Catégorie

Vous trouverez ci-dessous les articles de la catégorie que vous avez sélectionné

Archives de catégorie Cheeb tsam Paris

Sib ntsib rau cov koom cuab kev ntseeg nyob rau sab Asie pem lub chaw CEF

Lub hauv paus loj SNMM tau caw txhua cov koom cuab kev ntseeg tuaj sib ntsib, tuaj sib tham thiab nyias nthuav txog  nyias lub hom phiaj yuav npaj rau yav tom ntej no, txog ntawm tej kev nyuaj uas sd ho tau ntsib, sib qhia txog tej kev zoo siab tau tshwm sim los.

Ua li no mas hnub tim 17 lub 4 hli ntuj xyoo 2024, yog ib hnub uas cov koom cuab kev ntseeg nyob rau sab Asie tau tuaj sib koom pem lub chaw « CEF » nyob 58, rue de Breteuil 75007 Paris.

Muaj cov coj ntawm cov koom cuab kev ntseeg Philippines, Bengladesh, Indes thiab 2 tug niam tsev coj cov koom cuab kev ntseeg Tamouls nyob Sri Lanka thiab Hmoob. Peb nco ntsoov txog tus txiv plig Gabriel uas coj lub koom cuab kev ntseeg Vietnam ( Nyab Laj ) vim nws mus pw tsev kho mob lawm.

Kuv zoo siab tau mus fim thiab paub txog cov coj ntawm cov koom cuab kev ntseeg nyob sab Asie. Txoj kev sib fim no yog ib lub sij hawm tuaj nthuav tawm txog txoj hauj lwm peb tau txais hauv kev ntseeg. Tseem muaj yam ua rau yus muaj kev cia siab vim hais tias txawm peb nyias muaj nyias txuj los  qhov kawg peb sawv daws yeej muaj cov kev txhawj xeeb tib yam txog ntawm peb cov pawg ntseeg.

Haiv neeg Tamouls Srilankais lawv muaj ib pab hluas muaj peev xwm thiab kub siab heev. Lawv muaj txog li 71 tus hluas los txhawb lawv pawg ntseeg.

Thaum lub caij sib tham xaus, peb sawv daws pom tau tias txoj kev txhawj xeeb yog hais txog cov hluas ; Yuav ua li cas thiaj li pab tau cov hluas paub txog lawv lub luag hauj lwm nyob hauv pawg ntseeg thiab nyob rau hauv lub Koom Txoos Ntseeg Kav Tos Liv ?

Lub hauv paus loj SNMM mam nrog xav saib yuav npaj tau li cas nrog rau cov koom cuab kev ntseeg nyob sab Asie ib lub caij sib fim koom nrog rau cov hluas.

Yuav tsum xam pom txog tus hluas txoj kev kub siab thiab pab txhawb nws, pab kom nws loj hlob ntawm  txoj kev xav hauv nws lub neej, ntawm nws txoj kev ntseeg thiab ntawm nws tus kheej.

Xav kom cov hluas los hnov, los mloog thiab los hais lus nrog rau lwm tus hluas nyob hauv lwm pawg ntseeg.

Ntawm no yog lub hom phiaj yuav los coj peb sawv daws sib sau koom ua ib lub siab, kom peb thiaj li muaj txoj kev cia siab loj zuj zus tuaj !

niam Ntsuab Xwm YAJ / Joanne YANG, coordinatrice Aumônerie des Hmong de France.

