« Ntawm no yog phab 3 hais txog cov niam Xib Hwb lawv cov lus tim khawv. Cov lus tim khawv no sib lub caij lub nyoog thiaj li xam tau, nws tsom txog poj niam lub meej mom thiab nco pom zej zuag txog cov thawj pab pawg ntseeg hmoob uas cov txiv plig Oblats lawv saib xyuas. Ua tsaug rau cov niam tsev uas lawv txo lawv lub meej mom los qhib lawv lub siab qhia rau peb kawm paub txog haiv neeg Hmoob thawj kauj ruam nyob hauv kev ntseeg tim Los Tsuas Teb. »

Propos recueillis par Joanne Yang

Niam Xib Hwb Txiaj Hawj qhia txog nws tus kheej.

Kuv txiv yog Tooj Xeeb TSAB hos kuv niam yog Ntxhoo Yaj. Kuv txiv coj peb tsev neeg los ntseeg txog Tswv Ntuj xyoo 1963 nyob Los Tsuas Teb. Kuv niam kuv txiv hlub thiab saib me tub, me ntxhais muaj nqes ib yam.

Thaum kuv muaj 9 xyoos thiaj tau xa kuv nrog rau kuv ib tug niam laus thiab kuv ob tug nus peb mus kawm ntawv nyob pem lub nroog Luang Prabang Los Tsuas Teb. Peb cov ntxhais mus nrog cov Leej Phauj Italie nyob, hos cov tub mus nrog cov Txiv Plig Italie nyob. Kuv hu ua Npliaj Tsab, kuv yog niam Xib Hwb Txiaj Hawj Yaj. Kuv tus txiv wb sib qaws los ua txij nkawm nyob ua ke xyoo 1969 nyob lub xeev Sayaboury Los Tsuas Teb. Wb muaj 6 leej me nyuam, 3 leeg tub, 3 leeg ntxhais, muaj 14 leeg xeeb ntxwv thiab yog niam tais yawm txiv koob rau 2 leeg xeeb ntxwv. Wb lub neej los ua txij nkawm nyob ua ke sib hlub, sib pab tau 43 lub xyoos. Kuv tus txiv tau tso peb cov niam tub tseg, ncaim lub ntiaj teb no mus xyoo 2012 lub 11 hli nyob Fab Kis Teb, lub nroog Metz.

Peb lub neej thaum ub xyoo 1970.

Tam sim no kuv laus lawm kuv xav hais rau nej paub tias ua ib tug Xib Hwb tus niam tsev, yuav tau txhawb nws lub zog kom nws muaj siab rau leg nws txoj hauj lwm tshaj Tswv Ntuj Lub Moo Zoo rau peb tsoom hmoob thiab pab tsoom ntseeg nrog rau lub zej zog kev mob nkeeg. Xib Hwb tus niam tsev yuav tsum coj ib tug yam ntxwv zoo, txo nws lub meej mom, ua ib tug neeg siab ntev, siab loj siab dav, hwm nws tus txiv. Ua  ib tug niam tsev nquag tu nws lub vaj lub tsev kom huv si.

Tu nws tus txiv thiab nws cov me nyuam kom hnav huv si, cob qhia nws cov me nyuam kom mloog lus, paub cai, hwm niam hwm txiv, hwm cov neeg laus, ua siab zoo rau cov me nyuam hauv lub zos, ua ib tug qauv zoo qhia rau cov me nyuam hauv zos nquag mus koom thaj mis xas hnub chiv. Thaum tus txiv muaj kwv tij neej tsa tuaj hauv lub tsev, yuav tsum hu luag ntxhi thiab ua zaub ua mov pub rau lawv noj.

Muaj tej zaum ntuj teb tag hmo muaj neeg mob, lawv tuaj tsa nws tus txiv, los nws yuav tsum tsis txhob yws, yuav tsum luag ntxhi txhawb cov neeg raug kev nyuaj siab lub zog. Xib Hwb tus niam tsev yuav tsum nyiam thiab hlub, tsis tas li yuav tau pab tsoom ntseeg nrog rau lub zej zog, tshwj xeeb tshaj plaws yog cov neeg txom nyem thiab cov me nyuam ntsuag uas tsis muaj niam muaj txiv hlub.

