Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

HIS  XAIS  61: 1-2, 10-11

LUB NTSIAB LUS : Yes Xus yog tus ua kom cov neeg txom nyem rov zoo siab tuaj. Cov neeg ntseeg txog Yes Xus lawv nrog Yes Xus ua kom tsoom neeg txom nyeem dim ntawm kev ntxhov siab.

COV LUS NYOB HAUV NTAWV HIS XAIS:

1 – HUAB TAIS Tswv Ntuj lub tswv yim nyob saum kuv, vim HUAB TAIS pleev kuv. 

      Nws tso kuv xa lub Moo Zoo rau cov neeg txheej qis, tshaj kev cawm rau cov thoj nam nyob pej kum teb, tshaj kev  twj lij rau cov neeg nyob hauv tsev loj faj.

2 – HUAB TAIS xa kuv mus tshaj HUAB TAIS ib lub xyoo pub txiaj ntsim,

     tshaj  tias muaj ib hnub uas peb tus Tswv Ntuj yuav rob caub. 

      HUAB TAIS xa kuv mus nplij cov neeg ntoo xyom kom sawv.

10 – Kuv zoo siab tag nrho, kuv dhia daj dhia luag nyob hauv HUAB TAIS. Kuv tus plig dhia hom khaj nyob hauv kuv tus Tswv Ntuj, vim Tswv Ntuj muab kev cawm cov tsoos rau kuv hnav, nws muab kev yeej lub tsho tshaj sab qhwv kuv, xws li tus nraug vauv tshiab kho nws hauv phuam, xws li tus nkauj nyab muab npauj kub npauj nyiag los coj.

11 – Tswv Ntuj ua kom muaj txoj kev ncaj thiab txoj kev cav txog Tswv Ntuj nthaw kaus rau tas txhias haiv neeg pom, ib yam li kaus nthaw nyob hauv thaj av zoo thiab noob tuaj nyob hauv lub vaj.

Yog Tswv Ntuj Lo Lus        Nws lus txiaj ntsim

Nkauj Paj Nruag             KUV TUS PLIG HOM KHAJ       

(Lus Kas 1)

Txais: Kuv tus plig hom khaj nyob hauv kuv tus Tswv Ntuj.

1 – Kuv tus plig cav txog Tswv Ntuj lub hwj chim. Kuv lub tswv yim hom khaj nyob hauv Tswv Ntuj, tus cawm kuv vim nws dauv muag ntsia nws tus ntxhais tsis muaj tsim.

Txij no mus, txhua haiv neeg yuav hais tias kuv txoj hmoov zoo.

2 – Tus Muaj Hwj Huam tas nrho, nws ua tej yam loj rau kuv, nws lub npe ntshiab.

Nws khuv leej cov neeg hwm nws txheej dhau txheej.

3 – Nws pub tej yam zoo rau cov neeg tshaib noj. Nws ntiab cov neeg muaj rov qab mus tes qhuav.

Huab Tais pab nws tus tub txib His Xas Lais vim nws nco ntsoov tias nws lub siab hlub neeg.

ZAJ NYEEM OB

1  TES  XAS  LOS  NIS  5: 16-24

LUB NTSIAB LUS : Cov neeg ntseeg yuav zoo siab luag nyav mus li. Lawv yuav xyiv fab mloog Leej Ntuj Plig qhia tej txoj kev tshiab ua Yes Xus tim khawv.

COV LUS PAJ LUG SAU TUAJ RAU TSOOM PLEEV NYOB TES XAS LOS NIS :

16 – Nej ua  siab kaj lug mus li. 

17 – Nej  teev Ntuj tsis tseg. 

18 – Tab txawm muaj xwm dab tsi tshwm sim tuaj, los nej yuav ua Ntuj tsaug mus li. 

        Tswv Ntuj lub siab xav kom nej ua li ntawd nyob hauv Yes Xus Pleev. 

19 – Nej txhob tua Leej Ntuj Plig xws li tua teeb. 

20 – Nej txhob thuam lub txiaj ntsim ua Yaj Saub. 

21 – Nej hnov yam twg, mas nej tshuaj saib puas tseeb tso : yam twg zoo, mas nej khaws tseg. 

22 – Nej caiv txhua txoj kev phem mog.

23 – Thov kom tus Tswv Ntuj siab kaj lug ua kom nej ntshiab tuaj. 

        Thov kom nej txuag tau nej lub tswv yim, nej tus plig, kom nej lub cev txhob muaj chaw xyeej,

        mus txog lub caij peb tus Huab Tais Yes Xus Pleev rov los. 

24 – Tus hu nej, nws pheej xeeb : nws yuav ua xws li kuv hais saum no. 

Yog Tswv Ntuj Lo Lus        Nws lus txiaj ntsim

NTAWV  MOO  ZOO

ZAM  1:  6-8, 19-28

LUB NTSIAB LUS : Tus tshaj Yes Xus lub Moo Zoo nws yuav nco txog Yes Xus lub koob meej xwb. Yus txhob nco txog yus lub koob meej.

COV LUS NYOB HAUV ZAM NTAWV MOO ZOO :

6 – Muaj ib tug neeg tuaj, yog Tswv Ntuj xa nws tuaj.  Nws lub npe hu ua Zam. 

7 – Nws yog ib tug tim khawv tuaj ua pov thawj txog qhov pom kev, kom txhua leej txhua tus ntseeg vim nws. 

8 – Tus ntawd tsis yog qhov pom kev, tab sis nws yuav ua tim khawv txog qhov pom kev.

19 – Thaum cov Yus Das xa ib co leej choj thiab ib co les vis tuaj ntawm Yes Lus Xas Les mus nug Zam hais tias :

       « Koj yog leej twg ? » Mas Zam ua tim khawv zoo li no : 

20 – Zam lees, nws tsis zais, nws lees tias : « Kuv tsis yog Leej Pleev. » 

21 –  Lawv nug Zam tias :

        « Ua li koj yog leej twg ?  Koj puas yog Es Lias ? » 

       Zam hais tias :

         « Kuv tsis yog. » 

          « Koj puas yog tus Yaj Saub ? » 

           Zam teb tias : « Tsis yog. » 

22 – Lawv thiaj hais rau nws tias :

         « Koj yog leej twg ?  Peb yuav tsum coj ib lo lus teb rov mus rau cov xa peb tuaj. 

           Koj hais dab tsi txog koj ? » 

23 – Zam hais tias :

        « Kuv yog tus neeg nyob hauv teb chaws quav poj lub suab qw tias :

          Nej ua kom Huab Tais txoj kev rov tiaj, raws li yaj saub His Xais tau hais tseg. »

24 – Cov uas lawv xa tuaj yog ib co Fas Lis Xais. 

25 – Lawv nug Zam tias :

       « Koj tsis yog Leej Pleev, tsis yog Es Lias, thiab tsis yog tus Yaj Saub,

         vim li cas koj thiaj ua kab ke ntxuav ? » 

26 – Zam teb rau lawv tias :

       « Kuv ua kab ke ntxuav nyob hauv dej.  Hos nyob hauv nej, muaj ib tug uas nej tsis paub, 

27 – tus ntawd yuav lawv kuv qab tuaj, kuv tsis tsim nyog daws nws txoj hlua khau. » 

28 – Tej ntawd tshwm sim tuaj nyob Npes Tas Nias, nyob sab dej Yos Las Das tim ub,

        ntawm thaj chaw uas Zam ua kab ke ntxuav.

Huab Tais Pleev.      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

HIS XAIS 40 : 1-5, 9-11

LUB NTSIAB LUS : Tswv Ntuj rov tuaj xyuas nws haiv neeg mus li. Nws tuaj saib cov ntseeg txog nws xws li ib tug tswv saib nws cov yaj.

COV LUS NYOB HAUV NTAWV HIS XAIS :

1 – Nej tus Tswv Ntuj hais tias : « Nej nplij kuv haiv neeg, nej nplij lawv mas ! 

2 – Nej hais lus rau hauv Yes Lus Xas Les nruab siab. 

     Nej hais nrov nrov rau nws tias nws lub caij ua qhev dhau lawm.

     Nws them txim txhaum tas lawm. Cov xwm uas nws txais ntawm

     HUAB TAIS txhais tes los them nws cov txhaum twb tshaj nws cov txhaum ob npaug lawm. »

3 – Muaj ib lub suab qw tias : 

    « Nej npaj ib txog kev hauv teb chaws suab puam rau Tswv Ntuj taug. 

      Nej ncaws ib txog kev ncaj hauv cov teb chaws quav poj rau peb tus Tswv Ntuj. 

4 – Nej txhub cov hav tob kom siab, kom cov roob thiab cov hauv toj cia li qis,

      kom cov tiaj muaj pov toj, hloov ua hav tiaj tus yees, kom cov toj ntxhab hloov ua tshav puam.  

5 – HUAB TAIS lub hwj chim yuav tawm los. Txhua tus muaj lub cev nqaij puav leej yuav pom lub hwj chim,

      vim HUAB TAIS lub ncauj tau hais lus.

9 – Koj yog tus fi tsab xov zoo no mus rau Xis Yoos. Koj nce mus saum ib lub roob siab, koj tsa suab qw nrov nrov mas ! 

      Koj  yog tus fi tsab xov zoo mus rau Yes Lus Xas Les, koj txhob ntshai cuab suab. 

      Koj hais rau cov nroog Yus Das tias : « Ntsia ntawm no saib, yog nej tus Tswv Ntuj. »

10 – Saib HUAB TAIS Tswv Ntuj nyob ntawm no.  Nws tuaj txog, nws muaj hwj huam !

        Nws txhais npab ua tswv kav sawv daws.  Nej ntsia tus nqi zog nrog nws. 

        Cov nyiaj nws them nyob ntawm nws xub ntiag.

