Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB                            

1 VAJ 19 : 1-8

LUB NTSIAB LUS : Peb taug peb txoj kev hla lub ntiaj teb no, peb yuav vam txog Tswv Ntuj cov dej tshuaj ntxiv zog rau peb, peb thiaj yuav txog lub roob uas Tswv Ntuj txais neeg.

COV LUS NYOB HAUV NTAWV VAJ PHAU IB:

1 – As Kas qhia rau nws poj niam Zes Xas Npes txog tas puas tsav yam uas Es Lias tau ua.

Nws qhia tias Es Lias tau xuas ntaj tua cov yaj saub cuav tas tib si.  

2 – Ces Zes Xas Npes tso ib tug neeg xa xov mus rau Es Lias tias :

« Yog tag kis tav li lub caij no kuv tseem tsis tau ua kom koj raug tua li lawv,

mas tseev kom cov dab tso tas ib puas tsav yam xwv txheej txom nyem los raug kuv ! »

3 – Ces Es Lias tau ntshai. Nws thiaj khiav mus kom tau cawm nws txoj sia. 

Thaum nws mus txog Npes Xas Npes nyob Yus Das teb, nws tso nws tus tub txib nyob ntawd. 

4 – Nws mus ib hnub ke nyob hauv teb chaws suab puam ntxiv. Nws thiaj -mus -so hauv ib tsob qab ntoo. Nws xav tuag, nws hais tias :

« HUAB TAIS, kuv txom nyem txaus lawm !          

Thov koj thau kuv txoj sia rov qab mas !

Vim kuv kuj tsis zoo dua kuv cov yawg koob ! »

5 – Es Lias cia li tso cev pw pem teb ces nws tsaug zog. 

Tab sis ib tug Tshiab los tsa nws thiab -hais rau nws tias :

« Sawv los noj mov. » 

6 – Es Lias rua muag ntsia, nws pom ib lub ncuav mov nyob saum cov pob zeb thiab pom ib plhuaj taub dej. Nws noj lub ncuav mov thiab haus dej tas ces nws rov qab pw dua. 

7 – Tab sis HUAB TAIS tus Tshiab rov qab los -tsa nws tias :

« Sawv los noj mov !

Koj tseem tshuav ib ntus kev deb kawg. »

8 – Es Lias thiaj sawv tsees los noj mov thiab haus dej tas ces nws rov muaj zog tuaj. 

Nws thiaj mus kev plaub caug hnub thiab plaub caug hmo, ces nws mus txog Tswv Ntuj lub roob Hos Les.

Yog Tswv Ntuj Lo Lus        Nws lus txiaj ntsim

Nkauj Paj Nruag              SAJ HUAB TAIS LUB SIAB ZOO                      

(NPN 34-1)

Txais: Nej saj ces nej yuav pom Huab Tais lub siab zoo.

1 – Kuv cav lus zoo txog Huab Tais txhua niaj txhua hnub. Kuv lub ncauj yuav cav lus zoo txog nws.

Kuv tus ntsuj plig yuav muaj ntsej muag nyob hauv Huab Tais. Cov neeg me hnov kuv cov lus, lawv yuav zoo siab.

2 – Nej nrog kuv cav txog Huab Tais, peb ua ke tshaj nws lub npe. Kuv nrhiav Huab Tais, nws teb kuv.

Nws pab kuv dim ntawm txhua yam uas kuv ntshai.

3 – Cov neeg nrhiav Huab Tais, lawv yuav muaj ntsej muag luag ntxhi nyob hauv kev hom khaj.

lawv yuav tsis poob ntsej muag. Thaum cov txom nyem hu txog Huab Tais, nws mloog lawv.

Nws cawm lawv ntawm kev txhawj xeeb.

4 – Huab Tais tus Tshiab tsa tsev tsam phooj ncig cov neeg hwm Huab Tais, nws npo lawv.

Nej ntsia thiab nej saj saib Huab Tais lub siab zoo npaum li cas. Tus tau txoj hmoov zoo yog tus tuaj nkaum nyob hauv Huab Tais.

ZAJ NYEEM OB              

ES FES XOS  4 : 30 – 32,  5 : 1 – 2

LUB NTSIAB LUS : Thaum peb coj tus yam ntxwv tsis zoo mas peb ua kom Leej Tswv Yim tu siab tuaj. Peb yuav coj tus yam ntxwv phim Tswv Ntuj cov me nyuam.

COV LUS PAJ LUG SAU TUAJ RAU COV NTSEEG NYOB ES FES XOS:

30 – Nej txhob ua kom Tswv Ntuj Leej Ntuj Plig Ntshiab tu siab :

vim nws muab nws lub thwj los ntaus cim rau nej, nws hom nej cia hnub uas Ntuj txhiv neeg. 

31 – Tej kev hais lus iab siab, kev tsiv tsaim, kev npau taws, kev nthe, kev hais tub qaug :

mas nej yuav muab rho pov tseg tas huv tib si, nej yuav dawj tas puas tsav yam nkhaus pov tseg. 

32 – Nej sawv daws yuav rov sib ua zoo, sib hlub, nej yuav ib leeg zam rau ib leeg,

ib yam li Tswv Ntuj zam rau nej nyob hauv Leej Pleev. 

1 – Nej yuav yoog raws li Huab Tais, xws li cov me nyuam zoo nyiam. 

2 – Nej yuav taug txoj kev nyiam, raws li Leej Pleev tus lwj lwm, uas nws nyiam peb,

nws siv nws txoj sia los pab peb ; nws rov muab nws cev xws li ib tug tsiaj hlawv txi Ntuj tsw qab mus rau Tswv Ntuj. 

Yog Tswv Ntuj Lo Lus        Nws lus txiaj ntsim

NTAWV MOO ZOO                     

6 : 41-51

LUB NTSIAB LUS : Kev ntseeg txog Yes Xus yog cov mov ntxiv zog rau peb lub siab. Tab sis yog thaum cov neeg nrhiav Yes Xus tiag, lawv thiaj hnov Yes Xus cov lus ntxiv zog rau lawv.

COV LUS NYOB HAUV ZAM NTAWV MOO ZOO.

41 – Cov Yus Das yws yws txog Yes Xus, vim nws hais tias :

« Kuv yog cov mov nqes saum ntuj los. » 

42 – Lawv tseem hais tias :

« Nws tsis yog Yes Xus, Yos Xes tus tub lod ? 

Peb tsis paub nws niam nws txiv lod ? 

Ua cas zaum no nws hais tias : “Kuv nqes saum ntuj los ? » 

43 – Yes Xus teb rau lawv tias : « Nej txhob ua ke yws yws. 

44 – Tsis muaj leej twg tuaj cuag kuv tau, yog Leej Txiv uas xa kuv tuaj tsis rub nws los. 

Hos kuv, mas Hnub Kawg, kuv yuav tsa nws sawv rov qab los.  

45 – Cov Yaj Saub Phau Ntawv sau hais tias: 

« Tswv Ntuj yuav qhia sawv daws huv tib si. » Tus twg hnov Leej Txiv lub suab thiab txais nws lo lus qhia,

mas tus ntawd tuaj cuag kuv. 

46 – Tsis -muaj leej twg tau pom Leej Txiv. Tsuas yog tus tuaj ntawm Tswv Ntuj tuaj thiaj tau pom Leej Txiv. 

47 – Kuv hais qhov muaj tseeb tiag rau nej :

Tus ntseeg, nws muaj txoj sia nyob mus li.

48 – « Kuv yog cov mov muaj txoj sia.

49 – Nej cov yawg koob tau noj cov mov mas nas hauv teb chaws suab puam,

tab sis lawv tuag tas lawm. 

50 – Cov mov nqes saum ntuj los yog zoo li no :

tus noj cov mov no, nws tsis tuag. 

51 – Kuv yog cov mov muaj txoj sia nqes saum ntuj los. Leej twg noj cov mov no,

nws yuav ciaj nyob mus li. Cov mov uas kuv yuav muab pub rau lub qab ntuj neeg noj kom lawv muaj txoj sia, yog kuv lub cev nqaij. »

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB                  

KEV TSIV 16 : 2-4, 12-15.

LUB NTSIAB LUS : Cov His Xais Lais tsis tso siab rau Tswv Ntuj. Tswv Ntuj ua siab ntev rau lawv, nws ua hwj huam yees ntxwv pab lawv ntau zaus.

