Catégorie

Vous trouverez ci-dessous les articles de la catégorie que vous avez sélectionné

Archives de catégorie Liturgie

Caij Hla           HNUB CHIV 5             XYOO C

Par Cécile YANG

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia     

ZAJ NYEEM IB            

HAUJ LWM 14 : 21-27.

LUB NTSIAB LUS : Cov pab neeg nyuam qhuav txais kev ntseeg tsis tau ntev, lawv yuav sib pab sib nres tiv txoj kev raug luag hiam. Cov Leej Choj, cov tub tshaj Ntuj Lus, cov muaj zog dua cov nyob hauv txoj kev ntseeg sawv daws sib pab.

COV LUS NYOB HAUV NTAWV HAUJ LWM.

21 – Thaum nkawd tshaj Ntuj lus tas nyob hauv lub tsheej Des Npes, thiab nkawd qhia tau ib pab thwj tim coob lawm, mas nkawd rov mus Lis Ros, rau Is Kos Nias thiab rau As Nthias Kias. 

22 – Nkawd pab kom cov thwj tim ua siab ruaj tawv qhawv nyob hauv txoj kev ntseeg. Nkawd qhia tias : « Peb yuav tsum raug ntau yam kev txom nyem, peb thiaj yuav tau mus hauv Tswv Ntuj lub Ceeb Tsheej. » 

23 – Nkawd tsa ib co txwj laus nyob hauv txhua lub koom txoos. Thaum nkawd nrog sawv daws hais cov zaj teev ntuj thiab yoo mov tas, mas nkawd muab lawv cob rau tus Huab Tais uas lawv ntseeg txog. 

24 – Ces nkawd hla Pis Xis Dias teb mus txog Pas Fis Lias teb. 

25 – Thaum nkawd tshaj ntuj lus nyob Pes Zes tas lawm, mas nkawd thiaj li mus nram As Tas Lias. 

26 – Nkawd caij nkoj nyob As Tas Lias mus rau As Nthias Kias uas yog lub tsheej nkawd sawv kev mus tshaj Ntuj lus. Tswv Ntuj lub txiaj ntsim tau pab nkawd ua hauj lwm tiav lawm.  

27 – Thaum nkawd los txog As Nthias Kias, mas nkawd hu lub Koom Txoos tas huv si kom tuaj,

nkawd piav txog tej yam Tswv Ntuj tau pab nkawd ua rau sawv daws mloog : 

nkawd piav tias Tswv Ntuj tau qhib cov neeg teev dab lub siab kom lawv ntseeg.

Yog Tswv Ntuj Lo Lus        Nws lus txiaj ntsim      

Nkauj Paj Nruag :              CAV TXOG HUAB TAIS LUB NPE                   

(NPN 145-5)

Txais: Kuv tus Huab Tais Tswv Ntuj, kuv yuav cav txog koj lub npe mus ib txhiab ib txhis!

1 – Huab Tais siab zoo, nws khuv leej neeg, nws tsis npau taws sai.

Huab Tais ua zoo rau txhua leej txhua tus. Nws hlub thiab txuag nws tej dej num.

2 – Huab Tais, txhua yam koj tsim los ua koj tsaug. Cov ntseeg txog koj yuav cav lus zoo txog koj.

Lawv yuav cav txog koj txoj kev ua vaj nto koob meej. Lawv yuav tshaj txog koj cov hauj lwm muaj hwj xyeej.

3 – Lawv yuav qhia koj txoj kev ua vaj muaj hwj chim thiab koj lub Ceeb Tsheej ci ntsa iab rau As Das tsoom tub ki paub. Koj lub Ceeb Tsheej yog lub Ceeb Tsheej nyob txhiab niag tim puas xyoo.

Koj yuav ua vaj mus txheej dhau txheej.

ZAJ NYEEM OB          

QHIB YAV TOM NTEJ 21 : 1-5.

LUB NTSIAB LUS : Lub caij peb tseem hla lub ntiaj teb no, peb yuav xav txog hnub uas lub ntiaj teb neeg yuav mus ntsib Tswv Ntuj. Thaum ntawd, peb yuav pom Tswv Ntuj xyeem ntawm qhov muag.

COV LUS NYOB HAUV PHAU NTAWV QHIB YAV TOM NTEJ.

1 – Ces kuv pom ib lub ntuj tshiab thiab ib lub ntiaj teb tshiab. 

Vim tias thawj lub ntuj thiab thawj lub ntiaj teb ploj tas lawm. 

Hiav txwv kuj tsis nyob ntxiv lawm. 

2 – Ces kuv pom lub nroog Ntshiab, uas yog Yes Lus Xas Les tshiab nqes saum ntuj, pem Tswv Ntuj los. 

Nws ua zam sees xws li tus nkauj nyab ntim zam tos nraug vauv. 

3 – Kuv  hnov ib lub suab tuaj ntawm lub theej kiab tuaj tias : 

“Saib ! Tswv Ntuj lub tsev los nrog  neeg nyob :

Tswv Ntuj yuav nrog lawv nyob ! Lawv yuav yog nws haiv neeg. Tswv Ntuj yuav nrog lawv nyob. 

4 – Nws yuav so txhua lub kua muag ntws ntawm lawv qhov muag. 

Yuav tsis muaj kev tuag ntxiv. Yuav tsis muaj kev quaj kev nyiav, kev ntsaj, kev mob ntxiv.  

Vim tas txhua yam muaj sia uas tau xub tshwm sim los, puav leej ploj tas huv tib si lawm.” 

5 – Ces tus zaum saum lub theej kiab hais tias : 

“Nej saib ! Kuv tsim dua txhua tsav txhua yam tshiab.” 

Thiab nws hais tias : “Koj sau qhov no cia mog. Vim cov lus no yog lus pheej xeeb thiab lus tseeb.” 

Yog Tswv Ntuj Lo Lus        Nws lus txiaj ntsim

NTAWV MOO ZOO          

ZAM 13 : 31-35.

LUB NTSIAB LUS : Yog vim Yes Xus nyiam Leej Txiv, nws thiaj tau txais lub hwj chim thiab lub koob meej loj. Yog peb sib nyiam sib hlub nyob hauv Yes Xus mas peb thiaj yuav muaj koob meej nyob ntawm Tswv Ntuj xub ntiag.

COV LUS NYOB HAUV ZAM NTAWV MOO ZOO.

31 – Thaum Yus Das tawm mus lawm, Yes Xus hais tias :

« Nyem no Neeg Leej Tub twb txais koob meej lawm, thiab Tswv Ntuj kuj muaj koob meej nyob hauv nws. 

32 – Yog  Tswv Ntuj muaj koob meej nyob hauv Neeg Leej Tub, mas Tswv Ntuj kuj yuav ua kom Neeg Leej Tub muaj koob meej nyob hauv nws thiab. Tshuav tsis ntev, Tswv Ntuj yuav muab koob meej rau Neeg Leej Tub. 

33 – Cov me nyuam me, kuv yuav nrog nej nyob me ntsis ntxiv xwb. 

Nej yuav nrhiav kuv. Nyem no, kuv hais rau nej ib yam li kuv tau hais rau cov Yus Das tias qhov chaw kuv mus, mas nej tuaj tsis tau.

34 – « Kuv muab ib lo lus qhia tshiab rau nej :

yam li nej yuav sib nyiam sib hlub. Nej yuav  rov sib nyiam sib hlub ib yam li kuv tau nyiam nej. 

35 – Qhov yuav ua kom sawv daws paub tias nej yog kuv cov thwj tim,

yog qhov no : nej sib nyiam sib hlub. »

Huab Tais Pleev      Lub qab ntuj neeg cav txog koj

Caij Hla              HNUB CHIV 4            XYOO C

Par Cécile YANG

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB          

HAUJ LWM 13 : 14, 43-52.

LUB NTSIAB LUS : Thaum Paj Lug tshaj Ntuj Lus, nws haiv neeg tsis mloog nws thiab hiam nws.

Tab sis Paj Lug tsis ntaus siab me, nws mus tshaj Ntuj Lus rau lwm qhov chaw.

COV LUS NYOB HAUV NTAWV HAUJ LWM.

14 – Paj Lug thiab Npas Nas Npes nkawd hla dhau Pes Zes, mus txog As Nthias Kias Pis Xis Dias. 

Txog hnub , nkawd mus hauv lub Tsev Txoos, nkawd zaum.

43 – Thaum sawv daws tawm tas mas muaj coob leej Yus Das thiab ib co pej kum neeg hwm Ntuj raws Paj Lug thiab Npas Nas Npes nkawd. Nkawd nrog lawv tham, thiab qhia kom lawv npuab ruaj nreb Tswv Ntuj lub txiaj ntsim.

44 – Lwm Hnub Xya, yuav luag tas lub tsheej tuaj sib sau mloog Tswv Ntuj Lo Lus. 

45 – Cov Yus Das pom neeg tuaj coob coob, mas lawv khib. Ces thaum Paj Lug hais lus mas lawv teb tej lo lus thuam Ntuj. 

46 – Paj Lug thiab Npas Nas Npes nkawd ua siab loj hais tias :

« Peb yuav tsum xub tshaj Tswv Ntuj lo lus rau nej tso, vim kev cai mus li ntawd. 

Tab sis yog vim nej xyeeb Tswv Ntuj lo lus, thiab nej saib nej tsis tsim nyog txais txoj sia nyob mus li. 

Vim qhov ntawd mas peb thiaj tig mus qhia cov neeg teev pej kum dab.”

47 – Huab Tais twb qhia peb tias :

« Kuv tsa koj ua qhov pom kev kaj txhua haiv neeg, kom koj xa txoj kev cawm neeg mus txog tim npoo ntiaj teb. » 

48 – Cov neeg teev pej kum dab hnov cov lus no mas sawv daws zoo siab. 

Lawv cav txog Huab Tais lo lus. Cov uas lawv txoj hmoo yog txais txoj sia nyob mus li mas lawv tig los ntseeg. 

49 – Ces Huab Tais lo lus ri mus puv tas ib cheeb tsam ntawd. 

50 – Tab sis cov Yus Das mus cob cov poj nom uas hwm Tswv Ntuj,

thiab cov ua hau nyob hauv lub tsheej. Cov Yus Das pib hiam Paj Lug thiab Npas Nas Npes nkawd. 

Lawv ntiab nkawd kom tawm hauv lawv teb chaws mus. 

51 – Nkawd thiaj nchos cov plua av lo nkawd ko taw rau lawv, ces nkawd mus rau Is Kos Nias. 

52 – Hos cov thwj tim, mas lawv zoo siab, thiab Leej Ntuj Plig Ntshiab nyob puv hauv lawv.