11 – Nws zoo li ib tug Tswv saib nws cov yaj nog zaub. Nws puag cov me nyuam yaj nyob hauv nws xub ntiag. Nws coj cov maum yaj rov mus so hauv nkuaj.

Yog Tswv Ntuj Lo Lus        Nws lus txiaj ntsim

Nkauj Paj Nruag            CIA PEB POM KOJ LUB SIAB ZOO     

(NPN 85)

Txais: Huab Tais, thov cia peb pom koj lub siab zoo ! Thov pub koj txoj kev cawm neeg rau peb!

1 – Kuv mloog saib Tswv Ntuj hais dab tsi. Huab Tais hais rau nws haiv neeg tias, “Nej nyob kaj lug!”

Huab Tais txoj kev cawm los nyob ze cov neeg hwm nws. Nws lub koob meej nqes los nyob hauv peb lub teb chaws.

2 – Txoj kev cawm thiab kev tseeb los sib cuag. Kev thaj yeeb thiab kev haum pheej los sib koom.

Txoj kev tseeb hlav ib tug txoov kaus nyob hauv ntiaj teb, kev haum pheej nqes saum ntuj los.

3 – Huab Tais pub txiaj ntsim, peb cov av pub qoob loo. Kev haum pheej mus ua Huab Tais ntej,

nws npaj txoj kev thaj yeeb rau peb taug.

ZAJ NYEEM OB

2 POB ZEB 3 : 8-14

LUB NTSIAB LUS : Huab Tais ua siab ntev tos kom peb tig los yuav lub siab tshiab, tab sis peb txhob ncua ntev vim peb paub tias yog thaum twg Huab Tais tuaj tos peb.

COV LUS POB ZEB SAU TUAJ RAU TSOOM PLEEV :

8  – Cov zoo nyiam, nej tsis txhob ua zoo ib yam li nej tsis to taub tias,

       nyob ntawm Huab Tais xub ntiag, ib hnub yog zoo li ib txhiab xyoo,

       ib txhiab xyoo yog zoo ib yam li ib hnub. 

9 – Huab Tais tsis ncua lo lus nws cog  xws li qee leej uas lawv thuam tias

      Huab Tais ua yam twg mas nws ua qeeb qeeb.  Tab sis, yog vim Huab Tais ua siab ntev rau nej, nws tsis xav kom ib tug ploj li, nws tsuas xav kom sawv daws nyob mus txog hnub uas lawv tig los hloov lub siab tshiab. 

10 – Huab Tais lub Hnub Nyoog yuav los txog xws li ib tug tub sab. 

       Hnub ntawd, ib lub suab xuav nrov nrov, yuav ua txheej  ntuj yaj tas nrho, txhua tsav txhua yam yuav kub hnyiab thiab yuav yaj tas, lub ntiaj teb thiab tas ib puas tsav yam dej num hauv ntiaj teb yuav kub hnyiab thiab yaj tas.

11 – Yog vim txhua yam yuav yaj tas li ntawd,  mas  nej  yuav  tsum coj tus yam ntxwv ntshiab, thiab yuav teev Ntuj tsis tseg. 

12 – Vim nej tos Tswv Ntuj lub Hnub Nyoog, mas nej xav kom Tswv Ntuj lub Hnub Nyoog los txog sai dua.

        Hnub ntawd cov txheej ntuj yuav kub hnyiab thiab yuav plam tas, hluav taws yuav kub txhua tsav txhua yam yaj tas huv tib si. 

13 – Peb tos txog ib lub ntuj tshiab thiab ib lub ntiaj teb tshiab, raws li Tswv Ntuj tau cog lus tias :

        txoj kev ncaj yuav nyob txawm hauv lub ntuj tshiab thiab lub ntiaj teb tshiab ntawd.

14 – Cov zoo nyiam, lub caij nej tos no, nej yuav rau siab ua kom Tswv Ntuj pom tias nej tsis tsuas ib tee qias, thiab tsis muaj ib qho xyeej, ces thaum  Huab Tais los txog, nws yuav pom nej nyob hauv txoj kev kaj siab lug.

Yog Tswv Ntuj Lo Lus        Nws lus txiaj ntsim

NTAWV MOO ZOO        

MAS KOS 1 : 1-8

LUB NTSIAB LUS : Mas Kos ntuas peb kom peb tig los yuav lub siab tshiab tos Yes Xus yuav tuaj. Yog peb coj tus yam ntxwv them txim txhaum mas peb lub siab yuav kaj.

COV LUS HAUV MAS KOS NTAWV MOO ZOO :

1 – Cov lus chiv lub Moo Zoo hais txog Yes Xus Pleev, Tswv Ntuj Leej Tub. 

2 – Muaj raws li cov lus nyob hauv yaj saub His Xais phau ntawv, nws hais tias :

Kuv xa kuv tus tub tshaj xo mus ua koj ntej. Nws yuav npaj koj txoj kev.

3 – Tus qw hauv teb chaws quav poj lub suab hais tias :

Nej npaj txoj kev rau Huab Tais, nej kho nws cov hauv kev kom ncaj.

4 – Zam, tus ua kab ke Ntxuav, tawm tuaj nyob teb chaws quav poj, 

nws tshaj ib co kab ke ntxuav pab hloov siab kom Ntuj zam txhaum.

5 – Tas cov neeg hauv teb chaws Yus Das  thiab tas cov nyob Yes Lus Xas Les tuaj cuag nws. 

Lawv lees txhaum, ces Zam ntxuav lawv nyob hauv tus dej Yos Las Das.

6 – Zam hnav plaub ntxhuav, nws sia ib daim tawv tsiaj ncig nws lub duav. 

Nws noj kooj thiab zib mu qus. 

7 – Zam tshaj tias : « Tus lawv kuv qab tuaj, nws muaj zog dua kuv;

kuv tsis tsim nyog khoov daws nws txoj hlua khau. 

8 – Ntawm kuv, kuv muab dej los ntxuav nej, hos nws mas nws yuav ntxuav nej nyob hauv Leej Ntuj Plig Ntshiab.

Huab Tais Pleev.      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB   

HIS XAIS  63 : 16-17, 19, 64 : 3-8

LUB NTSIAB LUS : Peb thov kom Tswv Ntuj zam txhaum rau peb xws li nws xub ua ntau zaus rau cov His Xas Lais thaud, peb tso siab, vim Tswv Ntuj nqes los nrog neeg nyob.

COV LUB NYOB HAUV NTAWV HIS XAIS :

16 – HUAB TAIS, koj yog peb txiv. Has Nplas Has tsis paub peb lawm.

       His Xas Lais zeem tsis tau peb. HUAB TAIS, tus ua peb txiv yog koj.

       Txij txheej thaud los, koj lub npe hu ua « Tus txhiv peb. »

17 – HUAB TAIS, yog vim li cas koj thiaj ua kom peb poob zoo nyob deb ntawm koj txoj kev ? 

       Yog vim li cas koj thiaj ua kom peb lub siab tawv thiab tsis xav hwm koj ? Thov koj rov los mas,

        vim koj cov tub txib thiab cov xeem neeg ua koj lub cuab tam. 

19 – Tau ntev los lawm peb yog cov neeg uas koj tsis tswj. peb yog cov neeg tsis tuav koj lub npe

hu txog koj. Ab ! Kheev lam koj nqes los, mas cov roob yuav muaj dej ntws ua ntshua niab.                

3 – Tsis muaj ib lub pob ntseg tau hnov, tsis muaj ib lub qhov muag tau pom lwm tus Tswv Ntuj ua zoo npaum li koj rau cov neeg tso siab rau koj. Koj mus cuag cov neeg, mus taug kev ncaj thiab

nco nraim koj tej kev. Saib, koj tau npau taws, peb tau ua txhaum. Tau ntev los peb tsis npuab koj.

5 – Peb sawv daws tau ua zoo li tus neeg tsis huv. Peb tej num zoo li ib co khaub ncaws tsuas.

      Peb sawv daws ntsws xws li cov nplooj ziab tshav. Peb cov txhaum ntsawj peb xws li cua. 

6 – Tsis muaj leej twg hu txog koj lub npe, tsis muaj leej twg tsim dheev los nyob khov kho hauv koj.

      Vim koj muab koj lub ntsej muag zais, koj tso peb zwm rau peb cov txhaum.

7 – Tsis kav, HUAB TAIS koj yog peb txiv. Peb yog av luaj, koj yog tus puab peb. 

      Yog koj txhais tes puab peb sawv daws. 

8 – HUAB TAIS, koj txhob npau taws heev dhau. Koj txhob nco txog peb cov txhaum mus li. 

      Thov koj ntsia mas ! Peb sawv daws yog koj haiv neeg.

Yog Tswv Ntuj Lo Lus         Nws lus txiaj ntsim

Nkauj Paj Nruag              THOV COJ PEB ROV LOS CUAG KOJ                

(NPN 80-2)

Txais: Huab Tais, thov coj peb rov los cuag koj. Thov koj pub peb pom koj lub ntsej muag ces peb yuav tau txais kev cawm.

1 – Tus zoo Tswv zov His Xas Lais, koj mloog mog. Koj zaum saum koj lub theej kiab, koj ci ntsa iab.

Koj qhib koj lub hwj huam tawm los, koj tuaj cawm peb mas!

2 – Tswv Ntuj muaj hwj huam tas nrho, koj rov los mas! Koj nyob saum ntuj dauv muag los ntsia, koj yuav pom. Thov koj nqes los xyuas koj lub vaj txiv cawv. Koj nqes los xyuas tsob txiv cawv uas koj txhais tes xis tau cog thiab xyuas tus tub uas txais koj lub zog.

3 – Thov koj tso koj txhais tes rau saum tus nyob ntawm koj sab xis, rau saum tus tub uas txais koj lub zog.

