Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB

VAJ 3 : 5, 7-12

LUB NTISAB LUS : Tus Vaj Xas Los Moos thov kom Tswv Ntuj pub lub tswv yim thoob tsib rau nws : ces Tswv Ntuj pub.

COV LUS NYOB HAUV NTAWV VAJ PHAU IB :

5 – Nyob Nkas Npas Oos, hmo ntuj Xas Los Moos ua npau suav pom HUAB TAIS tawm tuaj rau nws pom xyeem thiab hais tias :

« Koj thov qhov koj xav kom kuv muab rau koj. »

7 – « HUAB TAIS, nyem no koj tau tsa koj tus tub txib ua vaj -hloov nws txiv Das Vis chaw.  Kuv yog ib tug me nyuam tub hluas xwb, kuv tsis txawj ntaus thawj. 

8 – Koj tus tub txib nyob nruab nrab haiv neeg uas koj tau xaiv, yog ib haiv neeg coob tas nrho suav tsis txheeb tshuaj tsis txhua. 

9 – Thov koj pub ib lub siab thoob tsib txawj xav tom ntej tom qab zoo rau koj tus tub txib kom nws txawj pom tias qhov twg yog zoo, qhov twg yog phem. Vim tias leej twg thiaj yuav txawj -coj -koj -haiv -neeg -coob tas npaud ? »

10 – Xas Los Moos thov li ntawd mas xis HUAB TAIS siab. 

11 – HUAB TAIS hais rau Xas Los Moos tias : « Koj tau thov li ntawd, koj tsis thov kom koj tau ua neej laus nkoos,

tsis tau thov kom muaj nyiaj muaj kub, tsis thov kom tau rhuav koj cov yeeb ncuab txoj sia. 

Koj tau thov ib lub -tswv yim thoob tsib txawj xav tom ntej tom qab zoo. 

12 – Li ntawd, mas kuv yuav ua raws li koj thov. Kuv pub ib lub siab ntse thiab thoob tsib rau koj.

Yav tas los lawm tsis tau muaj leej twg muaj ib lub siab zoo li ntawd, thiab yav tom ntej kuj tsis muaj leej twg yuav tau lub siab zoo npaum no. » 

Yog Tswv Ntuj lo lus. Nws lub Txiaj Ntsim

Nkauj Paj Nruag              KUV NYIAM HUAB TAIS TXOJ CAI               

(NPN 119-2)

Txais: Huab Tais, kuv nyiam koj txoj cai tas nrho.

1 – Huab Tais, kuv hais tias, “Kuv txoj hauj lwm yog ua raws li koj cov lus.” Txoj cai tawm hauv koj lub ncauj los muaj nqis dua ib txhab nyiaj ib txhab kub.

2 – Thov koj txoj kev hlub nplij kuv raws li koj tau cog lus rau koj tus tub txib. Thov koj lo lus nqes los nyob hauv kuv

ces kuv yuav muaj txoj sia vim kuv lub siab xib rau koj txoj cai.

3 – Kuv nyiam koj cov lus qhia dua tas txhua yam, kuv nyiam koj txoj cai dua ib co tseem kub zoo nkauj.

Li ntawd, kuv thiaj taug koj txoj kev ncaj ncees, kuv ntxub txhua txoj kev dag.

4 – Koj tej kev tswj zoo tas nrho. Vim li ntawd, kuv thiaj mloog koj txoj cai. Thaum kuv nrhiav tau koj cov lus, kuv pom kev tuaj!

Koj cov lus ua kom cov neeg me txawj xav tom ntej tom qab.

ZAJ NYEEB OB

LOS MAS      8 : 28-30

LUB NTSIAB LUS : Cov neeg uas Tswv Ntuj hu los ua cov neeg ntseeg mas Tswv Ntuj pab lawv tas zog kom lawv txia ua xws li nws Leej Tub Yes Xus.

COV LUS PAJ LUG SAU TUAJ RAU COV NTSEEG NYOB LOS MAS :

28 – Peb paub tias Tswv Ntuj nres cov neeg nyiam nws, nws nrog cov uas mloog nws lub suab hu ua hauj lwm,

kom lawv tau qhov zoo, raws li tus nru lus uas nws npaj. 

