Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB     

HAS NPAS KWS      1 : 2-3, 2 : 2-4.p502

LUB NTSIAB LUS : Tab yog peb pom tas sawv daws huv si ua phem mas peb yuav 
nco ntsoov tias yog cov siab ncaj thiaj yuav muaj txoj hmoov zoo. 

COV LUS NYOB HAUV NTAWV HAS NPAS KWS :

2 – Tus Yaj Saub Has Npas Kws hais tias :

« HUAB TAIS, kuv yuav hu koj txog thaum twg, hos koj tsis mloog ?

Kuv tseem yuav qw npaum li cas tias :

‘Lawv muab kuv tua !’ Ces koj mam tuaj npo kuv ? 

3 – Vim li cas koj cia kuv pom tej yam tsis ncaj ?

Vim li cas koj nyob twj ywm ntsia lawv yuam tsoom sid ? 

Kuv tsuas tau pom kev ua tub sab, kev sib ntaus sib ceg sib ncaim xwb ! 

2 – Thaum ntawd HUAB TAIS teb kuv _tias :

« Koj sau zaj koj pom cia,

koj muab txaug saum daim txiag kom luag tau kev nyeem yooj yim. 

3 – Vim tias qhov koj yees pom ntawd nws muaj nws lub caij yuav tshwm sim tuaj. 

Qhov ntawd yuav tshwm sim tuaj tiag, tsis yog dag, yog tsis tau txog lub caij mas koj yuav tos.

Yeej yuav muaj tuaj xwb ! 

4 – Tus neeg siab nkhaus, nws yuav qaug. Tus siab ncaj nws yuav muaj txoj sia vim nws _lub siab_ pheej xeeb. »

Yog Tswv Ntuj Lo Lus        Nws lus txiaj ntsim

Nkauj Paj Nruag              YOG NEJ HNOV HUAB TAIS LUB SUAB                   

(NPN 95) (Zaj 62)

Txais: Hnub no yog nej hnov Huab Tais lub suab lawm, nej tsis txhob cia nej lub siab tawv li pob zeb.

1 – Nej tuaj, peb sawv daws hu nkauj zoo siab cav txog Huab Tais!

Peb qw suab zoo siab hawm lub tsua cawm peb.

Peb txav los ntawm nws xub ntiag ua nws tsaug!.

Peb npuaj teg hu nkauj cav txog nws.

2 – Nej chaws los, peb khoov cev, peb pe.

Peb txhos caug hawm tus Huab Tais tsim peb los.

Nws yog peb tus Tswv Ntuj, peb yog nws haiv neeg,

yog pab yaj nws txhais tes hwj.

3 – Hnub no, nej cia li mloog Huab Tais lub suab.

Nej tsis txhob cia nej lub siab tawv li pob zeb,

zoo li thaum nej nyob Mes Lis Npas

thiab nyob Mas Xas hauv teb chaws suab puam.

Thaum ntawd, nej cov yawg koob twb pom kuv cov hauj lwm muaj hwj huam,

tsis kav lawv tseem twv kuv thiab sim kuv.

ZAJ NYEEM OB

2 TIS MOS TES 1 : 6-8, 13-14.p869

LUB NTSIAB LUS : Thaum peb xav tshaj Ntuj Lus, peb ntsib ntau yam nyuaj. Mas peb 
yuav nco tias lub tswv yim peb txais ntawm Tswv Ntuj los yog ib lub tswv yim muaj 
zog. 

COV LUS PAJ LUG SAU TUAJ RAU TIS MOS TES :

 
6 – Yog vim li ntawd, kuv thov ntuas koj, kom koj rov txhib lub txiaj ntsim uas Tswv Ntuj

tso rau hauv koj hnub kuv tiag tes rau koj. 

7 – Lub tswv yim uas Tswv Ntuj pub rau peb tsis yog ib lub tswv yim ntshai,

yog ib lub tswv yim muaj zog, ib lub tswv yim nyiam, ib lub tswv yim pab yus tswj yus lub neej. 

8 – Koj _txhob _txaj _muag _ua _tim _khawv zeem peb tus Huab Tais. Txhob txaj muag zeem kuv uas yog Yes Xus tus neeg nyob txim. Koj yuav zoo siab nrog kuv raug txom nyem vim lub Moo Zoo. 

Koj muaj Tswv Ntuj lub zog nres koj. 

13 – Txoj kev koj yuav taug yog cov lus ncaj uas koj tau hnov ntawm kuv nyob hauv txoj kev ntseeg thiab kev nyiam Yes Xus Pleev. 

14 –  Koj ceev Ntuj cov lus qhia zoo zoo mog. Koj muaj Leej Ntuj Plig Ntshiab pab koj :

nws nyob txawm hauv peb. 

Yog Tswv Ntuj Lo Lus        Nws lus txiaj ntsim

NTAWV MOO ZOO

LUS KAS 17 : 5-10.p644

LUB NTSIAB LUS: Thaum peb mloog Tswv Ntuj mas peb txhob xav tias Tswv Ntuj 
tshuav peb nuj nqe. 

COV LUS NYOB HAUV LUS KAS NTAWV MOO ZOO : 

5 – Cov Hauv Paus Xa Lus hais rau Huab Tais _tias :

« Koj txhab kev ntseeg rau peb mas ! »

6 – Ces Huab Tais hais tias :

« Yog nej muaj kev ntseeg luaj li lub noob zaub roj, mas nej yuav hais tau rau tsob ntoo txiv pos no tias ‘Rho koj cov cag, koj tshais mus cog koj rau hauv dej ntuj,’ _mas tsob ntoo yuav mloog nej lus.

7 – « Nyob hauv nej, yog leej twg tus tub txib mus laij teb, los nws mus zov tsiaj lawm, thaum nws rov tom teb los txog, nej leej twg yuav hais rau nws tias : « Koj tsuag tsuag los zaum noj mov ? »

8 – Ntshai nws yuav hais rau tus tub txib tias :

« Koj ua hmo rau kuv, koj sia siv, koj rau mov rau kuv. Thaum kuv noj kuv haus tas, mas koj mam li noj haus tom qab. »

9 – Tus tub txib ua raws li nws tus tswv txib, tus tswv puas pom nws txiaj ntsim ? 

10 – Nej kuj zoo ib yam li ntawd :

thaum nej ua tas txhua yam raws li tej lus luag txib nej, mas nej hais tias : « Peb yog ib co tub txib tsis muaj nqi ;

peb ua qhov uas peb yuav tsum ua. »

Huab Tais Pleev      Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

 ZAJ NYEEM IB               

AS MOS                    6 : 1, 4-7. P491

LUB NTSIAB LUS : Cov neeg uas lawv tsuas nrhiav kev noj qab nyob zoo mas muaj ib
zaug Tswv Ntuj yuav muab txim rau lawv. 

COV LUS NYOB HAUV NTAWV AS MOS :

1 – Lawv yuav raug txoj hmoov phem, cov uas lawv nyob dag ua si nyob saum Xis Yoos,

cov tso siab rau yav tom ntej nyob saum lub roob Xas Mas Lias,

cov nom tswv ntaus thawj kav cov kuj cuab uas His Xas Lais tsev neeg mus cuag lawv.
4 – Lawv pw saum tej lub txaj kaus ntxhw, lawv khaum tes khaum taw saum cov rooj zaum tswm zooj,

lawv noj luag tej me nyuam yaj, noj luag tej thav nyuj.

5 – Lawv qw tej zaj kwv txhiaj ntxuag thaj cheej xws li Das Vis, lawv tsim tej twj ua paj nruag. 

6 – Lawv haus cov cawv txiv ntoo puv tej lub ntim loj. Lawv muab roj tsw qab tshaj los pleev lawv lub cev. 

Lawv tsis ntxhov siab txog qhov His Xas Lais tab tom yuav raug xwv txheej. 

7 – Vim li ntawd, nyem no txog lub caij lawv yuav ua tsoom pej xeem ntej mus nyob txim lawm pej kum teb. 

Nyem no dua lub caij uas cov neeg pw tsa ceg cos haus cawv qaug cawv lawm.

Yog Tswv Ntuj Lo Lus        Nws lus txiaj ntsim

Nkauj Paj Nruag:              KUV TUS PLIG CAV TXOG HUAB TAIS                    

(NPN 146) (Zaj 127)

Txais: Kuv tus Plig, koj cav lus zoo txog Huab Tais.

1 – Huab Tais Tswv Ntuj nco ntsoov nws cov lus mus ib txhiab ib txhis.

Nws tswj txoj kev ncaj rau cov neeg uas raug luag hiam.

Nws pub rau cov neeg tshaib noj, nws tso cov neeg nyob txim.

2 – Huab Tais qhib cov neeg dig muag kom rov pom kev,

nws tsa cov neeg qaug zog.

Huab Tais nyiam cov neeg ua ncaj, nws pov hwm cov pej kum neeg.

3 – Nws txhawb cov poj ntsuam thiab cov ntsuag nos.

Nws mooj cov siab phem kom lawv yuam kev.

Huab Tais yog tus vaj nyob mus li.

Xis Yoos, nws yog koj tus Tswv Ntuj mus tiam dhau tiam.

