Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB    

HAUV PAUS 15 : 5 – 12, 17 – 18                            

LUB NTSIAB LUS :  HUAB TAIS nrog Has Nplas cog lus.

COV LUS NYOB HAUV NTAWV HAUV PAUS HAIS TIAS :

5 – HUAB TAIS coj Has Nplas mus nraum zoov thiab hais rau nws tias : 

« Koj tsa muag ntsia saum ntuj thiab suav cov hnub qub saib koj suav puas txheeb. »  

Ces nws hais tias : 

« Koj cov xeeb ntxwv yuav coob npaum li ntawd. »  

6 – Has Nplas ntseeg HUAB TAIS, ces HUAB TAIS muab Has Nplas lub siab ntseeg suav ua kev ncaj rau Has Nplas.   

7 – HUAB TAIS hais rau nws tias : 

« Kuv yog tus HUAB TAIS uas tau kom koj tawm hauv lub teb chaws

Uj uas nyob Kas Ntes los mus nyob lub teb chaws uas kuv yuav muab rau koj, ua koj tug. » 

8 – Has Nplas teb tias : 

« HUAB TAIS Tswv Ntuj, dab tsi thiaj yuav qhia rau kuv paub tias kuv tau lub teb chaws ua kuv tug ? » 

9 – HUAB TAIS hais rau nws tias : 

« Koj mus coj ib tug xyuas nyuj muaj peb xyoos, ib tug nkauj tshis muaj peb xyoos, ib tug txiv yaj muaj peb xyoos, ib tug poj nquab  thiab  ib  tug me  nyuam nquab los rau kuv tso. »  

10 – Has Nplas coj cov tsiaj raws li hais los rau HUAB TAIS. Nws muab cov tsiaj phua nruab nrab,

nws muab ib sab teeb rau sab xis ib sab teeb rau sab laug, tiam sis nws tsis phua cov noog. 

11 – Dav nyuj ya ntxiag los noj cov tsiaj, tab sis Has Nplas nplawm kom dav ya. 

12 – Thaum lub hnub tab tom poob qho, Has Nplas ib ce tsaug tas,

thiab muaj ib qho ntshai loj kawg los laum Has Nplas.

17 – Thaum lub hnub poob qho lawm thiab tsaus ntuj lawm, ces muaj ib lub qhov txos ncho pa lug thiab ib teg tsau cig cig los hla ntawm cov sab nqaij kis nruab nrab. 

18 – Hnub ntawd, HUAB TAIS nrog Has Nplas cog lus li no :

« Kuv muab lub teb chaws no rau koj tsoom xeeb ntxwv nyob,

txij tus dej nyob Hais Nkws Tos teb mus txog ntua tus Dej Loj, tus dej Aws Fas Tes.

Yog Tswv Ntuj Lo Lus        Nws lus txiaj ntsim

Nkauj Paj Nruag                          HUAB TAIS YOG QHOV POM KEV                 

(NPN 27-3)

Txais: Huab Tais yog kuv qhov pom kev, nws yog tus cawm kuv.

1 – Huab Tais yog kuv qhov pom kev. Nws yog tus cawm kuv, kuv yuav ntshai leej twg?

Huab Tais yog lub yeej ntsa zeb thaiv kuv lub neej, kuv yuav ntshai leej twg?

2 – Huab Tais, koj mloog kuv lub suab hu koj! Thov koj hlub kuv, koj teb kuv mas.

Kuv nco txog koj lo lus hais tias, “Nej nrhiav kuv lub ntsej muag.”

3 – Huab Tais, kuv nrhiav koj lub ntsej muag. Koj txhob thaiv koj lub ntsej muag rau kuv.

Koj txhob npau taws, txhob ntiab koj tus tub txib mus deb. Koj yog tus pab kuv, koj txhob tso kuv pov tseg.

4 – Kuv paub tseeb tias kuv yuav tau pom Huab Tais lub siab zoo nyob hauv cov neeg ciaj lub teb chaws.

Koj tos ntsoov Huab Tais, koj ua siab loj, koj tos ntsoov nws mog.

ZAJ NYEEM OB   

FIS LIS POS 3 : 17 – 21, 4 : 1

LUB NTSIAB LUS :  Txoj tseem kev cawm neeg.

COV LUS PAJ LUG SAU TUAJ RAU COV NTSEEG NYOB FIS LIS POS.

17 – Kwv tij sawv daws, nej yoog raws li kuv tus lwj lwm mog. 

Nej ntsia ntsoov cov neeg ua raws li peb tus  piv txwv. 

18 – Kuv hais li ntawd rau nej, yog vim muaj ntau leej ua xws li lawv yog cov yeeb ncuab ntxub Yes Xus tus ntoo cuam. Thaum kuv hais qhov ntawd rau nej, mas kuv kua muag poob. 

19 – Cov neeg ntawd, lawv kawg yuav poob rau hauv txoj kev tuag xwb. 

Lawv tus huab tais, yog lawv lub plab. Lawv muab tej yam phim yuav txaj muag los khav. 

Lawv tsuas nyiam tej yam nyob ntiaj teb no xwb. 

20 – Ntawm peb, mas peb lub tsheej nyob saum ntuj, vim peb tos Huab Tais Yes Xus Pleev yuav los cawm peb ;

21 – nws yuav muab peb lub cev txom nyem no hloov ua ib lub cev muaj hwj chim,

xws li nws lub. Nws ua li ntawd tau, vim nws muaj hwj huam tswj txhua tsav txhua yam.

1 – Kuv cov kwv tij zoo nyiam, nej yog kuv qhov chaw zoo siab, yog kuv lub koob meej. Nej nyob ruaj nreb hauv Huab Tais mog .

Yog Tswv Ntuj Lo Lus        Nws lus txiaj ntsim

NTAWV MOO ZOO         

LUS KAS 9 : 28b – 36

LUB NTSIAB LUS :   Yes Xus lub hwj chim tawm los.

COV LUS NYOB HAUV LUS KAS NTAWV MOO ZOO HAIS TIAS :

28b – Yes Xus coj Pob Zeb, Zam, thiab Yas Kos nrog nws, ces nws nce mus teev Ntuj saum  roob.

29 – Thaum Yes Xus teev Ntuj, nws lub ntsej muag hloov, nws cev ris tsho ci dawb paug ntsa iab.

30 – Ib sij huam, muaj ob tug neeg nrog Yes Xus tham : yog Mais Xes thiab Es Lias. 

31 – Nkawd tawm los muaj hwj chim, nkawd nrog Yes Xus tham txog txoj hauj lwm uas nws yuav sawv

kev mus lis kom tiav nyob Yes Lus Xas Les. 

32 – Pob Zeb thiab nws cov npawg qaug dab ntub. Tab sis lawv meej pem kawg.

Ces lawv pom Yes Xus lub hwj chim thiab pom ob tug neeg uas nrog Yes Xus ua ke.

33 – Thaum ob tug ntawd yuav ncaim ntawm Yes Xus, mas Pob Zeb hais rau Yes Xus tias :

« Xib Hwb, peb nyob ntawm no mas zoo kawg !

Cia peb tsa peb lub tsev tsam phooj, ib lub rau koj, ib lub rau Mais Xes, ib lub rau Es Lias. »

Pob Zeb tsis paub nws hais dab tsi.       

34 – Thaum Pob Zeb tab tom hais li ntawd, mas muaj ib twv huab tuaj vov nkaus lawv.

Thaum lawv nyob hauv twv huab, lawv ntshai kawg. 

35 – Muaj ib lub suab nrov hauv twv huab tuaj tias :

« Tus no yog kuv Leej Tub, yog tus kuv Xaiv, nej mloog nws mog. » 

36 – Thaum lub suab hais li ntawd tas, tshuav Yes Xus tib leeg xwb.

Hnub ntawd, cov thwj tim ua twj ywm tsis qhia dab tsi rau leej twg txog qhov lawv tau pom.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB            

TXOJ CAI OB   26 : 4 – 10

LUB NTSIAB LUS:  Yuav cev thawj cov qoob loo rau Tswv Ntuj.

COV LUS NYOB HAUV PHAU NTAWV TXOJ CAI OB.

4 – Niaj xyoo koj yuav ris ib kawg nplej tshiab los rau tus Leej Choj.

Tus Leej Choj yuav txais lub kawm ntawm koj txhais tes

los tso rau hauv koj tus Huab Tais Tswv Ntuj lub taw thaj txi Ntuj.

5 – Ces koj yuav hais cov lus no rau koj tus Huab Tais Tswv Ntuj :

 »Kuv txiv thaum ub yog ib tug As Las Mais nyob tsis ruaj chaw.

Nws nqes los rau Hais Nkws Tos teb, nws coj ib pab neeg tsawg kawg los nyob ntawd.

Ntev mus lawv mam coob tuaj, lawv ua ib haiv neeg loj, muaj zog thiab huam vam.

6 – Cov Hais Nkws Tos hiam peb thiab tsis saib peb li, Lawv kom peb ua lawv qhev, mas txom nyem tas nrho. Tswv Ntuj hnov peb lub suab, pom peb txoj kev txom nyem kev khwv, thiab pom peb lub neej raug luag yuam.

8 – Tswv Ntuj tsa tes coj peb tawm ntawm Hais Nkws Tos teb los. Nws pab peb. Nws hem cov Hais Nkws Tos kom lawv ntshai loj, thiab nws ua hwj huam yees ntxwv.

9 – Tswv Ntuj coj peb los txog qhov no, nws muab lub teb chaws no rau peb.

Lub teb chaws no, mis nyuj thiab zib mu ntws tsis txawj tu.

10 – Tswv Ntuj, ntawm no, yog thawj phaum txhiam xws uas koj pub rau kuv

mas kuv nqa los cev rau koj. » Koj hais li ntawd tas, mas koj yuav txo cov txhiam xwm ntawd

rau ntawm koj tus Huab Tais Tswv Ntuj xub ntiag thiab koj yuav pe koj tus Tswv Ntuj.

