Viens à moi

Je compte tes larmes et tes sanglots déversés

Sous le poids du fardeau que la vie t’a donné.

Dans le silence de tes nuits j’entends ta voix

Qui m’appelle et crie en vain vers ma Croix.

 Je te vois et je sens ta foi animer ton cœur

Qui attend le miracle venant du Seigneur.

Tes louanges chantées et tes prières dites

Transpercent mon cœur doux sans limites.

Viens à moi car je connais ton âme affaiblie.

Viens et que la paix guérisse enfin ta vie.

                   Joanne YANG 

Auteur

Vous trouverez ci-dessous ce qui a été publié par l'auteur que vous avez sélectionné

Author Archive by Aumônerie catholique Hmong de France

Hnub chiv 3 ntawm lub caij plaub caug. Xyoo C

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1 :

Kev Tsiv : Tshooj : 3 Nqe : 1 – 8a. 10. 13 – 15

Lub ntsiab lus : Tswv Ntuj hu Mais Xes hauv tsob pos cig cig. Tswv Ntuj xa Mais Xes mus. Tswv Ntuj qhia nws lub npe.

1 Mais Xes niaj hnub mus zov nws yawm txiv Zes Raus pab yaj. Zes Raus yog ib tug leej choj Mas Dias. Mais Xes coj nws yawm txiv cov yaj mus noj zaub dhau teb chaws suab puam, ces nws mus txog Tswv Ntuj lub roob Hos Les.

2 HUAB TAIS tus Tshiab yees tawm los rau Mais Xes pom nyob hauv ib co nplaim taws cig cig nyob hauv ib tsob
pos. Mais Xes ntsia ntsoov, tsob pos cig cig ntsa iab tab sis tsis txawj kug li.

3 Ces Mais Xes hais tias : « Kuv yuav lug kev mus xyuas yam txawv txawv ntawd saib yog dab tsi, ua cas tsob pos ntawd cig cig tsis txawj kug. »

4 HUAB TAIS pom nws lug kev tuaj xyuas, ces Tswv Ntuj hu nws hauv tsob ntoo tuaj tias : « Mais Xes, Mais Xes. »
Mais Xes teb tias : « Kuv nyob ntawm no. »

5 Tswv Ntuj hais tias : « Koj txhob txav los ze ntawm no, hle koj nkawm khau ntawm koj ko taw, vim thaj chaw uas koj tsuj no yog ib thaj chaw ntshiab. »

6 Tswv Ntuj hais ntxiv tias : « Kuv yog koj cov yawg koob tus Tswv Ntuj, yog Has Nplas Has tus Tswv Ntuj,
yog His Xas Has tus Tswv Ntuj, thiab yog Yas Kos tus Tswv Ntuj. » Ces Mais Xes thaiv nws lub ntsej muag,
vim nws ntshai tsam nws qhov muag tau pom Tswv Ntuj.

7 HUAB TAIS hais tias : « Kuv pom, kuv pom kuv haiv neeg txoj kev txom nyem nyob Hais Nkws Tos teb. Kuv hnov lawv lub suab quaj vim luag quab yuam lawv. Kuv paub lawv tej kev txhawj xeeb tas huv si.

8 Kuv nqes los cawm lawv kom dim ntawm cov Hais Nkws Tos txhais tes. Kuv yuav coj lawv tawm hauv lub teb chaws ntawd rov los rau ib lub teb chaws dav thiab zoo qoob, lub teb chaws muaj mis nyuj thiab zib mu,ntws sis laub sis lug, yog lub teb chaws uas cov Kas Nas Has, cov His Tis, cov As Mos, cov Pes Lis Xis, cov His Vis, thiab cov Zes Npws nyob.

13 Mais Xes hais rau Tswv Ntuj tias: « Thaum kuv mus cuag cov His Xas Lais, thiab kuv hais rau lawv tias : ‘Nej cov
yawg koob tus Tswv Ntuj xa kuv tuaj pab nej.’ Yog lawv hais rau kuv tias : ‘Nws lub npe hu li cas ?’ Kuv yuav hais li cas rau lawv ?

14 Tswv Ntuj hais rau Mais Xes tias : « Kuv yog tus kuv yuav yog. » Tswv Ntuj hais ntxiv tias : « Koj yuav hais rau cov His Xas Lais li no : ‘Kuv yog tus kuv yuav yog’ xa kuv tuaj pab nej. »

15 Tswv Ntuj tseem hais ntxiv rau Mais Xes tias : « Koj yuav hais li no rau cov His Xas Lais : ‘ HUAB TAIS, uas yog nej cov yawg koob tus Tswv Ntuj, yog Has Nplas Has tus Tswv Ntuj, yog His Xas Has tus Tswv Ntuj thiab yog Yas Kos tus Tswv Ntuj xa kuv tuaj pab nej. Lub npe no yog kuv lub npe mus ib txhis, neeg yuav tuav lub npe no hu txog kuv mus txheej dhau txheej.’

Yog Tswv Ntuj Lo Lus. Nws Lub Txiaj Ntsim

Zaj nyeem 2 :

Kos Lis Nthos : Tshooh : 10 Nqe : 1 – 6. 10 – 12

Lub ntsiab lus : Tej xwm hauv His Xas Lais kwv huam yog tej zaj qhuab qhia peb.

1 Kwv tij, kuv xav kom nej paub tias, thaum ub twv huab tau roos peb cov yawg koob, sawv daws tau hla
lub hiav txwv,

2 sawv daws tau nrog Mais Xes txais lub cim ntxuav nyob hauv twv huab, thiab nyob hauv dej ntuj liab,

3 sawv daws tau noj cov mov poob saum ntuj los,

4 sawv daws tau haus cov dej txhawv saum ntuj los : yog cov dej tawm hauv phab tsua los. Phab tsua ntawd yog
Leej Pleev.

5 Tab sis, cov tau ua ntxim Tswv Ntuj lub siab, muaj tsawg leej, vim li ntawd lawv thiaj tuag pawg lug nyob hauv teb chaws suab puam.

6 Tej xwm ntawd tshwm sim los ua piv txwv qhia peb, kom peb tsis txhob ywj peb lub siab ntshaw qhov phem, xws li
txheej thaud cov His Xas Lais tau ua.

10 Nej tsis txhob yws taus xws li tej laus thaud : Ntuj tus Tshiab thiaj muab lawv tua.

11 Tej xwm ntawd tshwm sim los ua piv txwv qhia peb. Lawv muab sau cia ua tej zaj qhuab qhia peb vim yuav txog lub caij uas ntiaj teb kawg.