ZAJ NYEEM OB

1 TIS MOS TES      6 : 11-16. P868

LUB NTSIAB LUS: Peb cov neeg ntseeg txog Yes Xus peb yuav ua ib co tim khawv
zeem tseeb txog Tswv Ntuj, xws li Yes Xus. 
                                                                      

COV LUS PAJ LUG SAU TUAJ RAU TIS MOS TES :

11 – Ntawm koj, mas koj yog Tswv Ntuj tus neeg, koj txav mus deb ntawm tej ntawd tib si. 

Koj xyaum mus taug txoj kev ncaj, kev hwm Ntuj, kev ntseeg, kev nyiam, kev tij lim,

kev hlub luag mos nyoos. 

12 – Koj ntaus ntsug rog zoo los pab kev ntseeg. Koj yuav txeeb tau txoj sia nyob mus li : 

Ntuj hu koj los txais txoj sia ntawd. Thiab yog vim koj xav tau txoj sia nyob mus li,

ces koj thiaj ua zaj zeem kev ntseeg zoo nkauj rau cov tim khawv pom. 

13 – Kuv tuav txog Tswv Ntuj lub npe, uas nws pub txoj sia rau txhua tsav txhua yam thiab tuav txog Yes Xus Pleev lub npe, uas nws tau hais lo lus zeem tseeb zoo nkauj,

nyob ntawm Poos Xyus Pis Las Tos xub ntiag. 

14 – Koj coj lo lus qhia zoo, txhob ua ib yam tsis huv, txhob muaj chaw xyeej. 

Koj ua li ntawd mus txog hnub peb tus Huab Tais Yes Xus Pleev

yuav tawm los rau pom xyeem. 

15 – Thaum txog lub caij teem, tus yuav ua kom Yes Xus tawm los, 

yog tus Huab Tais nto koob meej, tus Vaj kav tas tsoom vaj,

tus Huab Tais kav tas tsoom huab tais, 

16 – yog tus muaj txoj sia tsis txawj tuag ua nws tug,

yog tus nyob txawm saum qhov pom kev, uas neeg mus tsis tau, 

yog tus uas leej tib neeg _tsis tau pom dua, thiab pom tsis tau.

Kev nto koob meej thiab kev muaj hwj huam

yog nws tug mus ib txhiab ib txhis ! Ua li ! 

Yog Tswv Ntuj Lo Lus        Nws lus txiaj ntsim

NTAWV MOO ZOO          

LUS KAS       16 : 19-31. P643

LUB NTSIAB LUS: Cov neeg uas tas lawv sid lawv tso siab rau nyiaj txiag mas lwm 
tiam lawv txoj hmoov yuav phem. 

COV LUS NYOB HAUV LUS KAS NTAWV MOO ZOO :

 
19 – « Muaj ib tug neeg nplua nuj, nws hnav ntaub tsuj liab tsam xem thiab ntaub pag mos. 

Nws niaj hnub noj tej rooj qav zoo kawg.

20 – Muaj ib tug pluag hu ua Las Ntxas Los, nws ib ce mob kiav txhab tas,

nws pw ze ntawm tus nplua nuj lub rooj loog. 

21 – Las Ntxas Los ntshaw noj tej yam poob ntawm tus nplua nuj lub rooj mov kom tsau nws plab…

Dev tseem tuaj yaim nws tej qhov txhab thiab. 

22 – Muaj ib hnub, tus pluag tuag, cov Tshiab tuaj nqa nws mus rau hauv Has Nplas Has xub ntiag. 

Tus nplua nuj kuj tuag thiab, luag muab nws coj mus faus.

23 – Tus nplua nuj nyob hauv ntuj txias teb tsaus, nws txom nyem loj kawg. 

Nws tsa muag ntsia pom Has Nplas Has nyob deb thiab pom

Las Ntxas Los nyob hauv nws xub ntiag.  

24 – Nws hu nrov tias : Txiv Has Nplas Has, thov koj khuv leej kuv,

thov koj xa Las Ntxas Los tuaj muab nws ntsis ntiv tes tub

dej rau kuv tus nplaig kom txias, vim kuv raug tsim txom nyob hauv cov hluav taws no. 

Tab sis Has Nplas Has hais tias :

25 – Kuv tub, koj nco ntsoov tias thaum ua neej nyob koj tau txais koj cov nyiaj txiag,

hos Las Ntxas Los tau txais kev mob. Zaum no Las Ntxas Los txais kev nplij nyob ntawm no,

hos koj raug tsim txom. 

26 – Thiab tsis tag li ntawd :

muaj ib lub qhov ntuj tob kawg kem peb rau ntawm nej, kom cov uas xav hla ntawm peb rau tim nej hla tsis tau, thiab kom cov nyob tim nej txhob hla tau los rau tim no.

27 – Ces tus nplua nuj hais tias :

« Txiv, kuv thov koj xa Las Ntxas Los mus hauv kuv txiv tsev,

28 – vim kuv muaj tsib tug kwv tij, kom Las Ntxas Los mus ua pov thawj qhia lawv,

kom lawv tsis txhob tuaj nyob hauv qhov chaw raug tsim txom no.” 

29  – Ces Has Nplas Has hais tias :

“Lawv muaj Mais Xes thiab cov Yaj Saub. 

Cia lawv mloog Mais Xes thiab cov Yaj Saub qhia. 

30 – Tab sis tus nplua nuj hais tias :

“Txiv Has Nplas Has, yog tias ib tug hauv cov tuag mus cuag lawv, mas lawv yuav hloov siab.

31 – Tab sis Has Nplas Has _hais rau nws tias :

“Yog lawv tsis mloog Mais Xes thiab cov Yaj Saub, mas tab yog ib tug sawv hauv cov tuag mus qhia lawv,

lawv kuj yuav tsis ntseeg nws.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

AS MOS            8 : 4-7. P492

LUB NTSIAB LUS: Muaj tej tus xav tias tsuav yog lawv teev Ntuj hnub chiv mas

Tswv Ntuj zoo siab rau lawv lawm. Tab sis Tswv Ntuj xub saib tias peb puas ua ncaj

Rau luag tej.

COV LUS NYOB HAUV NTAWV AS MOS :

4 – Nej cov neeg uas quab yuam cov pluag thiab xav rhuav cov neeg txheej qis nyob hauv lub teb chaws, nej mloog kuv hais mog ! 

5 – Nej niaj hnub hais tias :

« Laj tos lub caij caiv dua ! Peb maj, peb xav muag peb cov nplej sai !

Laj tos kom Xas Npas Tos dua !

Peb yuav xuas rab teev loj tsis txwm choj los luj,

yuav xuas cov kawm yau tsis txwm tawv los yeem nplej. 

6 – Peb yuav muab nyiaj los muas cov neeg pluag, peb yuav kom cov neeg txom nyem ua peb qhev vim lawv tshuav nuj nqes ntawm peb npaum li ib nkawg khau khiab. 

Tab yog cov tsig txhuv xwb los peb yuav sau nqe tib si, peb tsis zam rau luag. »

7 – HUAB TAIS tuav txog Yas Kos lub npe cog lus tias :

Kuv yuav nco ntsoov nej tej hauj lwm phem mus li.      

Yog Tswv Ntuj Lo Lus        Nws lus txiaj ntsim

Nkauj Paj Nruag :              HUAB TAIS TSA COV PLUAG               

(NPN 113) (zaj 194)

Txais: Peb cav lus zoo txog Huab Tais vim nws tsa cov neeg txom nyem.

1 – Huab Tais cov tub txib, nej cav lus zoo txog nws mas! Nej cav txog nws kom nws lub npe nto moo lug,

txij no mus txog txhiab niag tim puas xyoo.

2 – Huab Tais kav tas ib tsoom haiv neeg. Nws lub koob meej nyob siab dua cuaj txheej ntuj.

Leej twg thiaj yuav zoo li peb tus Huab Tais Tswv Ntuj uas zaum lub theej kiab nyob txheej ntuj saud?

3 – Nws tsa tus neeg me hauv plua av los. Nws rub tus txom nyem hauv qhov chaw qias

los nrog cov tub huab tais zaum ua ib txig thiab nrog cov tub huab tais hauv nws haiv neeg ua ke.

ZAJ NYEEM OB   

1 TIS MOS TES       2 : 1-8. P863

LUB NTSIAB LUS: Thaum peb tuaj sib sau nyob hauv tsev teev Ntuj peb yuav nco

ntsoov thov Tswv Ntuj rau zej zog, rau lub teb chaws.

COV LUS UAS PAJ LUG SAU TUAJ RAU TIS MOS TES :

1 – Li ntawd, kuv xav ntuas nej, kom nej xub thov Ntuj, teev Ntuj, thiab hais tej zaj ua Ntuj tsaug rau tas ib zeej tsoom.

2 – Nej yuav thov Ntuj rau cov vaj, thiab cov muaj cai tswj luag tej, tom peb tau kev coj ib lub neej nyob nyab xeeb thiab tiaj tus nyob hauv txoj kev hwm Ntuj thiab muaj tsim. 

3 – Tej ntawd yog kev zoo thiab xis tus Tswv Ntuj cawm peb lub siab. 

4 – Tswv Ntuj xav kom tas _zeej tsoom txais kev cawm thiab paub qhov tseeb. 