COV LUS NYOB HAUV NTAWV KEV TSIV :

2 – Tas tsoom tub ki His Xas Lais cem cem yws yws rau Mais Xes thiab As Loos nkawd nyob hauv teb chaws suab puam. 

3 – Cov His Xas Lais hais rau nkawd tias : 

« Kheev lam HUAB TAIS txhais tes tua kom peb tuag tas nyob Hais Nkws Tos teb,

thaum peb zaum ncig tej niag lauj kaub nqaij thiab peb muaj mov noj tsau plab npo mas ! 

Peb paub tseeb tias neb coj peb los nyob hauv lub hav suab puam no kom

peb sawv daws tuag tshaib tas xwb ! » 

4 – Ces HUAB TAIS hais rau Mais Xes tias : 

« Kuv yuav ua kom mov poob saum txheej ntuj saud los rau nej noj. 

Cov neeg yuav niaj tag kis tawm mus khaws kom txaus rau lawv noj hnub ntawd xwb,

kuv xav sim lawv, -kuv thiaj paub tias lawv puas mloog kuv txoj cai los tsis mloog.            

12 – « Kuv tau hnov cov His Xas Lais tej lus yws lus cem lawm. -Koj hais cov lus no rau lawv : 

Thaum yuav tsaus ntuj, nej yuav tau nqaij noj, thaum kaj ntug, nej yuav tau mov noj kom tsau plab. 

Ces nej yuav paub tias kuv yog HUAB TAIS nej tus Tswv Ntuj tiag. » 

13 – Thaum tsaus ntuj, -muaj ib co yij ya tuaj tsaws puv thaj chaw lawv nyob,

hos thaum sawv ntxov,  muaj ib txheej lwg dawb paug puv ib ncig thaj tsam lawv nyob. 

14 – Thaum cov lwg ntawd qhuav tas, ces txawm pom ib co hmoov mos mos,

ua tsig daws, zoo li ib co te, nyob saum npoo av suab puam. 

15 – Thaum cov His Xas Lais pom li ntawd, lawv sib nug zom zaws tias : 

« Cov ntawd yog dab tsi ? » Vim lawv yeej tsis paub tias yog dab tsi tiag. –Mais Xes hais rau lawv tias : 

« Cov ntawd, yog cov mov uas HUAB TAIS muab pub rau nej noj. 

Yog Tswv Ntuj Lo Lus        Nws lus txiaj ntsim

Nkauj Paj Nruag              COV MOV POOB SAUM NTUJ LOS                

(NPN 78-1)

Txais: Huab Tais tso mov poob saum ntuj los yug lawv.

1 – Tej yam peb hnov thiab peb paub, yog tej uas peb phaj txiv thiab phaj yawg tau qhia.

Peb yuav tsis zais rau peb cov xeeb ntxwv. Peb yuav qhia Tswv Ntuj lub hwj huam

thiab nws cov hauj lwm muaj hwj chim rau tsoom tub ki tom ntej paub.

2 – Nws txib cov huab nyob txheej saud, nws qhib rooj ntug. Nws ua kom cov mov Mas Nas poob li dej nag los yug lawv txoj sia.

3 – Neeg tau noj Ntuj tsoom Tshiab cov mov. Huab Tais xa txhiam laj txhiam xws rau lawv noj seem noj so.

Huab Tais coj lawv los txog nws thaj chaw ntshiab, txog lub roob uas nws txhais tes xis txeeb los ua nws tug.

ZAJ NYEEM OB               

ES FES XOS  4: 17, 20-24

LUB NTSIAB LUS : Cov His Xas Lais tsis tso siab rau Tswv Ntuj. Lawv cem cem yws yws txog Tswv Ntuj. Tab sis Tswv Ntuj ua siab ntev hlub lawv mus li.

COV LUS PAJ LUG SAU TUAJ RAU COV NTSEEG NYOB ES FES XOS:

17 – Kuv xav hais rau nej, kuv xav taij nej nyob hauv Huab Tais, kom nej txhob coj ib tug yam ntxwv xws li cov neeg teev dab. Cov teev dab, lawv nyob hauv zaj tswv yim tsis muaj qab hau. 

20 – Nej, mas nej tsis tau kawm tias Yes Xus zoo li ntawd. 

21 – Nej tau txais ib txoj kev, thiab ib co lus qhia raws nraim li qhov tseeb nyob hauv Yes Xus.  

22 – Yam li, nej yuav tso nej tus yam ntxwv thaud tseg, nej yuav hle nej tus qub neeg uas lwj zuj zus pov tseg, vim tus qub neeg ntshaw ntau yam tsis muaj nqis. 

23 – Nej tso nej lub siab qub pov tseg, -nej cia zaj tswv yim tshiab los nyob hauv nruab siab. 

24 – Nej yuav hnav tus Neeg Tshiab : Ntuj tsim tus Neeg Tshiab ntawd raws li Huab Tais tus duab.

Ntuj tsim nws nyob hauv txoj kev ncaj, kev ntshiab, thiab kev tseeb. 

Yog Tswv Ntuj Lo Lus        Nws lus txiaj ntsim

NTAWV MOO ZOO                     

ZAM 6 : 24-35

LUB NTSIAB LUS : Yes Xus yog cov mov nqes saum ntuj los. Peb yuav noj Yes -Xus, noj Yes Xus cov lus, noj Yes Xus tus piv txwv. Cov tsis kam txais Yes Xus hauv nruab siab mas lawv tsis muaj Ntuj txoj sia.

COV LUS NYOB HAUV ZAM NTAWV MOO ZOO:

24 – Tab sis tsoom neeg pom tias Yes Xus tsis nyob ntawd lawm, nws cov thwj tim kuj tsis nyob lawm thiab, ces lawv nce mus hauv cov nkoj ntawd, lawv mus nrhiav Yes Xus tim Kas Fas Naus. 

25 – Lawv tuaj nrhiav tau Yes Xus rau sab ntug dej tid, lawv hais rau nws tias :

« Las Npis, thaum twg koj tuaj ntawm no lawm ? »

26 – Yes Xus teb rau lawv tias :

« Kuv hais qhov tseeb tiag rau nej :

Nej nrhiav kuv, tsis yog vim nej tau pom ib co cim, yog vim nej tau noj cov ncuav mov tsau nej plab. 

27 – Nej txhob ua hauj lwm nrhiav cov txhiam xws txawj ploj. Nej ua hauj lwm nrhiav cov txhiam xws pub txoj sia nyob mus li. Cov txhiam xws ntawd yog cov uas Neeg Leej Tub yuav pub rau nej. Vim nws yog tus uas Leej Txiv Tswv Ntuj ntaus thwj rau. » 

28 – Lawv hais rau Yes Xus tias :

« Peb yuav ua dab tsi, peb thiaj ua tau Tswv Ntuj cov hauj lwm ? » 

29 – Yes Xus teb rau lawv hais tias : « Tswv Ntuj txoj hauj lwm yog zoo li no : 

Kom nej ntseeg txog tus nws xa tuaj. » 

30 – Lawv hais rau Yes Xus tias :

« Koj yuav ua lub cim dab tsi rau peb pom, kom peb ntseeg koj ? 

Koj ua hauj lwm dab tsi ? 

31 – Peb cov yawg koob noj cov mov mas nas nyob teb chaws suab puam,

raws li cov lus sau cia hais tias : 

« Nws pub cov mov tuaj saum ntuj tuaj rau lawv noj. » 

32 – Yes Xus thiaj hais rau lawv tias :

« Kuv hais qhov tseeb tiag rau nej :

Tsis yog Mais Xes pub cov mov tuaj saum ntuj tuaj rau nej, yog kuv Txiv pub rau nej. 

Cov mov tuaj saum ntuj tuaj yog tseem mov. 

33 – Vim Tswv Ntuj cov mov -yog cov mov nqes saum ntuj los, yog cov mov pub txoj sia rau lub qab ntuj neeg. » 

34 – Lawv thiaj hais rau Yes Xus tias :

« Huab Tais, thov koj pub cov mov ntawd rau peb noj mus li. »

35 – Yes Xus hais rau lawv tias :

« Kuv yog cov mov muaj txoj sia. 