12 Nyem no, tus twg khav tias nws sawv ntsug lawm, mas nws yuav ceev faj, nyob tsam nws ntog !

Yog Tswv Ntuj Lo Lus. Nws Lub Txiaj Ntsim

Ntawv moo zoo :

Lus kas : Tshooj : 13 Nqe : 1 – 9

Lub ntsiab lus : Tig los hloov siab. Zaj paj lug hais txog tsob txiv ncuav pias tsis txi txiv.

1 Tib lub zim txwv ntawd, muaj ib co neeg tuaj qhia Yes Xus txog cov Nkas Lis Lais uas Pis Las Tos muab
lawv cov ntshav hliv xyaw rau cov ntshav uas lawv txi Ntuj.

2 Ces Yes Xus thiaj hais rau lawv tias : « Nej puas xav tias cov Nkas Lis Lais ntawd tau ua txhaum loj dua lwm cov
neeg nyob Nkas Lis Lais, lawv thiaj raug tsim txom zoo li ntawd ?

3 Kuv hais rau nej tias lawv tsis tau ua txhaum loj dua luag tej. Tab sis, yog nej tsis tig los hloov siab, mas nej yuav tuag ib yam li ntawd thiab.

4 Hos kaum yim leej neeg uas tus pej thuam Xis Los Es vau los tsuam lawv tuag tas, mas nej puas xav tias lawv
tshuav nuj nqi ntau dua ib tsoom neeg nyob Yes Lus Xas Les huv si ?

5 Kuv hais rau nej tias lawv tsis tshuav nuj nqis ntau dua luag. Tab sis yog nej tsis xav tig los hloov dua siab tshiab, mas nej yuav tuag ib yam li ntawd thiab. »

6 Yes Xus hais zaj paj lug no : « Muaj ib tug neeg cog tau ib tsob txiv ncuav pias rau hauv nws lub vaj txiv
cawv. Nws tuaj de txiv ncuav pias, tabsis tsis pom muaj txiv li.

7 Ces nws hais rau tus tub txib zov vaj tias : « Koj saib ! Tau peb xyoos no kuv tuaj de txiv ncuav pias, kuv yeej tsis pom ib lub txiv li. Koj muab tsob ntoo ncuav pias ntov. Yuav cia nws nyob ntxoov av ua dab tsi ? »

8 Tus tub txib zov vaj teb rau tus tswv vaj tias : « Huab Tais, thov koj cia tsob ntoo nyob xyoo no ntxiv. Kuv yuav
khawb av ncig lub hauv paus ntoo thiab npoog chiv rau.

9 Tej zaum yav tom ntej, tsob ntoo yuav txi txiv. Yog tsis txi, koj mam muab ntov. »

Huab Tais Pleev. Lub qab ntuj neeg cav txog koj.

Hnub chiv 2 ntawm lub caij plaub caug. Xyoo C

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1 :

Hauv Paus : Tshooj : 15 Nqe : 5 – 12. 17 – 18

Lub ntsiab lus : Huab Tais nrog Has Nnplas cog lus.

5 HUAB TAIS coj Has Nplas mus nraum zoov thiab hais rau nws tias : « Koj tsa muag ntsia saum ntuj thiab suav
cov hnub qub saib koj suav puas txheeb. » Ces nws hais tias : « Koj cov xeeb ntxwv yuav coob npaum li ntawd. »

6 Has Nplas ntseeg HUAB TAIS, ces HUAB TAIS muab Has Nplas lub siab ntseeg suav ua kev ncaj rau Has Nplas.

7 HUAB TAIS hais rau nws tias : « Kuv yog tus HUAB TAIS uas tau kom koj tawm hauv lub teb chaws Uj uas nyob
Kas Ntes los mus nyob lub teb chaws uas kuv yuav muab rau koj, ua koj tug. »

8 Has Nplas teb tias : « HUAB TAIS Tswv Ntuj, dab tsi thiaj yuav qhia rau kuv paub tias kuv tau lub
teb chaws ua kuv tug ? »

9 HUAB TAIS hais rau nws tias : « Koj mus coj ib tug xyuas nyuj muaj peb xyoos, ib tug nkauj tshis muaj peb xyoos,
ib tug txiv yaj muaj peb xyoos, ib tug poj nquab thiab ib tug me nyuam nquab los rau kuv tso. »

10 Has Nplas coj cov tsiaj raws li hais los rau HUAB TAIS. Nws muab cov tsiaj phua nruab nrab, nws muab ib sab teeb
rau sab xis ib sab teeb rau sab laug, tiam sis nws tsis phua cov noog.

11 Dav nyuj ya ntxiag los noj cov tsiaj, tab sis Has Nplas nplawm kom dav ya.

12 Thaum lub hnub tab tom poob qho, Has Nplas ib ce tsaug tas, thiab muaj ib qho ntshai loj kawg los laum Has Nplas.

17 Thaum lub hnub poob qho lawm thiab tsaus ntuj lawm, ces muaj ib lub qhov txos ncho pa lug thiab ib teg tsau cig cig los hla ntawm cov sab nqaij kis nruab nrab.

18 Hnub ntawd, HUAB TAIS nrog Has Nplas cog lus li no : « Kuv muab lub teb chaws no rau koj tsoom xeeb ntxwv nyob, txij tus dej nyob Hais Nkws Tos teb mus txog ntua tus Dej Loj, tus dej Aws Fas Tes.

Yog Tswv Ntuj Lo Lus. Nws Lub Txiaj Ntsim

Zaj nyeem 2 :

Fis Lis Pos : Tshooj : 3 Nqe ; 17 Tshooj : 4 Nqe : 1

Lub ntsiab lus : Txoj tseem kev cawm neeg.

17 Kwv tij sawv daws, nej yoog raws li kuv tus lwj lwm mog. Nej ntsia ntsoov cov neeg ua raws li peb tus piv txwv.

1 Kuv cov kwv tij zoo nyiam, nej yog kuv qhov chaw zoo siab, yog kuv lub koob meej. Nej nyob ruaj nreb hauv Huab Tais mog .

Yog Tswv Ntuj Lo Lus. Nws Lub Txiaj Ntsim

Los nyeem zaj no :

Zaj nyeem 2 :

Fis Lis Pos : Tshooj : 3 Nqe : 20 Tshooj : 4 Nqe : 1

Lub ntsiab lus : Txoj tseem kev cawm neeg.