5 – Vim muaj tib tug _Tswv Ntuj xwb. Nyob ntawm Tswv Ntuj thiab tsoom neeg kis nruab nrab,

tsuas muaj tib tug cev lus xwb : yog Yes Xus Pleev. _Nws yog neeg, nws muab nws los ua nqi txhiv peb sawv daws. 

6 – Thaum txog lub caij teem, nws tau ua tim khawv zeem tseeb txog tej yam ntawd. 

7 – Ntuj tsa kuv ua tus tshaj lus thiab tus Hauv Paus Xa Lus. Kuv hais lus tseeb, kuv tsis dag.       

Kuv yog tus thoob xwm Txoj Cai, qhia cov neeg teev pej kum dab,

kom lawv paub txoj kev ntseeg thiab paub qhov tseeb. 

8 – Li ntawd, kuv xav kom nyob tas qhov txhia chaw, sawv daws thov Ntuj, thiab tsa tes hwm Ntuj, hu txog Ntuj, kom txhob muaj kev npau taws, txhob muaj lus sib ceg.

Yog Tswv Ntuj Lo Lus        Nws lus txiaj ntsim

NTAWV MOO ZOO                      

LUS KAS _16 : 1-13.p642

LUB NTSIAB LUS : Peb yuav muab siab rau ua raws li lub Moo Zoo qhia. Ib yam li cov neeg nrhiav nyiaj lawv muab siab rau lawv txoj hauj lwm.

COV LUS NYOB HAUV LUS KAS NTAWV MOO ZOO :

1 – Yes Xus tseem hais rau cov thwj tim tias :

« Muaj ib tug neeg nplua nuj, nws muaj ib tug tim xyoob xam txiaj. 

Luag qhia tus tswv tias tus tim xyoob muab nws tej nyiaj txiag siv lwj siv liam. 

2 – Tus tswv hu tus tim xyoob tuaj, nws hais rau tus tim xyoob tias : 

‘Kuv hnov hais dab tsi txog koj ? Koj qhia saib koj siv kuv tej nyiaj txiag li cas. 

Txij no mus, koj yuav _tsis tau ua tus xam txiaj ntxiv.’ 

3 – Tus tim xyoob xav zoj rau nruab siab tias :

Kuv yuav ua li cas, yim kuv tus tswv yuav tshem txoj hauj lwm xam txiaj ntawm kuv ? 

Mus ncaws teb ? Kuv tsis muaj zog.  

Mus thov khawv ? _Kuv kuj txaj muag…  

4 – Kuv paub kuv yuav ua dab tsi kom thaum lawv tshem txoj hauj lwm xam txiaj ntawm kuv lawd,

muaj neeg txais kuv mus nyob hauv lawv tsev. 

5 – Ces tus tim xyoob hu cov neeg tshuav nqi ntawm tus tswv ib tug zuj zus tuaj. 

Nws hais rau thawj tug tias :

Koj tshuav nuj nqi ntawm kuv tus tswv npaum li cas ? 

6 – Tus tshuav nqi teb tias : Ib puas hub roj. Tus tim xyoob hais rau nws tias : ‘Muab koj daim ntawv _tshuav _nqi los, koj zaum, koj sau _sai sai ua _tsib caug.’

7 – Tus tim xyoob hais rau lwm tus tias :

Koj ne, koj tshuav nqi pes tsawg ? 

Nws hais tias : Ib puas phawv nplej. 

Tus tim xyoob hais rau nws tias :

‘Muab koj daim ntawv tshuav nqi los, koj sau ua yim caum.’

8 – Tus tswv qhuas tus tim xyoob siab tsis ncaj _txawj ua neeg xyuam xim. 

Vim ntiaj teb neeg cov tub, _thaum lawv nrog lawv cov npawg ua ke,

lawv xyuam xim dua kev kaj cov tub.  

9 – Kuv hais rau nej :

« Nej xuas tej nyiaj txiag los coj neeg mus rau hauv kev tsis ncaj, mus tsim phooj ywg. 

Ces thaum nyiaj dua toj tas lawm, cov phooj ywg ntawd yuav txais nej mus hauv cov tsev tsam phooj nyob mus li.

10 – Leej twg pheej xeeb thaum nws saib tej yam me me, nws kuj pheej xeeb thaum nws saib ib yam loj. 

Leej twg ua tsis ncaj thaum nws saib tej yam me me, nws kuj ua tsis ncaj thaum nws saib tej yam loj. 

11 – Yog nej tsis pheej xeeb saib cov nyiaj txiag uas xeeb kev tsis ncaj,

mas leej twg yuav muab yam zoo tseem ceeb rau nej saib ? 

12 – Thaum nej saib yam uas yog luag tug, _yog nej ua tsis ncaj,

mas leej twg yuav muab yam uas yog nej tug rau nej tuav. 

13 – Tsis muaj ib tug tub txib tsob hwb ob tug tswv tau. 

Nws yeej yuav ntxub ib tug, nyiam lwm tus. 

Nws yuav npuab ib tug, thuam lwm tus. 

Nej yuav ua Tswv Ntuj tub txib thiab nyiaj txiag tub txib tsis tau. »

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

XAM PHAJ  21, 4b – 9.

4 – lawv taug txoj kev mus rau lub hiav txwv Xus, vim lawv xav lug Es Dos teb. Thaum lawv mus txog ib tog kev, tsoom pej xeem npau taws.

5 – Lawv cem Tswv Ntuj thiab cem Mais Xes tias :

« Vim li cas neb thiaj coj peb tawm Hais Nkws Tos teb kom peb los tuag hauv lub teb chaws suab puam no ? Tsis muaj mov noj, tsis muaj dej haus li, peb dhuav noj cov niag mov tuag tshaib ntawd dhau hwv lawm ! »

6 – Tswv Ntuj thiaj tso ib cov nab muaj taug tuaj tom lawv. Cov nab ntawd tom cov His Xas Lais tuag coob leej.

7 – Tsoom pej xeem mus hais rau Mais Xes tias : « Peb ua txhaum lawm vim peb tau cem HUAB TAIS thiab cem koj. Koj thov kom HUAB TAIS zam rau peb, kom nws ntiab cov niag nab ntawd khiav mus deb peb. » Ces Mais Xes thiaj thov kom Ntuj zam rau lawv.

8 – HUAB TAIS teb tias : « Koj nchuav ib tug nab muaj taug, koj muab khuam rau saum ib tug ncej. Leej twg raug nab tom, yog nws ntsia tus nab nchuav ntawd ces nws yuav tsis tuag. »

9 – Mais Xes thiaj muab tooj nchuav ua ib tug nab, nws muab khuam rau saum ib tug ncej. Yog nab tom leej twg, mas nws tsa muag ntsia tus nab tooj ntawd ces nws tsis tuag.

Yog Tswv Ntuj Lo Lus        Nws lus txiaj ntsim

Nkauj Paj Nruag

78

3 – Tej yam peb hnov thiab peb paub, yog tej uas peb phaj txiv thiab phaj yawg qhia tseg.

4 – Peb yuav tsis zais rau lawv cov xeeb ntxwv, qhia nws lub hwj huam thiab cov dej num zoo nkauj zoo saib

34 – Thaum Tswv Ntuj tua lawv, ces lawv nrhiav nws ; lawv yuav lub siab tshiab, lawv tig los rau nws.

35 – Lawv rov nco tias Tswv Ntuj yog lawv lub tsua, nco tias tus Tswv Ntuj Nyob Siab Tshaj yog tus txhiv lawv.

36 – Tab sis lawv lam ntxias nws ntawm ncauj xwb, lawv tus nplaig dag nws.

37 – Lawv lub siab tsis npuab nws ruaj, lawv tsis tso siab rau cov lus nws cog rau lawv.

38 – Tab sis, Tswv Ntuj lub siab hlub mos nyoos zam rau lawv, nws tsis rhuav lawv, nws ntxuav lawv cov txhaum.

39 – Nws rov nco tias lawv yog ib lub cev nqaij xwb, yog ib txoj pa uas yuav dua mus tsis rov.

ZAJ NYEEM OB

FIS LIS POS 2, 6-11

6 – Yes Xus Pleev yog Tswv Ntuj, tiam sis nws tsis cia nws lub hwj chim Tswv Ntuj rau luag hawm : nws muab nws lub hwj chim hle.

7 – Nws yeem ua ib tug qhev, nws yug los ua neeg xws li ib tsoom neeg. Luag pom nws tus yam ntxwv yog yam ntxwv tib neeg.

8 – Nws txo nws qis : nws tuaj yeem mloog Ntuj lus mus txog qhov tuag, thiab tseem xaiv txoj

kev tuag saum ntoo cuam.

9 – Vim li ntawd, mas Tswv Ntuj thiaj tsa Yes Xus ua ib tug loj nyob siab siab. Tswv Ntuj muab lub npe uas nyob siab dua lwm cov npe rau nws.

10 – Li ntawd, tus twg hnov tuav txog Yes Xus lub npe, tsis hais nyob saum cov txheej ntuj, los nyob ntiaj teb no, los nyob nruab yeeb, mas tus ntawd cia li txhos caug hawm.

11 – Txhua xeem lus yuav tsum cav tias Yes Xus Pleev yog Huab Tais : Leej Txiv Tswv Ntuj thiaj muaj koob meej nto moo lug.