Peb yuav tsis txav mus deb koj ib zaug ntxiv. Koj ua kom peb muaj txoj sia nyob, peb yuav hu txog koj lub npe.

ZAJ NYEEM OB

1 KOS LIS NTHOS 1 : 3-9

LUB NTSIAB LUS : Thaum peb ntsib kev ntseeg thawj zaug peb tau txais Yes Xus lub txiaj ntsim. Tas peb sid peb yuav ua kom kev paub Yes Xus thiab kev nyiam Yes Xus hlob mus zuj zus txog hnub peb yuav rov mus pom Yes Xus.

COV LUS PAJ LUG SAU TUAJ RAU COV PLEEV NYOB KOS LIS NTHOS :

3 – Thov  kom  peb  Txiv  Tswv Ntuj thiab Huab Tais Yes Xus Pleev pub txiaj ntsim thiab kev thaj yeeb rau nej. 

4 – Kuv ua Tswv Ntuj tsaug tsis tseg, vim lub txiaj ntsim uas Tswv Ntuj tau pub rau nej,

nyob hauv Yes Xus Pleev. 

5 – Vim nej nplua nuj nyob hauv Yes Xus : nej tau Lo Lus muaj nqe li nyiaj,

nej tau zaj txuj ci muaj nqe li kub, 

6 – vim li ntawd, nej tej hauj lwm ua Leej Pleev tim khawv muaj zog tuaj. 

7 – Tsis tshuav ib lub txiaj ntsim uas nej tsis tau txais,

thaum  nej tos peb tus Huab Tais Yes Xus Pleev yuav tawm los rau pom xyeem. 

8 – Nws yuav ua kom nej nyob ruaj nreb txog qhov kawg, kom hnub uas peb tus Huab Tais Yes Xus Pleev rov los txog, mas tsis muaj ib qho xyeej nyob hauv nej.

9 – Tswv Ntuj tsis fav xeeb li, yog nws hu nej kom nej nrog nws

Leej Tub peb tus Huab Tais Yes Xus Pleev koom ib txog hmoov.

Yog Tswv Ntuj Lo Lus         Nws lus txiaj ntsim

NTAWV MOO ZOO

MAS KOS     13 : 33-37

LUB NTSIAB LUS : Peb yuav ceev faj xws li cov neeg zov hmo : vim niaj hnub Yes Xus tuaj cuag peb. Yog peb txawj pom Yes Xus nyob hauv cov xwm niaj hnub tshwm sim, hnub kawg peb yuav tsis ntshai Yes Xus.

COV LUS NYOB HAUV MAS KOS NTAWV MOO ZOO :

33 – Nej ceev faj, nej zov hmo, vim nej tsis paub tias thaum twg thiaj yog lub sij hawm. 

34 – Zoo li ib tug neeg tawm rooj mus deb : Nws tso nws vaj tse cia,

nws muab cai rau cov tub txib, nws faib ib leeg ib txog hauj lwm. 

Nws kom tus zov qhov rooj zov hmo. 

35 – Nej zov hmo mog, vim nej tsis paub thaum twg tus tswv tsev yuav rov los,

puas yog thaum tsaus ntuj, los thaum ib tag hmo, thaum qaib qua los thaum kaj ntug. 

36 – Tsam nws los txog thaum nej tsis nco faj,  nws pom nej tsaug zog. 

37 – Qhov kuv hais rau nej no, kuv kuj hais rau tas sawv daws huv si :

« Nej zov hmo mog ! »

Huab Tais Pleev.      Lub qab ntuj neeg cav txog koj      

                                                                  Hwm Yes Xus ua Vaj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

ES XES KIAS _34             11-16

LUB NTSIAB LUS :   Yes Xus yog tus Vaj hlub tsoom ntseeg xws tus tswv zov yaj hlub nws pab yaj.

COV LUS NYOB HAUV NTAWV ES XES LIAS :

11 – HUAB TAIS Tswv Ntuj hais li no : Zaum no, tus yuav tsob hwb kuv pab yaj yog kuv. 

Kuv yuav mus tshuaj xyuas. 

12 – Kuv yuav mus tshuaj xyuas kuv pab yaj zoo li ib tug tswv zov yaj,

thaum nws rov nrhiav tau nws cov yaj uas tawg ua lwj ua liam,

thaum uas ntuj tsaus pos huab nti.

13 – Kuv yuav kom lawv tsiv ntawm cov haiv neeg uas lawv nrog nyob,

kuv yuav sau lawv ntawm pej kum teb los,

kuv yuav coj lawv rov los rau hauv lawv thaj av. 

Kuv yuav cia lawv nog zaub nyob pem His Xas Lais tej hauv roob,

nram tej vos hav thiab tas qhov txhia chaw uas muaj neeg nyob hauv lub teb chaws. 

14 – Kuv yuav cia lawv nog zaub nyob hauv ib thaj chaw zaub mos nyoos,

thiab His Xas Lais tej hauv roob yuav yog lawv chaw nog zaub uas lawv yuav tau so dhuav. 

Kuv pab yaj yuav nog tej hav nyom ntsuab xiab saum His Xas Lais tej toj roob. 

15 – HUAB TAIS Tswv Ntuj hais li no: 

Yog kuv yuav coj kuv cov yaj mus nog zaub, thiab ua kom lawv tau so. 

16 – Kuv yuav nrhiav tus poob zoo, kuv yuav coj tus ncaim npoj rov los poo npoj,

kuv yuav qhwv tus raug qhov txhab, kuv yuav kho tus muaj mob kom zoo. 

Tus yaj rog thiab noj qab nyob zoo kuv yuav saib xyuas nws. 

Kuv yuav coj cov yaj mus nog zaub raws txoj kev ncaj.     

Yog Tswv Ntuj Lo Lus        Nws lus txiaj ntsim

Nkauj Paj Nruag             HUAB TAIS YOG TUS TSWV ZOV YAJ                       

(NPN 23-2) (Zaj 73)

Txais: Huab Tais yog tus Zoo Tswv Zov Yaj, nws zov kuv, kuv tsis ntshaw dab tsi li!

1 – Huab Tais yog kuv tus tswv zov yaj, kuv tsis ntshaw dab tsi.

Nws tso kuv nyob hauv tej tshav zaub mos.

2 – Nws coj kuv mus so nyob ze dej, nws rov ntxiv zog rau kuv tus plig.

Nws coj kuv mus taug txoj kev ncaj kom nws lub npe nto koob meej.

3 – Cov neeg ntxub kuv, lawv hnyos kuv. Koj npaj ib roog qav rau ntawm kuv xub ntiag.

Koj pleev roj tsw qab rau saum kuv taub hau. Koj hliv cawv puv lub ntim rau kuv haus.

4 -Tas kuv sim neej, kev kaj siab thiab kev hlub nrog nraim kuv.

Tas kuv sim neej, kuv yuav nyob hauv Huab Tais tsev.

ZAJ NYEEM OB               

1 KOS LIS NTHOS            15 : 20-26, 28

LUB NTSIAB LUS :   Tswv Ntuj tso tas puas tsav yam kom zwm rau Yes Xus. Thiab Yes Xus coj tas  txhia leej txhia tus kom tuaj zwm rau Tswv Ntuj.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

20 – Tab sis tsis yog zoo li ntawd. Leej Pleev sawv hauv cov tuag rov los lawm tiag. 

Nyob hauv ib tsoom neeg uas mus tsaug zog lawm, mas Leej Pleev yog thawj tug uas tau sawv rov los. 

21 – Tim ib tug neeg, mas txoj kev tuag thiaj li txeem los. Tab sis ib tug neeg rov coj tau txoj kev sawv rov los rau cov tuag. 

22 – Sawv daws tuag nyob hauv As Das. Tab sis sawv daws yuav ciaj rov los nyob hauv Leej Pleev. 

23 – Nyias muaj nyias lub sij hawm sawv rov los : tus xub sawv, yog Leej Pleev, nws yog tus ntaus thawj. 

Thaum txog Leej Pleev lub Hnub Nyoog tawm rov los, mas Leej Pleev cov neeg yuav sawv rov los. 

24 – Thaum ntawd yuav yog lub zim txwv kawg : Leej Pleev yuav rhuav cov vaj, _cov tswj lub ntiaj teb,

thiab cov muaj hwj _huam, ces nws yuav muab lub hwj chim ua vaj cob rov rau Leej Txiv Tswv Ntuj.  

25 – Leej Pleev yuav ua vaj mus txog lub caij Leej Txiv tso tsoom yeeb

ncuab tas tib si rau hauv nws qab xib taws. 

26 – Tus yeeb ncuab kawg, uas nws yuav rhuav, yog txoj kev tuag. 

28 – Thaum Leej Tub tau tas puas tsav yam nyob hauv nws qab xib taws lawm,

mas nws kuj yuav zwm rau tus uas tau muab tas txhua tsav txhua yam los zwm rau nws,

kom Tswv Ntuj nyob hauv txhua leej txhua tus.  

Yog Tswv Ntuj Lo Lus        Nws lus txiaj ntsim

NTAWV MOO ZOO                      

MAS TAIS 25:31-46

LUB NTSIAB LUS :   Yes Xus yog tus Vaj _txiav txim rau nws tsoom pej xeem, nws _tsuas saib lawv puas tau ua cov hauj lwm sib nyiam sib hlub.

COV LUS NYOB HAUV MAS TAIS NTAWV MOO ZOO :

31 – “Thaum Neeg Leej Tub yuav rov los, nws yuav muaj koob meej. Tas tsoom Tshiab yuav nrog nws los. 

Nws yuav zaum saum nws lub theej kiab muaj koob meej. 

32 – Tas ib tsoom haiv neeg yuav sib sau nyob ntawm nws xub ntiag. 

