Catégorie

Vous trouverez ci-dessous les articles de la catégorie que vous avez sélectionné

Archives de catégorie Orléans

Kiab niam Neej Vaj Lis Foom cov lus tim khawv

Par Cécile YANG

Nyob zoo, kuv yog Kiab niam Neej Vaj Lis Foom, kuv thov sau ob peb lo lus tim khawv txog ntawm peb cov hmoob Orléans mus sau siab koom nrog lwm haiv neeg nram Lourdes.

Tim 5 lub 6 hli ntuj 2023, peb muaj 11 leeg hmoob nrog lawv lub Koom Haum AMICITIA nyob hauv xeev Loiret mus sau siab nram Lourdes. Lub koom haum ntawd, nws lub hom phiaj yog coj cov neeg muaj mob mus thov ntuj nram Lourdes. Muaj ib co neeg nws yog cov tuaj mus pab cov neeg mob ntawd. Peb mus pw hauv ib lub chaw so, lawv kuj txais peb zoo heev. Peb cov ntseeg txhua txhua hnub muaj kev sib tham sau siab hais txog peb txoj kev ntseeg.

Muaj ib hnub peb txhua pab uas yog txhua haiv neeg tau los mus sib tham txog peb txoj kev ntseeg, peb sib tham ntev li 1H30. Thaum lub sij hawm ntawv kuv thiaj tau hnov ib cov lus tim khawv uas txhawb kuv lub zog thiab kuv txoj kev ntseeg. Muaj peb tug thiaj tau los hais ua tsaug rau peb Niam Mab Liab. Hais tias thaum lawv mob los nyuaj siab tau txais kev txom nyem nyob hauv lawv tsev neeg, lawv tau thov Niam Mab Liab heev, lawv cog lus rau Niam Mab Liab tias yog Niam Mab Liab pab lawv dim ntawv txoj kev txom nyem mob nkeeg nyob hauv lawv lub neej, lawv yuav los ua Tswv Ntuj ib tug zoo tub txib. Ces txawm muaj raws li lawv tau thov. Li ntawd, niaj hnub no lawv thiaj zoo siab los ua Tswv Ntuj ib tug tub txib. Lawv nco ntsoov tias lawv tau txais ib lub txiaj ntsim los ntawm Tswv Ntuj. Lawv hais ntxiv tias Tswv Ntuj yeej muaj tseeb tiag ; yog thov thiab tso siab rau Tswv Ntuj tiag peb los yuav tau txais ib yam thiab. Yog li peb sawv daws yuav nco ntsoov tias yog peb taij peb thov peb yuav tau txais ib yam. Thaum sawv daws tau hnov cov lus no tag, kuj ua rau kuv xav tias lawv yog ib cov ntseeg muaj lub siab loj tiag. Kuv rov nug kuv tus kheej tias kuv puas muaj txoj kev ntseeg thiab lub siab loj npaum li lawv ? Kuv xav tias peb hmoob tseem yuav tau kawm thov ntuj raws ib yam li cov lus tim khawv hnov ntawm no. Peb yuav nco ntsoov cog lus rau Niam Mab Liab los lees ua Tswv Ntuj ib tug tub txib peb thiaj li tsis tsuag hauv peb txoj kev ntseeg. Hnub no kuv zoo li Tos Mas, kuv pom thiab kuv hnov lawm ces kuv ntseeg.

Nco ntsoov ua Tswv Ntuj tsaug uas yog tus nyob siab nyob saum ntuj.

                                           Kiab Lis Foom

Kiab LIS FOOM
Niam Mab Liab nyob Lourdes
Teev Ntuj nrog AMICITIA

« Ua Tswv Ntuj ib tug tub txib… »

Par Cécile YANG

Nyob zoo txog peb ib tsoom ntseeg sawv daws,

Wb ob niam txiv tau mus nrog cov phooj ywg ntseeg los tsuas teev ntuj nyob hauv chav tsev ntawm Don Bosco, hauv lub nroog Orléans.

Tus leej choj Kiettisack (Antoine) nws yog cov phooj ywg los tsuas lawv tus txiv plig coj lawv teev ntuj tau ntau lub xyoo los.