Co cov lus tim Khawv

Nyob zoo ib ntsoov neeg ntseeg teev hawm Tswv Ntuj,
Hnub tim 16 lub 12 hlis ntuj 2023, cov phooj ywg ntseeg Los Tsuas tau caw peb
tsoom ntseeg nyob Tsheeb tsam Paris thiab Aumonerie Fab Kis Teb, mus koom thaj
txi ntuj nrog cov txiv plig des Missions Etrangères de Paris (MEP) nyob Paris 6è.
Nco txog tsoom tub tshaj ntuj lus thiab cov tim khawv raug tua tuag nyob Los
Tsuas Teb vim lawv txoj kev ntseeg.
Thaum qhib lub txoos, suab paj nruag pib nrov cov leej choj hnav dawb nrog txoj
phuam liab nkag los ua ib kab sab raws tus tswm ciab. Kuv pom tias zoo nkauj
cuag li ib cov npauj npaim ya raws lub teeb yuav mus ntsauv paj. Ua cas yuav zoo
ntxim kuv siab tag npaum li, kuv yeej ntsia tsis dhua ua rau kuv hnov tias kuv ob
txhais kho taw tsis tsuj av lawm, kuv ib ce sib sib xws li kuv cia li nrog lawv ya…
Cov txiv plig faib ua 2 pab, ib pab mus zaum rau sab xis ib pab mus zaum rau sab
laug. Thaum lawv mus zaum txhij tag lawm, hov pom ib tug txiv Plig nrig ib tug pas
maj mam los zaum nrog lawv. Kuv ntsia mas zoo nkaus li kuv twb yuav paub tus
txiv plig ntawd. Thaum saib nws tseeb tseeb lawm, ua cas hov yog txiv plig Antoine
Sène() Lub thaj txi ntuj no kuj muaj ntau haiv neeg tuaj xws li, neeg Los Tsuas, Nyab Laj, Thaib, Hmoob … Lub txoos ua lus fab kis tab sis tsab ntawv, cov nkauj, cov thov ntuj ua lus Los Tsuas, lus Nyaj Laj thiab lus Thaib. Peb Hmoob kuj hu zaj nkauj “Huab Tais lub vaj txiv ntoo” ZNQ 79. thaum txais Lub Cim Yug. Ntawv Moo Zoo : “Nej tsis txhob ntshai cov neeg tua nej lub cev” (MT 10, 24-30) Txiv plig piav tsab ntawv Moo Zoo, nws kuj tuav txog txhua tus tim khawv lub npe thiab hais txog lawv txoj kev raug tsim txom, raug tua vim lawv txoj kev ntseeg. Thaum nws tuav txog THOJ Xyooj Paj Lug lub npe, nws kuj tsa muag ntsia peb cov Hmoob thiab kom peb zam txim vim nws hais tau tsis meej. Xyooj Paj Lug yog tib tug xib hwb pab cov txiv plig mus kho mob thiab tshaj Tswv Ntuj lub Moo Zoo rau hmoob nyob toj siab. Muaj ib zaug thaum Txiv Plig Txhiaj Tshaj thiab Xyooj nkawv rov qab pem toj siab los tsev cov neeg phem ntes tau nkawv, lawv kom Xyooj khiav tab sis nws xum nyob nrog Txiv Plig Txhiaj Tshaj. Cov neeg phem thiaj li muab nkawv tua ua ke pov rau hauv ib tug kwj deg. Xyooj tau tas sim neej raws li Zam ntawv Moo Zoo (Zam 15:13) hais tias: « Tsis muaj leej twg muaj txoj kev nyiam loj dua tus uas siv nws txoj sia rau nws cov phooj ywg » Zoo li kuv twb pom 17 leej tim khawv zem zuag nyob nrog peb thiab xav tias txiv plig Txhiaj Tshaj thiab Xyooj Paj Lug nkawv yuav pom peb Hmoob tuaj koom lub thaj txi ntuj no. Txhua txhia yam no ua rau kuv caj pas ti ti, kua muag tshuav poob nco txog lub sij hawm lawv raug tsim txom…. Kuv zoo siab tias peb Hmoob kuj tuaj koom lub txoos no thiab peb hnav peb cov tsoos hmoob. Yog tias peb tuaj coob zog mas haj yam yuav zoo tshaj. Thaum teev ntuj tag, peb sawv daws kuj npaj tau ib pluag mov noj ua ke, sib fim, ua kev zoo siab nrog tsoom leej choj, leej phauj thiab cov phooj ywg tib si. Kuv rov ntsib Antoine Sène() uas yog ib tug txiv plig Oblat, neeg los tsuas. Nws lub
npe hmoob hu ua Txiv plig Vam Tuam, nws txawj hais lus hmoob vim nws tau nrog
Hmoob nyob Guyane thiab nyob Thaib Teb. Lub caij nyoog twb dhau los lawm ze
30 lub xyoo no mam rov sib ntsib hnub no. Lub sij hawm thaum peb sib ncaim
ntawd Antoine Sène twb tsis tau txais Lub Cim tiag Tes. Wb rov tham txog thaum
peb mus kawm kev cai ntuj nyob Bagnères-de-Bigorre thiab peb taug kev mus
Lourdes…
Kuv kuj rov ntsib nws tus muam, yog ib tug phooj ywg zoo, wb tau rov nco txog
thaum peb coj cov tub ntxhais hluas hmoob/los tsuas mus ua si thaum lub caij
sov…..
Tsoom ntseeg, txhua xyoo thaum lub 12 hlis ntuj yeej muaj lub thaj txi ntuj rau
cov Leej Ntshiab nrog cov txiv MEP, peb sawv daws hov tuaj koom thov ntuj rau
lawv thiab.
Rau cov phooj ywg tau tuaj koom lub txoos teev ntuj hmo no, tab txawm kuv coj
tsis tau nej hu zaj nkauj “Huab Tais lub vaj txiv ntoo” zoo raws li siab xav los thov
txim nawb (yog thawj zaug peb hu nrog paj nruag) thiab txhua txhia yam xws li
hais dhau los saum no ua rau kuv lub siab npau npog twb ua yuav luag tsis taus
pa!
Nyob zoo xyoo tshiab thov kom Huab Tais Ntuj pov hwm peb sawv daws.
Co, Tsev Hmoob Catholique Cheeb Tsam Paris

