Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB   

HIS XAIS 7: 10-16

LUB NTSIAB LUS : Tus Yaj Saub His Xais, nws tshaj Tswv Ntuj cov lus 700 tawm xyoo  ua Yes Xus ntej. Nws xub hais tias ib tug hluas nkauj tsim txiaj yuav ua Leej Pleev niam.

COV LUS NYOB HAUV NTAWV HIS XAIS :

10 – HUAB TAIS kom His Xais rov mus hais rau As Kas :

11 – « Koj thov koj tus HUAB TAIS Ntuj kom nws ua ib lub cim rau koj nyob puag hauv qab ntuj txias teb tsaus, los nyob saum cov chaw siab, puag saum ub. »

12 – As Kas hais tias :

« Kuv yuav tsis thov. Kuv yuav tsis sim HUAB TAIS. »  

13 – His Xais hais tias :

« Das Vis tsev neeg, nej mloog mas !

Nej ua kom tej tib neeg sab tas nrho, los tsis txaus nej siab ! 

Nej tseem yuav ua kom Tswv Ntuj sab thiab. 

14 – Vim li ntawd, Huab Tais yuav pub ib lub cim rau nej. Nej ntsia saib !  Tus poj niam hluas xeeb tub lawm. Nws yuav yug ib tug tub. 

Nws yuav tis npe rau nws tus tub hu ua Es Mas Nus Es. 

15 – Thaum nws txawj xyeeb qhov phem thiab xaiv qhov zoo, mas nws yuav noj mis nyuj thiab zib mu.

16 – Thaum tus me nyuam tseem tsis tau txawj xyeeb qhov phem thiab xaiv qhov zoo, mas lub teb chaws uas ob tug vaj hem koj, yuav tsis muaj tus saib xyuas.

Yog Tswv Ntuj Lo Lus        Nws lus txiaj ntsim

Nkauj Paj Nruag :              QHIB ROOJ VAG TOS HUAB TAIS     

(NPN 24-1)

Txais: Nej qhib lub rooj vag rau Huab Tais chaws los vim nws yog tus vaj nto koob meej.

1 – Lub ntiaj teb thiab txhua yam uas nyob hauv lub sim ceeb yog Huab Tais li.

Lub qab ntuj khwb thiab tas tsoom neeg nyob hauv yog Huab Tais tug.

Huab Tais yog tus txawb lub ntiaj teb rau saum dej hiav txwv.

Nws tsa lub ntiaj teb ruaj rau saum npoo dej.

2 – Leej twg thiaj yuav tau nce mus saum Huab Tais lub roob?

Leej twg thiaj yuav sawv taus nyob hauv nws lub chaw ntshiab?

Yog tus neeg siab huv tes tsis lo txhaum,

tus uas lub siab tsis xib rau qhov phem,

tus tsis twv ntuj twv teb cog lus cuav.

3 – Nws yuav tau txais Huab Tais lo lus foom hmoov zoo

uas yog txiaj ntsim paj tshab tuaj ntawm nws tus Huab Tais Cawm Seej tuaj.

Haiv neeg nrhiav Tswv Ntuj yuav tau txais nws tej paj tshab

vim lawv nrhiav Yas Kos tus Tswv Ntuj lub ntsej muag.

ZAJ NYEEM OB   

LOS MAS 1: 1-7

LUB NTSIAB LUS : Tswv Ntuj leej Tub yuav ib lub cev neeg. Nws yog tus vaj Das Vis ib tug xeeb ntxwv.

COV LUS PAJ LUG SAU TUAJ RAU COV LOS MAS :

1 – Kuv yog Paj Lug, Yes Xus Pleev tus tub txib. Ntuj hu kuv los ua Hauv Paus Xa Lus,

Ntuj qee kuv los tshaj Tswv Ntuj lub Moo Zoo. 

2 – Tau ntev los lawm Tswv Ntuj tau cog lus  tias  nws yuav xa nws lub Moo Zoo,

3 – nws tso cov Yaj Saub thiab cov Ntawv Ntshiab tuaj hais txog nws Leej Tub,

uas yug hauv  Das  Vis  caj  ces  los.  

4 – Leej Ntuj Plig Ntshiab tsa peb tus Huab Tais Yes Xus Pleev uas tuag lawd kom sawv rov los ua Tswv Ntuj Leej Tub muaj hwj huam. 

5 – Peb txais txiaj ntsim ntawm Yes Xus los, nws tsa peb ua Hauv Paus Xa Lus kom peb mus tshaj txoj kev mloog lus, thiab txoj kev ntseeg rau cov pej kum neeg paub. 

6 – Nej kuj yog pab neeg ntawd :  Yes Xus Pleev hu nej los ua nws tug.

7 – Kuv, Paj Lug, sau ntawv tuaj rau nej, uas nej yog cov neeg Tswv Ntuj nyiam nyob Los Mas, 

nws hu nej los ua neeg ntshiab :

thov kom peb Txiv Tswv Ntuj, thiab Huab Tais Yes Xus Pleev pub txiaj ntsim thiab  kev thaj yeeb rau  nej.

Yog Tswv Ntuj Lo Lus        Nws lus txiaj ntsim

NTAWV MOO ZOO

MAS TAIS 1: 18-24

LUB NTSIAB LUS : Yes Xus yug ntawm Mab Liab, yog thaum Yos Xes qhaib Mab Liab lawm.

COV LUS NYOB HAUV MAS TAIS NTAWV MOO ZOO :

18 – Yes Xus  Pleev  lub  keeb  chiv  zoo li no : 

 Mab Liab uas yog Yes Xus niam, lawv muab qhaib rau Yos Xes lawm. 

 Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub. 

19 – Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv  txog Mab Liab, ces nws txiav siab nrauj Mab Liab twj ywm. 

20 – Thaum nws txiav siab nrauj li ntawd, Huab Tais tus Tshiab tawm los ua npau suav rau nws, thiab hais rau nws tias :

« Yos Xes, Das Vis leej tub, koj txhob ntshai coj Mab Liab, koj tus poj niam, los nyob hauv koj tsev. 

Yog Leej Ntuj Plig Ntshiab ua kom nws xeeb tub. 

21 – Nws yuav yug ib tug tub, koj yuav tis nws npe hu ua Yes Xus vim nws yuav cawm nws haiv neeg ntawm lawv cov txhaum. »

22 – Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg

tias :      

23 – Tus ntxhais nkauj xwb  yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es, txhais tias : « Tswv Ntuj nrog peb nyob ».

24 – Thaum Yos Xes tsim los, nws ua raws li Huab Tais tus Tshiab qhia rau nws :

nws coj nws poj niam los nyob hauv nws tsev. 

Huab Tais Pleev      Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB  

HIS  XAIS  35:1-6, 10

LUB NTSIAB LUS : Nej ntsia nej tus Huab Tais tuaj cawm nej.

COV LUS NYOB HAUV NTAWV HIS XAIS :

1 – Cov teb chaws suab puam thiab teb quav poj, nej kaj tsij zoo siab mog. 

Lub tiaj maj sab, koj kav tsij dhia daj dhia luag, thiab tawg paj xws li cov paj iab,

tawg ib phaum tas, ib phaum tuaj ! 