Yog Tswv Ntuj Lo Lus        Nws lus txiaj ntsim

NTAWV MOO ZOO

ZAM 3, 13-17

13 – Tsis muaj leej twg tau nce mus saum ntuj, tsuas yog tus nqes saum ntuj los, uas yog Neeg Leej Tub nyob saum ntuj.

14 – Neeg Leej Tub yuav tsum raug luag tsa nws siab xws li Mais Xes tsa tus nab nyob teb chaws suab puam,

15 – kom xwv tus ntseeg txog nws, muaj txoj sia nyob mus li.

16 – Vim Tswv Ntuj nyiam lub qab ntuj neeg npaum no : nws thiaj muab nws Leej Tub twm zeej rau, kom xwv tus ntseeg txog Leej Tub txhob tuag, tab sis kom nws muaj txoj sia nyob mus li.

17 – Tswv Ntuj tsis xa Leej Tub tuaj hauv lub qab ntuj kom nws muab txim rau lub qab ntuj neeg, nws xa Leej Tub tuaj cawm lub qab ntuj neeg.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

 ZAJ NYEEM IB                            

THOOB TSIB 9 : 13-18.p397

LUB NTSIAB LUS : Peb yuav thov kev thoob tsib ntawm Tswv Ntuj vim neeg tsis paub kev thoob tsib.

COV LUS NYOB HAUV NTAWV THOOB TSIB :

13 – Tus neeg twg thiaj yuav paub tau Tswv Ntuj tus nru lus ? 

Leej twg yuav mem tau qhov uas Huab Tais nyiam ? 

14 – Leej tib neeg uas txawj tuag, nws _zaj tswv yim yog tswv yim txhawj. Neeg zaj tswv yim tsis ruaj. 

15 – Neeg lub cev txawj lwj, ua nra hnyav qees rau neeg tus plig, neeg lub cev zoo li ib lub tsev av nkos tsuam tus plig uas muaj kev txhawj nyob puv hauv.

16 – Peb yuav luag mem tsis tau tias muaj dab tsi nyob ntiaj teb no. 

Peb siv siv zog _thiaj nrhiav tau tej yam uas nyob ze ntawm peb txhais tes,

ua li mas yog leej twg thiaj yuav nrhiav tau tej yam uas nyob saum Ntuj ? 

17 – Huab Tais, leej twg yuav paub tau koj lub siab, yog koj tsis pub kev thoob tsib thiab koj tsis tso koj lub tswv yim ntshiab tuaj saum ntuj tuaj ?

18 – Vim muaj li ntawd, mas cov neeg nyob ntiaj teb no tej xub ke ncaj tuaj,

tib neeg thiaj tau paub tej yam ntxim koj siab. Kev thoob tsib tau cawm lawv.

Yog Tswv Ntuj Lo Lus        Nws lus txiaj ntsim

Nkauj Paj Nruag              KOJ YOG PEB QHOV CHAW VAM KHOM                

(NPN 90-2) (Zaj192)

Txais: Huab Tais, koj yeej ib txwm yog peb qhov chaw vam khom tiam dhau tiam.

1 – Huab Tais, koj ua kom neeg rov mus ua av luaj.

Koj hais tias, “As Das tsoom tub ki, nej rov mus ua plua av!”

Koj saib ib txhiab xyoo zoo li ib hnub.

Koj saib ib hmos zoo li ib teev.

2 – Koj rho neeg txoj sia thaum lawv tsaug zog nruab dab ntub.

Lawv ploj ntais zoo li nroj tsuag tawg paj yav sawv ntxov,

tab sis yav tsaus ntuj, lub paj qhuav tas.

3 – Thov koj qhia kom peb paub suav peb lub hnub nyoog ua neej,

peb thiaj yuav tau ib lub siab thoob tsib.

Huab Tais, thov koj rov qab los.

Thov koj hlub koj cov tub txib mas!

4 – Sawv ntxov tsees, thov koj pub koj txoj kev hlub rau peb,

peb yuav qw suab zoo siab tas peb sim neej.

Thov Huab Tais lub siab hlub nqes los roos peb

kom cov hauj lwm peb txhais tes khwv vam meej.

ZAJ NYEEM OB               

FIS LES MOOS _9b-17.p877

LUB NTSIAB LUS :Paj Lug saib Fis Les Moos tus qhev yog Paj Lug tus tub, nws hlub tus qhev ib yam li tus tswv. Tus qhev Os Nes Xis Mos tau ntsib Paj Lug nyob hauv tsev loj faj. Nws txais kev ntseeg ntawm Paj Lug los.

COV LUS PAJ LUG SAU TUAJ RAU FIS LES MOOS:

9 – Tus yuav hais lus rau koj no, yog Paj Lug, tus laus neeg Paj Lug, uas nyem no nws yog Yes Xus Pleev tus neeg nyob txim. 

10 – Kuv thov koj rau kuv tus me nyuam Os Nes Xis Mos, uas kuv yug nws nyob hauv cov saw hlau. 

11 – Yav dhau los, Os Nes Xis Mos yog ib tug neeg tsis muaj qab hau pes tsawg rau koj. 

Tab sis, txij no mus, nws yuav muaj nqis rau koj, ib yam li nws muaj nqis loj rau kuv. 

12 – Kuv xa nws rov qab los rau koj. Nws yog kuv nplooj siab. 

13 – Kuv twb xav cia nws nyob ze kuv, kom nws sawv koj chaw pab kuv nyob hauv cov saw hlau uas lub Moo Zoo pub rau kuv. 

14 – Tab sis, kuv tsis xav ua ib yam _uas kuv tsis tau xub nug koj lus pom zoo tso.

Yam zoo uas koj yuav ua, mas kuv tsis yuam koj, koj yuav tsum zoo siab ua koj xwb.

15 – Os Nes Xis Mos tau ncaim ntawm koj ib ntus, ntshai yog vim Ntuj xav xa nws rov qab los ua koj tug mus li. 

16 – Ntuj tsis xa nws rov los ua koj ib tug qhev. _Nws zoo tshaj tus qhev. Nws rov los ua _ib tug kwv tij uas koj hlub. Nws twb yog kuv ib tug kwv uas kuv nyiam kawg. 

Mas nws haj yam yuav ua ib tug kwv tij uas koj yuav nyiam tshaj nyob hauv tsoom sid, thiab nyob hauv Huab Tais. 

17 – Yog koj saib tias wb yog ob tug sib raug zoo, mas koj yuav txais nws ib yam li txais kuv. 

Yog Tswv Ntuj Lo Lus        Nws lus txiaj ntsim

NTAWV MOO ZOO                      

LUS KAS 14 : 25-33.p640

LUB NTSIAB LUS : Tus xav nrog Yes Xus mus, nws yuav txiav siab nyiam Yes Xus tshaj sawv daws. Tus txiav siab lawv Yes Xus qab, nws yuav tsum paub tias Yes Xus yuav thov ntau yam ntawm nws.

COV LUS NYOB HAUV LUS KAS NTAWV MOO ZOO :

25 – Tej pab neeg coob nrog Yes Xus taug kev. Yes Xus tig los hais rau lawv tias :

26 – « Leej twg los raws kuv, yog nws tsis nyiam kuv dua nws niam nws txiv,

nws poj niam me nyuam, nws cov kwv tij thiab cov muam, thiab yog nws nyiam nws txoj sia dua kuv,

mas tus ntawd ua tsis tau kuv thwj tim. 

27 – Leej twg tsis kwv nws tus ntoo cuam thiab tsis lawv kuv qab, mas nws ua tsis tau kuv thwj tim. »

28 – « Yog nej leej twg xav txhim ib tug pej thuam, nws yuav tsis xub zaum xam saib yuav siv nyiaj npaum li cas, thiab ntsuas saib nws puas muaj nyiaj txaus ua kom tiav lod ?

29 – Tsam nws pib txhim cov taw ntsa tas, ho ua tsis tau kom tiav. Ces tas cov neeg pom yuav thuam nws hais tias : 

30 – Saib ! Tus neeg no pib txhim, ho ua tsis tau kom tiav !

31 – Los ib tug vaj, yuav sawv kev mus ua rog ntaus lwm tus vaj, nws yuav tsis xub zaum  xam saib nws muaj kaum txhiab leej tub rog, nws puas yuav tiv tau tus vaj uas coj nees nkaum txhiab leej tuaj ?    

32 – Yog nws paub tias yuav tiv tsis tau, mas thaum lwm tus vaj tseem tuaj txog deb,

nws yuav xa ib pab tiam lis mus thov kom cia lub teb chaws nyob thaj yeeb.  

33 – Nej kuj zoo ib yam li ntawd : nej leej twg tsis tso nws lub cuab tam tseg, nws ua tsis tau kuv thwj tim.

Huab Tais Pleev      Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB                 

NPES XIS LAS 3 : 17-18, 20, 28-29.

LUB NTSIAB LUS : Cov neeg thoob tsib nyob ntawm Tswv Ntuj, ntau zaus yog cov -neeg me.

COV LUS NYOB HAUV NTAWV NPES XIS LAS :

17 – Me tub, thaum koj ua koj tes dej num, koj txhob muab hlob, ces cov neeg uas ntuj xaiv yuav nyiam koj. 

