub tau pom Niam Mab Liab yog tim 25 lub 6 hli 1981. Los txog tav no nws tseem niaj hnub pom Niam Mab Liab, vim nws nyuam qhuav tau txais 9 qhov uas qhia tsis tau xwb. Niam Mab Liab muab txoj hauj lwm rau nws kom nws thov ntuj pab rau cov neeg muaj mob. Nws yuav txiv lawm thiab muaj ob tub me nyuam. Nws nyob ib lub zos tsis deb pem qaum Medjugorje.
Xyoo 1983 thaum lub 1 hlis, Niam Mab Liab tau pib piav txog nws lub neej rau Vicka. Niam Mab Liab siv tau ob xyoos los piav thiaj tiav. Vicka tau xuas tes muab sau rau ob phau ntawv cia tos txog thaum Niam Masb Liab tso lus hais tias muab luam tawm tau, ces nws mam muab luam tawm.

Ivan Dragicevic yog tus laus dua ntawm nkawd ob tug tub uas pom Niam Mab Liab. Nws txoj hauj lwm yog kom nws thov ntuj pab rau cov Leej Choj (txiv plig), cov yim neeg (families), thiab ib tsoom tub ntxhais hluas (youth) nyob hauv ntiaj teb. Nws tseem niaj hnub pom Niam Mab Liab, vim nws tsuas tau txais 9 yam uas qhia tsis tau xwb.
Nws yuav ib tug poj niam As Mes Lis Kas. Nkawd nyob Boston, MA, USA. Nkawd muaj 4 tug me nyuam. Tiam sis Ivan kuj mus mus los los, nws nyob 6 hli nyob tim Medjugorje thiab 6 hli nyob tim As Mes Lis Kas.

Marija Pavlovic-Lunetti yog tus laus thib peb ntawm lawv 6 leej. Niam Mab Liab muab txoj hauj lwm rau nws kom nws thov ntuj pab rau cov ntsuj plig nyob hauv teb chaws them txim. Nws kuj yog ib tug tau pib pom Niam Mab Liab pib txij hnub tim 25 lub 6 hlis 1981 los lawm. Nws tseem niaj hnub pom Niam Mab Liab, vim nws tsuas tau txais 9 yam uas qhia tsis tau xwb. Ib hlis ib zaug hnub tim 25 hauv lub hlis, Niam Mab Liab muab ib co lus rau nws kom nws hais rau tas ntiaj teb neeg paub (message to the world).
Nws yuav ib tug txiv yog neeg Is Tas Lis, ces nws nyob Is Tas Lis teb. Nws muaj 4 tug me nyuam. Ib xyoos nws kuj mus ob peb zaug tim Medjugorje thiab.

Mab Liab Qhia Txog Yav Tom Ntej
Raws li tus Leej Phauj Emmanuel Maillard Piav

Tus phauj Emmanuel Maillard yog ib tug neeg Fab Kis, ua leej phauj coj lub neej tab seeb nyob hauv lub koom haum hu ua les Beatitudes/ the Beatitudes. Nws mus ua hauj lwm nyob tim Medjugorje txij xyoo 1989 los lawm. Nws yog tus tau tsim lub koom haum hu ua “Les Enfants de Medjugorje” nyob Fab Kis teb xyoo 1990, thiab lub koom haum hu ua “Children of Medjugorje, Inc.” (COM) nyob tim USA xyoo 1995. Lub koom haum no yog tsa los pab rau cov poj niam txiv neej los niam tsev txiv tsev zoo li peb, kom sawv daws hlob nyob hauv lawv txoj kev ntseeg raws li lub Koom Txoos Kas Tos Liv qhia, thiab raws li cov lus uas Niam Mab Liab tuaj hais nyob tim Medjugorje xwb. Tus phauj Emmanuel kuj tshaj tawm Niam mab Liab tej lus rau ntiaj teb paub thiab.

Nyob hauv daim video saum no, yog tus phauj Emmanuel hais lus piav txog qee lub ntsiab ntawm cov lus Niam Mab Liab tau tuaj hais nyob Medjugorje rau lawv 6 leej tub ntxhais uas tau pom Niam Mab Liab txij thaum lub 6 hli tim 25, 1981 los lawm. Lub ntsiab lus hnub no hu ua “Mab Liab Piav txog Yav Tom Ntej” no. Phauj Emmanuel piav cov lus ntawd yog hnub tim 9 lub 11 hlis 2019, rau ib pab neeg Fab Kis muaj li 600 leej, tuaj teev ntuj nyob Medjugorje. Muaj ib tug txiv plig, hu ua TP Mathieu Rey, coj pab neeg ntawd tuaj. Yog tus TP ntawd xub los hais lus ua ntej tus phauj Emmanuel los hais.

Nram no, kuv yuav tsis txhais kom tas txhua txhua lo lus, kuv tsuas txhais cov lus muaj lub ntsiab tseem ceeb xwb.

Tus phauj Emmanuel xub piav txog cov nqe lus uas qhia tsis tau(secrets) li no:
“Ua tsaug rau nej sawv daws cov npaj cov coj thiab cov tuaj ntawm no huv si. Nej tuaj txog 600 leej neeg Fab Kis mas kuj zoo kawg nkaus…tsis yog niaj hnub yuav muaj coob li no… Ua tsaug rau nej txoj kev thov ntuj…Kuv yuav sim li kuv ua tau los hais tej yam kom saib puas pab tau nej lub neej thiab qhov loj tshaj yog kom muab kev tso siab rau nej sawv daws nyob hauv lub ntiaj teb no uas tsis muaj kev tso siab li.

Lub ntsiab lus hnub no uas sau tias kom kuv hais txog mas yog yuav hais txog tej yam uas qhia tsis tau, hu ua cov Secrets no… Tiam sis Niam Mab Liab hais tias tsis tas kom peb yuav tsum hais txog cov secrets ntawd li… vim peb twb tsis paub txog tias yog dab li. Yog li ntawd kuv mam li muab lwm yam los hais…”

Tiam sis phauj Emmanuel kuj xub pib piav qhia txog cov lus qhia tsis tau ua ntej raws li no:

“Niam Mab Liab (NML) tau hais tias nws yuav qhia lawv 6 leej ntawd ib leeg zuj zus txog 10 yam uas qhia tsis tau tam sis no, yog cov secrets. Thaum leej twg paub txog 10 yam lawm mas nws yuav pom NML ib xyoos ib zaug lawm xwb, yuav tsis niaj hnub pom li zaum no lawm… Vim li ntawd niaj hnub no Vicka, Marija, thiab Ivan lawv peb leeg no tsuas paub txog 9 yam xwb ces lawv tseem niaj hnub pom NML; Mirjana, Ivanka, thiab Jakov lawv ib leeg paub txog 10 yam lawm ces lawv tsuas pom NML ib xyoos ib zaug lawm xwb.
Tiam sis Jakov mas nws muaj ib qho tshwj xeeb, yog hnub Yes Xus yug los (tim 25 lub 12 hlis) uas nws tau pom tus me nyuam Yes Xus thiab…