Kom nws  kav tsij dhia hom khaj zoo siab luag ntxhwb ntxhi, ua suab ntas ntua. 

2 – Ntuj pub Lis Npas lub koob meej rau lub tiaj maj sab.

Lawv yuav pom Lis Npas lub koob meej, yuav pom peb tus Tswv Ntuj lub hwj chim ci ntsa iab.

3 – Nej ua kom cov tes qaug zog rov muaj zog, ua kom cov hauv caug ntshaus raws rov khov.

4 – Nej hais rau cov siab muag tias : « Nej ua siab loj ! Nej txhob ntshai !

Ntsia saib ! Nej tus Tswv Ntuj nyob ntawm no ! »

Kev rob caub tab tom tuaj, Tswv Ntuj cov txim pauj neeg cov txhaum tuaj cawm peb. 

5 – Ces cov dig muag ob lub qhov muag rov rua hlo, cov pob ntseg lag yuav qhib plho.

6 – Tus neeg ceg tawv dhia nrawm xws li tus muas lwj.  Tus nplaig txhav qw tej suab zoo siab. 

Vim ib co dej txhawv hauv cov teb chaws suab puam los, tej tus dej ntws hla cov teb chaws maj sab.

10 – Cov neeg uas HUAB TAIS txhiv yuav rov qab los, lawv yuav chaws mus hauv Xis Yoos thiab nqua suab zoo siab, ib txog kev zoo siab ib txhiab ib txhis roos lawv taub hau. 

Kev luag ntsuag qees thiab kev lom zem ua lawv luag, kev iab kev khwv thiab kev ntsaj ploj ntais mus.

Yog Tswv Ntuj Lo Lus        Nws lus txiaj ntsim

Nkauj Paj Nruag :              HUAB TAIS, KOJ TUAJ CAWM            

(NPN 146)

Txais: Huab Tais, koj tuaj cawm peb mas!

1 – Huab Tais Tswv Ntuj nco ntsoov nws cov lus mus ib txhiab ib txhis.

Nws tswj txoj kev ncaj rau cov neeg uas raug luag hiam.

Nws pub rau cov neeg tshaib noj, nws tso cov neeg nyob txim.

2 – Huab Tais qhib cov neeg dig muag kom rov pom kev;

nws tsa cov neeg qaug zog.

Huab Tais nyiam cov neeg ua ncaj, nws pov hwm cov pej kum neeg.

3 – Nws txhawb cov poj ntsuam thiab cov ntsuag nos.

Nws mooj cov siab phem kom lawv yuam kev.

Huab Tais yog tus vaj nyob mus li.

Xis Yoos, nws yog koj tus Tswv Ntuj mus tiam dhau tiam.

ZAJ NYEEM OB   

YAS  KOS  5:  7-10

LUB NTSIAB LUS : Nej ua neeg muaj lub siab ruaj nreb, vim lub caij Huab Tais yuav tawm tuaj txog ze lawm.

COV LUS YAS KOS SAU TUAJ NTUAS TSOOM NTSEEG :

7 – Kwv tij zoo nyiam, nej yuav ua siab ntev, mus txog lub caij Huab Tais los txog. 

Nej ntsia tus tswv liaj saib : txij thaum pib los thawj phaum nag mus txog lub caij ntuj nag tu,

nws ua siab ntev tos cov qoob tawm hauv av tuaj. 

8 – Nej kuj yuav ua siab ntev, thiab nej ua neeg siab ruaj, vim lub caij Huab Tais yuav rov los twb ze lawm. 

9 – Kwv tij, nej ib tug txhob yws txog lwm tus, Ntuj thiaj yuav tsis txiav txim rau nej.  

Tus txiav txim twb nyob ze ntawm qhov rooj lawm. 

10 – Kwv tij, nej yuav muab Huab Tais cov Yaj Saub los ua ib tug piv txwv rau nej yoog. 

Nej yuav ua siab ntev ris txoj kev txom nyem xws li lawv. 

Yog Tswv Ntuj Lo Lus        Nws lus txiaj ntsim

NTAWV  MOO  ZOO       

MAS  TAIS 11:  2-11

LUB NTSIAB LUS : Yes Xus cav lus zoo txog tus Zam Ntxuav Plig tias nws yog tus tiam lis xub tuaj qhia tsoom sid kom npaj siab tos Yes Xus.   

COV LUS NYOB HAUV MAS TAIS NTAWV MOO ZOO :

2 – Thaum ntawd, Zam nyob hauv tsev loj faj, nws hnov hais txog Leej Pleev cov hauj lwm. 

Zam xa nws ib co thwj tim tuaj nug Yes Xus tias :

3 – « Koj puas yog tus yuav tuaj ? 

Los peb tseem yuav tos dua lwm tus ? »

4 – Yes Xus teb rau lawv tias :

« Nej rov mus qhia qhov nej hnov thiab qhov nej pom rau Zam :

5 – cov dig muag rov pom kev, cov ceg tawv mus taus kev, cov mob ruas rov huv lawm, cov lag ntseg hnov lus, cov tuag sawv rov los, cov pluag tau hnov lub Moo Zoo lawm.  

6 – Tus uas nws tsis ntog vim kuv, mas nws txoj hmoov zoo. »   

7 – Thaum Zam cov thwj tim rov mus lawm, Yes Xus hais txog Zam rau cov pab neeg li no :

« Nej mus xyuas dab tsi hauv teb chaws suab puam ?

 Nej puas mus xyuas ib tsob tauj raug cua nplawm ?

8 – Nej tawm mus xyuas dab tsi ?  Puas yog mus xyuas ib tug neeg hnav tsoos tsuj tsoos npuag ? 

 Tab sis cov neeg hnav tsoos tsuj tsoos  npuag nyob hauv vaj ntxwv tej tsev xwb. 

9 – Ua li mas nej tawm mus xyuas dab tsi ? 

Puas yog  mus xyuas ib tug yaj saub ? 

Muaj tseeb tiag, kuv hais rau nej tias nws tseem loj dua ib tug yaj saub. 

10 – Ntawv sau  txog nws li no :

 Kuv tso kuv tus tub xa xov mus ua koj ntej, nws yuav npaj txoj kev tom koj hauv ntej.

11 – Kuv hais tseeb rau nej, tas cov tub uas tsoom poj niam yug huv tib si, tsis muaj ib tug sawv loj dua Zam Ntxuav Plig. 

Tab sis, tus me tshaj hauv Ntuj lub Ceeb Tsheej, tseem loj dua Zam thiab. 

Huab Tais Pleev      Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB   

HIS XAIS 11: 1-10

LUB NTSIAB LUS : Tus Huab Tais tuaj nrog peb nyob nws txiav txim ncaj rau cov neeg pluag. Nws pub kev thaj yeeb rau sawv daws.

COV LUS NYOB HAUV NTAWV HIS XAIS :

1 – Ib tug ceg yuav hlav ntawm Yes Xes lub hauv paus los, ib tug ntsuag yuav hlav ntawm Yes Xes cov cag los. 