Yog Tswv Ntuj Lo Lus        Nws lus txiaj ntsim

Nkauj Paj Nruag :              TSWV NTUJ YOG TUS TSIM PEB                   

(NPN 100)

Txais: Tswv Ntuj yog tus tsim peb los. Peb yog nws haiv neeg, nws pab yaj.

1 – Tas lub ntiaj teb, nej qw suab zoo siab cav txog Huab Tais. Nej xyiv fab hlo tsob hwb Huab Tais.

Nej luag ntxhi chaws los ntawm nws xub ntiag.

2 – Nej yuav paub tias Huab Tais yog Tswv Ntuj. Nws tsim peb los, peb yog nws tug,

yog nws haiv neeg, yog pab yaj nws zov.

3 – Huab Tais siab zoo, nws hlub peb mus li. Nws npuab peb txheej dhau txheej.

ZAJ NYEEM OB          

QHIB YAV TOM NTEJ  7 : 9, 14, 17.

LUB NTSIAB LUS : Cov neeg ntseeg tuaj yeem raug txom nyem kom tau pab tsoom sid, mas Tswv Ntuj yuav hu lawv tuaj nyob pem Tswv Ntuj lub Ceeb Tsheej lom zem mus li.

COV LUS NYOB HAUV PHAU NTAWV QHIB YAV TOM NTEJ.

9 – Dhau tej ntawd tas lawm, ces kuv pom ib pab neeg coob coob suav tsis txheeb ;

muaj tas txhua teb chaws, txhua haiv neeg, txhua xeem lus. Lawv sawv ntsug ze ntawm lub theej kiab, nyob ntawm Leej Yaj xub ntiag. Lawv hnav tsho dawb ntev, thiab tuav tej rev nplooj ntawm tes. 

14 – Kuv teb tias : “Huab Tais, yog koj thiaj paub.” 

Nws rov hais tias : 

“Lawv yog cov uas hla dhau txoj kev raug luag hiam hnyav los. 

Lawv tau ntxhua lawv cov tsho ntev, thiab muab raus Leej Yaj cov ntshav kom dawb. 

17 – Leej Yaj, uas nyob nruab nrab lub theej kiab, yuav ua Tswv zov lawv,

nws yuav coj lawv mus txog cov qhov dej muaj txoj sia. Tswv Ntuj yuav so cov kua muag ntws ntawm lawv qhov muag.”

Yog Tswv Ntuj Lo Lus        Nws lus txiaj ntsim

NTAWV MOO ZOO          

ZAM. 10 : 27-30.

LUB NTSIAB LUS :  Cov neeg ua Yes Xus cov yaj thiab txais txoj sia ntawm nws yog cov neeg siab zoo.

Yes Xus ua lawv tus Xib Hwb, lawv tus Tswv. Yes Xus zoo li cas, lawv nyiam Yes Xus zoo li cas.

COV LUS NYOB HAUV ZAM NTAWV MOO ZOO.

27 – Kuv cov yaj mloog kuv lub suab, kuv paub lawv, lawv raws nraim kuv. 

28 – Kuv pub txoj sia nyob mus li rau lawv, lawv yuav tsis tuag ib zaug li. 

Tsis muaj leej twg yuav chua tau lawv ntawm kuv txhais tes. 

29  – Kuv Txiv yog tus loj tshaj txhua tsav txhua yam, nws muab cov yaj no rau kuv,

mas yeej tsis muaj leej twg yuav chua tau dab tsi ntawm kuv Txiv txhais tes li. 

30 – Leej Txiv thiab kuv, wb yog ib tug xwb. »

Huab Tais Pleev      Lub qab ntuj neeg cav txog koj

Caij Hla            HNUB CHIV 3              XYOO C

Par Cécile YANG

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB                

HAUJ LWM 5 : 27-32, 40-41.

LUB NTSIAB LUS : Cov neeg xav ua Yes Xus tim khawv lawv tsis mloog cov hlob txwv kom txhob ua Yes Xus tim khawv. Lawv mloog Leej Ntuj Plig txhib lawv.

COV LUS NYOB HAUV NTAWV HAUJ LWM.

27 – Lawv coj los txog, lawv kom cov Hauv Paus Xa Lus mus sawv ntawm cov txwj laus Xas Nes Nrees xub ntiag.Tus Thawj leej choj nug cov Hauv Paus Xa Lus tias :

28 – « Peb twb txwv nej, tsis kheev nej siv lub npe ntawd los qhia. Tab sis nej tseem qhia nej zaj ntawd mus thoob Yes Lus Xas Les. Nej puas xav kom tus neeg ntawd cov ntshav rov qab poob los rau saum peb ? » 

29 – Ces Pob Zeb nrog cov Hauv Paus Xa Lus teb tias : 

« Yuav tsum mloog Tswv Ntuj lus zoo dua mloog neeg lus. 

30 – Tus Yes Xus uas nej muab nws dai saum ib tug ncej kom tuag, mas peb cov yawg koob tus Huab Tais tsa nws sawv rov los lawm. 

31 – Nws yog tus uas Tswv Ntuj txhais tes xis tsa nws siab kom nws ua tus Thawj thiab tus Cawm Seej. Yog vim nws, mas Tswv Ntuj thiaj pub txoj kev thov txhaum thiab kev zam txhaum rau His Xas Lais. 

32- Peb yog cov tim khawv pom tej yam ntawd. Leej Ntuj Plig Ntshiab uas Tswv Ntuj

pub rau cov neeg mloog nws lus kuj ua tim khawv txog tej yam ntawd thiab. » 

40 – Lawv  hu cov Hauv Paus Xa Lus kom rov los hauv tsev. Lawv kom luag muab cov Hauv Paus Xa Lus nplawm tas, lawv txwv tsis pub tuav txog Yes Xus lub npe los qhia. Ces lawv tso cov Hauv Paus Xa Lus mus. 

41 – Cov Hauv Paus Xa Lus tawm ntawm lub rooj txwj laus Xas Nes Nrees,

lawv zoo siab vim Ntuj saib lawv tsim nyog raug luag hiam vim Lub Npe. 


Yog Tswv Ntuj Lo Lus        Nws lus txiaj ntsim

Nkauj Paj Nruag :              KUV YUAV CAV TXOG KOJ                 

(NPN 30)

Txais: Huab Tais, kuv yuav cav txog koj vim koj tau cawm kuv.

1 – Huab Tais, kuv yuav cav txog koj vim koj tau rub kuv tawm hauv lub qhov ntuj los.

Koj tsis cia kuv ua yeeb ncuab qhov chaw zoo siab. Huab Tais, koj rub kuv tus plig tawm hauv ntuj txias teb tsaus los. Koj tsis pub kuv mus hauv lub qhov ntxa.

2 – Cov ntseeg Huab Tais, nej hu nkauj cav txog nws. Nej nqaum paj nqaum nruas cav txog nws lub npe ntshiab. Nws npau taws, tsuas npau ib pliag. Nws hlub neeg, nws hlub tas ib sid.

Hmo ntuj, kuv kua muag poob tsis tu, tab sis kaj ntug txoog, kuv rov zoo siab.

3 – Huab Tais, koj mloog mas! Thov koj hlub, thov koj pab kuv.

Koj muab kuv txoj kev quaj nyiav los hloov ua kev lom zem.

Huab Tais, kuv tus Tswv Ntuj, kuv yuav ua koj tsaug mus li.

ZAJ NYEEM OB       

QHIB YAV TOM NTEJ 5 : 11-14.

LUB NTSIAB LUS : Yav tom ntej, tsoom Leej Ntshiab yuav ua ib lub Txoos loj cav txog Tswv Ntuj. Nyob ntiaj teb no, peb ua peb cov Txoos teev ntuj, peb kuj yuav kub siab xws li yav tom ntej nyob saum ntuj.

COV LUS NYOB HAUV NTAWV QHIB YAV TOM NTEJ.

11- Kuv tseem pom li no ntxiv : 

kuv hnov ib pab Tshiab coob tas nrho lub suab. Lawv muaj nto txhiab nto vam leej, nyob ncig lub theej kiab, ncig cov Muaj Txoj Sia thiab cov Laus, lawv hu nkauj nrov nrov tias : 

12 – “Leej Yaj uas luag nkaug nws caj dab, nws tsim nyog txais lub hwj huam, kev nplua nuj, kev thoob tsib, lub zog, lub hwj chim, lub koob meej thiab lo lus cav.” 

13 – Ces kuv hnov tas txhua tsav puas yam nyob saum ntuj, nyob ntiaj teb, nyob nruab yeeb, nyob hauv hiav txwv :

kuv hnov tas nrho lub sim ceeb qw tias :  

“Lo lus cav, lub hwj chim, lub koob meej thiab lub hwj huam, yog tus zaum saum lub theej kiab tug, thiab yog Leej Yaj tug, mus tas  ib txhiab ib txhis !”

14 – Plaub Leeg Muaj Txoj Sia teb tias :  “Ua li !”  Cov Laus txhos caug pe.


Yog Tswv Ntuj Lo Lus        Nws lus txiaj ntsim

NTAWV MOO ZOO         

ZAM 21 : 1-19.

LUB NTSIAB LUS : Zaj no yuav muab los faib ua ob zag kuj tau. Qib 1 txog 14: Yes Xus sawv rov los, nws pab nws cov thwj tim puav ntses: nyem no, nws pab cov ntseeg mus tshaj Ntuj Lus. Qib 15 txog 19: Yes Xus sawv rov los, nws vam txog neeg kom neeg pab xa nws lus mus thoob ntiaj teb: tab sis nws vam txog cov neeg nyiam nws, vim yog cov neeg nyiam Yes Xus lawv thiaj ua Yes Xus tim khawv tau.

COV LUS NYOB HAUV ZAM NTAWV MOO ZOO.

1 – Dua li ntawd, Yes Xus rov tawm los rau cov thwj tim pom nyob ntawm ntug dej ntuj Tis Npes Lias. 

Thaum Yes Xus tawm los mas muaj zoo li no. 

2 – Cov nyob ua ke ntawd yog Xis Moos Pob Zeb, Tos Mas uas hu ua Dis Dws Mos,

Nas Tas Nais uas nyob Kas Nas hauv xeev Nkas Lis Lais, Ntxes Npes Dais ob tug tub, thiab ob tug thwj tim ntxiv.

3 – Xis Moos Pob Zeb hais rau lawv tias :

« Kuv yuav mus puav ntses. » Lawv hais rau nws tias : « Peb nrog koj mus thiab. » 

Lawv tawm mus nce rau hauv lub nkoj. Hmo ntawd lawv puav tsis tau dab tsi li. 

4 – Thaum kaj ntug lawm, Yes Xus nyob tim ntug dej. Tab sis cov thwj tim tsis paub tias yog Yes Xus. 