Tus tuaj cuag kuv nws yuav tsis tshaib, tus ntseeg txog kuv nws yuav tsis nqhis ib zaug li. »

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ YEEM IB                    

2 VAJ 4 : 42-44

LUB NTSIAB LUS : Tswv Ntuj pab tus Yaj Saub Es Lis Xais ua kom mov ntau tuaj. Yog vim Tswv Ntuj xav pab ib co neeg pluag tshaib plab.

COV LUS NYOB HAUV NTAWV VAJ OB :

42 – Muaj ib tug neeg tuaj ntawm Npas Sas Lis Sas tuaj. Nws nqa ib co mov nplej tshiab tuaj rau tus Yaj Saub Es Lis Xais, yam li nws nqa nees nkaum lub ncuav mov thiab tej tes nplej. 

Es Lis Xais hais rau nws tus tub txib tias :

« Koj muab cov mov no pub rau cov neeg nyob -ntawm no noj. »

43 – Tab sis tus tub txib teb tias :

« Kuv yuav ua zoo li cas faib cov mov no rau ib puas leej neeg noj ? »

Es Lis Xais hais tias :

« Koj cev rau tsoom neeg ntawd noj mas ! Vim HUAB TAIS tau hais tias sawv daws yuav noj

thiab tseem yuav tshuav ib co mov seem. » 

44 – Tus tub txib cev rau sawv daws noj tsau tas tseem tshuav ib co mov seem,

raws li HUAB TAIS hais.

Yog Tswv Ntuj Lo Lus        Nws lus txiaj ntsim

Nkauj Paj Nruag :              HUAB TAIS TSIM TXHIAM XWS                    

(NPN 145-4)

Txais: Huab Tais tsim txhiam laj txhiam xws los yug peb, nws mloog txhua yam peb thov.

1 – Huab Tais, koj cov hauj lwm yuav cav txog koj. Cov ntseeg txog koj yuav cav lus zoo txog koj.

Lawv yuav cav txog koj lub Ceeb Tsheej nto koob meej. Lawv yuav tshaj txog koj cov hauj lwm muaj hwj xyeej.

2 – Sawv daws ntsia ntsoov koj, txhua tus vam txog koj. Koj pub txhiam laj txhiam xws rau lawv raws caij raws nyoog. Koj nthuav koj txhais tes, koj pub kom txhua tus muaj txoj sia tau noj tsau npo.

3 – Huab Tais ua yam twg, nws ua ncaj. Nws lim xeeb ua txhua txoj hauj lwm raws txoj kev ntshiab.

Huab Tais nyob ze cov neeg tuav txog nws lub npe, Nws nyob ze cov neeg uas muab tas nrho lawv lub siab lub ntsws hu txog nws.

ZAJ NYEEM OB               

ES FES XOS 4 : 1-6

LUB NTSIAB LUS : Peb yuav sib koom siab, sib txhawb, sib nqa, vim peb muaj tib tug Huab Tais.

COV LUS PAJ LUG SAU TUAJ RAU COV NTSEEG NYOB ES FES XOS :

1 – Kuv yog tus raug txim hauv Huab Tais, kuv thov nej, kom nej coj ib lub neej phim txoj kev uas Ntuj hu nej los taug. 

2 – Nej yuav ua neeg tsis muab hlob ; nej yuav ua neeg siab mos siab zoo. 

Nej yuav ua siab ntev. Nej yuav ua siab ntev ib leeg txhawb ib leeg nyob hauv txoj kev nyiam. 

3 – Nej yuav siv zog txuag kev thaj yeeb kom sawv daws koom ua ib pab, nyob hauv ib lub tswv yim. 

4 – Tsuas muaj tib lub cev thiab tib lub tswv yim xwb, vim Ntuj hu nej los taug tib txoj kev tso siab. 

5 – Tsuas muaj tib tug Huab Tais, tib txoj kev ntseeg, tib lub cim ntxuav. 

6 – Tsuas muaj tib tug Tswv Ntuj ua sawv daws Txiv. Nws nyob siab dua sawv daws, nws sau sawv daws, -nws nyob hauv sawv daws.

Yog Tswv Ntuj Lo Lus        Nws lus txiaj ntsim

NTAWV MOO ZOO         

ZAM 6 : 1-15

LUB NTSIAB LUS : Yes Xus ua kom mov ntau tuaj, txaus pub rau tsib txhiab leej noj tsau. Yes Xus ua li  ntawd, nws ua ib lub cim. Yog lub cim tias nws Lo Lus yug tas ntiaj teb neeg tau.

COV LUS NYOB HAUV ZAM  NTAWV MOO ZOO :

1 – Dhau tej no lawm, Yes Xus mus rau sab dej ntuj Nkas Lis Lais tim ub,

uas tseem hu ua Dej Ntuj Tis Npes Lias. 

2 – Ib pab neeg coob raws nws mus, vim lawv tau pom cov cim nws ua kho neeg mob.

3 – Yes Xus nce saum lub roob, nws nrog nws cov thwj tim zaum nyob saud. 

4 – Yuav txog lub Ntees Hla uas yog cov Yus Das lub ntees nqaum paj nqaum nruas.

5 – Yes Xus tsa muag ntsia pom ib pab neeg coob tuaj cuag nws, nws hais rau Fis Lis Pos tias :

« Peb yuav ua li cas muas ncuav mov txaus cov neeg -ntawd noj ? » 

6 – Yes Xus hais li ntawd sim Fis Lis Pos, tab sis Yes Xus yeej paub tias nws yuav ua dab tsi.

7 – Fis Lis Pos teb rau Yes Xus tias :

« Muab ob puas lub txiaj nyiag muas mov los tseem yuav tsis txaus kom ib leeg tau ib qho me me. » 

8 – Yes Xus ib tug thwj tim hu ua As Nres,

yog Xis Moos Pob Zeb tus kwv, hais rau Yes Xus tias :

9 – « Ib tug me tub nyob ntawm no muaj tsib lub ncuav mov qib thiab ob tug ntses me me,

tab sis qhov ntawd yuav ua cas txaus rau npaum no leej neeg noj ? » 

10 – Yes Xus hais tias : « Nej kom cov neeg zaum. » Nyob ntawm qhov chaw ntawd muaj nroj ntau. 

Ces cov neeg zaum, kwv yees muaj tsib txhiab leej neeg. 

11 – Yes Xus -tuav cov ncuav mov, -nws ua ntuj tsaug tas, nws muab faib rau cov neeg uas zaum ntawd. 

Nws kuj ua ib yam li ntawd rau cov ntses me me kom txaus lawv noj thiab. 

12 – Thaum lawv noj tsau tas, Yes Xus hais rau nws cov thwj tim tias :

« Nej khaws cov sab mov seem kom txhob sem ib qho li. »  

13 – Thaum lawv noj tsau tas, lawv thiaj khaws cov mov seem uas ntsu ntawm tsib lub ncuav mov qib los,

lawv ntim -puv kaum ob tawb. 

14 – Tsoom sid pom lub cim Yes Xus ua, ces lawv hais tias :

« Tus no yog tus Yaj Saub uas yuav tuaj nyob hauv lub qab ntuj neeg tiag. »

15 – Yes Xus to taub hais tias lawv yuav tuaj ntes nws mus tsa ua vaj, ces nws mus nws tib leeg twj ywm rau pem roob.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB     

YES LES MIAS 23 : 1-6

LUB NTSIAB LUS : Ntau zaus, cov neeg coj Tswv Ntuj cov yaj lawv coj tsis zoo. Tswv Ntuj xa Yes Xus ua tus piv txwv rau cov neeg xyiv fab coj Tswv Ntuj cov yaj.

COV LUS NYOB HAUV NTAWV YES LES MIAS :

1 – HUAB TAIS, cov lus ceeb toom hais li no. Cov tswv zov yaj ua kom pab yaj tuag,

thiab lawv ua kom pab yaj tawg ua lwj ua liam nyob hauv kuv lub tshav zaub.

Mas lawv txoj hmoov yuav phem. 

2 – Vim li ntawd, tsoom His Xas Lais tus HUAB TAIS Tswv Ntuj cem cov tswv zov nws haiv neeg nog zaub tias :  

« Nej tau ua kom kuv cov yaj tawg, nej caum lawv, nej tsis liam fab saib kuv cov yaj.

Nyem no kuv yuav tuaj xyuas nej, vim nej cov hauj lwm lim hiam.

Yog HUAB TAIS lo lus.