2 – HUAB TAIS lub tswv yim yuav nyob txawm saum nws. Yog ib lub tswv yim thoob tsib thiab ntse, ib lub tswv yim pab xav tom ntej tom qab thiab pab ua siab loj, ib lub tswv yim paub txuj thiab hwm HUAB TAIS. 

3 – Nws yuav nrhiav kev hwm HUAB TAIS. 

Nws yuav tsis txiav txim raws li qhov muag pom sab nraud, nws yuav tsis xaiv kev taug raws li hnov lus moo cua hais. 

4 – Nws yuav  txiav txim ncaj rau cov tsis muaj zog, nws yuav pab cov neeg hauv txheej qis nyob hauv lub teb chaws, nws lub ncauj cov lus txiav yuav ntaus cov siab ceev, nws di ncauj yuav tshuab pa tua cov lim hiam.   

5 – Kev ncaj yuav yog nws txoj siv sia duav, kev hais qhov muaj tseeb yuav yog nws txoj siv sia ntawm ntsag.

6 – Tus hma yuav nrog tus thav yaj nyob, tus tsov pom txwv yuav nrog tus thav tshis nyob ib nkuaj. 

Tus xyuas nyuj thiab tus tsov ntxhuav yuav ua ke nog zaub, ib tug me nyuam tub yuav caij nkawd.

7 – Tus maum nyuj thiab tus maum dais ntaus phooj ywg, nkawd cov me nyuam yuav nyob hauv ib lub nkuaj, tus tsov ntxhuav yuav noj quav nplej xws li tus nyuj. 

8 – Tus me nyuam mos yuav ua si nyob ze ntawm tus nab liab tsaig, tus me nyuam nyuam qhuav cais mis yuav cev tes mus hauv nab ntsuab lub qhov.

9 – Nyob saum kuv lub roob ntshiab, yuav tsis ua phem tsis ua nkhaus, vim kev paub HUAB TAIS yuav nyob puv ntiaj teb, ib yam li dej vov lub hiav txwv.

10 – Hnub ntawd, Yes Xes lub hauv paus yuav sawv xws li ib tug chij hu tas txhia haiv neeg.

11 – Hnub ntawd, Huab Tais yuav rov tsa nws txhais tes kom tau cawm cov seem nyob hauv nws haiv neeg.

Yog Tswv Ntuj Lo Lus        Nws lus txiaj ntsim

Nkauj Paj Nruag :              TUS VAJ PUB KEV THAJ YEEB           

(NPN 72-1)

Txais: Lub caij nws ua vaj, txoj kev haum pheej tawg paj,

lub qab ntuj neeg nyob thaj yeeb tsis muaj caij kawg.

1 – Tswv Ntuj, thov koj pub txoj kev haum pheej rau tus vaj,

thov koj pub txoj kev ncaj rau vaj ntxwv leej tub

kom nws tswj koj haiv neeg raws kev ncaj,

kom nws kav cov neeg me raws kev haum pheej.

2 – Lub caij nws ua vaj, txoj kev haum pheej tawg paj,

yuav muaj kev thaj yeeb mus txog thaum tsis muaj lub hli.

Nws yuav ua vaj kav txhua lub hiav txwv,

nws yuav kav txij tus Niam Dej mus txog npoo ntiaj teb kawg.

3 – Nws yuav npo tus pluag uas hu txog nws;

nws yuav cawm cov neeg me uas tsis muaj chaw khaub zig.

Nws yuav hlub tus pluag thiab tus neeg me tsis muaj tsim;

nws yuav cawm cov pluag txoj sia.

4 – Thov kom nws lub npe nto koob meej mus ib txhiab ib txhis,

kom nws lub npe nyob ntev li lub hnub.

Ib tsoom neeg yuav tau txais txoj hmoov zoo nyob hauv nws lub npe.

Txhua haiv neeg yuav tshaj tias nws txoj hmoov zoo.

ZAJ NYEEM OB

LOS MAS 15 : 4-9

LUB NTSIAB LUS : Yes Xus tau ua siab ntev vim nws xav cawm sawv daws. Peb yuav ua siab ntev raws li Yes Xus tus piv txwv.

COV LUS PAJ LUG SAU TUAJ RAU COV NTSEEG NYOB LOS MAS :

4 – Tas txhua yam thaud, lawv muab sau tseg, mas yog vim lawv xav qhia peb : 

Ntawv qhia  kom paub Tswv Ntuj lub siab ntev, paub Tswv Ntuj txoj kev nplij neeg, peb thiaj tso siab rau Ntuj. 

5 – Kuv thov tus Tswv Ntuj siab ntev txawj nplij neeg zoo li ntawd, kom nws ua peb lub siab ntshaw sib nyiam sib hlub raws li Yes Xus Pleev tus lwj lwm.

6 – Ces nej yuav koom siab koom ntsws, thiab koom suab hu nkauj cav txog Tswv Ntuj uas yog peb tus

Huab Tais Yes Xus Pleev Leej Txiv.

7 – Ua li mas, nej ib leeg yuav txais ib leeg zoo, xws li Yes Xus tau txais nej tuaj hwm Tswv Ntuj. 

8 – Kuv hais tias, thaum Yes Xus Pleev tuaj nws tau pab haiv His Xas Lais, vim nws xav kom Tswv Ntuj nto moo tias Tswv Ntuj siab ncaj, nws xav ua kom muaj raws li Tswv Ntuj tau cog lus rau cov yawg koob His Xas Lais. 

9 – Nyem no, tas txhia haiv neeg thiaj cav txog tus Tswv Ntuj khuv leej neeg. Raws nraim li Ntawv lo lus hais tias :

‘Kuv yuav cav txog koj nyob hauv nruab nrab txhua haiv neeg, kuv yuav hu nkauj cav txog koj lub npe.’ 

Yog Tswv Ntuj Lo Lus        Nws lus txiaj ntsim

NTAWV MOO ZOO        

MAS TAIS 3 : 1-12

LUB NTSIAB LUS : Nej sawv daws kav tsij hloov siab, vim Ntuj lub Ceeb Tsheej tuaj txog ze lawm.

COV LUS NYOB HAUV MAS TAIS NTAWV MOO ZOO :

1 – Muaj ib ntus, Zam Ntxuav Plig  mus ntuas tsoom sid nyob hauv teb chaws suab puam Yus Das. 

2 – Nws hais tias :

« Nej hloov siab mog, vim Ntuj lub Ceeb Tsheej los txog ze lawm. » 

3 – Nws yog tus uas yaj saub His Xais hais txog tias :

Tus qw hauv teb chaws quav poj lub suab hais tias :

Nej npaj txoj kev rau Huab Tais, nej ua kom nws txoj kev ncaj tuaj.

4  – Zam cov ris tsho yog xuas plaub ntxhuav ua, nws sia ib daim siv tawv tsiaj ncig nws lub duav. 

Nws noj kooj thiab zib mu qus. 

5 – Tas cov nyob Yes Lus Xas Les, cov nyob Yus Das teb, thiab cov nyob ib thaj tsam raws tus dej Yos Las Das puav leej tuaj cuag Zam. 

