Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1 :

Hauv Paus : Tshooj 15 nqe : 1 txog 6; Tshooj : 21 nqe : 1 txog 3

1 Thaum tej xwm no dhau tas lawm, HUAB TAIS yees tawm los hais
lus rau Has Nplas hnov li no : « Koj txhob ntshai mog, Has Nplas! Kuv
yog daim leem phiaj thaiv koj. koj yuav txais koob haum loj kawg. »

2 Has Nplas teb tias : « HUAB TAIS Tswv Ntuj, koj yuav muab dab tsi pub rau kuv ? Kuv twb yuav dua, kuv tsis muaj tub muaj kiv… »

3 Has Nplas hais ntxiv tias : « Koj tsis pub kom kuv muaj ib tsob noob
li ces ib tug qhev uas yug hauv kuv tsev yuav los txais kuv lub cuab tam. »

4 HUAB TAIS lo lus tseem nrov tuaj rau Has Nplas tias : « Tus ntawd yuav tsis yog tus los txais koj lub cuab tam, tus yuav txais koj lub cuab tam yog koj ib tug tub uas yog tseem koj roj ntsha tiag. »

5 HUAB TAIS coj Has Nplas mus nraum zoov thiab hais rau nws tias : « Koj tsa muag ntsia saum ntuj thiab suav cov hnub qub saib koj suav puas txheeb. » Ces nws hais tias : « Koj cov xeeb ntxwv yuav coob npaum li ntawd. »

6 Has Nplas ntseeg HUAB TAIS, ces HUAB TAIS muab Has Nplas lub siab
ntseeg suav ua kev ncaj rau Has Nplas.

1 HUAB TAIS pub rau Xas Las raws li nws tau hais thiab ua rau
Xas Las raws li nws tau cog lus.

2 Ces Xas Las xeeb tub, nws yug ib tug tub rau Has Nplas Has thaum nws laus lawm, yug rau lub caij uas Tswv Ntuj tau teem cia.

3 Has Nplas Has tis npe rau nws tus tub uas Xas Las yug hu ua His Xas Has.

Yog Tswv Ntuj Lo Lus. Nws Lub Txiaj Ntsim

Zaj nyeem 2 :

Hes Nplaws : Tshooj : 11 Nqe : 8; 11 txog 12; 17 txog 19

8 Yog vim Has Nplas Has ntseeg, mas nws thiaj mloog Ntuj hu nws kom sawv kev mus ib lub teb chaws uas nws yuav txais los ua nws lub cuab tam. Ces nws sawv kev, nws tsis paub tias nws yuav mus txog qhov twg.

11 Yog vim Xas Las ntseeg, mas tab nws txawm laus heev lawm, nws muaj peev xwm xeeb tub. Xas Las ntseeg tias tus tau cog lus rau nws, yuav tsis fav xeeb.

12 Vim li ntawd, tus neeg uas twb yuav txog nws lub caij tuag tseem yug tau ib co xeeb ntxwv coob npaum li cov hnub qub nyob saum ntuj thiab cov suab zeb nyob ntawm ntug hiav txwv uas suav tsis txheeb.

17 Yog vim Has Nplas Has ntseeg, mas thaum Tswv Ntuj sim nws, nws cia li
muab Is Xas Has txi rau Ntuj, txawm tias Is Xas Has yog nws tib leeg tub twm zeej.

18 Is Xa Has twb yog tus yuav txais tej yam uas Tswv Ntuj cog lus tias yuav pub. Tswv Ntuj twb hais txog Is Xas Has tias : ‘koj yuav muaj ib co xeeb ntxwv tawm ntawm Is Xas Has.’

19 Has Nplas Has xav tias Tswv Ntuj tsa tau cov neeg tuag kom ciaj rov los. Ces Has Nplas Has rov qab tau nws tus tub. Zaj hais txog Is Xas Has no yog ib zag paj lug.

Yog Tswv Ntuj Lo Lus. Nws Lub Txiaj Ntsim

Ntawm Moo Zoo :

Lus Kas : Tshooj : 2 nqe : 22 txog 40

Lub ntsiab lus : Mab Liab thiab Yos Xes coj tus me nyuam Yes Xus mus hauv lub Tuam Tsev Teev Ntuj. Lawv ntsib Xis Mes Oos thiab As Nas.

22 Thaum txog lub caij yuav ua kab ke ntxuav ob niam tub raws li Mais Xes Txoj Cai, Mab Liab thiab Yos Xes nkawd coj Yes Xus mus pem Yes Lus Xas Les, kom tau cev tus me nyuam rau Huab Tais.

23 Vim Huab Tais Txoj Cai sau tias : « Txhua tus me nyuam tub xub yug, yuavmuab qee rau Huab Tais. »

24 Nkawd tseem yuav cev ib co txim rau Ntuj raws li Huab Tais Txoj Cai uas sau cia tias : muab ib nkawg nquab lwb rwg, los ob tug thav nquab dawb.

25 Thaum ntawd nyob Yes Lus Xas Les, muaj ib tug txiv neej hu ua Xis Mes Oos. Tus neeg ntawd yog neeg ncaj thiab nyiam teev Ntuj. Nws tos tus yuav tuaj nplij His Xas Lais. Leej Ntuj Plig Ntshiab nyob roos nws.

26 Leej Ntuj Plig Ntshiab tshoj nws ces nws paub tias yog nws tsis tau pom Huab Tais tus Pleev, mas nws yuav tsis tuag.

27 Leej Ntuj Plig coj nws tuaj nyob hauv lub Tuam Tsev Teev Ntuj. Thaum Mab Liab thiab Yos Xes nkawd coj tus me nyuam mos Yes Xus tuaj ua cov kab ke raws Txoj Cai,

28 Xis Mes Oos txais tus me nyuam los rau hauv nws ob txhais npab, nws cav lus zoo txog Tswv Ntuj tias :

29 Txiv Tswv, nyem no koj tso koj tus tub txib mus kaj lug, raws li koj lo lus,

30 vim kuv qhov muag tau pom koj txoj kev cawm neeg, 31 uas koj npaj nyob ntawm ib tsoom haiv neeg xub ntiag,

32 yog qhov pom kev tawm tuaj kaj cov pej kum haiv neeg, yog koj tsoom pej xeem His Xas Lais lub koob meej.

33 Yes Xus niam thiab txiv qhuas cov lus nkawd hnov hais txog tus me nyuam.

34 Xis Mes Oos foom hmoov zoo rau lawv, nws hais rau Mab Liab, Yes Xus
niam tias : « Koj ntsia ! Tus me nyuam no yuav ua chaw rau ntau leej His Xas Lais ntog thiab ntau leej rov sawv. Nws yog ib lub cim ua kom sawv daws sib cav.

35 Hos ntawm koj, mas ib rab ntaj yuav hno koj tus plig, kom xwv tej lus uas coob leej xav tuaj nruab siab tawm los rau sawv daws paub.

36 Tseem muaj ib tug yaj saub poj niam, hu ua As Nas, yog Fas Nus Ees tus
ntxhais, xeem As Ntxes. Nws lub hnub nyoog laus kawg. Dhau lub caij nws
nyob ua nkauj xwb lawm, mas nws nrog nws tus txiv nyob xya xyoo,

37 ces nws ua poj ntsuam laus li ntawd txog yim caum plaub xyoos. Nws tsis nrug ntawm lub Tuam Tsev Teev Ntuj li. Nws yoo mov thiab hais cov zaj teev Ntuj los hawm Tswv Ntuj thawm hnub thawm hmo.

38 Tib lub sij hawm ntawd, As Nas kuj tuaj nyob ntawd thiab, nws cav lus zoo txog Tswv Ntuj, nws hais txog tus me nyuam rau txhia leej txhia tus uas tos txog txoj kev txhiv Yes Lus Xas Les.

39 Thaum lawv ua txhua yam raws li Huab Tais Txoj Cai tas lawm, lawv rov
mus Nkas Lis Lais, hauv lawv lub nroog Nas Xas Les.

40 Hos ntawm tus me nyuam, nws hlob, nws muaj zog zuj zus, kev thoob tsib puv nws siab ntsws. Tswv Ntuj lub txiaj ntsim nyob saum nws.

Huab Tais Pleev. Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Teev ntuj hnub vas Xaum tsaus ntuj

Zaj nyeem 1 :

Kis Xais : Tshooj 62 nqe : 1 txog 5

Ntsiab lus : Yes Lus Xas Les yog Tswv Ntuj tus nkauj nyab tshiab.

1 Vim muaj Xis Yoos, kuv yuav tsis nyob twj ywm. Vim muaj Yes Lus Xas Les, kuv yuav tsis so, mus txog lub caij nws txoj kev yeej tawm plaws xws li ib qho kaj, nws txoj kev yeej tawm plaws xws li ib teg tsau cig cig.

2 Cov kuj cuab yuav pom koj txoj kev yeej, tas cov vaj huv si yuav pom koj lub hwj chim. Luag yuav tis npe tshiab hu koj, yog HUAB TAIS lub ncauj yuav qhia. 3 Koj yuav zoo li ib lub mom teev kub muaj hwj chim nyob hauv HUAB TAIS tes. Zoo li ib lub kaus mom ua vaj nyob hauv koj tus Tswv Ntuj xib teg.

4 Luag yuav tsis hais ntxiv txog koj tias : « Tus luag tso pov tseg. »
Luag yuav hu koj tias : « Kuv lub chaw zoo siab. » Luag hu koj thaj av tias :
« Nkauj nyab tshiab. » Vim koj yuav yog HUAB TAIS chaw zoo siab thiab koj thaj av yuav ua nkauj nyab tshiab.

5 Tus tsim koj, nws yuav qaws koj ua nws txij nkawm zoo li ib tug tub hluas
yuav ib tug ntxhais nkauj xwb. Koj yuav ua koj tus Tswv Ntuj zoo siab lom zem, xws li tus nkauj nyab ua nraug vauv lub chaw sov siab dhia daj dhia luag.

Yog Tswv Ntuj Lo Lus. Nws Lub Txiaj Ntsim

Zaj nyeem 2 :

Hauj Lwm : Tshooj 13 nqe 16-17; 22-25

16 Paj Lug thiaj li sawv tsees, tsa tes, thiab nws hais tias : « Kwv tij His Xas Lais, thiab nej cov uas hwm Tswv Ntuj sawv daws, nej mloog mog !

17 Tus Tswv Ntuj saib peb haiv neeg, tus Tswv Ntuj saib His Xas Lais,
nws xaiv peb cov yawg koob thaud. Lub caij peb haiv neeg khuam nyob Hais Nkws Tos teb, Tswv Ntuj ua kom peb haiv neeg huam vam. Tiam sis nws tso nws lub zog tuaj pab lawv tawm ntawm lub teb chaws ntawd los.