Yog Tswv Ntuj Lo Lus        Nws lus txiaj ntsim

Nkauj Paj Nruag                  HUAB TAIS, THOV KOJ NROG KUV NYOB                  

(NPN 91)

Txais:                 Huab Tais, thaum kuv raug kev nyuaj ntxhov, thov koj nrog kuv nyob.

1 – Tus tsa tsev rau hauv tus Huab Tais Nyob Siab, hmo ntuj, nws so hauv tus Muaj Hwj Huam qhov ntxoov, nws hais rau Tswv Ntuj hais tias,

“Koj yog kuv qhov chaw vam khom, yog kuv lub yeej ntsa zeb,

yog kuv tus Tswv Ntuj, kuv tso siab rau koj.”

2 – Qhov phem yuav tuaj tsis txog koj, xwv txheej yuav los tsis ti koj lub tsev tsam phooj

vim Huab Tais yuav txib nws cov Tshiab kom lawv zov koj txoj xub ke.

3 – Lawv yuav nqa koj rau hauv lawv txhais tes, koj txhais taw yuav tsis dawm pob zeb.

Koj yuav tsuj tau tsov ntxhuav, tsuj tau zaj, tsuj tau nab muaj taug.

4 – Huab Tais hais tias, “Vim nws npuab kuv mas kuv yuav npo nws.

Kuv yuav tsa nws siab vim nws paub kuv lub npe. Yog nws hu txog kuv mas kuv yuav teb rau nws.

Thaum nws txom nyem, kuv yuav nrog nws nyob. Kuv yuav npo nws thiab ua kom nws muaj koob meej.”

ZAJ NYEEM OB                        

LOS MAS 10 : 8 – 13

LUB NTSIAB LUS :  Txawm yog Yus Das los Hes Las, yeej tsis sib txawv.

COV LUS UAS PAJ LUG SAU TUAJ RAU COV NTSEEG NYOB LOS MAS :

8 – Kwv tij sawv daws, nyob hauv Ntawv, peb nyeem lo lus no :

Tswv Ntuj Lo Lus nyob ze koj,

Tswv Ntuj Lo Lus nyob hauv koj qhov ncauj thiab nyob hauv koj lub siab.

Tswv Ntuj Lo Lus yog txoj kev ntseeg uas peb tshaj.

9 – Yog koj di ncauj lees tias Yes Xus yog Huab Tais, thiab koj lub siab ntseeg tias Tswv Ntuj tsa Yes Xus tuag sawv rov los, mas koj yuav txais kev cawm neeg. 

10 – Lub siab ntseeg tau txais kev ncaj los ua nws tug. Lub ncauj uas lees ntseeg txog Yes Xus tau txais kev cawm. Vim Ntawv sau cia tias : ‘Tus ntseeg txog Huab Tais, nws yuav tsis poob ntsej muag.’ 

12 – Li ntawd, txhob hais tias muaj cov Yus Das  thiab muaj cov Hes Las ; lawv tsis sib txawv. 

Sawv daws muaj ib tug Huab Tais xwb, yog tus Huab Tais pub paj tshab ntau rau cov neeg hu txog nws. 

13 – Vim Ntawv yeej sau cia tias :

‘Leej twg hu txog Huab Tais lub npe, nws yuav ntsib kev cawm neeg.’

Yog Tswv Ntuj Lo Lus        Nws lus txiaj ntsim

NTAWV MOO ZOO   

LUS KAS 4 : 1 – 13

LUB NTSIAB LUS :  Yes Xus yeej dab phem ntxias.

COV LUS NYOB HAUV LUS KAS NTAWV MOO ZOO HAIS TIAS :

1 – Yes Xus rov ntawm dej Yos Las Das los, nws muaj Leej Ntuj Plig Ntshiab  nyob puv hauv nws. 

Leej Ntuj Plig coj Yes Xus mus nyob teb chaws suab puam  

2 – plaub caug hnub, dab phem ntxias Yes Xus. Tas lub caij ntawd Yes Xus tsis noj dab tsi li.

Thaum dhau plaub caug hnub lawd, nws tshaib plab.  

3 – Dab phem hais rau Yes Xus tias :

« Saib ! Koj yog Tswv Ntuj Leej Tub no, koj hais kom lub pob zeb no txia ua mov. »

4 – Yes Xus teb rau dab phem tias :

« Muaj lus sau cia tias : Neeg tsis kawg muab mov los yug txoj sia xwb. »

5 – Dab phem coj Yes Xus nce mus saum ib qho chaw siab. 

Ib sij huam, nws muab tas nrho cov ceeb tsheej nyob ntiaj teb rau Yes Xus ntsia. 

6 – Ces dab phem hais rau Yes Xus tias :

« Kuv yuav muab cov ceeb tsheej ntawd lub peev xwm thiab lub koob meej huv tib si rau koj. 

Vim kuv tau txais ua kuv tug, kuv xav muab rau leej twg kuj tau ywj kuv siab. 

7 – Li ntawd, yog koj pe kuv, mas tej ntawd yog koj tug tas huv si. »  

8 – Yes Xus hais rau dab phem tias :

« Muaj lus sau cia tias :  Koj yuav pe Huab Tais, koj tus Tswv Ntuj, koj yuav teev nws tib leeg xwb. »

9 – Dab phem tseem coj Yes Xus mus pem Yes Lus Xas Les, ces dab phem muab Yes Xus tso saum lub ruv Tuam Tsev Teev Ntuj.

Dab phem hais rau Yes Xus tias :

« Saib !  Koj yog Tswv Ntuj Leej Tub no, koj dhia saum no lawm puag hauv,       

10 – vim muaj lus sau cia tias :

Ntuj yuav txib nws cov tshiab, kom lawv zov koj.

11 – Thiab tseem sau ntxiv tias :

Lawv yuav nqa koj hauv lawv txhais tes, kom koj txhais taw txhob dawm ib lub pob zeb li. »  

12 – Tab sis Yes Xus teb rau dab phem  tias : « Muaj lus sau hais tias :

koj yuav tsis txhob ntxias Huab Tais, koj tus Tswv Ntuj.

13 – Dab phem ntxias Yes Xus kawg tswv yim, ces nws txav ntawm Yes Xus mus, tos dua lwm lub zoo sij hawm.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB          

NPES XIS LAS 27 : 4-7.

LUB NTSIAB LUS : Neeg cov lus yog tawm hauv neeg lub siab los, ces neeg cov lus thiaj ua kom yus paub neeg lub siab.

COV LUS NYOB HAUV NTAWV NPES XIS LAS.

4 – Thaum yus xuas vab tshaus los tshau, mas tshuav tej yam tsis huv nyob hauv lub vab. 

Yog yus tshau neeg cov lus, yus kuj pom muaj tej yam tsis zoo. 

5 – Tus puab lauj kaub thiaj sim nws cov lauj kaub nyob hauv qhov txos. 

Luag kuj tsom tau tib neeg lub siab nyob hauv tib neeg cov lus tham.  

6 – Ib tsob ntoo cov txiv qhia yus kom paub tias lub vaj puas yog ib lub vaj zoo los tsis zoo.

Tib neeg cov lus kuj qhia tias tib neeg lub siab puas zoo los tsis zoo. 

7 – Tus neeg twg tseem tsis tau hais lus mas koj txhob cav lus zoo txog nws,

vim lub chaw tsom tib neeg yog nws cov lus.

Yog Tswv Ntuj Lo Lus        Nws lus txiaj ntsim

Nkauj Paj Nruag              TSIM NYOG UA HUAB TAIS TSAUG              

(NPN 92)

Txais: Huab Tais, tsim nyob peb yuav ua koj tsaug mus li!

1 – Tsim nyog peb yuav ua Huab Tais tsaug! Tswv Ntuj Nyob Siab, tsim nyog yuav hu nkauj cav txog koj lub npe. Sawv ntxov tsees, tsim nyog yuav tshaj koj txoj kev hlub. Hmo ntuj, tsim nyog yuav cav txog koj lub siab pheej xeeb.

2 – Tus siab ncaj yuav hlob zoo li tsob ntoo kuj yem. Nws tshoom siab li tsob ntoo ciab nyob Lis Npas.

Lawv nrhau cag ruaj rau hauv Huab Tais tsev. lawv hlob nyob hauv peb tus Tswv Ntuj cov tshav loog.

3 – Tab yog lawv laus lawm, lawv tseem txi txiv vim muaj dej yug lawv tus txha.

Lawv cov nplooj ntsuab mos nyoos. Lawv tshaj tias Huab Tais yog tus ncaj.

Lawv hais tias: “Huab Tais yog kuv phab tsua, tsis muaj ib yam nkhaus nyob hauv nws.”

ZAJ NYEEM OB             

1 KOS LIS NTHOS 15 : 54-58.

LUB NTSIAB LUS : Peb zoo siab ua Tswv Ntuj tej hauj lwm vim peb tso siab tias peb tsis yuam kev,

vim peb yeej txoj kev tuag nyob hauv Yes Xus.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

54 – Thaum lub cev txawj lwj no plhis tau rau lub tsis txawj lwj lawm,

thaum lub cev txawj tuag no plhis tau ua lub tsis txawj tuag lawm,

mas yuav muaj raws li lo lus nyob hauv Ntawv hais tias :

“Txoj kev yeej rhuav txoj kev tuag tog rau hauv qab thu lawm. 

55 – Kev tuag, koj txoj kev yeej nyob qhov twg ? Kev tuag, koj rab hmuv nyob qhov twg ?” 

56 – Kev tuag rab hmuv yog kev txhaum. Kev txhaum lub zog yog Txoj Cai. 

57 – Peb ua Tswv Ntuj tsaug, vim nws pub kev yeej rau peb, nyob hauv peb tus Huab Tais Yes Xus Pleev. 

58 – Kuv cov kwv tij zoo nyiam, nej ua siab khov siab ruaj mog, kom nej tsuas muaj zoo zuj zus nyob hauv Huab Tais lub luag hauj lwm, vim nej paub tias nej tsis nkim zog dag ua hauj lwm nyob hauv Huab Tais.