Hais txog cov lus qhia tsis tau ntawd mas tam sis no peb tsis paub tias yog dab tsi li mas yuav qhia tsis tau kiag li. Mirjana tau hais tias: ‘Yog peb ntxeev siab rau NML es peb cia li yuam cai qhia tawm rau sawv daws mas peb yuav ruam hais tsis tau lus thaum ntawd li’ no.
Muaj ib qhov qhia tsis tau, yog yam 3 uas qhia tsis tau, tiam sis peb kuj paub me me txog. Yog hais txog lub cim uas NML hais tias nws yuav cia tshwm tuaj thaum kawg nyob rau ntawm qhov chaw nws tau tshwm sim thawj zaug, saum lub roob Podbrdo, uas hu ua lub Roob kev Tshwm Sim(Apparition Hill). Muaj peb yam peb paub txog, yog qhov tias: 1)lub cim ntawd mas txhua leej yuav pom tau thaum lawv mus txog Medjugorje; 2) yuav muab rhuav tshem tsis tau li; 3) yuav nyob ruaj nreb mus li… Yog li mas kuj yuav nyob mus txog thaum ntiaj teb kawg … Lub cim ntawd yog dab tsi? Qhov ntawd yog qhov qhia tsis tau. Vicka thiab Jakov nkawd thiaj paub xwb, nkawd tau pom lub cim ntawd lawm thiab nkawd paub tias hnub twg yuav tshwm tuaj…

Ib yam peb paub ntxiv txog tej yam qhia tsis tau mas yog qhov tias, raws li Mirjana hais, nyob li ntawm nws, mas thaum txog sij hawm uas NML yuav kom nws muab ib qho los ntau qhov qhia tsis tau tshaj tawm rau ntiaj teb paub, mas nws yuav tsum xub mus ceeb toom rau ib tug TP uas nws tau xaiv lawm, ces tus TP ntawd nrog rau Mirjana yuav tsum yoo, tsuas noj mov ntse dej xwb kom puv xya hnub nkaus, ces thaum ntawd Mirjana mam li mus qhia lub ntsiab lus los cov ntsiab lus tseeb rau tus TP ntawd paub, ces tus TP mam li yuav muab tshaj tawm qhia rau tas ntiaj teb neeg sawv daws paub. Vim niaj hnub no muaj kev sib xa moo zoo thiab nrawm heev mas 10 nas this tej xwb ces ntiaj teb neeg yeej yuav tsum paub coob lawm…Peb hnub tom qab qhov kev tshaj tawm no kiag xwb, ces yam ntawd yuav tshwm sim tuaj ntag…
Qhov nram no tsis yog tseeb, kuv tsuas lam hais ua piv txwv xwb:
Xws li yog tias lub cim uas NML yuav coj tuaj tso rau saum qhov chaw uas nws tau tshwm sim thawj zaug ntawd yog ib tug dej txhawv hauv av los, mas thaum Mirjana thiab TP nkawd yoo mov 7 hnub tas lawm, tus TP yuav tshaj tawm tias yuav muaj ib tug dej txhawv los rau qhov chaw ntawd, ces peb hnub tom qab xwb, neeg yuav pom tus dej txhawv tawm los tiag… yog peb mus txog ntawd ces peb yuav pom tau, yuav kov tau, yuav yees tau duab tib si…

Lawv cov tub ntxhais uas pom NML ntawd nyias yuav tsum xaiv nyias ib tug txiv plig los tshaj tawm nyias cov lus qhia tsis tau ntawd. Xws li Mirjana mas nws twb xaiv tau nws tus TP ntxov los lawm hu ua TP Petar Ljubičić. Tiam sis nws kuj tau hais tias yog nws yuav tsum hloov mas nws yeej hloov tau thiab no….Vicka kuj tau xaiv ib tug TP lawm thiab, tab sis tus TP ntawd ho tas sim neej lawm, ces nws yuav tsum tau xaiv dua lwm tus…”

Dhau qhov no lawm, tus phauj yuav los zaum piav txog ib lub caij tshiab yuav tuaj tom ntej no raws li nram no:

“Ntawm no kuv xav los hais txog ob lub ntsiab lus uas NML tau hais thaum lub 6 hli tim 25 thiab lub 7 hli tim 25 tsaib no (2018)…
Los txog tav no, uas kuv tau nyob tau 30 xyoo ntawm no lawm, mas NML tsis tau hais lus zoo li ntawd ib zaug li…yog ib co lus txawv kawg li (extraordinary messages), yog hais txog yav tom ntej, thiab yog zoo li ib co lus saub…Vim li ntawd kuv thiaj hais tias nws tsis tau hais dua ib co lus zoo li ntawd li….
Kuv yuav muab cov lus ntawd kab puav uas kuv nco tau rau nruab siab los hais rau nej…

Ntawm no yog cov lus uas nws hais rau hnub tim 25 lub 6 hli 2018, uas yog hnub nco txog NML tuaj tshwm sim tau 38 xyoo nkaus lawm,
NML tau hais li no:
‘Kuv cov me nyuad, kuv xav npaj nej lub siab tos lub caij tshiab uas yuav tuaj…’
Lub caij tshiab ntawd yog yav tom ntej… Niam NML hais tias yog…ib lub caij muaj kev thaj yeeb… yog ib lub caij ntuj tshiab (spring time/printemps)….yog ib lub caij uas nws lub siab tos ntsoov xav kom los txog sai sai… Txhais tias, niaj hnub no peb lub ntiaj teb tsis muaj kev thaj yeeb li, thaum ntawd mas yuav thaj yeeb lug… lub caij ntawd tas puas tsav yam yuav tshiab tas nrho, huab cua yuav tshiab yuav zoo, peb yuav muaj ib lub neej txawv lub nyem no… NML hais rau peb tias nws npaj peb lub siab tos lub caij tshiab yuav tuaj… Peb yeej yuav tau pom lub caij tshiab ntawd hauv peb lub neej tiam no xwb…

Nws hais ntxiv tias:
‘Kuv npaj nej lub siab…. kom nej nyob ruaj nreb hauv txoj kev ntseeg, thiab kom nej mob siab teev ntuj tsis tseg…’
Nej yeej tau hnov lawm tias NML tuaj yog tuaj hais tsis tseg kom peb yuav tsum ntseeg thiab yuav tsum rau siab teev ntuj, muaj ntau qhov twb hais txog lawm… Kuv yuav tsis rov muab los hais ntxiv… Nej mloog qhov nws hais ntxiv yog li no:
‘Nej yuav nyob ruaj nreb hauv txoj kev ntseeg… kom Leej Tswv Yim Ntshiab tau kev ua hauj klwm nyob hauv nej los ua kom daim npoo ntiaj teb rov tshiab tuaj’…
Vim niaj hnub no tib neeg niaj hnub muab lub ntiaj teb rhuav, rhuav tej xyoob ntoo, tej huab cua, daim npoo av….yog coj li no mus ces tsis ntev tom ntej no ntshai peb yuav ua tsis taus pa ntxiv lawm…. Nej twb hnov hais txog nuclear tawg xws li nyob Chernobyl thiab lwm qho chaw…thiab nej yeej hnov hais txog tej tsiaj txhu tuag… tsam ib hnub twg tsis muaj ntses nyob hauv hiav txwv ntxiv, los tsis muaj noog saum ntuj ntxiv, los av tsis zoo qoob ntxiv …. tej noob qoob noob loo uas neeg muab hloov muab kho… Tej no yog kev tab tom rhuav lub ntiaj teb xwb…

Tiam sis thaum ntawd yuav yog ib lub caij tshiab, tas puas tsav yam yuav tshiab tas nrho…Lub ntiaj teb yuav hloov ua dua ib lub tshiab tuaj… tiam sis peb yeej xav tsis tawm tias yuav yog zoo li cas kiag li….Li ntawd NML thiaj tuaj npaj peb lub siab tos… Nej puas ntseeg tias peb yuav tau pom?…. Peb yeej yuav pom xwb….