3 – Kuv yuav mus sau kuv cov yaj uas tseem nyob txhua lub teb chaws, kuv caum lawv mus.

Kuv yuav coj lawv rov los nyob ua ke hauv lawv tej tshav zaub, lawv yuav txi txiv, lawv yuav huam vam.

4 – Kuv yuav ua kom ib co tswv zov yaj sawv los ua hau coj lawv mus nog zaub,

lawv yuav tsis ntshai tsis txhawj ntxiv, lawv yuav tsis muaj ib tug –ploj. »

5 – HUAB TAIS ceeb toom li no : 

« Nej ntsia saib ! Twb txog lub caij uas kuv yuav tsa ib tug kaus siab ncaj hauv Das Vis tsev neeg. 

Tus kaus ntawd yuav ua vaj nws yuav xyuam xim, nws yuav ua raws kev ncaj kev ncees nyob hauv lub teb chaws no. 

6 – Lub caij nws ua vaj mas Yus Das teb yuav txais txoj kev cawm, His Xas Lais yuav tau nyob nyab xeeb. »

Lub npe uas luag yuav tis rau nws yog : 

« HUAB TAIS, peb txoj kev ncaj. »

ZAJ NYEEM IB.      YES LES MIAS        23 : 1-6.

LUB NTSIAB LUS : Ntau zaus, cov neeg coj Tswv Ntuj cov yaj lawv coj tsis zoo. Tswv Ntuj xa Yes Xus ua tus piv txwv rau cov neeg xyiv fab coj Tswv Ntuj cov yaj.

COV LUS NYOB HAUV NTAWV YES LES MIAS :

1          HUAB TAIS, cov lus ceeb toom hais li no. 

Cov tswv zov yaj ua kom pab yaj tuag,

thiab lawv ua kom pab yaj tawg ua lwj ua liam nyob hauv kuv lub tshav zaub.

Mas lawv txoj hmoov yuav phem. 

2          Vim li ntawd, tsoom His Xas Lais tus HUAB TAIS Tswv Ntuj

cem cov tswv zov nws haiv neeg nog zaub tias :  

« Nej tau ua kom kuv cov yaj tawg, nej caum lawv,

nej tsis liam fab saib kuv cov yaj.

Nyem no kuv yuav tuaj xyuas nej,

vim nej cov hauj lwm lim hiam.

Yog HUAB TAIS lo lus.

3          Kuv yuav mus sau kuv cov yaj uas tseem nyob txhua lub teb chaws, kuv caum lawv mus.

Kuv yuav coj lawv rov los nyob ua ke hauv lawv tej tshav zaub,

lawv yuav txi txiv, lawv yuav huam vam.

4          Kuv yuav ua kom ib co tswv zov yaj sawv los ua hau coj lawv mus nog zaub,

lawv yuav tsis ntshai tsis txhawj ntxiv,

lawv yuav tsis muaj ib tug –ploj. »

5          HUAB TAIS ceeb toom li no : 

« Nej ntsia saib ! Twb txog lub caij uas kuv yuav tsa ib tug kaus

siab ncaj hauv Das Vis tsev neeg. 

Tus kaus ntawd yuav ua vaj nws yuav xyuam xim,

nws yuav ua raws kev ncaj kev ncees nyob hauv lub teb chaws no. 

6          Lub caij nws ua vaj mas Yus Das teb yuav txais txoj kev cawm,

His Xas Lais yuav tau nyob nyab xeeb. »

Lub npe uas luag yuav tis rau nws yog : 

« HUAB TAIS, peb txoj kev ncaj. »

YOG TSWV NTUJ LO LUS.         Nws lub txiaj ntsim.

NPN:              HUAB TAIS YOG TUS TSWV ZOV YAJ                       (NPN 23-1)

Txais: Huab Tais yog tus Zoo Tswv Zov Yaj, nws zov kuv, kuv tsis ntsaw dab tsi li!

1. Huab Tais yog kuv tus tswv zov yaj, kuv tsis ntshaw dab tsi.

Nws tso kuv nyob hauv tej tshav zaub mos.

Nws coj kuv mus so nyob ze dej, nws rov ntxiv zog rau kuv tus plig.

2. Nws coj kuv mus taug txoj kev ncaj kom nws lub npe nto koob meej.

Tab yog kuv taug kev mus hauv lub kwj ha tsaus ntuj nti,

kuv tsis ntshai vim koj nrog kuv,

koj rab pas nrig yog kuv chaw tso siab.

3. Cov neeg ntxub kuv, lawv hnyos kuv.

Koj npaj ib roog qav rau ntawm kuv xub ntiag.

Koj pleev roj tsw qab rau saum kuv taub hau.

Koj hliv cawv puv lub ntim rau kuv haus.

4. Tas kuv sim neej, kev kaj siab thiab kev hlub nrog nraim kuv.

Tas kuv sim neej, kuv yuav nyob hauv Huab Tais tsev.

____________________________________________________________

Ps (NPN)) 23:1-3a, 3b-4, 5-6 (1)

CAIJ NYOB NRUAB XYOOS, HNUB CHIV 16, XYOO B

Ordinary Time, 16 B

ZAJ NYEEM OB.                ES FES XOS 2 : 13-18.

LUB NTSIAB LUS : Zeej tsoom yeej xav sib faib ua ntau pab sib ntxub. Yes Xus sau sawv daws los nyob ua ke ua ib lub cev.

COV LUS PAJ LUG SAU TUAJ RAU COV NTSEEG NYOB ES FES XOS :

13        Hos nyem no, nej nyob hauv Leej Pleev. 

Thaud, nej nyob deb, nyem no,

Leej Pleev cov roj ntsha coj nej los nyob ze lawm. 

14        Leej Pleev yog peb txoj kev thaj yeeb.

Nws muab ob haiv neeg los ua ib haiv rau hauv nws lub cev,

nws rhuav lub laj kab cais ob haiv neeg, -nws lub cev rhuav kev ntxub pov tseg. 

15        Leej Pleev rhuav Txoj Cai, thiab cov lus qhia, 

nws muab ob hom neeg los tsim Tus Neeg Tshiab nyob hauv nws,

kom tsa tau kev thaj yeeb. 

-(del)

16        Nws -tus Ntoo Cuam sau ob hom neeg rov los nrog Tswv Ntuj sib haum xeeb,

nyob hauv tib lub Cev xwb : nws lub Cev muab txoj kev ntxub rhuav pov tseg. 

17        Nws tuaj tshaj txoj kev thaj yeeb : tshaj txoj kev thaj yeeb rau nej cov nyob deb,

thiab tshaj txoj kev thaj yeeb rau lawv cov nyob ze. 

18        Vim Leej Pleev, mas peb ob hom neeg no koom ib lub tswv yim,

ces peb tau kev mus cuag Leej Txiv. 

YOG TSWV NTUJ LO LUS.         Nws lub txiaj ntsim.

                                    NTAWV MOO ZOO.          MAS KOS  6 : 30-34

LUB NTSIAB LUS : Yes Xus nrog cov Hauv Paus Xa Lus ua ib pab neeg tsis coob, tab sis tas zeej tsoom coob kawg tuaj cuag lawv. Yes Xus rau siab qhia lawv.

COV LUS NYOB HAUV MAS KOS NTAWV MOO ZOO:

30        Cov Hauv Paus Xa Lus los sib sau ncig Yes Xus,

lawv -piav -tas -puas tsav yam uas lawv tau ua thiab tau qhia.       

31        Ces Yes Xus hais rau lawv tias :

« Nej los rau ib qho chaw xu kev tsis muaj neeg, nej so me ntsis. »

Vim cov neeg tuaj thiab cov rov mus coob, ces cov Hauv Paus Xa Lus tsis xyeej noj mov. 

32        Lawv thiaj caij nkoj mus rau ib qho chaw xu ke, tsis muaj neeg.

33        Tsoom sid pom cov Hauv Paus Xa Lus caij nkoj mus, coob leej twb mem tau lawm. 

Ces sawv daws khiav ko taw hauv cov nroog tuaj mus. -Lawv xub mus txog chaw. 

34        Thaum Yes Xus nqes nkoj, nws pom ib pab neeg coob, nws hlub lawv,

vim lawv zoo li cov yaj uas tsis muaj tswv zov. 

Ces Yes Xus qhia lawv ntev loo.