29 – Cov neeg uas Tswv Ntuj xub -hu, nws faib txoj hmoov rau lawv kom nws Leej Tub tus duab tshwm los nyob hauv lawv. 

Leej Tub thiaj ua tij coj ib tsoom kwv coob coob. 

30 – Cov uas Tswv Ntuj hu lawv, mas nws faib txoj hmoov rau lawv. Cov uas Tswv Ntuj hu lawv, mas nws ua kom lawv ncaj tuaj. 

Cov uas Tswv Ntuj ua kom lawv ncaj tuaj, mas nws kuj ua kom lawv muaj hwj chim.  

Yog Tswv Ntuj lo lus. Nws lub Txiaj Ntsim

NTAWV MOO ZOO         

MAS TAIS     13 : 44-52

LUB NTSIAB LUS :

1-Tus hnov Tswv Ntuj Lo Lus, nws yuav saib Tswv Ntuj Los Lus muaj nqe -dua tas ib puas tsav yam. (44-46)

2-Nyob hauv tsoom neeg txais lub Cim Ntxuav, muaj tej tus neeg tsis zoo xyaw cov neeg zoo : hnub kawg, Tswv Ntuj thiaj yuav xaiv nws cov neeg. (47-51)

COV LUS NYOB HAUV MAS TAIS NTAWV MOO ZOO :

44        Ntuj lub Ceeb Tsheej zoo li ib hub nyiaj faus rau hauv ib daim teb. 

Muaj ib tug neeg mus nrhiav tau.

Nws rov muab zais, nws zoo siab, nws muag nws lub cuab tam,

ces nws mus muas daim teb ntawd.

45        « Ntuj lub Ceeb Tsheej tseem zoo li ib tug tub luam nrhiav cov hlaws npliag deg -zoo nkauj. 

46        Thaum nws nrhiav tau ib lub hlaws nphiag npliag deg muaj nqi loj,

nws mus muag nws lub cuab tam tas huv si,

ces nws mus muas lub hlaws npliag deg ntawd.

47        « Ntuj lub Ceeb Tsheej tseem zoo li ib lub vas uas luag pov rau hauv dej ntuj. 

Lub vas puav tau ntau tsav ntau hom ntses. 

48        Thaum lub vas puv lawd, cov tub puav ntses rub lub vas los tim ntug nqhuab,

lawv zaum, lawv mam li xaiv cov zoo rau hauv tawb, hos muab cov tsis zoo pov tseg. 

49        Thaum lub zim txwv kawg, kuj yuav zoo ib yam li ntawd –thiab :

cov tshiab tuaj txog, lawv yuav cais cov neeg phem ntawm cov neeg ncaj.           

50        Lawv yuav muab cov neeg phem pov tseg rau hauv lub qhov hluav taws :

nyob hauv, sawv daws yuav quaj tom hniav nkawv.

51        « Nej puas to taub tas ib puas tsav yam ntawd ? » 

Lawv teb rau Yes Xus tias : « Peb to taub. » 

52        Yes Xus hais rau lawv tias :

“Ua li mas, thaum ib tug Kws Ntawv Ntshiab los

ua thwj tim hauv Ntuj lub Ceeb Tsheej,

nws zoo li ib tug tswv tsev uas rho tau tej yam qub thiab

tej yam tshiab hauv nws lub cuab tam los.”

Huab Tais Pleev .  Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB                

THOOB TSIB  12 : 13, 16-19

LUB NTSIAB LUS : Tswv Ntuj lub peev xwm loj kawg. Tab sis nws saib zoo, nws tsis yuam neeg. Nws nyiam zam rau sawv daws, nyiam pab sawv daws tig los yauv -lub siab tshiab.

COV LUS NYOB HAUV NTAWV THOOB TSIB :

13 – Tswv Ntuj, dhau ntawm koj lawm tsis muaj lwm tus yuav saib xyuas tau txhua leej xws li koj. 

Tsis muaj lwm tus uas koj yuav tsum lees ntawm nws xub ntiag tias koj txiav txim tsis ncaj.