6 – Lawv lees txhaum, thiab thov nws ntxuav lawv nyob hauv tus dej Yos Las Das.

7 – Thaum Zam pom coob tus Fas Lis Xais thiab ntau tus Xas Dus Kais tuaj txais kab ke ntxuav, nws hais rau lawv tias :

« Caj ces nab muaj taug, leej twg qhia nej khiav kom nej dim ntawm Ntuj Txoj Kev Npau Taws uas tuaj yuav txog ? 

8 – Nej  kav tsij txi ib co txiv tsim nyog tus neeg hloov siab. 

9 – Nej txhob khav rau nruab siab tias: 

‘Peb muaj Has Nplas Has ua peb txiv.’ 

Kuv hais rau nej tias, Tswv Ntuj yuav ua kom Has Nplas Has ib co xeeb ntxwv tawm hauv cov pob zeb no los kuj tau. 

10 – Zaum no, rab taus twb nyob ntawm cag ntoo lawm, tsob ntoo twg tsis txi txiv zoo, yuav tsum muab txiav pov hlawv hauv hluav taws.

11 – Ntawm kuv, mas kuv ntxuav nej nyob hauv dej kom nej tig los yuav ib lub siab tshiab ;

hos tus lawv kuv qab tuaj, nws muaj zog dua kuv, kuv tsis tsim nyog hle nws nkawm khau. 

Tus ntawd yuav ntxuav nej nyob hau Leej Ntuj Plig Ntshiab thiab nyob hauv hluav taws.

12 – Nws txhais tes tuav rawv ib lub vab, nws yuav ntxuaj nws lub tshav ntaus nplej. 

Nws yuav yawm cov nplej qoos rau hauv txhab, hos cov npluag, nws yuav muab hlawv hauv cov hluav taws tsis txawj tuag. »

Huab Tais Pleev      Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB    

HIS XAIS 2 : 1-5

LUB NTSIAB LUS : Huab Tais Tswv Ntuj sau tas txhia haiv neeg los nyob hauv txoj kev thaj yeeb, nyob hauv Tswv Ntuj lub Ceeb Tsheej.

COV LUS NYOB HAUV NTAWV HIS XAIS :

1 – Lo Lus ua tus Yaj Saub His Xais,

As Mos tus tub paub txog Yus Das teb thiab Yes Lus Xas Les.

2 – Yav tom ntej, yuav muaj ib hnub lub roob uas HUAB TAIS tsa tsev nyob yuav txawb saum cov

roob lub ncov, nws yuav sawv siab dua cov pov roob. Tas ib tsoom kuj cuab yuav khiav ua npoj ntws tuaj saum HUAB TAIS lub roob ;           

3 – ntau haiv neeg yuav tuaj.  Lawv yuav hais tias :

« Nej tuaj ! Peb nce mus pem Yas Kos tus Tswv Ntuj lub tsev !  Kom nws qhia nws tej kev rau peb,

thiab kom peb mus taug nws tej kev. »

4 – Tswv Ntuj yuav txiav txim hauv nruab nrab cov kuj cuab. Nws yuav xaiv nyob hauv ntau haiv neeg.

Lawv yuav muab lawv rab ntaj ob sab ntse los ntaus ua voom, muab lawv rab hmuv ntaus ua liag.

Thaum ib lub kuj cuab sawv los ntaus lwm lub kuj cuab, lawv yuav tsis tsa rab ntaj ob sab ntse. 

Lawv yuav tsis kawm kev ntaus rog ntxiv.   

5 – Cov His Xas Lais sawv daws, nej tuaj !

Peb mus taug Tswv Ntuj txoj kev kaj lug.

Yog Tswv Ntuj Lo Lus        Nws lus txiaj ntsim

Nkauj Paj Nruag:   PEB MUS PEM HUAB TAIS TSEV        

(NPN 122-1)

Txais:  Nej tuaj, peb sawv daws zoo siab hom khaj nyob hauv Huab Tais tsev.

1 – Thaum kuv hnov lawv hais tias,

“Peb mus pem Huab Tais tsev,” kuv zoo siab hlo.

Yes Lus Xas Les, peb nres ntawm koj cov qhov rooj lawm.

2 – Yes Lus Xas Les, koj yog lub tsheej nyob ruaj nreb muaj hwj chim.

Txhua xeem hauv Huab Tais haiv neeg nce tuaj hauv lub tsheej.

3 – Tas txhua xeem nce tuaj raws li His Xas Lais txoj cai.

Lawv tuaj cav txog Huab Tais lub npe

vim cov theej kiab txiav txim ncaj nyob hauv koj,

yog cov theej kiab hauv Das Vis tsev neeg.

4 – Thov kom Yes Lus Xas Les tau nyob thaj yeeb,

kom cov phooj ywg tau nyob tiaj tus,

kom muaj kev thaj yeeb nyob hauv koj cov ntsa loog

thiab muaj kev tiaj tus nyob hauv koj cov tuam tsev.”

5 – Kuv hais rau kuv cov kwv tij phooj ywg hais tias,

“Thov kom kev thaj yeeb roos nej.

Vim kuv nyiam peb tus Huab Tais Tswv Ntuj lub tsev,

kuv thov kom nej tau nyob kaj lug.”  

ZAJ NYEEM OB  

LOS MAS 13, 11-14

LUB NTSIAB LUS : Txoj kev cawm peb nyob ze lawm. Peb kav tsij taug txoj kev cawm neeg mas !

COV LUS PAJ LUG SAU TUAJ RAU COV NTSEEG NYOB LOS MAS :

11  – Nej paub tias nyem no txog lub caij peb yuav tsim hauv nruab dab ntub los. 

Nyem no tus cawm peb tuaj txog ze peb dua hnub peb pib ntseeg. 

12 – Nyem no, hmo yuav dhau, twb yuav kaj ntug. Peb tso txoj hauj lwm tsaus ntuj pov tseg. 

Peb tuav ntaj tuav hmuv mus ua rog nyob hauv qhov pom kev. 

13 – Peb yuav coj ib tug cwj pwm muaj tsim, thiaj li phim cov neeg ua neej nruab hnub. 

Peb tsis txhob ua neeg hu dab, txhob quav dej quav cawv, txhob ua plees ua yi, txhob ua yam qias, txhob sib ceg sib khib. 

14 – Nej hnav peb tus Huab Tais Yes Xus Pleev. Nej tsis txhob ntxhov siab txog nej lub cev, thiab  txhob ua raws lub cev ntshaw.  

Yog Tswv Ntuj Lo Lus        Nws lus txiaj ntsim

NTAWV MOO ZOO       

MAS TAIS        24 : 37-44

LUB NTSIAB LUS : Peb niaj hnub npaj siab tos Huab Tais.

COV LUS NYOB HAUV MAS TAIS NTAWV MOO ZOO :

37 – “Lub caij Neeg Leej Tub yuav rov los nyob, yuav zoo li thaum Nos Hes ua neej nyob. 

38 – Thaum dej tsis tau nyab ntiaj teb, sawv daws noj, sawv daws haus, sawv daws yuav poj niam thiab muab tej ntxhais pub tshoob mus txog hnub. Nos Hes nkag mus hauv lub nkoj. 