22 Tswv Ntuj muab Xas Ws xyeeb pov tseg, Tswv Ntuj thiaj tsa Das Vis ua lawv tus vaj. Tswv Ntuj ua pov thawj txog Das Vis tias : « Kuv nrhiav tau Das Vis, Yes Xes tus tub. Nws yog tus neeg ntxim kuv siab, nws yuav ua raws li kuv lub siab xav tas huv si. »

23 Nyob hauv Das Vis cov xeeb ntxwv, Tswv Ntuj tsa Yes Xus ua tus cawm neeg los pab His Xas Lais.

24 Zam xub tuaj ua ntej. Nws xub npaj kev rau Yes Xus yuav tuaj. Nws tshaj rau haiv His Xas Lais kom lawv sawv daws txais kab ke ntxuav thiab lees txhaum.

25 Thaum Zam ua nws txoj hauj lwm yuav tiav, nws hais tias : « Kuv tsis yog
tus uas nej xav. Tiam sis tus lawv kuv qab, mas nyem no nws tuaj lawm. Tus
ntawd mas kuv tsis tsim nyog daws nws txoj hlua khau. »

Yog Tswv Ntuj Lo Lus. Nws Lub Txiaj Ntsim

Ntawm Moo Zoo :

Mas Tais : Tshooj 1 nqe 1 txog 24

1 Phau ntawv qhia txog Yes Xus Pleev lub keeb, uas yog Das Vis leej tub thiab yog Has Nplas Has leej tub :

2 Has Nplas Has yug Is Xas Has, Is Xas Has yug Yas Kos, Yas Kos yug Yus Das thiab nws cov kwv tij.

3 Yus Das poj niam hu ua Thas Mas yug Fas Les thiab Ntxas Las. Fas Les yug Es Xas Los, Es Xas Los yug As Las,

4 As Las yug As Mis Nas Das, As Mis Nas Das yug Nas As Xoos, Nas As Xoos yug Xas Moos,

5 Xas Moos poj niam hu ua Las Has yug Npuag Oos, Npuag Oos poj niam hu ua Luv yug Os Npes, Os Npes yug Yes Xes,

6 Yes Xes yug tus vaj Das Vis. Das Vis yuav Us Lis tus poj niam, nws
yug Xas Los Moos,

7 Xas Los Moos yug Los Npuag, Los Npuag yug As Npias, As Npias yug As Xas,

8 As Xas yug Yos Xa Fas, Yos Xas Fas yug Yos Las, Yos Las yug Os Xias,

9 Os Xias yug Yos As Thas, Yos As Thas yug As Kas, As Kas yug Es Xes Kias,

10 Es Xes Kias yug Mas Nas Xes, Mas Nas Xes yug As Moos, As Moos yug Yos Xias,

11 Yos Xias yug Yes Kos Nias thiab Yes Kos Nias cov kwv tij. Thaum
ntawd yog lub caij raug txim nyob Npas Npis Los.

12 Dhau lub caij raug txim nyob Npas Npis Los lawm, Yes Kos Nias yug Xas
Las Thias, Xas Las Thias yug Ntxos Los Npas Npes,

13 Ntxos Los Npas Npes yug As Npis Yus, As Npis Yus yug Es Lias Kis,
Es Lias Kis yug As Ntxos,

14 As Ntxos yug Xas Dos, Xas Dos yug As Khis, As Khis yug Es Lis Us,

15 Es Lis Us yug Es Les As Ntxas, Es Les As Ntxas yug Mas Thas,
Mas Thas yug Yas Kos,

16 Yas Kos yug Yos Xes uas yog Mab Liab tus txiv. Mab Liab yug Yes Xus,
uas luag hu nws ua Leej Pleev.

17 Tas cov tiam neeg huv tib si : txij Has Nplas Has los txog Das Vis,
muaj kaum plaub tiam ; txij Das Vis los txog lub caij raug txim nyob Npas Npis Los, muaj kaum plaub tiam ; txij lub caij raug txim nyob Npas Npis Los txog lub caij Leej Pleev tuaj, muaj kaum plaub tiam.

18 Yes Xus Pleev lub keeb chiv zoo li no : Mab Liab uas yog Yes Xus niam, lawv muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub.

19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm.

20 Thaum nws txiav siab nrauj li ntawd, Huab Tais tus Tshiab tawm los ua npau suav rau nws, thiab hais rau nws tias : « Yos Xes, Das Vis leej tub, koj txhob ntshai coj Mab Liab, koj tus poj niam, los nyob hauv koj tsev. Yog Leej Ntuj Plig Ntshiab ua kom nws xeeb tub.

21 Nws yuav yug ib tug tub, koj yuav tis nws npe hu ua Yes Xus : vim nws yuav cawm nws haiv neeg ntawm lawv cov txhaum. »

22 Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias :

23 Tus ntxhais nkauj xwb yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es, txhais tias : « Tswv Ntuj nrog peb nyob ».

24 Thaum Yos Xes tsim los, nws ua raws li Huab Tais tus Tshiab qhia rau nws : nws coj nws poj niam los nyob hauv nws tsev. 25 Nws tsis paub nws poj niam mus txog hnub Mab Liab yug Mab Liab tus tub. Nws tis tus tub npe hu ua Yes Xus.

Huab Tais Pleev. Lub qab ntuj neeg cav txog koj.

Tsis lis nyeem zaj no lo kuj tau thiab

Ntawm Moo Zoo :

Mas Tais : Tshooj 1 nqe 18 txog 24

18 Yes Xus Pleev lub keeb chiv zoo li no : Mab Liab uas yog Yes Xus niam, lawv muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub.

19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm.

20 Thaum nws txiav siab nrauj li ntawd, Huab Tais tus Tshiab tawm los ua npau suav rau nws, thiab hais rau nws tias : « Yos Xes, Das Vis leej tub, koj txhob ntshai coj Mab Liab, koj tus poj niam, los nyob hauv koj tsev. Yog Leej Ntuj Plig Ntshiab ua kom nws xeeb tub.

21 Nws yuav yug ib tug tub, koj yuav tis nws npe hu ua Yes Xus : vim nws yuav cawm nws haiv neeg ntawm lawv cov txhaum. »

22 Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias :

23 Tus ntxhais nkauj xwb yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es, txhais tias : « Tswv Ntuj nrog peb nyob ».

24 Thaum Yos Xes tsim los, nws ua raws li Huab Tais tus Tshiab qhia rau nws : nws coj nws poj niam los nyob hauv nws tsev. 25 Nws tsis paub nws poj niam mus txog hnub Mab Liab yug Mab Liab tus tub. Nws tis tus tub npe hu ua Yes Xus.

Huab Tais Pleev. Lub qab ntuj neeg cav txog koj.

Teev Ntuj hmo ntuj

Zaj nyeem 1 :

His Xais : Tshooj 9 nqe 1 txog 6

Lub ntsiab lus : Ib tug yug los ua vaj kav Tswv Ntuj haiv neeg

1 Thaum ntawd tsoom pej xeem uas lawv maub hauv qhov tsaus ntuj,
lawv pom ib qho pom kev loj. Ib qho pom kev ci tuaj rau saum cov nyob hauv lub teb chaws tsaus ntuj nti.

2 HUAB TAIS, koj tau ua kom kev hom khaj hlob mus, kom muaj chaw zoo siab ntau. Sawv daws zoo siab nyob ntawm koj xub ntiag, ib yam li cov sau qoob loo zoo siab, ib yam li co tub rog sib faib cov toob xib lawv txeeb tau lawv dhia lom zem.

3 Tus quab uas tsuam lawv, tus ntas nyob saum lawv xub pwg, tus zov
cov neeg nyob txim rab qws, koj muab tsuj, xws li thaum Mas Dias lub hnub
nyoog.

4 Cov suab khau tub rog nrov ncha tas huv si, cov tsho tshaj sab lo ntshav tas huv si, nplaim taws yuav noj, hluav taws yuav hlawv.

5 Vim ib tug me nyuam yug los rau peb, Ntuj pub ib tug tub rau peb. Lub tuam teb nyob saum nws xub pwg. Luag tis nws npe hu ua : tus qhia tswv yim zoo tas nrho, tus Tswv Ntuj siab loj, tus vaj txheeb pub kev thaj yeeb.

6 Das Vis lub theej kiab thiab lub teb chaws nws yuav kav yog ib lub tuam teb dav thiab nyob thaj yeeb tsis muaj caij kawg. Nws yuav muab Txoj Cai thiab kev ncaj los tsa thiab nres nws lub tuam teb, txij no mus txog ib txhiab ib txhis. Tus HUAB TAIS kav tsoom tub rog nws lub siab hlub muaj khib yuav ua tej ntawd.

Yog Tswv Ntuj Lo Lus. Nws Lub Txiaj Ntsim

Zaj nyeem 2 :

Tis Tos : Tshooj 2 nqe 11 txog 14

Lub ntsiab lus : Vim lis cas sawv daws thiaj yuav coj tus yam ntxwv zoo

11 Sawv daws yuav coj tus yam ntxwv zoo, vim Tswv Ntuj lub txiaj ntsim yog lub qhov dej uas txhawv txoj kev cawm txhua leej txhua tus. Tswv Ntuj lub txiaj ntsim tawm los rau sawv daws pom xyeem.

12 Tswv Ntuj lub txiaj ntsim qhia peb kom tso kev tsis hwm Ntuj pov tseg, tso txoj kev ntshaw txog lub sim ceeb no tseg, kom tiam neej no, peb ua neej nyob hauv txoj kev cheem peb lub siab, hauv txoj kev ncaj, thiab kev hwm
Ntuj.

13 Vim peb tos thiab peb vam ntsoov txoj kev kaj siab lug. Peb tos kom
peb tus Tswv Ntuj loj, Yes Xus Pleev uas yog tus cawm peb lub hwj chim tawm los rau qhov muag pom xyeem.

14 Yes Xus Pleev, nws muab nws rau luag ntes, kom nws txhiv tau peb ntawm txhua txoj kev phem. Nws ntxuav ib haiv neeg kom huv los ua nws tug, thiab kub siab ua cov dej num zoo.