Yog Tswv Ntuj Lo Lus        Nws lus txiaj ntsim

Nkauj Paj Nruag :              HUAB TAIS YOG TUS TSWV ZOV YAJ                      

(NPN 23-1)

Txais: Huab Tais yog tus Zoo Tswv Zov Yaj, nws zov kuv, kuv tsis ntsaw dab tsi li!

1 – Huab Tais yog kuv tus tswv zov yaj, kuv tsis ntshaw dab tsi. Nws tso kuv nyob hauv tej tshav zaub mos.

Nws coj kuv mus so nyob ze dej, nws rov ntxiv zog rau kuv tus plig.

2 – Nws coj kuv mus taug txoj kev ncaj kom nws lub npe nto koob meej. Tab yog kuv taug kev mus hauv lub kwj ha tsaus ntuj nti, kuv tsis ntshai vim koj nrog kuv, koj rab pas nrig yog kuv chaw tso siab.

3 – Cov neeg ntxub kuv, lawv hnyos kuv. Koj npaj ib roog qav rau ntawm kuv xub ntiag.

Koj pleev roj tsw qab rau saum kuv taub hau. Koj hliv cawv puv lub ntim rau kuv haus.

4 – Tas kuv sim neej, kev kaj siab thiab kev hlub nrog nraim kuv. Tas kuv sim neej, kuv yuav nyob hauv Huab Tais tsev.

ZAJ NYEEM OB               

ES FES XOS 2 : 13-18

LUB NTSIAB LUS : Zeej tsoom yeej xav sib faib ua ntau pab sib ntxub. Yes Xus sau sawv daws los nyob ua ke ua ib lub cev.

COV LUS PAJ LUG SAU TUAJ RAU COV NTSEEG NYOB ES FES XOS :

13 – Hos nyem no, nej nyob hauv Leej Pleev. Thaud, nej nyob deb, nyem no,

Leej Pleev cov roj ntsha coj nej los nyob ze lawm. 

14 – Leej Pleev yog peb txoj kev thaj yeeb. Nws muab ob haiv neeg los ua ib haiv rau hauv nws lub cev,

nws rhuav lub laj kab cais ob haiv neeg, -nws lub cev rhuav kev ntxub pov tseg. 

15 – Leej Pleev rhuav Txoj Cai, thiab cov lus qhia, nws muab ob hom neeg los tsim Tus Neeg Tshiab nyob hauv nws, kom tsa tau kev thaj yeeb. 

16 – Nws -tus Ntoo Cuam sau ob hom neeg rov los nrog Tswv Ntuj sib haum xeeb,

nyob hauv tib lub Cev xwb : nws lub Cev muab txoj kev ntxub rhuav pov tseg. 

17 – Nws tuaj tshaj txoj kev thaj yeeb : tshaj txoj kev thaj yeeb rau nej cov nyob deb,

thiab tshaj txoj kev thaj yeeb rau lawv cov nyob ze. 

18 – Vim Leej Pleev, mas peb ob hom neeg no koom ib lub tswv yim,

ces peb tau kev mus cuag Leej Txiv. 

Yog Tswv Ntuj Lo Lus        Nws lus txiaj ntsim

NTAWV MOO ZOO      

MAS KOS  6 : 30-34

LUB NTSIAB LUS : Yes Xus nrog cov Hauv Paus Xa Lus ua ib pab neeg tsis coob, tab sis tas zeej tsoom coob kawg tuaj cuag lawv. Yes Xus rau siab qhia lawv.

COV LUS NYOB HAUV MAS KOS NTAWV MOO ZOO:

30 – Cov Hauv Paus Xa Lus los sib sau ncig Yes Xus, lawv -piav -tas -puas tsav yam uas lawv tau ua thiab tau qhia.       

31 – Ces Yes Xus hais rau lawv tias :

« Nej los rau ib qho chaw xu kev tsis muaj neeg, nej so me ntsis. »

Vim cov neeg tuaj thiab cov rov mus coob, ces cov Hauv Paus Xa Lus tsis xyeej noj mov. 

32 – Lawv thiaj caij nkoj mus rau ib qho chaw xu ke, tsis muaj neeg.

33 – Tsoom sid pom cov Hauv Paus Xa Lus caij nkoj mus, coob leej twb mem tau lawm. 

Ces sawv daws khiav ko taw hauv cov nroog tuaj mus. -Lawv xub mus txog chaw. 

34 – Thaum Yes Xus nqes nkoj, nws pom ib pab neeg coob, nws hlub lawv,

vim lawv zoo li cov yaj uas tsis muaj tswv zov. Ces Yes Xus qhia lawv ntev loo.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB                 

AS MOS 7 : 10, 12-15

LUB NTSIAB LUS : Cov neeg cev Tswv Ntuj cov lus rau tsoom sid mloog lawv txhob ntshai tsoom sid. Lawv yuav muaj lub siab loj, vim tus xa lawv yog Tswv Ntuj.

COV LUS NYOB HAUV NTAWV AS MOS:

10 – As Mas Xias yog tus Leej Choj nyob Npes Thes.bNws tso neeg mus hais rau tus vaj His Xas Lais Yes Los Npuag tias : 

« Tus Yaj Saub As Mos ntxias His Xas Lais tsev neeg kom lawv ntxeev siab rau koj. 

Lub teb chaws nyiaj tsis tau nws lus haub lus ntxias ntxiv lawm. »  

12 – Ces tus Leej Choj As Mas Xias hais rau tus Yaj Saub As Mos tias :

« Niag pom Ntuj, koj tawm ntawm lub teb chaws no mus mas ! Koj khiav mus nyob Yus Das teb. 

Koj mus nrhiav noj nrhiav haus nyob ntawd, koj mus ua Yaj Saub nyob ntawd.

13 – Koj tsis txhob ua Yaj Saub nyob Npes Thes ntxiv.  Vim yog tus vaj chaw teev Ntuj, yog lub teb chaws tsev teev Ntuj. » 

14 – As Mos teb rau As Mas Xias tias : -« Thaud, kuv tsis yog Yaj Saub thwj tim. 

Kuv ib txwm yog neeg zov yaj, kuv cog ntoo.

15 – Thaum kuv tseem nrog kuv tej pab tsiaj nyob, HUAB TAIS hu kuv. 

Nws tau hais rau kuv tias :

Koj sawv mus ua Yaj Saub qhia kuv haiv His Xas Lais. » 

Yog Tswv Ntuj Lo Lus        Nws lus txiaj ntsim

Nkauj Paj Nruag :              CIA PEB POM KOJ LUB SIAB ZOO                

(NPN 85)

Txais: Huab Tais, thov cia peb pom koj lub siab zoo! Thov pub koj txoj kev cawm neeg rau peb!

1 – Kuv mloog saib Tswv Ntuj hais dab tsi. Huab Tais hais rau nws haiv neeg tias, “Nej nyob kaj lug!”

Huab Tais txoj kev cawm los nyob ze cov neeg hwm nws. Nws lub koob meej nqes los nyob hauv peb lub teb chaws.

2 – Txoj kev cawm thiab kev tseeb los sib cuag. Kev thaj yeeb thiab kev haum pheej los sib koom.

Txoj kev tseeb hlav ib tug txoov kaus nyob hauv ntiaj teb, kev haum pheej nqes saum ntuj los.

3 – Huab Tais pub txiaj ntsim, peb cov av pub qoob loo. Kev haum pheej mus ua Huab Tais ntej,

nws npaj txoj kev thaj yeeb rau peb taug.

ZAJ NYEEM OB               

ES FES XOS 1 : 3-11

LUB NTSIAB LUS : Txij thaum Tswv Ntuj tsim lub qab ntuj neeg nws npaj kom sawv daws los zwm rau Yes Xus.

COV LUS PAJ LUG SAU TUAJ RAU COV NTSEEG NYOB ES FES XOS :

3 – Kuv cav lus zoo txog Tswv Ntuj, peb tus Huab Tais Yes Xus Pleev Leej Txiv,

vim nws foom hmoov zoo rau peb, thiab pub txiaj ntsim yug peb tus ntsuj plig,

nws tau pub txhij pub txhua, nyob saum cov txheej ntuj, hauv Leej Pleev.  

4 – Thaum tseem tsis tau tsim lub ntuj lub teb, Tswv Ntuj twb xaiv peb nyob hauv Leej Pleev,

kom peb ntshiab huv, tsis lo txhaum rau ntawm nws xub ntiag, thiab kom peb tau los nyob hauv txoj kev nyiam. 