18 – Koj yim yog tus loj, koj yim yuav nyiam ua tus me, koj thiaj yuav yog tus neeg xis Huab Tais siab. 

20 – Vim Huab Tais lub hwj huam loj tas nrho, thiab yog cov neeg me thiaj cav lus zoo txog nws. 

28 – Thaum tus neeg muab hlob raug txom nyem mas tsis muaj tshuaj kho tau nws zoo,

vim ib tug yub phem nrhau cag tob nyob hauv nws lawm. 

29 – Tus neeg xyuam xim xav ntsoov txog cov paj lug nyob hauv nruab siab. 

Tus neeg thoob tsib ntshaw ib lub pob ntseg qhib lug mloog.

Yog Tswv Ntuj Lo Lus        Nws lus txiaj ntsim

Nkauj Paj Nruag              TSWV NTUJ HLUB COV TXOM NYEM                     

(NPN 68)

Txais: Tswv Ntuj, koj lub siab zoo, koj yog cov neeg txom nyem lub chaw nyob.

1 – Cov neeg ncaj zoo siab, lawv hom khaj nyob ntawm Tswv Ntuj xub ntiag.

Nej hu nkauj rau Tswv Ntuj, nej hu nkauj cav txog nws lub npe.

2 – Tus Tswv Ntuj nyob hauv lub tsev ntshiab, yog cov ntsuag nos txiv, nws txheem cov poj ntsuam.

Tus neeg uas luag tso pov tseg, Tswv Ntuj pub tsev rau nws nyob. Cov neeg nyob hauv tsev loj faj, Tswv Ntuj tso lawv dim mus ua neej ywj siab.

3 – Tswv Ntuj, thaum koj lub teb chaws qhuav nkig nkuav, koj ywg dej nag kom nws rov muaj sia.

Koj haiv neeg tau los nyob hauv lub teb chaws uas koj pub ua lawv tug. Koj lub siab zoo, koj pub rau cov pluag.

ZAJ NYEEM OB                           

HES NPLAWS 12 : 18-19, 22-24.

LUB NTSIAB LUS : Peb nrog Tswv Ntuj cog lus nyob hauv Yes Xus, peb nyob ze Tswv Ntuj, nyob ze Yes Xus, peb lub neej lom zem.

COV LUS NYOB HAUV NTAWV HES NPLAWS:

18 – Nej tsis tau txav mus ze ib yam uas nej kov tau, xws li cov hluav taws kub kub, 

twv huab dub, qhov tsaus ntuj nti, thiab cua daj cua dub, 

19 – lub suab hom los tej suab hais lus nrov doog diaj. Cov thaum ub tau hnov, lawv thov kom txhob hais lus ntxiv rau lawv. 

22 – Tab sis nej, mas nej tau txav los ze lub roob Xis Yoos, ze tus Tswv Ntuj muaj txoj sia lub tsheej Yes Lus Xas Les saum ntuj, ze txhiab vam tus Tshiab uas sib txoos ua ntees lom zem,

23 – ze ib tsoom tub hlob uas muaj npe sau nyob saum ntuj, ze tus Tswv Ntuj txiav txim rau tas lub qab ntuj neeg, ze cov neeg ncaj cov plig uas Ntuj twb ua kom lawv zoo txhij zoo txhua tas. 

24 – Nej tau txav los ze Yes Xus uas yog tus sawv peb chaw cog lus tshiab,

yog tus tsuag nws cov ntshav uas txawj hais lus zoo dua As Npes cov ntshav. 

Yog Tswv Ntuj Lo Lus        Nws lus txiaj ntsim

NTAWV MOO ZOO                     

LUS KAS 14 : 1, 7-14.

LUB NTSIAB LUS : Peb nyob ntawm Tswv Ntuj xub ntiag, cov loj tsis yog cov peb -xav. Peb sawv daws yuav nyiam ua neeg me.

COV LUS NYOB HAUV LUS KAS NTAWV MOO ZOO :

1 – Muaj ib zaug, hnub Xas Npas Tos, Yes Xus tuaj noj ib pluag mov nyob hauv cov Fas Lis Xais ib tug thawj coj tsev. Lawv nyas ntshis Yes Xus.

7 – Yes Xus hais ib zag paj lug rau cov neeg tuaj noj mov, vim nws pom lawv xaiv thawj cov rooj zaum. 

Nws hais rau lawv tias : 

8 – « Thaum luag caw koj mus noj tshoob, koj tsis txhob mus zaum thawj cov rooj, tsam luag caw ib tug muaj meej mom dua koj tuaj thiab. 

9 – Nyob tsam tus tswv tsev uas tau caw neb tuaj lam los hais rau koj tias :

‘Koj cia qhov chaw kod rau tus no.’ Ces koj yuav sawv mus zaum lub rooj puag nram qab, koj yuav txaj muag.       

10 – Thaum luag caw koj, koj yuav mus zaum -lub rooj puag nram qab, kom thaum tus caw koj los txog, nws hais rau koj tias :

‘Npawg, koj nce los pem toj.’

Ces koj yuav tau ntsej muag nyob ntawm cov neeg tuaj nrog koj koom rooj qav xub ntiag. 

11 – Vim tias tus uas nws tsa nws siab, mas Ntuj yuav txo nws qis, hos tus uas nws txo nws qis, mas Ntuj yuav tsa nws siab. »

12 – Yes Xus tseem hais rau tus neeg caw nws tias :

« Thaum koj npaj ib roog su los ib roog hmo, koj txhob nqua hu koj cov phooj ywg,

koj cov kwv tij, koj cov neej tsa, thiab cov neeg nplua nuj uas nyob ze koj.

Tsam lawv ho caw koj thiab pauj koj rooj nqaij rooj hno. 

13 – Thaum koj ua ib roog qav, koj nqua hu cov pluag, cov tu tes tu taw, cov ceg tawv, cov dig muag. 

14 – Koj yuav zoo siab, vim lawv tsis muaj dab tsi pauj rau koj. Thaum cov neeg siab ncaj yuav sawv rov los, mas Ntuj yuav pauj rau koj. »

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB               

HIS XAIS 66 : 18-21.

LUB NTSIAB LUS : Tswv Ntuj tshoj neeg lub siab mus li kom muaj neeg mus tshaj nws txoj kev cawm neeg rau txhia haiv neeg paub, ces sawv daws tuaj hwm Tswv Ntuj.

COV LUS NYOB HAUV NTAWV HIS XAIS.

18 – Kuv tuaj sau txhua lub kuj cuab thiab txhua xeem lus. Lawv yuav tuaj, lawv yuav pom kuv lub hwj chim. 

19 – Kuv yuav tsa ib lub cim nyob hauv cov kuj cuab. Kuv yuav xa cov neeg dim ntawm kev raug txim mus cuag cov kuj cuab, thiab cov pov txwv nyob deb uas tsis tau hnov hais txog kuv, tsis tau pom kuv lub hwj chim. Cov dim ntawm kev raug txim yuav tshaj kuv lub koob meej nyob hauv cov kuj cuab. 

20 – Lawv yuav coj nej tsoom kwv tij tas huv si nyob hauv cov kuj cuab rov qab los,

yuav cev lawv ua thaj txi HUAB TAIS. Tus caij nees kuj muaj, tus caij tsheb ob lub log los plaub lub log kuj muaj. Tus caij luj los caij ntxhuav kuj muaj. Lawv tuaj txog kuv lub roob ntshiab Yes Lus Xas Les.

HUAB TAIS hais tias lawv ua xws li tsoom His Xas Lais, lawv cev toob xib nyob hauv cov phaj ntshiab huv los txi Ntuj hauv HUAB TAIS lub tsev.

21 – Kuv yuav tsa lawv tej tug los ua Leej Choj thiab ua Les Vis.

Yog Tswv Ntuj Lo Lus        Nws lus txiaj ntsim

Nkauj Paj Nruag              MUS TSHAJ LUB MOO ZOO                 

(NPN 117)

Txais: Nej mus thoob qab ntuj, nej tshaj kuv lub moo zoo rau txhua leej txhua tus.

1 – Tas txhua haiv neeg, nej cav lus zoo txog Huab Tais. Tas ib tsoom neeg, nej cav txog nws lub koob meej.

2 – Huab Tais lub siab hlub muaj zog tas nrho. Nws lub siab pheej xeeb mus ib txhiab ib txhis.

ZAJ NYEEM OB                           

HES NPLAWS 12 : 5-7, 11-13.

LUB NTSIAB LUS : Lub neej yog ceeb laj ris. Tswv Ntuj cov lus qhuab qhia ceeb laj mloog. Tab sis Tswv Ntuj pub peb nyob kaj siab lug.

COV LUS NYOB HAUV NTAWV HES NPLAWS.

5 – Nej puas nco qab lo lus uas Ntuj hais rau nej xws li hais rau ib co tub tias : 

“Me tub, koj txhob thuam Huab Tais lo lus qhuab. Thaum nws cob qhia koj, koj txhob ua siab me. 

6 – Vim tias tus uas Huab Tais nyiam mas Huab Tais cob nws, thiab Huab Tais nplawm tus uas Huab Tais txais los ua nws tus tub.” 

7 – Kev raug luag hiam, yog ib txog kev cob nej. Tswv Ntuj cob nej xws li nws cov tub. 