Txiv plig Kiettisack yog ib tug leej choj txais lub cim tiag tes nyob rau tim teb chaws Los Tsuas.

Yog li no, nws tuaj kawm ntawv ntawm pab MEP ( Mission étrangère de Paris ) nyob pem Paris tas nws lub caij nyoog lawm,

nws yuav tau rov qab mus teb chaws Los Tsuas.

Nws yog ib tug txiv plig paub hais 3 hom lus xws li lus los tsuas, lus nyab laj thiab lus fab kis. 

Hnub tim 25 lub 6 hli ntuj no thaum 11h, hauv lub tsev teev ntuj Don Bosco, txiv plig Kiettisack tuaj ua lub txoos teev ntuj 

nrog tus txiv plig Jean-Louis Rodriguez.

Tom qab teev ntuj tas, yuav npaj khi tes rau txiv plig Kiettisack.

Thov caw sawv daws tuaj koom thiab tuaj pab txhawb. Tsis tas li thov sawv daws pab npaj khoom noj haus tuaj pab txhawb.

kuv pom tau tias txiv plig Kiettisack yog ib tug txiv plig txawj hu nkauj teev ntuj ua lus los tsuas. Nws kub kub siab txhawb thiab pab 

pawg ntseeg los tsuas nyob ntawm Orléans no. 

Nws yuav mus tsev yuav ua rau sawv daws uas tau paub txog nws muaj kev tshua txog nws ib ntus. 

Thov kom Huab Tais Yes Xus coj txiv plig Kiettisack nws txoj hauv kev kom mus txog nws lub teb chaws. 

Kom nws coj nws lub siab ruaj khov thiab kom nws txoj kev ntseeg loj hlob ua rau nws nyob kaj siab lug los ua Tswv Ntuj txoj hauj lwm.

Amen.

église saint Jean Bosco: 140, rue de l’argonne 45000 Orléans

Niam Ntsuab Xwm Yaj

Kaum xyoo dhau tso lub chaw rau nthwv cua tshiab

Par Cécile YANG

Nyob zoo rau peb ib tsoom ntseeg hmoob sawv daws,

Ntawm no kuv yog niam Ntsuab Xwm Yaj/ Joanne Yang, kuv muaj lus zoo siab los hais qhia rau nej paub txog kuv pab neeg ua hauj lwm hauv lub aumônerie hmoob fab Kis teb. Kuv thov qhia rau peb cov ntseeg paub txog kuv tus kheej tias kuv yog ib tug niam tsev muaj 5 tug me nyuam. Kuv tau los txais txoj hauj lwm hauv lub aumônerie no yeeb vim kuv xav tias yuav yog ib txoj hauv kev pab rau kuv nkag siab zoo dua txog ntawm kev ntseeg. Kuv paub meej tias kuv yuav tau kawm tiag kuv thiaj li yuav paub mus txuas lus nrog rau cov leej choj los mus rau cov txiv tswv qhia thiab cov coj kev ntseeg, los rau nej txhua leej txhua tus. Kuv pab neeg uas txaus siab los nrog kuv tuav lub aumônerie no ntxiv mus lawm yav tom ntej, yog ib cov niam tsev muaj dej num ua muaj me tub me nyuam. Lawv kuj xav txhawb lawv txoj kev ntseeg kom loj hlob tuaj, li no lawv thiaj li txaus siab muab lawv lub sij hawm los pab kuv. Thov nej sawv daws zam lub txheej pub rau peb cov niam tsev vim peb tseem yuav los xyaum zuj zus mus thiab thov nej ua lub siab ntev pub rau peb, muab lo lus txhawb siab pub rau peb. Txawm li cas los kom sawv daws ua siab loj vim yeej muaj txiv plig Jean-Paul ua tus coj peb thiab muaj 2 tug txwj laus uas yog Xaiv Tsom Yaj/ Paul Cho Yang thiab Qhua Xab Thoj los pab peb.

Txuas ntxiv no mus kuv thov kom peb tsev neeg hmoob sawv daws tsuas muaj ntsib kev noj qab haus huv nyob rau lub xyoo tshiab 2023, kom lub xyoo tshiab nthuav txoj kev ntshiab dawb huv pub rau peb txhua tus huv tib si.

Pab Qub
Pab Tshiab