39 – Zeej tsoom tsis nco faj txog dab tsi mus txog thaum dej tuaj nyab kiag, thiab tshoob sawv daws tas huv tib si. Thaum Neeg Leej Tub yuav rov los nyob, kuj yuav zoo li ntawd thiab. 

40 – Ces ob tug neeg uas nyob tom liaj, luag yuav coj ib tug mus, tseg lwm tus. 

41 – Ob tug poj niam uas tab tom zom zeb, luag yuav coj ib tug mus, tseg lwm tus.

42 – “Nej zov hmo mog, vim nej tsis paub hnub twg nej tus Huab Tais yuav los.   

43 – Nej yuav to taub tias : yog tus tswv tsev paub tias hmo ntuj, lub sij hawm twg tub sab yuav tuaj,

mas nws yuav zov hmo, tsis cia tub sab tho qhov tsev.       

44 – Nej kuj yuav ua li ntawd, nej yuav sawb sim kom txhij, vim Neeg Leej Tub yuav los lub sij hawm uas nej tsis nco faj.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

                                                                   Hwm Yes Xus ua Vaj.

ZAJ NYEEM IB                            

2 XAS MUAS _5 : 1-3.

LUB NTSIAB LUS : _Thaum cov txwj _laug His Xas Lais tuaj thov kom Das Vis ua lawv tus Vaj, lawv tsuas pom tias Das Vis txawj coj lawv mus ntaus rog. Tab sis Das Vis yuav ua kom lawv paub Tswv Ntuj zoo. Ntau leej thaum lawv xaiv Yes Xus ua lawv tus Vaj, lawv tseem tsis tau paub tias Yes Xus yuav coj lawv mus taug txoj kev twg.

COV LUS NYOB HAUV NTAWV XAS MUAS PHAU OB:

1 – Cov xeem His Xas Lais tib si tuaj cuag Das Vis nyob Hes Nploos. Lawv hais rau nws tias : « Peb nrog koj koom ib co pob txha ib ce nqaij. 

2 – Yav thaud, Xas Ws ua vaj, twb yog koj coj His Xas Lais mus los. 

HUAB TAIS tau hais rau koj tias :

koj yuav coj kuv tsoom pej xeem His Xas Lais mus nog zaub. Koj yuav ua His Xas Lais tus tswv. »

3 – Tsoom txwj laus His Xas Lais thiaj tuaj _cuag Das Vis nyob Hes Nploos. 

Tus vaj Das Vis nrog lawv cog lus nyob Hes Nploos, nyob ntawm Tswv Ntuj xub ntiag. 

Lawv pleev roj tsa Das Vis ua vaj His Xas Lais. 

Yog Tswv Ntuj Lo Lus        Nws lus txiaj ntsim

Nkauj Paj Nruag :              PEB MUS PEM HUAB TAIS TSEV                    

(NPN 122-2) (Zaj 203)

Txais: Nej tuaj, peb sawv daws zoo siab hom khaj nyob hauv Huab Tais tsev.

1 – Thaum kuv hnov lawv hais tias,

“Peb mus pem Huab Tais tsev,” kuv zoo siab hlo.

Yes Lus Xas Les, peb nres ntawm koj cov qhov rooj lawm.

2 – Yes Lus Xas Les, koj yog lub tsheej nyob ruaj nreb muaj hwj chim.

Txhua xeem hauv Huab Tais haiv neeg nce tuaj hauv lub tsheej.

3 – Tas txhua xeem nce tuaj raws li His Xas Lais txoj cai.

Lawv tuaj cav txog Huab Tais lub npe

vim cov theej kiab txiav txim ncaj nyob hauv koj,

yog cov theej kiab hauv Das Vis tsev neeg.

ZAJ NYEEM OB               

KOS LOS XAIS _1 : _12-20

LUB NTSIAB LUS : Yes Xus yog tus ua thawj loj tshaj tas txhia yam, yog lub taub hau coj lub Koom Txoos. Yes Xus coj ntiaj teb neeg mus taug ib txog kev tshiab.

COV LUS PAJ LUG SAU TUAJ RAU COV NTSEEG NYOB KOS LOS XAIS.

12 – Ua li mas, nej yuav zoo siab ua nej Txiv tsaug, vim nej Txiv hu nej los nrog nws cov ntshiab koom

txais ib txog hmoov nyob hauv qhov pom kev. 

13 – Huab Tais Leej Txiv rho peb ntawm lub Ceeb Tsheej tsaus ntuj los.  

Nws coj peb los nyob hauv nws Leej Tub lub Ceeb Tsheej. 

14 – Nyob hauv Leej Tub, peb tau txoj kev cawm, thiab txoj kev zam txhaum.

15 – Yes Xus yog tus Tswv Ntuj uas qhov muag pom tsis tau tus duab. 

Nws yog tus xub yug ntawm txhua tsav txhua yam uas Ntuj tsim los. 

16 – Nyob hauv Leej Pleev, Ntuj tsim txhua yam nyob saum ntuj thiab nyob ntiaj teb no,

tsim txhua yam pom tau thiab pom tsis tau, tsim txhua tus Tshiab zaum saum theej kiab,

thiab txhua tus Tshiab ua Huab Tais, ua Vaj Txheeb, thiab muaj hwj huam. 

Ntuj tsim tas puas tsav yam nyob hauv Leej Pleev, kom lawv tsob hwb Leej Pleev. 

17 – Leej Pleev xub nyob dua txhua tsav txhua yam. Tas puas tsav yam muaj txoj sia nyob hauv Leej Pleev. 

18 – Leej PLeev yog lub Taub Hau nyob saum lub Cev :

lub Cev yog lub Koom Txoos. Leej Pleev yog lub Hauv Paus, nws yog tus xub yug hauv cov tub tuag los. 

19 – Tswv Ntuj muab txhua yam uas zoo tshaj, coj los nyob hauv Leej Pleev. 

20 – Nyob hauv Leej Pleev, Tswv Ntuj xyiv fab hlo rov nrog tas txhua tsav txhua yam sib haum xeeb.

Vim Leej Pleev, mas txhua tsav txhua yam nyob ntiaj teb thiab nyob saum ntuj rov tau nyob thaj yeeb hauv Leej Pleev cov ntshav uas ntws saum ntoo cuam.

Yog Tswv Ntuj Lo Lus        Nws lus txiaj ntsim

NTAWV MOO ZOO            

LUS KAS _23 : 35-43.

LUB NTSIAB LUS:    Yes Xus yog ib tug Vaj tuaj yeem tuag kom tau pab nws haiv neeg. Nws yog tus Vaj coj cov neeg txhaum mus pem lub Ceeb Tsheej Ntshiab.

COV LUS NYOB HAUV LUS KAS NTAWV MOO ZOO:

35 – Tsoom pej xeem sawv ntsug ntawd ntsia. Cov thawj coj hnyos Yes Xus, lawv hais tias :

« Nws cawm tau luag tej. Yog tias nws yog Tswv Ntuj Leej Pleev thiab tus Xaiv tiag,

kom nws rov cawm nws mas ! »

36 – Cov tub rog kuj thuam Yes Xus. Lawv txav los, lawv cev ib co dej qaub rau Yes Xus.