5 – Yes Xus thiaj hais rau lawv tias :

« Cov me nyuam, nej puas muaj dab tsi noj ? » Lawv teb rau Yes Xus tias : « Tsis muaj. » 

6 – Nws hais rau lawv tias :

« Nej pov vas rau ntawm lub nkoj sab xis, nej yuav tau ntses. » 

Lawv thiaj pov vas mus, ces lawv rub tsis tau lub vas rov los, vim mag tau ntses ntau kawg. 

7 – Tus thwj tim uas Yes Xus nyiam thiaj hais rau Pob Zeb tias : « Yog Huab Tais ! » 

Xis Moos Pob Zeb hnov dheev tias yog Huab Tais, nws muab ib daim khaub ncaws khi ntawm duav, vim nws liab qab, ces nws dhia mus hauv dej. 

8 – Lwm cov thwj tim mam li caij nkoj thiab cab lub vas puav ntses  los. 

Lawv nyob tsis deb ntawm ntug nqhuab lawm, kwv yees deb li ob puas tshim. 

9 – Thaum lawv nqes los txog saum av, lawv pom ib cub tawg thee nyob ntawd,

hos muaj ib co ntses tso rau saud, thiab ib co ncuav mov. 

10 – Yes Xus hais rau lawv tias :

« Nej nqa cov ntses me uas nej nyuam qhuav puav tau los. » 

11 – Xis Moos Pob Zeb nce mus hauv nkoj, nws rub lub vas mag ntses loj puv nkaus los rau saum av :

tau ib puas tsib caug peb tus ntses ! Txawm tias puav tau ntses ntau npaum ntawd, tsis kav lub vas tsis ntuag.

12 – Yes Xus hais rau lawv tias : « Nej los noj tshais. » 

Tsis muaj ib tug thwj tim muaj cuab kav nug Yes Xus tias :

« Koj yog leej twg ? »

Vim lawv yeej paub tseeb tias yog Huab Tais. 

13 – Yes Xus txav los muab cov ncuav mov cev rau lawv, nws kuj muab cov ntses cev rau lawv thiab.

14 – Txij thaum Yes Xus sawv hauv cov tuag rov los,

mas nws tawm los rau cov thwj tim pom, zaum no yog zaum peb.

15 – Thaum lawv noj tshais tas, Yes Xus hais rau Xis Moos Pob Zeb tias :

« Xis Moos, Zam tus tub, koj puas nyiam kuv dua lawv cov ntawd ? » 

Pob Zeb hais rau Yes Xus tias :

« Huab Tais, koj paub tias kuv nyiam koj tiag. » 

Yes Xus hais rau Pob Zeb tias :

« Koj coj kuv cov me nyuam yaj mus noj zaub mog. » 

16 – Yes Xus rov hais zaum ob tias :

« Xis Moos, Zam tus tub, koj puas nyiam kuv ? » 

Pob Zeb hais rau Yes Xus tias :

« Huab Tais, koj paub tias kuv nyiam koj tiag. » 

Yes Xus hais rau nws tias :

« Koj zov kuv cov yaj mog. » 

17 – Yes Xus tseem rov hais dua zaum peb rau Pob Zeb tias :

« Xis Moos, Zam tus tub, koj puas nyiam kuv tiag ?” 

Pob Zeb tu siab rau qhov Yes Xus hais rau nws zaum peb tias :

« Koj puas nyiam kuv tiag ? » Pob Zeb hais rau Yes Xus tias :

« Huab Tais, koj paub tas ib puas tsav yam, koj paub tias kuv nyiam koj tiag. » 

Yes Xus hais rau Pob Zeb tias :

« Koj coj kuv cov yaj mus noj zaub mog. 

18 – Kuv hais qhov muaj tseeb tiag rau koj : 

Thaum koj tseem hluas zog, koj muab koj txoj siv, koj sia koj, koj xav mus qhov twg los koj mus koj. 

Tiam sis thaum koj laus, koj yuav tsa tes cia ib tug muab siv rau koj sia, cia luag coj koj mus hauv qhov chaw uas koj tsis xav mus. » 

19 – Yes Xus hais qhov ntawd qhia tias Pob Zeb yuav tuag zoo li cas kom Tswv Ntuj nto koob meej. 

Yes Xus hais li tas, nws hais rau Pob Zeb tias : « Koj raws kuv mus. » 

Huab Tais Pleev      Lub qab ntuj neeg cav txog koj

Caij Hla               HNUB CHIV 7               XYOO C

Par Cécile YANG

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Hnub nyoog Yes Xus mus saum ntuj

ZAJ NYEEM IB           

HAUJ LWM 7: 55-60

Lawv xuas pob zeb tua Tes Fas Nos

55 – Leej Ntuj Plig Ntshiab nyob puv hauv Tes Fas Nos lub siab. Tes Fas Nos tsa
muag ntsia ntsoov rau saum ntuj. Nws pom Tswv Ntuj lub hwj chim thiab pom
Yes Xus sawv nyob ntawm Tswv Ntujsab xis.

56 – Ces nws hais tias :
« Kuv pom lub ntuj qhib lug, thiab pom Neeg Leej Tub sawv ntsug ntawm Tswv
Ntuj sab xis. »

57 – Thaum ntawd, cov Yus Das nthe nrov nrov. Lawv pos pob ntseg. Sawv daws
ua ib tsaug khiav mus nthos nkaus Tes Fas Nos.

58 – Lawv thawb Tes Fas Nos mus rau sab nroog nraud, ces lawv txawb
pob zeb tua nws. Cov tim khawv tso lawv tej khaub ncaws rau ntawm ib tug
tub hluas ko taw. Tus hluas ntawd hu ua Xauv.

59 – Thaum lawv tab tom txawb pob zeb tua Tes Fas Nos mas Tes Fas Nos
hu txog Ntuj. Nws hais tias :
« Huab Tais Yes Xus, thov koj txais kuv
tus plig. »
60 – Ces nws txhos caug, nws hais ib lo nrov nrov tias :
« Huab Tais, koj txhob muab qhov txhaum ntawd rau lawv ris. »
Tes Fas Nos hais li ntawd tas, ces nws txoj sia tu.

Nkauj Paj Nruag

96

Nej hu ib zag nkauj tshiab rau HUAB TAIS

Nej txhos caug hawm HUAB TAIS vim nws kev ntshiab tawm ntsa iab

HUAB TAIS ua vaj. Kom lub ntiaj teb hom khaj,
kom tas cov ntug hiav txwv dhia daj dhia luag !

kev haum pheej thiab kev ncaj yog chaw txawb nws lub theej kiab.

Yim txheej cuaj txheej ntuj tau tshaj nws txoj kev ncaj,
tas ib tsoom haiv neeg tau pom nws lub hwj chim

nej txhos caug pe ntawm HUAB TAIS xub ntiag mas ! »

HUAB TAIS, koj yog tus nyob siab dua ntiaj teb.
Koj nyob siab dua tas cov dab tib si.

Caij Hla HNUB CHIV 2             XYOO C

Par Cécile YANG

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB     

HAUJ LWM 5 : 12-16.

LUB NTSIAB LUS : Cov neeg ntseeg tiag Yes Xus sawv rov los mas lawv ua hwj huam yees ntxwv xws li Yes Xus, vim lawv coj tus yam ntxwv xa kev kaj siab lug mus rau sawv daws.

COV LUS NYOB HAUV NTAWV HAUJ LWM.

12 – Ntuj siv cov Hauv Paus Xa Lus ob txhais tes los ua ntau lub cim thiab

ntau yam hwj huam yees ntxwv nyob hauv tsoom pej xeem. 

Cov ntseeg koom siab koom ntsws tuaj nyob hauv lub qab ruv tsev Xas Los Moos. 

13 – Tsis muaj leej twg muaj cuab kav tuaj nrog lawv ua ke. Tab sis tsoom pej xeem cav lus zoo txog lawv. 

14 – Cov ntseeg los ntxiv coob zuj zus rau Huab Tais, tej pab txiv neej thiab poj niam coob kawg… 

15 – Ces lawv coj cov neeg mob tuaj tso ntawm kev, lawv tso cov mob pw saum tej lub txaj thiab tej daim lev, kom thaum Pob Zeb hla los mus, nws tus duab ntxoov tus puav neeg mob. 

16 – Tsoom neeg coob coob ntawd tuaj ntawm cov zos tsis deb ntawm Yes Lus Xas Les tuaj. 

Lawv coj cov neeg mob thiab cov neeg raug dab tsis huv tuaj. Sawv daws puav leej zoo tas huv si.

Yog Tswv Ntuj Lo Lus        Nws lus txiaj ntsim

Nkauj Paj Nruag :              HUAB TAIS SIAB ZOO               

(118-2)

Txais: Peb ua Huab Tais tsaug vim nws siab zoo, nws khuv leej neeg mus ib txhiab ib txhis.

1 – His Xas Lais, nej hais tias:

“Nws khuv leej neeg mus ib txhiab ib txhis.” As Loos tsev neeg, nej hais tias:

“Nws khuv leej neeg mus ib txhiab ib txhis” Tsoom neeg hwm Huab Tais, nej hais tias:

“Nws khuv leej neeg mus ib txhiab ib txhis.”

2 – Luag thawb kuv kom kuv ntog, tab sis Huab Tais pab kuv.

Kuv lub zog, kuv rab peev xwm yog Huab Tais, nws yog tus cawm kuv.

Cov neeg ncaj qw suab zoo siab hauv lawv cov tsev tsam phooj vim lawv tau txais kev yeej.

3 – Lub pob zeb uas cov txhim tsev muab pov tseg, txia ua lub pob zeb txheem tsev.

Yam hwj huam loj no yog Huab Tais ua. Nws ua hwj huam muaj koob meej nto moo rau peb qhov muaj pom. Hnub no yog hnub Huab Tais tau tsim los rau peb, peb zoo siab hom khaj.

ZAJ NYEEM OB        

QHIB YAV TOM NTEJ 1 : 9-19.

LUB NTSIAB LUS : Muaj ib hnub, Yes Xus tawm tuaj rau Zam pom xyeem.Yes Xus hnav xws li ib tug Vaj, xws li ib tug Leej Choj. Nws hais tias : kuv tuag ib zaug, tab sis, nyem no, kuv nyob mus li. Niaj hnub chiv Yes Xus kuj ntuas peb zoo li ntawd thiab.

COV LUS NYOB HAUV NTAWV QHIB YAV TOM NTEJ.

9 – Kuv yog Zam, nej tus kwv, uas nrog nej raug  kev iab kev khwv, nrog nej ua siab ntev siab tawv,

nyob hauv Yes Xus thiab nyob hauv lub ceeb tsheej. Thaum ntawd kuv nyob hauv lub pov txwv Pas Mos, vim Tswv Ntuj Lo Lus, thiab vim txoj kev ua tim khawv txog Yes Xus. 

10 – Hnub ntawd yog Huab Tais hnub, kuv lub tswv yim feeb rau nruab yeeb. 