20 Ntawm peb, mas peb lub tsheej nyob saum ntuj, vim peb tos Huab Tais Yes Xus Pleev yuav los cawm peb ;

1 Kuv cov kwv tij zoo nyiam, nej yog kuv qhov chaw zoo siab, yog kuv lub koob meej. Nej nyob ruaj nreb hauv Huab Tais mog .

Yog Tswv Ntuj Lo Lus. Nws Lub Txiaj Ntsim

Ntawv moo zoo :

Lus Kas : Tshooj : 9 Nqe : 28b – 36

Lub ntsiab lus ; Yes Xus lub hwj chim tawm los.

28 Yes Xus hais cov lus ntawd kwv yees tau yim hnub lawm, nws coj Pob Zeb, Zam, thiab Yas Kos nrog nws, ces nws
nce mus teev Ntuj saum roob.

29 Thaum Yes Xus teev Ntuj, nws lub ntsej muag hloov, nws cev ris tsho ci dawb paug ntsa iab.

30 Ib sij huam, muaj ob tug neeg nrog Yes Xus tham : yog Mais Xes thiab Es Lias.

31 Nkawd tawm los muaj hwj chim, nkawd nrog Yes Xus tham txog txoj hauj lwm uas nws yuav sawv kev mus lis kom tiav nyob Yes Lus Xas Les.

32 Pob Zeb thiab nws cov npawg qaug dab ntub. Tab sis lawv meej pem kawg. Ces lawv pom Yes Xus lub hwj chim thiab pom ob tug neeg uas nrog Yes Xus ua ke.

33 Thaum ob tug ntawd yuav ncaim ntawm Yes Xus, mas Pob Zeb hais rau Yes Xus tias : « Xib Hwb, peb nyob ntawm no mas zoo kawg ! Cia peb tsa peb lub tsev tsam phooj, ib lub rau koj, ib lub rau Mais Xes, ib lub rau Es Lias. » Pob Zeb tsis paub nws hais dab tsi.

34 Thaum Pob Zeb tab tom hais li ntawd, mas muaj ib twv huab tuaj vov nkaus lawv. Thaum lawv nyob hauv twv huab,
lawv ntshai kawg.

35 Muaj ib lub suab nrov hauv twv huab tuaj tias : « Tus no yog kuv Leej Tub, yog tus kuv Xaiv, nej mloog nws mog. »

36 Thaum lub suab hais li ntawd tas, tshuav Yes Xus tib leeg xwb. Hnub ntawd, cov thwj tim ua twj ywm tsis qhia
dab tsi rau leej twg txog qhov lawv tau pom.

Huab Tais Pleev. Lub qab ntuj neeg cav txog koj.

Thawj hnub chiv ntawm lub caij 40. Xyoo C

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1 :

Phau 5 : Tshooj : 26 Nqe : 4 – 10

lub ntsiab lus : Tus ua hauj lwm tsim qoob loo los tsim lwm yam nws zoo siab cev ib feem rau Tswv Ntuj ua Ntuj tsaug. Vim Tswv Ntuj pub kom yus muaj zog ua neeg twj lij, tsis tas yuav thov mov noj ntawm luag tej.

4 Niaj xyoo koj yuav ris ib kawg nplej tshiab tuaj rau tus Leej Choj. Tus Leej Choj yuav txais lub kawm ntawm koj tes mus txo rau hauv HUAB TAIS koj tus Tswv Ntuj lub taw thaj txi Ntuj.

5 Ces koj yuav hais cov lus no rau HUAB TAIS koj tus Tswv Ntuj : « Thaum ub, kuv txiv yog ib tug neeg As Las Mais nyob tsis ruaj chaw. Nws nqes mus Hais Nkws Tos teb, nws coj ib pab neeg tsawg mus. Ntev mus lawv coob tuaj ua ib haiv neeg loj thiab muaj zog.

6 Cov Hais Nkws Tos hiam peb thiab tsis saib peb li. Lawv kom peb ua lawv qhev ces peb txom nyem tas nrho.

7 Peb thiaj hu txog HUAB TAIS, peb cov yawg koob tus Tswv Ntuj. HUAB TAIS hnov peb lub suab, thiab ntsia peb txoj kev txom nyem, nws pom peb lub neej raug luag yuam.

8 HUAB TAIS tsa tes coj peb tawm Hais Nkws Tos teb los. Nws pab peb, nws hem cov Hais Nkws Tos kom lawv ntshai thiab nws ua hwj huam yees ntxwv.

9 Nws coj peb los txog qhov no, nws muab lub teb chaws no rau peb. Teb chaws no muaj mis nyuj thiab zib ntab
ntws lug.

10 HUAB TAIS, ntawm no yog thawj phaum qoob uas koj pub rau kuv, mas kuv nqa tuaj cev rau koj. » Koj yuav tso cov qoob ntawd rau ntawm HUAB TAIS koj tus Tswv Ntuj xub ntiag, thiab koj yuav pe HUAB TAIS koj tus Tswv Ntuj

Yog Tswv Ntuj Lo Lus. Nws Lub Txiaj Ntsim

Zaj nyeem 2 :

Los Mas : Tshooj : 10 Nqe : 9 – 13

Lub ntsiab lus : Txawm yog Yus Das los Hes Las yeej tsis sib txawv.

9 Yog koj di ncauj lees tias Yes Xus yog Huab Tais, thiab koj lub siab ntseeg tias Tswv Ntuj tsa Yes Xus tuag sawv rov los, mas koj yuav txais kev cawm neeg.

10 Lub siab ntseeg tau txais kev ncaj los ua nws tug. Lub ncauj uas lees ntseeg txog Yes Xus tau txais kev cawm. Vim
Ntawv sau cia tias : ‘Tus ntseeg txog Huab Tais, nws yuav tsis poob ntsej muag.’

12 Li ntawd, txhob hais tias muaj cov Yus Das thiab muaj cov Hes Las ; lawv tsis sib txawv. Sawv daws muaj ib tug
Huab Tais xwb, yog tus Huab Tais pub paj tshab ntau rau cov neeg hu txog nws.

13 Vim Ntawv yeej sau cia tias : ‘Leej twg hu txog Huab Tais lub npe, nws yuav ntsib kev cawm neeg.’

Yog Tswv Ntuj Lo Lus. Nws Lub Txiaj Ntsim

Ntawv moo zoo :

Lus Kas : Tshooj : 4 Nqe : 1 – 13

Lub ntsiab lus : Yers Xus yeej dab phem ntxias.