Yog Tswv Ntuj Lo Lus. Nws Lub Txiaj Ntsim

Ntawv moo zoo :

Lus Kas : Tshooj 2 nqe 1 txog 14

1 Lub zwj ceeb ntawd, vaj ntxwv Xes Ntxas Aus Nkus Tus tshaj lus
ceeb toom kom tas ntiaj teb txheeb tsoom mej hwm.

2 Thaum txheeb tsoom mej hwm thawj zaug no, yog lub caij Kis Lis
Nyus ua nom tswj Xis Lias teb.

3 Txhua leej txhua tus sawv kev mus, nyias mus sau nyias npe hauv nyias lub nroog.

4 Yos Xes kuj sawv kev hauv lub nroog Nas Xas Les, xeev Nkas Lis Lais
mus pem Das Vis lub nroog hu ua Npes Les Hes, nyob hauv xeev Yus Das, vim Yos Xes yog Das Vis tsev neeg thiab Das Vis caj ces.

5 Yos Xes xav muab Mab Liab lub npe sau nrog nws lub npe, vim
Mab Liab yog tus nws qhaib thiab Mab Liab cev hnyav lawm.

6 Thaum nkawd nyob Npes Les Hes, txog lub caij Mab Liab yuav daws cev.

7 Nws yug nws tus tub, nws muab ntaub qhwv, thiab muab tso pw hauv ib lub dab nyuj, vim lub tsev txais qhua tsis muaj chaw rau nkawd so.

8 Nyob thaj tsam ntawd, muaj ib co neeg zov yaj. Lawv nyob nruab teb. Hmo ntuj, lawv nyob zov lawv pab yaj.

9 Huab Tais tus Tshiab tawm los rau lawv pom, Huab Tais lub hwj chim ci dawb paug ncig lawv, lawv ntshai kawg.

10 Tus Tshiab hais rau lawv tias : « Nej txhob ntshai, vim kuv tuaj xa ib tsab
xov zoo uas yuav ua kom nej zoo siab thiab ib tsoom neeg zoo siab.

11 Hnub no, nyob hauv Das Vis lub nroog, tus Cawm nej yug los lawm, nws yog Leej Pleev, thiab yog Huab Tais.

12 Lub cim yuav ua kom nej paub yog lub cim no : nej yuav pom ib tug me nyuam mos qhwv ntaub pw hauv ib lub dab nyuj. »

13 Ib sij huam, txawm muaj ib pab Tshiab coob coob tuaj nrog tus Tshiab xa
xov cav lus zoo txog Tswv Ntuj tias :

14 « Nyob saum cov txheej ntuj siab, Tswv Ntuj nto meej nto moo, nyob ntiaj
teb, tsoom neeg Tswv Ntuj nyiam, nyob thaj yeeb.

Huab Tais Pleev. Lub qab ntuj neeg cav txog koj.

Teev Ntuj sawv ntxov

Zaj nyeem 1 :

His Xais : Tshooj 62 nqe 11 txog 12

Lub ntsiab lus : Yes Lus Xas Les yog Tswv Ntuj tus nkauj nyab tshiab.

11 Ntawm no yog lo lus HUAB TAIS hais kom nrov mus txog npoo ntiaj teb.
Nej hais rau Xis Yoos tus ntxhais tias : « Saib ntawm no, tus cawm koj tuaj yuav txog. Saib ntawm no, nws tuav koj nqe zog, cov nyiaj them koj tes dej num nyob ntawm nws xub ntiag. »

12 Luag yuav hu lawv tias : « Haiv neeg Ntshiab, cov neeg uas HUAB
TAIS txhiv. » Luag yuav hu koj tias : « Tus uas ntuj nrhiav, lub tsheej uas ntuj
tsis tso pov tseg. »

Yog Tswv Ntuj Lo Lus. Nws Lub Txiaj Ntsim

Zaj nyeem 2 :

Tis Tos : Tshooj 3 nqe 4 txog 7

4 Tab sis, hnub uas tus Tswv Ntuj cawm peb qhib nws lub siab zoo tawm los thiab nws txoj kev nyiam tsoom sid tawm los rau qhov muag pom xyeem,

5 mas nws tsis tshuaj tias peb puas tau ua cov dej num ncaj los tsis tau. Nws tsuas mloog nws lub siab khuv leej neeg. Nws cawm peb nyob hauv cov dej ntxuav neeg, kom peb rov yug los tshiab, thiab rov tshiab tuaj nyob hauv Leej Ntuj Plig Ntshiab.

6 Tswv Ntuj tso Leej Ntuj Plig los nyob puv hauv peb ntau kawg, nyob hauv Yes Xus Pleev, tus cawm peb.

7 Leej Pleev lub txiaj ntsim ua kom peb ntshiab tuaj, ces peb tso siab tau tias peb yuav txais txoj sia nyob mus li los ua peb lub cuab tam

Yog Tswv Ntuj Lo Lus. Nws Lub Txiaj Ntsim

Ntawv moo zoo :

Lus Kas : Tshooj 2 nqe 15 txog 20

Lub ntsiab lus : Yes Xus yug los.

15 Thaum cov Tshiab tso cov zov yaj tseg rov mus saum ntuj lawm, cov zov
yaj sib yaum tias : « Peb mus Npes Les Hes, mus xyuas yam xwm uas Huab Tais tuaj qhia peb ntawd saib. »

16 Ces lawv maj zeeg tuaj mus. Lawv pom Mab Liab thiab Yos Xes, thiab pom tus me nyuam mos pw hauv dab nyuj.

17 Thaum lawv pom li ntawd, lawv piav lo lus uas tus Tshiab tau qhia rau lawv txog tus me nyuam.

18 Tus twg hnov, tus twg kuj qhuas txog tej lus uas cov zov yaj hais rau lawv.

19 Hos Mab Liab, nws ua tib zoo khaws tej lus no huv si cia rau nruab siab.

20 Cov zov yaj rov mus tsev, lawv foom koob meej thiab cav lus zoo
txog Tswv Ntuj vim tas txhua yam lawv tau pom thiab tau hnov raws li Ntuj qhia lawv.

Huab Tais Pleev. Lub qab ntuj neeg cav txog koj.

Teev ntuj hnub 25

Zaj nyeem 1 :

His Xais : Tshooj 52 nqe 7 txog 10

Lub ntsiab lus : Cas lus zoo txog tus tshaj tias Huab Tais rov tsa Xis Yoos.

7 Tus xa lub Moo Zoo pem hauv sab tuaj, nws ob txhais taw zoo nkauj. Nws tshaj tias kev thaj yeeb tuaj lawm ! Nws qhia sawv daws paub tias
kev noj qab nyob zoo tuaj txog lawm, nws tuaj tshaj kev cawm neeg.
Nws hais rau Xis Yoos tias : « Koj tus Tswv Ntuj ua vaj ! »

8 Koj mloog mas ! Koj cov neeg zov keeb tsa suab, lawv ua ke qw zoo siab vim lawv pom xyeem ntawm qhov muag, HUAB TAIS rov qab los nyob Xis Yoos.

9 Yes Lus Xas Les cov tsev uas tau pob tas, nej sawv daws luag ua suab ntas ntua, vim HUAB TAIS nplij nws haiv neeg, nws txhiv Yes Lus Xas Les.

10 Tus HUAB TAIS Ntshiab loj npab ntshuas nyob ntawm txhua haiv neeg xub ntiag. Npoo ntuj npoo ntiaj teb pom peb tus Tswv Ntuj txoj kev cawm neeg.

Yog Tswv Ntuj Lo Lus. Nws Lub Txiaj Ntsim

Zaj nyeem 2 :

Hes Nplaws : Tshooj 1 nqe 1 txog 6

Lub ntsiab lus : Tswv Ntuj xa nws Leej Tub tuaj cev nws cov lus rau peb, Tswv Ntuj Leej Tub loj dua Ntuj tsoom Tshiab.

1 Puag thaum ub, Tswv Ntuj kom cov Yaj Saub siv ntau txoj kev los
cev nws cov lus rau peb cov yawg koob ntau zaus kawg.

2 Lub zim txwv no, txog lub zwj ceeb kawg lawm, Tswv Ntuj thiaj tso nws Leej Tub tuaj cev nws cov lus rau peb. Tswv Ntuj tsa Leej Tub ua tus txais lub cuab tam tas huv tib si, thiab nws nrog Leej Tub tsim lub sim ceeb.

3 Leej Tub yog Tswv Ntuj lub hwj chim ci ntsa iab, yog Tswv Ntuj tus duab. Leej Tub lo lus muaj zog, Leej Tub nres tas lub sim ceeb huv tib si. Nws ntxuav txhua txoj kev txhaum pov tseg huv tib si, ces nws zaum ntawm tus Tswv Ntuj muaj hwj huam sab xis nyob txheej ntuj saud.

4 Nws loj dua ib tsoom Tshiab, vim nws tau txais ib lub npe zoo, lub npe muaj hwj chim loj dua cov Tshiab tej npe huv tib si.

5 Nej xav saib puas muaj ib tug Tshiab uas Tswv Ntuj tau hais rau nws tias :
“Koj yog kuv Leej Tub, hnub no kuv xeeb koj.” Thiab Tswv Ntuj tseem hais rau nws tias : “Kuv yog nws Txiv, nws yog kuv Leej Tub.”

6 Thaum Tswv Ntuj xa nws Leej Tub tuaj ua tus Xub Yug los nyob hauv lub
sim ceeb no, mas nws tseem rov qab hais dua tias : “Kuv xav kom tas Tswv Ntuj tsoom Tshiab hawm nws.”

Yog Tswv Ntuj Lo Lus. Nws Lub Txiaj Ntsim

Ntawm Moo Zoo :

Zam : Tshooj 1 nqe 1 txog 18

Lub ntsiab lus : Leej Lo Lus lub hwj chim.

1 Thaum lub hauv paus, Leej Lo Lus yeej nyob txawm lawm. Leej Lo
Lus nyob ze Tswv Ntuj. Leej Lo Lus yog Tswv Ntuj.

2 Thaum lub hauv paus, Leej Lo Lus nyob ze Tswv Ntuj.

3 Tas ib puas tsav yam tshwm los vim nws. Yog tsis muaj nws, mas tsis muaj ib yam dab tsi tshwm tau los nyob.

4 Txoj sia xeeb txawm nyob hauv nws. Txoj sia yog neeg qhov pom kev.

5 Ces qhov pom kev ci hauv qhov tsaus ntuj, qhov tsaus ntuj thaiv tsis tau qhov pom kev.

6 Muaj ib tug neeg tuaj, yog Tswv Ntuj xa nws tuaj. Nws lub npe hu ua Zam.

7 Nws yog ib tug tim khawv tuaj ua pov thawj txog qhov pom kev, kom txhua leej txhua tus ntseeg vim nws. 8 Tus ntawd tsis yog qhov pom kev, tab sis nws yuav ua tim khawv txog qhov pom kev.