Nws yuav cais _tsoom neeg xws li tus zov yaj cais cov yaj ntawm cov tshis. 

33 – Nws yuav cia cov yaj rau ntawm nws sab xis, cia cov tshis rau ntawm nws sab laug.   

34 – Ces tus Vaj yuav hais rau cov nyob sab xis tias : “Nej los mog ! Nej yog cov uas kuv Txiv pub txoj hmoov zoo rau.  Nej txais lub Ceeb Tsheej uas Ntuj npaj tseg rau nej txij puag

thaum pib tsim lub sim ceeb los ua nej tug. 

35 – Vim tias kuv tshaib plab, nej pub rau kuv noj ; kuv nqhis dej,

nej pub rau kuv haus, kuv yog ib tug pej kum neeg, nej txais kuv ; 

36 – kuv liab qab, nej muab rau kuv hnav ; kuv mob, nej tuaj xyuas kuv ;

kuv nyob hauv tsev loj faj, nej tuaj tsham kuv.”

37 – Ces cov neeg ncaj yuav teb tias :

“Huab Tais, thaum twg peb tau pom koj tshaib plab ces peb tau pub rau koj noj,

pom koj nqhis dej, ces peb tau _muab rau koj haus, 

38 – pom koj yog ib tug pej kum neeg, ces peb tau txais koj,

pom koj liab qab ces tau muab rau koj hnav ? 

39 – Pom koj mob los nyob hauv tsev loj faj, ces peb tau tuaj xyuas koj ?” 

40 – Tus Vaj yuav teb rau lawv li no : “Kuv hais tseeb rau nej. 

Nej tau ua npaum li cas rau cov me tshaj hauv kuv tsoom _kwv, mas yog nej ua rau kuv.”

41 – Ces tus vaj yuav hais rau cov nyob sab laug tias : “Nej txoj hmoov phem. _Nej khiav mus deb kuv,

mus nyob hauv cov hluav taws kub tsis txawj tuag, uas Ntuj npaj rau tus dab phem thiab nws cov dab. 

42 – Vim thaum kuv tshaib plab nej tsis pub rau kuv noj, kuv nqhis dej nej tsis pub rau kuv haus, 

43 – kuv yog ib tug pej kum neeg nej tsis txais kuv, kuv liab qab nej tsis muab rau kuv hnav,

kuv mob thiab kuv nyob hauv tsev loj faj nej tsis tuaj xyuas kuv.” 

44 – Ces cov ntawd yuav teb rau tus Vaj tias :

“Huab Tais, thaum twg peb tau pom koj tshaib plab los nqhis dej,

pom koj yog ib tug pej kum neeg, pom koj _liab qab,

pom koj mob los nyob hauv tsev loj faj, ces peb tsis tau pab koj ?” 

45 – Ces tus Vaj yuav teb rau lawv tias : “Kuv hais tseeb rau nej,

nej tsis tau ua rau cov me tshaj hauv kuv tsoom kwv npaum li cas,

mas yog nej tsis tau ua rau kuv.” 

46 – Ces cov no yuav mus raug txim ib txhiab ib txhis. 

Hos cov siab ncaj yuav mus txais txoj sia nyob mus li.  

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

NTAWV PAJ LUG 31 : 10-31

LUB NTSIAB LUS: Tus poj niam zoo yog tus nrhiav kev kaj siab lug nyob hauv nws tej hauj lwm ua niam tsev.

COV LUS NYOB HAUV NTAWV PAJ LUG:

10- Leej twg yuav nrhiav tau ib tug niam tsev nquag ?  Tus niam tsev nquag muaj nqi dua tej hlaws npliag deg ! 

11 – Nws tus txiv tso siab lug rau nws, tus txiv yuav tsis tshaib tsis ntshaw.            

12 – Nws ua zoo rau nws tus txiv tas ib sim neej, nws tsis ua phem rau tus txiv.

13 – Nws tooj xov plaub yaj, saws ntuag nws ob txhais tes ua hauj lwm nrawm nroos. 

14 – Nws zoo li lub nkoj ua luam, uas mus yuav toob xib txog luag pej kum teb rov los. 

15 – Ntuj tsis tau kaj, nws sawv los faib mov rau nws tsev neeg noj, faib hauj lwm rau nws cov ntxhais txib ua. 

16 – Nws ntshaw ib daig teb, nws mus yuav, nws ob txhais tes mus cog hmab txiv cawv rau. 

17 – Nws sia siv khov kho, loj npab ntshuas siv zog ntsos ua num. 

18 – Nws paub tias nws lag luam yuav tau paj, nws lub teeb ci lam lug tas hmo. 

19 – Nws ob txhais tes tuav leg xov, nws ntiv tes nthos nkaus ntxaiv los qaiv.      

20 – Nws cev tes pab cov neeg txom nyem, nws pub mov rau cov neeg pluag noj.    

21 – Lub caij ntuj no nws tsis ntshai daus, vim tas nws tsev neeg tau tsho txooj hnav. 

22 – Nws hnav ntaub maj mos, thiab ntaub liab tsam xem.

23 – Nws tus txiv nto moo nyob ntawm cov qhov rooj tsheej.  Tau nrog cov txwj laus hauv lub teb chaws zaum ua ke.     

24 – Nws ntos ntaub mos coj mus muag, nws ua siv muag rau cov tub lag tub _luam.

25 – Nws muaj zog, muaj hwj chim, nws luag nyav tos yav tom ntej. 

26 – Nws hais lus saib qab saib hau, nws lub ncauj tsuas qhia kev hwm Ntuj hwm neeg. 

27 – Nws saib cov neeg ua hauj lwm hauv nws tsev, nws tsis nyob dag noj luag mov luag zog. 

28 – Nws cov tub sawv los cav tias : nws txoj hmoov zoo.  Nws tus txiv kuj qhuas nws tias : 

29 – Muaj ntau tus poj niam tau ua ntau yam zoo, tab sis koj tseem ua zoo tshaj sawv daws !

30 – Tus muaj xom lees nws xav ntxias luag, tus zoo nkauj kuj tsis muaj nqis dab tsi. 

Tus poj niam hwm Tswv Ntuj mas luag yuav cav txog nws.

31 – Nej pub cov txiv txi ntawm nws txhais tes rau nws.           

Kom nws cov hauj lwm rov cav lus zoo txog nws nyob ntawm cov qhov rooj tsheej.

Yog Tswv Ntuj Lo Lus        Nws lus txiaj ntsim

Nkauj Paj Nruag           COV TAU TXOJ HMOOV ZOO             

(NPN 128-1) (Zaj 72)

Txais: Cov tau txoj hmoov zoo yog cov hwm Huab Tais thiab taug nws txoj kev.

1 – Cov neeg hwm Huab Tais thiab taug nws txoj kev, lawv txoj hmoov zoo.

Koj tau noj cov txhiam xws koj ob txhais tes khwv.

Koj txoj hmoov zoo, koj tau lub neej kaj siab lug.

2 – Koj poj niam zoo li tsob txiv cawv txi nyob hauv koj tsev.

Koj cov tub ki zoo li cov ntsuag txiv ntoo roj nyob ncig koj lub phaj tsum.

3 – Huab Tais foom hmoov zoo rau tus hwm nws.

Thov kom Huab Tais nyob saum Xis Yoos foom hmoov zoo rau koj.

Niaj hnub tas koj sim neej, koj yuav pom Yes Lus Xas Les vam meej.

ZAJ NYEEM OB              

1 TES XAS LOS NIS 5 : 1-6

LUB NTSIAB LUS : Ib sim neej tsis ntev, peb txhob tsaug zog, txhob hais tias: ob peb hnub tso, mam tig los yuav lub siab tshiab tiag.

COV LUS PAJ LUG SAU TUAJ RAU COV NTSEEG NYOB TES XAS LOS NIS.

1 – Kwv tij, tsis tas kuv yuav qhia nej txog lub zim txwv thiab lub hnub nyoog uas Huab Tais yuav rov los. 

2 – Nej twb paub meej tias, Huab Tais lub hnub nyoog yuav los txog xws li ib tug tub sab uas tuaj thaum ib tag hmo. 

3 – Thaum zeej tsoom hais zom zaws tias :  ‘Peb tau nyob kaj lug, thiab nyob nyab xeeb’,        

ces ib sij huam, txoj kev ploj yuav ya ntxiag tuaj raug lawv, xws li tus poj niam cev hnyav, uas ib sij huam nws cia li mob.  Lawv yuav tsis tau kev dim. 

4 – Kwv tij, ntawm nej, mas nej tsis nyob hauv qhov tsaus ntuj ;

lub hnub nyoog ntawd yuav tsis tuaj muab nej, xws li ib tug tub sab. 

5 – Nej sawv daws puav leej yog qhov pom kev cov me nyuam, nej yog cov me nyuam mus nruab hnub. 

Peb tsis yog cov neeg maub hmo ntuj, nyob hauv qhov tsaus ntuj. 

6 – Li ntawd, mas peb tsis txhob tsaug zog xws li luag tej : peb yuav zov hmo ; peb yuav noj me haus tsawg. 

Yog Tswv Ntuj Lo Lus        Nws lus txiaj ntsim

NTAWV MOO ZOO

MAS TAIS 25 : 14-30

LUB NTSIAB LUS : Cov ntseeg lawv muaj ib lub cuab tam muaj nqe kawg : yog lub Moo Zoo. Yog lawv muab lub Moo Zoo los faus hauv lawv lub cim xeeb xwb mas lawv muaj txhaum.

COV LUS NYOB HAUV MAS TAIS NTAWV MOO ZOO:

14 – “Yog zoo li ib tug neeg uas yuav mus tawm rooj deb, nws hu nws cov tub txib los,

nws muab nws lub cuab tam rau lawv ceev. 