1 Yes Xus rov ntawm dej Yos Las Das los, nws muaj Leej Ntuj Plig Ntshiab nyob puv hauv nws. Leej Ntuj Plig coj Yes Xus mus nyob teb chaws suab puam

2 plaub caug hnub, dab phem ntxias Yes Xus. Tas lub caij ntawd Yes Xus tsis noj dab tsi li. Thaum dhau plaub caug hnub lawd, nws tshaib plab.

3 Dab phem hais rau Yes Xus tias : « Saib ! Koj yog Tswv Ntuj Leej Tub no, koj hais kom lub pob zeb no txia ua mov. »

4 Yes Xus teb rau dab phem tias : « Muaj lus sau cia tias : Neeg tsis kawg muab mov los yug txoj sia xwb. »

5 Dab phem coj Yes Xus nce mus saum ib qho chaw siab. Ib sij huam, nws muab tas nrho cov ceeb tsheej nyob ntiaj teb
rau Yes Xus ntsia.

6 Ces dab phem hais rau Yes Xus tias : « Kuv yuav muab cov ceeb tsheej ntawd lub peev xwm thiab lub koob meej huv
tib si rau koj. Vim kuv tau txais ua kuv tug, kuv xav muab rau leej twg kuj tau ywj kuv siab.

7 Li ntawd, yog koj pe kuv, mas tej ntawd yog koj tug tas huv si. »

8 Yes Xus hais rau dab phem tias : « Muaj lus sau cia tias : Koj yuav pe Huab Tais, koj tus Tswv Ntuj, koj yuav teev nws tib leeg xwb. »

9 Dab phem tseem coj Yes Xus mus pem Yes Lus Xas Les, ces dab phem muab Yes Xus tso saum lub ruv Tuam Tsev
Teev Ntuj. Dab phem hais rau Yes Xus tias : « Saib ! Koj yog Tswv Ntuj Leej Tub no, koj dhia saum no lawm puag hauv,

10 vim muaj lus sau cia tias : Ntuj yuav txib nws cov tshiab, kom lawv zov koj.

11 Thiab tseem sau ntxiv tias : Lawv yuav nqa koj hauv lawv txhais tes, kom koj txhais taw txhob dawm ib lub pob
zeb li. »

12 Tab sis Yes Xus teb rau dab phem tias : « Muaj lus sau hais tias : Koj yuav tsis txhob ntxias Huab Tais, koj tus Tswv Ntuj.

13 Dab phem ntxias Yes Xus kawg tswv yim, ces nws txav ntawm Yes Xus mus, tos dua lwm lub zoo sij hawm

Huab Tais Pleev. Lub qab ntuj neeg cav txog koj.

Tshaj moo qaij qaug nyob xeev Loiret 45

Par Aumônerie catholique Hmong de France

Tshaj tawm rau peb ib tsoom ntseeg sawv daws paub tias Xyooj Txheem yug hnub tim 18 / 01 / 1985 nyob rau Mana guyane française tau tas sim neej rau hnub tim 24 / 02 / 2022. Nws muaj li 37 xyoo.

Tsev xyom cuab yuav npaj nws lub pag lub xau rau lub week-end 05 / 03 /22 rau 07 /03 / 2022 tuaj no.

sev xyom cuab yuav npaj nws lub pag lub xau nyob rau lub chav tsev :

Salle des fêtes La Cour – Marigny

45 260 La Cour – Marigny

Samedi 05 / 03 / 2022 :

  • 11 h 00 : Tos txais tus qauv.

Dimanche 06 / 03 / 2022 :

Lundi 07 / 03 / 2022 :

  • 11 h 00 : Teev ntuj tom lub tsev teev ntuj

Peb ib tsoom ntseeg pab thov ntuj rau tsev xyom cuab thiab rau Xyooj Txheem tus ntsuj plig.

Lub caij COVID-19 no, nws tsev neeg yuav npaj cov ntaub npog ntsej muag thiab cov tshuaj ntxuav tes rau cov neeg yuav tuaj nrog lawv hlub lawv tus tub.

Hnub chiv 8 ntawm lub caij nruab xyoo. Xyoo C

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1 :

Npes Xos Las : Tshooj : 27 Nqe : 4 – 7

Lub ntsiab lus : Neeg cov lus ua kom paub neeg lub siab.

4 Thaum yus xuas vab tshaus los tshau, mas tshuav tej yam tsis huv nyob hauv lub vab. Yog yus tshau neeg
cov lus, yus kuj pom muaj tej yam tsis zoo.

5 Tus puab lauj kaub thiaj sim nws cov lauj kaub nyob hauv qhov txos. Luag kuj tsom tau tib neeg lub siab nyob hauv tib neeg cov lus tham.

6 Ib tsob ntoo cov txiv qhia yus kom paub tias lub vaj puas yog ib lub vaj zoo los tsis zoo. Tib neeg cov lus kuj qhia tias tib neeg lub siab puas zoo los tsis zoo.

7 Tus neeg twg tseem tsis tau hais lus mas koj txhob cav lus zoo txog nws, vim lub chaw tsom tib neeg yog nws cov lus.

Yog Tswv Ntuj Lo Lus. Nws Lub Txiaj Ntsim

Zaj nyeem 2 :

Kos Lis Nthos : Tshooj : 15 Nqe : 54 – 58

Lub ntsiab lus : Yuav sawv rov los zoo li cas ?

54 Thaum lub cev txawj lwj no plhis tau rau lub tsis txawj lwj lawm, thaum lub cev txawj tuag no plhis tau ua lub tsis
txawj tuag lawm, mas yuav muaj raws li lo lus nyob hauv Ntawv hais tias : “Txoj kev yeej rhuav txoj kev tuag tog rau
hauv qab thu lawm.

55 Kev tuag, koj txoj kev yeej nyob qhov twg ? Kev tuag, koj rab hmuv nyob qhov twg ?”

56 Kev tuag rab hmuv yog kev txhaum. Kev txhaum lub zog yog Txoj Cai.

57 Peb ua Tswv Ntuj tsaug, vim nws pub kev yeej rau peb, nyob hauv peb tus Huab Tais Yes Xus Pleev.

58 Kuv cov kwv tij zoo nyiam, nej ua siab khov siab ruaj mog, kom nej tsuas muaj zoo zuj zus nyob hauv Huab Tais
lub luag hauj lwm, vim nej paub tias nej tsis nkim zog dag ua hauj lwm nyob hauv Huab Tais.