5 – Nws ib txwm xaiv peb ua nws cov tub ki tshiab, nyob hauv Yes Xus Pleev. 

Nws lub tswv yim pom zoo ua li ntawd, 

6 – kom peb cav txog nws lub hwj chim thiab nws lub txiaj ntsim,

vim nws pub txiaj ntsim dawb rau peb nyob hauv tus Zoo Nyiam. 

7 – Nyob hauv Tus Zoo Nyiam, peb tau txais kev txhiv peb ntawm nws cov roj ntsha. 

8 – Peb tau kev daws peb cov txhaum ntawm lub txiaj ntsim nplua nuj uas Leej Txiv pub dawb rau peb. 

Leej Txiv lub tswv yim thoob tsib thiab ntse 

9 – qhia yam zais (tob) puag hauv nws lub siab xav -rau peb paub,

thiab qhia nws tus nru lus xav ua zoo uas nws ib txwm npaj rau peb paub. 

10 – Thaum txog lub caij teem, nws ua kom zaj nru lus zoo no tsheej xeeb : 

nws yuav coj txhua tsav txhua yam thiab coj txhua leej txhua tus nyob

saum ntuj thiab nyob ntiaj teb rov los zwm rau Leej Pleev. 

11 – Ntuj xaiv peb thiab qee peb nyob hauv Leej Pleev, raws li Tswv Ntuj tus txheej txheem uas nws ib txwm tsa los coj txhua tsav txhua yam kom haum nws lub siab xav. 

Yog Tswv Ntuj Lo Lus        Nws lus txiaj ntsim

NTAWV MOO ZOO                     

MAS KOS 6 : 6-13

LUB NTSIAB LUS : Cov neeg xav tshaj Ntuj Lus, lawv mus xyuas sawv daws, lawv tsis txhob npaj ntau yam. Lawv tsuas npaj cev Tswv Ntuj Lo Lus.

6 – Nws xav tsis thoob txog qhov lawv tsis ntseeg. Yes Xus mus hauv cov zos nyob ib ncig, nws qhia lawv. 

7 – Nws hu Pab Kaum Ob los cuag nws, ces nws xa lawv ua tej pab ob leeg mus. 

Nws pub hwj huam ntiab dab tsis huv rau lawv. 

8 – Yes Xus qhia lawv kom txhob nqa dab tsi taug kev li, tsuas nqa tib rab pas nrig xwb. 

Txhob ntim mov, txhob nqa hnab ruas, txhob ntim xim nyiaj rau hauv duav siv. 

9 – Nws hais tias : « Nej rau khau khiab xwb, txhob hnav ob lub tsho. » 

10 – Yes Xus tseem hais rau lawv tias : « Nej chaws mus hauv lub tsev twg,

nej yuav nyob hauv lub tsev ntawd mus txog hnub nej rov qab. 

11 – Yog qhov chaw twg tsis txais nej, thiab luag tsis mloog nej, nej tso qhov chaw ntawd tseg, 

nej nchos cov plua av lo nej qab xib taws pov tseg, cia ua tim khawv txiav txim rau lawv. » 

12 – Cov thwj tim tawm mus, -lawv tshaj kom tsoom sid tig los hloov siab tshiab. 

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

ES XES KIAS 2 : 2-5

LUB NTSIAB LUS : Tus neeg ntseeg txog Ntuj, tab yog cov neeg nrog nws nyob txais nws lo lus los tsis txais, mas nws yuav tsum ua Tswv Ntuj tim khawv tshaj Tswv Ntuj cov lus.

COV LUS NYOB HAUV NTAWV ES XES KIAS:

2 – Lub Tswv yim tuaj nyob hauv kuv, ces kuv tau hnov ib tug hais rau kuv tias :

3 – “Neeg leej tub, kuv xa koj mus cuag cov His Xas Lais, uas lawv ntxeev siab thiab ua rog tiv kuv.

Lawv sawv los ntaus kuv txog tav no, xws li lawv phaj txiv phaj yawg.

4 – Phaj tub lawv muaj lub taub hau tawv, muaj lub siab txhav.

Kuv xa koj mus cuag lawv. Koj hais rau lawv tias Tswv Ntuj hais li.

5 – Lawv yog ib pab neeg ntxeev siab.Tab yog lawv mloog los tsis mloog mas lawv yuav tsum paub tias

ib tug Yaj Saub sawv los nyob hauv nruab nrab lawv.”

Yog Tswv Ntuj Lo Lus        Nws lus txiaj ntsim

Nkauj Paj Nruag :               PEB TSA MUAG NTSIA HUAB TAIS                  

(NPN 123)

Txais: Peb tsa muag ntsia Huab Tais, thov nws khuv leej peb.

1 – Kuv tsa muag ntsia txog koj uas yog tus zaum lub theej kiab nyob txheej ntuj saud,

zoo puav tam li cov tub txib ntsia lawv tus tswv txhais tes.

2 – Peb ntsia ntsoov txog hnub uas peb tus Huab Tais Tswv Ntuj yuav pab peb,

zoo puav tam li tus ntxhais txib ntsia nws tus niam tsev txhais tes.

3 -Huab Tais, thov koj hlub, thov koj khuv leej peb mas! Vim luag thuam peb, dhuav peb siab tas nrho.

Peb tus plig ntim tsis taus cov neeg muab hlob tej lus thuam.

ZAJ NYEEM OB               

2 KOS LIS NTHOS 12 : 7-10

LUB NTSIAB LUS : Tus saus chob Paj Lug cov nqaij, peb tsis paub tias yog dab tsi. Peb tsuas paub tias Paj Lug, tus Hauv Paus Xa Lus kub siab tshaj, nws yog ib tug neeg xws luag thiab.

COV LUS PAJ LUG SAU TUAJ RAU COV NTSEEG NYOB KOS LIS NTHOS :

7 – Ntuj qhib tej yam zoo tas nrho los qhia kuv, tiam sis Ntuj tsis xav kom kuv muab hlob, 

ces Ntuj tso ib tug saus los chob kuv cov nqaij. Ntuj tso Xas Tas ib tug dab tuaj ntaus kuv tej tawg ncuav, kom kuv tsis txhob muab hlob. 

8 – Kuv thov Huab Tais peb zaug, kom Xas Tas tus dab ntawd txav mus deb kuv. 

Tiam sis Huab Tais teb rau kuv tias :

9 – ‘Kuv lub txiaj ntsim txaus pab koj lawm, vim lub hwj huam muaj zog nyob hauv tus tsis muaj zog.’ 

Yog vim qhov ntawd, mas kuv thiaj khav txog kuv txoj kev tsis muaj zog, kom Leej Pleev lub hwj huam los nyob hauv kuv.  

10 – Yog tim qhov ntawd mas kuv thiaj zoo siab txais kuv txoj kev raug luag thuam,

kev txhawj xeeb, kev raug luag hiam, thiab tej kev ntshai, vim Leej Pleev. 

Vim tias, yog thaum kuv tsis muaj zog, mas kuv thiaj muaj zog. 

Yog Tswv Ntuj Lo Lus        Nws lus txiaj ntsim

NTAWV MOO ZOO                     

MAS KOS 6 : 1-6

LUB NTSIAB LUS : Tab peb txawm niaj hnub hnov Yes Xus cov lus mas peb yuav muab siab rau qhuas txog Yes Xus cov lus uas yog lus nyiaj lus kub.

COV LUS NYOB HAUV MAS KOS NTAWV MOO ZOO:

1 – Yes Xus tawm hauv qhov chaw ntawd mus, nws rov mus lub zos nws nyob hlob,

cov thwj tim kuj nrog nws mus thiab. 

2 – Hnub Xas Npas Tos, Yes Xus qhia hauv tsev txoos. 

Muaj neeg coob tuaj mloog, lawv hnov nws cov lus, lawv qhuas, lawv hais tias :

« Nws tau tej ntawd qhov twg los ? Lub siab thoob tsib thiab cov hwj huam yees ntxwv loj uas nws ob txhais tes ua, yog leej twg pub rau nws? 

3 – Tus ntawd tsis yog tus kws ntoo, Mab Liab tus tub lod ? 

Nws tsis yog Yas Kos, Yos Xes, Yus Das thiab Xis Moos lawv kwv tij lod ? 