16 – Yog vim koj muaj hwj huam koj thiaj muaj lub siab ncaj.  Yog vim koj lub hwj chim tswj tas puas tsav yam thiab txuag tau tas puas tsav yam.

17 – Yog muaj tej tus neeg tsis ntseeg tias koj lub hwj huam loj tas nrho, mas koj muab koj lub zog rau lawv pom. 

Yog muaj neeg muaj cuab kav hla koj, mas koj qhau lawv. 

18 – Tab sis, Tswv Ntuj koj txawj cheem koj lub zog, koj tsis txiav txim hnyav rau peb. Koj tswj peb, tab sis koj maj mam ua. 

Tsuav yog koj xav ua yam twg, mas koj lub hwj huam nyob ntawd, koj ua tau tam sim ntawd. 

19 – Yog vim koj maj mam ua li ntawd, mas koj thiaj li tau qhia koj haiv neeg tias tus siab ncaj yuav ua tib neeg tus phooj ywg. 

Koj ua kom koj cov tub ki tau kev tso siab tias thaum lawv ua txhaum tas lawm, mas koj pub kom lawv txawj tig los yuav lub siab tshiab.

Yog Tswv Ntuj Lo Lus.         Nws lus txiaj ntsim

Nkauj Paj Nruag        HUAB TAIS LUB SIAB ZOO                  

(NPN 86)

Txais: Huab Tais, koj lub siab zoo, koj zam rau peb.

1 – Huab Tais, koj lub siab zoo, koj zam rau peb. Koj ua siab ntev hlub cov neeg hu txog koj.

Koj tig ntsej los mloog kuv lo lus thov, thov koj ua siab ntev mloog kuv lub suab taij.

2 – Huab Tais, tas ib tsoom haiv neeg koj tsim los tuaj hawm koj. Lawv yuav cav txog koj lub npe.

Tswv Ntuj, koj tib leeg yog tus loj, Koj tsim tau txhua yam zoo nkauj zoo saib.

Koj tib leeg yog Tswv Ntuj.

3 – Huab Tais, koj yog tus Tswv Ntuj siab zoo thiab khuv leej neeg, yog tus tsis npau taws sai, yog tus hlub neeg thiab ua ncaj.

Thov koj tig los ntsia kuv, thov koj khuv leej kuv. Koj pub koj lub zog rau koj tus tub txib.

ZAJ NYEEM OB

LOS MAS 8 : 26-27

LUB NTSIAB LUS : Thaum peb ntsia lub ntiaj teb neeg peb tsis to taub tias Tswv Ntuj coj lub ntiaj teb neeg zoo li cas mus rau qhov twg. Tab sis peb tso siab tias Leej Tswv Yim Ntshiab pab peb thov tej yam haum Tswv Ntuj siab.

COV LUS PAJ LUG SAU TUAJ RAU COV NTSEEG NYOB LOS MAS :

26 – Leej Ntuj Plig tuaj nres peb cov neeg tsis muaj zog.  Peb tsis paub thov dab tsi kom peb txoj kev teev Ntuj ntxim Tswv Ntuj siab.  

Tab sis Leej Ntuj Plig sawv peb chaw thov Ntuj rau peb : nws hais cov lus uas neeg piav tsis tau. 

27 – Tus Tswv Ntuj uas tsom hauv neeg nruab siab, nws paub tias Leej Ntuj Plig xav kom tau dab tsi :

vim li no, Leej Ntuj Plig sawv cov ntshiab chaw thov Ntuj raws nraim li Tswv Ntuj lub siab xav.

Yog Tswv Ntuj Lo Lus.         Nws lus txiaj ntsim

NTAWV MOO ZOO         

MAS TAIS 13 : 24-43

LUB NTSIAB LUS : Niaj hnub peb pom tej yam zoo thiab tej yam phem sib xyaws nyob hauv peb thiab nyob ib ncig ntawm peb : peb yuav tso siab tias qhov kawg mas Tswv Ntuj lo lus yuav yeej.