9 Qhov pom kev uas yog qhov tseeb, ci tuaj ziab txhua leej tib neeg, nws tuaj
nyob hauv lub sim ceeb.

10 Nws yeej nyob txawm hauv lub sim ceeb no. Yog nws ua kom muaj lub sim ceeb no tshwm los, tsis kav lub sim ceeb tsis paub nws.

11 Nws los nyob hauv nws tsev, tsis kav nws cov neeg tsis txais nws.

12 Tab sis, cov neeg uas txais nws thiab ntseeg txog nws lub npe, mas nws pub hwj huam rau lawv kom los ua Tswv Ntuj cov me nyuam tas huv tib si.

13 Cov ntawd, yog cov uas tsis yug ntawm ntshav los, tsis yog lub cev nqaij xav kom lawv yug los, thiab kuj tsis yog neeg lub siab xav kom lawv yug los. Lawv yog cov yug ntawm Tswv Ntuj los.

14 Ces Leej Lo Lus xeeb los ua ib lub cev neeg, nws nrog peb nyob. Peb tau ntsia ntsoov nws lub hwj chim. Yog lub hwj chim uas Leej Tub twm zeej tau ntawm Leej Txiv los. Leej Tub muaj txiaj ntsim thiab qhov tseeb nyob puv hauv nws.

15 Zam ua tim khawv txog Leej Lo Lus : Zam tshaj hais tias : « Tus no yog tus kuv hais txog tias, tus uas lawv kuv qab tuaj, mus ua kuv ntej lawm,
vim nws xub nyob dua kuv. »

16 Peb puav leej tau txais qhov txhawv nphau nphwv hauv nws los : peb txais txiaj ntsim sis laub sis lug.

17 Txoj Cai yog Mais Xes muab, hos lub txiaj ntsim thiab txoj kev tseeb yog Yes Xus Pleev coj tuaj.

18 Tsis muaj leej twg tau pom Tswv Ntuj ib zaug. Tab sis Leej Tub Twm Zeej uas yug ntawm Tswv Ntuj los, thiab nws nyob nraim hauv Leej Txiv lub xub ntiag, nws ua kom peb paub Tswv Ntuj.

Huab Tais Pleev. Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem ib :

Xas Muas : Tshooj 7 nqe : 1-5; 8b-12; 14a-16

Lub ntsiab lus : Das Vis xav tias nws yuav tsum txhim ib lub tsev rau Tswv Ntuj nyob, thiaj phim. Tab sis Tswv Ntuj haus rau Das Vis tias Das Vis yuav muaj koob meej yog vim nws tus xeeb ntxwv Yes Xus.

1 Thaum Das Vis tuaj nyob hauv nws tsev thiab HUAB TAIS pab nws rhuav cov yeeb ncuab nyob ib ncig ntawm nws tib si, ces tus vaj Das Vis hais rau tus Yaj Saub Nas Taas tias : « Koj ntsia saib ! Kuv nyob hauv ib lub tsev ntoo faj khaum, hos Tswv Ntuj lub Xab Cog Lus nyob hauv ib lub Tsev Tsam Phooj xwb! »

3 Nas Taas teb rau tus vaj tias : « Koj ua raws li koj siab nyiam, vim
HUAB TAIS nrog koj nyob. »

4 Hmo ntawd, Nas Taas hnov Tswv Ntuj lo lus no :

5 « Koj mus hais rau kuv tus tub txib Das Vis tias HUAB TAIS hais li no : Puas yog koj yuav txhim ib lub tsev rau kuv nyob txawm hauv ?

8 Nas Taas, nyem no koj mus hais rau kuv tus tub txib Das Vis tias : HUAB TAIS Xas Npas Os hais li no : Kuv yog tus tau rho koj hauv cov tshav zaub thiab hauv nruab nrab pab yaj los tsa ua tus tswv saib kuv tsoom pej xeem His Xas Lais.

9 Kuv tau nrog koj ua tas puas tsav yam hauj lwm. Kuv tau rhuav koj cov yeeb ncuab tib si nyob ntawm koj xub ntiag. Kuv yuav pub kom koj lub npe nto moo loj cuag li cov vaj loj tshaj nyob thoob tas ntiaj teb.

11 HUAB TAIS yuav ua kom koj loj. HUAB TAIS yuav tsim ib tsev neeg los pub rau koj.

12 Thaum koj sim neej dua tas koj yuav mus nrog koj cov poj yawm txwv koob pw, kuv yuav cia koj ib tug xeeb ntxwv tawm ntawm koj roj ntsha los hloov koj ua vaj. Kuv yuav nres nws txoj kev ua vaj kom nyob ruaj nreb.

14 Kuv yuav ua nws txiv, nws yuav yog kuv leej tub. Yog nws ua qhov phem,
kuv yuav xuas ib tug pas los muab txim rau nws, kuv yuav ntaus nws xws li neeg ntaus neeg. 15 Tab sis kuv yuav tsis thau kuv lub txiaj ntsim ntawm nws los xws li kuv tau thau tus xub ua vaj dua koj.

16 Koj tsev neeg thiab koj txoj kev ua vaj yuav nyob mus li nyob ntawm kuv
xub ntiag. Koj lub theej kiab yuav nyob ruaj nreb mus ib txhis. »

Yog Tswv Ntuj Lo Lus. Nws Lub Txiaj Ntsim

Zaj nyeem ob :

Los Mas : Tshooj 16 nqe 25-27

Lub ntsiab lus : Txij thaum Yes Xus yug los nyob ntiaj teb no peb paub txoj hmoob zoo uas Tswv Ntuj ib txwm npaj rau lub ntiaj teb neeg

25 Tswv Ntuj yog tus muaj hwj huam, nws ua kom peb nyob ruaj nreb, raws li lub Moo Zoo kuv xa tuaj, thiab raws li tus Yes Xus Pleev uas kuv tshaj txog. Yog txoj kev qhib ib yam tob, uas Ntuj muab zais tob tob txij lub hauv paus los.

26 Tiam sis, nyem no, Ntuj muab rau sawv daws pom xyeem. Cov Ntawv twb xub hais txog cov txuj ci tob tob zais ntshis ntawd. Tswv Ntuj yeej ib txwm txiav tias, yuav ceeb toom cov txuj ci tob tob ntawd rau txhua haiv neeg paub, kom rub tau sawv daws los ua neeg mloog lus nyob hauv txoj kev ntseeg.

27 Tswv Ntuj ua li ntawd, vim nws tib leeg yog tus thoob tsib. Thov kom Tswv Ntuj muaj koob meej nyob hauv Yes Xus Pleev, mus txog txhiab niag tim puas xyoo. Ua li !

Yog Tswv Ntuj Lo Lus. Nws Lub Txiaj Ntsim

Ntawm Moo Zoo :

Lus Kas : Tshooj 1 nqe 26-38

Lub ntsiab lus : Yog vim Mab Liab zoo siab ua Tswv Ntuj ntxhais txib, ces nws tau xeeb Yes Xus. Yog vim peb zoo siab uas Tswv Ntuj cov tub txib, peb thiaj muaj Yes Xus nyob hauv peb.

26 Leej Ntuj Plig Ntshiab tshoj nws ces nws paub tias yog nws tsis tau pom Huab Tais tus Pleev, mas nws yuav tsis tuag.

27 Leej Ntuj Plig coj nws tuaj nyob hauv lub Tuam Tsev Teev Ntuj. Thaum Mab Liab thiab Yos Xes nkawd coj tus me nyuam mos Yes Xus tuaj ua cov kab ke raws Txoj Cai, 28 Xis Mes Oos txais tus me nyuam los rau hauv nws ob txhais npab, nws cav lus zoo txog Tswv Ntuj tias :

29 Txiv Tswv, nyem no koj tso koj tus tub txib mus kaj lug, raws li koj lo lus,

30 vim kuv qhov muag tau pom koj txoj kev cawm neeg, 31 uas koj npaj nyob ntawm ib tsoom haiv neeg xub ntiag,

32 yog qhov pom kev tawm tuaj kaj cov pej kum haiv neeg, yog koj tsoom pej xeem His Xas Lais lub koob meej.

33 Yes Xus niam thiab txiv qhuas cov lus nkawd hnov hais txog tus me nyuam.

34 Xis Mes Oos foom hmoov zoo rau lawv, nws hais rau Mab Liab, Yes Xus
niam tias : « Koj ntsia ! Tus me nyuam no yuav ua chaw rau ntau leej His Xas Lais ntog thiab ntau leej rov sawv. Nws yog ib lub cim ua kom sawv daws sib cav.

35 Hos ntawm koj, mas ib rab ntaj yuav hno koj tus plig, kom xwv tej lus uas coob leej xav tuaj nruab siab tawm los rau sawv daws paub.

36 Tseem muaj ib tug yaj saub poj niam, hu ua As Nas, yog Fas Nus Ees tus
ntxhais, xeem As Ntxes. Nws lub hnub nyoog laus kawg. Dhau lub caij nws
nyob ua nkauj xwb lawm, mas nws nrog nws tus txiv nyob xya xyoo,

37 ces nws ua poj ntsuam laus li ntawd txog yim caum plaub xyoos. Nws tsis nrug ntawm lub Tuam Tsev Teev Ntuj li. Nws yoo mov thiab hais cov zaj teev Ntuj los hawm Tswv Ntuj thawm hnub thawm hmo.

38 Tib lub sij hawm ntawd, As Nas kuj tuaj nyob ntawd thiab, nws
cav lus zoo txog Tswv Ntuj, nws hais txog tus me nyuam rau txhia leej txhia tus uas tos txog txoj kev txhiv Yes Lus Xas Les.

Huab Tais Pleev. Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem ib :

His Xais : tshooj 61 nqe 1-2a; 10-11

Lub ntsiab lus : Yes Xus yog tus ua kom cov neeg txom nyem rov zoo siab tuaj. Cov neeg ntseeg txog Yes Xus lawv yuav nrog Yes Xus ua kom tsoom neeg txom nyem dim ntawm kev ntxhov siab.

1 HUAB TAIS Tswv Ntuj lub tswv yim nyob saum kuv, vim HUAB
TAIS pleev kuv. Nws tso kuv xa lub Moo Zoo rau cov neeg txheej qis, tshaj kev cawm rau cov thoj nam nyob pej kum teb, tshaj kev twj lij rau cov neeg nyob hauv tsev loj faj.

2 HUAB TAIS xa kuv mus tshaj HUAB TAIS ib lub xyoo pub txiaj ntsim, tshaj tias muaj ib hnub uas peb tus Tswv Ntuj yuav rob caub. HUAB TAIS xa kuv mus nplij cov neeg ntoo xyom kom sawv.