Yog Tswv Ntuj Lo Lus        Nws lus txiaj ntsim

NTAWV MOO ZOO             

LUS KAS 6 : 39-45.

LUB NTSIAB LUS :

1 – Peb txhob txiav txim rau luag, yus xub kho yus kom zoo tas tso. (qib 39-42)

2 – Yus yuav kho yus lub siab kom zoo tuaj ces yus thiaj yuav txi txiv zoo. (qib 43-45).

COV LUS NYOB HAUV LUS KAS NTAWV MOO ZOO.

39 – Yes Xus hais dua ib zag paj lug li no :

« Ib tug  dig muag puas coj tau lwm tus dig muag kev ? Nkawd ob leeg yuav tsis ua ke mus poob qhov lod ? 

40 – Tus thwj tim tsis loj dua nws tus xib hwb. Tus thwj tim uas kawm tiav tas, nws tsuas kawg luaj nws tus xib hwb.   

41 – Vim li cas koj ntsia tus quav nplej uas nyob hauv koj tus kwv lub qhov muag ? 

Hos tus nqaj uas nyob hauv koj lub qhov muag, koj ho tsis pom ! 

42 – Ua cas koj thiaj hais rau koj tus kwv tias :

‘Kwv ntxawg, koj cia kuv rho tus quav nplej hauv koj qhov muag pov tseg,’

hos koj twb tsis pom tus nqaj hauv koj qhov muag. Neeg zoo nraum daim tawv, koj rho tus nqaj hauv koj qhov muag pov tseg tso ; koj thiaj yuav pom kev dig tus quav nplej hauv koj tus kwv lub qhov muag.

43 – « Tsis muaj ib tsob ntoo zoo nkauj yuav txi ib co txiv lwj, tsis muaj ib tsob ntoo lwj yuav txi ib co txiv zoo nkauj.  

44 – Xav paub tsob ntoo, mas yuav ntsia nws lub txiv :

luag tsis de txiv ncuav pias saum tej pos kaus ntsaj, luag tsis de txiv cawv saum ib tsob txiv pos tshauv.

45 – Tus neeg zoo, rho tej yam zoo tawm hauv nws lub siab los. Tus neeg phem rho tej yam phem tawm hauv nws lub siab los. Vim tias yam uas lub ncauj hais tawm, yog phwj hauv lub siab tuaj.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB             

1 XAS MUAS 26:2, 7-9, 12-13, 22-23

LUB NTSIAB LUS : Tus vaj Das Vis siab zoo, nws tsis tua tus xav muab nws tua.

Yog piv txwv qhia peb tias peb yuav zam rau cov yeeb ncuab.

COV LUS NYOB HAUV NTAWV XAS MUAS.

2 – Xas Ws sawv kev mus nram lub hav suab puam Xis Fes. Peb txhiab leej tub rog His Xas Lais zoo tshaj nrog nws mus caum Das Vis nyob hauv lub hav suab puam Xis Fes. 

7 – Das Vis thiab As Npis Sais nkawd maub mus soj Xas Ws pw tsaug zog nyob hauv nws lub yeej,

nws rab hmuv txhos hauv av ze ntawm nws. Cov tub rog pw ncig Xas Ws.  

8 – Ces As Npis Sais hais rau Das Vis tias :

« Hnub no, HUAB TAIS tso koj tus yeeb ncuab rau hauv koj txhais tes. 

Koj cia kuv mus muab nws rab hmuv rov hno nws rau hauv av. 

Kuv nkaug ib teg xwb ces txaus lawm, tsis tas kuv yuav nkaug ob teg ! »

9 – Tab sis Das Vis hais rau As Npis Sais tias :

« Koj tsis txhob tua nws ! Leej twg tua HUAB TAIS tus pleev, mas nws yuav nyob tsis raug txim puas tau ? »

12 – Ces Das Vis mus ze ntawm Xas Ws taw, nws muab Xas Ws rab hmuv thiab lub plhuaj taub dej. 

Ces nkawd khiav lawm.  Tsis muaj leej twg pom nkawd. Sawv daws tsaug zog tas. Tsis muaj tus hnov li. 

13 – Das Vis hla hav dej mus sab tim ub, nws mus saum lub ncov roob nrug deb ntawm Xas Ws. 

22 – Das Vis mam li hu Xas Ws nrov nrov tias :

« Tus vaj rab hmuv nyob ntawm no ! Koj tso koj ib tug tub txib hla tuaj nqa mas ! 

23 – Cia HUAB TAIS txiav txim rau nyias raws li nyias lub siab ncaj siab ncees.  

Hnub no HUAB TAIS muab koj rau hauv kuv tes, tab sis kuv tsis kam tsa tes tua koj,

HUAB TAIS tus pleev ! »

Yog Tswv Ntuj Lo Lus        Nws lus txiaj ntsim

Nkauj Paj Nruag              HUAB TAIS KHUV LEEJ NEEG            

(NPN 103-2)

Txais: Huab Tais siab zoo thiab khuv leej neeg, nws tsis npau taws sai.

1 – Kuv tus plig, koj cav lus zoo txog Huab Tais. Kuv tej siab ntsws, nej cav lus zoo txog nws lub npe ntshiab. Kuv tus plig, koj cav lus zoo txog Huab Tais. Koj txhob mom nws txheej.

Koj yuav nco ntsoov nws tej txiaj ntsim.

2 – Nws zam koj cov txhaum, nws kho koj tej mob nkeeg. Nws muab nws lub siab zoo thiab khuv leej neeg roos koj. Nws cawm koj txoj sia ntawm kev puas tsuaj.

3 – Huab Tais siab zoo, nws khuv leej neeg tas nrho. Nws hlub neeg mus li, nws tsis npau taws sai.

Nws tsis nplua peb raws li peb cov txhaum. Nws tsis pauj kev phem rau tej txhaum peb tau ua.

4 – Nws tshem peb cov txhaum mus deb peb npaum li sab hnub tuaj nyob nrug deb sab hnub poob.

Huab Tais hlub cov neeg hwm nws zoo li leej txiv hlub nws tej tub ki.

ZAJ NYEEM OB          

1 KOS LIS NTHOS 15 : 45-49.

LUB NTSIAB LUS : Peb sawv daws yug los ua ntiaj teb tug.

Tab sis peb yuav hnav tus neeg tuaj qaum ntuj tuaj.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

45 – Muaj lus sau tseg tias : “ Thawj tus neeg yog As Das. Thaum Ntuj tsim nws, ces nws yog ib tug plig ciaj sia. Hos tus As Das tshiab tom qab no, yog ib tug plig pub txoj sia. 

46 – Tab sis, tsis yog sab ntsuj plig xwb tawm los rau peb pom. Yog sab nqaij xub tawm los, ces sab ntsuj plig mam tawm los tom qab. 

47 – Thawj tus neeg uas nws tawm ntawm av los, nws yog ntiaj teb tug. Tus neeg tshiab tom qab no, tawm pem qaum ntuj los. 

48 – Tus neeg ntiaj teb zoo li cas, mas cov neeg ntiaj teb kuj zoo li ntawd tas huv tib si. 

Hos tus neeg qaum Ntuj zoo li cas, mas cov neeg qaum ntuj kuj zoo li ntawd tas huv tib si. 

49 – Peb xub  hnav tus neeg ntiaj teb tus duab, ces peb mam li tau hnav tus neeg qaum ntuj tus duab.” 

Yog Tswv Ntuj Lo Lus        Nws lus txiaj ntsim

NTAWV MOO ZOO        

LUS KAS 6 : 27-38.

LUB NTSIAB LUS : Tab yog cov neeg ua phem rau peb mas peb yuav ua zoo rau lawv.

Yog txoj kev xis Tswv Ntuj siab. Yog txoj kev hu Tswv Ntuj cov txiaj ntsim tuaj  txog peb.

COV LUS NYOB HAUV LUS KAS NTAWV MOO ZOO.

27 – « Hos kuv hais rau nej cov mloog kuv tias :

Nej yuav nyiam nej cov yeeb ncuab, nej yuav ua zoo rau cov neeg ntxub nej, 

28 – nej foom lus zoo rau cov foom phem rau nej, nej thov Ntuj rau cov neeg xyav nej lub moo. 

29 – Leej twg ib ncuav pias rau koj sab plhu, koj tig sab tod rau nws ntaus thiab. 

Leej twg chua koj lub tsho tshaj sab, mas koj txhob nrog nws txeeb koj lub tsho hnav. 

30 – Leej twg thov koj, mas koj pub rau. Leej twg txeeb tau tej yam nyob hauv koj lub cuab tam,

mas koj tsis txhob ntaim kom nws xa rov qab. 

31 – Nej xav kom luag tej ua li cas rau nej, mas nej yuav ua ib yam li ntawd rau luag tej thiab.

32 – Yog nej nyiam cov neeg nyiam nej, mas lawv yuav nco nej txiaj ntsim li cas ? 

Tab yog cov neeg txhaum, lawv kuj nyiam cov uas nyiam lawv. 

33 – Yog nej ua zoo rau cov neeg ua zoo rau nej, mas lawv yuav nco nej txiaj ntsim li cas ? 

Cov neeg txhaum kuj ua tau ib yam li ntawd thiab. 

34 – Yog nej txais nyiaj rau cov neeg uas nej paub tias nej yuav tau rov qab,

mas lawv yuav nco nej txiaj ntsim li cas ? Cov neeg txhaum kuj txais nyiaj rau cov neeg txhaum kom lawv rov tau li qub. 

35 – Hos nej, mas nej yuav nyiam nej cov yeeb ncuab, nej yuav ua qhov zoo thiab nej yuav txais nyiaj tsis tos luag them rov rau nej. Ces nej tus nqe zog yuav loj, thiab nej yuav yog Tus Nyob Siab Tshaj cov tub,

vim nws siab zoo, nws ua zoo rau cov neeg mom nws txiaj ntsim thiab rau cov neeg lim hiam.