COV LUS NYOB HAUV MAS TAIS NTAWV MOO ZOO :

24 – Yes Xus tseem hais dua ib zag paj lug tias :

« Ntuj lub Ceeb Tsheej zoo li ib tug neeg tseb ib co noob zoo rau hauv nws daim teb. 

25 – Thaum sawv daws tsaug zog tas, nws tus yeeb ncuab tuaj tseb ib co noob nroj rau hauv cov nplej tas ces nws rov qab mus. 

26 – Txij thaum nplej hlob txog nplej txhawv, nroj kuj tawm tuaj thiab. 

27 – Cov tub txib tuaj hais rau tus tswv qoob tias : « Huab Tais, koj tau tseb ib co noob qoob zoo rau hauv koj daim teb los tsis sub ?

Vim li cas thiaj muaj nroj ? » 

28 – Tus tswv qoob teb rau lawv tias : « Yog ib tug yeeb ncuab ua qhov ntawd. » Cov tub txib hais rau tus tswv tias :

« Koj puas xav kom peb mus sau cov nroj pov tseg ? »  Tus tswv teb tias :

29 – « Kuv tsis xav ! Tsam thaum nej sau nroj, nej rho tau nplej nrog thiab. 

30 – Nej cia nroj nrog nplej hlob ua ke mus txog lub caij sau nplej. Thaum txog caij sau qoob, kuv mam hais rau cov sau nplej -tias :

Nej xub sau nroj -pav ua tej teg cia -hlawv, hos nej sau cov nplej rau hauv kuv lub txhab. »

31 – Yes Xus tseem hais ib zag paj lug li no : « Ntuj lub Ceeb Tsheej zoo li ib lub noob zaub roj uas ib tug neeg nqa mus tseb hauv nws daim teb. 

32 – Lub noob ntawd me tshaj txhua hom noob, tab sis thaum nws hlob, nws siab dua lwm cov zaub huv tib si. -Nws loj luaj li ib tsob ntoo. 

Ces tej noog ya saum ntuj los nkaum hauv nws cov ceg. »

33 – Yes Xus tseem hais ib zag paj lug -tias : « Ntuj lub Ceeb Tsheej zoo li ib co poov xab uas ib tug poj niam muab tso rau

hauv peb kawg hmoov nplej mus txog thaum uas tas cov hmoov ntawd su tuaj. »

34 – Yes Xus qhia ib puas tsav yam ntawd rau zeej tsoom, mas nws ua paj lug hais.  Tsis muaj ib yam uas nws tsis ua paj lug hais. 

35 – Li ntawd, mas muaj raws li tus yaj saub cov lus tias : Kuv yuav qhib ncauj hais ib co paj lug.

Tej yam zais txij thaum ntuj tsim teb raug los, kuv yuav muab tshaj tawm.

36 – Yes Xus tso tsoom sid tseg, nws rov los tsev. Cov thwj tim txav los hais rau nws tias :

« Koj txhais zaj paj lug hais txog nroj tuaj hauv daim teb rau peb saib. »

37 – Yes Xus teb rau lawv tias : « Tus tseb cov noob zoo, yog Neeg Leej Tub. 

38 – Daim teb, yog lub qab ntuj neeg. Cov noob zoo, yog cov tub hauv lub Ceeb Tsheej. 

Cov nroj, yog tus Phem cov tub. 

39 – Tus yeeb ncuab uas tseb cov noob nroj, yog Dab Phem. Lub caij sau nplej, yog lub zim txwv kawg. -Cov tub sau nplej, yog cov Tshiab. 

40 – Lawv yuav sau cov nroj los hlawv. -Lub zim txwv kawg, yuav zoo ib yam li ntawd : 

41 – Neeg Leej Tub yuav xa nws cov Tshiab, lawv yuav thau tej kev ntxias ua txhaum thiab cov neeg ua phem tas huv si tawm hauv nws lub Ceeb Tsheej.          

42 – Cov Tshiab yuav muab lawv pov rau hauv lub qhov hluav taws. Nyob hauv, sawv daws yuav quaj tom hniav nkawv. 