10 Kuv zoo siab tag nrho, kuv dhia daj dhia luag nyob hauv HUAB TAIS. Kuv tus plig dhia hom khaj nyob hauv kuv tus Tswv Ntuj, vim Tswv Ntuj muab kev cawm cov tsoos rau kuv hnav, nws muab kev yeej lub tsho tshaj sab qhwv kuv, xws li tus nraug vauv tshiab kho nws hauv phuam, xws li tus nkauj nyab muab npauj kub npauj nyiag los coj.

Yog Tswv Ntuj Lo Lus. Nws Lub Txiaj Ntsim

Zaj nyeem ob :

Tes Xas Los Nis : Tshooj :5 Nqe 16 txog 24

Lub ntsiab lus : Cov neeg ntseeg yuav zoo siab luag nyav mus li. Lawv yuav xyiv fab mloog Leej Ntuj Plig qhia tej txoj kev tshiab ua Yes Xus tim khawv.

16 Nej ua siab kaj lug mus li.

17 Nej teev Ntuj tsis tseg. 18 Tab txawm muaj xwm dab tsi tshwm sim tuaj, los nej yuav ua Ntuj tsaug mus li. Tswv Ntuj lub siab xav kom nej ua li ntawd nyob hauv Yes Xus Pleev.

19 Nej txhob tua Leej Ntuj Plig xws li tuateeb.

20 Nej txhob thuam lub txiaj ntsim ua Yaj Saub. Nej hnov yam twg, mas nej tshuaj saib puas tseeb tso : yam twg zoo, mas nej khaws tseg.

22 Nej caiv txhua txoj kev phem mog.

23 Thov kom tus Tswv Ntuj siab kaj lug ua kom nej ntshiab tuaj. Thov kom nej txuag tau nej lub tswv yim, nej tus plig, kom nej lub cev txhob muaj chaw xyeej, mus txog lub caij peb tus Huab Tais Yes Xus Pleev rov los.

24 Tus hu nej, nws pheej xeeb : nws yuav ua xws li kuv hais saum no.

Yog Tswv Ntuj Lo Lus. Nws Lub Txiaj Ntsim

Ntawm Moo Zoo :

Zam : tshooj : 1 nqe : 6-8; 19-28

Lub ntsiab lus : Tus tshaj Yes Xus lub Moo Zoo nws yuav nco txog Yes Xus lub koob meej xwb. Yus txhob nco txog yus lub koob meej.

6 Muaj ib tug neeg tuaj, yog Tswv Ntuj xa nws tuaj. Nws lub npe hu ua Zam.

7 Nws yog ib tug tim khawv tuaj ua pov thawj txog qhov pom kev, kom txhua leej txhua tus ntseeg vim nws.

8 Tus ntawd tsis yog qhov pom kev, tab sis nws yuav ua tim khawv txog qhov pom kev.

19 Thaum cov Yus Das xa ib co leej choj thiab ib co les vis tuaj ntawm Yes Lus Xas Les mus nug Zam hais tias : « Koj yog leej twg ? » Mas Zam ua tim khawv zoo li no :

20 Zam lees, nws tsis zais, nws lees tias : « Kuv tsis yog Leej Pleev. »

21 Lawv nug Zam tias : « Ua li koj yog leej twg ? Koj puas yog Es
Lias ? » Zam hais tias : « Kuv tsis yog. » « Koj puas yog tus Yaj Saub ? » Zam teb tias : « Tsis yog. »

22 Lawv thiaj hais rau nws tias : « Koj yog leej twg ? Peb yuav tsum coj ib
lo lus teb rov mus rau cov xa peb tuaj. Koj hais dab tsi txog koj ? »

23 Zam hais tias : « Kuv yog tus neeg nyob hauv teb chaws quav poj lub suab qw tias : Nej ua kom Huab Tais txoj kev rov tiaj, raws li yaj saub His Xais tau hais tseg. »

24 Cov uas lawv xa tuaj yog ib co Fas Lis Xais.

25 Lawv nug Zam tias : « Koj tsis yog Leej Pleev, tsis yog Es Lias, thiab tsis yog tus Yaj Saub, vim li cas koj thiaj ua kab ke ntxuav ? »

26 Zam teb rau lawv tias : « Kuv ua kab ke ntxuav nyob hauv dej. Hos nyob hauv nej, muaj ib tug uas nej tsis paub,

27 tus ntawd yuav lawv kuv qab tuaj, kuv tsis tsim nyog daws nws
txoj hlua khau. »

28 Tej ntawd tshwm sim tuaj nyob Npes Tas Nias, nyob sab dej Yos Las Das tim ub, ntawm thaj chaw uas Zam ua kab ke ntxuav.

Huab Tais Pleev. Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem ib :

His Xais : tshooj 40 nqe 1-5; 9-11

Lub ntsiab lus : Tswv Ntuj rov tuaj xyuas nws hais neeg mus li. Nws tuaj saib cov ntseeg txog nws xws li ib tug tswv saib nws cov yaj.

1 Nej tus Tswv Ntuj hais tias : « Nej nplij kuv haiv neeg, nej nplij lawv mas !

2 Nej hais lus rau hauv Yes Lus Xas Les nruab siab. Nej hais nrov
nrov rau nws tias nws lub caij ua qhev dhau lawm. Nws them txim txhaum tas lawm. Cov xwm uas nws txais ntawm HUAB TAIS txhais tes los them nws cov txhaum twb tshaj nws cov txhaum ob npaug lawm. »

3 Muaj ib lub suab qw tias : « Nej npaj ib txog kev hauv teb chaws suab puam rau Tswv Ntuj taug. Nej ncaws ib txog kev ncaj hauv cov teb chaws quav poj rau peb tus Tswv Ntuj.

4 Nej txhub cov hav tob kom siab, kom cov roob thiab cov hauv toj cia li qis, kom cov tiaj muaj pov toj, hloov ua hav tiaj tus yees, kom cov toj ntxhab hloov ua tshav puam.

5 HUAB TAIS lub hwj chim yuav tawm los. Txhua tus muaj lub cev
nqaij puav leej yuav pom lub hwj chim, vim HUAB TAIS lub ncauj tau hais lus.

9 Koj yog tus fi tsab xov zoo no mus rau Xis Yoos. Koj nce mus saum ib lub roob siab, koj tsa suab qw nrov nrov mas ! Koj yog tus fi tsab xov zoo mus rau Yes Lus Xas Les, koj txhob ntshai cuab suab. Koj hais rau cov nroog Yus Das tias : « Ntsia ntawm no saib, yog nej tus Tswv
Ntuj. »

10 Saib HUAB TAIS Tswv Ntuj nyob ntawm no. Nws tuaj txog, nws muaj hwj huam ! Nws txhais npab ua tswv kav sawv daws. Nej ntsia tus nqi zog nrog nws. Cov nyiaj nws them nyob ntawm nws xub ntiag.

Yog Tswv Ntuj Lo Lus. Nws Lub Txiaj Ntsim

Zaj nyeem ob :

Pob Zeb : tshooj 3 nqe 8-14

Lub ntsiab lus : Huab Tais ua siab ntev tos kom peb tig los yuav lub siab tshiab, tab sis peb txhob ncua ntev vim peb paub tias yog thaum twg Huab Tais tuaj tos peb.

8 Cov zoo nyiam, nej tsis txhob ua zoo ib yam li nej tsis to taub tias, nyob ntawm Huab Tais xub ntiag, ib hnub yog zoo li ib txhiab xyoo, ib txhiab xyoo yog zoo ib yam li ib hnub.

9 Huab Tais tsis ncua lo lus nws cog xws li qee leej uas lawv thuam tias Huab Tais ua yam twg mas nws ua qeeb qeeb. Tab sis, yog vim Huab Tais ua siab ntev rau nej, nws tsis xav kom ib tug ploj li, nws tsuas xav kom sawv daws nyob mus txog hnub uas lawv tig los hloov lub siab tshiab.

10 Huab Tais lub Hnub Nyoog yuav los txog xws li ib tug tub sab. Hnub ntawd, ib lub suab xuav nrov nrov, yuav ua txheej ntuj yaj tas nrho, txhua tsav txhua yam yuav kub hnyiab thiab yuav yaj tas, lub ntiaj teb thiab tas ib puas tsav yam dej num hauv ntiaj teb yuav kub hnyiab thiab
yaj tas.

11 Yog vim txhua yam yuav yaj tas li ntawd, mas nej yuav tsum coj tus yam ntxwv ntshiab, thiab yuav teev Ntuj tsis tseg.

12 Vim nej tos Tswv Ntuj lub Hnub Nyoog, mas nej xav kom Tswv
Ntuj lub Hnub Nyoog los txog sai dua. Hnub ntawd cov txheej ntuj yuav kub hnyiab thiab yuav plam tas, hluav taws yuav kub txhua tsav txhua yam yaj tas huv tib si.

13 Peb tos txog ib lub ntuj tshiab thiab ib lub ntiaj teb tshiab, raws li Tswv Ntuj tau cog lus tias : txoj kev ncaj yuav nyob txawm hauv lub ntuj tshiab thiab lub ntiaj teb tshiab ntawd.

14 Cov zoo nyiam, lub caij nej tos no, nej yuav rau siab ua kom Tswv Ntuj pom tias nej tsis tsuas ib tee qias, thiab tsis muaj ib qho xyeej, ces thaum Huab Tais los txog, nws yuav pom nej nyob hauv txoj kev kaj siab lug.

Yog Tswv Ntuj Lo Lus. Nws Lub Txiaj Ntsim

Ntawm Moo Zoo :

Mas Kos : tshooj : 1 nqe : 1 txog 8

Lub ntsiab lus : ¨Mas Kos ntuas peb kom peb tig los yuav lub siab tshiab tos Yes Xus yuav tuaj. Yog peb coj tus yam ntxwv them txim txhaum mas peb lub siab yuav kaj.

1 Cov lus chiv lub Moo Zoo hais txog Yes Xus Pleev, Tswv Ntuj Leej
Tub.

2 Muaj raws li cov lus nyob hauv yaj saub His Xais phau ntawv, nws hais tias : Kuv xa kuv tus tub tshaj xo mus ua koj ntej. Nws yuav npaj koj txoj kev.

3 Tus qw hauv teb chaws quav poj lub suab hais tias : Nej npaj txoj kev rau Huab Tais, nej kho nws cov hauv kev kom ncaj.

4 Zam, tus ua kab ke Ntxuav, tawm tuaj nyob teb chaws quav poj, nws tshaj ib co kab ke ntxuav pab hloov siab kom Ntuj zam txhaum.