36 – Nej yuav hlub luag tej ib yam li nej Txiv hlub neeg. 

37 – Nej tsis txhob txiav txim, Ntuj thiaj yuav tsis txiav txim rau nej.

Nej tsis txhob muab txim, Ntuj thiaj yuav tsis muab txim rau nej. 

Nej zam txhaum mog, Ntuj thiaj yuav zam rau nej. 

38 – Nej pub, Ntuj thiaj yuav pub rau nej. 

Ntuj yuav xuas ib lub tawb loj los luj, yuav muab tswm muab co kom ceev thiab ntim nco lug ces

Ntuj yuav muab hliv rau hauv nej nqaws tsho. 

Vim Ntuj yuav xuas lub tawb uas nej luj rov los luj rau nej.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB            

YES LES MIAS 17 : 5-8.

LUB NTSIAB LUS : Tus tso siab rau neeg, nws yuav tsis ntsib kev kaj siab lug.

Tus tso siab rau Tswv Ntuj, nws lub siab thiaj yuav kaj.

COV LUS NYOB HAUV NTAWV YES LES MIAS.

5 – HUAB TAIS hais li no : 

« Tus neeg uas tso siab rau lwm tus neeg mas nws txoj hmoov yuav phem. 

Nws muab lub cev nqaij los ua nws lub zog, hos nws lub siab txav mus nyob deb ntawm HUAB TAIS. 

6 – Nws zoo li ib tsob pos tuaj nyob hauv hav maj sab. Nws tsis pom txoj kev noj qab nyob zoo tuaj txog. 

Nws nyob hauv ib lub teb chaws suab puam qhuav, nyob hauv ib thaj av daw ntsev tsis muaj neeg nyob.

7 – Hos tus neeg tso siab rau HUAB TAIS thiab npuab HUAB TAIS, mas nws txoj hmoov yuav zoo. 

8 – Nws zoo li ib tsob ntoo cog ze ntug dej. Nws nrhau cag mus txog tus dej. 

Thaum txog lub caij ntuj qhua nws tsis ntshai. Nws cov nplooj ntsuab mos nyoos mus li. 

Thaum txog lub xyoo ntuj qhuav qhawv nws tsis txhawj, nws txi txiv tsis tseg. 

Yog Tswv Ntuj Lo Lus        Nws lus txiaj ntsim

Nkauj Paj Nruag              COV TAU TXOJ HMOOV ZOO             

(NPN 1)

Txais: Cov tau txoj hmoov zoo yog cov tso siab rau Tswv Ntuj.

1 – Tus tau txoj hmoov zoo yog tus tsis ua raws cov neeg phem zaj tswv yim.

Nws tsis taug cov neeg txhaum txoj kev. Nws xib rau Huab Tais txoj cai.

Nws tsis zaum ntawm cov neeg thuam Ntuj lub rooj. Nruab hnub, hmo ntuj, nws qog Huab Tais txoj cai.

2 – Nws zoo puav tam li tsob ntoo cog ze dej. Nws txi txiv raws caij, nws cov nplooj tsis ntsws.

Nws ua yam twg tau yam ntawd raws siab xav.

3 – Cov neeg phem tsis hwm Tswv Ntuj txoj cai; lawv zoo li cov npluag nplej uas cua tshuab ya rau txhua qhov. Huab Tais zov cov siab ncaj txoj kev; cov neeg lim hiam txoj kev yuav ploj.

ZAJ NYEEM OB          

1 KOS LIS NTHOS 15 : 12, 16-20.

LUB NTSIAB LUS : Peb ntseeg tias Yes Xus sawv rov qab los, peb thiaj txais txoj sia tshiab ntawm nws, thiab peb yuav sawv rov los.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

12 – Yog peb tshaj tias Leej Pleev sawv hauv cov tuag rov los lawm, vim li cas,

nyem no, muaj tej tus hauv nej hais tias tsis muaj kev sawv hauv cov tuag los ? 

16 – Yog cov  tuag tsis sawv rov los, mas Leej Pleev kuj tsis tau sawv rov los tiag. 

17 – Yog Leej Pleev tsis sawv rov los, mas peb txoj kev ntseeg yog ib txoj kev cuav, 

hos nej, los nej tseem nyob hauv nej cov txhaum. 

18 – Thiab cov uas tau mus tsaug zog nyob hauv Leej Pleev, mas lawv ploj lawm tiag. 

19 – Peb cov uas tso siab rau Leej Pleev, yog peb tsuas muaj kev cia siab nyob hauv tiam neej no xwb,

mas peb yog cov neeg txom nyem tshaj ib tsoom tib neeg huv si. 

20 – Tab sis tsis yog zoo li ntawd. Leej Pleev sawv hauv cov tuag rov los lawm tiag. 

Nyob hauv ib tsoom neeg uas mus tsaug zog lawm, mas Leej Pleev yog thawj tug uas tau sawv rov los. 

Yog Tswv Ntuj Lo Lus        Nws lus txiaj ntsim

NTAWV MOO ZOO             

LUS KAS 6 : 17, 20-26.

LUB NTSIAB LUS : Ntau zaus, yog cov neeg pluag thiab txom nyem xub ntsib Tswv Ntuj lub Ceeb Tsheej.

COV LUS NYOB HAUV LUS KAS NTAWV MOO ZOO.

17 – Yes Xus nrog cov Hauv Paus Xa Lus nqes los, nws sawv saum ib qho chaw tiaj. 

Muaj Yes Xus ib tsoom thwj tim thiab ib pab neeg coob kawg tuaj ntawm xeev Yus Das,

ntawm Yes Lus Xas Les, ntawm ntug dej ntuj Tws Los thiab Xis Doos tuaj. 

20 – Yes Xus tsa muag ntsia nws cov thwj tim, nws hais tias :

« Nej cov pluag, mas nej txoj hmoov zoo, vim Tswv Ntuj lub Ceeb Tsheej yog nej tug.

21 – Nej cov uas nyem no nej tshaib, nej txoj hmoov zoo, vim nej yuav tau noj txaus siab.

Nej cov uas nyem no nej quaj, nej txoj hmoov zoo, vim nej yuav luag.

22 – Thaum muaj neeg ntxub nej, thaum luag ntiab nej, los luag cem nej,

los xyav lus phem rau nej lub npe vim Neeg Leej Tub, mas nej txoj hmoov zoo. 

23 – Hnub ntawd, nej yuav zoo siab, nej yuav dhia hom khaj,

vim nej tau txais koob haum loj nyob saum ntuj. Txheej thaud, lawv cov yawg koob kuj tau ua li ntawd rau cov Yaj Saub.”

24 – “Hos nej cov nplua nuj, mas nej txoj hmoov phem, vim nej twb txais kev nplij nej lawm.

25 – Nej cov uas nyem no tau noj tsau, nej txoj hmoov phem, vim nej yuav tshaib.

Nej cov uas nyem no nej luag, nej txoj hmoov phem, vim nej yuav quaj thiab yuav ntsaj. 

26 – Thaum zeej tsoom cav lus zoo txog nej, mas nej txoj hmoov phem. 

Txheej thaud, lawv cov yawg koob kuj ua li ntawd rau cov yaj saub cuav. »

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB          

HIS XAIS 6 : 1-9.

LUB NTSIAB LUS : His Xais ntsib tus Tswv Ntuj muaj hwj chim. Thaum peb ua lub Txoos Txi Ntuj peb ntsib Yes Xus nqes los ua mov kom tau pab peb ntsib tus Tswv Ntuj muaj hwj chim.

COV LUS NYOB HAUV NTAWV HIS XAIS.

1 – Xyoo tus vaj Os Xias tuag, kuv pom Huab Tais zaum saum ib lub theej kiab siab siab. 

Nws tw tsho dauv mus puv nkaus lub Tuam Tsev tas huv tib si.

2 – Nyob ntawm nws txheej saud, muaj ib co Tshiab Xes Las Fis sawv ntsug. Lawv nyias muaj nyias rau txhais tis. Ob txhais thaiv ntsej muag, ob txhais vov ko taw, ob txhais cia ya.  

3 – Lawv ib leeg hu nkauj nrov nrov rau ib leeg tias :

« Tsoom tub rog tus HUAB TAIS ntshiab, ntshiab, ntshiab. Nws lub koob meej nyob puv lub ntiaj teb. »

4 – Lub suab ntawd nrov ua cov taw ncej qhov rooj ua zog koog, pa taws ncho puv lub tsev. 

5 – Kuv hais tias : »Kuv hmoov phem !  Kuv yuav tuag ! Kuv yog ib tug neeg di ncauj tsis huv.

Kuv nyob nruab nrab ib haiv neeg di ncauj tsis huv. Kuv qhov muag tau pom tus Vaj, tus HUAB TAIS kav tsoom tub rog ! »

6 – Ib tug Tshiab Xes Las Fis ya ntxiag los txog ntawm kuv, nws txhais tes tuav ib lub pob zeb kub lug uas nws xuas ib rab ciaj tais ntawm lub thaj txi Ntuj los.  

7 – Nws coj lub pob zeb los so kuv di ncauj, nws hais tias :

« Saib ! Qhov no twb chwv koj di ncauj lawm, nws tshem koj qhov yuam kev tas huv si. 

Nws them koj cov txhaum tas lawm. »

8 – Ces kuv hnov Huab Tais lub suab hais tias :

« Kuv yuav xa leej twg mus ? Leej twg yuav sawv peb cev mus ? »

Kuv teb tias :

« Kuv nyob ntawm no.  Koj xa kuv mus. »

 Huab Tais hais rau kuv tias :

9 – « Koj mus ! Koj yuav hais rau haiv neeg no tias :

Nej mloog ! Nej mloog mas ! Nej tsis to taub ! Nej ntsia ! 

Nej ntsia mas ! Nej pom kev tsis tseeb ! »

Yog Tswv Ntuj Lo Lus        Nws lus txiaj ntsim

Nkauj Paj Nruag              HU NKAUJ CAV TXOG HUAB TAIS                

(NPN 138-2)

Txais: Huab Tais, kuv yuav hu nkauj cav txog koj nyob ntawm tsoom Tshiab xub ntiag.