Ces kuv hnov ib lub suab nrov, xws li lub hom tom kuv nraub qaum tuaj tias :

11 – “Koj sau tej yam koj  pom rau hauv ib phau ntawv, xa mus rau xya lub Koom Txoos uas nyob Es Fes Xos, Xaws Mus Nas, Pes Nkas Mos, Thias Tis Las, Xas Des, Fis Las Des Fias thiab Laus Dis Kias Yas . 

12 – Kuv tig mus ntsia lub suab hais lus tuaj rau kuv ntawd. Kuv tig mus, ua ciav kuv pom xya tus ncej kub txawb teeb. 

13 – Cov ncej ntawd nyob ncig ib tug zoo li Tib Neeg ib Leeg Tub. Nws hnav ib lub tsho ntev, sia ib txog siv kub ntawm duav. 

14 – Nws lub taub hau thiab nws cov plaub hau dawb dawb nra paug, xws li xov pwm cib dawb, thiab xws li daus. Nws qhov muag zoo xws li ib tug nplaim taws cig cig. 

15 – Nws ko taw zoo xws li tooj liab, uas nchuav hauv qhov hluav taws los. Nws lub suab nrov nroo ntws xws li ib tug dej hlob.

16 – Nws tuav xya lub hnub qub nyob hauv nws txhais tes xis. Muaj ib rab ntaj ob sab ntse tawm hauv nws qhov ncauj los. Nws lub ntsej muag ci ntsa iab xws li lub hnub thaum tshav kub kub. 

17 – Kuv pom nws, kuv vau hlo rau ntawm nws ko taw, xws li kuv tuag lawm. 

Tab sis nws muab nws txhais tes xis los chwv kuv, thiab nws hais tias: 

“Txhob ntshai ! Yog kuv ! Kuv yog tus Thawj, tus Kawg, tus Muaj Txoj Sia. 

18 – Kuv tau tuag lawm ; tab sis nyem no, kuv muaj txoj sia mus li txheej dhau txheej.

Kuv tuav tus yawm sij hauv txoj kev tuag thiab hauv tub tuag teb. 

19 – Koj yuav sau tej yam koj pom, yam li tej uas tab tom tshwm sim nyem no, thiab tej uas yuav tshwm sim tuaj yav pem suab. 

Yog Tswv Ntuj Lo Lus        Nws lus txiaj ntsim

NTAWV MOO ZOO         

ZAM 20 : 19-31.

LUB NTSIAB LUS : Cov neeg ntseeg tias Yes Xus sawv rov los mas Yes Xus pub lawv nyob kaj lug.

COV LUS NYOB HAUV ZAM  NTAWV MOO ZOO.

19 – Tib hnub ntawd thaum tsaus ntuj, uas yog thawj hnub pib lub lis piam, 

cov qhov rooj hauv qhov chaw cov thwj tim nyob kaw tas, vim lawv ntshai cov Yus Das. 

Yes Xus los sawv hauv nruab nrab, nws hais rau lawv tias :

« Nej nyob kaj lug. » 

20 – Thaum Yes Xus hais lo lus ntawd tas, nws muab nws ob txhais tes thiab nws phab tav rau lawv saib. 

Cov thwj tim pom Huab Tais, lawv zoo siab kawg. 

21 – Yes Xus rov hais rau lawv tias :

« Nej nyob kaj lug ! Kuv xa nej mus xws li Leej Txiv xa kuv tuaj. » 

22 – Yes Xus hais li tas, nws tshuab pa rau lawv, nws hais rau lawv tias :

« Nej txais Leej Ntuj Plig Ntshiab. 

23 – Nej daws txhaum rau leej twg, mas nws cov txhaum yuav daws. 

Nej tsis daws leej twg cov txhaum, mas nws cov txhaum yuav nyob. »

24 – Tos Mas yog ib tug hauv pab Kaum Ob, nws tseem hu ua Dis Dws Mos thiab. 

Thaum Yes Xus tawm los, mas nws tsis nrog cov thwj tim nyob. 

25 – Lwm cov thwj tim hais rau nws tias :

« Peb pom Huab Tais lawm ! » Ces Tos Mas hais rau lawv tias :

« Yog kuv tsis pom lub qhov txhab ntsia hlau nyob hauv nws ob txhais tes, yog kuv tsis muab kuv tus ntiv tes ntxig lub qhov ntsia hlau, thiab yog kuv tsis muab kuv txhais tes rau ntawm nws phab tav, mas kuv tsis ntseeg. »

26 – Yim hnub tom qab, cov thwj tim rov nyob hauv tsev dua. Tos Mas kuj nrog lawv nyob thiab. 

Cov qhov rooj puav leej kaw tas. Yes Xus tawm los sawv hauv nruab nrab, nws hais rau lawv tias :

« Nej nyob kaj lug ! » 

27 – Ces  Yes  Xus  hais rau Tos Mas tias :

« Cev koj ntiv tes rau ntawm no, koj ntsia kuv ob txhais tes. Cev koj txhais tes los, muab rau hauv kuv phab tav. Koj txhob ua neeg tsis ntseeg ntxiv, koj ntseeg mog. » 

28 – Tos Mas teb rau Yes Xus tias :

« Kuv tus Huab Tais, Kuv tus Tswv Ntuj. » 

29 – Yes Xus hais rau Tos Mas tias :

« Vim koj pom kuv, mas koj thiaj ntseeg. Cov uas tsis tau pom tab sis lawv ntseeg, mas lawv txoj hmoov zoo. »

30 – Yes Xus tseem tau ua lwm cov cim ntau nyob ntawm cov thwj tim xub ntiag,

uas tsis tau muab sau rau hauv phau ntawv no. 

31 – Tau muab cov cim no sau tseg kom nej ntseeg tias Yes Xus yog Leej Pleev, Tswv Ntuj Leej Tub. 

Nej ntseeg ces nej yuav muaj txoj sia nyob hauv nws lub npe.

Huab Tais Pleev      Lub qab ntuj neeg cav txog koj

Lub Caij Hla        HNUB CHIV HLA       XYOO C

Par Cécile YANG

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB           

HAUJ LWM 10 : 37-43.

LUB NTSIAB LUS : Tswv Ntuj tsa Yes Xus sawv rov los. Tus twg xav txais Tswv Ntuj cov txiaj ntsim nws yuav vam txog Yes Xus.

COV LUS NYOB HAUV NTAWV HAUJ LWM.

37 – Nej twb tau hnov txog tej xwm uas tshwm sim tuaj nyob hauv xeev Yus Das :

yam li thaum Zam tshaj tias sawv daws yuav txais lub cim ntxuav, mas nej kuj hnov hais txog Yes Xus nyob Nas Xas Les. Nws pib qhia hauv xeev Nkas Lis Lais. 

38 – Tswv Ntuj tau pleev nws. Tswv Ntuj muab Leej Ntuj Plig Ntshiab thiab muab hwj huam rau nws. 

Nws mus ncig teb ncig chaw, nws ua zoo rau sawv daws. Nws kho cov neeg poob hauv dab phem tes kom lawv zoo. Vim Tswv Ntuj nrog nws nyob. 

39 – Peb ua tim khawv pom tas puas tsav yam Yes Xus tau ua nyob hauv cov

Yus Das lub teb chaws thiab nyob Yes Lus Xas Les. Cov Yus Das tau ua phem rau nws :

lawv muab nws dai saum ib tug ncej kom nws tuag. 

40 – Tab sis, hnub tim peb, Tswv Ntuj tsa nws sawv rov qab los lawm

thiab pub kom nws tawm los xyuas cov tim khawv uas nws xub tau xaiv ua ntej. 

41 – Tsis yog tas tsoom pej xeem tau pom nws. Cov tau pom nws yog peb. 

Thaum nws sawv hauv cov tub tuag rov los, mas peb tau nrog nws noj thiab haus ua ke. 

42 – Nws qhia peb kom peb tshaj rau tsoom pej xeem thiab ua pov thawj zeem

tias nws yog tus uas Tswv Ntuj tsa los txiav txim rau cov neeg ciaj thiab cov neeg tuag. 

43 – Tas cov yaj saub ua tim khawv txog Yes Xus tias leej twg ntseeg txog nws,

mas leej twg cov txhaum yuav daws tas nyob hauv nws lub npe. »

Yog Tswv Ntuj Lo Lus        Nws lus txiaj ntsim

Nkauj Paj Nruag:              HNUB NO YOG HNUB HUAB TAIS TSIM                  

(NPN 118-1)

Txais: Hnub no yog hnub Huab Tais tsim los rau peb, peb zoo siab hom khaj.

1 – Peb ua Huab Tais tsaug vim nws khuv leej neeg mus ib txhiab ib txhis.

Haiv His Xas Lais, nej cav tias:

“Nws txoj kev hlub nyob mus ib txhiab ib txhis.”

2 – Huab Tais txhais tes xis ua hauj lwm loj;

nws txhais tes xis muaj hwj huam. Kuv yuav tsis tuag, kuv yuav muaj txoj sia nyob.

Kuv yuav cav txog Huab Tais tej dej num.

3 – Lub pob zeb uas cov txhim tsev muab pov tseg,

txia ua lub pob zeb txheem tsev. Yam hwj huam loj no yog Huab Tais ua,

yog yam zoo tshaj rau peb qhov muag pom.

ZAJ NYEEM OB               

KOS LOS XAIS 3 : 1-4.

LUB NTSIAB LUS : Peb ntseeg txog Yes Xus, peb thiaj txais lub Cim Ntxuav. Yog lub cim tias peb nrog Yes Xus tuag thiab nrog Yes Xus muaj txoj sia.

COV LUS PAJ LUG SAU TUAJ RAU COV NTSEEG NYOB KOS LOS XAIS.

1 – Nej pom xeeb nrog Leej Pleev sawv rov los lawm, mas nej nrhiav tej yam nyob txheej saud,

vim txheej saud yog Leej Pleev qhov chaw nyob, nws zaum ntawm Tswv Ntuj phab xis. 

2 – Nej lub siab yuav dai dhuam rau tej yam nyob txheej saud, txhob dai rau tej yam nyob ntiaj teb no.

3 – Vim tias, nej tuag lawm, hos nej txoj sia nrog Leej Pleev tsiv nraim hauv Tswv Ntuj. 

4 – Leej Pleev yog nej txoj sia :

thaum nws yuav tawm los rau pom xyeem, mas nej kuj yuav nrog nws tawm los muaj hwj chim.

Yog Tswv Ntuj Lo Lus        Nws lus txiaj ntsim

NTAWV MOO ZOO         

ZAM 20 : 1-9.

LUB NTSIAB LUS : Yog vim Yes Xus sawv rov los peb thiaj tso siab tias nws pub txoj sia rau peb tau.