43 – Ces cov neeg siab ncaj yuav ci ntsa iab zoo li lub hnub nyob hauv lawv Txiv lub Ceeb Tsheej.  Leej twg muaj pob ntseg, cia nws mloog. « 

Huab Tais Pleev.      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB                 

HIS XAIS 55 : 10-11

LUB NTSIAB LUS : Tswv Ntuj lo lus ua hauj lwm nyob hauv neeg lub siab. Yog vim peb ntseeg qhov ntawd mas peb thiaj zoo siab tshaj Ntuj lus rau tsoom sid.

COV LUS NYOB HAUV NTAWV HIS XAIS :

10 – Cov nag, cov daus uas poob saum ntuj los, yog lawv tsis tau pub dej rau ntiaj teb haus, mas lawv tsis rov mus saum ntuj. 

Cov nag thiab cov daus ua kom cov noob lwj thiab nthaw kaus, ua kom lub ntiaj teb txi txiv rau tus tseb, pub mov rau neeg noj,

ces cov nag mam rov mus lawm saum ntuj. 

11 – Cov lus tawm ntawm kuv lub ncauj los kuj zoo li ntawd thiab. Nws tsis tau ua hauj lwm, mas nws tsis rov los cuag kuv.

Kuv lo lus tsis tau leg qhov kuv xav, mas nws tsis rov los cuag kuv. Kuv lo lus tsis tau ua tiav qhov kuv xa nws mus ua, mas nws tsis rov los cuag kuv.« 

Yog Tswv Ntuj lo lus. Nws lub Txiaj Ntsim

Nkauj Paj Nruag              LUB NOOB POOB HAUV THAJ AV ZOO                   

(NPN 65)

Txais: Lub noob uas poob rau hauv thaj av zoo, nws yuav txi txiv ncw tos lub caij sau qoob.

1 – Koj tau tuaj xyuas lub ntiaj teb, koj ywg dej rau. Koj ua kom lub ntiaj teb nplua nuj tuaj.

Dej puv Tswv Ntuj cov ciav dej nyob txheej ntuj saud. Koj npaj noob qoob noob loo rau ntiaj teb.

2 – Koj ua kom muaj dej ntws puv kwj liag. Koj laij av kom tiaj.

Koj tso nag los ywg kom av phom. Koj foom hmoov zoo rau tej noob kom tuaj kaus.

3 – Koj pub txiaj ntsha txiaj ntsim thawm niaj thawm xyoo. Dej txhawv hauv teb chaws suab puam los ywg tej tshav zaub.

4 – Nplooj hlav ntsuab xiab hauv tej taw roob. Nplooj hlav ntxhee yees hauv tej vos hav.

Tej tsiaj txhu nog zaub puv tshav. Tej qoob loo siav daj vog hauv nras liaj nras teb.

Txhua yam qw suab zoo siab. Txhua tsav seev suab hu nkauj ntsuag qees.

ZAJ NYEEM OB

LOS MAS 8 : 18-23

LUB NTSIAB LUS : Peb pom lub ntiaj teb raug txom nyem thiab zwm rau kev tuag, tab sis peb tso siab tias kev txom nyem kev tuag ntawd yog txoj kev yug lub ntuj lub teb tshiab.

COV LUS PAJ LUG SAU TUAJ RAU COV NTSEEG NYOB LOS MAS :

18 – Kuv pom tias txoj kev txom nyem uas peb ris lub caij no, yuav muab los piv tsis tau rau lub hwj chim uas yuav tawm tuaj

rau luag pom xyeem nyob hauv peb. 

19 – Tas puas tsav yam uas Ntuj tsim los tos ntshis txog lub caij Tswv Ntuj cov me nyuam yuav tawm -los rau sawv daws pom xyeem. 

20 – Tas puas tsav yam Ntuj tsim los puav leej zwm rau kev cuav : tsis yog vim lawv txhob txwm xav zwm rau kev cuav ;

yog vim muaj ib tug coj lawv mus zwm rau kev cuav. 

21 – Tas puas tsav yam Ntuj tsim los, tso siab tias lawv kuj yuav dim ntawm txoj kev ua qhev thiab txoj kev ploj :

lawv tso siab tias lawv yuav tau kev twj lij mus hauv Tswv Ntuj tsoom tub ki lub hwj chim. 