15 – Nws muab tsib nras nyiaj rau thawj tug, muab ob nras rau tus ob, hos muab ib nras xwb rau tus peb. 

Nws muab rau lawv raws li lawv lub peev xwm, ces nws mus tawm rooj deb lawm. 

16 – Tam sis ntawd, tus uas tau txais tsib nras nyiaj, nqa cov nyiaj ntawd mus ntxeev, nws tau paj tsib nras ntxiv.       

17 – Tus tau txais ob nras kuj ua li ntawd thiab : nws tau paj ob nras _ntxiv.          

18 – Hos tus tau txais ib nras xwb mus khawb ib lub qhov rau hauv av,

nws muab tus tswv nras nyiaj coj mus faus rau hauv. 

19 – Ib lub sij hawm ntev loo tom qab, cov tub txib tus tswv rov los txog.  Nws nrog lawv txheeb nws cov nyiaj. 

20 – Tus uas tau txais tsib nras nyiaj tuaj txog.  Nws cev tsib _nras _ntxiv, nws hais tias :

“Huab Tais, tsib nras nyiaj no yog koj muab rau kuv :

hos ntawm no yog tsib nras uas kuv coj mus ntxeev tau paj ntxiv.”

21 – Tus tswv hais rau nws tias : “Zoo kawg, tub txib siab zoo siab ncaj,

thaum koj saib tej yam tsawg, koj ua ncaj.  Kuv yuav tsa koj saib ntau yam. 

Koj los nyob hauv koj tus huab tais txoj kev zoo siab _mog.” 

22 – Ces tus tau txais ob nras tuaj txog, nws hais tias : “Huab Tais, ob nras nyiaj no yog koj muab rau kuv :

hos ntawm no yog ob nras uas kuv coj mus ntxeev tau paj ntxiv.” 

23 – Nws tus tswv hais rau nws tias : “Zoo kawg, tub txib siab zoo siab ncaj. 

Thaum koj saib tej yam tsawg li no, koj ua ncaj.  Kuv yuav tsa koj saib ntau yam. 

Koj los nyob hauv koj tus huab tais txoj kev zoo siab mog.” 

24 – Tus tub txib uas tau txais ib nras nyiaj xwb tuaj txog, nws hais tias :

“Huab Tais, kuv paub tias koj yog ib tug neeg siab heev.

Koj hlais nplej hauv tej teb koj tsis tau tseb, koj sau qoob hauv tej chaw koj tsis tau pov noob rau. 

25 – Kuv ntshai, kuv thiaj coj koj nras nyiaj mus faus rau hauv av.   Saib ntawm no, _koj rov tau yam uas yog koj tug.” 

26 – Ces tus tswv teb rau nws tias : “Tub txib siab phem thiab tub nkeeg,

koj twb paub tias kuv hlais nplej hauv tej teb uas kuv tsis tau tseb,

thiab kuv sau qoob hauv tej chaw uas kuv tsis tau pov noob rau. 

27 – Tsim nyog koj yuav nqa kuv cov nyiaj mus rau cov tub ceev nyiaj. 

Thaum kuv rov los, kuv yuav tau kuv cov nyiaj nrog cov paj. 

28 – Nej rho nras nyiaj ntawm nws, nej muab rau tus uas muaj kaum nras lawm. 

29 – Vim tias Ntuj yuav pub rau tus uas twb muaj lawm, ces nws yuav tau ntau ntxiv. 

Hos tus uas tsis muaj, Ntuj yuav thau qhov me me uas nws muaj. 

30 – Nej muab tus tub txib tsis tsim txiaj ntawd pov rau nraum zoov hauv qhov tsaus ntuj :

nyob ntawd yuav quaj tom hniav nkawv.”

Huab Tais Pleev.      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB    

THOOB TSIB           6 : 12-16 

LUB NTSIAB LUS : Nyem no, ntiaj teb neeg txawj tsim ntau yam. Tab sis sawv daws 
nyias tsis txawj coj nyias lub siab. Peb yuav vam txog Tswv Ntuj kev Thoob Tsib, peb 
thiaj coj tau peb lub neej kom zoo.

COV LUS NYOB HAUV NTAWV THOOB TSIB 

12 – Kev thoob tsib ci ntsa iab tsis txawj nphob ib zaug. Cov neeg nyiam kev thoob tsib,

mas nws cia lawv ntsia ntsoov nws. Cov neeg nrhiav kev thoob tsib,

mas nws cia lawv ntsib nws. 

13 – Kev thoob tsib xub tuaj thawj cov neeg ntshaw txog nws, nws tawm tuaj rau lawv paub nws. 

14 – Thaum nyuam qhuav kaj ntug, yog leej twg mus nrhiav kev thoob tsib mas nws tsis tas yuav khwv. 

Nws yuav pom kev thoob tsib zaum nraum nws qhov rooj tos nws.  

15 – Nrhiav kev thoob tsib mas yog _txoj kev ntse zoo tshaj.  Leej twg uas zov hmo kawm kev thoob tsib,

mas nws yuav dim ntawm kev ntxhov siab sai.  

16 – Kev thoob tsib tawm mus tas qhov txhia chaw, nws nrhiav cov neeg tsim nyog txais nws. 

Kev thoob tsib tshwm ntawm tej xub ke, nws ua ntsej muag luag nyav rau cov uas tsis thuam nws. 

Kev thoob tsib mus cuag lawv lub tswv yim tsis tseg.

Yog Tswv Ntuj Lo Lus        Nws lus txiaj ntsim

Nkauj Paj Nruag            KUV TUS PLIG SEEV YEES TXOG TSWV NTUJ            

(NPN 63-2) (Zaj 71)

Txais: Kuv tus plig nqhis txog koj, zoo puav tam li av qhuav tsis tau dej yug.

1 – Tswv Ntuj, koj yog tus kuv nrhiav! Kuv lub cev seev yees txog koj.

Kuv tus plig nqhis txog koj puav tam li av qhuav tsis tau dej yug.

2 – Kuv mus ntsia koj nyob hauv lub tuam tsev ntshiab, kuv pom koj lub zog thiab lub hwj chim.

Koj txoj kev hlub muaj nqis dua txoj sia. Kuv lub ncauj yuav cav txog koj lub koob meej.

3 – Kuv yuav cav txog koj tas kuv sim neej. Kuv yuav tsa tes hawm koj thiab hu txog koj lub npe. Kuv tus plig zoo siab puav tam li tus tau noj ib roog qav. Kuv di ncauj hom khaj, kuv lub ncauj yuav cav txog koj.

4 – Thaum kuv pw saum txaj, kuv nco txog koj. Kuv teev koj txog ntuj teb tag hmo.

Koj tau pab kuv, kuv nqua suab hu nkauj nyob hauv koj phab tis qhov ntxoov.

ZAJ NYEEM OB

TES XAS LOS NIS 4 : 13-18

. 
LUB NTSIAB LUS : Thaum txog hnub Huab Tais tuaj tos peb mas peb tso ntiaj teb no 
tseg, peb mus cuag Tswv Ntuj. Li ntawd, thaum peb tuag mas peb muaj chaw tso siab. 

COV LUS PAJ LUG SAU TUAJ RAU COV NTSEEG NYOB TES XAS LOS NIS. 

13 – Kwv tij sawv daws, peb tsis xav kom nej tsis paub dab tsi txog cov neeg uas pw tsaug zog mus li. 

Thaum nej muaj ib tug neeg tuag, nej yuav tsis txhob tu siab xws li cov neeg uas tsis muaj kev tso siab. 

14 – Vim peb ntseeg tias, Yes Xus tuag thiab sawv rov los.  Peb kuj tso siab tias, cov neeg mus pw tsaug zog nyob hauv Yes Xus, mas Tswv Ntuj yuav coj lawv mus nrog nws nyob. 

Huab Tais qhia ib lo lus rau peb, peb xav hais lo lus ntawd rau nej paub. 

15 – Yam li, _hnub Huab Tais rov los txog, mas peb cov neeg ciaj yuav tsis xub mus cuag

Huab Tais ua ntej cov uas tuag ntxov lawd. 

16 – Vim, thaum txog lub caij teem, sawv daws yuav hnov thawj tug Tshiab lub suab,

thiab hnov Tswv Ntuj lub puab nrov. Ces Huab Tais yuav nqes saum ntuj los.

Cov neeg tuag nyob hauv Yes Xus Pleev yuav xub sawv rov los. 

17 – Hos peb cov uas tseem ciaj, mam li yuav tau mus nrog cov tuag sawv rov los ntawd sib txoos ua ke ;

ces Ntuj yuav nqa peb nrog lawv nce mus saum cov huab, peb yuav mus cuag Huab Tais nyob saum ntuj. 

Peb _yuav mus nrog Huab Tais nyob mus li. 

18 – Peb sawv daws nco ntsoov txog cov lus no, peb thiaj rov sib pab ua siab loj.

Yog Tswv Ntuj Lo Lus        Nws lus txiaj ntsim

NTAWV MOO ZOO

MAS TAIS 25 : 1-13

COV LUS NYOB HAUV MAS TAIS NTAWV MOO ZOO :

 
1 – “Ntuj lub Ceeb Tsheej yuav zoo xws li kaum leej ntxhais taws teeb tawm mus tos nraug ______vauv. 

2 – Nyob hauv lawv, muaj tsib leeg ruam, hos tsib leeg xyuam xim.

3 – Cov ruam nqa teeb, tab sis tsis nqa roj nrog. 

4 – Hos cov xyuam xim nqa teeb thiab ntim roj rau hauv hwj nrog.            

5 – Nraug vauv los lig, ces lawv qaug dab ntub. Sawv daws tsaug zog. 

6 – Thaum ib tag hmo, ib lub suab nthe tias : “Nraug vauv los txog lawm ! _Nej tawm los txais _nws !” 