Puas muaj ib tug tub uas nws txiv tsis cob qhia nws ?

11 – Txoj kev cob qhia yeej tsis ua kom leej twg zoo siab tam sim ntawd, tsuas muaj ua kom chim siab xwb. Tsuas yog yav tom ntej, mas txoj kev cob qhia thiaj txi txiv rau hauv txoj kev thaj yeeb thiab txoj kev ncaj. 

12 – Ua li mas nej kav tsij rov tsa nej ob txhais tes tsaug leeg, rov sawv ntseg saum nej lub hauv caug ntshaus raws. 

13 – Thiab nej ua kom tej kev nkhaus ncaj tuaj rau nej ob txhais taw, kom tus ceg tawv txhob lem ko taw, nws thiaj yuav zoo taus.

Yog Tswv Ntuj Lo Lus        Nws lus txiaj ntsim

NTAWV MOO ZOO                     

LUS KAS 13 : 22-30.

LUB NTSIAB LUS : Tab yog yus ib txwm ua Ntuj kev cai mas niaj hnub yus yuav ceev faj. Tej zaum yus tsis npuab Yes Xus pes tsawg. Peb yuav ntsia thiab kawm Yes Xus mus li, kom peb tau ua raws li nws siab nyiam mus li.

COV LUS NYOB HAUV LUS KAS NTAWV MOO ZOO.

22 – Yes Xus mus hauv cov nroog thiab cov zos, nws qhia sawv daws. 

Nws taug kev mus rau Yes Lus Xas Les.

23 – Muaj ib tug hais rau Yes Xus tias :

« Huab Tais, cov yuav txais kev cawm puas yog cov tsawg ? »

Yes Xus hais rau lawv tias : 

24 – « Nej ua tiag mus hauv lub qhov rooj nqaim mog. 

Kuv hais rau nej : coob leej yuav nrhiav kev mus lawm hauv, tab sis lawv yuav mus tsis txog.

25 – Thaum tus tswv tsev sawv mus kaw qhov rooj lawm, tab sis nej tseem nyob nraum zoov,

nej yuav pib khob qhov rooj thiab nej yuav hais tias :

‘Huab Tais, koj qhib qhov rooj rau peb mas,’ ces nws yuav teb rau nej tias :

‘Kuv tsis paub nej nyob qhov twg tuaj.’ 

26 – Ces nej yuav hais rau nws tias :

‘Peb twb noj thiab haus nyob -ntawm koj xub ntiag, hos koj twb qhia sawv daws nyob hauv peb cov tshav puam.’

27 – Ces  tus  tswv -tsev -yuav hais rau nej tias :

‘Kuv tsis paub nej nyob qhov twg tuaj. Nej txav mus deb kuv, -tas nej cov ua tsis ncaj huv tib si.

28 – Nej yuav pom -Has Nplas Has, His Xas Has, Yas Kos, thiab ib tsoom yaj saub nyob hauv Tswv Ntuj lub Ceeb Tsheej, hos nej yuav raug luag ntiab mus nyob sab nraud, mas thaum ntawd nej yuav quaj ncia thiab yuav tom hniav nkawv. 

29 – Luag yuav tuaj Xib Fab thiab Toob Fab tuaj, tuaj Naj Fab thiab Pej Fab tuaj.

Sawv daws yuav tuaj zaum ntawm rooj qav, nyob hauv Tswv Ntuj lub Ceeb Tsheej.

30 – Ces muaj ib co neeg ua luag qab, yuav tau ua ntej, hos ib co ua ntej yuav ua qab. »

Huab Tais Pleev      Lub qab ntuj neeg cav txog koj

ZAJ NYEEM IB                 

YES LES MIAS 38 : 4-6, 8-10.

LUB NTSIAB LUS : Tus Yaj Saub Yes Les Mias cev Tswv Ntuj cov lus, yog ib co lus tsis xis luag siab. Tab sis yog qhov tseem ceeb. Ib tug pej kum neeg hlub tus Yaj Saub zoo dua cov Yus Das.

COV LUS NYOB HAUV NTAWV YES LES MIAS.

4 – Cov nom tswv hais rau tus vaj tias : 

« Yes Les Mias, tus neeg phem ntawd, koj muab nws tua mas ! Vim nws hais ib co lus tsis zoo ua kom cov tub rog zov lub nroog thiab cov pej xeem ntaus siab me. Tus ntawd tsis xav nrhiav kev cawm tsoom pej xeem, nws coj lawv mus raug txom nyem. »

5 – Tus  vaj Xes Des Xis teb tias : 

« Nej ntsia, nws nyob ntawm no. Nws nyob hauv nej tes. Tus vaj ua tsis tau dab tsi los tiv nej ! » 

6 – Lawv ntes Yes Les Mias, lawv muab nws pov rau hauv vaj tus tub hu ua Mas Kis Yas Hus lub qhov tim thaj uas nyob hauv lub tshav zov keeb. Lawv muab hlua tso nws nqes mus hauv lub qhov tim thaj.

Nyob hauv lub qhov tim thaj tsis muaj dej, tab sis muaj av nkos, ces Yes Les Mias zom rau hauv cov av nkos. 

8 – Es Npes Mes Les, yog ib tug neeg sam ua kab xwm hauv tus vaj tsev. 

Nws tawm hauv vaj ntxwv lub loog tuaj hais rau tus vaj tias :  

9 – « Huab tais vaj ntxwv, cov neeg ntawd ua tsis zoo rau tus Yaj Saub Yes Les Mias,

lawv muab nws pov rau hauv lub qhov tim thaj mas nws kawg yuav tuag nyob hauv xwb. »

10 – Ces tus vaj hais rau Es Npes Mes Les tias : 

« Koj coj peb tug neeg -nyob ntawm no nrog koj, nej mus thau tus Yaj Saub Yes Les Mias tawm los cheem nws tseem muaj txoj sia. »

Yog Tswv Ntuj Lo Lus        Nws lus txiaj ntsim      

Nkauj Paj Nruag              HUAB TAIS, TUAJ PAB KUV                 

(NPN 40-2)

Txais: Huab Tais, thov koj tuaj pab kuv.

1 – Kuv tos ntsoov Huab Tais, nws khoov los ze kuv.

2 – Huab Tais hnov kuv lub suab quaj. Nws rub kuv tawm ntawm txoj kev piam sij thiab kev tsaus ntuj.

Thaum kuv tshais ruam, nws hwj kuv.

3 – Nws tso ib zaj nkauj tshiab rau hauv kuv lub ncauj, yog zaj nkauj cav txog peb tus Tswv Ntuj.

Coob leej pom, lawv yuav hwm Huab Tais, lawv tso siab rau nws.

4 – Kuv pluag, kuv txom nyem, Huab Tais nco txog kuv. Koj yog tus pab kuv thiab npo kuv.

Huab Tais, koj txhob ua siab hnyav!

ZAJ NYEEM OB               

HES NPLAWS 12 : 1-4.

LUB NTSIAB LUS : Tas puas tsav yam ntxias ua txhaum nyob ncig peb. Peb yuav ntsia ntsoov Yes Xus, peb thiaj tsis ntaus siab me.

COV LUS NYOB HAUV NTAWV HES NPLAWS.

1 – Li ntawd, muaj tim khawv coob kawg nyob ncig peb, mas peb yuav muab txhua lub nra txo pov tseg,

thiab muab tej kev txhaum uas thaiv peb kev xyeeb hlo pov tseg. Peb kav tsij tso sas ntws mus txais txoj kev sim siab uas Ntuj npaj rau peb. 

2 – Peb yuav ntsia ntsoov Yes Xus uas yog tus ntaus thawj coj cov ntseeg. 

Nws pab peb -ntseeg kom tom thawj. Yes Xus tsis kam taug txoj kev lom zem uas luag cev rau nws,

nws yeem kwv ntoo cuam, nws tsis ntshai luag thuam, tsis ntshai poob ntsej muag. 

Nyem no nws zaum ntawm Tswv Ntuj lub theej kiab sab xis. 

3 – Nej nco ntsoov txog Yes Xus uas raug cov neeg txhaum tiv nws, nej thiaj yuav tsis ntaus siab me. 

4 – Nej tseem tsis tau tawm tsam tiv kev txhaum txog thaum nqaij ntuag ntshav nrog.

Yog Tswv Ntuj Lo Lus        Nws lus txiaj ntsim      

NTAWV MOO ZOO                     

LUS KAS 12 : 49-53.

LUB NTSIAB LUS : Yes Xus tsis cia ntiaj teb neeg tsaug zog twj ywm nyob hauv txoj kev txhaum. Yes Xus tuaj diaj sawv daws.

COV LUS NYOB HAUV LUS KAS NTAWV MOO ZOO.

49 – « Kuv coj ib co hluav taws tuaj rau lub ntiaj teb, kuv yeej xav kom cov hluav taws ntawd twb cig lawm. 

50 – Kuv yuav tsum txais ib co kab ke ntxuav. Kuv ntxhov siab mus txog hnub uas tej ntawd tiav tas. 

51 – Nej puas xav tias kuv tuaj  pub txoj kev thaj yeeb nyob ntiaj teb no ? 

Kuv hais rau nej, kuv tsis tuaj pub kev thaj yeeb, kuv coj kev sib ncaim tuaj.    