1 – Huab Tais, kuv muab tas kuv siab ntsws los ua koj tsaug vim koj hnov cov lus tawm ntawm kuv lub ncauj los. Kuv hu nkauj cav txog koj nyob ntawm ib tsoom tshiab xub ntiag. Kuv yuav hawm koj nyob hauv koj lub tuam tsev ntshiab.

2 – Kuv ua tsaug rau koj lub npe vim koj hlub thiab pheej xeeb. Kuv hu txog koj, koj teb kuv, koj txhab zog rau kuv.

3 – Huab Tais, tas ib tsoom vaj nyob ntiaj teb yuav ua koj tsaug. Thaum lawv hnov cov lus uas koj lub ncauj tau cog, lawv yuav cav lus zoo txog Huab Tais, lawv hais tias,

“Huab Tais lub koob meej loj tas nrho!”

4 – Huab Tais txhais tes xis cawm kuv. Koj yuav ua tas puas tsav yam rau kuv.

Koj lub siab hlub nyob mus ib txhiab ib txhis. Koj txhob tso cov hauj lwm koj txhais tes tsim pov tseg.

ZAJ NYEEM OB           

1 KOS LIS NTHOS 15 : 1-11.

LUB NTSIAB LUS : Kev ntseeg lub ntsiab yog qhov tias : Yes Xus tuag thiab Yes Xus sawv rov los.

Yog lo lus uas cov tshaj Ntuj Lus lawv yuav xub tshaj.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

1 – Kwv tij sawv daws, kuv rov qab hais kom nej nco ntsoov txog lub Moo Zoo uas kuv tau tshaj rau nej. 

Nej tau txais,  thiab nej nyob ruaj nreb hauv lub Moo Zoo ntawd. 

2 – Yog nej ntseeg raws nraim li kuv tau tshaj rau nej, mas nej yuav txais kev cawm nyob hauv lub Moo Zoo. Yog lub Moo Zoo cawm tsis tau nej, mas nej ntseeg dag xwb. 

3 – Qhov kuv tau qhia rau nej, mas yog qhov kuv xub tau txais :

yam li Yes Xus yeem tuag kom tau ntxuav peb cov txhaum pov tseg, raws li Ntawv Ntshiab xub hais. 
4 – Lawv muab nws zwm rau hauv ntxa, ces hnub peb, nws sawv rov qab los, raws li Ntawv xub hais. 

5 – Nws yees tawm los rau Pob Zeb pom tas, ces nws rov tawm tuaj rau pab kaum ob leeg pom. 

6 – Tom qab no, Yes Xus tseem yees tawm los rau ib pab kwv tij muaj tsib puas leej ib txhij pom. 

Cov ntawd, muaj qee leej twb tuag lawm, tiam sis cov coob tseem ua neej nyob txog tav no. 

7 – Tom qab no, Yes Xus tseem tawm los rau Yas Kos pom,

thiab muaj ib zaug rau tas nws cov Hauv Paus Xa Lus huv tib si pom. 

8 – Kuv yog tus puag tom tw, xws li ib tug me nyuam yug los tsis tau puv hli, tsis kav Yes Xus kuj tawm tuaj rau kuv pom thiab. 

9 – Kuv yog ib tug Hauv Paus Xa Lus me tshaj cov. Kuv tsis tsim nyog hu ua Hauv Paus Xa Lus, vim kuv tau hiam Tswv Ntuj lub Koom Txoos. 

10 – Yog Tswv Ntuj lub txiaj ntsim ua kom kuv lub siab hloov los zoo li no. Tswv Ntuj lub txiaj ntsim nyob hauv kuv, nws tsis nyob dag. Kuv tau ua hauj lwm ntau tshaj sawv daws. Tab sis tsis yog kuv ua :

yog Tswv Ntuj lub txiaj ntsim uas nrog kuv nyob, tau ua cov hauj lwm ntawd. 

11 – Txawm yog kuv los yog lawv, qhov peb tshaj tawm yog cov lus ntawd. Ces nej ntseeg. 

Yog Tswv Ntuj Lo Lus        Nws lus txiaj ntsim

NTAWV MOO ZOO         

LUS KAS 5 : 1-11.

LUB NTSIAB LUS : Cov tub tshaj Ntuj Lus yuav vam txog Yes Xus pab qhia lawv  tswv yim, ces lawv thiaj txawj hais cov lus qhib neeg lub siab. Yes Xus yog tus pab  puav neeg ib yam li thaud nws pab puav ntses.

COV LUS NYOB HAUV LUS KAS NTAWV MOO ZOO.

1 – Muaj ib zaug, thaum Yes Xus nyob ntawm ntug pas dej Nkes Nes Xas Les,

ib pab neeg coob sib txiv mloog Tswv Ntuj Lo Lus ntawm nws. 

2 – Yes Xus pom ob lub nkoj nres ntawm ntug dej. Cov  tub  puav  ntses  nqes  nkoj  tas lawm, lawv ntxuav lawv cov vas. 

3 – Yes Xus nce mus hauv ib lub nkoj, yog Xis Moos lub, nws kom Xis Moos nquam nkoj mus deb ntawm ntug dej me ntsis. Yes Xus zaum hauv nkoj qhia tsoom sid.

4 – Thaum Yes Xus hais lus tas, nws hais rau Xis Moos tias :

« Koj nquam nkoj mus lawm tom qhov dej tob, nej tso nej cov vas nqes mus puav ntses. » 

5 – Xis Moos teb tias :

« Xib Hwb, peb twb khwv ib hmos tsis tau dab tsi. 

Tab sis yog vim koj hais, mas kuv yuav pov cov vas nqes mus. » 

6 – Ces lawv pov vas. Lawv puav tau ntses ntau kawg ua lawv cov vas ntuag kiag. 

7 – Lawv co tes rau cov npawg nyob lwm lub nkoj kom tuaj pab. Cov npawg tuaj txog, sawv daws muab ntses ntim rau ob lub nkoj puv nkaus, ua nkoj yuav luag tog.

8 – Xis Moos Pob Zeb pom li ntawd, nws txhos caug ntua pe Yes Xus, nws hais tias :

« Huab Tais, koj txav mus deb kuv, vim kuv yog ib tug neeg txhaum. » 

9 – Xis Moos ntshai kawg, cov nrog Xis Moos ua ke puav leej ntshai, vim lawv puav tau ntses ntau. 

10 – Yas Kos thiab Zam, uas yog Ntxes Npes Dais ob tug tub, thiab yog Xis Moos ob tug npawg, nkawd kuj ntshai kawg. Yes Xus hais rau Xis Moos tias :

« Koj txhob ntshai, txij no mus, koj yuav puav neeg. »

11 – Ces lawv nquam nkoj los rau tim ntug. Lawv tso tas ib puas tsav yam tseg, lawv raws Yes Xus mus.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB             

Malakhi 3 1-4.

1 – “Saib maj, kuv tso kuv tus tubtxib mus npaj kev rau tom kuv hauv ntej, thiab tus Tswv uas nej nrhiav yuav los rau hauv nws lub tuam tsev tamsid. Tus tubtxib uas yuav qhia tej lus cog tseg uas nej txaus siab ntawd nws tabtom los.” Yawmsaub uas muaj hwjchim loj kawg nkaus hais li no ntag.

2 – Leejtwg yuav thev tau hnub uas nws los, thiab leejtwg yuav sawv khov kho rau thaum nws tshwm plaws los? Rau qhov nws zoo yam nkaus li cub thee uas nchuav nyiaj thiab zoo li kua tshuaj ntxhua khaubncaws.

3 – Nws yuav zaum yam li tus uas nchuav thawj tom thiab nchuav kom tau cov tseem nyiaj. Nws yuav ntxuav Levi caj ces kom dawb huv thiab muab lawv nchuav ib yam li nchuav nyiaj nchuav kub, mus txog thaum lawv coj tej uas raug cai tuaj xyeem rau Yawmsaub. 

4 – Thaum ntawd tej uas cov Yuda thiab Yeluxalees muab xyeem yuav txaus Yawmsaub lub siab ib yam li yav thaum ub thiab yam li xyoo uas dhau los.

Yog Tswv Ntuj Lo Lus        Nws lus txiaj ntsim

Nkauj Paj Nruag Tus zoo tswv zov yaj

(23)

7 – Qhov rooj, nej tshoom kom siab siab mas ! Rooj loog txheej thaud, nej tshoom kom siab !
Tus vaj nto koob meej yuav chaws los hauv nej !
8 – Tus vaj nto koob meej yog leej twg?

• Yog tus HUAB TAIS muaj zog thiab siab tawv.
• yog tus HUAB TAIS siab tawv ntaus rog.

9 – Qhov rooj, nej tshoom kom siab siab mas ! Rooj loog txheej thaud, nej nyob qhib lug tos !
Cia tus vaj nto koob meej chaws los !
10 -Tus vaj nto koob meej no yog leej twg ?
tus Vaj nto koob meej yog tus HUAB TAIS muaj hwj huam tas nrho.

ZAJ NYEEM OB

Hes Nplaws, Zaj 2 14-18

14 – Vim cov me nyuam koom ib co ntshav, ib ce nqaij, mas Yes Xus kuj nrog
lawv koom, kom nws txoj kev tuag yeej tus tuav txoj kev tuag lub hwj huam, tus
ntawd yog tus dab phem Xas Tas.
15 – Yes Xus npo cov uas mag kev tuag muab lawv ua qhev nyob hauv txoj kev
ntshai tuag tas ib sim neej.
16 – Yes Xus tsis tuaj cawm cov Tshiab. Nws tuaj cawm Has Nplas Has tsoom
xeeb ntxwv.

17 – Vim li no, nws thiaj yuav tsum yug los zoo ib yam li nws cov kwv, nws thiaj ua tau ib tug Leej Choj uas
ib txhij khuv leej neeg thiab npuab Tswv Ntuj. Nws so tsoom pej xeem cov
txhaum pov tseg.