Hos nws cov muam, tsis yog cov nrog peb nyob ua ke lod ? » Yes Xus ua lawv poob siab. 

4 – Ces Yes Xus hais rau lawv tias :

« Ib tug Yaj Saub, tsuas yog nyob hauv lub zos nws hlob,

hauv nws cov txheeb ze thiab nws tsev neeg, mas luag thiaj saib nws tsis muaj nqis. » 

5 – Vim li ntawd, Yes Xus ua tsis tau ib yam hwj huam yees ntxwv nyob ntawd li,

nws tsuas tsa tes rau tus puav tuag ceg los tuag tes kom zoo. 

6 – Nws xav tsis thoob txog qhov lawv tsis ntseeg.

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB                 

THOOB TSIB 1 : 13-15, 2 : 23-25, 3 : 1

LUB NTSIAB LUS : Ntau zaus, neeg raug txoj kev phem, tab sis Tswv Ntuj tau tsim -neeg zoo. Yog vim neeg cov txhaum mas neeg thiaj raug txoj hmoov phem.

COV LUS NYOB HAUV NTAWV THOOB TSIB.

13 – Tswv Ntuj tsis tau tsim txoj kev tuag. Nws tsis xav pom cov muaj txoj sia ploj.  

14 – Tswv Ntuj tsim txhua yam kom -muaj txoj sia nyob. Txhua yam Ntuj tsim los nyob ntiaj teb no xav noj qab nyob zoo. Tsis muaj tshuaj lom neeg nyob hauv txhua yam. Ib txwm txoj kev tuag tsis ua vaj kav lub ntiaj teb no. 

15 – Vim kev ncaj ncees muaj txoj sia nyob mus li.

23 – Muaj tseeb ! Tswv Ntuj tsim neeg tsis txawj tuag tsis txawj lwj. 

Tswv Ntuj tsim neeg muaj lub meej yim raws li Tswv Ntuj lub meej yim. 

24 – Vim dab phem khib mas txoj kev tuag thiaj txeem los nyob hauv lub sim ceeb. 

Cov neeg uas yog dab phem tug, mas muaj ib hnub lawv yuav paub.

1 – Cov neeg ncaj tus plig nyob hauv Tswv Ntuj txhais tes. 

Tsis muaj ib yam xwv txheej dab tsi yuav -raug tau lawv.

Yog Tswv Ntuj Lo Lus        Nws lus txiaj ntsim

Nkauj Paj Nruag :              KUV YUAV CAV TXOG KOJ                 

(NPN 30)

Txais: Huab Tais, kuv yuav cav txog koj vim koj tau cawm kuv.

1 – Huab Tais, kuv yuav cav txog koj vim koj tau rub kuv tawm hauv lub qhov ntuj los.

Koj tsis cia kuv ua yeeb ncuab qhov chaw zoo siab. Huab Tais, koj rub kuv tus plig tawm hauv ntuj txias teb tsaus los. Koj tsis pub kuv mus hauv lub qhov ntxa.

2 – Cov ntseeg Huab Tais, nej hu nkauj cav txog nws. Nej nqaum paj nqaum nruas cav txog nws lub npe ntshiab. Nws npau taws, tsuas npau ib pliag. Nws hlub neeg, nws hlub tas ib sid.

Hmo ntuj, kuv kua muag poob tsis tu, tab sis kaj ntug txoog, kuv rov zoo siab.

3 – Huab Tais, koj mloog mas! Thov koj hlub, thov koj pab kuv.

Koj muab kuv txoj kev quaj nyiav los hloov ua kev lom zem.

Huab Tais, kuv tus Tswv Ntuj, kuv yuav ua koj tsaug mus li.

ZAJ NYEEM OB               

2 KOS LIS NTHOS 8 : 7-9, 12-15

LUB NTSIAB LUS : Cov neeg coj lub Koom Txoos tsis nyiam thov nyiaj ntawm tsoom ntseeg. Tab sis Yes Xus twb muab nws txoj sia los pab sawv daws : phim cov -ntseeg yuav sau lawv cov nyiaj ib qho los pab rau luag tej.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

7 – Nej ua yam twg, los nej yeej txawj ua zoo heev : tsis hais kev ntseeg, los kev hais lus, los kev kawm txuj, los kev xyiv fab pab sawv daws, los txoj kev nyiam uas nej txais ntawm peb los, mas nej yeej ua zoo tas huv tib si lawm. Ua li mas, nej kuj yuav tsum ua zoo tshaj nyob hauv txoj kev pub paj tshab thiab. 

8 – Kuv tsis yuam nej. -Kuv tsuas xav tias, vim luag tej xyiv fab pab, mas kuv xav sim saib,

nej lub siab puas txawj nyiam tiag. 

9 – Nej paub tias peb tus Huab Tais Yes Xus Pleev lub siab dav :

Nws yog tus nplua nuj, tab sis nws ua kom nws pluag, kom xwv nws lub neej pluag ua nej nplua nuj tuaj.

12 – Thaum yus pub, mas yus -zoo siab pub, thiab yuav pub raws li yus muaj :

tus sau paj tshab thiaj zoo siab sau. Yog yus tsis muaj, mas cia li. 

13 – Kuv tsis hais tias, tab yog koj txom nyem, tsis kav koj tseem yuav tsum pub rau luag tej. 

Qhov uas peb yuav tsum ua yog kom sawv daws tau sib npaug. 

14 – Nyem no, nej muab nej qhov seem los pab lawv txoj kev txom nyem kom lwm hnub,

lawv ho muab lawv qhov seem tuaj pab nej. 

15 – Li ntawd sawv daws thiaj yuav tau sib npaug raws li Ntawv hais tias :

‘Tus khaws tau ntau, nws tsis tau tshaj luag ; tus khaws tau tsawg, nws kuj tsis tshaib.’

Yog Tswv Ntuj Lo Lus        Nws lus txiaj ntsim

NTAWV MOO ZOO                     

MAS KOS 5 : 21-43

LUB NTSIAB LUS : Yes Xus ua hwj huam yees ntxwv, tsis yog nws xav kom luag tej qhua nws. Yog vim nws xav pab cov neeg txom nyem.

COV LUS NYOB HAUV MAS KOS NTAWV MOO ZOO.

21 – Thaum Yes Xus caij nkoj rov los txog sab ntug dej tim no, ib pab neeg coob tuaj sib sau ntsauv nws.

Thaum ntawd, Yes Xus tseem nyob ntawm ntug dej ntuj.   

22 – Muaj ib tug hauv cov tswj tsev txoos hu ua Yais Los tuaj txog. 

Thaum nws pom dheev Yes Xus, nws txhos caug ntua ntawm Yes Xus ko taw. 

23 – Nws thov Yes Xus tias :

« Kuv tus me ntxhais txoj sia yuav tu, thov koj tuaj tsa tes cawm nws kom nws ciaj. » 

24 – Yes Xus nrog Yais Los mus. -Ib pab neeg coob raws Yes Xus mus thiab,

lawv sawv daws txiv Yes Xus.

25 – Muaj ib tug poj niam tsob ntshav tau kaum ob xyoos los lawm. 

26 – Ntau tus kws tshuaj tau ua kom nws txoj kev txom nyem kawg. 

Nws siv tas nws lub cuab tam los kho tsis tau nws zoo. Nws mob heev zuj zus ntxiv. 

27 – Nws hnov luag hais txog Yes Xus, ces nws nrog tsoom sid sib txiv tom Yes Xus nraub qaum.

Nws kov Yes Xus lub tsho. 

28 – Vim nws xav hauv siab tias :

« Tsuav yog kuv tau kov nws lub tsho xwb, mas kuv yeej yuav dim. »       

29 – Ces tam sis ntawd, nws qhov tsob ntshav tu nrho, nws hnov nws lub cev zoo hlo ntawm tus mob. 

30 – Tam sim ntawd, Yes Xus kuj hnov ib lub zog tawm hauv nws mus ;

ces Yes Xus tig los nug pab neeg ntawd tias : « Leej twg kov kuv lub tsho ? »

31 – Cov thwj tim hais rau nws tias :

« Koj ntsia saib, tas tsoom sid txiv koj txhua sab tuaj, koj tseem hais tias :

« Leej twg kov kuv ? »  

32 – Yes Xus ntsia ib ncig kom pom tus neeg uas tau kov nws. 