52 – Txij no mus, ib tse neeg muaj tsib leeg yuav sib ncaim, peb leeg yuav tiv ob leeg, ob leeg yuav tiv peb leeg : 

53 – sawv daws yuav sib ncaim, txiv yuav tiv tub, tub yuav tiv txiv, niam yuav tiv ntxhais, ntxhais yuav tiv niam, poj yuav tiv nyab, nyab yuav tiv poj. »

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia     

ZAJ NYEEM IB                 

THOOB TSIB 18 : 6-9.

LUB NTSIAB LUS : Tus sau ntawv Thoob Tsib, nws rov piav txog thawj hmo hla uas Tswv Ntuj tua cov tub Hais Nkws Tos thiab npo cov tub His Xas Lais. Nyem no niaj hnub nws kuj npo peb thiab.

COV LUS NYOB HAUV NTAWV THOOB TSIB.

6 – Tswv Ntuj, peb cov yawg koob twb xub paub txog hmo uas

koj yuav muab cov Hais Nkws Tos tua. Koj ua kom lawv xub paub vim koj xav pab lawv tso siab rau cov lus koj cog, koj xav pab lawv ua siab loj. 

7- Koj haiv neeg thiaj tos ntshis tias cov neeg ncaj yuav dim, cov yeeb ncuab yuav ploj. 

8 – Vim tias koj ib txhij rob caub rau cov ntxub peb, thiab koj muab koob meej rau peb,

koj xaiv peb los ua koj tug.        

9 – Vim li ntawd tas tsoom tub ki ntshiab thiaj txi Ntuj twj ywm nyob hauv nyias tsev,

thiab lawv koom cog lus tsa ib txog cai zoo li no : yam li cov ntshiab lawv yuav sib faib lawv cuab tam,

lawv yuav sib pab ris xwv txheej. Lawv ua ke hu cov yawg koob cov -nkauj.

Yog Tswv Ntuj Lo Lus        Nws lus txiaj ntsim      

Nkauj Paj Nruag              COV TAU TXOJ HMOOV ZOO             

(NPN 33-4)

Txais: Cov tau txoj hmoov zoo yog cov Tswv Ntuj xaiv los ua nws tug.

1 – Cov neeg siab ncaj, nej hu nkauj ntsuag qees cav txog Huab Tais.

Nej cov lus cav ntxim Tswv Ntuj siab. Cov tau txoj hmoov zoo yog haiv neeg

uas tau Huab Tais los ua lawv tus Tswv Ntuj thiab yog haiv neeg Ntuj xaiv los ua Huab Tais lub cuab tam.

2 – Huab Tais zov cov neeg hwm nws. Nws zov cov neeg tso siab rau nws lub siab zoo.

Nws npo lawv dim ntawm kev tuag. Nws txuag lawv txoj sia thaum lub teb chaws raug kev tshaib kev nqhis.

3 – Peb tus ntsuj plig tos ntsoov Huab Tais. Nws yog tus pab peb, nws yog peb daim leem phiaj.

Huab Tais, thov kom koj lub siab hlub roos peb. Peb chaw tso siab yog nyob hauv koj.

ZAJ NYEEM OB              

HES NPLAWS 11 : 1-2, 8-19.

LUB NTSIAB LUS : Thaum ib tug neeg tso siab rau Tswv Ntuj mas nws tsis yuam kev li. Tswv Ntuj yuav pub tas txhia yam uas nws cog lus pub.

COV LUS NYOB HAUV TSAB NTAWV HES NPLAWS :

8 – Yog vim Has Nplas Has ntseeg, mas nws thiaj mloog Ntuj hu nws kom sawv kev mus ib lub teb

chaws uas nws yuav txais los ua nws lub cuab tam. Ces nws sawv kev, nws tsis paub tias nws yuav mus txog qhov twg. 

9 – Yog vim Has Nplas Has ntseeg, mas nws thiaj tsiv mus nyob hauv thaj av uas yog pej kum neeg av,

yog thaj av uas Ntuj cog lus tias yuav pub rau nws. Has Nplas Has ua neej nyob hauv tsev tsam phooj xws li Is Xas Has thiab Yas Kos. Nkawd nrog Has Nplas -Has -txais Tswv -Ntuj -lo -lus -cog. 

10 – Has Nplas Has tos txog lub tsheej muaj taw ntsa uas Tswv Ntuj yuav txhim thiab yuav tsa. 

11 – Yog vim Xas Las ntseeg, mas tab nws txawm laus heev lawm, nws muaj peev xwm xeeb tub.

Xas Las ntseeg tias tus -tau cog lus rau nws, yuav tsis fav xeeb. 

12 – Vim li ntawd, tus neeg uas twb yuav txog nws lub caij tuag tseem yug tau ib co xeeb ntxwv coob npaum li cov hnub qub nyob saum ntuj thiab cov suab zeb nyob ntawm ntug hiav txwv uas suav tsis txheeb. 

13 – Cov neeg ntawd, thaum lawv tuag, lawv tseem tsis tau txais txhua yam uas Tswv Ntuj cog lus tias nws yuav pub. Tab sis yog vim lawv ntseeg, mas lawv nyob deb pom thiab tshua txog txhua yam ntawd,

thiab lawv zeem tseeb tias lawv tsuas yog ib co pej kum neeg tuaj hla lub ntiaj teb no xwb. 

14 – Lawv qhia li no kom pom tias lawv nrhiav ib lub teb chaws nyob. 

15 – Yog lawv nco txog lub teb chaws uas lawv yug los, mas lawv tseem muaj caij rov mus nyob lawv qub teb qub chaw. 

16 – Tab sis lawv tos txog ib lub teb chaws zoo dua, yog lub nyob saum ntuj. 

Vim li ntawd Tswv Ntuj tsis txaj muag cia lawv hu nws ua lawv tus Tswv Ntuj,

ces nws npaj ib lub tsheej rau lawv tiag. 

17 – Yog vim Has Nplas Has ntseeg, mas thaum Tswv Ntuj sim nws, nws cia li muab -Is Xas Has txi rau Ntuj, txawm tias Is Xas Has yog nws tib leeg tub twm zeej. 

18 – Is Xa Has twb yog tus yuav txais tej yam uas Tswv Ntuj cog lus tias yuav pub. 

Tswv Ntuj twb hais txog Is Xas Has tias : 

‘koj yuav muaj ib co xeeb ntxwv tawm ntawm Is Xas Has.’

19 – Has Nplas Has xav tias Tswv Ntuj tsa tau cov neeg tuag kom ciaj rov los. 

Ces Has Nplas Has rov qab tau nws tus tub. Zaj hais txog Is Xas Has no yog ib zag paj lug. 

Yog Tswv Ntuj Lo Lus        Nws lus txiaj ntsim      

NTAWV MOO ZOO                     

LUS KAS 12 : 32-48.

LUB NTSIAB LUS : Niaj hnub Tswv Ntuj tuaj cuag peb, niaj hnub peb rau siab tos nws, rau siab ua tej yam Tswv Ntuj tos ntawm peb.

COV LUS NYOB HAUV LUS KAS NTAWV MOO ZOO.

33 – « Muab nej lub cuab tam muag, nej muab pub rau cov pluag. 

Nej tsim tej nas nyiaj tsis txawj qub, tsim ib txhab kub uas tsis txawj nqig rau saum ntuj. 

Nyob saud, tsis muaj tub sab tuaj ze, tsis muaj kab rws xwv. 

34 – Vim tias nej txhab kub nyob qhov twg, nej lub siab kuj yuav nyob qhov ntawd. »

35 – « Nej sia siv thiab taws teeb, 

36 – zoo li ib co tub txib uas tos lawv tus tswv mus ua tshoob rov los. 

Thaum tus tswv rov los txog, nws yuav khob qhov rooj,ces lawv yuav qhib rau nws tam sis ntawd. 

37 – Cov tub txib uas thaum tus tswv los txog, nws pom lawv tseem zov hmo, mas lawv txoj hmoov zoo. 

Kuv hais tseeb rau nej, tus tswv yuav sia siv, yuav kom cov tub txib ntawd zaum ntawm rooj mov,

nws yuav rau mov rau lawv noj. 

38 – Txawm tias, tus tswv los txog thaum ib tag hmo los thaum qaib qua,

yog nws pom zov hmo zoo li ntawd, mas cov tub txib txoj hmoov zoo ! 

39 – Nej to taub qhov no zoo mog ! Yog tias tus tswv tsev paub lub sij hawm twg tub sab yuav tuaj,

nws yuav tsis cia tub sab tho qhov tsev. 

40 – Nej kuj ib yam thiab, nej yuav npaj kom txhij, vim yog lub sij hawm uas nej tsis nco faj,

mas Neeg Leej Tub thiaj yuav tuaj . »

41 – Ces Pob Zeb hais tias :

« Huab Tais,  koj hais zaj paj lug no, puas yog koj hais rau peb, los hais rau sawv daws ? » 

42 – Huab Tais teb hais tias :

« Leej twg yog tus tub txib pheej xeeb thiab xyuam xim, uas tus tswv tsev yuav tsa nws saib tus tswv cov tub zog, kom thaum txog caij nws faib hmoov nplej rau lawv ? 