18 – Vim nws tau raug kev sim siab, mas nws thiaj txawj pab cov raug kev sim siab.

Yog Tswv Ntuj Lo Lus        Nws lus txiaj ntsim

NTAWV MOO ZOO               

LUS KAS 4 : 20-30.

LUB NTSIAB LUS : Yes Xus cov lus xis cov neeg me tsis muab hlob. Tab sis cov tsis xav tig los yuav lub siab tshiab, mas lawv tsis xav hnov Yes Xus lub Moo Zoo.

COV LUS NYOB HAUV LUS KAS NTAWV MOO ZOO.

20 – Yes Xus rov kauv phau ntawv, nws rov muab rau tus tub txib, ces nws zaum.

Tas tsoom neeg uas nyob hauv lub tsev txoos ntsia ntsoov Yes Xus.  

21 – Ces Yes Xus hais rau lawv tias :

“Hnub no, cov lus nyob hauv zaj Ntawv no tsheej xeeb raws li nej tau hnov. »

22 – Tas cov neeg ntawd zeem tseeb tias nws hais lus zoo, lawv qhuas cov lus muaj txiaj ntsim tawm hauv nws lub ncauj los. Lawv hais tias :

« Tus ntawd, tsis yog Yos Xes tus tub    lod ? » 

23 – Ces Yes Xus hais rau lawv tias :

« Paub ntsoov, nej yuav piv lus hais txog kuv tias :

Kws kho mob, koj rov kho koj mas ! Tas txhua yam uas luag piav tias tshwm sim nyob Kas Fas Naus,

mas koj kuj ua ib yam li ntawd nyob hauv lub zos koj hlob no thiab mas ! »

24 – Yes Xus tseem hais ntxiv tias :

« Kuv hais tseeb rau nej, tsis muaj ib tug yaj saub uas luag yuav txais nws zoo hauv lub zos nws hlob.  

25 – Kuv hais tseeb rau nej : lub caij Es Lias nyob, muaj coob tus poj ntsuam nyob His Xas Lais teb. 

Thaum ntuj kaw nag tau peb xyoos thiab rau hli, tas teb chaws tshaib plab loj kawg. 

26 – Tab sis Ntuj tsis xa Es Lias mus pab cov poj ntsuam His Xas Lais ib tug li. 

Ntuj xa Es Lias mus pab ib tug poj ntsuam nyob lub zos Xas Les Tas, nyob Xis Doos teb. 

27 – Lub caij tus yaj saub Es Lis Xais nyob, muaj coob tus mob ruas nyob His Xas Lais teb,

tab sis tsis muaj ib tug mob ruas His Xas Lais rov huv, tsuas yog tus mob ruas Xis Lias hu ua Nas Maas thiaj rov huv. »

28 – Tas cov neeg hauv lub tsev txoos hnov cov lus ntawd, mas lawv npau taws kawg. 

29 – Lawv sawv tsees, lawv ntiab Yes Xus tawm sab nroog nraud. Lawv coj Yes Xus mus txog ntawm ib phab toj saum lub roob uas lawv txhim lub nroog, lawv yuav thawb Yes Xus kom poob lawm hauv lub qab toj ntxhab. 

30 – Tab sis Yes Xus hla plaws hauv nruab nrab lawv, nws taug nws kev mus lawm.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB              

NES HES MIS 8 : 1-10.

LUB NTSIAB LUS : Cov His Xas Lais rov qab los nyob Yes Lus Xas Les, lawv ua ib lub txoos teev Ntuj.

Es Nras nyeem ntawv Ntshiab thiab nthuav rau sawv daws mloog tas. Lawv ua ib roog qav.

Peb tseem ua peb cov txoos xws li tus piv txwv ntawd.

COV LUS NYOB HAUV NTAWV NES HES MIS.

1 – Tas tsoom pej xeem sawv daws tuaj sib sau nyob ntawm lub tshav ntawm lub qhov rooj dej. 

Lawv kom tus thoob xwm Es Nras nqa phau ntawv Mais Xes txoj cai uas HUAB TAIS qhia kom His Xas Lais coj. 

2 – Ces tus Leej Choj Es Nras nqa phau ntawv txoj cai tuaj tso ntawm lub Txoos hauv ntej. 

Nyob hauv lub Txoos muaj cov txiv neej, cov poj niam thiab cov me nyuam paub tab. 

Hnub ntawd yog hnub xiab ib lub xya hli. 

3 – Nyob ntawm lub tshav ncaj lub qhov rooj dej, Es Nras nyeem ntawv txij thaum nyuam qhuav kaj ntug mus txog hnub ntseg. Nws nyeem rau cov poj niam cov txiv neej thiab cov me nyuam paub tab sawv daws  mloog. Sawv daws cug pob ntseg zoo mloog txoj cai.  

4 – Tus thoob xwm ntawv Es Nras sawv nyob saum ib lub sam thiaj uas lawv txhob txwm npaj rau nws sawv. 

5 – Es Nras qhib phau ntawv, sawv daws pom nws zoo. Vim nws nyob qhov chaw siab dua sawv daws. 

Thaum nws pib qhib phau ntawv mas tsoom sid sawv tsees. 

6 – Es Nras pib cav txog tus HUAB TAIS Tswv Ntuj nyob siab. Tas sawv daws tsa tes rau saum ntuj thiab teb tias :

« Ua li ! Ua li ! »

Ces tas tsoom pej xeem pe HUAB TAIS, lawv ntsej muag khoov ti av. 

7 – Cov Les Vis piav txoj cai rau tsoom sid uas sawv ntsug mloog nyob ntawd.  

8 – Ces Es Nras nyeem Tswv Ntuj txoj cai nyob hauv ntawv. Nws txhais lub ntsiab kom sawv daws to taub zoo. 

9 – Tus Leej Choj Thoob Xwm Es Nras hais rau tsoom pej xeem tias :

« Hnub no, yog ib hnub ntshiab rau nej tus HUAB TAIS Tswv Ntuj !

Nej tsis txhob nyob tej tug mluas mlob, nej tsis txhob quaj ! »

Nws hais li no vim thaum sawv daws hnov cov lus nthuav txoj cai mas sawv daws quaj.

10 – Nws tseem hais ntxiv tias :

« Nyem no, nej mus noj nqaij noj mov, haus dej haus cawv, nej nqa ib feem mus faib rau cov tsis tau npaj dab tsi. Hnub no yog ib hnub ntshiab rau peb tus HUAB TAIS !

Nej tsis txhob tu siab ! HUAB TAIS chaw zoo siab yog nej lub loog zeb ! »

Yog Tswv Ntuj Lo Lus        Nws lus txiaj ntsim

Nkauj Paj Nruag              KOJ COV LUS YOG TXOJ SIA              

(NPN 19-2)

Txais: Huab Tais, koj cov lus yog hwj huam, yog txoj sia thiab yog ntsuj plig.

1 – Huab Tais txoj cai zoo tas nrho! Nws ntxiv zog rau tus ntsuj plig.

Huab Tais tus txhooj nyob ruaj nreb, nws ua kom tus neeg tswv yim tsawg thoob tsib tuaj.

2 – Huab Tais cov lus qhuab qhia yog lus ncaj ua kom neeg lub siab kaj.

Huab Tais lo lus qhia ntshiab si ua kom neeg pom kev.

3 – Kev hwm Huab Tais yog kev dawb huv. Kev hwm Huab Tais yuav nyob mus li.

Huab Tais txoj cai yog lus tseeb, yog cov lus txiav txim ncaj.

4 – Huab Tais yog kuv lub tsua, yog tus txhiv kuv. Thov kom cov lus tawm ntawm kuv lub ncauj

thiab lub suab seev hauv kuv nruab plawv ntxim koj lub siab.

ZAJ NYEEM OB             

1 KOS LIS NTHOS 12 : 12-14, 18-21, 26-30.

LUB NTSIAB LUS : Lub Koom Txoos yog Yes Xus lub cev hlob. Peb yog Yes Xus tej tes taw, nyias txawv nyias. Tab sis sawv daws ua ke yog Yes Xus lub cev ciaj nyob mus li nyob ntiaj teb no.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

12 – Ib yam li neeg lub cev : neeg muaj tib lub cev xwb : tab sis muaj tes, muaj taw, muaj ntau yam :

txhua yam yog lub cev, txawm tias muaj ntau ces, los yeej yog tib lub cev xwb. Nyob hauv Leej Pleev kuj zoo li ntawd. 

13 – Vim tias peb sawv daws tau txais lub Cim Ntxuav nyob hauv Leej Ntuj Plig tib leeg, thiab nyob hauv tib lub cev xwb. Tsis hais cov Yus Das los cov Hes Las, cov qhev los cov twj lij, peb sawv daws puav leej tau haus txaus siab ntawm Leej Ntuj Plig tib leeg. 

14 – Lub cev tsis muaj ib txhais ceg xwb : lub cev muaj ntau txhais.

18 – Tab sis Tswv Ntuj tso txhua yam rau hauv lub cev, kom nyias nyob nyias chaw,

raws li nws pom zoo. 

19 – Yog tas lub cev muaj ib ceg xwb, mas lub cev yog qhov twg ? 

20 – Muaj ntau ceg, tab sis yog tib lub cev xwb. 

21 – Li ntawd qhov muag hais tsis tau rau txhais tes tias :

‘Kuv tsis tas yuav siv koj !’ Lub taub hau hais tsis tau rau ob txhais taw tias :

‘Kuv tsis tas yuav siv neb !’ 

26 – Yog ib sab ceg mob, mas tas nrho tej tes taw nrog nws mob. 

Yog ib txhais tes tau koob meej, mas txhua ces hauv lub cev nrog nws zoo siab. 

27 – Ntawm nej, mas nej yog Leej Pleev lub cev, nyias muaj nyias tug nyob hauv Leej Pleev. 