5 Tas cov neeg hauv teb chaws Yus Das thiab tas cov nyob Yes Lus Xas Les tuaj cuag nws. Lawv lees txhaum, ces Zam ntxuav lawv nyob hauv
tus dej Yos Las Das.

6 Zam hnav plaub ntxhuav, nws sia ib daim tawv tsiaj ncig nws lub duav. Nws noj kooj thiab zib mu qus.

7 Zam tshaj tias : « Tus lawv kuv qab tuaj, nws muaj zog dua kuv; kuv tsis tsim nyog khoov daws nws txoj hlua khau.

8 Ntawm kuv, kuv muab dej los ntxuav nej, hos nws mas nws yuav ntxuav nej nyob hauv Leej Ntuj Plig Ntshiab.

Huab Tais Pleev. Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem ib :

His Xais : tshooj 63 nqe 16b; 17;19b tshooj 64 nqe 2b txog 7

Lub ntsiab lus : Peb thov kom Tswv Ntuj zam txhaum rau peb xws li nws xub ua ntau zaus rau cov His Xas Lais thaud, peb tso siab, vim Tswv Ntuj nqes los nrog neeg nyob.

16 HUAB TAIS, koj yog peb txiv. Has Nplas Has tsis paub peb lawm. His Xas Lais zeem tsis tau peb. HUAB TAIS, tus ua peb txiv yog koj. Txij txheej thaud los, koj lub npe hu ua « Tus txhiv peb. »

17 HUAB TAIS, yog vim li cas koj thiaj ua kom peb poob zoo nyob deb ntawm koj txoj kev ? Yog vim li cas koj thiaj ua kom peb lub siab tawv thiab tsis xav hwm koj ? Thov koj rov los mas, vim koj cov tub txib thiab cov xeem neeg ua koj lub cuab tam.

19 Tau ntev los lawm peb yog cov neeg uas koj tsis tswj, peb yog cov neeg tsis tuav koj lub npe hu txog koj. Ab ! Kheev lam koj nqes los, mas cov roob yuav muaj dej ntws ua ntshua niab.

3 Tsis muaj ib lub pob ntseg tau hnov, tsis muaj ib lub qhov muag tau pom lwm tus Tswv Ntuj ua zoo npaum li koj rau cov neeg tso siab rau
koj.

4 Koj mus cuag cov neeg, mus taug kev ncaj thiab nco nraim koj tej kev. Saib, koj tau npau taws, peb tau ua txhaum. Tau ntev los peb tsis npuab koj.

5 Peb sawv daws tau ua zoo li tus neeg tsis huv. Peb tej num zoo li ib co khaub ncaws tsuas. Peb sawv daws ntsws xws li cov nplooj ziab tshav. Peb cov txhaum ntsawj peb xws li cua.

6 Tsis muaj leej twg hu txog koj lub npe, tsis muaj leej twg tsim dheev los nyob khov kho hauv koj. Vim koj muab koj lub ntsej muag zais, koj tso peb zwm rau peb cov txhaum.

7 Tsis kav, HUAB TAIS koj yog peb txiv. Peb yog av luaj, koj yog tus puab
peb. Yog koj txhais tes puab peb sawv daws.

8 HUAB TAIS, koj txhob npau taws heev dhau. Koj txhob nco txog peb cov txhaum mus li. Thov koj ntsia mas ! Peb sawv daws yog koj haiv neeg.

Yog Tswv Ntuj Lo Lus. Nws Lub Txiaj Ntsim

Zaj nyeem ob :

Kos Lis Nthos : Tshooj : 1 nqe : 3 txog 9

Lub ntsiab lus : Thaum peb ntsib kev ntseeg thawj zaug peb tau txais Yes Xus lub txiaj ntsim. Tas peb sid peb yuav ua kom kev paub Yes Xus thiab kev nyiam Yes Xus hlob mus zuj zus txog hnub peb yuav rov mus pom Yes Xus.

3 Thov kom peb Txiv Tswv Ntuj thiab Huab Tais Yes Xus Pleev pub txiaj ntsim thiab kev thaj yeeb rau nej.

4 Kuv ua Tswv Ntuj tsaug tsis tseg, vim lub txiaj ntsim uas Tswv Ntuj tau pub rau nej, nyob hauv Yes Xus Pleev.

5 Vim nej nplua nuj nyob hauv Yes Xus : nej tau Lo Lus muaj nqe li nyiaj, nej tau zaj txuj ci muaj nqe li kub,

6 vim li ntawd, nej tej hauj lwm ua Leej Pleev tim khawv muaj zog tuaj.

7 Tsis tshuav ib lub txiaj ntsim uas nej tsis tau txais, thaum nej tos peb tus Huab Tais Yes Xus Pleev yuav tawm los rau pom xyeem.

8 Nws yuav ua kom nej nyob ruaj nreb txog qhov kawg, kom hnub uas peb tus Huab Tais Yes Xus Pleev rov los txog, mas tsis muaj ib qho xyeej nyob hauv nej.

9 Tswv Ntuj yog tus pheej xeeb : yog nws hu nej kom los nrog nws Leej Tub, peb tus Huab Tais Yes Xus Pleev koom ib txog hmoov.

Yog Tswv Ntuj Lo Lus. Nws Lub Txiaj Ntsim

Ntawm Moo Zoo :

Mas Kos : tshooj : 13 nqe : 33 txog 37

Lub ntsiab lus : Peb yuav ceev faj xws li cov neeg zov hmo : vim niaj hnub Yes Xus tuaj cuag peb. Yog peb txawj pom Yes Xus nyob hauv cov xwm niaj hnub tshwm sim, hnub kawg peb yuav tsis ntshai Yes Xus.

33 Nej ceev faj, nej zov hmo, vim nej tsis paub tias thaum twg thiaj yog lub sij hawm.

34 Zoo li ib tug neeg tawm rooj mus deb : Nws tso nws vaj tse cia, nws
muab cai rau cov tub txib, nws faib ib leeg ib txog hauj lwm. Nws kom tus zov qhov rooj zov hmo.

35 Nej zov hmo mog, vim nej tsis paub thaum twg tus tswv tsev yuav rov los, puas yog thaum tsaus ntuj, los thaum ib tag hmo, thaum qaib qua los thaum kaj ntug.

36 Tsam nws los txog thaum nej tsis nco faj, nws pom nej tsaug zog.

37 Qhov kuv hais rau nej no, kuv kuj hais rau tas sawv daws huv si : « Nej zov hmo mog ! »

Huab Tais Pleev. Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem ib :

Es Xes Kias : tshooj 34 nqe 11,12; 15-17

Lub ntsiab lus : Yes Xus yog tus Vaj hlub tsoom ntseeg xws li tus tswv zov yaj hlub nws pab yaj.

11 HUAB TAIS Tswv Ntuj hais li no : Zaum no, tus yuav tsob hwb kuv pab yaj yog kuv. Kuv yuav mus tshuaj xyuas.

12 Kuv yuav mus tshuaj xyuas kuv pab yaj zoo li ib tug tswv zov yaj, thaum nws rov nrhiav tau nws cov yaj uas tawg ua lwj ua liam, thaum uas ntuj tsaus pos huab nti.

15 HUAB TAIS Tswv Ntuj hais li no: Yog kuv yuav coj kuv cov yaj mus nog zaub, thiab ua kom lawv tau so.

16 Kuv yuav nrhiav tus poob zoo, kuv yuav coj tus ncaim npoj rov los poo npoj, kuv yuav qhwv tus raug qhov txhab, kuv yuav kho tus muaj mob kom zoo. Tus yaj rog thiab noj qab nyob zoo kuv yuav saib
xyuas nws. Kuv yuav coj cov yaj mus nog zaub raws txoj kev ncaj.

Yog Tswv Ntuj Lo Lus. Nws Lub Txiaj Ntsim

Zaj nyeem ob :

Kos Lis Nthos : Tshooj : 15 nqe : 20-26; 28

Lub ntsiab lus : Tswv Ntuj tso tas puas tsav yam kom zwm rau Yes Xus. Thiab Yes Xus coj tas txhia leej txhia tus kom tuaj zwm rau Tswv Ntuj.

20 Tab sis tsis yog zoo li ntawd. Leej Pleev sawv hauv cov tuag rov los lawm tiag. Nyob hauv ib tsoom neeg uas mus tsaug zog lawm, mas Leej Pleev yog thawj tug uas tau sawv rov los.

21 Tim ib tug neeg, mas txoj kev tuag thiaj li txeem los. Tab sis ib tug neeg rov coj tau txoj kev sawv rov los rau cov tuag.

22 Sawv daws tuag nyob hauv As Das. Tab sis sawv daws yuav ciaj rov los nyob hauv Leej Pleev.

23 Nyias muaj nyias lub sij hawm sawv rov los : tus xub sawv,
yog Leej Pleev, nws yog tus ntaus thawj. Thaum txog Leej Pleev lub Hnub Nyoog tawm rov los, mas Leej Pleev cov neeg yuav sawv rov los.

24 Thaum ntawd yuav yog lub zim txwv kawg : Leej Pleev yuav rhuav cov vaj, cov tswj lub ntiaj teb, thiab cov muaj hwj huam, ces nws yuav muab lub hwj chim ua vaj cob rov rau Leej Txiv Tswv Ntuj.

25 Leej Pleev yuav ua vaj mus txog lub caij Leej Txiv tso tsoom yeeb ncuab tas tib si rau hauv nws qab xib taws.

26 Tus yeeb ncuab kawg, uas nws yuav rhuav, yog txoj kev tuag.

28 Thaum Leej Tub tau tas puas tsav yam nyob hauv nws qab xib taws lawm, mas nws kuj yuav zwm rau tus uas tau muab tas txhua tsav txhua yam los zwm rau nws, kom Tswv Ntuj nyob hauv txhua leej txhua tus.

Yog Tswv Ntuj Lo Lus. Nws Lub Txiaj Ntsim.

Ntawm Moo Zoo :

Mas Tais : tshooj : 25 nqe : 31 txog 46

31 “Thaum Neeg Leej Tub yuav rov los, nws yuav muaj koob meej. Tas tsoom Tshiab yuav nrog nws los. Nws yuav zaum saum nws lub theej kiab muaj koob meej.

32 Tas ib tsoom haiv neeg yuav sib sau nyob ntawm nws xub ntiag. Nws
yuav cais tsoom neeg xws li tus zov yaj cais cov yaj ntawm cov tshis.

33 Nws yuav cia cov yaj rau ntawm nws sab xis, cia cov tshis rau ntawm nws sab laug.

34 Ces tus Vaj yuav hais rau cov nyob sab xis tias :
“Nej los mog ! Nej yog cov uas kuv Txiv pub txoj hmoov zoo rau. Nej txais lub Ceeb Tsheej uas Ntuj npaj tseg rau nej txij puag thaum pib tsim lub sim ceeb los ua nej tug.