37 – Lawv hais tias : « Saib koj yog cov Yus Das tus vaj no, koj cia li cawm koj mas ! » 

38  – Tseem muaj ib co npe ntawv sau nyob siab me ntsis saum Yes Xus taub hau, hais tias :

« Tus no yog cov Yus Das tus Vaj. »

39 – Ob tug neeg phem dai saum ntoo cuam, muaj ib tug tsawm Yes Xus tias :

« Koj tsis yog Leej Pleev lod ? _Koj rov cawm koj, thiab cawm wb mas. » 

40 – Tab sis lwm tus qhib ncauj hais lus, nws cem tias :

« Koj tseem tsis ntshai Tswv Ntuj lod ? _Koj twb raug tib lub txim zoo li nws thiab ! 

41 – Wb mas, wb lub txim yog txoj kev ncaj, vim wb tau ua tej yam tsim nyog raug txim. 

Hos nws tsis tau ua dab tsi phem li. » 

42 – Ces nws hais tias :

« Yes Xus, thaum koj mus txog hauv koj lub Ceeb Tsheej, thov koj nco txog kuv. »

43 – Ces Yes Xus hais rau nws tias : « Kuv hais tseeb rau koj :

Hnub no, koj yuav nrog kuv nyob hauv lub Nras Lom Zem. »

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB                 

MAS LAS KIS  3:19-20.

LUB NTSIAB LUS :   Thaum Yes Xus yuav rov tuaj mas nws yuav zoo li lub hnub hlawv cov neeg nkhaus thiab kaj cov neeg siab ncaj.

COV LUS NYOB HAUV NTAWV MAS LAS KIS:

19 – Vim nyem no Huab Tais lub Hnub Nyoog tawm tuaj ntaiv cuag li ib lub qhov txog, 

mas cov neeg siab phem yuav zoo li ib co quav nyab. Lub Hnub Nyoog uas tuaj yuav txog ntawd, _yuav hlawv lawv tas huv tib si, kom tsis txhob tshuav ib tug kav los ib tug cag.   

20 – Tab sis nej cov uas hwm kuv lub npe, thaum lub Hnub Pub Kev Ncaj yuav ci tuaj,

mas nws yuav xa txoj kev ncaj tuaj rau nej. Nws cov sab hnub yuav coj kev cawm neeg tuaj rau nej. »

Yog Tswv Ntuj Lo Lus        Nws lus txiaj ntsim

Nkauj Paj Nruag:              HUAB TAIS TUAJ KAV LUB NTIAJ TEB                    

(NPN 98-3) (Zaj 202)

Txais: Huab Tais tuaj kav lub ntiaj teb, nws kav lub qab ntuj neeg nyob hauv txoj kev haum pheej.

1 – Nej ntaus nkauj nog ncas cav txog Huab Tais!

Nej ntaus nkauj nog ncas ntxuag suab thaj cheej!

Nej tshuab xyu tshuab hom ntxuag suab kub nyuj!

Nej dhia hom khaj cav txog tus vaj vim nws yog peb tus Huab Tais.

2 – Dej ntuj thiab tej tsiaj nyob nruab deg,

nej rag kev lom zem nroo ntws mog!

Lub sim ceeb thiab tsoom neeg nyob ntiaj teb,

nej nqaum paj nqaum nruas lom zem.

Tej me dej, nej ntas nrov nroo ntws.

3 – Cov toj roob hauv pes,

Nej qw suab hom khaj nyob ntawm Huab Tais xub ntiag

vim nws tuaj kav lub ntiaj teb.

Nws yuav tswj lub qab ntuj neeg nyob hauv txoj kev haum pheej.

ZAJ NYEEM OB               

2 TES XAS LOS NIS _3 : 7-12.

LUB NTSIAB LUS : Sawv daws yuav muab siab rau ua hauj lwm kom txhob noj luag zog luag mov.

COV LUS PAJ LUG SAU TUAJ RAU COV NTSEEG NYOB TES XAS LOS NIS.

7 – Vim nej paub zoo tias, nej yuav yoog peb li cas. Thaum peb nyob tim nej, peb tsis tau coj lub neej tsis haum txoj cai. 

8 – Peb tsis tau kom leej twg pub mov rau peb noj dawb :       

peb tau ua hauj lwm nruab hnub hmo ntuj ; peb tau khwv iab khwv daw, vim peb tsis xav ua ib lub nra hnyav rau nej leej twg ris. 

9 – Tsis yog vim peb tsis muaj cai kom nej saib peb hnyav, tab sis, yog vim peb xav muab ib tug piv txwv rau nej yoog. 

10 – Thaum peb tseem nyob ze nej, peb kuj tau tsa ib txog cai tias, yog muaj ib tug neeg tsis kam ua hauj lwm, mas nws tsis txhob noj mov thiab. 

11 – Tiam sis nyem no, peb hnov tias, nyob tim nej muaj tej tus coj lub neej tsis haum txoj cai ntawd,

lawv tsis ua hauj lwm dab tsi li, lawv tsuas xav kov tas puas tsav yam. 

12 – Peb thov ntuas cov neeg ntawd nyob hauv Huab Tais Yes Xus Pleev kom lawv ua hauj lwm thiab nyob twj ywm, thiab kom lawv noj cov mov uas lawv tau khwv ua. 

Yog Tswv Ntuj Lo Lus        Nws lus txiaj ntsim

NTAWV MOO ZOO                      

LUS KAS _21 : 5-19

LUB NTSIAB LUS :     Cov neeg ntseeg yuav tsum paub tias lub Koom Txoos tsis        yog ib pab neeg muaj hwj chim uas luag hwm. Cov neeg ntseeg yuav ntsib kev raug luag hiam ntau.

COV LUS NYOB HAUV LUS KAS NTAWV MOO ZOO.

5 – Thaum ntawd, ib txhia hais tias lub Tuam Tsev Teev Ntuj txhim tau pob zeb zoo nkauj rau thiab muaj paj tshab txi Ntuj zoo saib. _Yes Xus hais tias : 

6 – « Tej uas nej qhov muag ntsia ntawm no, muaj ib hnub luag yuav rhuav tsis tseg ob lub pob zeb txhim sib tshooj sawv ntsug. » 

7 – Lawv nug Yes Xus tias :

« Xib Hwb, thaum twg tej ntawd mam li tshwm sim tuaj, thiab yuav muaj lub cim dab tsi thaum tej ntawd yuav tshwm sim tuaj ?”

8 – Yes Xus hais tias :

« Nej ceev faj txhob cia luag ua kom nej yuam kev. Vim yuav muaj coob leej siv kuv lub npe tuaj, lawv yuav hais tias :

‘Yog kuv’, thiab yuav hais tias : ‘Lub zim txwv twb los txog ze ze lawm’. Mas nej txhob mus raws lawv.

9 – Thaum nej hnov luag tham txog kev tsov rog thiab kev kub ntxhov, mas nej tsis txhob ntshai.