28 – Nyob hauv lub Koom Txoos, Tswv Ntuj tsa tej tus ua Hauv Paus Xa Lus, tej tus ua Yaj Saub, tej tus ua Xib Hwb. Tseem muaj cov ua hwj huam yees ntxwv, cov tau lub txiaj ntsim kho mob, cov tsob hwb luag, cov tuav kev tswj fwm, thiab cov paub ntau xeem lus. 

29 – Sawv daws puas yog Hauv Paus Xa Lus ? Sawv daws puas yog Yaj Saub, los Xib Hwb ? 

Sawv daws puas ua hwj huam yees ntxwv ? 

30 – Sawv daws puas txawj kho mob kom zoo ?  Sawv daws puas paub ntau xeem lus ? 

Sawv daws puas txhais tau ntau xeem lus ?

Yog Tswv Ntuj Lo Lus        Nws lus txiaj ntsim

NTAWV MOO ZOO            

LUS KAS 1 : 1-4, 4 : 14-21.

LUB NTSIAB LUS : Lus Kas tau xub tshuaj xwm zoo nws thiaj sau nws phau ntawv Moo Zoo. Peb muab siab rau txais. Yes Xus cov lus uas Lus Kas khaws tseg los pub rau peb mloog.

COV LUS NYOB HAUV LUS KAS NTAWV MOO ZOO.

1 – Tes Os  Fis Los, tus zoo koob meej, muaj coob leej tau nqes tes sau

ib zag piav txog cov xwm uas tshwm sim nyob hauv nruab nrab peb lawm.             

2 – Lawv tau sau raws li cov tau pom xyeem ntawm qhov muag qhia rau peb. 

Cov ntawd ua Lo Lus cov tub txib txij lub hauv paus los.

3 – Kuv tau tshuaj xwm txog txhua yam meej txij thaum pib chiv lub keeb. 

Kuv thiaj txiav siab sau ib zag muaj hauv paus hauv ntsis rau koj,         

4 – kom koj paub meej tias cov lus qhia uas koj tau txais yog lus khov lus ruaj.

14 – Nws yuav ua kom koj kaj siab thiab zoo siab tas nrho. Thaum  nws yug los, coob leej kuj yuav zoo siab. 

15 – Vim nws yuav yog ib tug loj nyob ntawm Huab Tais xub ntiag. Nws yuav tsis haus kua txiv cawv, tsis haus cawv ntsim. Txij nruab thiab los, Leej Ntuj Plig Ntshiab yuav nyob puv hauv nws. 

16 – Nws yuav coj coob leej tub His Xas Lais rov los rau Huab Tais, lawv tus Tswv Ntuj. 

17 – Nws yuav taug kev mus ntawm Huab Tais hauv ntej. Nws yuav tau Es Lias lub tswv yim thiab lub hwj huam, kom nws coj  cov ua txiv lub siab rov los rau lawv cov me nyuam, coj cov neeg qig lus rov los taug cov neeg ncaj txoj kev thoob tsib. Nws yuav npaj ib haiv neeg qhib siab lug tos Huab Tais. 

18 – Ntxas Kas Lias hais rau tus Tshiab tias :

« Dab tsi yuav ua kom kuv paub tias yuav muaj tuaj li ntawd ? 

Vim kuv yog ib tug neeg laus, hos kuv poj niam kuj muaj hnub nyoog lawm. » 

19 – Tus Tshiab teb tias :

« Kuv yog Nkas Nplias. Kuv sawv nraim ntawm Tswv Ntuj xub ntiag. 

Nws xa kuv tuaj hais lus rau koj thiab fi tsab xov zoo no rau koj. 

20 – Vim koj tsis ntseeg kuv cov lus uas thaum txog sij hawm yuav tsheej xeeb,

mas koj yuav nyob ntsiag to hais tsis tau lus mus txog hnub tej xwm ntawd tshwm sim tuaj. »

21 – Tsoom pej xeem tos Ntxas Kas Lias, lawv xav tsis thoob tias vim li cas Ntxas Kas Lias thiaj nyob ntev hauv kem  ntshiab. 

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB             

HIS XAIS 62 : 1-5.

LUB NTSIAB LUS : Tswv Ntuj txawj zam rau cov neeg nyiam nws. Tswv Ntuj hlub cov ua nws haiv neeg, xws li ib tug txiv hlub nws poj niam.

COV LUS NYOB HAUV NTAWV HIS XAIS.

1 – Vim muaj Xis Yoos, kuv yuav tsis nyob twj ywm. Vim muaj Yes Lus Xas Les, kuv yuav tsis so,

mus txog lub caij nws txoj kev yeej tawm plaws xws li ib qho kaj, nws txoj kev yeej tawm plaws xws li ib teg tsau cig cig.

2 – Cov kuj cuab yuav pom koj txoj kev yeej, tas cov vaj huv si yuav pom koj lub hwj chim.

Luag yuav tis npe tshiab hu koj, yog HUAB TAIS lub ncauj yuav qhia. 

3 – Koj yuav zoo li ib lub mom teev  kub muaj hwj chim nyob hauv HUAB TAIS tes. 

Zoo li ib lub kaus mom ua vaj nyob hauv koj tus Tswv Ntuj xib teg.      

4 – Luag yuav tsis hais ntxiv txog koj tias : « Tus luag tso pov tseg. » 

Luag yuav hu koj tias : « Kuv lub chaw zoo siab. » Luag hu koj thaj av tias :  « Nkauj nyab tshiab. »

Vim koj yuav yog HUAB TAIS chaw zoo siab thiab koj thaj av yuav ua nkauj nyab tshiab.

5 – Tus tsim koj, nws yuav qaws koj ua nws txij nkawm zoo li ib tug tub hluas yuav ib tug ntxhais nkauj xwb. Koj yuav ua koj tus Tswv Ntuj zoo siab lom zem, xws li tus nkauj nyab ua nraug vauv lub chaw sov siab dhia daj dhia luag.

Yog Tswv Ntuj Lo Lus        Nws lus txiaj ntsim

Nkauj Paj Nruag              TSHAJ TSWV NTUJ COV HAUJ LWM           

(NPN 96-2)

Txais: Nej tshaj Tswv Ntuj cov hauj lwm muaj hwj chim rau ntiaj teb neeg.

1 – Nej hu ib zag nkauj tshiab rau Huab Tais.Tas ntiaj teb, nej hu nkauj rau Huab Tais mas!

Nej hu nkauj cav txog nws lub npe.

2 – Nej yuav niaj hnub tshaj nws txoj kev cawm thiab nws lub koob meej rau txhua haiv neeg paub.

Nej tshaj txog nws cov hauj lwm nto moo rau ib tsoom haiv neeg.

3 – Tsoom haiv neeg cov cuab yim, nej cav lus zoo txog Huab Tais. Nej cav txog nws lub hwj chim.

Tsim nyog nej cav txog nws lub npe muaj hwj chim.

4 – Nej teev hawm Huab Tais. Ntiaj teb neeg, nej txhos caug hawm nws. Nej hais rau cov haiv neeg hais tias, “Huab Tais ua vaj.”

Nws tswj txhua haiv neeg raws kev haum pheej.

ZAJ NYEEM OB               

1 KOS LIS NTHOS 12 : 4-11.

LUB NTSIAB LUS : Leej Tswv Yim Ntshiab pub ntau lub tswv yim sib txawv rau sawv daws. Vim peb sawv daws nyias txawv nyias, ces peb thiaj sib pab tau.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

4 – Ntuj pub ntau yam txiaj ntsim, tiam sis yog tuaj ntawm Leej Ntuj Plig tib leeg tuaj xwb. 

5 – Muaj ntau txoj kab xwm, tab sis yog tuaj ntawm tib tug Huab Tais tuaj. 

6 – Muaj ntau txoj hauj lwm, tab sis yog tib tug Tswv Ntuj ua cov hauj lwm ntawd nyob hauv txhua leej tib neeg. 

7 – Ntuj pub Leej Ntuj Plig rau peb kom peb pab tau tsoom sid. 

8 – Ib txhia, Leej Ntuj Plig pub ib zaj lus thoob tsib rau lawv. Ib txhia, Leej Ntuj Plig pub ib zag txuj ci rau lawv. 

9 – Ib txhia, Leej Ntuj Plig pub kom lawv muaj ib lub siab ntseeg. Ib txhia, Leej Ntuj Plig pub kom lawv txawj kho mob. 

10 – Ib txhia, Leej Ntuj Plig pub kom lawv txawj ua hwj huam yees ntxwv.

Ib txhia, Leej Ntuj Plig pub kom lawv txawj ua Yaj Saub.

Ib txhia, Leej Ntuj Plig pub kom lawv txawj pom tias puas yog dab.

Ib txhia, Leej Ntuj Plig pub kom lawv txawj hais ntau xeem lus.

Ib txhia, Leej Ntuj Plig pub kom lawv txawj txhais ntau xeem lus. 

11 – Tas ib puas tsav yam ntawd, yog Leej Ntuj Plig tib leeg ua, yog Leej Ntuj Plig tib leeg muab faib rau zeej tsoom sawv daws, raws li nws nyiam.

Yog Tswv Ntuj Lo Lus        Nws lus txiaj ntsim

NTAWV MOO ZOO        

ZAM 2 : 1-12.

LUB NTSIAB LUS : Thaum lawv ua tshoob nyob Kas Nas, Yes Xus ua kom dej txia ua cawv. Nyob hauv peb lub neej Yes Xus ua kom tas txhia yam hloov los ua tej yam muaj nqes, peb sim neej thiaj lom zem tuaj.

COV LUS NYOB HAUV ZAM NTAWV MOO ZOO.

1 – Peb hnub tom qab, muaj ib rooj tshoob hauv lub zos Kas Nas xeev Nkas Lis Lais. 

Yes Xus niam mus nrog lawv noj tshoob nyob ntawd. 

2 – Lawv caw Yes Xus thiab nws cov thwj tim mus noj tshoob thiab. 