22 – Peb paub tias, los txog tav no, tas puas tsav yam ntuj tsim los ntsaj xws li ib tug poj niam daws cev. 

23 – Tsis yog tas puas tsav yam ntsaj xwb ; tab txawm peb twb tau txais Leej Ntuj Plig cov txiaj ntsim los ua peb tug,

tsis kav peb tseem ntsaj nyob hauv nruab siab thiab, vim peb tos -lub caij txhiv peb lub cev. 

Yog Tswv Ntuj lo lus. Nws lub Txiaj Ntsim

NTAWV MOO ZOO

MAS  TAIS 13 : 1-23

LUB NTSIAB LUS : Ntuj lo lus uas cov tub tshaj Ntuj Lus cev rau tsoom sid yog zoo li cov noob nplej uas luag tseb, qee zaum nws tsis txi txiv, qee zaum nws txi txiv zoo.

COV LUS NYOB HAUV MAS TAIS NTAWV MOO ZOO :

1 – Muaj ib hnub, Yes Xus tawm hauv tsev mus zaum ntawm ntug dej ntuj. 

2 – Tej pab neeg coob tuaj ntsauv nws, ces nws nce mus zaum hauv ib lub nkoj, hos tas tsoom neeg nyob ntawm ntug dej. 

3 – Yes Xus ua paj lug qhia lawv txog ntau yam. Yes Xus hais li no : « Tus tseb nplej tawm mus tseb.

4 – Thaum nws tseb, muaj ib co noob poob ntawm ntug kev, noog ya tuaj noj tas huv si lawm. 

5 – Ib co noob poob rau hauv cov av pob zeb, nyob ntawd tsis muaj av ntau, ces  noob tuaj kaus sai, vim av tsis tob.   

6 – Thaum hnub tuaj, tshav ziab, cov yub nkig, vim tsis muaj cag ces cov yub qhuav tas. 

7 – Tseem muaj ib co noob poob hauv cov pos. –Pos hlob tuaj laum cov yub. 

8 – Hos muaj ib co noob poob rau hauv thaj av zoo, cov noob ntawd txhawv hnab, tej lub noob txi ib puas lub, tej lub txi rau caum lub, tej lub txi peb caug lub.

9 – Leej twg muaj pob ntseg, cia nws mloog. »

10 – Cov thwj tim txav los ze Yes Xus, lawv hais rau nws tias : « Vim li cas koj ua paj lug hais rau lawv ? » 

11 – Yes Xus teb rau lawv tias : « Vim Ntuj pub kom nej paub tej yam tob hauv Ntuj lub Ceeb Tsheej,

tab sis Ntuj tsis tau pub rau cov ntawd. 

12 – Tus uas twb muaj lawm, mas Ntuj -yuav pub rau nws kom nws muaj ntau tshaj. Hos ntawm tus tsis muaj, ces Ntuj tseem yuav thau qhov nws muaj tawm mus. 

13 – Vim li ntawd, kuv thiaj ua paj lug hais rau lawv : vim tias lawv ntsia, los lawv tsis pom, lawv mloog,

los lawv tsis hnov, thiab tsis to taub. 

14 – Li ntawd, thiaj muaj raws li cov lus uas Yaj Saub His Xais xub hais tseg -tias : Nej pob ntseg hnov, los nej yuav tsis to taub ; nej ntsia, tab sis nej yuav tsis pom.

15 – Yog vim haiv neeg no lub siab qhwv lawm : lawv pos pob ntseg, lawv qi qhov muag,

lawv ntshai tsam lawv qhov muag pom, tsam lawv pob ntseg hnov, ces lawv lub siab to taub.,

tsam lawv yuav tsum hloov siab, thiab kuv yuav kho tau lawv zoo.

16 – Hos nej, mas nej qhov muag tau txoj hmoov zoo, vim nej qhov muag pom kev.  Nej pob ntseg tau txoj hmoov zoo, vim nej pob ntseg hnov lus. 