7 – Ces tas cov ntxhais hluas sawv los npaj teeb. 

8 – Cov ruam hais rau cov xyuam xim tias : “Nej pub ib qho roj rau peb mas, peb cov teeb tuag lawm. » 

9 – Tab sis cov xyuam xim teb rau cov ruam tias : “Ntshai roj yuav tsis txaus rau nej thiab rau peb.

Nej mus muas roj tom cov tub luam rau nej.” 

10 – Thaum cov ntxhais ruam mus muas roj lawm, ces nraug vauv los txog.

Cov uas tau npaj txhij tos, nrog nraug vauv chaws mus hauv chav tsev ua tshoob,

ces luag kaw qhov rooj.

11 – Thaum kawg, lwm cov ntxhais los txog thiab, lawv hais tias : “Huab Tais, Huab Tais, thov koj qhib qhov rooj rau peb.”

12 – Tab sis nraug vauv teb tias : “Kuv hais tseeb rau nej, kuv tsis paub nej yog leej twg !”

13 – Ua li mas nej zov hmo mog, vim nej tsis paub hnub twg thiab lub sij hawm twg.”

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB     

MAS LAS KIS          1 : 14, 2 : 1-2, 8-9

LUB NTSIAB LUS: Nyob hauv Iub Koom Txoos, tus twg muaj txoj kab xwm coj luag 
tej nws yuav ceev faj kom nws txhob ncaim ntawm Tswv Ntuj txoj kev, txhob nyiam ib 
co zoo dua lwm cov. 

COV LUS NYOB HAUV NTAWV MAS LAS KIAS :

14 – Tsoom tub rog tus HUAB TAIS hais tias : Kuv yog ib tug tuam vaj. 

Tas txhia haiv neeg saib kuv lub npe muaj hwj xyeej nyob hauv cov kuj cuab. 

1 – Nyem no, cov Leej Choj, kuv qhia nej zoo li no : 

2 – Yog nej tsis mloog kuv, yog nej tsis muab siab rau ua kom kuv lub npe nto koob meej,

mas kuv yuav xa txoj hmoov phem tuaj rau nej, kuv yuav tsawm nej cov lus foom hmoov zoo. 

8 – Nej ncaim ntawm txoj kev lawm. Nej tej lus qhia ua kom coob leej ntog. 

Lo lus uas kuv nrog cov Les Vis cog mas nej rhuav pov tseg tas lawm !  

9 – Ces kuv thiaj ua kom tas tsoom pej xeem thuam nej thiab saib nej tsis muaj tsim,

vim nej tsis taug kuv txoj kev thiab thaum nej qhia tsoom sid mas nej nyiam

ib txhia thiab nej ntxub ib txhia.

Yog Tswv Ntuj Lo Lus        Nws lus txiaj ntsim

Nkauj Paj Nruag             KEV THAJ YEEB NYOB HAUV HUAB TAIS            

(NPN 131) (Zaj 70)

Txais: Huab Tais, kuv nrhiav tau kev thaj yeeb nyob hauv koj.

1 – Huab Tais, kuv lub siab tsis ntshaw txoj hauj lwm loj, kuv tsis tsom tej yam siab dhau.

Kuv tsis nrhiav tej yam uas kuv lub tswv yim tsis duav.

2 – Kuv tus plig nyob thaj yeeb ntsiag to zoo li tus me nyuam khooj rau hauv nws niam xub ntiag,

ib yam li kuv tus plig nyob hauv kuv.

3 – His Xas Lais, txij no mus, koj tso siab rau Huab Tais tas ib txhiab ib txhis.

ZAJ NYEEM OB

1 TES XAS LOS NIS          2 : 7-9, 13

LUB NTSIAB LUS: Paj Lug yog tus xa Yes Xus lub Moo Zoo, nws xaiv txoj kev ua 
neeg me nyob hauv pab neeg uas nws qhia lawv. Nws chaw zoo siab yog qhov tias 
lawv txais Tswv Ntuj Lo Lus. 

COV LUS PAJ LUG SAU TUAJ RAU COV NTSEEG NYOB TES XAS LOS NIS. 

7 – Peb yog Leej Pleev cov Hauv Paus Xa Lus, peb yuav ua kom nej raug peb hnyav kuj tau, tab sis peb tsis _ua. Thaum peb nyob nruab nrab hauv nej peb tau ua ib co neeg me ! 

8 – Peb tau hlub nej xws li ib leeg niam tu thiab txuag nws cov me nyuam.  Peb ib txhij xav pub Tswv Ntuj lub Moo Zoo rau nej, thiab xav pub peb txoj sia rau nej : vim peb lub siab tau _nyiam tiag. 

9 – Kwv tij, nej nco ntsoov txog peb tej hauj lwm, thiab txog peb tej kev iab kev khwv. 

Thaum peb tshaj Tswv Ntuj lub Moo Zoo rau nej, mas peb tau ua hauj lwm nruab hnub thiab hmo ntuj,

vim peb tsis xav ua ib lub nra hnyav rau nej ib tug twg ris li.

13 – Yog vim tej ntawd, mas peb ua Tswv Ntuj tsaug tsis tseg, vim thaum nej txais Tswv Ntuj Lo Lus uas peb tau qhia nej, mas nej tsis txais Lo Lus ntawd xws li neeg lo lus ; nej txais raws nraim li Tswv Ntuj Lo Lus, vim yeej yog Tswv Ntuj Lo Lus tiag. Lo Lus ntawd tseem ua hauj lwm nyob hauv nej, cov ntseeg. 

Yog Tswv Ntuj Lo Lus        Nws lus txiaj ntsim

NTAWV MOO ZOO         

MAS TAIS    23 : 1-12

LUB NTSIAB LUS : Peb cov neeg txais Yes Xus kev ntseeg, peb yuav ceev faj kom 
peb txhob qhia luag ua tej yam uas peb tsis kam ua. Peb yuav ua ib co thwj tim saib Yes 
Xus ua Xib Hwb. 

COV LUS NYOB HAUV MAS TAIS NTAWV MOO ZOO : 

1 – Yes Xus qhia tsoom sid thiab nws cov thwj tim. Nws hais tias :

2 – “Cov Kws Ntawv Ntshiab thiab cov Fas Lis Xais zaum Mais Xes lub theej kiab lawm.
3 – Nej ua tas txhua yam lawv qhia nej, thiab nej khaws huv tib si tseg, tab sis nej txhob ua raws li lawv. 

Vim lawv qhia, tab sis lawv tsis ua raws. 

4 – Lawv nog tej lub nra hnyav yuam rau tsoom sid xwb pwg, tab sis lawv tsis kam cev ib tug ntiv tes los kov.

5 – Lawv ua txhua tsav txhua yam kom luag qhuas.  Yog li ntawd, lawv thiaj coj tej txws ntim Txoj Cai dav dav, thiab dai tej tw ntxhoo ntev ntev. 

6 – Thaum lawv mus noj nqaij haus cawv, lawv nyiam zaum thawj lub rooj. 

Nyob hauv cov tsev txoos, lawv nyiam zaum cov rooj pem hauv ntej.

7 – Lawv nyiam kom luag hawm lawv tom tej tshav puam, nyiam hnov sawv daws hu lawv ua “Xib Hwb”.

8  – Hos nej, mas nej txhob cia luag hu nej ua “Xib Hwb”, vim nej tsuas muaj tib tug Xib Hwb xwb,

thiab nej sawv daws yog ib co kwv tij. 

9 – Nej txhob hu leej twg nyob ntiaj teb no ua “Txiv”, vim nej tsuas muaj tib leeg Txiv xwb, yog tus nyob saum ntuj. 

10 – Nej txhob cia luag hu nej ua “Thawj Tswj”, vim nej tsuas muaj tib tug Tswj xwb, yog Leej Pleev. 

11 – Tus loj dua cov nyob hauv nej, yuav ua nej tus tub txib. 

12 – Tus twg tsa nws siab, Ntuj yuav txo nws qis. Tus twg txo nws qis, Ntuj yuav tsa nws siab.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

KEV TSIV     22 : 20-26

LUB NTSIAB LUS: Tswv Ntuj pab peb ntau lawm. Peb yuav pab cov pluag cov txom 
nyem kom peb tsim nyog hu ua Tswv Ntuj siab zoo cov tub ki. 

COV LUS NYOB HAUV NTAWV KEV TSIV :

 
20 – « Koj yuav tsis txhob hiam, tsis txhob yuam tus pej kum neeg, vim thaud nej yog ib co pej kum neeg nyob Hais Nkws Tos teb. 

21 – Koj yuav tsis txhob lim hiam rau ib tug poj ntsuam los ib tug me nyuam ntsuag.      

22 – Yog koj lim hiam rau nws, nws hu txog kuv, mas kuv yuav mloog nws lub suab quaj. 

23 – Kuv yuav npau taws heev thiab yuav ua kom hniav ntaj txo koj txoj sia,

ces koj poj niam yuav ua poj ntsuam thiab koj cov tub yuav ua tub ntsuag.  

24 – Yog koj qiv nyiaj rau tus kwv tij hauv koj haiv neeg, los rau ib tug pluag hauv koj haiv neeg,

mas koj yuav tsis txhob noj nws, koj yuav tsis txhob tsub paj rau nws them. 

25 – Yog koj txais ib tug lub tsho ntev uas nws muab yuam nuj nqes rau koj, mas thaum hnub poob qho,

koj yuav xa rov qab rau nws. 

26 – Nws tsuas muaj tib lub tsho ntawd ua pam vov thiab ua ris tsho hnav xwb, nws yuav pw zoo li cas ? 

Yog nws hu txog kuv, kuv yuav mloog nws lub suab quaj, vim kuv lub siab hlub neeg.             