35 Vim tias kuv tshaib plab, nej pub rau kuv noj ; kuv nqhis dej, nej pub
rau kuv haus, kuv yog ib tug pej kum neeg, nej txais kuv ;

36 kuv liab qab, nej muab rau kuv hnav ; kuv mob, nej tuaj xyuas kuv ; kuv nyob hauv tsev loj faj, nej tuaj tsham kuv.”

37 Ces cov neeg ncaj yuav teb tias : “Huab Tais, thaum twg peb tau pom koj tshaib plab ces peb tau pub rau koj noj, pom koj nqhis dej, ces peb tau muab rau koj haus, 38 pom koj yog ib tug pej kum neeg, ces peb tau txais koj, pom koj liab qab ces tau muab rau koj hnav ? 39 Pom
koj mob los nyob hauv tsev loj faj, ces peb tau tuaj xyuas koj ?”

40 Tus Vaj yuav teb rau lawv li no : “Kuv hais tseeb rau nej. Nej tau ua
npaum li cas rau cov me tshaj hauv kuv tsoom kwv, mas yog nej ua rau kuv.”

41 Ces tus vaj yuav hais rau cov nyob sab laug tias : “Nej txoj hmoov phem. Nej khiav mus deb kuv, mus nyob hauv cov hluav taws kub tsis txawj tuag, uas Ntuj npaj rau tus dab phem thiab nws cov dab. 42 Vim
thaum kuv tshaib plab nej tsis pub rau kuv noj, kuv nqhis dej nej tsis pub rau kuv haus,

43 kuv yog ib tug pej kum neeg nej tsis txais kuv, kuv liab qab nej tsis muab rau kuv hnav, kuv mob thiab kuv nyob hauv tsev loj faj nej tsis tuaj xyuas kuv.”

44 Ces cov ntawd yuav teb rau tus Vaj tias : “Huab Tais, thaum twg peb tau pom koj tshaib plab los nqhis dej, pom koj yog ib tug pej kum neeg, pom koj liab qab, pom koj mob los nyob hauv tsev loj faj, ces peb tsis tau pab koj ?”

45 Ces tus Vaj yuav teb rau lawv tias : “Kuv hais tseeb rau nej, nej tsis tau ua rau cov me tshaj hauv kuv tsoom kwv npaum li cas, mas yog nej tsis tau ua rau kuv.”

46 Ces cov no yuav mus raug txim ib txhiab ib txhis. Hos cov siab ncaj yuav mus txais txoj sia nyob mus li.

Huab Tais Pleev. Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem ib :

Ntawv Paj Lug : Tshooj : 31 nqe : 10-13; 19-20; 30-31

Lub ntsiab lus : Tus poj niam zoo yog tus nrhiav kev kaj siab lug nyob hauv nws tej hauj lwm ua niam tsev.

10 Leej twg yuav nrhiav tau ib tug niam tsev nquag ? Tus niam tsev nquag muaj nqi dua tej hlaws npliag deg !

11 Nws tus txiv tso siab lug rau nws, tus txiv yuav tsis tshaib tsis ntshaw.

12 Nws ua zoo rau nws tus txiv tas ib sim neej, nws tsis ua phem rau tus txiv.

13 Nws tooj xov plaub yaj, saws ntuag, nws ob txhais tes ua hauj lwm nrawm nroos.

19 Nws ob txhais tes tuav leg xov, nws ntiv tes nthos nkaus ntxaiv los qaiv.

20 Nws cev tes pab cov neeg txom nyem, nws pub mov rau cov neeg pluag noj.

30 Tus muaj xom lees nws xav ntxias luag, tus zoo nkauj kuj tsis muaj nqis dab tsi. Tus poj niam hwm Tswv Ntuj mas luag yuav cav txog nws.

31 Nej pub cov txiv txi ntawm nws txhais tes rau nws. Kom nws cov hauj
lwm rov cav lus zoo txog nws nyob ntawm cov qhov rooj tsheej.

Yog Tswv Ntuj Lo Lus. Nws Lub Txiaj Ntsim

Zaj nyeem ob :

Tes Xas Los Nis : Tshooj 5 nqe 1 txog 6

Ntsiab lus : Ib sim neej tsis ntev, peb txhob tsaug zog, txhob hais tias : ob peb hnub tso, mam tig los yuav lub siab tshiab tiag

1 Kwv tij, tsis tas kuv yuav qhia nej txog lub zim txwv thiab lub
hnub nyoog uas Huab Tais yuav rov los.

2 Nej twb paub meej tias, Huab Tais lub hnub nyoog yuav los txog xws li ib tug tub sab uas tuaj thaum ib tag hmo.

3 Thaum zeej tsoom hais zom zaws tias : ‘Peb tau nyob kaj lug, thiab nyob nyab xeeb’, ces ib sij huam, txoj kev ploj yuav ya ntxiag tuaj raug lawv, xws li tus poj niam cev hnyav, uas ib sij huam nws cia li mob. Lawv yuav tsis tau kev dim.

4 Kwv tij, ntawm nej, mas nej tsis nyob hauv qhov tsaus ntuj ; lub hnub nyoog ntawd yuav tsis tuaj muab nej, xws li ib tug tub sab. 5 Nej sawv daws puav leej yog qhov pom kev cov me nyuam, nej yog cov me nyuam mus nruab hnub. Peb tsis yog cov neeg maub hmo ntuj, nyob hauv qhov tsaus ntuj.

6 Li ntawd, mas peb tsis txhob tsaug zog xws li luag tej : peb yuav zov hmo ; peb yuav noj me haus tsawg.

Yog Tswv Ntuj Lo Lus. Nws Lub Txiaj Ntsim.

Ntawm Moo Zoo :

Mas Tais : tshooj : 25 nqe : 14 txog 30

Lub ntsiab lus : Cov ntseeg lawv muaj ib lub cuab tam muaj nqe kawg : yog lub Moo Zoo. Yog lawv muab lub Moo Zoo los faus hauv lawv lub cim xeeb xwb mas lawv muaj txhaum.

14 “Yog zoo li ib tug neeg uas yuav mus tawm rooj deb, nws hu nws cov tub txib los, nws muab nws lub cuab tam rau lawv ceev.

15 Nws muab tsib nras nyiaj rau thawj tug, muab ob nras rau tus ob, hos
muab ib nras xwb rau tus peb. Nws muab rau lawv raws li lawv lub peev xwm, ces nws mus tawm rooj deb lawm. Tam sis ntawd,

16 tus uas tau txais tsib nras nyiaj, nqa cov nyiaj ntawd mus
ntxeev, nws tau paj tsib nras ntxiv.

17 Tus tau txais ob nras kuj ua li ntawd thiab : nws tau paj ob nras ntxiv.

18 Hos tus tau txais ib nras xwb mus khawb ib lub qhov rau hauv av, nws muab tus tswv nras nyiaj coj mus faus rau hauv.

19 Ib lub sij hawm ntev loo tom qab, cov tub txib tus tswv rov los txog. Nws nrog lawv txheeb nws cov nyiaj.

20 Tus uas tau txais tsib nras nyiaj tuaj txog. Nws cev tsib nras ntxiv, nws hais tias : “Huab Tais, tsib nras nyiaj no yog koj muab rau kuv : hos ntawm no yog tsib nras uas kuv coj mus ntxeev tau paj ntxiv.”

21 Tus tswv hais rau nws tias : “Zoo kawg, tub txib siab zoo siab ncaj,
thaum koj saib tej yam tsawg, koj ua ncaj. Kuv yuav tsa koj saib ntau yam. Koj los nyob hauv koj tus huab tais txoj kev zoo siab mog.”

22 Ces tus tau txais ob nras tuaj txog, nws hais tias : “Huab Tais, ob nras nyiaj no yog koj muab rau kuv : hos ntawm no yog ob nras uas kuv coj mus ntxeev tau paj ntxiv.”

23 Nws tus tswv hais rau nws tias : “Zoo kawg, tub txib siab zoo siab ncaj. Thaum koj saib tej yam tsawg li no, koj ua ncaj. Kuv yuav tsa koj saib ntau yam. Koj los nyob hauv koj tus huab tais txoj kev zoo siab mog.”

24 Tus tub txib uas tau txais ib nras nyiaj xwb tuaj txog, nws hais tias : “Huab Tais, kuv paub tias koj yog ib tug neeg siab heev. Koj hlais nplej hauv tej teb koj tsis tau tseb, koj sau qoob hauv tej chaw koj tsis tau pov noob rau.

25 Kuv ntshai, kuv thiaj coj koj nras nyiaj mus faus rau hauv av. Saib ntawm no, koj rov tau yam uas yog koj tug.”

26 Ces tus tswv teb rau nws tias : “Tub txib siab phem thiab tub nkeeg, koj twb paub tias kuv hlais nplej hauv tej teb uas kuv tsis tau tseb, thiab kuv sau qoob hauv tej chaw uas kuv tsis tau pov noob rau.

27 Tsim nyog koj yuav nqa kuv cov nyiaj mus rau cov tub ceev nyiaj. Thaum kuv rov los, kuv yuav tau kuv cov nyiaj nrog cov paj.

28 Nej rho nras nyiaj ntawm nws, nej muab rau tus uas muaj kaum
nras lawm.

29 Vim tias Ntuj yuav pub rau tus uas twb muaj lawm, ces nws yuav tau ntau ntxiv. Hos tus uas tsis muaj, Ntuj yuav thau qhov me me uas nws muaj.

30 Nej muab tus tub txib tsis tsim txiaj ntawd pov rau nraum zoov hauv qhov tsaus ntuj : nyob ntawd yuav quaj tom hniav nkawv.”

Huab Tais Pleev. Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem ib :

Thoob Tsib : tshooj : 6 nqe : 12 txog 16

Lub ntsiab lus : Nyem no, ntiaj teb neeg txawj tsim ntau yam. Tab sis sawv daws nyias tsis txawj coj nyias lub siab. Peb yuav vam txog Tswv Ntuj kev Thoob Tsib, peb thiaj coj tau peb lub neej kom zoo.

12 Kev thoob tsib ci ntsa iab tsis txawj nphob ib zaug. Cov neeg nyiam kev
thoob tsib, mas nws cia lawv ntsia ntsoov nws. Cov neeg nrhiav kev thoob tsib, mas nws cia lawv ntsib nws.