17 – Kuv hais tseeb rau nej, cov yaj saub thiab cov neeg siab ncaj thaud coob leej ntshaw pom yam uas nej pom,

tab sis lawv tsis tau pom, ntshaw hnov yam uas nej hnov, tab sis lawv tsis tau hnov !

18 – Nej mloog zaj paj lug hais txog tus tseb nplej lub ntsiab. 

19 – Tus neeg uas tau hnov Lo Lus qhia txog Ntuj lub Ceeb Tsheej, nws  tsis  to taub, tus Phem tuaj txog,

nws txeeb yam uas Ntuj tseb hauv tus ntawd lub siab : tus ntawd yog tus txais cov noob poob ntawm ntug kev.

20 – Cov noob poob rau hauv cov av pob zeb, yog tus neeg uas thaum nws hnov Ntuj Lo Lus, nws zoo siab txais.

21 – Tab sis nws tsis muaj cag nyob hauv nws, vim nws yog neeg tsis ruaj : thaum muaj kev txom nyem,                                                                       

los muaj kev raug luag hiam vim Lo Lus, ces nws ntog tam sis ntawd. 

22 – Cov noob uas poob rau hauv cov pos, yog tus uas hnov Lo Lus, tab sis ntiaj teb kev txob xeeb, nyiaj txiag tej kev ntxias laum Lo Lus,

ces Lo Lus txi tsis taus txiv. 

23 – Cov noob uas poob rau hauv cov av zoo,  yog tus uas hnov Lo Lus, nws to taub Lo Lus ntawd, ces nws txi txiv.

Ib tug txi ib puas lub, ib tug txi rau caum lub, hos lwm tus txi peb caug lub.

Huab Tais Pleev.      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB                

NTXAS KAS LIAS 9 : 9-10

LUB NTSIAB LUS : Yes Xus yog tus tuaj ua kom lub ntiaj teb nyob hauv kev thaj yeeb. Cov neeg ntseeg kuj yuav tshaj txoj kev thaj yeeb ntawd nyob ntiaj teb no.

COV LUS NYOB HAUV NTAWV NTXAS KAS LIAS :

9 – Tsoom pej xeem nyob Xis Yoos, nej ua tej pab lom zem hom khaj mas !

Tsoom pej xeem nyob Yes Lus Xas Les, nej qw tej suab zoo siab mas !

Nej ntsia saib nej tus Vaj tuaj txog nej lawm. Nws yog tus ua ncaj thiab yeej tsoom yeeb ncuab.

Nws tsis muab hlob, nws caij ib tug me nyuam luj.

10 – Nws yuav rhuav cov Es Fais lawv tej tsheb rog. Nws yuav rhuav Yes Lus Xas Les lawv tej tsheb ntaus rog.

Rab hneev ua rog, nws yuav tsis pub muaj ntxiv. Nws yuav ceeb toom kev thaj yeeb rau txhia haiv neeg.

Nws yuav kav teb chaws txij ib lub hiav txwv mus txog lwm lub, txij tus niam dej mus txog npoo ntiaj teb kawg.

Yog Tswv Ntuj lo lus. Nws lub Txiaj Ntsim

Nkauj Paj Nruag             CAV TXOG HUAB TAIS LUB NPE                   

(NPN 145-1)

Txais: Kuv tus Huab Tais Tswv Ntuj, kuv yuav cav txog koj lub np emus npe mus ib txhiab ib txhis!

1 – Kuv tus Tswv Ntuj, kuv cav lus zoo txog koj. Kuv yuav cav txog koj lub npe mus ib txhiab ib txhis.

Kuv yuav niaj hnub cav txog koj lub koob meej. Kuv yuav cav lus zoo txog koj lub npe mus ib txhiab ib txhis.

2 – Huab Tais siab zoo, nws khuv leej neeg, nws tsis npau taws sai. Huab Tais ua zoo rau txhua leej txhua tus.

Nws hlub thiab txuag nws tej dej num.

3 – Huab Tais, koj cov hauj lwm yuav cav txog koj. Cov ntseeg txog koj yuav cav lus zoo rau koj.