Nyob hauv NML txoj kev tshwm sim nyob Medjugorje, nws tau ua ib yam los yog qhib ib lub qhov rai me me rau peb, kom peb pom zem zuag txog tias lub caij tshiab ntawd yuav yog zoo li cas….

Nej puas nco tau tias NML qhia tias nws hnub yug yog hnub twg?… ‘Yog tim 5 lub 8 hli’…
Yog li ntawd xyoo 1984, nws muaj pes tsawg xyoo?…’Nws muaj 2000 xyoo lawm’…
Ob peb hnub ua ntej, nws hais qhia rau cov tub ntxhais uas pom nws tias hnub tim 5 lub 8 hli 1984, nws yuav muaj 2000 xyoo… Ces nws thov kom cov neeg hauv lawv lub zos sawv dawv yoo mov thiab teev ntuj npaj ua kev zoo siab rau lub hnub nyoog ntawd….Ces lawv sawv daws tau yoo mov thiab niaj hnub teev ntuj…Thaum txog hmo ua ntej hnub ntawd yav tsaus ntuj, thaum lawv tuaj teev ntuj ua ke li niaj zaus, tus ntxhais hu ua Jelena Vasilj, uas kuj yog ib tug ntxhais hnov tau NML lub suab hais lus rau nws nyob hauv nws nruab siab thiab, hmo ntawd nws pom dab phem Xas Tas pw hauv av, npau taws heev kawg nkaus li, ntswj lees nws ib ce, ua ntsej muag hnya tas, nws hais rau Jelena tias:
‘Tag kis, koj hais rau NML kom tsis txhob tsa tes foom hmoov zoo rau ntiaj teb li.’
Thaum lawv teev ntuj tas lawm, Jelena pom NML hauv nws nruab siab, NML luag ntxhi xwb. NML hais rau Jelena tias:
‘Tos Xas Tas hais li ntawd rau koj los, vim nws paub tias, tus Nyob Siab tau tso cai rau kuv kom tag kis kuv foom hnoov zoo tshwj xeeb (solemn blessing/benediction solennelle) rau ntiaj teb, ces nws paub tias hnub ntawd mas nws yuav raug muab khi cia, ces nws yuav ua tsis tau dab tsi li, ces nws thiaj npau taws….’

Tag kis tim 5 lub 8 hli los txog, yog lub caij sov, ces neeg tuaj coob kawg nkaus tuaj teev ntuj; muaj txog 70 tus txiv plig tuaj nyob hauv lub zos. Lub caij ntawd tseem tsis tau muaj cov chav daws txhaum ntau. Lawv muab ib lub rooj ib(chair) rau tus txiv plig zaum, hos tus neeg daws txhaum yuav tsum mus txhos caug rau hauv av ntawm ib cag xwb. Ces hnub ntawd, txij sawv ntxov mus txog tsaus ntuj, mas tas cov neeg tuaj teev ntuj sawv daws huv tib si mus sawv ua leej tos yuav daws txhaum, txhua leej txhua tus mus tas tib si…Ib co mus tas tseem muaj lwm cov mus ntxiv tas zog thiab… Sawv daws mus daws txhaum li ntawd kuj yog ib qho txawv kawg. Tiam sis tseem muaj ib qhov txawv ntxiv thiab, yog qhov tias tas txhua leej txhua tus mus daws txhaum cia li quaj tas tus. Yog vim li cas? Vim lawv nyias rov pom tias nyias cov txhaum tau ua rau Tswv Ntuj tu siab npaum li cas, ces lawv tu siab dhau rau lawv tus kheej, lawv thiaj quaj. Yog Leej Ntuj Plig Ntshiab ua kom lawv paub li ntawd, nws qhov pom kev ua kom lawv pom lawv cov txhaum zoo li ntawd, ces lawv thiaj tu siab loj. Yog ib txog kev tu siab rau yus cov txhaum uas yog ib qho zoo tuaj ntawm Leej Ntuj Plig tuaj. Sawv daws thiaj quaj tas tus…
Tsis tas li xwb, lawv tseem quaj rau qhov tias lawv mus daws txhaum tas, Tswv Ntuj zam txhaum rau lawv lawm, ces lawv zoo siab lawv ho quaj ib zaug thiab. Tsis tas li xwb, tab cov txiv plig los lawv kuj quaj thiab ces tas sawv daws quaj.

Tseem muaj ib yam txawv kawg thiab. Muaj ib co neeg uas yog cov tuaj mus ncig ua si tom tus ntug dej hiav txwv Adriatic; muaj dab tsi ua rau lawv lub siab komn lawv cia li los rau tom Medjugorje huv si. Thaum lawv los txog, lawv kuj cia li mus sawv ua leej tos mus daws txhaum thiab, lawv kuj quaj tas tus thiab. Lub caij ntawd yog muab cug mas ntshai yuav cug tau kua muag ntau kawg li… Txawv kawg nkaus… Thaum yav tsaus ntuj, cov txiv plig hais tias: ‘Peb daim ntaub khuam xub pwg daws txhaum mas ntub tas vim peb cov kua muag thiab vim cov neeg tuaj daws txhaum ntawm peb cov kua muag’…. Hmo ntawd thaum tsaus ntuj, NML tuaj tshwm sim hais rau cov tub ntxhais uas pom nws tias:
‘Kuv tsis tau quaj dua ib zaug vim kev tu siab, npaum li hnub no kuv tau quaj vim kev zoo siab.’…
NML tseem hais ntxiv tias:
‘Kuv cov me nyuad, hnub no Xas Tas raug muab khi cia lawm, nws ua tsis tau dab tsi, tiam sis nej nco ntsoov tias, txij tag kis mus nws yuav rov los nyob twj lij dua…’
Thaum NML hais cov lus ntawd, cov uas pom NML, pom tias NML quaj kua muag poob, yog cov kua muag zoo siab quaj, tiam sis lawv ntsia ntsoov pom cov kua muag ntawd cia li hloov ua kua muag ntshav lawm, cov kua muag ntshav ntawd kuj ho cia li hloov ua kua muag kub lawm thiab. Ces ua rau peb nco txog thaum hais saw Mab Liab, peb xav txog NML thiab Yes Xus lub neej muaj kev zoo siab, muaj kev txom nyem, thiab nto koob meej (Joyfull, Sorrowful, Glorious Mysteries)…

Kuv hais li no yog kuv xav qhia rau nej tias, hnub uas Xas Tas raug muab khi cia lawm, nws ua tsis tau dab tsi lawm, ces muaj dab tsi tshwm sim?,,, Muaj qhov tias, hnub ntawd tsoom neeg sawv daws tau txais Tswv Ntuj txoj kev khuv leej ntws lug cuag li dej ntws los nyab rau lawv tej siab ntsws tas tib si, Xas Tas ua tsis tau dab tsi los txwv qhov ntawd. Hnub ntawd Tswv Ntuj txoj kev khuv leej ua kom sawv daws qhov muag pom kev yeej Xas Tas, tsis muaj tus thaiv lawv ntxiv kom txhob xav mus daws txhaum, txhob pom tias yus tau ua txhaum, los txhob xav tso kev ua txhaum, ua phem, ua qias pov tseg…. Peb thiaj pom tias Xas Tas yog tus ntis peb tas mus li, muab txhiab pua yam los pleev peb qhov muag, kom peb thiaj hloov tsis tau peb tus kheej mus taug txoj kev ua neeg dawb huv neeg ntshiab, tiam sis hnub ntawd muaj Tswv Ntuj txoj kev khuv leej los nyab tas sawv daws tej siab ntsws, ces ua rau sawv daws nyias ntshaw hloov nyias tus kheej…
Kuv xav tias qhov no qhia tau me me rau peb hais tias lub caij tshiab yav tom ntej ntshai yuav yog ib lub caij zoo li ntawd, muaj Tswv Ntuj txoj kev khuv leej kav sawv daws….