COV LUS NYOB HAUV ZAM NTAWV MOO ZOO.

1 – Thawj hnub pib lub lis piam, thaum sawv ntxov, ntuj tsis tau kaj, Mab Lias Mas Ntas Las mus tom ntxa. 

Nws pom daim txiag zeb tshem ntawm lub ntxa lawm. 

2 – Mab Liab Mas Ntas Las khiav mus cuag Xis Moos Pob Zeb thiab lwm tus thwj tim,

uas yog tus Yes Xus nyiam. 

Nws hais rau nkawd tias :

« Lawv nqa Huab Tais tawm hauv ntxa lawm, peb tsis paub xyov lawv coj nws mus tso qhov twg lawm. »

3 – Pob Zeb tawm plaws mus, lwm tus thwj tim kuj tawm plaws thiab, nkawd mus tom ntxa. 

4 – Nkawd ob leeg ua ke khiav mus, tab sis lwm tus thwj tim khiav nrawm dua Pob Zeb, nws khiav ua ntej, nws xub mus txog tom ntxa. 

5 – Nws khoov mus xauj, nws pom tej hlab ntaub nyob ntawd ;

tab sis nws tsis chaws mus hauv. 

6 – Ces Xis Moos Pob Zeb lawv tus thwj tim qab mus txog, nws chaws mus hauv lub ntxa. 

Nws pom cov hlab ntaub nyob ntawd, 

7 – hos daim ntaub qhwv taub hau kauv cia nyob lwm qhov, tsis xyaw cov hlab ntaub. 

8 – Ces lwm tus thwj tim uas xub mus txog ntawm lub ntxa mam li chaws mus hauv. 

Nws pom ces nws ntseeg. 

9 – Vim  lawv tseem tsis tau to taub tias Yes Xus yuav sawv hauv cov tuag rov los raws li Ntawv qhia. 

Huab Tais Pleev      Lub qab ntuj neeg cav txog koj

Hnub Chiv Nqaum Nplooj Xyooj C

Par Cécile YANG

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

His Xais, Zaj 50, 4-7

4 – HUAB TAIS Tswv Ntuj tau muab cov thwj tim tus nplaig rau kuv. Nws qhia kuv kom kuv txawj hais ib lo lus nplij tus qaug zog. Niaj tag kis nws tsa kuv pob ntseg kom kuv tsim dheev, kom kuv mloog xws li cov thwj tim mloog.

5 – HUAB TAIS Tswv Ntuj qhib kuv pob ntseg, mas kuv tsis npau taws, kuv tsis yig, kuv tsis thaub qab.

6 – Lawv ntaus kuv, mas kuv tig kuv nraub qaum rau lawv ntaus. Lawv xav rho kuv cov hwj txwv, mas kuv tig kuv sab plhu rau lawv. Lawv xav ib tawg ncuav rau kuv thiab xav nto qaub ncaug rau kuv

ntsej muag, los kuv tsis fee plhu rau lawv.

7 – Tab sis HUAB TAIS Tswv Ntuj tsom kwm kuv, vim qhov ntawd mas kuv tsis poob ntsej muag. Ces kuv ua kuv ntsej muag tawv li pob zeb. Kuv paub tias kuv yuav tsis raug kev txaj muag.

Yog Tswv Ntuj Lo Lus        Nws lus txiaj ntsim

Nkauj Paj Nruag 22

8 – Leej twg pom kuv, mas nws thuam kuv; lawv luag kuv, lawv co taub hau hnyos kuv :

9 – « Tig mus cuag HUAB TAIS los mas! Cia HUAB TAIS npo nws dim. Nws pom xeeb nyiam HUAB TAIS! Cia HUAB TAIS npo nws dim.

17 – Vim tias ib pab dev coob sawv ncig kuv; ib pab neeg phem puav kuv kev:

lawv nkaug kuv tej tes taw.

18 – Kuv suav tau kuv cov pob txha tas tib si.

19 – Lawv muab kuv cov khaub ncaws los sis faib, lawv twv saib leej twg yuav tau kuv cov ris tsho.

20 – Hos koj, HUAB TAIS, thov koj txhob txav mus deb kuv ! Koj yog kuv lub zog, koj pab kuv mas! Tsuag tsuag tuaj pab. cawm kuv lub neej txom nyem ntawm twm hauv kub.

23 – Kuv xav tshaj koj lub npe rau kuv cov kwv tij. Kuv yuav cav txog koj nyob hauv nruab nrab lub txoos.

24 – Nej cov uas hwm HUAB TAIS, nej cav lus zoo txog nws mog !

ZAJ NYEEM OB

Fis Lis Pos, Zaj 2, 6-11

6 – Yes Xus Pleev yog Tswv Ntuj, tiam sis nws tsis cia nws lub hwj chim Tswv Ntuj rau luag hawm :

nws muab nws lub hwj chim hle.

7 – Nws yeem ua ib tug qhev, nws yug los ua neeg xws li ib tsoom neeg. Luag pom nws tus yam ntxwv

yog yam ntxwv tib neeg.

8 – Nws txo nws qis : nws tuaj yeem mloog Ntuj lus mus txog qhov tuag, thiab tseem xaiv txoj

kev tuag saum ntoo cuam.

9 – Vim li ntawd, mas Tswv Ntuj thiaj tsa Yes Xus ua ib tug loj nyob siab siab.

Tswv Ntuj muab lub npe uas nyob siab dua lwm cov npe rau nws.

10 – Li ntawd, tus twg hnov tuav txog Yes Xus lub npe, tsis hais nyob saum cov txheej ntuj, los nyob ntiaj teb no, los nyob nruab yeeb, mas tus ntawd cia li txhos caug hawm.

11 – Txhua xeem lus yuav tsum cav tias Yes Xus Pleev yog Huab Tais :

Leej Txiv Tswv Ntuj thiaj muaj koob meej nto moo lug.

Yog Tswv Ntuj Lo Lus        Nws lus txiaj ntsim

NTAWV MOO ZOO

Lus Kas, Zaj 23, 1-49

1 – Tas cov neeg tuaj sib txoos ntawd ib txhij sawv tsees, lawv coj Yes Xus mus rau Pis Las Tos.

2 – Lawv pib liam rau Yes Xus tias : « Peb pom tus neeg ntawd cob peb haiv neeg kom ua phem. Nws txwv tsis pub them se rau Xes Ntxas, thiab nws hais tias nws yog tus Vaj Pleev. »

3 – Pis Las Tos nug Yes Xus tias : « Koj puas yog cov Yus Das tus vaj ? »

Yes Xus teb tias : »Yog koj hais li ntawd. »

4 – Ces Pis Las Tos hais rau cov Thawj Leej Choj thiab rau tsoom sid tias :

« Kuv tsis pom ib lub txim nyob hauv tus neeg no. »

5 – Tsis kav, lawv hais tsis tseg tias : « Nws haub tsoom pej xeem kom ntxeev

siab. Nws pib qhia hauv Nkas Lis Lais mus thoob xeev Yus Das, tuaj txog ntawm no. »

6 – Thaum Pis Las Tos hnov hais li ntawd, nws nug saib Yes Xus puas yog neeg Nkas Lis Lais.

7 – Thaum Pis Las Tos paub tias Yes Xus zwm rau Hes Los, ces nws xa Yes Xus mus rau Hes Los. Vim lub caij ntawd Hes Los kuj tuaj nyob Yes Lus Xas Les thiab.

8 – Thaum Hes Los pom Yes Xus, nws zoo siab heev. Tau ntev los lawm, Hes Los ntshaw pom Yes Xus vim tej yam nws hnov luag hais txog Yes Xus, thiab nws vam tias Yes Xus yuav ua tej zaj hwj huam.

9 – Ces Hes Los nug Yes Xus txog ntau yam, tab sis Yes Xus tsis teb dab tsi rau Hes Los.

10 – Cov Thawj Leej Choj thiab cov Kws Ntawv Ntshiab kuj sawv ntsug nyob ntawd thiab, lawv liam heev kawg rau Yes Xus.

11 – Hes Los nrog nws cov zov keeb thuam thiab ua ntau yam tub qaug Yes Xus. Lawv muab ib lub tsho zoo nkauj rau Yes Xus hnav, ces lawv xa nws rov mus rau Pis Las Tos.

12 – Txij hnub ntawd los, Hes Los thiab Pis Las Tos nkawd ua phooj ywg, hos yav thaud mas nkawd sib ntxub.

13 – Pis Las Tos hu cov Thawj Leej Choj, cov nom, thiab cov pej xeem tuaj,

14 – nws hais rau lawv tias : « Nej coj tus neeg no tuaj rau kuv, xws li ib tug haub pej xeem kom ntxeev siab. Nyem no, kuv nug nws nyob ntawm nej xub ntiag, kuv tsis pom nws muaj txim xws li nej liam.

15 – Hes Los kuj tsis pom nws muaj txim, Hes Los thiaj xa nws rov los rau peb. Nws tsis tau ua ib yam tsim nyog tuag.

16 – Kuv yuav muab nws nplawm, ces kuv yuav tso nws mus. »

18 – Tab sis tas sawv daws qw ntsuag qees tias : « Tus neeg ntawd yuav tsum tuag !

Koj tso Npas Las Npas rau peb. »

19 – Npas Las Npas raug kaw hauv tsev loj faj, vim nws sawv ua rog ntxeev siab nyob hauv lub nroog thiab nws tua neeg.

20 – Pis Las Tos xav tso Yes Xus mus, ces nws rov qab hais lus rau lawv.

21 – Tab sis lawv nthe nthe hais tias : « Muab nws dai saum ntoo cuam ! Muab nws dai saum ntoo cuam ! »

22 – Pis Las Tos rov hais lus zaum peb rau lawv tias : « Tus neeg no tau ua dab tsi phem ? Kuv

tsis pom dab tsi txaus muab nws tua. Kuv yuav muab nws nplawm, ces kuv yuav tso nws mus. »

23 – Tab sis lawv qw nrov, taij tsis tseg kom muab Yes Xus dai saum ntoo cuam.

Lawv qw nrov nrov muaj ceem zuj zus.

24 – Ces Pis Las Tos txiav txim raws li lawv taij.

25 – Pis Las Tos tso tus uas raug kaw hauv tsev loj faj vim nws ntxeev siab

thiab tua neeg ; nws tso tus uas lawv taij. Hos nws muab Yes Xus rau lawv ua ywj lawv siab.

26 – Thaum lawv coj Yes Xus mus, lawv nthos ib tug txiv neej hu ua Xis Moos tuaj Xis Les Nas tuaj. Nws mus ua teb rov los. Lawv muab tus ntoo cuam rau nws, kom nws kwv lawv Yes Xus qab.

27 – Ib pab pej xeem coob coob raws Yes Xus mus. Muaj ib co poj niam ntaus lawv hauv siab thiab quaj hlub Yes Xus.