Nws yuav tsum paub cog kev phooj ywg rau cov niam tsev thiab cov ntxhais hluas hauv lub zos, tsis yog rau cov niam tsev los cov ntxhais ntseeg xwb, vim tias muaj tej lub zos mas tseem muaj cov kwv tij neej tsa uas tseem coj txoj qub kev cai thiab. Muaj tej zaum mas Xib Hwb thiab nws poj niam me nyuam tseem mus nyob tej lub zos uas tsis tau muaj ib yim neeg txais kev ntseeg txog Tswv Ntuj Lub Moo Zoo li.

Xib Hwb tus niam tsev yuav tsum zoo siab hlo qhib rooj lug rau kwv tij neej tsa  tuaj tsham Xib Hwb. Muaj tej hmo, mas muaj neeg tuaj nyob hauv yus vaj yus tsev txog tsheej tag hmo, yuav tsum ua siab ntev.

Xyoo 1970 ntawd kuv tus kheej kuv yog ib tug niam tsev los puas ib tug niam Xib Hwb tseem hluas heev. Txhua yam kuv piav no ces kuv yeej tau xyaum coj li hais. Lub caij thaum ntawd kuv tsis tau xav dab tsi li vim tej niam tej txiv txoj kev qhuab qhia me nyuam ua neej nws yeej mus zoo li. Los ua lub neej  nyob rau teb chaws Fab Kis Teb no mam li xav tau tias tsis hais lub caij thaum ub los lub caij tam sim no, neeg ntiaj teb yeej saib cov poj niam lub meej mom, lub hwj chim qes tshaj cov txiv neej.

Yog ib qho tu siab rau peb ib tsoom poj niam Hmoob rau lub caij thaum ntawv. Cov Leej Choj Italie thiab Fab Kis lub caij ntawv lawv tsis nco tias yuav tau qhia cov Xib Hwb cov poj niam kom lawv pab tau lawv tus txiv thiab ; Yam li tias kom cov poj niam txawj coj cov ntseeg teev ntuj lub caij uas lawv tus txiv muaj chaw tawm rooj mus lawm, kom lawv txawj qhia ntawv hmoob, qhia xyaum nkauj teev ntuj, qhia cov niam tsev los cov ntxhais hluas xaws khaub ncaws, xaws tshuab. Vim tias lub caij ntawd mas cov niam tsev thiab cov ntxhais hluas nyob pem zos toj siab, lawv xuas tes xaws khaub ncaws hnab xwb.

Lub caij uas peb cov txiv tab tom kawm Tswv Ntuj Txoj Cai Lub Moo Zoo nyob hauv lub Tsev Hauv Paus, peb cov poj niam ces rau siab ntso mus ua vaj zaub, tu tsiaj txhu, ua zaub ua mov rau peb sawv daws noj, tu me tub me nyuam ib yam li ib tug niam tsev hmoob nyob pem zos toj siab xwb tiag.

Nco lub txiaj ntsim…

Kuv xav thiab kuv pom tau tias cov Leej Choj thaum ntawd lawv yeej yog peb niam peb txiv, peb yog lawv cov tub cov nyab, peb cov me nyuam yog lawv cov xeeb ntxwv. Peb muaj txog 70 tawm leej, peb tsis muaj kev txob, kev txhawj txog kev noj kev haus, lawv yog cov nres tas nrho, lawv tseem faib me ntsis nyiaj hnub nyiaj hlis los pab peb thiab. Kuv yuav ris cov Txiv Plig lawv tej txiaj ntsim mus ib txhiab ib txhis. Nco txog lub caij ntawd ces kuv tauv tsis taus lub kua muag li, saib zoo li yog nag hmo xwb.

Lub siab xav hais tias cas cov Leej Choj tsis muaj lub hom phiaj rau peb cov ua nyab, los ntshai lawv twb muaj kev nyuaj siab txaus rau peb lawm. Kuv yeej nco ntsoov lawv tej txiaj ntsim hlub peb, pab peb haiv Hmoob uas nyob pem tej zos toj roob hauv pes. Yog tsis muaj lawv ces yeej tsis muaj hnub no li.