Hnub tim 14 lub 2 hlis 1982, NML tau hais ib lo lus zoo li no tias:
‘Thaum tas 10 yam uas qhia tsis tau ntawd raug muab qhia tawm tas rau ntiaj teb, thiab tau tshwm sim tuaj tas lawm, mas thaum ntawd yog lub caij uas Xas Tas yuav tsis muaj peev xwm ua tau dab tsi ntxiv lawm (fin du pouvoir de Satan/ the end of Satan’s power).’
Peb yuav ntsia hais tias cov uas lawv pom NML mas tam sis no lawv hnub nyoog twb yog 52 mus rau 55 xyoo tas tib si lawm… yog li mas peb yuav tsis tos 2000 xyoo tom ntej no ntxiv….Nej puas to taub qhov kuv hais? Nej puas pom tias lub caij peb nyob no yog ib lub caij yuav muaj dab tsi?….Tswv Ntuj tau xaiv nej los nyob lub caij no, uas yog ib lub caij nyuaj kawg thiab tshwj xeeb kawg…. Nej yuav nco ntsoov ua Tswv Ntuj tsaug vim nej yuav tau pom ib lub caij txawv, ib lub caij tshiab….peb yeej xav tsis tau txog tias yuav yog zoo li cas li… tiam sis yog NML twb xav kom los txog sai sai, mas nws paub tias yuav yog ib lub caij zoo kawg nkaus rau peb….”

Nram no mus phauj Emmanuel yuav hais txog NML cov lus nws hais hnub tim 25 lub 7 hli 2018.

“NML hais li no:
‘Kuv cov me nyuad, yuav muaj ib co kev nyuaj kev sim siab loj, nej yuav tsis muaj zog tiv tau…. Vim nej siv nej lub zog uas twb me me lawm, los ua tej yam uas tsis ntxiv zog rau nej….’

Yog vim li cas NML hais tias peb yuav tsis muaj zog tiv tau? Yog vim hais tias peb ua peb lub neej, peb lub hom phiaj ces yog niaj hnub nrhiav txoj kev tau zoo nyob ntiaj teb no xwb…xav muaj, xav nplua nuj, yim muaj yim xav muaj ntau, xav ua tau txhua yam raws siab xav, xav muaj txhij muaj txhua, xav kom txhob muaj kev txhawj xeeb dab tsi, xav lom zem, ……tej no tsis yog tej yam phem, yeej yog tej yam zoo, uas Tswv Ntuj pub rau peb, vim peb yuav tsum muaj nyiaj muaj txiaj, muaj noj muaj hnav, muaj vaj muaj tsev, muaj phooj muaj ywg…. tiam sis… kom peb nco ntsoov tias tej ntawd tsuas yog tej txoj kev pab peb nyob ntiaj teb no xwb, yog tej txoj kev pab kom peb mus txog peb lub hom phiaj hauv lub neej xwb.

NML qhia tias peb lub hom phiaj hauv lub neej yog dab tsi? Yog kom mus txog saum ntuj nkaus xwb… Peb tsis nco qab tias peb muaj ib tug ntsuj plig uas yuav mus kom tau txoj sia nyob mus li li … ces peb siv tas peb lub caij peb lub zog los nrhiav qhov zoo hauv ntiaj teb no xwb…”

Nram no mus kuv yuav piav raws li phauj Emmanuel cov ntsiab lus lawm xwb, tsis txhais nws cov lus lawm, vim ntev dhau. Kom sd to taub tias yog kuv cov lus kuv piav raws li kuv to taub nws hais xwb. Nws hais ntxiv tias:

Kuj yog vim muaj tej lub tswv yim yuam kev coj sd, peb thiaj yuav tsis muaj zog tiv tau tej kev nyuaj kev sim siab loj uas NML hais tias yuav muaj tuaj. Cov tswv yim yuam kev ntawd yog:
Egoism: txoj kev siab nqaim siab ti xav kom yus tau ntau;
Modernism: txoj kev ntseeg hais tias tej tswv yim, tej kev cai, tej kev ntseeg, tej kev coj noj coj ua txheej thaud qub dhau lawm tsis zoo, yuav tsum hloov mus coj raws txheej tshiab lub tswv yim tshiab xwb) ,
Materialism: lub tswv yim ntseeg hais tias tsis muaj Tswv Ntuj, tsis muaj dab, tsis muaj ntsuj plig, tsuas muaj yam khoom yus pom tau kov tau nkaus xwb.

Tej tswv yim no ua kom peb tsis mob siab txog peb lub hom phiaj yuav mus kom txog saum ntuj li. Ib yam li yog peb twb tsis ntseeg tias muaj Tswv Ntuj, tsuas muaj lub ntiaj teb yus pom tau xwb ces, peb mus teev ntuj muaj qab hau da tsi? Tsis muaj li, tsuas yog mus nkim sij hawm dag xwb, peb tseem poob nyiaj qees xwb, thiab twb tsis siv lub sij hawm mus khwv nyiaj ntxiv li. Tiam sis yog peb to taub txoj kev teev ntuj zoo thiab ntseeg, mas qhov ntawd thiaj yog qhov peb yuav khwv tau txiaj ntsim koob hmoov coj peb mus txog saum ntuj.

Muaj ib cov hluas coob kawg twb tsis paub txog tias lawv muaj ib tug ntsuj plig li, twb tsis paub tias tib neeg lub hom phiaj ua neej yog kom tau mus saum ntuj xwb. Yog muaj neeg nug lawv tias, thaum tuag lawm tib neeg yuav mus qhov twg? Lawv yuav teb tias; tuag tas ces nkag qhov av xwb… los tej zaum lawv yuav hais tias
tuag ces yuav rov mus thawj thiab dua, los lwm yam ntxiv …Tiam sis coob leej, tab txawm yog cov hluas Kas Tos Liv kiag, los yeej tsis paub txog hais tias peb txoj kev ntseeg Yes Xus qhia li cas tiag.

NML hais tias:
“nej yuav tsis muaj zog tiv tau…. Vim nej siv nej lub zog uas twb me me lawm, los ua tej yam uas tsis ntxiv zog rau nej….”
Ua li dab tsi thiaj yuav ntxiv zog rau peb? Yog tej yam hais txog Tswv Ntuj xwb thiaj yuav ntxiv zog tau rau peb. Yog thaum peb teev ntuj ces peb thiaj yuav muaj zog tuaj… Peb lub siab tus ntsuj plig thiaj yuav muaj zog tuaj… Niaj hnub no, neeg tsis xav mus teev ntuj pes tsawg lawm… Ntau zaus peb tau hnov tej tug hais tias:
“Kuv tsis mus teev ntuj, kuv yuav xyuas lawv ncaws npas,”
los tej yam zoo li no, ces peb twb tsis siv peb lub zog los lub sij hawm mus ua tej yam yuav ntxiv zog rau peb sab ntsuj plig li, peb ua tej yam kom peb tsis muaj zog zuj zus xwb Ces yog muaj tej kev nyuaj kev sim siab tuaj ces peb yuav tiv tsis yeej li. Vim tias tsis yog peb lub zog, yog Tswv Ntuj lub zog ua kom peb muaj zog tiv tej yam phem yam nyuaj.