28 – Yes Xus tig mus ntsia cov poj niam, nws hais tias : « Cov ntxhais nyob Yes Lus Xas Les, nej txhob quaj hlub kuv, nej quaj hlub nej thiab hlub nej cov me nyuam mog !

29 – Vim yuav muaj tej hnub uas luag hais tias : Cov tau txoj hmoov zoo, yog cov poj niam tab seeb, yog lub plab uas tsis yug tub ki, thiab ob lub mis uas tsis muaj me nyuam noj !

30 – Thaum ntawd, lawv yuav hais rau cov roob tias : Nej vau los tsuam peb mas ! Thiab hais rau cov pov roob tias : Nej nphau los vov peb mas !

31 – Vim tias, yog luag ua li no rau tus ntoo nyoos, luag yuav ua li cas rau tus

ntoo qhuav ? »

32 – Lawv kuj coj ob tug neeg tau ua phem nrog Yes Xus mus, lawv yuav muab nkawd tua thiab.

33 – Thaum lawv mus txog qhov chaw hu ua Khauj Khaum Taub Hau, lawv muab Yes Xus dai rau saum ntoo cuam. Lawv kuj muab ob tug neeg tau ua phem dai saum ntoo cuam thiab, ib tug nyob sab xis, ib tug nyob sab laug.

34 – Yes Xus hais tias : « Txiv, koj zam rau lawv, vim lawv tsis paub lawv ua dab tsi ? »

Ces lawv muab Yes Xus cov ris tsho sib faib, lawv twv saib leej twg tau daim twg.

35 – Tsoom pej xeem sawv ntsug ntawd ntsia. Cov thawj coj hnyos Yes Xus, lawv

hais tias : « Nws cawm tau luag tej. Yog tias nws yog Tswv Ntuj Leej Pleev thiab tus Xaiv tiag, kom nws rov cawm nws mas ! »

36 – Cov tub rog kuj thuam Yes Xus. Lawv txav los, lawv cev ib co dej qaub rau Yes Xus.

37 – Lawv hais tias :

« Saib koj yog cov Yus Das tus vaj no,koj cia li cawm koj mas ! »

38 – Tseem muaj ib co npe ntawv sau nyob siab me ntsis saum Yes Xus taub hau, hais tias : « Tus no yog cov Yus Das tus Vaj. »

39 – Ob tug neeg phem dai saum ntoo cuam, muaj ib tug tsawm Yes Xus tias :

« Koj tsis yog Leej Pleev lod ? Koj rov cawm koj, thiab cawm wb mas. »

40 – Tab sis lwm tus qhib ncauj hais lus, nws cem tias :

« Koj tseem tsis ntshai Tswv Ntuj lod ?

Koj twb raug tib lub txim zoo li nws thiab !

41 – Wb mas, wb lub txim yog txoj kev ncaj, vim wb tau ua tej yam tsim nyog raug txim. Hos nws tsis tau ua dab tsi phem li. »

42 – Ces nws hais tias : « Yes Xus, thaum koj mus txog hauv koj lub Ceeb Tsheej, thov koj nco txog kuv. »

43 – Ces Yes Xus hais rau nws tias : « Kuv hais tseeb rau koj : Hnub no, koj yuav nrog kuv nyob hauv lub Nras Lom Zem. »

44 – Kwv yees txij tav su, ces lub hnub ploj ntais lawm. Tas lub ntiaj teb tsaus

ntuj nti mus txog peb teev hnub qaij.

45 – Daim ntaub hauv Kem Ntshiab ntuag rhe hauv nruab nrab.

46 – Yes Xus hu ib suab nrov nrov hais tias :

« Txiv, kuv tso kuv txoj sia rau hauv koj

txhais tes. » Yes Xus hais li ntawd tas, nws txoj sia tu nrho.

47 – Tus xab txheeb pom qhov uas nyuam qhuav tshwm sim ntawd, nws cav txog

Tswv Ntuj lub hwj chim, nws hais tias : « Tus no yog ib tug neeg siab ncaj tiag ! »

48 – Tas cov pab neeg uas tuaj sib sau ua ke ntsia tej xwm no, pom qhov uas nyuam

qhuav tshwm sim tas los, mas lawv rov mus tsev, lawv ntaus lawv hauv siab.

49 – Tas Yes Xus cov swm neeg huv tib si, thiab ib co poj niam uas raws Yes Xus hauv xeev Nkas Lis Lais tuaj, lawv sawv ntsug deb ntsia tej xwm ntawd.

Huab Tais Pleev      Lub qab ntuj neeg cav txog koj

Lub Caij Plaub Caug       HNUB CHIV 5     XYOO C

Par Cécile YANG

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB                            

HIS XAIS 43 : 16-21.

LUB NTSIAB LUS :  Tswv Ntuj yuav ua kom nws haiv neeg tawm ntawm pej kum teb los zaum ob.

COV LUS NYOB HAUV NTAWV HIS XAIS.

16 – HUAB TAIS yog tus tho ib txog kev hla nruab hiav txwv, tho ib txog kev nyob hauv cov dej muaj zog. 

HUAB TAIS ua kom Fas Las Oos cov tsheb rog, cov nees thiab tsoom tub rog siab loj sawv daws ua ke sawv mus ntaus rog.

17 – Nyem no, lawv pw, lawv yuav tsis sawv, lawv tuag xws li tus teeb xeeb uas kug tas.  

HUAB TAIS hais li ntawd.

18 – Nej txhob nco txog thawj cov xwm, txhob xav tswv yim txog tej yam thaum ub tshwm sid. 

19 – Ntsia saib ! Kuv rov ua dua ib yam tshiab. Yam ntawd twb hlav kaus. Nej tsis pom lod ?  Muaj tseeb ! 

Kuv yuav tho ib txog kev hauv teb chaws suab puam, kuv yuav ua kom tej tus dej txhawv hauv cov teb chaws maj sab. 

20 – Tej tsiaj nruab nrag, tej hma thiab tej qaib nyuj yuav cav lus zoo txog kuv lub koob meej,

vim kuv yuav ua kom dej txhawv hauv teb chaws suab puam los, haiv neeg kuv xaiv thiaj tau dej haus. 

21 – Haiv neeg kuv tsim los yuav cav txog kuv lub koob meej mus li.

Yog Tswv Ntuj Lo Lus        Nws lus txiaj ntsim

Nkauj Paj Nruag              HUAB TAIS UA TEJ YAM LOJ RAU PEB                   

(NPN 126)

Txais: Peb zoo siab hom khaj vim Huab Tais ua tej yam loj kawg rau peb.

1 – Thaum Huab Tais coj Xis Yoos cov neeg nyob txim rov los, peb xav tias yog npau suav.

Peb lub ncauj muaj suab luag, peb tus nplaig hu nkauj zoo siab.

2 – Pej kum haiv neeg hais zom zaws tias,

“Huab Tais tau ua tej yam loj tas nrho rau lawv.”

Huab Tais tau ua tej yam loj rau peb, peb zoo siab tas nrho.

3 – Huab Tais, koj coj peb cov neeg nyob txim rov los xws li dej sab siv huam nyob teb chaws suab puam.

Cov neeg tseb nplej, tseb ntxuag kua muag. Thaum lawv sau nplej, lawv sau nrog suab luag.

4 – Thaum mus, lawv quaj vim lawv ris cov seev noob. Thaum lawv rov los, lawv hu nkauj vim lawv ris cov nplej tshiab los.

ZAJ NYEEM OB   

FIS LIS POS 3 : 8-14.

LUB NTSIAB LUS :  Txoj tseem kev cawm neeg.

COV LUS PAJ LUG SAU TUAJ RAU COV NTSEEG NYOB FIS LIS POS.

8 – Nyem no, kuv saib txhua yam tsis muaj nqis, vim kuv muab piv rau ib yam muaj nqe tas nrho,

yog txoj kev paub Yes Xus Pleev, kuv tus Huab Tais. Vim nws, mas kuv tau tso tas ib puas tsav yam pov tseg ;

kuv saib tas puas tsav yam tsis muaj qab hau, vim kuv xav tau Leej Pleev. 

9 – Kuv xav kom Tswv Ntuj ntsib kuv nyob hauv Leej Pleev. Kuv tsis muaj ib txog kev ncaj ua kuv tug ;

kuv tsis muaj txoj kev ncaj tuaj ntawm Txoj Cai tuaj. Kuv tsuas muaj txoj kev ncaj tuaj ntawm txoj kev ntseeg txog Leej Pleev thiab ntawm Tswv Ntuj tuaj xwb, yog txoj kev ncaj uas nrhau cag rau hauv txoj kev ntseeg. 

10 – Kuv xav paub Leej Pleev, xav paub nws txoj kev sawv rov los muaj zog npaum li cas,

xav npuab nws nyob hauv nws txoj kev raug txom nyem, thiab kuv xav yoog nws tus piv txwv nyob hauv txoj kev tuag, 

11 – saib kuv puas yuav sawv tau hauv cov tub tuag rov los. 

12 – Kuv tsis hais tias, kuv twb mus txog chaw lawm, los kuv twb zoo txhij zoo txhua tas lawm. 

Kuv khiav ntxiv kom kuv tuav tau Leej Pleev, vim Yes Xus Pleev twb tuav tau kuv lawm. 

13 – Kwv tij, kuv tsis khav tias, kuv tuav tau Leej Pleev lawm. 

Kuv tsuas hais li no : kuv hnov qab tias, kuv tau khiav kev deb li cas lawm. 

14 – Kuv khoov cev ncaj qha khiav mus rau tom hauv ntej, kuv tso sas ntws kom mus txog chaw,  vim kuv pom cov paj tshab, uas Tswv Ntuj hu peb mus txais nyob txheej saud, nyob hauv Yes Xus Pleev. 

Yog Tswv Ntuj Lo Lus        Nws lus txiaj ntsim

NTAWV MOO ZOO         

ZAM 8 : 1-11.

LUB NTSIAB LUS :  Tus poj niam deev hluas.

COV LUS NYOB HAUV ZAM NTAWV MOO ZOO.

1 – Ntawm Yes Xus, mas nws mus pem Roob Txiv Ntoo Roj. 

2 – Thaum kaj ntug txoog, Yes Xus rov mus hauv lub Tuam Tsev Teev Ntuj. 

Tas tsoom pej xeem tuaj cuag nws. Yes Xus zaum, nws thiaj pib qhia lawv. 

3 – Cov kws ntawv thiab cov Fas Lis Xais coj ib tug poj niam tuaj rau Yes Xus :

luag ntes nws thaum tab tom deev hluas nraug. Lawv coj tus poj niam tuaj sawv ntsug hauv nruab nrab. 

4 – Lawv hais rau Yes Xus tias :

« Xib Hwb, tus poj niam no, luag pom nws tab tom deev hluas. 