Ntawv kuv txoj kev ntseeg thiab kev tso siab rau peb Txiv Tswv Ntuj…

Nyob hauv peb lub Tsev hauv Paus kawm los ua ib tug Xib Hwb tshaj Tswv Ntuj Lub Moo Zoo nyob rau nroog Luang Prabang Los Tsuas Teb, peb mus koom thaj mis xas txhua hnub thaum 8 teev sawv ntxov, thiab thaum yav tsaus ntuj peb mus hais Txoj Saw Mab Liab.

Txhua pluas mov, peb teev Ntuj ua Ntuj tsaug.

Yog li ntawd peb yuav tsum nco ntsoov txog peb tus Huab Tais Yes Xus cov lus hais qhia rau peb tias : 

« Neeg tsis kawg muab mov xwb los yug txoj sia, neeg tseem muab txhua lo lus tawm ntawm Tswv Ntuj lub ncauj los yug txoj siab thiab. » (Mas Tais zaj 4 nqes 4)

Peb yeej yuav tsum mus khwv ua liaj ua teb, thiab ua hauj lwm, kom tau zaub tau mov los yug peb tsev neeg, kom tau nyiaj los siv rau peb tsev neeg thiab. Tiam sis peb kuj yuav tsum qee peb lub sij hawm los teev ntuj thiab mus koom thaj mis xas, yuav tsis tau txhua hnub, tiam sis kom tau rau hnub chiv, npaj siab mus txais lub Cim Yug los yug peb txoj sia thiab peb tus ntsuj plig, kom peb tau lub txiaj ntsim muaj hwj chim, muaj zog los nres peb lub cev.

Nyob hauv peb txoj kev ntseeg, kev tso siab, mas thaj mis xas thiab lub Cim Yug, yog lub txiaj ntsim muaj nqes thiab muaj hwj chim loj tshaj plaws. Peb muaj Huab Tais Yes Xus nyob nrog nraim peb, yog txoj kev uas taug tsis muaj xwm txheej, yog txoj kev coj peb tus plig mus txog pem Tswv Ntuj lub Ceeb Tsheej.

Thaum peb thov ntuj mas peb tsis txhob ua xyem xyav, peb yuav tsum muaj txoj kev ntseeg thiab txoj kev tso siab tiag2, yog peb thov ib yam kev pab ntawm peb Txiv Tswv Ntuj thiab peb tus Huab Tais Yes Xus, yog peb tsis tau txais yam peb thov ntawd mas txhob tag kev cia siab. Peb yuav tsum nco ntsoov tias peb Txiv Tswv Ntuj thiab peb tus Huab Tais Yes Xus paub tias yam twg zoo dua rau peb, mas Nws yuav pub yam zoo dua ntawd rau peb.

Peb yuav tsum nquag teev ntuj, tso peb lub siab npuab rau peb Txiv Tswv Ntuj thiab peb tus Huab Tais Yes Xus kom peb muaj peb Txiv Tswv Ntuj lub hwj huam thiab lub zog loj nyob nrog nraim peb thiab Nws yuav tso Leej Tswv Yim Ntshiab los coj peb txoj hauv kev ua neej, ces peb yuav  yeej tas ib puas tsav yam kev nyuaj siab nyob hauv peb lub neej mog.

Peb yuav tsum nquag hais Txoj Saw Mab Liab, yog ib txoj kev teev ntuj tseem ceeb thiab muaj nuj nqes loj tas nrho. Thaum nej hais Txoj Saw Mab Liab, nej txhob xav tias cas yuav ntev ua luaj, nej xav tias txhua zaj Koj nyob zoo Mab Liab yog ib lub teeb ci lam lug coj peb txoj hauv kev mus cuag peb Txiv Tswv Ntuj.

Peb Niam Mab Liab yog peb ib Leej Niam nyob nrog nraim ntawm peb ib sab, Nws paub txhua yam kev nyuaj siab hauv peb lub siab, Nws pab peb daws txhua yam teeb meem nyob ntawm nws Leej Tub peb tus Huab Tais Yes Xus Pleev lub xub ntiag. Nws pab cev peb tej lus thov rau Nws Leej Tub peb tus Huab Tais Yes Xus. Thov kom Peb Leej Txiv Tswv Ntuj, thiab peb tus Huab Tais Yes Xus txoj kev Thaj Yeeb nyob nrog nraim nej mog.

Niam Xib Hwb Txiaj Hawj Yaj