Mus ntsib Mim Yaj

Hnub tim 9 lub 9 hli ntuj 2023 yog ib hnub zoo tshav ntuj nrig pub rau 2 tug phooj ywg rov los sib ntsib. Tau ze 50 xyoo lawm, Mim Yaj thiab Zuag Vaj mam li rov los sib puag, lub suab luag thawb nkawv ob tug rov mus nyob lub caij puag thaum ub tim teb chaws Nplog. Lub kua muag poob vim muaj kev zoo siab nco txog lub neej ua ib tug ntxhais hmoob nyob pem toj siab tau los paub txog Tswv Ntuj lub moo zoo.

Yeeb vim muaj txiv plig Nyiaj Pov tuaj nrog Hmoob nyob pem roob lub sij hawm 1950 ntawd. Txiv plig Nyiaj Pov tuaj kawm lus Hmoob, tsim tus ntawv Hmoob,  nws mam li tshaj Ntuj lus zuj zus rau cov Hmoob.

Mim Yaj thiab Zuag Vaj nkawv yog ob tug ntxhais Hmoob uas lawv niam lawv txiv tau lawb dab los ua neeg ntseeg Ntuj. Muaj cov txiv plig OBLATS tuaj nrog hmoob nyob thiaj li txhawb tau coob leej ntau tus ntawm cov tub ntxhais hluas Hmoob los paub ntaub ntawv Hmoob thiab kawm ntawv Fab Kis thiab ntawv Nplog.

Zuag Vaj yog ib tug ntxhais Hmoob tau mus kawm ntawv nyob ntawm cov leej phauj Kas Nas Das thiab Hmoob, tom qab lawm yog ntawm cov leej phauj Is Tas Lis. Thaum nws mus kawm ntawv nws muaj li 9 lub xyoo. Txoj kev kawm ntawv tam li lub teeb ci pab yus nrhiav tau yus txoj hauv kev. Zuag Vaj los ua ib tug niam tsev hmoob tiam sis nyob hauv nws lub neej nws txoj kev kawm ntawv thiab nws txoj kev ntseeg kho thiab rub nws lub siab los ua Tswv Ntuj ib tug ntxhais txib. Txoj kev kawm nws tau txais los, tsis los ua ib txoj kev muab hlob rau nws. Nws lub neej nws yeej muaj lub siab mus txhais lus pab txhua leej txhua tus thiab nws txoj kev ntseeg pab nws tuav nws txoj hmoov los ua Tswv Ntuj ib tug ntxhais txib txog niaj hnub no.

Xyoo 1962, txiv plig Nyiaj Pov xa Mim Yaj thiab Maiv Yaj uas yog 2 tug ntxhais Hmoob pem toj siab tuaj kawm ntawv tim Fab Kis Teb. Nkawv tau ncaim niam ncaim txiv tuaj nrog cov leej phauj nyob tom Saint Gildas-des-Bois, ze Nantes. Ob tug yeej pib kawm Collège los mus. Mim Yaj kawm ntawv hauv lub tsev kawm ntawv uas yog ib lub « juvénat » txais cov ntxhais uas yuav npaj siab los mus ua leej phauj.

Maiv Yaj nws mus kawm tau ib daim ntawv pov thawj (certificat) qhia txog txhua yam uas ib tug zoo niam tsev yuav tsum paub txog. 