Yog Tswv Ntuj Lo Lus. Nws Lub Txiaj Ntsim

Ntawv moo zoo :

Lus Kas : Tshooj : 6 Nqe : 39 – 45

Lub ntsiab lus : Txhob txiav txim. Tsob ntoo thiab nws cov txiv.

39 Yes Xus hais dua ib zag paj lug li no : « Ib tug dig muag puas coj tau lwm tus dig muag kev ? Nkawd ob leeg yuav tsis
ua ke mus poob qhov lod ?

40 Tus thwj tim tsis loj dua nws tus xib hwb. Tus thwj tim uas kawm tiav tas, nws tsuas kawg luaj nws tus xib hwb.

41 Vim li cas koj ntsia tus quav nplej uas nyob hauv koj tus kwv lub qhov muag ? Hos tus nqaj uas nyob hauv koj lub qhov muag, koj ho tsis pom !

42 Ua cas koj thiaj hais rau koj tus kwv tias : ‘Kwv ntxawg, koj cia kuv rho tus quav nplej hauv koj qhov muag pov tseg’, hos koj twb tsis pom tus nqaj hauv koj qhov muag. Neeg zoo nraum daim tawv, koj rho tus nqaj hauv koj qhov muag pov tseg tso ; koj thiaj yuav pom kev dig tus quav nplej hauv koj tus kwv lub qhov muag.

43 « Tsis muaj ib tsob ntoo zoo nkauj yuav txi ib co txiv lwj, tsis muaj ib tsob ntoo lwj yuav txi ib co txiv zoo nkauj.

44 Xav paub tsob ntoo, mas yuav ntsia nws lub txiv : luag tsis de txiv ncuav pias saum tej pos kaus ntsaj, luag tsis de txiv cawv saum ib tsob txiv pos tshauv.

45 Tus neeg zoo, rho tej yam zoo tawm hauv nws lub siab los. Tus neeg phem rho tej yam phem tawm hauv nws lub
siab los. Vim tias yam uas lub ncauj hais tawm, yog phwj hauv lub siab tuaj

Huab Tais Pleev. Lub qab ntuj neeg cav txog koj.

Nco txog Phauj Xis Soeur Carmen CHAPDELAINE lub neej thiab nws txoj kev pab peb cov Hmoob

Par Aumônerie catholique Hmong de France

Reconnaissance et hommage à Soeur Carmen CHAPDELAINE Phauj Xis (publié le 25/02/2022)

Biographie de Soeur Carmen CHAPDELAINE – Nco txog Phauj Xis lub neej (biographie extraite du livre « En chemin avec le peuple Hmong » du Père René CHARRIER)

Carmen CHAPDELAINE Phauj Xis yog ib tug phauj tuaj nrog Hmoob nyob Los Tsuas Teb tau 13 xyoo. Nws txoj hauj lwm mas yog npaj cov ntxhais hluas Hmoob kom lawv tau mus kawm ntawv thiab nws qhia Ntuj kev cai kom yav tom ntej :

  • muaj cov ntxhais hluas Hmoob paub zoo txog Ntuj txoj kev ntseeg thiab tau rov mus qhia rau cov tseem nyob zos Hmoob pem roob
  • hais tawm tias cov ntxhais los yeej kawm ntawv tau ib yam li cov tub
  • muaj cov ntxhais hluas Hmoob taug txoj kev ntseeg mus ua phauj

Nws tau sau ntawv tseg li no :
« Xyoo 1959, kuv tau noog cov saib peb cov phauj kom lawv xa kuv mus ua hauj hauj lwm nyob lwm lub teb chaws. Xyoo 1961, lawv noog saib kuv pus kam mus Los Tsuas Teb. Kuv kuj tau kam tiam sis kuv txhawj zog vim hais tias muaj tsov rog nyob Los Tsuas Teb. Hnub 9 lub 12 hli xyoo 1961, kuv thiaj li mus txog Los Tsuas Teb. Kuv tau kawm lus Nplog tau 6 hli. Thaum lub 5 hli ntuj, kuv qhia ntawv rau 3 tug ntxhais hluas uas yog Dia, Tia, Mo. Xyoo 1962, tus Txiv Plig loj saib peb cov phauj tuaj xyuas peb nyob Los Tsuas Teb. Nws kam kuv kawm lus Hmoob thiab kam kuv pab cov ntxhais Hmoob.
Txiv Plig Nyiaj Pov (Yves Bertrais) pib qhia lus Hmoob rau kuv. Ces Txiv Plig Nyiaj Pov thiab peb tug ntxhais hlob tau muab kuv tis lub npe Hmoob hu ua : Phauj Xis (« Tante Aimée »). Lawv qab, kuv tau tsiv mus nyob lub tsev tis npe hu ua : « Foyer Nong Bone ». Nyob ntawm lub tsev tshiab, kuj muaj tshaj li 12 tug ntxhais nyob tos kuv. Xyoo ntawd, yog thawj zaug kuv tau mus xyuas ib lub zos Hmoob nyob Sayaboury. Kuv niaj hnub qhia ntawv rau cov ntxhais Hmoob nyob Nong Bone.