Vim tias tej ntawd yuav tsum tshwm sim tuaj tso, tab sis tsis tau txog lub zim txwv kawg tam sis ntawd. »

10 – Yes Xus hais rau lawv tias :

« Ib haiv neeg yuav sawv los ntaus lwm haiv neeg, ib lub teb chaws yuav sawv los ntaus lwm lub teb chaws.

11 – Lub ntiaj teb yuav qeeg heev kawg. Nyob rau ntau qhov chaw yuav muaj mob aws, thiab muaj kev tshaib. Yuav muaj tej yam xwm txaus ntshai kawg, thiab tej lub cim loj nyob saum ntuj.

12 – Tab sis ua ntej ib puas tsav yam ntawd, luag yuav cev tes ntes nej, luag yuav hiam nej,

luag yuav coj nej mus kom rau cov tsev txoos thiab tsev loj faj. Luag yuav coj nej mus rau ntawm cov vaj thiab cov nom tswj teb chaws xub ntiag vim kuv lub npe. 

13 – Tej ntawd yuav pub ib lub zoo sij hawm rau nej ua tim khawv. 

14 – Nej khaws rau nruab siab tias nej yuav tsis txhob npaj ib co lus teb kom txuag tau nej. 

15 – Vim kuv yuav muab ib co lus thiab ib txog kev thoob tsib rau nej, ces cov ntxub nej yuav tsis muaj ib tug teb tau thiab cav tau nej cov lus.

16 – Tab yog nej niam nej txiv, nej cov kwv tij, cov txheeb ze, thiab cov phooj ywg,

los lawv tseem yuav mus kom nej. Luag yuav muab nej ib txhia tua.          

17 – Luag yuav ntxub nej vim kuv lub npe. 

18 -Tab sis tsis muaj ib txoj plaub hau saum nej taub hau yuav ploj. 

19 – Nej ua siab ruaj kom tom thawj, ces nej yuav cawm nej txoj sia. »        

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

ES XES KIAS 47, 1-2.8-9.12

1 – Tus neeg ntawd coj kuv rov los txog ntawm lub qhov rooj mus hauv lub Tuam Tsev Teev Ntuj. Ua ciav muaj ib tug dej ntws hauv taw rooj los dua sab hnub tuaj lawm, vim lub Tuam Tsev tig mus rau sab hnub tuaj lawm. Dej txhawv ntawm sab qab tsuas lub Tuam Tsev Teev Ntuj sab xis nram lub qab thaj txi Ntuj.

2 – Tus neeg coj kuv tawm ntawm lub qhov rooj nyob sab pej los, nws coj kuv ncig sab Tuam Tsev nraud los txog ntawm lub rooj vag uas tig rau sab hnub tuaj. Nyob ntawd, dej ntws ntawm sab xis los.

8 – Tus neeg ntawd hais rau kuv tias : « Cov dej no ntws mus rau toob fab mus nram lub hav As Las Npas, yuav mus tshwm rau hauv lub hiav txwv. Cov dej no mus ua kom lub hiav txwv cov dej huv tuaj.

9 – Tus dej no ntws txog qhov twg mas tas puas tsav yam muaj txoj sia mus mus los los yuav ciaj nyob hauv cov dej no. Yuav muaj ntses ntau heev vim tus dej no ntws mus txog qhov twg mas yam twg yuav huv tuaj thiab txoj sia hlob taus.

12 – Nyob ntawm ob sab ntug dej yuav tuaj tas puas tsav yam txiv ntoo, lawv cov nplooj yuav tsis zeeg ib zaug thiab lawv yuav txi txiv mus li. Niaj hli lawv yuav txi ib co txiv tshiab, vim cov dej ntws ntawm thaj chaw ntshiab los. Cov txiv yuav yog ib co txhiam xws, cov nplooj yuav yog ib co tshuaj. »

Yog Tswv Ntuj Lo Lus        Nws lus txiaj ntsim

Nkauj Paj Nruag

46

2 – Tswv Ntuj yog peb lub chaw nkaum, yog peb lub yeej ntsa zeb. Thaum kev txhawj xeeb tuaj, nws cev nws lub zog mus li los pab peb.

3 – Li ntawd, tab yog lub ntiaj teb ua zog koog, toj roob hauv pes nphau rau hauv tiv txwv, los peb tsis ntshai.

5 – Tab sis muaj ib tug dej ntws ncau ntau ceg, mus ua chaw zoo siab rau Tswv Ntuj lub tsheej,

lub tsheej ntawd yog tus Nyob Siab lub tuam tsev uas ntshiab tshaj lwm cov.

6 – Tswv Ntuj nyob hauv nruab nrab lub tsheej ; lub tsheej yuav tsis tshee, tsis co.

Kaj ntug txoog, Tswv Ntuj pab nws :

8 -Tus HUAB TAIS muaj hwj huam tas nrho nrog peb nyob. Yas Kos tus Tswv Ntuj yog peb lub yeej ntsa zeb.

9 – Nej mus xyuas HUAB TAIS cov hauj lwm saib,

10 – Nws cheem kev sib ntaus sib tua mus txog tim npoo ntiaj teb,

ZAJ NYEEM OB

KOS LIS NTHOS TSAB IB 3, 9c-11.16-17

9 – Nej yog Tswv Ntuj lub Tuam Tsev.

10 – Kuv ua raws li lub txiaj ntsim uas Tswv Ntuj pub rau kuv. Kuv zoo li tus neeg txhimtsev :

kuv pib txhim taw ntsa. Lwm tus tau txhim ntxiv rau saud. Tab sis nyias yuav muab siab rau saib nyias txoj kev txhim tsev.

11 – Vim tias tsis muaj leej twg yuav txhim ib tug taw ntsa txawv tus uas ib txwm nyob : tus taw ntsa ntawd yog Yes Xus Pleev.

16 – Nej puas paub tias nej yog Tswv Ntuj ib lub Tuam Tsev ? Nej puas paub tias Tswv Ntuj Leej Ntuj Plig nyob txawm hauv nej ?

17 – Yog muaj ib tug rhuav Tswv Ntuj lub Tuam Tsev, mas Tswv Ntuj yuav rhuav tus ntawd. Vim tias Tswv Ntuj lub Tuam Tsev yog ib yam ntshiab. Lub Tuam Tsev ntawd yog nej.

Yog Tswv Ntuj Lo Lus        Nws lus txiaj ntsim

NTAWV MOO ZOO

ZAM 2, 13-22

13 – Yuav txog cov Yus Das lub Ntees Hla, ces Yes Xus mus pem Yes Lus Xas Les.

14 – Nyob hauv lub Tuam Tsev Teev Ntuj, Yes Xus pom cov tub luam muag nyuj, muag tshis, muag nquab, thiab cov neeg pauv nyiaj zaum ntawm lawv cov rooj.

15 – Nws muab ib co hlua ua ib rab nplawm, nws ntiab sawv daws huv tib si tawm hauv lub Tuam Tsev Teev Ntuj, nws caum cov yaj thiab cov nyuj. Nws nchuav cov pauv nyiaj tej nyiaj, nws ntxeev lawv tej rooj.