Tswv Ntuj lub zog yog dab tsi? Yog txoj kev nyiam Tswv Ntuj uas nyob hauv peb nruab siab.Thaum peb nyiam Tswv Ntuj lawm ces, peb yuav muaj zog ntsos tiv txoj kev phem hauv peb lub neej, peb yuav mob siab zam kom dhau tsis txhob ua qhov phem qhov qias.

NML tseem hais ntxiv tias:
“…nej yuav tsis muaj zog tiv tau… ces txoj kev txhaum yuav kav sd …”
Yog thaum kev txhaum kav sd lawm, peb yuav ua li cas?… Peb yuav tsum xav txog qhov no tias peb yuav ua li cas yeej tau kev txhaum… mloog raws li niaj hnub no mas muaj kev phem kev qias puv nkaus ntiaj teb lawm, yog peb tib neeg xwb ces ntshai yuav tsis yeej li lau….

Tiam sis NML yog peb Niam, nws hlub peb, nws coj kev cia siab tuaj rau peb, nws muaj lo lus ‘tiam sis’ rau peb thiab, nws hais tias:
“… tiam sis yog nej yog kuv neeg, mas nej yuav txais kev yeej… vim nej yuav muaj chaw nkaum nyob hauv kuv leej Tub Yes Xus lub Plawv.”
Yog li ntawd, lub zog uas tuaj ntawm Tswv Ntuj tuaj pab kom peb yeej tej kev phem kev nyuaj thiab kev sim siab loj tom ntej no, yog HT Yes Xus lub Plawv. NML tsis tau hais tias, nej yuav tsum mus nkaum rau thaj chaw no… tiam sis nws hais tias peb yuav muaj chawm nkaum nyob hauv nws Leej Tub lub Plawv.

NML twb tau xub qhia ob peb hlis ua ntej lawm hais tias:
“Lub Cim Yug yog kuv Leej Tub Yes Xus lub Plawv.”
Yog li ntawd yog peb nquag mus txais lub Cim Yug, nquag mus pe hawm lub Cim Yug, ces Yes Xus hauv lub Cim Yug yuav yog peb qhov chaw nkaum, rau peb txhua leej txhua tus tib si. Peb mus nrhiav tsis tau lwm tus pab peb ntxiv.

Nram no, Phauj Emmanuel kuj tau hais txog lwm qhov chaw NML tuaj tshwm sim, saib NML tau hais dab tsi thiab; nws hais txog tej tug neeg tau coj ib lub neej dawb huv, thiab tau hais tej cov lus saub txog yav tom ntej thiab.

Nws xub hais txog tias nyob Fatima, NML tau tuaj tshwm sim xyoo 1917, nws tau hais li no:
“Thaum kawg, kuv lub plawv tsis lo txhaum yuav txais kev yeej. (In the end, my Immaculate Heart will triumph/ A la fin, mon Coeur Immacule triomphera.”)
Yog peb muab cov lus no los xav mas yog yuav muaj ib qho kev yeej, yuav tsum xub muaj ib qho kev sib tawm tsam tso, mam muaj tus yeej tom qab. Qhov sib tawm tsam ntawd yog dab tsi? NML tsis tau hais qhia rau peb paub. Tiam sis ntshai txoj kev sib tawm tsam ntawd mas yuav yog sib tawm tsam sab ntsuj plig ntau, sib tawm tsam txog qhov phem qhov zoo ntau. Mas niaj hnub no peb sd puav leej nyob hauv qhov kev sib tawm tsam ntawd huv tib si.

Thaum Vaj Qhia Zam Paj Lug II ua vaj qhia, mas nws muaj lub siab hlub thiab nyuaj siab txog cov yim neeg thiab txoj kev ua txij ua nkawm kawg nkaus li, ces nws tau kom ib tug Tswv Qhia nyob Is Tas Lis tsa ib lub hauv paus kev kawm los txhawb txhim thiab txuag cov yim neeg, hu ua ‘Institute for Studies on Marriage and Family’ no, nyob rau Los Mas. Tus Tswv Qhia ntawd thiaj sau ntawv mus rau tus leej phauj Lucia uas thaum ub tau pom NML nyob Fatima, thov kom nws lub koom haum cov leej phauj thov Ntuj pab txoj hauj lwm ntawd. Thaum ntawd Lucia tseem muaj txoj sia nyob, nws nyuam qhuav tuag tim 13 lub 2 hlis 2005, peb hlis ua ntej vaj qhia Zam Paj Lug II xwb. Tus phauj Lucia tau sau ntawv tuaj teb rau tus tswv qhia ntawd.
Raws li phauj Emmanuel hais mas tej zaum neeg yuav tsis paub txog, tiam sis nws hais tias txij thaum tus phauj Lucia mus nyob hauv nws lub koom haum ua phauj lawm, nws tseem tau pom NML ntxiv. Yog li cov lus uas phauj Lucia sau tuaj teb rau tus tswv qhia yuav tsum yog NML cov lus. Tus phauj Lucia sau ntawv tuaj hais tias: “Nthwv rog kawg ntawm Xas Tas txoj kev kav ntiaj teb, mas yog nws yuav tsa ib nthwv rog los rhuav lub yim neeg thiab txoj kev ua txij ua nkawm.”

Yog li ntawd, raws peb pom mas niaj hnub no peb tab tom nyob hauv nthwv rog ntawd lawm. (Qhov no yog kuv hais ntxib xwb: Vim niaj hnub no muaj kev sib nrauj yooj yooj yim, muaj kev tso tej me nyuam ua ntsuag ciaj, muaj kev rho me nyuam ntau kawg nkaus, muaj txoj kev sib yuav tsis raws kev raws cai, txiv neej sib yuav txiv neej, poj niam sib yuav poj niam… zoo li lub yim neeg tsis muaj nqes pes tsawg lawm). Ces peb kuj nyob ze ze rau qhov kawg lawm. Txhais tias tshuav tsis ntev ces yuav yog lub caij tshiab uas NML hais tias, nws yuav txais kev yeej lawm.

Nruab xyoo HNUB CHIV 24 XYOO B

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

HIS XAIS _50 : 5-9

LUB NTSIAB LUS : Tus Yaj Saub cav txog Tswv Ntuj tus Tub Txib uas yog Yes Xus. Peb kuj yuav xyaum ua Tswv Ntuj cov tub txib tshiab.

COV LUS NYOB HAUV NTAWV HIS XAIS :

5 – HUAB TAIS Tswv Ntuj qhib kuv pob ntseg, mas kuv tsis npau taws,

kuv tsis yig, kuv tsis thaub qab.

6 – Lawv ntaus kuv, mas kuv tig kuv nraub qaum rau lawv ntaus.

Lawv xav rho kuv cov hwj txwv, mas kuv tig kuv sab plhu rau lawv.

Lawv xav ib tawg ncuav rau kuv thiab xav nto qaub ncaug rau kuv ntsej muag,

los kuv tsis fee plhu rau lawv.

7 – Tab sis HUAB TAIS Tswv Ntuj tsom kwm kuv, vim qhov ntawd mas kuv tsis poob ntsej muag.

Ces kuv ua kuv ntsej muag tawv li pob zeb. Kuv paub tias kuv yuav tsis raug kev txaj muag.