Txij xyoo 1964-1965, mas cov ntxhais coob zuj zus tuaj, ces tsis muaj chaw pw txaus lawm. Ces peb tau xyuas npaj ua ib lus tsev tshiab nyob ib sab ntawm lub tsev noj mov. Peb kuj npaj ua ib lub tsev noj mov tshiab thiab. Txiv Plig Lynde muab nyiaj pab peb ua lub tsev, thaum tsa tsev tiav, peb kuj muaj 2 lub tsev loj txais tau tshaj ntawm 40 leej. Cov ntxhais coob zuj zus tuaj, chaw siv loj zus zus tuaj, ces yuav tau nrhiav nyiaj txiag kom txaus. Kuj muaj coob tus pab thiab :
1.L’Evêque de Vientiane.
2.La congrégation pour l’Evangélisation.
3.Les catholiques Américains (par le Père Bouchard).
4.Mon père vend un terrain pour m’aider.
5.La sœur du Père Bertrais qui est sœur Thérèse.
6.Les Oblates Canadiennes.
7.Je fais la quête au Canada dans les Eglises.
8.Les jeunes filles Hmong font des broderies.
9.Un groupe de dames en Autriche.
10.Des femmes américaines.
Vim muaj coob tus pab, peb thiaj li ua tau ntau yam. Kuv tsis tshua khees tham txog cov lus no, tiam sis zaum no yog lub caij tshaj tawm kom sawv daws paub. Txij xyoo 1965, tseem tshuav cov ntxhais yau los cov ntxhais hnub nyoog loj lawm nyob cov zos Hmoob tseem tsis tau txawj nyeem ntawv. Cov Hmoob muaj mob los, coob tus kuj tuaj kho mob nyob Vientiane. Kuv tau coj ib co mus kho ntawm cov Fab Kis vim lawm tsis paub lus Fab Kis. Cov ntxhais hluas lawv kuj tau mus xyuas cov neeg raug mob raug nkeeg hauv cov tsev kho mob, tau nqa zaub mov, nqa khaub ncaws mus rau lawv los tau mus txhais lus.
Xyoo 1967, kuv rov los 2 los 3 hli tim Canada teb. Tiam sis tau 3 vas thiv xwb ces kuv raug mob ntawm cov pob txha sab nraub qaum vim ua tsheb sib nraus. Xyoo 1968, kuv rov qab mus Los Tsuas Teb, rov los ua hauj lwm nyob Nong Bone. Txij xyoo 1969 mus rau xyoo 1975, yav sawv ntxov peb qhia xaws khob ncaws, ces yav tav su, peb qhia ntuj kev cai rau cov Xib Hwb Hmoob cov poj niam.
Lub 3 hli ntuj 1971, kuv rov los Canada, ces lub 9 hli ntuj kuv rov mus ua kuv txoj hauj lwm txog xyoo 1975.
1975 yog xyoo uas teb chaws Los Tsuas tawg, cov ntxhais lawv rov mus tsev. Kuj muaj ib co lawv hla tus dej Mekong mus Thaib Tab. Kuv nyob Nong Bone thiab ntsaig cov khoom, cov tsis zoo siv ces kuv tau hlawv ib co pov tseg, cov tseem zoo siv ces kuv muab pub rau lub tsev kho mob Sisavang Von. Cov nom tswv tshiab tsis kam kuv nyob Los Tsuas Teb ces kuv tau khiav lub 8 hli ntuj 1975. Kuv mus nyob Thaib Teb, nyob lub nroog Chiang Mai. Nrog kuv, muaj zoo li 2 los 3 tug ntxhais hluas Hmoob. Tiam sis tsis yooj yim, vim nom tswv tsis kam ua ntawv rau peb nyob Thaib Teb ces peb tau mus ua ntawv lwm qhov chaw kom tau nyob Thaib Teb. Cov ntxhais los lawv kuj muaj txoj kev txhawj vim lawv tsis hnov moo txog lawv cov txheeb ze nyob Los Tsuas Teb, ces lawv txhawj siab kawg li. Lub 3 hli xyoo 1976, kuv rov los nyob Canada.
Kuv nyob tau 13 xyoo nrog cov ntxhais Hmoob mas lawv tau qhia ntau yam rau kuv. Kuv ua lawv tsaug ntau vim lawv tau tso siab rau kuv. Kuv nco txog cov ntxhais ua peb tau nyob ua ke ntau xyoo, tau sib pab sib qhia. Kuv nco ntsoov 3 tug ntxhais hlob Dia, Mo thiab Rhia, vim tsis muaj lawv kuv yuav ua tsis tau kuv txoj hauj lwm. Kuv ua Ntuj tsaug vim peb tau rov qab sib ntsib. Kuv pom hais tias nej ua tau nej lub neej zoo lawm. »

Hommage-a-Phauj-Xis-1

Au-revoir-Phauj-Xis-1

THANK YOU – MERCI – UA TSAUG

We are thankful to Phauj Xis’ family for their kindness and many blessings to allow us to attend her last moment on earth. She has been a “jewellery Mother” for so many of Hmong Girls in the 60’s to prepare their unknown future for the 21st Century. And now, they know who they are because of her love, faith and sacrifices.

Family coordinator : Kia Thao
Prayer coordinators : Chong Thao Ly & Pa Yang
Prayer book & printing : Xia Vue Yang
Donation manager : Ted V. Thao
Member coordinators : Xyo Suzane Vang, Chong Thao Ly
Visiting members : Xa Lee, Chong Koua Yang, Deu Lo Yang, Cha Ly, Doua Her

Phauj Xis lub ntees

Par Aumônerie catholique Hmong de France

Funérailles de Soeur Carmen CHAPDELAINE au Canada (publié le 23/02/2022)

Qhia rau peb tsoom ntseeg nyob Fab Kis Teb hais tias yuav ua Phauj Xis Soeur Carmen CHAPDELAINE lub ntees nyob Canada hnub 07/03/2022. Lawv tso nws lub cev nyob lub tsev : Coopérative Funéraire de l’Estrie, 485, rue du 24-Juin, Sherbrooke, Québec, J1E 1H1, CANADA thiab tso cai pub xyuas nws lub cev thaum 11h00 sawv ntxov mus txog 14h00 tav su, ces mam li teev Ntuj lawv qab. Lub koom cuab tsev Aumônerie tau xas ib tsab ntawv rau cov xeev ntuj coj tsoom ntseeg nyob Fab Kis Teb. Peb sawv daws ua ke thov ntuj rau Phauj Xis.

Les funérailles de Soeur Carmen CHAPDELAINE Phauj Xis se dérouleront le lundi 7 mars 2022 au Canada. Les visites seront possibles ce jour-là de 11h00 du matin à 14h00 de l’après-midi à l’adresse : Coopérative Funéraire de l’Estrie, 485, rue du 24-Juin, Sherbrooke, Québec, J1E 1H1, CANADA. La messe aura lieu après les visites à partir de 14h00. Un courrier d’information a été adressé en début de semaine par l’Aumônerie aux délégués des régions de France. Prions ensemble pour le repos de Soeur Carmen.

Lien pour les informations utiles :

https://www.coopfuneraireestrie.com/avis-de-deces/carmen-chapdelaine-208114/

Hnub chiv 7 ntawm lub caij nruab xyoo. Xyoo C

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1 :

Xas Muas : Tshooj : 26 Nqe : 2. 7 – 9. 12. 13. 22 – 23

Lub ntsiab lus : Das Vis zam rau Xas Ws.