Yog Tswv Ntuj Lo Lus        Nws lus txiaj ntsim

Nkauj Paj Nruag              HUAB TAIS, KUV NYIAM KOJ             

(NPN 18) (Zaj 69)

Txais: Huab Tais, kuv nyiam koj, koj yog kuv lub zog.

1 – Huab Tais yog kuv phab tsua, yog kuv lub yeej ntsa zeb, yog tus npo kuv.

2 – Nws yog kuv tus Tswv Ntuj, yog lub tsua rau kuv khiav los nkaum. Nws yog kuv daim leem phiaj, yog rab ntaj ua kom kuv yeej.

Nws yog kuv lub yeej ntsa zeb, peb cav lus zoo txog nws! Kuv hu txog Huab Tais ces kuv yeej kuv cov yeeb ncuab.

3 – Huab Tais muaj txoj sia, nws yog kuv lub tsua nto koob meej. Tus Tswv Ntuj uas pub kev cawm rau kuv, nws nto koob meej.

Huab Tais muab kev yeej rau nws tus vaj, nws hlub tus nws pleev. Nws hlub Das Vis thiab Das Vis caj ces mus li.

ZAJ NYEEM OB

TES XAS LOS NIS             1 : 5-10

LUB NTSIAB LUS : Cov tub tshaj Ntuj Lus yuav ua Yes Xus tim khawv zoo ces muaj neeg txais kev ntseeg. Cov ntseeg sawv daws kuj yuav ua Yes Xus tim khawv zoo thiab, ces tas teb chaws yuav paub Yes Xus.

COV LUS PAJ LUG SAU TUAJ RAU COV NTSEEG NYOB TES XAS LOS NIS. 

5 – Peb lub Moo Zoo tuaj txog nej, tsis yog ib co lus qhuav xwb : peb lub Moo Zoo _muaj ib co hauj lwm tuaj nrog, thiab muaj

Leej Ntuj Plig Ntshiab lub zog nyob hauv. Lub Moo Zoo tuaj khov kho. Nej paub tias thaum peb tuaj tsob hwb nej,

peb tau coj tus yam ntxwv zoo li cas nyob nruab nrab hauv nej. 

6 – Nej thiaj yoog raws peb tus piv txwv, thiab yoog raws Huab Tais tus lwj lwm, vim nej tau txais Lo Lus. 

Nej tau raug ntau txoj kev txhawj xeeb, tab sis nej zoo siab nyob hauv Leej Ntuj Plig Ntshiab. 

7 – Ces nej tau ua ib tug piv txwv zoo rau cov neeg ntseeg nyob Mas Xes Dos Nias teb,

thiab As Kas Yas teb _huv _tib _si. 

8 – Huab Tais Lo Lus nrov ncha ntws tim nej, mus txog Mas Xes Dos Nias thiab As Kas Yas teb ;

nej txoj kev ntseeg ri mus tas qhov txhia chaw ; nyem no, tsis tas peb yuav hais txog qhov ntawd ntxiv. 

9 – Luag tej ob cag piav tias peb tuaj txog tim nej li cas, thiab nej ua li cas tig los ntseeg txog Tswv Ntuj,

nej tso cov mlom pov tseg, nej los tsob hwb tus Tswv Ntuj muaj txoj sia uas yog tus tseeb. 

10 – Vim nej tos Tswv Ntuj Leej Tub yuav rov saum ntuj los. 

Leej Tub ntawd, yog Yes Xus, uas Tswv Ntuj tsa hauv cov neeg tuag sawv rov los :

Yes Xus yog tus npo peb dim ntawm txoj kev npau taws, uas tab tom tuaj.

Yog Tswv Ntuj Lo Lus        Nws lus txiaj ntsim

NTAWV MOO ZOO         

MAS TAIS     22 : 34-40

 LUB NTSIAB LUS : Thaum peb tham txog txoj kev ntseeg mas peb txhob tham txog tej yam me nyob hauv txoj kev ntseeg. Peb yuav nco ntsoov piav tias lub ntsiab yog kev nyiam. 

COV LUS NYOB HAUV MAS TAIS NTAWV MOO ZOO.

 
34 – Cov Fas Lis Xais hnov tias Yes Xus teb rau cov Xas Dus Kais tws lus, ces lawv sib sau sab laj. 

35 – Lawv ib tug tuaj sim Yes Xus, nws yog ib tug kws lij choj, nws nug tias :

36 – “Xib Hwb, nyob hauv Txoj Cai, lo lus qhia twg loj dua cov ? 

37 – Yes Xus hais rau nws tias : “Koj yuav muab tas koj lub siab, tas koj tus ntsuj plig,

tas koj lub tswv yim los nyiam koj tus Huab Tais Tswv Ntuj_.    

38 – Lo lus qhia no yog lo lus qhia loj tshaj cov, yog thawj lo lus qhia. 

39 – Lo lus qhia ob kuj zoo ib yam thiab : koj yuav nyiam tus nyob ze koj ib yam nkaus li koj nyiam koj. 

40 – Tas Txoj Cai thiab cov Yaj Saub puav leej dai ncuv rau ob lo lus qhia no.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB   

HIS XAIS      45 : 1, 4-6

LUB NTSIAB LUS : Ntau zaus Tswv Ntuj vam txog cov neeg tseem tsis tau paub 
nws, nws kom lawv ua nws cov hauj lwm xws li kom tus vaj Kws Los tso cov His 
Xas Lais nyob txim nyob Npas Npis Los kom rov mus Yes Lus Xas Les. 

COV LUS NYOB HAUV NTAWV HIS XAIS :

1 – HUAB TAIS hais li no txog Kws Los, uas yog nws tus Pleev. Kuv tau nthos nkaus nws txhais tes xis los ua kom

cov kuj cuab vau rau hauv pem teb, los hle cov vaj tej siv sia, los qhib cov qhov rooj ob sab nyob ntawm nws xub ntiag,

kom cov rooj loog txhob kaw nti. 

4 – Yog vim kuv tus tub txib Yas Kos, yog vim His Xas Lais tus kuv xaiv, mas kuv thiaj tuav koj npe hu. 

Thaum koj tseem tsis tau paub kuv, mas kuv twb pub ib lub npe muaj hwj chim rau koj. 

5 – Kuv yog Huab Tais, tsis muaj lwm tus Huab Tais. Dhau kuv lawm mas tsis muaj lwm tus Tswv Ntuj ntxiv. 

Thaum koj tseem tsis tau paub kuv, mas kuv ua kom koj tuav ntaj tuav hmuv, 

6 – kom txij hnub tuaj mus txog hnub poob, paub tias dhau kuv lawm mas tsis muaj dab tsi li. 

Kuv yog HUAB TAIS, tsis muaj dua lwm tus HUAB TAIS.

Yog Tswv Ntuj Lo Lus        Nws lus txiaj ntsim

Nkauj Paj N ruag            TSWV NTUJ LUB HWJ XYEEJ NTSHIAB                  

(NPN 96-1) (Zaj 68)

Txais: Nej cav txog Tswv Ntuj lub hwj xyeej ntshiab, nej teev hawm nws.

1 – Nej hu ib zag nkauj tshiab rau Huab Tais. Tas ntiaj teb, nej hu nkauj rau Huab Tais mas.

Nej tshaj nws lub koob meej rau cov haiv neeg paub. Nej tshaj nws cov hauj lwm nto moo rau ib tsoom haiv neeg.

2 – Nws yog tus Huab Tais loj, nws nto koob meej, nws muaj hwj xyeej. Nws nyob siab dua ib tsoom dab.

Cov dab uas lwm haiv neeg teev mas lawv tsis muaj nqi dab tsi. Tswv Ntuj thiaj yog tus tsim yim txheej cuaj txheej ntuj.

3 – Tsoom haiv neeg cov cuab yim, nej cav lus zoo txog Huab Tais. Nej cav txog nws lub hwj chim.

Tsim nyog nej cav txog nws lub npe muaj hwj chim. Nej nqa paj tshab, nej chaws mus hauv nws lub loog.

4 – Nej teev hawm Huab Tais. Ntiaj teb neeg, nej txhos caug hawm nws. Nej hais rau cov haiv neeg hais tias,

“Huab Tais ua vaj, nws tswj txhua haiv neeg raws kev haum pheej.”

ZAJ NYEEM OB 2

TES XAS LOS NIS           1 : 1-5

LUB NTSIAB LUS : Tsab ntawv no yog thawj tsab ntawv uas Paj Lug sau. Paj Lug 
ua Tswv Ntuj tsaug vim cov Tes Xas Los Nis muab siab rau txais lub Moo Zoo. 

COV LUS PAJ LUG SAU TUAJ RAU COV NTSEEG NYOB TES XAS LOS NIS. 

1 – Paj Lug, nrog Xis Vas Nus, thiab Tis Mos Tes sau ntawv tuaj rau lub Koom Txoos nyob Tes Xas Los Nis,

uas nyob hauv peb Txiv Tswv Ntuj, thiab nyob hauv Huab Tais Yes Xus Pleev.

2 – Thov kom Leej Txiv Tswv Ntuj, thiab Huab Tais Yes Xus Pleev, pub txiaj ntsim thiab kev thaj yeeb _rau nej.

3 – Kwv tij, peb yuav tsum ua Tswv Ntuj tsaug tsis tseg vim nej ; tsim nyog yuav ua tsaug, vim nej txoj kev ntseeg hlob mus zoo,

thiab nej sawv daws sib nyiam sib hlub zoo zuj zus. 

4 – Nej ua li ntawd, mas peb muaj ntsej muag nyob hauv Tswv Ntuj cov Koom Txoos,

vim tias, tab txawm nej raug luag hiam thiab raug txom nyem, mas nej nyob ruaj nreb, thiab nej ntseeg. 