3 – Lawv tsis tshuav cawv ntxiv lawm, Yes Xus niam hais rau Yes Xus tias :

« Lawv tsis muaj cawv ntxiv lawm. » 

4 – Ces Yes Xus hais rau nws niam tias :

« Niad, tsis yog wb hauj lwm. 

Kuv lub sij hawm tseem los tsis tau txog. » 

5 – Yes Xus niam hais rau cov tub ce cawv tias :

« Yes Xus kom nej ua yam twg, mas nej ua huv tib si mog. »

6 – Nyob ntawd, muaj rau lub hub zeb teem dej rau cov Yus Das siv raws li lawv tej kev cai ntxuav tes. 

Ib lub hub ntim tau peb los plaub thoob dej. 

7 – Yes Xus hais rau cov tub ce cawv tias :

« Nej hliv dej kom puv cov hub no. »

Ces lawv hliv dej puv nkaus cov hub. 

8 – Yes Xus hais rau lawv tias :

« Zaum no, nej ce cov dej no nqa mus rau txiv thiaj com. » Ces lawv ce cov dej ntawd nqa mus. 

9 – Thaum txiv thiaj com saj cov dej txia ua cawv, mas nws tsis paub cov cawv los qhov twg los. 

Tab sis cov tub ce cawv paub lawm, vim lawv yog cov ce. Txiv thiaj com hu nraug vauv los. 

10 – Nws hais rau nraug vauv tias :

« Sawv daws ce cov cawv qab los haus tso. Thaum cov neeg qaug cawv lawd, mam li ce cov qab tsis heev los haus. Hos koj, koj muab cov cawv qab cia txog tav no. »

11 – Yes Xus thawj lub cim yog zoo li ntawd. Nws ua thawj lub cim nyob Kas Nas xeev Nkas Lis Lais. 

Nws ua nws lub hwj chim tawm los rau pom, ces nws cov thwj tim ntseeg txog nws.   

12 – Ua li ntawd tas, Yes Xus nqes mus nram Kas Fas Naus. Nws niam, nws cov kwv tij thiab nws cov thwj tim  nrog nws mus. Lawv tsuas nyob ntawd ob peb hnub xwb.

Huab Tais Pleev      Lub qab ntuj neeg cav txog koj

ZAJ NYEEM IB                

HIS XAIS 40: 1-5, 9-11     

LUB NTSIAB LUS:    His Xais ceeb toom cov lus nplij His Xas Lais.

COV LUS NYOB HAUV PHAU NTAWV HIS XAIS HAIS TIAS:

1 – Nej tus Tswv Ntuj hais tias :

« Nej nplij kuv haiv neeg, nej nplij lawv mas !

2 – Nej hais lus rau hauv Yes Lus Xas Les nruab siab.  Nej hais nrov nrov rau nws tias nws lub caij ua qhev dhau lawm.  Nws them txim txhaum tas lawm.  Cov xwm uas nws txais ntawm HUAB TAIS txhais tes los them nws cov txhaum twb tshaj nws cov txhaum ob npaug lawm. »

3 – Muaj ib lub suab qw tias :

« Nej npaj ib txog kev hauv teb chaws suab puam rau Tswv Ntuj taug.  Nej ncaws ib txog kev ncaj hauv cov teb chaws quav poj rau peb tus Tswv Ntuj.

4 – Nej txhub cov hav tob kom siab, kom cov roob thiab cov hauv toj cia li qis, kom cov tiaj muaj pov toj, hloov ua hav tiaj tus yees, kom cov toj ntxhab hloov ua tshav puam.

5 – HUAB TAIS lub hwj chim yuav tawm los.  Txhua tus muaj lub cev nqaij puav leej yuav pom lub hwj chim, vim HUAB TAIS lub ncauj tau hais lus.

9 – Koj yog tus fi tsab xov zoo no mus rau Xis Yoos.  Koj nce mus saum ib lub roob siab, koj tsa suab qw nrov nrov mas !  Koj  yog tus fi tsab xov zoo mus rau Yes Lus Xas Les, koj txhob ntshai cuab suab.  Koj hais rau cov nroog Yus Das tias :

« Ntsia ntawm no saib, yog nej tus Tswv Ntuj. »

10 – Saib HUAB TAIS Tswv Ntuj nyob ntawm no.  Nws tuaj txog, nws muaj hwj huam ! Nws txhais npab ua tswv kav sawv daws.  Nej ntsia tus nqi zog nrog nws.  Cov nyiaj nws them nyob ntawm nws xub ntiag.

Yog Tswv Ntuj Lo Lus        Nws lus txiaj ntsim

Nkauj Paj Nruag                KUV TUS PLIG CAV TXOG HUAB TAIS        

(NPN 104-4)

Txais:  Kuv tus plig, koj cav lus zoo txog Huab Tais

1 – Kuv tus Huab Tais Tswv Ntuj, koj loj tas nrho. Koj hnav koob meej ci ntsa iab.

Koj hnav qhov pom kev li lub tsho tshaj sab muaj hwj chim. Koj nthuav lub ntuj zoo li ib chaws ntaub.

2 – Koj txhim koj lub tuam tsev rau saum cov dej nyob txheej ntuj saud. Koj muab tauv huab los ua koj lub tsheb. Koj mus kev saum cua ob phab tis. Koj muab cua ua koj cov tub coj xo.

Koj muab nplaim taws ua koj tub txib.

3 – Huab Tais, koj cov hauj lwm ntau tas nrho. Koj tsim tas txhua yam raws kev thoob tsib.

Koj tsim txhua yam tsiaj nyob puv ntiaj teb. Koj tsim lub hiav txwv kom muaj tsiaj loj tsiaj me coob suav tsis txheeb.

4 – Txhua leej txhua tus tos koj yuav pub txhiam xws rau lawv raws caij nyoog.

Koj pub rau lawv ces lawv cev tes txais. Koj nthuav koj txhais tes ces lawv tau txhua yam zoo.

5 – Yog koj rho txoj pa ntawm leej twg mas lawv txoj sia tu, lawv rov mus ua av luaj.

Thaum koj xa koj lub tswv yim tuaj mas lawv rov tsheej xeeb muaj txoj sia.

Koj ua kom lub ntiaj teb rov tshiab tuaj.

ZAJ NYEEM OB              

TIS TOS  2 : 11 – 14, 3 : 4 – 7

LUB NTSIAB LUS:    Vim li cas sawv daws thiaj yuav coj tus yam ntxwv zoo.                             P165

COV LUS NYOB HAUV PHAU NTAWV TIS TOS HAIS TIAS:

11 – Sawv daws yuav coj tus yam ntxwv zoo, vim Tswv Ntuj lub txiaj ntsim yog lub qhov dej uas txhawv txoj kev cawm txhua leej txhua tus.  Tswv Ntuj lub txiaj ntsim tawm los rau sawv daws pom xyeem. 

12 – Tswv Ntuj lub txiaj ntsim qhia peb kom tso kev tsis hwm Ntuj pov tseg, tso txoj kev ntshaw txog lub sim ceeb no tseg, kom tiam neej no, peb ua neej nyob hauv txoj kev cheem peb lub siab, hauv txoj kev ncaj, thiab kev hwm Ntuj. 

13 – Vim peb tos thiab peb vam ntsoov txoj kev kaj siab lug.  Peb tos kom peb tus Tswv Ntuj loj,

Yes Xus Pleev uas yog tus cawm peb lub hwj chim tawm los rau qhov muag pom xyeem. 

14 – Yes Xus Pleev, nws muab nws rau luag ntes, kom nws txhiv tau  peb ntawm txhua txoj kev phem.  Nws ntxuav ib haiv.

4 – Tab sis, hnub uas tus Tswv Ntuj cawm peb qhib nws lub siab zoo tawm los thiab nws txoj kev nyiam tsoom sid tawm los rau qhov muag pom xyeem, 

5 – mas nws tsis tshuaj tias peb puas tau ua cov dej num ncaj los tsis tau. Nws tsuas mloog nws lub siab khuv leej neeg.  Nws cawm peb nyob hauv cov dej ntxuav neeg, kom peb rov yug los tshiab, thiab rov tshiab tuaj nyob hauv Leej Ntuj Plig Ntshiab. 

6 – Tswv Ntuj tso Leej Ntuj Plig los nyob puv hauv peb ntau kawg, nyob hauv Yes Xus Pleev, tus cawm peb. 

7 – Leej Pleev lub txiaj ntsim ua kom peb ntshiab tuaj, ces peb tso siab tau tias peb yuav txais txoj sia nyob mus li los ua peb lub cuab tam.         

Yog Tswv Ntuj Lo Lus        Nws lus txiaj ntsim

NTAWV MOO ZOO      

LUS KAS 3: 15-16, 21-22

LUB NTSIAB LUS:  Zam ntxuav plig tawm tuaj.

COV LUS NYOB HAUV LUS KAS NTAWV MOO ZOO:

15 – Tsoom pej xeem vam vam tos ntsoov, sawv daws ua xyem xyav txog Zam rau nruab siab tias tej zaum Zam yog Leej Pleev. 

16 – Ces Zam hais  rau sawv daws tias :

« Ntawm kuv, mas kuv muab dej los ntxuav nej, tab sis tus muaj zog dua kuv yuav tuaj.

Kuv tsis tsim nyog daws txoj hlua khi nws nkawm khau. Tus ntawd yuav ntxuav nej nyob hauv Leej Ntuj Plig Ntshiab thiab hauv hluav taws.

21 – Thaum uas tsoom pej xeem txais kab ke ntxuav tas, thiab Yes Xus kuj txais kab ke ntxuav tas lawm, ces Yes Xus teev Ntuj. Lub ntuj qhib plho los, 

22 – ces Leej Ntuj Plig Ntshiab yees ua ib lub cev, xws li ib tug nquab, nqes los saum Yes Xus. 

Ib lub suab nrov saum ntuj tuaj tias :

« Koj yog kuv Leej Tub. Hnub no kuv xeeb koj. »

Huab Tais Pleev      Lub qab ntuj neeg cav txog koj