16 – Nws hais rau cov muag nquab tias : « Nej tshem tej ntawd tawm hauv no mus. Nej tsis txhob muab kuv Txiv lub Tsev los ua ib lub tsev ua luam ntxiv. »

17 – Yes Xus cov thwj tim nco txog lo lus uas Ntawv sau tseg tias : Kev mob siab rau koj lub Tsev ua kuv lub siab kub lug.

18 – Cov Yus Das thiaj qhib ncauj hais rau nws tias : « Koj tau ua li no, koj yuav muab lub cim

dab tsi rau peb pom ?

19 – Yes Xus teb rau lawv, nws hais tias : « Nej rhuav lub Tsev Ntshiab no. Peb hnub tom qab, mas kuv rov txhim tau.”

20 – Cov Yus Das thiaj hais tias : « Lawv ua hauj lwm plaub caug rau xyoo thiaj txhim tau lub Tsev Ntshiab no. Hos koj, koj ua peb hnub, koj yuav rov txhim tau ! »

21 – Tab sis Yes Xus hais txog nws lub Cev uas yog lub Tsev Ntshiab.

22 – Thaum Yes Xus sawv hauv cov tuag rov los lawm, nws cov thwj tim rov nco tias nws twb tau hais li ntawd, ces lawv ntseeg txog Phau Ntawv thiab ntseeg txog lo lus uas Yes Xus tau hais.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB                 

NTAWV THOOB TSIB 3 : 1-6, 9

LUB NTSIAB LUS. Tus neeg ntseeg, tej zaud tsoom sid thuam nws. Tab sis nws tso siab tias Tswv Ntuj ua kom nws ntshiab tuaj, nws yuav muaj txoj sia nyob mus li.

1 – Cov neeg ncaj tus plig nyob hauv Tswv Ntuj txhais tes. Tsis muaj ib yam xwv txheej dab tsi yuav raug tau lawv.

2 – Cov neeg tsis muaj tswv yim xav tias cov neeg ncaj tuag lawm, hos lawv txoj kev ncaim mus yog ib yam xwv txheej loj, 

3 – thiab lawv txoj kev tawm rooj mus deb ntawm peb, yog ib txog kev puas tsuaj loj. 

Tab sis cov neeg ncaj ntawd nyob hauv kev thaj yeeb lawm. 

4 – Tib neeg xav tias cov siab ncaj tuag, mas yog lawv raug txim, tab sis lawv tso siab lug tias lawv muaj txoj sia nyob mus li.        

5 – Lawv raug ib txog kev txom nyem sib, tab sis lawv yuav txais txiaj ntsim koob hmoov loj. 

Tswv Ntuj sim lawv, nws pom tias lawv tsim nyog ua nws tug. 

6 – Tswv Ntuj sim lawv, zoo li sim kub nyob hauv lub yeej vub. Tswv Ntuj txais lawv zoo li thaj txi Ntuj zoo txhij zoo txhua.

9 – Cov neeg tso siab rau Huab Tais yuav paub txoj kev tseeb. Cov neeg npuab Huab Tais yuav nyob ze nws hauv txoj kev nyiam. Vim Huab Tais tshwj zias nws lub txiaj ntsim thiab nws txoj kev zam rau nws cov ntshiab, nws tuaj xyuas cov nws xaiv.

Yog Tswv Ntuj Lo Lus        Nws lus txiaj ntsim

Nkauj Paj Nruag : Tus ntseeg ruaj tso siab rau Tswv Ntuj

(26 (27), 1, 4, 7-9a, 13-14)

1 – qhov pom kev, nws yog tus cawm kuv. Kuv yuav ntshai leej twg?

4 – Kuv thov ib yam ntawm HUAB TAIS, yog yam kuv nrhiav :
thov kom tas kuv sim neej, kuv niaj hnub tau nyob hauv HUAB TAIS tsev,
kom kuv tau nuam ntsia saib HUAB TAIS zoo npaum li cas,
kuv xav ntsuam xyuas nws lub tuam tsev.

7 – HUAB TAIS, koj mloog kuv lub suab hu txog koj !
Thov koj hlub, koj

9 – Koj txhob thaiv koj lub ntsej muag rau kuv !

13 – Kuv paub tseeb tias kuv yuav tau pom HUAB TAIS lub siab zoo
nyob hauv tsoom neeg ciaj lub teb chaws.
14 – Koj tos ntsoov HUAB TAIS mog !
Koj ua tus muaj zog, koj ua siab loj !
koj tos ntsoov HUAB TAIS mog !

ZAJ NYEEM OB

Kos Lis Nthos Tsab Ib, Zaj 15, 51-57

51 – Kuv qhia ib yam tob rau nej : yam li peb yuav tsis tuag tas txhua leej, tab sis
tas sawv daws yuav hloov. 52 Thaum lub hom yuav nrov zaum kawg, vim tias lub
hom yeej yuav nrov tiag, mas ib sij huam ntev li ib ntsais muag, ces cov neeg tuag
yuav sawv rov los, tsis txawj lwj. Hos peb cov uas tseem ciaj, mas peb yuav
hloov tas.

53 – Vim lub cev txawj lwj no yuav plhis mus ua lub cev tsis txawj lwj ;
lub cev txawj tuag no yuav plhis mus ua lub cev tsis txawj tuag.
54 – Thaum lub cev txawj lwj no plhis tau rau lub tsis txawj lwj lawm, thaum lub
cev txawj tuag no plhis tau ua lub tsis txawj tuag lawm, mas yuav muaj raws li lo lus nyob hauv Ntawv hais tias :
“Txoj kev yeej rhuav txoj kev tuag tog rau hauv qab thu lawm.

55 – Kev tuag, koj txoj kev yeej nyob qhov twg ? Kev tuag, koj rab hmuv nyob qhov twg ?”
56 – Kev tuag rab hmuv yog kev txhaum. Kev txhaum lub zog yog Txoj Cai.
57- Peb ua Tswv Ntuj tsaug, vim nws pub kev yeej rau peb, nyob hauv peb tus Huab Tais Yes Xus Pleev.

Yog Tswv Ntuj Lo Lus        Nws lus txiaj ntsim

NTAWV MOO ZOO     

ZAM ZAJ 6 37-40

37 – Txhua yam uas kuv Txiv muab rau kuv yuav los cuag kuv. Hos tus tuaj cuag
kuv, kuv yuav tsis ntiab nws rau nraum zoov.

38 – Vim kuv nqes saum ntuj los, tsis yog los ua ywj kuv siab, yog los ua
raws li Tus Xa kuv tuaj lub siab.

39 – Tus Xa kuv tuaj lub siab xav, yog zoo li no :
Kom kuv tsis txhob ua ib yam uas nws muab rau kuv ploj li, thiab hnub kawg,
kom kuv tsa yam ntawd sawv rov los.
40 – Qhov uas kuv Txiv nyiam yog zoo li no :

leej twg pom Leej Tub thiab ntseeg txog Leej Tub, mas nws muaj txoj sia
nyob mus li, thiab Hnub Kawg, kuv yuav tsa nws sawv rov los. »

Huab Tais Pleev      Lub qab ntuj neeg cav txog koj