5 – Nyob hauv Txoj Cai, mas Mais Xes kom peb xuas pob zeb txawb cov poj niam zoo li ntawd. 

Koj ne, koj hais li cas ? » 

6 – Lawv hais li ntawd vim lawv xav sim Yes Xus,

lawv thiaj li tau kev mus kom nws. Tab sis Yes Xus khoov,

nws xuas ntiv tes sau npe ntawv rau hauv pem teb. 

7 – Lawv pheej rov nug tsis tseg, ces Yes Xus sawv ntsug, nws hais rau lawv tias :

« Nyob hauv nej, yog leej twg tsis muaj txhaum, mas kom nws xub txawb ib lub pob zeb rau tus poj niam ntawd. » 

8 – Ces Yes Xus rov khoov, nws rov sau npe ntawv hauv pem teb. 

9 – Thaum lawv hnov hais li ntawd, lawv nyias rov mus nyias zuj zus. Cov xub mus yog cov laus dua. 

Tshuav Yes Xus tib leeg thiab tus poj niam uas sawv hauv nruab nrab xwb. 

10 – Yes Xus rov sawv ntsug, nws hais rau tus poj niam tias :

« Me ntxhais, lawv dua twg tas lawm ? 

Tsis muaj leej twg muab txim rau koj lod ? » 

11 – Tus poj niam teb tias : « Huab Tais, tsis muaj leej twg. » 

Ces Yes Xus hais tias :

« Kuv kuj tsis muab txim rau koj thiab. Koj rov mus, txij no mus koj txhob ua txhaum ntxiv lawm mog. »

Huab Tais Pleev      Lub qab ntuj neeg cav txog koj

Lub Caij Plaub Caug     HNUB CHIV 4       XYOO C

Par Cécile YANG

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia     

ZAJ NYEEM IB    

YOS XUAS 5 : 9-12.

LUB NTSIAB LUS :  Cov His Xas Lais ua lub Ntees Hla. Lawv noj lawv cov qoob loo.

COV LUS NYOB HAUV NTAWV YOS XUAS HAIS TIAS :

9 – HUAB TAIS hais rau Yos Xuas tias : 

« Hnub no, kuv hle nej lub koob meej phem nyob Hais Nkws Tos teb pov tseg. » 

Ces qhov chaw ntawd thiaj hu ua Ntsis Nkas los txog tav no.

10 – Cov His Xas Lais tsa tsev tsam phooj nyob ntawm Ntsis Nkas. 

Thaum txog hnub tim kaum plaub tsaus ntuj lawv thiaj ua lub Ntees Hla. 

Yog nyob hauv lub tiaj Yes Lis Kos. 

11 – Ua lub Ntees Hla tas, tag kis lawv noj cov txhiam xws uas lawv cog nyob hauv lub teb chaws. 

Lawv noj cov mov tsis xyaw poov xab thiab cov noob nplej kib. 

12 – Tsis muaj cov mov mas nas lawm, vim lawv twb tau cov mov hauv lub teb chaws noj lawm. 

Cov His Xas Lais tsis muaj cov mov mas nas lawm ces txij xyoo ntawd

los lawv noj cov txhiam xws nyob hauv lub teb chaws Kas Nas Has.

Yog Tswv Ntuj Lo Lus        Nws lus txiaj ntsim

Nkauj Paj Nruag              SAJ HUAB TAIS LUB SIAB ZOO                      

(NPN 34-2)

Txais: Nej saj ces nej yuav pom Huab Tais lub siab zoo.

1 – Kuv cav lus zoo txog Huab Tais txhua niaj txhua hnub. Kuv lub ncauj yuav cav lus zoo txog nws.

Kuv tus ntsuj plig yuav muaj ntsej muag nyob hauv Huab Tais. Cov me neeg hnov kuv cov lus, lawv yuav zoo siab.

2 – Nej nrog kuv cav txog Huab Tais, peb sawv daws ua ke tshaj nws lub npe.

Kuv nrhiav Huab Tais, nws teb kuv. Nws pab kuv dim ntawm txhua yam uas kuv ntshai.

3 – Cov neeg nrhiav Huab Tais, lawv yuav muaj ntsej muag luag ntxhi nyob hauv kev hom khaj,

lawv yuav tsis poob ntsej muag. Thaum cov txom nyem hu txog Huab Tais, nws mloog lawv,

nws cawm lawv ntawm kev txhawj xeeb.

ZAJ NYEEM OB   

2 KOS LIS NTHOS 5 : 17-21.

LUB NTSIAB LUS :  Txoj hauj lwm tshaj Ntuj Lus.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

17 – Nyem no, yog leej twg los nyob hauv Leej Pleev, mas nws yog tus uas Ntuj xeem tsim dua tshiab :

tus qub neeg dua lawm, ib tug neeg tshiab sawv los nyob. 

18 – Tus qub neeg thiab tus neeg tshiab, puav leej los ntawm Tswv Ntuj los,

vim nws ua kom peb rov nrog nws sib haum xeeb nyob hauv Leej Pleev, 

thiab nws muab txoj kab xwm sau sawv daws los sib haum xeeb rau peb leg. 

19 – Tus ua kom lub ntiaj teb neeg nrog Tswv Ntuj rov sib haum xeeb nyob hauv Leej Pleev,

yog Tswv Ntuj ; nws tsis saib neeg cov txhaum ntxiv ; nws pub kom peb hais tau cov lus pab neeg kom nrog nws rov sib haum xeeb. 

20 – Ces peb yog cov uas Tswv Ntuj xa mus ua Leej Pleev cov tiam lis ;

yog zoo li Tswv Ntuj siv peb lub ncauj mus qhuab qhia. Peb tuav txog Leej Pleev lub npe thov nej tas zog,

kom nej cia li nrog Tswv Ntuj rov sib haum xeeb. 

21 – Tswv Ntuj ua kom tus uas tsis paub txoj kev txhaum, txia ua kev txhaum, kom nws pab peb, ces peb nyob hauv nws, mas peb plhis mus ua Tswv Ntuj txoj kev ncaj.

Yog Tswv Ntuj Lo Lus        Nws lus txiaj ntsim

NTAWV MOO ZOO         

LUS KAS 15: 1-3, 11-32.

LUB NTSIAB LUS:  Tswv Ntuj nyiam zam txhaum. Zaj paj lug hais txog tus yaj poob zoo.

COV LUS NYOB HAUV LUS KAS NTAWV MOO ZOO.

1 – Tas cov neeg sau se thiab cov neeg txhaum txav los ze Yes Xus, lawv xav mloog Yes Xus hais.

2 – Ces cov Fas Lis Xais thiab cov Kws Ntawv Ntshiab nroo zom zaws tias :

« Tus neeg ntawd txais cov neeg txhaum, 

nws tseem nrog lawv noj mov thiab ! »

3 – Yes Xus thiaj hais zaj paj lug no rau lawv :

‘Nej nrog kuv zoo siab, vim kuv nrhiav tau kuv tus yaj poob zoo lawm.’ 

11 – Yes Xus tseem hais tias :

“Ib tug neeg muaj ob tug tub. 

12 – Tus tub ntxawg hais rau nws txiv tias :        

‘Txiv, koj muab koj lub cuab tam feem uas yog kuv tug faib rau kuv.’ 

Ces leej txiv thiaj muab nws lub cuab tam faib rau nws ob tug tub.

13 – Ob peb hnub tom qab, tus tub ntxawg sau feem uas yog nws tug tas huv si, 

nws khiav mus ib lub teb chaws deb. Nyob ntawd nws muab nws lub cuab tam phob vim nws coj ib lub neej tsis tsim txiaj.

14 – Thaum nws muab nws lub cuab tam phob tas huv si lawm, ces lub teb chaws tshaib plab loj. 

Nws pib paub txoj kev yoo tshaib yoo nqhis. 

15 – Nws thiaj mus ua zog hauv ib tug neeg nyob txawm lub teb chaws ntawd.

Luag kom nws mus zov npua tom teb. 

16 – Tus tub ntxawg ntshaw noj cov qos uas npua noj kom tsau nws plab,  tab sis tsis muaj neeg pub rau nws noj. 

17 – Nws lub siab mam li ras dheev tias :

‘Pes tsawg leej tub zog nyob hauv kuv txiv tsev tau mov noj seem noj so, hos kuv nyob tuag tshaib ntuas ntawm no. 

18 – Kuv xav mus cuag kuv txiv, kuv yuav hais rau nws tias :

‘Txiv, kuv ua txhaum  rau Ntuj thiab rau koj. 

19 – Kuv tsis tsim nyog koj hu kuv ua koj tus tub ntxiv. Thov koj saib kuv ib yam li koj ib tug tub zog.’  

20 – Tus tub ntxawg thiaj sawv kev rov los cuag nws txiv. Thaum tus tub tseem los txog deb, nws txiv twb pom nws. Leej txiv hlub kawg, nws khiav mus puag tus tub caj dab, thiab nwj nws tus tub ntev loo. 

21 – Tus tub hais rau leej txiv tias :

‘Txiv, kuv ua txhaum rau Ntuj thiab rau koj. Kuv tsis tsim nyog koj hu kuv ua koj tus tub ntxiv.’ 

22 – Tab sis leej txiv hais rau cov tub txib tias : 

‘Nej tsuag tsuag mus nqa lub tsho zoo nkauj tshaj los ntawm no, nej muab rau nws hnav, nej muab ib nti nplhaib los ntxig nws ntiv tes, thiab ib nkawg khau los ntxig nws ko taw. 

23 – Nej cab tus xyuas nyuj rog los tua. Peb noj, peb ua lom zem. 

24 – Vim tias kuv tus tub no tuag lawm, nyem no nws ciaj rov los. Nws ploj lawm, nyem no rov nrhiav tau nws.’ Ces lawv sawv daws noj haus lom zem.

25 – Thaum ntawd, tus tub hlob tseem nyob tom teb. Thaum nws rov los yuav txog tsev,

nws hnov suab paj nruag thiab suab dhia seev cev nrov ntsuag qees.    

26 – Nws hu ib tug tub txib kom tawm mus cuag nws, nws nug saib lub suab ntawd yog dab tsi. 

27 – Tus tub txib hais rau nws tias :

‘Yog koj tus kwv rov qab los tsev, koj txiv tua tus xyuas nyuj rog, vim nws tau koj tus kwv rov los, noj qab nyob zoo.’ 

28 – Ces tus tub hlob npau taws, nws tsis kam los hauv tsev. Leej txiv tawm tuaj thov kom nws los hauv tsev. 

29 – Tab sis tus tub hlob teb rau nws txiv tias : 

‘Saib, kuv lis koj tej hauj lwm cuag li ib tug qhev tau npaum no xyoo, kuv tsis tau hla koj ib lo lus li,

koj twb tsis muab ib tug me nyuam tshis pub kuv ib zaug, kom tau nrog kuv cov phooj ywg noj ib pluag lom zem. 