43 – Yog thaum tus tswv rov los txog, nws pom tus tub txib tab tom lis nws tej num,

mas tus tub txib no txoj hmoov yuav zoo. 

44 – Kuv hais tseeb rau nej, tus tswv yuav tsa nws saib tus tswv lub cuab tam tas huv si. 

45 – Tab sis yog tus tub txib ntawd xav hauv siab tias ‘kuv tus Tswv yuav los lig,’

ces nws muab tus tswv tej tub txib ntxhais txib ntaus, nws noj nws haus kom qaug. 

46 – Tus tub txib no tus tswv yuav los txog hnub uas nws tsis nco faj, thiab lub sij hawm uas nws tsis paub. Tus tswv yuav ntiab tus tub txib mus nrog cov tsis hwm Ntuj nyob.

47 – Tus tub txib uas nws yeej paub qhov uas tus tswv xav kom ua, tab sis nws tsis npaj dab tsi li,

thiab tsis tau ua raws li qhov tus tswv xav kom ua, mas tus tub txib ntawd yuav mag tus tswv rab nplawm ntau teg. 

48 – Hos tus tub txib uas yeej tsis paub qhov uas tus tswv xav kom ua, thiab nws kuj tau ua tej yam tsim nyog ntaus, mas nws yuav mag tus tswv nplawm sib me ntsis.Tus uas Ntuj tau pub ntau rau, Ntuj -yuav taij ntau rov qab. Tus uas Ntuj tso ntau yam rau nws ceev, mas Ntuj yuav kom nws xa ntau dua -rov qab.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB                 

KOS ES LES 1 : 2-3, 2 : 21-23.

LUB NTSIAB LUS : Tas txhia yam nyob ntiaj teb no yog zoo li yaj ntshis. Tab sis nyob hauv Tswv Ntuj, tas txhia yam muaj nqe ib txhiab mus ib txhis.

COV LUS NYOB HAUV NTAWV KOS ES LES:

2 – Kos Es Les hais tias :

« Txhua yam txawj yaj ntshis, yog zoo li ib co pa yuav yaj mus. »

3 – Tib neeg nyob hauv lub qab hnub, tib neeg khwv khwv ua luaj, neeg tau tus qab hau dab tsi ? 

21 – Ntsia tus neeg no : nws tau khwv ua hauj lwm, nws thoob tsib thiab paub txuj,

tab sis nws yuav tsum tso tej yam ntawd tseg rau lwm tus khaws xyeem yuav. Li ntawd nws cov hauj lwm kuj txawj yaj ntshis, yog ib yam xwv txheej loj. 

22 – Tib neeg tau ua hauj lwm hnyav hnyav, nws lub siab siv zog nrhiav ub nrhiav no,

nws txoj kev khwv nyob hauv lub qab hnub, tau tus qab hau dab tsi ?           

23 – Nws niaj hnub txom nyem, nws niaj hmo tu siab, nws lub siab tsis tau kev so. 

Tej ntawd kuj yog yaj ntshis thiab.

Yog Tswv Ntuj Lo Lus        Nws lus txiaj ntsim

Nkauj Paj Nruag              YOG NEJ HNOV HUAB TAIS LUB SUAB                   

(NPN 90-2)

Txais: Hnub no yog nej hnov Huab Tais lub suab lawm, nej tsis txhob cia nej lub siab tawv li pob zeb.

1 – Huab Tais, koj ua kom neeg rov mus ua av luaj. Koj hais tias, “As Das tsoom tub ki, nej rov mus ua plua av!” Koj saib ib txhiab xyoo zoo li ib hnub. Koj saib ib hmos zoo li ib teev.

2 – Koj rho neeg txoj sia thaum lawv tsaug zog nruab dab ntub. Lawv ploj ntais zoo li nroj tsuag tawg paj yav sawv ntxov, tab sis yav tsaus ntuj, lub paj qhuav tas.

3 – Thov koj qhia kom peb paub suav peb lub hnub nyoog ua neej, peb thiaj yuav tau ib lub siab thoob tsib. Huab Tais, thov koj rov qab los. Thov koj hlub koj cov tub txib mas!

4 – Sawv ntxov tsees, thov koj pub koj txoj kev hlub rau peb, peb yuav qw suab zoo siab tas peb sim neej.

Thov Huab Tais lub siab hlub nqes los roos peb kom cov hauj lwm peb txhais tes khwv vam meej.

ZAJ NYEEM OB               

KOS LOS XAIS  3 : 1-6, 9-11.

LUB NTSIAB LUS : Cov neeg txais lub Cim Ntxuav lawv sawv muaj txoj sia tshiab nyob hauv Leej Pleev. Lawv pom tas txhia yam nyob hauv Yes Xus Pleev.

COV LUS PAJ LUS LUG SAU TUAJ RAU COV NTSEEG NYOB KOS LOS XAIS :

1 – Nej pom xeeb nrog Leej Pleev sawv rov los lawm, mas nej nrhiav tej yam nyob txheej saud,

vim txheej saud yog Leej Pleev qhov chaw nyob, nws zaum ntawm Tswv Ntuj phab xis. 

2 – Nej lub siab yuav dai dhuam rau tej yam nyob txheej saud, txhob dai rau tej yam nyob ntiaj teb no. 

3 – Vim tias, nej tuag lawm, hos nej txoj sia nrog Leej Pleev tsiv nraim hauv Tswv Ntuj. 

4 – Leej Pleev yog nej txoj sia : thaum nws yuav tawm los rau pom xyeem, mas nej kuj yuav nrog nws tawm los muaj hwj chim.

5 – Nej yuam nej tej tes taw, uas -nyiam lub ntiaj teb. 

6 – Kev ua dev ua npua, kev tsis huv, kev nyiam ua txhaum, kev ntshaw ua phem,

kev ntshaw nyiaj txiag, vim kev ntshaw nyiaj phem npaum li kev teev dab. 

Tej yam uas hais los no ua kom Tswv Ntuj npau taws rau cov neeg tsis mloog lus.

9 – Nej txhob ib leeg dag ib leeg. 

10 – Nej twb hle tus qub neeg thiab nws cov hauj lwm pov tseg lawm, nej hnav tus neeg tshiab,

uas yog tus neeg mus taug txoj kev paub zaj txuj tseeb, vim tus neeg ntawd rov tshiab tuaj, raws li Tus Tsim neeg tus duab. 

11 – Nyob hauv txoj kev ua tus neeg tshiab, mas tsis muaj tus Hes Las los Yus Das,

tsis muaj tus txais lub cim txiav, los tus tsis txais lub cim txiav, tsis muaj tus neeg qus, tus Xis Kus Thes, tus qhev, los tus twj lij : tsuas muaj Leej Pleev xwb, vim Leej Pleev yog txhua tsav txhua yam,

thiab nws nyob hauv txhua tsav txhua yam. 

Yog Tswv Ntuj Lo Lus        Nws lus txiaj ntsim

NTAWV MOO ZOO                     

LUS KAS 12 : 13-21.

LUB NTSIAB LUS : Tus saib tej yam nyob ntiaj teb no muaj nqi loj, thiab nws tso siab rau tej yam ntawd, mas nws yuam kev.

COV LUS NYOB HAUV LUS KAS NTAWV MOO ZOO:

13 – Muaj ib tug neeg hauv tsoom sid hais rau Yes Xus tias :

« Xib Hwb, koj hais kom kuv tij laug faib peb lub cuab tam rau kuv thiab. »

14 – Yes Xus hais rau nws tias :

« Npawg, leej twg tsa kuv ua tus txiav txim los tus faib cuab tam rau neb ? » 

15 – Yes Xus hais rau lawv tias :

« Nej ceev faj, nej yuav txuag kom nej txhob ntshaw, vim tias neeg txawm nplua nuj npaum twg,

los nws txoj sia tsis nyob hauv nws lub cuab tam. »

16 – Yes Xus hais zaj paj lug no rau lawv :

« Muaj ib tug neeg nplua nuj, nws cov -teb ntsu qoob loo kawg. 

17 – Nws xav tias : ‘Kuv yuav ua li cas, vim kuv tsis muaj chaw rau kuv cov qoob ?’ 

18 – Ces nws hais tias : ‘Kuv yuav ua li no : kuv yuav rhuav kuv cov txhab, yuav rov ua -ib co txhab loj dua, kuv yuav sau -kuv cov nplej thiab kuv tej cuab yeej cuab tam huv si los tso rau hauv. 

19 – Ces kuv yuav hais rau kuv tus plig tias : 

‘Me ntsuj plig, koj muaj qoob loo cuab tam ntau kav koj ntev niaj ntau xyoo :

koj so mog, koj noj, koj haus, koj ua si.’ 

20 – Tab sis Tswv Ntuj hais rau nws tias :

‘Neeg ruam ! -Hmo no kiag, Ntuj yuav coj koj tus ntsuj plig rov qab. 

Tej yam uas koj npaj tau, yuav yog leej twg tug ? 

21 – Tus uas khaws nyiaj txiag tseg rau nws tib leeg kheej, -yuav zoo li ntawd,

vim nws tsis nrhiav kev nplua nuj nyob hauv Tswv Ntuj. »

Huab Tais Pleev      Lub qab ntuj neeg cav txog koj