2 Xas Ws sawv kev mus nram lub hav suab puam Xis Fes. Peb txhiab leej tub rog His Xas Lais zoo tshaj nrog nws mus caum Das Vis nyob hauv lub hav suab puam Xis Fes.

7 Das Vis thiab As Npis Sais nkawd maub mus soj Xas Ws pw tsaug zog nyob hauv nws lub yeej, nws rab hmuv txhos hauv av ze ntawm nws. Cov tub rog pw ncig Xas Ws.

8 Ces As Npis Sais hais rau Das Vis tias : « Hnub no, HUAB TAIS tso koj tus yeeb ncuab rau hauv koj txhais tes. Koj cia
kuv mus muab nws rab hmuv rov hno nws rau hauv av. Kuv nkaug ib teg xwb ces txaus lawm, tsis tas kuv yuav nkaug
ob teg ! »

9 Tab sis Das Vis hais rau As Npis Sais tias : « Koj tsis txhob tua nws ! Leej twg tua HUAB TAIS tus pleev, mas nws yuav
nyob tsis raug txim puas tau ? »

12 Ces Das Vis mus ze ntawm Xas Ws taw, nws muab Xas Ws rab hmuv thiab lub plhuaj taub dej. Ces nkawd khiav
lawm. Tsis muaj leej twg pom nkawd. Sawv daws tsaug zog tas. Tsis muaj tus hnov li.

13 Das Vis hla hav dej mus sab tim ub, nws mus saum lub ncov roob nrug deb ntawm Xas Ws.

22 Das Vis mam li hu Xas Ws nrov nrov tias : « Tus vaj rab hmuv nyob ntawm no ! Koj tso koj ib tug tub txib hla tuaj nqa mas !

23 Cia HUAB TAIS txiav txim rau nyias raws li nyias lub siab ncaj siab ncees. Hnub no HUAB TAIS muab koj rau hauv
kuv tes, tab sis kuv tsis kam tsa tes tua koj, HUAB TAIS tus pleev ! »

Yog Tswv Ntuj Lo Lus. Nws Lub Txiaj Ntsim

Zaj nyeem 2 :

Kos Lis Nthos : Tshooj : 15 Nqe : 45 – 49

Lub ntsiab lus : Yuav sawv rov los zoo li cas ?

45 Muaj lus sau tseg tias : ‘Thawj tus neeg yog As Das. Thaum Ntuj tsim nws, ces nws yog ib tug plig ciaj sia. Hos tus
As Das tshiab tom qab no, yog ib tug plig pub txoj sia.

46 Tab sis, tsis yog sab ntsuj plig xwb tawm los rau peb pom. Yog sab nqaij xub tawm los, ces sab ntsuj
plig mam tawm los tom qab.

47 Thawj tus neeg uas nws tawm ntawm av los, nws yog ntiaj teb tug. Tus neeg tshiab tom qab no, tawm pem qaum ntuj los.

48 Tus neeg ntiaj teb zoo li cas, mas cov neeg ntiaj teb kuj zoo li ntawd tas huv tib si. Hos tus neeg qaum Ntuj zoo li
cas, mas cov neeg qaum ntuj kuj zoo li ntawd tas huv tib si.

49 Peb xub hnav tus neeg ntiaj teb tus duab, ces peb mam li tau hnav tus neeg qaum ntuj tus duab.

Yog Tswv Ntuj Lo Lus. Nws Lub Txiaj Ntsim

Ntawv moo zoo :

Lus Kas : Tshooj : 6 Nqe : 27 – 38

Lub ntsiab lus : Txoj kev nyiam cov yeeb ncuab. Kev khuv leej thiab kev ua zoo rau luag.

27 « Hos kuv hais rau nej cov mloog kuv tias : Nej yuav nyiam nej cov yeeb ncuab, nej yuav ua zoo rau cov neeg ntxub nej,

28 nej foom lus zoo rau cov foom phem rau nej, nej thov Ntuj rau cov neeg xyav nej lub moo.

29 Leej twg ib ncuav pias rau koj sab plhu, koj tig sab tod rau nws ntaus thiab. Leej twg chua koj lub tsho tshaj sab, mas koj txhob nrog nws txeeb koj lub tsho hnav.

30 Leej twg thov koj, mas koj pub rau. Leej twg txeeb tau tej yam nyob hauv koj lub cuab tam, mas koj tsis txhob
ntaim kom nws xa rov qab.

31 Nej xav kom luag tej ua li cas rau nej, mas nej yuav ua ib yam li ntawd rau luag tej thiab.

32 Yog nej nyiam cov neeg nyiam nej, mas lawv yuav nco nej txiaj ntsim li cas ? Tab yog cov neeg txhaum, lawv kuj
nyiam cov uas nyiam lawv.

33 Yog nej ua zoo rau cov neeg ua zoo rau nej, mas lawv yuav nco nej txiaj ntsim li cas ? Cov neeg txhaum kuj ua tau ib yam li ntawd thiab.

34 Yog nej txais nyiaj rau cov neeg uas nej paub tias nej yuav tau rov qab, mas lawv yuav nco nej txiaj ntsim li cas ? Cov neeg txhaum kuj txais nyiaj rau cov neeg txhaum kom lawv rov tau li qub.

35 Hos nej, mas nej yuav nyiam nej cov yeeb ncuab, nej yuav ua qhov zoo thiab nej yuav txais nyiaj tsis tos luag them rov rau nej. Ces nej tus nqe zog yuav loj, thiab nej yuav yog Tus Nyob Siab Tshaj cov tub, vim nws siab zoo, nws ua zoo
rau cov neeg mom nws txiaj ntsim thiab rau cov neeg lim hiam.

36 Nej yuav hlub luag tej ib yam li nej Txiv hlub neeg.

37 Nej tsis txhob txiav txim, Ntuj thiaj yuav tsis txiav txim rau nej. Nej tsis txhob muab txim, Ntuj thiaj yuav tsis muab txim rau nej. Nej zam txhaum mog, Ntuj thiaj yuav zam rau nej.

38 Nej pub, Ntuj thiaj yuav pub rau nej. Ntuj yuav xuas ib lub tawb loj los luj, yuav muab tswm muab co kom ceev thiab
ntim nco lug ces Ntuj yuav muab hliv rau hauv nej nqaws tsho. Vim Ntuj yuav xuas lub tawb uas nej luj rov los luj rau nej.

Huab Tais Pleev. Lub qab ntuj neeg cav txog koj.

