Rau sawv daws,

Hnub no los puas tag kis mus, peb npaj tos thiab cia siab tias TQ Banchong yuav rov los tsev. Cov kws kho mob tseem yuav soj ntsuam txog txhua yam uas yuav pab tau nws thiab kuaj roj ntsha. Tas li ntawd mas nws mam tau los tsev.

Nws zoo siab paub tias tus neeg uas saib xyuas nws twb npaj tau txhua yam tsheej tom tsev xws li ib lub txaj rau neeg mob pw, lub tshuab tso cua txias, cov tshuaj thiab ib lub me nyuam tub yees rau nws cov tshuaj.

Ntawm nej sawv daws, yog nej zoo siab yuav pab tau nws no, peb xav tau kev pab thiab txhawb los rau ob nqe lus nram no :

1/ Them nws cov tshuaj uas cov kws kho mob sau rau nws vim tias Teb Chaws Nplog tsis muaj sécurité sociale thim nqe rov qab.

 2/ Pab dej siab dej ntsws txhawb rau tus neeg saib xyuas txog TQ nruab hnub hmo ntuj nws lub nyiaj hli. Nws twb ua qhov hauj lwm no tau 2 xyoo los lawm.

Thov nej pab nug txhua cov neeg uas muaj siab pab peb thiab txhawb txog nws. Thov nej pab xa nyiaj tau hauv Western Union los puas hauv Moneygram mus rau Fondation P. Yves Bertrais uas tus Thawj coj yog Txhiaj Vwj Yaj/ Xia Vue Yang (Cov nyiaj ua kev pab no tsis zwm rau se nawd.

Peb tau tham meej nrog Cardinal Ling thiab cov leej choj uas tuav hauj lwm hauv lub diocèse Vientiane rau lub sij hawm uas TQ Banchong nws yuav tau ncaim peb mus lawm.

Lawv sawv daws yeej faj seeb txog txoj xwm no. Peb tau thov txog cov Hmoob kav tos liv nyob Nasala thiab Ban Nam Yarm kom lawv yeej meem npaj tuaj nram Vientiane thaum hnub ntawd los txog. Lub caij ua kab ke yuav tau ua lus Hmoob. Lawv yeej tau tshaj tso lus koom siab rov tuaj rau peb paub lawm.

Wb rov los tsev hnub tim 2 lub 10 hli 2024 no.

Txhiaj Vwj Yaj / Xia Vue Yang

TP Nyiaj Pov Foundation