Mim Yaj thiaj yog peb Hmoob thawj tug ntxhais kawm tau daim Baccalauréat rau lub xyoo 1969. Thaum nws paub tias nws twv tau lawm, ces nkawd thiaj li rov los tsev.

Mim Yaj rov los nyob ntsiag to yam tsis muaj dab tsi li. Nws rov los mus nrog niam nrog txiv ua liaj ua teb, pub qaib pub npua, rau thaum lub caij so tsis ua hauj lwm. Thaum ua hauj lwm, nws kuj tau mus nrog TP Nyiaj Pov ua hauj lwm nyob Vees Cas.

Nws txoj kev kawm ntaub kawm ntawv yog txoj kev thoob tsib qhib nws txoj kev xav thiab nws lub siab los mus pab txiv plig Nyiaj Pov txhais tej zaj hauv phau Ntawv Ntshiab thiab ntaus ntawv. Tom qab no, nws los pab kho thiab ntaus cov ntawv qub lus nyob hauv phau Ntawv Ntshiab 2002. Nws tau pab txiv plig Nyiaj Pov kho zaj « Peb Txiv » thiab zaj « koj nyob kaj lug Mab Liab ». Tsaib no los txog xyoo no, nws nrog kho txog cov zaj nyeem rau hnub Chiv thiab cov hnub nyoog tseem ceeb.

Mim Yaj yog ib tug niam tsev mus ua lub neej hmoob ntsiag to nyob tim As Me Kas. Nws kub siab thiab txhawj xeeb txog txhua yam hauj lwm ntawm kev ntseeg.

Hnub no yog ib hnub zoo lub Ntuj pub 2 tug phooj ywg sib ncaim tim Nplog Teb thaum me nyuam ntxhais rov los sib ntsib ntawm Fab Kis Teb no. Txoj kev phooj ywg yog txoj kev sib hlub sib tshua, nws yeej tsis ploj vim tias nyob hauv nkawd lub siab nkawd paub ntsoov tias nkawd los ua Tswv Ntuj ib tug zoo ntxhais txib, txo lub hwj chim.

Ua tsaug rau Tswv Ntuj, koj hlub txog peb cov hmoob nyob saum roob. Ua tsaug vim koj lub yeej koob yeej huam ua kom peb hmoob muaj txoj kev kawm thiaj li yuav los rub thiab txhawb tau cov tseem tsis tau paub txog Tswv Ntuj.

Ua tsaug rau Mim Yaj, koj ua tau ib tug zoo qauv rau peb cov poj niam hmoob kom peb nco ntsoov raws txoj kev tsis muab hlob peb thiaj li pom qhov tseeb nyob hauv peb txoj kev ntseeg thiab hauv peb lub neej.

Niam Ntsuab Xwm Yaj

Hnub tim 7 lub 6 hli 2023 : kev kawm txog lub luag hauj lwm saib xyuas thiab pab thaum npaj lub ntees nyob  ntawm lub chaw uas cov txiv Tswv qhia tuaj sib sau (CEF) thiab npaj los ntawm lub SNMM

Txhua cov tuav hauj lwm saib xyuas txog ib pab pawg neeg thiab cov khiav hauj lwm txog cov kab kev xa plig yeej tos ntsoov lub sij hawm muaj kev kawm no. Li no, hnub ntawd muaj 4 tug tib neeg uas tuav cov hauj lwm txog npaj ib lub ntees, lawv tau los hais lus ua tim khawv xws li hauv ib pawg ntseeg los sis tim hôpital.

Tsis tas li, muaj ib tug niam tsev Linda Vignac, uas yog ib tug kws coj qhia paub txoj tib neeg tej kab li kev cai ntawm txoj kev tuag.

Rau peb cov hmoob thiab rau lwm haiv neeg, txoj kev kawm rau hnub ntawd nws pab tau yus qhib thiab nthuav yus txoj kev xav kom deb hais txog txoj kev tuag thiab tej kev cai los nrog rau txoj kev ntseeg  kav tos liv.

Thov caw nej sawv daws los qhib qhov lien nram qab no mus nyeem cov lus tim khawv thiab los mus hnov txog  tus niam tsev Linda Vignac cov lus qhuab qhia rau peb.

niam Ntsuab Xwm Yaj / Joanne Yang