13 Kev thoob tsib xub tuaj thawj cov neeg ntshaw txog nws, nws tawm tuaj rau lawv paub nws.

14 Thaum nyuam qhuav kaj ntug, yog leej twg mus nrhiav kev thoob tsib mas nws tsis tas yuav khwv. Nws yuav pom kev thoob tsib zaum nraum nws qhov rooj tos nws.

15 Nrhiav kev thoob tsib mas yog txoj kev ntse zoo tshaj. Leej twg uas
zov hmo kawm kev thoob tsib, mas nws yuav dim ntawm kev ntxhov siab sai.

16 Kev thoob tsib tawm mus tas qhov txhia chaw, nws nrhiav cov neeg tsim
nyog txais nws. Kev thoob tsib tshwm ntawm tej xub ke, nws ua ntsej muag luag nyav rau cov uas tsis thuam nws. Kev thoob tsib mus cuag lawv lub tswv yim tsis tseg.

Yog Tswv Ntuj Lo Lus. Nws Lub Txiaj Ntsim

Zaj nyeem ob :

Tes Xas Los Nis : tshooj 4 nqe : 13 txog 18

Lub ntsiab lus : Thaum txog hnub Huab Tais tuaj tos peb mas peb tso ntiaj teb no tseg, peb mus cuag Tswv Ntuj. Li ntawd, thaum peb tuag mas peb muaj chaw tso siab.

13 Kwv tij sawv daws, peb tsis xav kom nej tsis paub dab tsi txog cov neeg uas pw tsaug zog mus li. Thaum nej muaj ib tug neeg tuag, nej yuav tsis txhob tu siab xws li cov neeg uas tsis muaj kev tso siab.

14 Vim peb ntseeg tias, Yes Xus tuag thiab sawv rov los. Peb kuj tso siab tias,
cov neeg mus pw tsaug zog nyob hauv Yes Xus, mas Tswv Ntuj yuav coj lawv mus nrog nws nyob. Huab Tais qhia ib lo lus rau peb, peb xav hais lo lus ntawd rau nej paub.

15 Yam li, hnub Huab Tais rov los txog, mas peb cov neeg ciaj yuav
tsis xub mus cuag Huab Tais ua ntej cov uas tuag ntxov lawd. 16 Vim, thaum txog lub caij teem, sawv daws yuav hnov thawj tug Tshiab lub suab, thiab hnov Tswv Ntuj lub puab nrov. Ces Huab Tais yuav nqes saum ntuj los. Cov neeg tuag nyob hauv Yes Xus Pleev yuav xub sawv rov los.

17 Hos peb cov uas tseem ciaj, mam li yuav tau mus nrog cov tuag sawv rov los ntawd sib txoos ua ke ; ces Ntuj yuav nqa peb nrog lawv nce mus saum cov huab, peb yuav mus cuag Huab Tais nyob saum ntuj. Peb yuav mus nrog Huab Tais nyob mus li.

18 Peb sawv daws nco ntsoov txog cov lus no, peb thiaj rov sib pab ua
siab loj.

Yog Tswv Ntuj Lo Lus. Nws Lub Txiaj Ntsim

Yog nej nyeem zaj lus los kuj tau thiab

Tes Xas Los Nis : tshooj 4 nqe : 13 txog 14

13 Kwv tij sawv daws, peb tsis xav kom nej tsis paub dab tsi txog cov neeg uas pw tsaug zog mus li. Thaum nej muaj ib tug neeg tuag, nej yuav tsis txhob tu siab xws li cov neeg uas tsis muaj kev tso siab.

14 Vim peb ntseeg tias, Yes Xus tuag thiab sawv rov los. Peb kuj tso siab tias,
cov neeg mus pw tsaug zog nyob hauv Yes Xus, mas Tswv Ntuj yuav coj lawv mus nrog nws nyob. Huab Tais qhia ib lo lus rau peb, peb xav hais lo lus ntawd rau nej paub.

Yog Tswv Ntuj Lo Lus. Nws Lub Txiaj Ntsim

Ntawm Moo Zoo :

Mas Tais : tshooj : 25 nqe : 1 txog 13

lub ntsiab lus : Zaj paj lug hais txog kaum leej niam txais ntsuab

1 “Ntuj lub Ceeb Tsheej yuav zoo xws li kaum leej ntxhais taws teeb
tawm mus tos nraug vauv.

2 Nyob hauv lawv, muaj tsib leeg ruam, hos tsib leeg xyuam xim.

3 Cov ruam nqa teeb, tab sis tsis nqa roj nrog.

4 Hos cov xyuam xim nqa teeb thiab ntim roj rau hauv hwj nrog.

5 Nraug vauv los lig, ces lawv qaug dab ntub. Sawv daws tsaug zog.

6 Thaum ib tag hmo, ib lub suab nthe tias : “Nraug vauv los txog lawm ! Nej tawm los txais nws !”

7 Ces tas cov ntxhais hluas sawv los npaj teeb.

8 Cov ruam hais rau cov xyuam xim tias : “Nej pub ib qho roj rau peb mas, peb cov teeb tuag lawm. »

9 Tab sis cov xyuam xim teb rau cov ruam tias :
“Ntshai roj yuav tsis txaus rau nej thiab rau peb. Nej mus muas roj tom cov tub luam rau nej.”

10 Thaum cov ntxhais ruam mus muas roj lawm, ces nraug vauv los txog. Cov uas tau npaj txhij tos, nrog nraug vauv chaws mus hauv chav tsev ua tshoob, ces luag kaw qhov rooj.

11 Thaum kawg, lwm cov ntxhais los txog thiab, lawv hais tias :
“Huab Tais, Huab Tais, thov koj qhib qhov rooj rau peb.”

12 Tab sis nraug vauv teb tias : “Kuv hais tseeb rau nej, kuv tsis paub nej
yog leej twg !”

13 Ua li mas nej zov hmo mog, vim nej tsis paub hnub twg thiab lub sij hawm twg.”

Huab Tais Pleev. Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb cov ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem ib :

Qhib yav tom ntej ; tshooj 7 nqe : 2-4; 4-9

Tswv Ntuj txuag ns cov tub txib

2 Kuv pom dua ib tug Tshiab tawm sab Toob Fab tuaj ; nws nqa tus Tswv Ntuj muaj txoj sia lub thwj. Nws hu ib suab nrov nrov rau plaub tug Tshiab uas tau txais txoj hauj lwm tso xwv txheej rau lub ntiaj teb tias :

3 “Nej txhob rawm tso xwv txheej mus rau lub ntiaj teb, lub hiav txwv, thiab tej me ntoo. Tos peb ntaus cim rau saum Tswv Ntuj cov tub txib hauv pliaj tso.”

4 Ces kuv hnov lawv ntaus cim rau npaum no leej : ib puas plaub caug plaub txhiab leej nyob hauv tas nrho cov xeem His Xas Lais.

5 Xeem Yus Das muaj kaum ob txhiab leej raug ntaus cim, xeem Lus Npees kaum ob txhiab, xeem Nkas kaum ob txhiab,

6 xeem As Ntxes kaum ob txhiab, Qhib Yav Tom Ntej, xeem Nes Tas Lis kaum ob txhiab, xeem Mas Nas Xes kaum ob txhiab,

7 xeem Xis Mes Oos kaum ob txhiab, xeem Les Vis kaum ob txhiab, xeem Is Xas Kas kaum ob txhiab,

8 xeem Ntxas Npus Loos kaum ob txhiab, xeem Yos Xes kaum ob txhiab,
thiab xeem Npes Yas Mis kaum ob txhiab raug ntaus cim rau. Dhau tej ntawd tas lawm, ces kuv pom ib pab neeg coob coob suav tsis txheeb ;
muaj tas txhua teb chaws, txhua haiv neeg, txhua xeem lus. Lawv sawv ntsug ze ntawm lub theej kiab, nyob ntawm Leej Yaj xub ntiag. Lawv hnav tsho dawb ntev, thiab tuav tej rev nplooj ntawm tes.

Yog Tswv Ntuj Lo Lus. Nws Lub Txiaj Ntsim

Zaj nyeem ob :

Zaj tsab ntawv : tshooj 3 nqe : 1txog 3

Nej yog Tswv Ntuj cov me nyuam, Tswv Ntuj cov me nyuam yuav ua neeg siab ntshiab.

1 Nej ntsia saib, Leej Txiv txoj kev nyiam peb loj tas npaum no : yam li
peb hu ua Tswv Ntuj cov me nyuam, peb yog Tswv Ntuj cov me nyuam tiag ! Lub ntiaj teb neeg tsis paub peb, vim ntiaj teb neeg tsis paub Leej Txiv.

2 Cov zoo nyiam, nyem no, peb yog Tswv Ntuj cov me nyuam. Qhov uas yav
tom ntej peb yuav plhis mus zoo li cas, tseem tsis tau tawm los rau qhov muag pom xyeem. Peb paub tias, thaum Leej Pleev yuav tawm los rau qhov muag pom xyeem, mas peb yuav zoo li Nws, vim nws zoo li cas, mas peb yuav pom Nws zoo li ntawd. 3 Tus twg tso siab rau Leej Pleev, mas Leej Pleev yuav ua kom nws huv tuaj, vim Leej Pleev yog tus huv.

Yog Tswv Ntuj Lo Lus. Nws Lub Txiaj Ntsim

Ntawm Moo Zoo :

Mas Tais : tshooj : 5 nqe : 1 txog 12

1 Yes Xus pom neeg coob coob tuaj, nws nce mus saum lub roob.
Nws zaum. Cov thwj tim txav los ze Yes Xus.

2 Ces Yes Xus tsa ncauj qhia lawv hais tias :
3 « Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li.

4 Cov tau txoj hmoov zoo, yog cov siab zoo, vim lawv yuav txais lub ntiaj teb los ua lawv tug.

5 Cov tau txoj hmoov zoo, yog cov quaj ntsuag, vim Ntuj yuav nplij lawv.

6 Cov tau txoj hmoov zoo, yog cov tshaib thiab nqhis txoj kev ncaj, vim Ntuj yuav daws lawv qhov nqhis.

7 Cov tau txoj hmoov zoo, yog cov hlub luag tej, vim Ntuj yuav hlub lawv.

8 Cov tau txoj hmoov zoo, yog cov siab huv, vim lawv yuav pom Tswv Ntuj.

9 Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam.

10 Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug.

11 Thaum luag thuam nej, hiam nej, thiab liam ntau yam phem rau nej vim kuv, mas nej txoj hmoov zoo.

12 Nej zoo siab thiab nej hom khaj mog, vim nej yuav tau txais koob haum loj nyob saum ntuj. Cov yaj saub ua nej ntej, kuj raug luag hiam zoo li ntawd thiab.

Huab Tais Pleev. Lub qab ntuj neeg cav txog koj.