8 – Tus pom tias kuv siab ncaj, nws nyob ze kuv, leej twg yuav txiav txim tau tias kuv muaj txhaum ?

Kom peb ua ke tuaj ntawm lub rooj txiav txim mas ! Leej twg yog tus tau mus kom kuv rau cov nom txiav txim ? Kom nws kaj tsij txav los cuag kuv saib !

9 – Ntsia saib ! HUAB TAIS Tswv Ntuj tsom kwm kuv ! Leej twg yuav txiav txim rau kuv tau ? _Muaj tseeb !

Sawv daws yuav txawj ntshaus _xws li ib ce tsoos uas kab yaim. Lawv lub cev yuav liam txwv tas. »

Yog Tswv Ntuj Lo Lus Nws lus txiaj ntsim

Nkauj Paj Nruag TAUG KEV NTAWM HUAB TAIS XUB NTIAG

(NPN 116-3) (zaj 128)

Txais: Kuv yuav taug kev ntawm Huab Tais xub ntiag nyob hauv tsoom neeg ciaj lub teb chaws.

1 – Kuv nyiam Huab Tais vim nws mloog kuv lub suab thov.

Nws tig ntsej _los ze kuv, kuv yuav hu txog nws tas kuv sim neej.

2 – Txoj kev tuag cov hlua nyob ncig kuv. Ntuj txias teb tsaus cuab hlua ntes kuv.

Kuv poob hauv kev txhawj xeeb, kev tu siab. Kuv hu txog Huab Tais, kuv tuav txog nws lub npe tias:

“Huab Tais, thov koj hlub kuv thiab npo kuv.”

3 – Huab Tais hlub neeg, nws siab ncaj. Nws zam txhaum rau neeg.

Nws txuag cov neeg me. Thaum kuv qaug zog, nws cawm kuv.

4 – Koj npo kuv tus plig ntawm txoj kev tuag. Koj so kuv kua muag.

Koj hwj kuv txhais taw kom kuv txhob ntog. Kuv yuav taug kev hauv cov neeg ciaj lub teb chaws

nyob ntawm Huab Tais xub ntiag.

ZAJ NYEEM OB

YAS KOS _2 : 14-18

LUB NTSIAB LUS : Tus ntseeg txog Tswv Ntuj tiag nws ua cov hauj lwm nyiam luag tej, vim Tswv Ntuj qhia kom sib nyiam sib hlub.

COV LUS YAS KOS SAU TUAJ RAU TSOOM NTSEEG :

14 – Kuv cov kwv tij, thaum ib tug tsis ua cov hauj lwm, yog nws hais tias :

“Kuv lub siab ntseeg”, mas nws txoj kev ntseeg muaj qab hau dab tsi ?

Lub siab ntseeg puas cawm tau nws ?

15 – Thaum ib tug kwv, los ib tug muam, tsis muaj dab tsi hnav,

thiab tsis muaj mov txaus noj txwm hnub,

16 – yog nej ib tug hais rau lawv tias:

“Nej mus nyob kaj siab lug mog ! Nej mus nte taws sov so, nej noj tsau npo mog !”

Tab sis nej tsis tau pub dab tsi pab lawv lub cev, mas nej lo lus muaj qab hau dab tsi ?

17 – Hais txog txoj kev ntseeg, kuj zoo li ntawd.

Yog kev ntseeg tsis muaj cov hauj lwm pab luag, mas kev ntseeg tuag lawm.

18 – Qee tus hais tias : “Koj muaj lub siab ntseeg, hos kuv muaj cov hauj lwm zoo.”

Yuav teb rau nws tias :

“Koj muab koj lub siab ntseeg tsis ua cov hauj lwm rau kuv pom,

ces kuv yuav muab kuv lub siab ntseeg cov hauj lwm rau koj pom.”

Yog Tswv Ntuj Lo Lus Nws lus txiaj ntsim

NTAWM MOO ZOO

MAS KOS _8:27-35

LUB NTSIAB LUS :Yes Xus ib txhij yog tus Huab Tais Pleev, thiab yog TswvNtuj tus Tub Txib raug luag hiam. Yes Xus cov thwj tim kuj ib txhij txais Yes Xus lub hwj chim thiab nws txoj kev txom nyem.

COV LUS NYOB HAUV MAS KOS NTAWV MOO ZOO :

27 – Yes Xus nrog nws cov thwj tim mus rau cov zos nyob cheeb tsam ntawm _Xes Ntxas Les Fis Lis Pos.

Thaum lawv mus kev, Yes Xus nug cov thwj tim li no :

« Luag tej hais tias kuv yog leej twg ? »

28 – Cov thwj tim teb tias :

« Ib txhia hais tias koj yog Zam Ntxuav Plig, ib txhia hais tias koj yog Es Lias,

hos ib txhia hais tias koj yog ib tug hauv cov yaj saub. »

29 – Yes Xus nug lawv tias :

« Hos nej, mas nej hais tias kuv yog leej twg ? »

Pob Zeb teb rau Yes Xus tias :

« Koj yog Leej Pleev. »

30 – Ces Yes Xus txwv lawv nruj kom txhob hais txog nws rau leej twg li.

31 – Yes Xus pib qhia cov thwj tim hais tias :

« Neeg Leej Tub yuav tsum raug txom nyem loj. Cov txwj laus, cov thawj leej choj thiab cov thoob xwm yuav muab nws xyeeb pov tseg ; luag yuav muab nws tua. Peb hnub tom qab, nws yuav sawv _rov los.

32 – Yes Xus qhia tej ntawd tshab plaws. Pob Zeb rub Yes Xus los ntawm nws,

ces Pob Zeb nroo rau Yes Xus.

33 – Tab sis Yes Xus tig _ntsia cov thwj tim, nws cem Pob Zeb hnyav ncawv tias :

« Xas Tas, koj lawv kuv qab !

Vim cov lus koj xav tsis yog Tswv Ntuj cov lus, yog neeg cov lus xwb ! »

Huab Tais Pleev Lub qab ntuj neeg cav txog koj

Nruab xyoo HNUB CHIV 23 XYOO B

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

HIS XAIS 35 : 4-7

LUB NTSIAB LUS : Tus Yaj Saub xub hais rau cov His Xas Lais nyob txim nyob Npas Npis Los tias tsis ntev lawv yuav rov tau zoo.

COV LUS NYOB HAUV NTAWV HIS XAIS :

4 – Nej hais rau cov siab muag tias : « Nej ua siab loj ! Nej txhob ntshai !

Ntsia saib ! Nej tus Tswv Ntuj nyob ntawm no ! »

Kev rob caub tab tom tuaj, Tswv Ntuj cov txim pauj neeg cov txhaum tuaj cawm peb.

5 – Ces cov dig muag ob lub qhov muag rov rua hlo,cov pob ntseg lag yuav qhib plho.

6 – Tus neeg ceg tawv dhia nrawm xws li tus muas lwj. Tus nplaig txhav qw tej suab zoo siab.

Vim ib co dej txhawv hauv cov teb chaws suab puam los, tej tus dej ntws hla cov teb chaws maj sab.

7 – Thaj av kub ntaiv yuav hloov ua pas dej. Lub teb chaws tuag dej yuav txhawv tej tus kaus dej txaws _txua tawm los. Thaj chaw uas hma ua zes nyob, yuav hloov ua tiaj tauj thiab tiaj ncaug zom ntawv.

