Qhia txog kev sis ntsib hnub tim 28/12/2024
-Hnub samedi tim 28/12/2024, TP. Cwj Vuam Chiv nrog peb cov Hmoob nyob rau lub
nroog Castres, zoo siab thiab pom zoo sib txoos teev Ntuj ua kev nco txog xyoo 1954,
uas thawj pab Hmoob nyob zos Roob Nyuj Qus, xeev Moos Loob (Luang Prabang) tau
los txais kev ntseeg Ntuj.
-Thaum 13 teev, TP. Cwj Vuam Chiv nrog peb tsev neeg nqa ib tauv paj mus xyuas
peb txiv thiab peb niam thoj Tsav Ntxaij lub ntxa, uas nyob tsis deb ntawm tsev teev
Ntuj, ua kev nco txog cov laus thaud tau txais kev ntseeg ua ke.
-Thaum 14 teev, TP. Cwj Vuam Chiv nrog TP. Bories Bruno ua lub txoos txi Ntuj rau
sawv daws, uas muaj neeg tuaj kwv yees li 40, 50 leej hauv lub tsev teev Ntuj Saix.
-Thaum teev Ntuj tas. Sawv daws tawm ua ke mus sib ntsib me ntsis rau hauv ib lub
tsev siv ua si Longuegineste, tau txom ncauj sib tham ua ke.
-Nyob hauv lub tsev, tau dai me ntsis duab cov laus thaud nyob Roob Nyuj Qus nrog
TP. Nyiaj Pov, thiab txawb tus puav mlom ua chaw nco txog peb lub qub neej nyob
rau Los Tsuas. Peb muaj lus hais txog vim li cas ib txhia cov Hmoob zos Roob Nyuj
Qus ho hloov peb kev cai dab qhuas los txais kev ntseeg Ntuj Catholique.
-TP. Bories Bruno tau hais ob peb lo lus rau peb sawv daws, txog nws ntiag tug ntawm
kev ntseeg kev sib vam khom, hais tias nws yeej xyeej siab txais yog muaj kev vam
khom txog.
-Lo lus kawg, kuv kuj tau los hais me ntsis lus li TP. Cwj Vuam Chiv xav kom kuv hais
txog, vim li cas kuv yawm txiv Zam Nob thiab kuv txiv Tsav Ntxaij, lawv ho tuaj yeem
hloov kev cai dab qhuas hmoob los txais kev ntseeg Ntuj Catholique, nyob rau zos
Roob Nyuj Qus xyoo 1954.
-Ze li 17 teev, sawv daws thiaj pib sib ncaim, nrog nco ua zem zuag txog tej duab uas
yog lub qub neej kev khwv thaum ub, tej laus nyob rau Los Tsuas.

Qhua Xab THOJ