Phauj Xis Soeur Carmen CHAPDELAINE tau tso peb tseg hnub 14/02/2022

Par Aumônerie catholique Hmong de France

Décès de Soeur Carmen CHAPDELAINE le 14/02/2022 (mis à jour le 22/02/2022)

Tshaj tawm rau peb sawv daws paub hais tias Phauj Xis Soeur Carmen CHAPDELAINE nyob Canada tau tas sim neej hnub 14/02/2022. Phauj Xis tau nrog cov Txiv Plig pab thiab xyuas cov ntxhais Hmoob nyob Los Tsuas Teb ua ntej lub teb chaws tawg. Peb sawv daws ua ke thov Tswv Ntuj kom hlub Phauj Xis thiab nws tsev neeg.

C’est avec une grande tristesse que nous apprenons le décès de Soeur Carmen CHAPDELAINE Phauj Xis au Canada le 14 février 2022. Soeur Carmen a accompagné les jeunes filles Hmong du temps des missionnaires au Laos. Unissons-nous dans la prière et demandons au Christ sa miséricorde pour que Soeur Carmen repose dans la Paix et la Lumière de Dieu.

Ci-dessous le lien vers les informations et l’avis de décès :

https://www.coopfuneraireestrie.com/avis-de-deces/carmen-chapdelaine-208114/

Hnub chiv 6 ntawm lub caij nruab xyoo. Xyoo C

Par Aumônerie catholique Hmong de France

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1 :

Yes Les Mias : Tshooj : 17 Nqe : 5 – 8

Lub ntsiab lus : Ib co lus qhia ua neeg thoob tsib.

5 HUAB TAIS hais li no : « Tus neeg uas tso siab rau lwm tus neeg mas nws txoj hmoov yuav phem. Nws muab lub cev nqaij los ua nws lub zog, hos nws lub siab txav mus nyob deb ntawm HUAB TAIS.

6 Nws zoo li ib tsob pos tuaj nyob hauv hav maj sab. Nws tsis pom txoj kev noj qab nyob zoo tuaj txog. Nws nyob hauv
ib lub teb chaws suab puam qhuav, nyob hauv ib thaj av daw ntsev tsis muaj neeg nyob.

7 Hos tus neeg tso siab rau HUAB TAIS thiab npuab HUAB TAIS, mas nws txoj hmoov yuav zoo.

8 Nws zoo li ib tsob ntoo cog ze ntug dej. Nws nrhau cag mus txog tus dej. Thaum txog lub caij ntuj qhua nws tsis ntshai. Nws cov nplooj ntsuab mos nyoos mus li. Thaum txog lub xyoo ntuj qhuav qhawv nws tsis txhawj, nws txi txiv tsis tseg.

Yog Tswv Ntuj Lo Lus. Nws Lub Txiaj Ntsim

Zaj nyeem 2 :

Kos Lis Nthos : Tshooj : 15 Nqe : 12. 16 – 20

Lub ntsiab lus : Muaj kev sawv rov los.

12 Yog peb tshaj tias Leej Pleev sawv hauv cov tuag rov los lawm, vim li cas, nyem no, muaj tej tus hauv nej
hais tias tsis muaj kev sawv hauv cov tuag los ?

16 Yog cov tuag tsis sawv rov los, mas Leej Pleev kuj tsis tau sawv rov los tiag.

17 Yog Leej Pleev tsis sawv rov los, mas peb txoj kev ntseeg yog ib txoj kev cuav, hos nej, los nej tseem nyob hauv nej cov txhaum.

18 Thiab cov uas tau mus tsaug zog nyob hauv Leej Pleev, mas lawv ploj lawm tiag.

19 Peb cov uas tso siab rau Leej Pleev, yog peb tsuas muaj kev cia siab nyob hauv tiam neej no xwb, mas peb yog cov neeg txom nyem tshaj ib tsoom tib neeg huv si.

20 Tab sis tsis yog zoo li ntawd. Leej Pleev sawv hauv cov tuag rov los lawm tiag. Nyob hauv ib tsoom neeg uas mus
tsaug zog lawm, mas Leej Pleev yog thawj tug uas tau sawv rov los.

Yog Tswv Ntuj Lo Lus. Nws Lub Txiaj Ntsim

Ntawv moo zoo :

Lus Kas : Tshooj : 6 Nqe : 17. 20 – 26

Lub ntsiab lus : Tsoom sid raws Yes Xus qab. Txoj hmoov zoo. Txoj hmoov phem.

17 Yes Xus nrog cov Hauv Paus Xa Lus nqes los, nws sawv saum ib qho chaw tiaj. Muaj Yes Xus ib tsoom thwj tim
thiab ib pab neeg coob kawg tuaj ntawm xeev Yus Das, ntawm Yes Lus Xas Les, ntawm ntug dej ntuj Tws Los thiab Xis
Doos tuaj.

20 Yes Xus tsa muag ntsia nws cov thwj tim, nws hais tias : « Nej cov pluag, mas nej txoj hmoov zoo, vim Tswv Ntuj lub Ceeb Tsheej yog nej tug.

21 Nej cov uas nyem no nej tshaib, nej txoj hmoov zoo, vim nej yuav tau noj txaus siab. Nej cov uas nyem no nej quaj, nej txoj hmoov zoo, vim nej yuav luag.

22 Thaum muaj neeg ntxub nej, thaum luag ntiab nej, los luag cem nej, los xyav lus phem rau nej lub npe vim Neeg Leej Tub, mas nej txoj hmoov zoo.

23 Hnub ntawd, nej yuav zoo siab, nej yuav dhia hom khaj, vim nej tau txais koob haum loj nyob saum ntuj. Txheej
thaud, lawv cov yawg koob kuj tau ua li ntawd rau cov Yaj Saub.”

24 “Hos nej cov nplua nuj, mas nej txoj hmoov phem, vim nej twb txais kev nplij nej lawm.

25 Nej cov uas nyem no tau noj tsau, nej txoj hmoov phem, vim nej yuav tshaib. Nej cov uas nyem no nej luag, nej txoj
hmoov phem, vim nej yuav quaj thiab yuav ntsaj.

26 Thaum zeej tsoom cav lus zoo txog nej, mas nej txoj hmoov phem. Txheej thaud, lawv cov yawg koob kuj ua
li ntawd rau cov yaj saub cuav. »

Huab Tais Pleev. Lub qab ntuj neeg cav txog koj.