Yog Tswv Ntuj Lo Lus Nws lus txiaj ntsim

Nkauj Paj Nruag KUV TUS PLIG CAV TXOG HUAB _TAIS

(NPN 146) (p3)

Txais: Kuv tus Plig, koj cav lus zoo txog Huab Tais.

1 – Huab Tais Tswv Ntuj nco ntsoov nws cov lus mus ib txhiab ib txhis.

Nws tswj txoj kev ncaj rau cov neeg uas raug luag hiam.

Nws pub rau cov neeg tshaib noj, nws tso cov neeg nyob txim.

2 – Huab Tais qhib cov neeg dig muag kom rov pom kev;

nws tsa cov neeg qaug zog. Huab Tais nyiam cov neeg ua ncaj, nws pov hwm cov pej kum neeg.

3 – Nws txhawb cov poj ntsuam thiab cov ntsuag nos. Nws mooj cov siab phem kom lawv yuam kev.

Huab Tais yog tus vaj nyob mus li. Xis Yoos, nws yog koj tus Tswv Ntuj mus tiam dhau tiam.

ZAJ NYEEM OB

YAS KOS 2 : 1-5

LUB NTSIAB LUS : Lub Koom Txoos yuav ceev faj kom txhob saib cov neeg muaj zoo dua cov neeg pluag.

COV LUS YAS KOS SAU TUAJ RAU TSOOM NTSEEG:

1 – Kwv tij, nej yog ib co neeg ntseeg txog peb tus Huab Tais Yes Xus Pleev muaj hwj chim,

mas nej txhob saib tias muaj tej tus neeg loj tej tus neeg me.

2 – Yog tias thaum sawv daws tuaj ua lub Txoos, muaj ib tug chaws los hauv tsev,

tus ntawd coj nplhaib kub, hnav tsoos tsho zoo nkauj ; hos muaj dua lwm tus kuj chaws los thiab,

tus no yog neeg pluag, nws cov ris tsho qias neeg.

3 – Nej tig ntsia tus hnav tsoos zoo nkauj, ces nej hais rau nws tias :

“Koj mus zaum ntawm lub chaw zoo !” Hos nej hais rau tus pluag tias :

“Koj sawv ntsug mog !” los hais tias :

“Koj zaum hauv no, ntawm kuv lub tog tiag taw mog !”

4 – Yog nej ua li ntawd, mas puas yog nej saib tias neeg tsis muaj nqis ib yam ?

Nej tsis ua ib yam nkaus li ib co nom txiav txim siab nkhaus thiab lod ?

5 – Kwv tij zoo nyiad, nej mloog mog !

Tswv Ntuj tsis tau xaiv cov neeg uas lub qab ntuj neeg saib lawv pluag,

kom los ua ib co neeg nplua nuj nyob hauv txoj kev ntseeg lod ?

Tswv Ntuj tsis tau xaiv lawv los ua cov txais lub Ceeb Tsheej ua lawv lub cuab tam,

raws li nws cog lus rau cov neeg nyiam nws lod ?

Yog Tswv Ntuj Lo Lus Nws lus txiaj ntsim

NTAWV MOO ZOO

MAS KOS : (7 :31-37)

LUB NTSIAB LUS : Cov neeg pom Yes Xus ua hwj huam yees ntxwv lawv zais tsis tau. Peb puas txawj pom tias niaj hnub Yes Xus ua hwj huam yees ntxwv nyob hauv peb nruab siab ? Yog peb pom, peb yuav xav cav txog Yes Xus.

COV LUS NYOB HAUV MAS KOS NTAWV MOO ZOO.

31 – Yes Xus tso Tws Los teb tseg, nws taug txoj kev hla Xis Doos mus rau dej ntuj Nkas Lis Lais, uas nyob hauv xeev Des Kas Pos Lis.

32 – Luag coj ib tug neeg lag ntseg, hais lus txhav qhi, tuaj rau Yes Xus. Lawv thov kom Yes Xus Tsa tes rau saum nws.

33 – Yes Xus coj nws tawm ntawm tsoom sid mus rau ib cag, Yes xus muab nws ntiv tes ntxig rau Tus lag ntseg ob lub qhov ntsej, nws muab aub ncaug pleev tus neeg ntawd tus nplaig.

34 – Yes Xus tsa muag ntsia saum ntuj, nws xyu ib suab, nws hais rau tus lag ntseg tias :

« Es fas tas, » txhais tias : « Koj qhib los. »

35 – Tus las ntseg ob lub qhov ntsej quib hlo, hos cov hlua khi nws tus plaig kuj plam plaws tam Sim ntawd, ces nws hais lus meej.

36 – Yes Xus txwv tsis pub lawv hais qhov ntawd rau leej twg li. Tab sis Yes Xus yim txwv, lawv yim tshaj.

37 – Qhov ntawd raug lawv siab tshaj txhua yam, ces lawv hais tias : « Nws ua tau ib puas tsav Yam zoo : nws ua kom cov lag ntseg hnov lus, thiab ua kom cov plaig txhav hais lus tau. »

Huab Tais Pleev Lub qab ntuj neeg cav txog koj

Tshaj moo qaij qaug nyob Orléans

Par Aumônerie catholique Hmong de France

YAJ Txawj Tuam

Tshaj tawm rau peb ib tsoom ntseeg sawv daws paub tias YAJ Txawj Tuam nyob lus zos Darvoy (Orléans – Loiret) tau tas sim neeg hnub tim 21/08/2024 Nws muaj li 68 xyoo.

Tsev xyom cuab yuav npaj nws lub pag lub xau rau lub week-end 07/09/2024 rau 08/09/2024 tuaj no:

Auberge de Villechaume

45 Rue de Villechaume

45240 SENNELY

Samedi 07 Septembre 2024

17H00 : Pib kab ke xa plig pem lub pompes funèbres CATON nyob JARGEAU

Dimanche 08 Septembre 2024

10H00 : Teev saw Mab Liab pem Auberge de Villechaume

20H00 : Teev Ntuj hmo kawg pem Auberge de Villechaume

Lundi 09 Septembre 2024

10H00 : Teev ntuj hauv tsev teev ntuj nyob Darvoy,

coj tus qauv mus sam sab rau tim lub cimetière nyob Darvoy

Yog nej xav tuaj pom YAJ Txawj Tuam ua zaum kawg nej tuaj pem lub Pompes funèbres CATON nyob JARGEAU:

31 Rue Faubourg Berry 45150 JARGEAU

Peb ib tsoom ntseeg pab thov ntuj rau tsev xyom cuab thiab rau YAJ Txawj Tuam tus ntsuj plig.

Nruab xyoo HNUB CHIV 22 XYOO B

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

PHAU TSIB 4 : 1-2, 6-8

LUB NTSIAB LUS : Yog tsoom neeg ntseeg mloog Tswv Ntuj cov lus qhia mas lawv yuav yog ib co neeg thoob tsib dua cov.

COV LUS NYOB HAUV NTAWV PHAU TSIB :

1 – Tsoom His Xas Lais, zaum no nej mloog txoj cai lij choj uas kuv qhia rau nej hnub no,

kom nej ua raws txoj cai lij choj ntawd. Ces nej yuav muaj txoj sia,

nej yuav mus nyob hauv1ub teb chaws uas nej cov yawg koob tus Huab Tais Tswv Ntuj muab rau nej,

kom nej tau txais los ua nej tug.

2 – Nej yuav tsis txhob ntxiv tej lo lus rau qhov kuv qhia nej ua, tsis txhob txiav ib lo lus pov tseg.