33 – Ces tus poj niam ntshai, nws tshee tshee, vim nws paub qhov uas nyuam qhuav tshwm sim hauv nws. Nws los txhos caug ntawm Yes Xus taw thiab qhia qhov tseeb rau Yes Xus. 

34 – Yes Xus hais rau tus poj niam tias :

“Phauj, koj lub siab ntseeg cawm koj lawm. 

Koj rov mus kaj siab lug, koj tus mob zoo lawm. »

35 – Thaum Yes Xus tseem tab tom hais lus, ib co neeg tuaj ntawm tus tswj tsev txoos lub tsev tuaj hais tias :

“Koj tus ntxhais twb tuag lawm, koj tseem yuav txob Xib Hwb ua dab tsi ?”  

36 – Tab sis Yes Xus twb hnov lo lus lawv nyuam qhuav hais, nws hais rau tus tswj tsev txoos tias :

« Koj txhob ntshai, tsuav koj ntseeg xwb. » 

37 – Yes Xus tsis kheev leej twg nrog nws mus li. 

Nws tsuas cia Pob Zeb, Yas Kos thiab Yas Kos tus kwv Zam nrog nws mus xwb.

38 – Lawv tuaj txog tus tswj tsev txoos lub tsev,

Yes Xus pom sawv daws ua ntxhov hnyo : ib txhia quaj, ib txhia qw nrov nrov. 

39 – Yes Xus los hauv tsev, nws hais tias :

« Ua cas sawv daws ua ntxhov hnyo thiab quaj zom zaws ? Tus me ntxhais tsis tuag, nws tsaug zog xwb. » 

40 – Ces lawv luag Yes Xus. -Tab sis Yes Xus ntiab sawv daws tawm mus nraum zoov,

nws tsuas kheev tus me nyuam niam thiab txiv, thiab cov nrog nws tuaj, nyob xwb. 

Nws chaws mus hauv kem uas tus me nyuam nyob. 

41 – Yes Xus tuav tus me nyuam txhais tes, nws hais rau tus me nyuad tias :

« Tas lis tas kus, » txhais tias :

« Me ntxhais, kuv hais koj, koj sawv ! » 

42 – Tus me ntxhais sawv tsees tam sis ntawd, nws mus kev, vim nws twb muaj kaum ob xyoos lawm. 

Tam sim ntawd, sawv daws ntshai kawg. 

43 – Yes Xus txwv lawv heev kom txhob qhia leej twg paub. Ces nws kom lawv muab mov rau tus me ntxhais noj. 

Huab Tais Pleev      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB                 

YOB 38 : 1,  8-11

LUB NTSIAB LUS : Tswv Ntuj yog tus muaj hwj huam loj. Neeg yog ib tug me me tsis phim yuav nrog Tswv Ntuj sib cav.

COV LUS NYOB HAUV NTAWV YOB.

1 – HUAB TAIS nyob hauv nag xob nag cua teb rau Yob tias : 

8 – « Thaum cov dej hiav txwv txhawv hauv tiv txwv nroo ntws tawm los,

yog leej twg muab cov dej hiav txwv kaw thiab xov ?  Puas yog koj ?

9 – Thaum kuv -tso ib co huab dawb los ua tsho vov lub hiav txwv, koj nyob qhov twg ? 

Thaum kuv tau ua tej twv huab dub los npog lub hiav txwv, koj ua dab tsi ? 

10 – Thaum kuv tu ciam teb rau dej kom txhob hla, thiab kuv tsa ntsa zeb ntsa tsua -xov lub hiav txwv,

koj nyob qhov twg ?  

11 – Thaum kuv tau hais rau cov hiav txwv tias : koj yuav tsis txhob mus dhau qhov no. 

Koj cov dej nphau muaj hwj chim -ntxiag, yuav tsum nyob twj ywm ntawm no,

mas thaum ntawd koj nyob qhov twg ? 

Yog Tswv Ntuj Lo Lus        Nws lus txiaj ntsim

Nkauj Paj Nruag:              PEB UA NTUJ TSAUG                 

(NPN 107)

Txais: Peb ua Ntuj tsaug vim Huab Tais hlub peb. Nws txoj kev hlub yuav nyob mus li.

1 – Cov neeg caij nkoj mus hauv hiav txwv, cov mus ua qav ua num hauv dej loj,

lawv tau pom Huab Tais cov hauj lwm thiab nws cov hwj huam yees ntxwv hauv plawv hiav txwv.

2 – Huab Tais lo lus ua kom cua daj cua dub tshuab nplaim dej nphau nphwv rau saum ntuj.

cov nplaim dej poob nthav rau hauv qab thu, lawv xeev siab fo.

3 – Thaum lawv txom nyem, lawv quaj hu txog Huab Tais. Nws cawm lawv ntawm kev txhawj kev ntshai.

Nws ua kom cua daj cua dub tu nrho, cov dej nphau nphwv rov nyob tus yees.

4 – Thaum lawv pom dej thiab cua tu nrho, lawv zoo siab. Tswv Ntuj coj lawv mus txog qhov chaw uas lawv nrhiav. Lawv cav txog Huab Tais txoj kev hlub thiab cov hwj huam yees ntxwv nws tau ua.

ZAJ NYEEM OB               

2 KOS LIS NTHOS 5 : 14-17

LUB NTSIAB LUS : Yog vim Yes Xus sawv peb chaw tuag thiab nws sawv rov los, cov neeg ntseeg txog Yes Xus lawv sawv daws thiaj yog cov neeg muaj txoj sia tshiab.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

14 – Leej Pleev txoj kev nyiam taij peb tas zog, vim peb nco ntsoov tias,

peb muaj ib tug sawv peb sawv daws chaw tuag, mas sawv daws nrog nws tuag. 

15 – Leej Pleev sawv peb sawv daws chaw tuag, kom cov neeg ciaj txhob nco txog lawv xwb,

lawv yuav tsum nco txog tus sawv lawv chaw tuag uas tau sawv rov los. 

16 – Li ntawd, nyem no, peb yuav tsis saib neeg raws li peb pom lawv lub cev sab nraud lawm. 

Tab yog peb tau pom Leej Pleev lub cev, mas nyem no, peb pom nws tsis zoo li tus qub lawm. 

17 – Nyem no, -yog leej twg los nyob hauv Leej Pleev, mas -nws yog tus uas Ntuj xeem tsim dua tshiab :

tus qub neeg dua lawm, ib tug neeg tshiab sawv los nyob. 

Yog Tswv Ntuj Lo Lus        Nws lus txiaj ntsim

NTAWV MOO ZOO         

MAS KOS 4 : 35-41

LUB NTSIAB LUS : Thaum peb raug xwm txheej ntau, peb tsis hnov Tswv Ntuj pab peb, peb xav tias yog nws tsaug zog. Peb xav li ntawd, vim peb tsis ntseeg zoo.

COV LUS NYOB HAUV MAS KOS NTAWV MOO ZOO.

35 – Hnub ntawd, thaum tsaus ntuj zuag, Yes Xus hais rau lawv tias :

« Peb hla mus sab ntug dej tid. » 

36 – Ces lawv tso tsoom sid tseg.  Lawv coj Yes Xus mus, nws cia li mus zoo li ntawd rau hauv nkoj. 

Muaj ib co nkoj nrog nws mus thiab.

37 – Muaj ib nthwv khaub zeeg cua loj kawg sawv tuaj. 

Dej nphau nphwv los rau hauv nkoj, ces lub nkoj twb puv dej tas lawm. 

38 – Yes Xus nyob tom tw nkoj, nws tsaug zog saum lub hauv ncoo. Lawv tsa Yes Xus, lawv hais rau nws -tias :

« Xib Hwb, peb yuav tuag, koj tsis quav ntsej lod ? » 

39 – Yes Xus tsim dheev, nws txwv cua, nws hais rau dej ntuj tias :

« Tswm seeb ! Koj nyob twj ywm ! » Ces cua tu nrho, dej ntuj  rov tus yees. 

40 – Yes Xus hais rau lawv tias

« Ua cas nej ntshai ua luaj ? -Nej tseem tsis tau ntseeg lod ? 

41 – Lawv ntshai kawg, lawv sib tham hais tias :

« Tus ntawd yog leej twg ? Txawm tias yog cua thiab dej ntuj los yeej mloog nws lus ? »

Huab Tais Pleev      Lub qab ntuj neeg cav txog koj