30 – Hos koj niag tub ntawd, mus  nrog  cov  niam  ntiav muab koj lub cuab tam nqos tas,

thaum nws rov los tsev, koj tua tus xyuas nyuj rog rau nws !’

31 – Ces leej txiv hais rau tus tub hlob tias :

‘Me tub, koj ib txwm nrog kuv nyob. Ib puas tsav yam uas yog kuv tug, mas kuj yog koj tug.

32 – Tab sis, peb yuav tsum noj ib roog qav thiab ua lom zem, vim koj tus kwv no tuag lawm, zaum no nws ciaj rov los, nws ploj lawm,  nyem no nrhiav tau nws rov los.’ »

Huab Tais Pleev      Lub qab ntuj neeg cav txog koj

Lub Caij Plaub Caug       HNUB CHIV 3      XYOO C

Par Cécile YANG

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB   

KEV TSIV 3 : 1-8a, 13-15

LUB NTSIAB LUS :  Tswv Ntuj hu Mais Xes hauv tsob pos cig cig tuaj thiab qhia nws lub npe.

COV LUS NYOB HAUV NTAWV KEV TSIV.

1 – Mais Xes niaj hnub mus zov nws yawm txiv Zes Raus pab yaj. Zes Raus yog ib tug leej choj Mas Dias.

Mais Xes coj nws yawm txiv cov yaj mus noj zaub dhau teb chaws suab puam,

ces nws mus txog Tswv Ntuj lub roob Hos Les.   

2 – HUAB TAIS tus Tshiab yees tawm los rau Mais Xes pom nyob hauv ib co nplaim taws cig cig nyob hauv ib tsob pos. Mais Xes ntsia ntsoov, tsob  pos cig cig ntsa iab tab sis tsis txawj kug li.         

3 – Ces Mais Xes hais tias : 

« Kuv yuav lug kev mus xyuas yam txawv txawv ntawd saib yog dab tsi,

ua cas tsob pos ntawd cig cig tsis txawj kug. » 

4 – HUAB TAIS pom nws lug kev tuaj xyuas, ces Tswv Ntuj hu nws hauv tsob ntoo tuaj tias : 

« Mais Xes, Mais Xes. » 

 Mais Xes teb tias : 

« Kuv nyob ntawm no. » 

5 – Tswv Ntuj hais tias : 

« Koj txhob txav los ze ntawm no, hle koj nkawm khau ntawm koj ko taw,

vim thaj chaw uas koj tsuj no yog ib thaj chaw ntshiab. » 

6 – Tswv Ntuj hais ntxiv tias : 

« Kuv yog koj cov yawg koob tus Tswv Ntuj, yog Has Nplas Has tus Tswv Ntuj,

yog His Xas Has tus Tswv Ntuj, thiab yog Yas Kos tus Tswv Ntuj. » 

Ces Mais Xes thaiv nws lub ntsej muag, vim nws ntshai tsam nws qhov muag tau pom Tswv Ntuj.

7 – HUAB TAIS hais tias : 

« Kuv pom, kuv pom kuv haiv neeg txoj kev txom nyem nyob Hais Nkws Tos teb. 

Kuv hnov lawv lub suab quaj vim luag quab yuam lawv.  

Kuv paub lawv tej kev txhawj xeeb tas huv si. 

8a – Kuv nqes los cawm lawv kom dim ntawm cov Hais Nkws Tos txhais tes.

Kuv yuav coj lawv tawm hauv lub teb chaws ntawd rov los rau ib lub teb chaws dav thiab zoo qoob,

lub teb chaws muaj mis nyuj thiab zib mu ntws sis laub sis lug,

13 – Mais Xes hais rau Tswv Ntuj tias: 

« Thaum kuv mus cuag cov His Xas Lais, thiab kuv hais rau lawv tias : 

‘Nej cov yawg koob tus Tswv Ntuj xa kuv tuaj pab nej.’ 

Yog lawv hais rau kuv tias : 

‘Nws lub npe hu li cas ?’ 

Kuv yuav hais li cas rau lawv ? 

14 – Tswv Ntuj hais rau Mais Xes tias : 

« Kuv yog tus kuv yuav yog. » 

Tswv Ntuj hais ntxiv tias : 

« Koj yuav hais rau cov His Xas Lais li no : 

‘Kuv yog tus kuv yuav yog’ xa kuv tuaj pab nej. »

15 – Tswv Ntuj tseem hais ntxiv rau Mais Xes tias : 

« Koj yuav hais li no rau cov His Xas Lais : 

‘ HUAB TAIS, uas yog nej cov yawg koob tus Tswv Ntuj, yog Has Nplas Has tus Tswv Ntuj,

yog His Xas Has tus Tswv Ntuj thiab yog Yas Kos tus Tswv Ntuj xa kuv tuaj pab nej. 

Lub npe no yog kuv lub npe mus ib txhis, neeg yuav tuav lub npe no hu txog kuv mus txheej dhau txheej.’

Yog Tswv Ntuj Lo Lus        Nws lus txiaj ntsim

Nkauj Paj Nruag              HUAB TAIS KHUV LEEJ NEEG                       

(NPN 103-5)

Txais: Huab Tais siab zoo thiab khuv leej neeg, nws tsis npau taws sai.

1 – Kuv tus plig, koj cav lus zoo txog Huab Tais. Kuv tej siab ntsws, nej cav lus zoo txog nws lub npe ntshiab. Kuv tus plig, koj cav lus zoo txog Huab Tais, koj txhob mom nws txheej.

Koj yuav nco ntsoov nws tej txiaj ntsim.

2 – Nws zam koj cov txhaum, nws kho koj tej mob nkeeg. Nws muab nws lub siab zoo thiab khuv leej neeg roos koj. Nws cawm koj txoj sia ntawm kev puas tsuaj.

3 – Huab Tais tswj txoj cai ncaj ncees. Cov raug luag tsuj, nws tsa lawv cai.

Nws qhia nws txoj cai rau Mais Xes thiab nws tej hauj lwm nto koob meej rau tsoom His Xas Lais.

4 – Huab Tais siab zoo, nws khuv leej neeg tas nrho. Nws hlub neeg mus li, nws tsis npau taws sai.

Nws lub siab uas hlub cov neeg hwm nws siab li lub ntuj, dav npaum li lub ntiaj teb.

ZAJ NYEEM OB  

1 KOS LIS NTHOS 10: 1-6, 10-12

LUB NTSIAB LUS :  Tej xwm hauv His Xas Lais kwv huam yog tej zaj qhuab qhia peb.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

1 – Kwv tij, kuv xav kom nej paub tias, thaum ub twv huab tau roos peb cov yawg koob, 

sawv daws tau hla lub hiav txwv, 

2 – sawv daws tau nrog Mais Xes txais lub cim ntxuav nyob hauv twv huab, thiab nyob hauv dej ntuj liab, 

3 – sawv daws tau noj cov mov poob saum ntuj los,

4 – sawv daws tau haus cov dej txhawv saum ntuj los :

yog cov dej tawm hauv phab tsua los. Phab tsua ntawd yog Leej Pleev. 

5 – Tab sis, cov tau ua ntxim Tswv Ntuj lub siab, muaj tsawg leej, vim li ntawd lawv thiaj tuag pawg lug nyob hauv teb chaws suab puam. 

6 – Tej xwm ntawd tshwm sim los ua piv txwv qhia peb, kom peb tsis txhob ywj peb lub siab ntshaw qhov phem, xws li txheej thaud cov His Xas Lais tau ua. 

10 – Nej tsis txhob yws taus xws li tej laus thaud : Ntuj tus Tshiab thiaj muab lawv tua. 

11 – Tej xwm ntawd tshwm sim los ua piv txwv qhia peb. Lawv muab sau cia ua tej zaj qhuab qhia peb vim yuav txog lub caij uas ntiaj teb kawg. 

12 – Nyem no, tus twg khav tias nws sawv ntsug lawm, mas nws yuav ceev faj, nyob tsam nws ntog ! 

Yog Tswv Ntuj Lo Lus        Nws lus txiaj ntsim

NTAWV MOO ZOO        

LUS KAS 13 : 1 – 9.

LUB NTSIAB LUS :  Zaj paj lug hais txog tsob txiv ncuav pias tsis txi txiv.

COV LUS NYOB HAUV LUS KAS NTAWV MOO ZOO HAIS TIAS :

1 – Tib lub zim txwv ntawd, muaj ib co neeg tuaj qhia Yes Xus txog cov

Nkas Lis Lais uas Pis Las Tos muab lawv cov ntshav hliv xyaw rau cov ntshav uas lawv txi Ntuj. 

2 – Ces Yes Xus thiaj hais rau lawv tias :

« Nej puas xav tias cov Nkas Lis Lais ntawd tau ua txhaum loj dua lwm cov neeg nyob Nkas Lis Lais,

lawv thiaj raug tsim txom zoo li ntawd ? 

3 – Kuv hais rau nej tias lawv tsis tau ua txhaum loj dua luag tej. Tab sis, yog nej tsis tig los hloov siab,

mas nej yuav tuag ib yam li ntawd thiab. 

4 – Hos kaum yim leej neeg uas tus pej thuam Xis Los Es vau los tsuam lawv tuag tas,

mas nej puas xav tias lawv tshuav nuj nqi ntau dua ib tsoom neeg nyob Yes Lus Xas Les huv si ? 

5 – Kuv hais rau nej tias lawv tsis tshuav nuj nqis ntau dua luag. Tab sis yog nej tsis xav tig los hloov dua siab tshiab, mas nej yuav tuag ib yam li ntawd thiab. »

6 – Yes Xus hais zaj paj lug no :

« Muaj ib tug neeg cog tau ib tsob txiv ncuav pias rau hauv nws lub vaj txiv cawv. 

Nws tuaj de txiv ncuav pias, tab sis tsis pom muaj txiv li.

7 – Ces nws hais rau tus tub txib zov vaj tias :

« Koj saib ! Tau peb xyoos no kuv tuaj de txiv ncuav pias, kuv yeej tsis pom ib lub txiv li. 

Koj muab tsob ntoo ncuav pias ntov. Yuav cia nws nyob ntxoov av ua dab tsi ? » 

8 – Tus tub txib zov vaj teb rau tus tswv vaj tias :

« Huab Tais, thov koj cia tsob ntoo nyob xyoo no ntxiv. Kuv yuav khawb av ncig lub hauv paus ntoo thiab npoog chiv rau. 

9 – Tej zaum yav tom ntej, tsob ntoo yuav txi txiv. Yog tsis txi, koj mam muab ntov. »

Huab Tais Pleev      Lub qab ntuj neeg cav txog koj