Nej yuav coj nej tus Huab Tais Tswv Ntuj cov lus qhia zoo ib yam li kuv tau ceeb toom rau nej.

6 – Nej yuav mloog yuav coj cov lus qhia ntawd, ces pej kum haiv neeg yuav pom nej yog neeg thoob tsib thiab neeg xyuam xim. Thaum lawv paub txoj cai lij choj ntawd lawm, lawv yuav tsa suab hlo tias :

“Haiv neeg loj ntawd lawv kawg yuav yog ib haiv neeg thoob tsib thiab xyuam xim xwb !”

7 – Haiv neeg twg es thiaj muaj ib co Huab Tais nyob ze ze lawv zoo li peb tus Huab Tais Tswv Ntuj nyob ze peb, thaum peb hu txog nws ?

8 – Haiv neeg twg thiaj muaj ib co cai lij choj ncaj xws li txoj cai lij choj kuv cev rau nej hnub no?

Yog Tswv Ntuj Lo Lus Nws lus txiaj ntsim

Nkauj Paj Nruag TUS COJ NCAJ

(NPN 15)

Txais: Tus neeg coj ncaj yuav tau mus nyob ntawm Huab Tais xub ntiag!

1 – Tus neeg coj tus yeeb yam tsis muaj chaw xyeej, yog tus ua ncaj rau luag, tus xav qhov tseeb tuaj nruab siab; nws tsis cia nws tus nplaig hais lus dag.

2 – Tus tsis ua phem rau luag, tus tsis ua tub qaug cov neeg nyob ze nws,

tus ntxub qhov phem thiab hwm cov neeg hwm Ntuj.

3 – Tus qiv nyiaj txiag rau luag, nws tsis tsub paj. Nws tsis txais luag nqi xiab kom muab txim rau tus tsis txhaum. Tus twg ua li no yuav nyob ruaj nreb.

ZAJ NYEEM OB

YAS KOS 1 : 17-18 + 21-22 + 27

LUB NTSIAB LUS : Tswv Ntuj cov lus uas peb txais nyob hauv peb cov Txoos teev Ntuj, peb yuav khaws tseg thiab nco ntsoov mus li nyob hauv peb tej hauj lwm.

COV LUS YAS KOS SAU TUAJ RAU TSOOM NTSEEG:

17 – Cov txiaj ntsim zoo thiab cov paj tshab tsis muaj chaw xyeej, yog tuaj saum ntuj tuaj tas huv si,

yog Leej Txiv, uas nws ua kom txhua yam pom kev, tso nqes los tas huv tib si.

Nyob hauv nws, tsis muaj ib yam txawj hloov, los txawj puas.

18 – Leej Txiv pom zoo hais ib lo lus tseeb yug peb, kom peb ua thawj cov txiv txi -hauv txhua yam uas nws tsim los.

21 – Nej yuav nrauj txhua yam tsis huv, nrauj txoj kev ua phem rau luag.

Nej qhib ib lub siab zoo txais Tswv Ntuj Lo Lus uas nws muab cog rau hauv nej.

Lo Lus ntawd yuav cawm nej tus plig.

22 – Nej coj Lo Lus mus ua neej. Nej txhob cia li mloog Lo Lus xwb, nej txhob rov dag nej.

27 – Txoj kev hwm Ntuj huv tsis lo ib yam qias, uas nyob ze ntawm peb Txiv Tswv Ntuj yog txoj no :

yog mus xyuas cov me nyuam ntsuag thiab cov poj ntsuam uas raug kev tu siab,

yog txuag yus lub siab kom txhob tsuas ib teev qias, yog nyob deb lub qab ntuj neeg.

Yog Tswv Ntuj Lo Lus Nws lus txiaj ntsim

NTAWV MOO ZOO

MAS KOS 7 : 1-8, 14-15, 21-23

LUB NTSIAB LUS : Thaum peb tseem teev dab, peb yuav tsum caiv ub caiv no kom txhob muaj txhaum. Nyem no, peb ntseeg txog Yes Xus, nws tsuas xav kom peb coj lub siab ntshiab.

COV LUS NYOB HAUV MAS KOS NTAWV MOO ZOO :

1 – Cov Fas Lis Xais thiab tus puav Kws Ntawv Ntshiab tuaj Yes Lus Xas Les tuaj,

lawv sib sau ntsauv Yes Xus.

2 – Lawv pom tus puav thwj tim xuas tes tsis huv noj mov, yam li lawv tsis xub ntxuav tes,

3 – vim tias cov Fas Lis Xais, thiab tas cov Yus Das huv tib si, mas lawv tsis noj mov yog lawv tsis xub ntxuav tes zoo zoo tso.

4 – Thaum lawv mus kav kiab kav khw rov los, yog lawv tsis tau xub pov dej rau -tso, mas lawv tsis noj mov. Tseem muaj ntau yam uas cov Yus Das ua raws li tej laus qhia kom ua :

ntxuav khob, ntxuav hub, thiab ntxuav tais tooj dag.

5 – Vim li ntawd, cov Fas Lis Xais thiab cov kws Ntawv Ntshiab thiaj nug Yes Xus tias :

« Ua cas koj cov thwj tim tsis ua raws li tej laus kev cai ib txwm qhia kom ua,

lawv cia li xuas tes tsis huv noj mov ? »

6 – Yes Xus hais rau lawv tias :

« Neeg zoo sab nraud, His Xais hais raug nej kawg, Ntawv thiaj sau tseg tias :

Haiv neeg no tsuas hwm kuv saum di ncauj, lawv lub siab nyob deb kuv.

7 – Lawv lam teev kuv dag, lawv muab neeg tej kab ke los nthuav xws li yog Ntuj lus qhia !

8 – « Nej tso Tswv Ntuj lo lus qhia tseg, nej muab nej khi rau neeg tej kev cai. »

14 – Yes Xus rov hu tsoom sid los ntawm nws, ces nws hais rau lawv tias :

« Tas nej sawv daws, nej mloog kuv kom nej to taub mog !

15 – Tsis muaj dab tsi nyob sab nraum neeg lub cev, uas nkag rau hauv neeg, yuav ua kom neeg tsis huv.

Yam ua kom neeg tsis huv yog yam tawm hauv neeg los.

21 – Vim tej yam phem uas txhawv hauv neeg nruab siab los yog :

kev ua dev ua npua, ua tub sab, tua neeg,

22 – deev luag txij nkawm, cuaj khaum, lim hiam, ua cuav,

ntxias luag ua plees ua yi, khib, xyav luag moo, muab hlob, ywj fab ywj fwj.

23 – Txhua hom kev phem no tawm sab hauv los, mas thiaj ua kom neeg tsis huv. »

Huab Tais Pleev Lub qab ntuj neeg cav txog koj

Aumônerie catholique des Hmong de France

Auteur

Author Archive by Aumônerie catholique Hmong de France

Nruab xyoo HNUB CHIV 27 XYOO B

Nruab xyoo HNUB CHIV 26 XYOO B

Tshaj moo qaij qaug nyob Caen

Nruab xyoo HNUB CHIV 25 XYOO B

Niam Mab Liab tshwm nyob Medjugorje, Bosnie-Herzégovine teb

Niam Mab Liab tshwm nyob Medjugorje, Bosnie-Herzégovine teb

Nruab xyoo HNUB CHIV 24 XYOO B

Nruab xyoo HNUB CHIV 23 XYOO B

Tshaj moo qaij qaug nyob Orléans

YAJ Txawj Tuam

Nruab xyoo HNUB CHIV 22 XYOO B