5 – Li ntawd, Tswv Ntuj txoj kev txiav txim ncaj, tawm tuaj rau pom xyeem : nej raug txom nyem, vim Tswv Ntuj lub Ceeb Tsheej. 

Mas Ntuj yuav pom nej tsim nyog mus hauv lub Ceeb Tsheej. 

Yog Tswv Ntuj Lo Lus        Nws lus txiaj ntsim

NTAWV MOO ZOO         

MAS TAIS     22 : 15-21

LUB NTSIAB LUS : Cov neeg ntseeg txog Yes Xus lawv ib txhij zwm rau Tswv
Ntuj, thiab zwm rau cov nom tswv kav teb chaws. Tab sis cov nom tswv kav tej yam 
sab nraud xwb. Hos Tswv Ntuj kav peb nruab siab. 

COV LUS NYOB HAUV MAS TAIS NTAWV MOO ZOO :

 15 – Ces cov Fas Lis Xais mus sab laj saib lawv yuav lem Yes Xus li cas kom nws hais lus yuam kev. 

16 – Lawv thiaj xa lawv cov thwj tim nrog cov tuaj Hes Los tog mus _hais rau Yes Xus tias :

“Xib Hwb, peb paub tias koj yog ib tug neeg hais qhov tseeb, thiab koj qhia Tswv Ntuj txoj kev raws nraim li qhov tseeb,

koj tsis tsa leej twg cai, tsis ntsia saib yog tus loj los tus yau. 

17 – Koj sim qhia peb saib, raws li koj xav, Txoj Cai puas kheev them se rau Xes Ntxas los tsis kheev ?” 

18 – Tab sis Yes Xus twb paub lawv lub siab nkhaus, ces nws hais tias :

“Neeg zoo sab nraud, vim li cas nej sim kuv ? 

19 – Muab nej lub nyiaj _them se _rau kuv saib.” Lawv cev ib lub txiaj nyiag los. 

20 – Ces Yes Xus hais rau lawv tias : “Tus duab hauv no yog leej twg tus ?

Thiab cov npe ntawv hauv no yog leej twg li ?” Lawv teb tias :

21 – “Yog Xes Ntxas li.” Ces Yes Xus hais rau lawv tias : “Yam twg yog Xes Ntxas tug,

mas nej muab rov rau Xes Ntxas. Yam twg yog Tswv Ntuj tug, mas nej muab rov rau Tswv Ntuj.”

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

HIS XAIS     25 : 6-10

LUB NTSIAB LUS: Tswv Ntuj xav pub kev lom zem kev kaj siab rau cov neeg tuaj 
cuag nws. Nws so lawv cov kua muag. 

COV LUS NYOB HAUV NTAWV HIS XAIS :

6 – Nyob saum lub roob no, tsoom tub rog tus HUAB TAIS yuav ua ib rooj nqaij ib rooj hno rau tas cov haiv neeg huv tib si,

yog ib rooj qav muaj hlwb puv pob txha, ib rooj cawv ntshiab tsis muaj txo.

7 – Nyob saum lub roob no, HUAB TAIS yuav yaws daim ntaub vov tsoom neeg tib si, yuav rhuav chaws ntaub qhwv tsoom kuj cuab.

8 – Nws yuav rhuav kev tuag ib txhiab ib txhis. HUAB TAIS Tswv Ntuj yuav so cov kua muag ntws

saum sawv daws lub ntsej muag, nws yuav thau nws haiv neeg chaw poob tsim nyob thoob ntiaj teb,

vim HUAB TAIS tau hais li ntawd. 

9 – Hnub ntawd sawv daws yuav hais tias :

« Nej ntsia peb tus Tswv Ntuj uas peb vam tias nws yuav cawm peb, yog tus HUAB TAIS uas peb tos. 

Peb kav tsij dhia hom khaj, kav tsij xyiv fab lom zem !  

10 – Vim HUAB TAIS yuav tso nws txhais tes nyob saum lub roob no.

Yog Tswv Ntuj Lo Lus        Nws lus txiaj ntsim

Nkauj Paj Nruag              KUV YUAV NYOB HAUV HUAB TAIS TSEV            

(NPN 23-1) (Zaj 67)

Txais: Kuv yuav nyob hauv Huab Tais tsev mus tag kuv sim neej.

1 – Huab Tais yog kuv tus tswv zov yaj, kuv tsis ntshaw dab tsi. Nws tso kuv nyob hauv tej tshav zaub mos.

Nws coj kuv mus so nyob ze dej, nws rov ntxiv zog rau kuv tus plig.

2 – Nws coj kuv mus taug txoj kev ncaj kom nws lub npe nto koob meej. Tab yog kuv taug kev mus hauv lub kwj ha tsaus ntuj nti,

kuv tsis ntshai vim koj nrog kuv, koj rab pas nrig yog kuv chaw tso siab.

3 – Cov neeg ntxub kuv, lawv hnyos kuv. Koj npaj ib roog qav rau ntawm kuv xub ntiag.

Koj pleev roj tsw qab rau saum kuv taub hau. Koj hliv cawv puv lub ntim rau kuv haus.

4. Tas kuv sim neej, kev kaj siab thiab kev hlub nrog nraim kuv. Tas kuv sim neej, kuv yuav nyob hauv Huab Tais tsev.

Yog Tswv Ntuj Lo Lus        Nws lus txiaj ntsim

ZAJ NYEEM OB   

FIS LIS POS  4 : 12-14, 19-20

LUB NTSIAB LUS : Peb yuav xyaum txais kev pluag ib yam li kev nyob zoo. Yog peb 

pab cov txom nyem mas Tswv Ntuj pauj rau peb.

COV LUS PAJ LUG SAU TUAJ RAU COV FIS LIS POS :

12 – Kuv txawj yoo mov, ib yam li kuv txawj noj kom tsau thaum muaj txhiam xws txaus noj seem noj so. 

Tsis hais thaum twg, _kuv tau xyaum yoog lub caij muaj noj muaj haus ib yam li yoog lub caij tshaib nqhis,

kuv yoog txoj kev nplua nuj, ib yam li yoog txoj kev pluag. 

13 – Kuv ua tau tas puas tsav yam nyob hauv tus ua kom kuv muaj zog. 

14 – Tab sis, thaum kuv raug kev txom nyem, nej tau pab kuv, mas nej tau ua zoo kawg. 
19 – Kuv tus Tswv Ntuj pom tias, nej yuav tsum muaj dab tsi, ces _nws _thiaj _pub tej _ntawd rau nej,

nws yuav pauj qhov nej tau pub rau kuv, vim nws nplua nuj, thiab nws siab dav nyob hauv Yes Xus Pleev. 

20 – Tus Tswv Ntuj no yog peb Leej Txiv, nws muaj koob meej nto moo mus txog txhiab niag tim puas xyoo. _Ua li. 

Yog Tswv Ntuj Lo Lus        Nws lus txiaj ntsim

NTAWV MOO ZOO         

MAS TAIS       22 : 1-14

LUB NTSIAB LUS: Tswv Ntuj hu peb tuaj nyob hauv nws lub Ceeb Tsheej ua tej 
yam hauj lwm lom zem thiab loj. Tab sis peb yuav tsum tso peb tej hauj lwm me tseg. 
Peb yuav tsum hloov tswv yim. 

COV LUS NYOB HAUV MAS TAIS NTAWV MOO ZOO :

1 – Yes Xus tsa ncauj rov ua paj lug hais rau lawv ntxiv tias :

2 – “Ntuj lub Ceeb Tsheej zoo li ib tug vaj uas nws ua tshoob rau nws tus tub.         

3 – Nws xa tub txib mus nqua hu neeg tuaj noj tshoob, tab sis lawv tsis xav tuaj. 

4 – Nws rov xa dua ib pab tub txib mus, nws hais li no : “Nej hais rau cov raug caw tias : Nej saib, kuv twb npaj kuv rooj qav tiav tas,

kuv tej heev nyuj thiab cov tsiaj rog puav leej tua tas lawm. Txhua yam npaj txhij tas. _Nej _kav tsij tuaj nrog noj tshoob !” 

5 – Tab sis cov neeg ntawd tsis quav ntsej, lawv nyias mus nyias : ib tug mus tom teb, ib tug mus ua luam. 

6 – Hos lwm cov tseem nthos nkaus cov tub txib ntes, hiam lawv, muab lawv tua pov tseg. 

7 – Tus vaj npau taws, nws xa nws cov tub rog mus tua cov neeg txo luag siav ntawd thiab hlawv lawv lub nroog. 

8 – Ces nws hais rau nws cov tub txib tias : “Rooj tshoob npaj tau txhij, tab sis cov neeg kuv caw tsis tsim nyog noj. 

9 – Nej mus tom tej ncauj ke, nej pom tsawg leej, nej nqua hu _kom tuaj noj rooj tshoob.” 

10 – Cov tub txib mus txhua txoj _kev, lawv sau tas txhua leej txhua tus uas lawv ntsib,

cov phem cov zoo tuaj huv tib si. Neeg tuaj puv nkaus lub tsev noj tshoob.

11 – Tus vaj chaws los xyuas cov neeg tuaj koom lub ntees tshoob. Nyob ntawd, nws pom ib tug tsis hnav tsoos noj tshoob.  

12 – Tus vaj hais rau nws tias : “Npawg, koj tsis hnav tsoos noj tshoob, ua cas koj los hauv no ?” 

Tus neeg ntawd nyob ntsiag to. 

13 – Ces tus vaj hais rau cov tub txib tias : “Nej muab nws pav tes pav taw, muab nws pov rau nraum zoov,

hauv qhov tsaus ntuj : nyob ntawd, yuav quaj tom hniav nkawv.” 

14 – Vim tias Ntuj hu ntau leej tuaj, tab sis tsawg leej raug xaiv.”

Huab Tais Pleev      Lub qab ntuj neeg cav txog koj