Lawv yuav cav txog koj lub Ceeb Tsheej nto koob meej. Lawv yuav tshaj txog koj cov hauj lwm muaj hwj xyeej.

4 – Tswv Ntuj cov lus muaj tseeb thiab nws cov hauj lwm ntshiab huv tas nrho.

Huab Tais tsa cov neeg poob tsag, nws tsa cov neeg raug luag hiam sawv.

ZAJ NYEEM OB               

LOS MAS 8 : 9, 11-13

LUB NTSIAB LUS : Peb niaj hnub tiv peb lub siab tsis zoo : peb kav tsij ua siab loj mloog Leej Tswv Yim Ntshiab mus txog hnub kawg.

COV LUS PAJ LUG SAU RAU COV NTSEEG NYOB LOS MAS.

9 – Ntawm nej, mas nej tsis zwm rau lub cev, nej zwm rau lub tswv yim, vim Tswv Ntuj Leej Tswv Yim -nyob txawm hauv nej. 

Tus twg tsis muaj Leej Pleev lub tswv yim nyob hauv nws mas nws tsis yog Leej Pleev tug. 

11 – Yog tus tau tsa Yes Xus tuag sawv rov los, nws lub tswv yim nyob txawm hauv nej,

mas nws yuav -pub txoj sia rau nej lub cev tuag, vim Leej Ntuj Plig -nyob txawm hauv nej.

12 – Kuv cov kwv tij, yog li ntawd mas peb tshuav luag nuj nqis, tab sis peb tsis tshuav lub cev nuj nqis. 

Tsis tas peb yuav ua neej mloog lub cev. 

13 – Yog nej ua neej mloog lub cev mas nej yuav tuag. Tab sis yog nej cia Leej Ntuj Plig muab lub cev cov hauj lwm tua pov tseg,

mas nej yuav muaj txoj -sia. 

Yog Tswv Ntuj lo lus. Nws lub Txiaj Ntsim

NTAWV MOO ZOO                     

MAS TAIS 11 : 25-30

LUB NTSIAB LUS : Yes Xus hu cov neeg me, cov neeg tsis paub txuj, los ua nws cov thwj tim. Nws qhia Leej Txiv cov txuj rau lawv paub. Nws pub Leej Txiv lub zog rau lawv txais.

COV LUS NYOB HAUV MAS TAIS NTAWV MOO ZOO

25 – Lub caij ntawd, Yes Xus hais tias : « Txiv, kuv cav lus zoo txog koj, Huab Tais kav lub ntuj lub teb,

vim koj zais tej yam ntawd rau cov neeg thoob tsib thiab cov neeg ntse, koj ho qhib rau cov me nyuam yaus. 

26 – Muaj tseeb tiag, Txiv, koj lub siab nyiam li ntawd. 

27 – Kuv Txiv muab tas ib puas tsav yam rau kuv. Tsis muaj leej twg paub Leej Tub, tsuas kawg Leej Txiv thiaj paub. 

Kuj tsis muaj leej twg paub Leej Txiv, tsuas kawg Leej Tub thiaj paub, thiab tus uas Leej Tub pom zoo qhia rau kom paub.

28 – « Tas nej sawv daws uas nej  khwv, thiab ris nra hnyav, nej tuaj cuag kuv -mog !

Kuv yuav cia nej so los siav.       

29 – Nej -txais kuv tus quab. -Nej kawm ntawm kuv mog, vim kuv siab zoo, kuv tsis muab hlob, nej tus plig yuav nrhiav tau chaw so los siav. 

30 – Vim kuv tus quab kwv yooj yim, thiab kuv lub nra sib. »

Huab Tais Pleev .  Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ YEEM IB                   

2 VAJ 4 : 8-11, 14-16

LUB NTSIAB LUS : Vim tus poj niam nyob Xws Nes ua zoo rau tus Yaj Saub Es Lis Xais, mas Tswv Ntuj pub tub ki rau nws.

COV LUS NYOB HAUV NTAWV VAJ PHAU OB

8 – Muaj ib hnub, Es Lis Xais mus so nyob Xws Nes. Muaj ib tug poj niam nyob txawm ntawd tuaj hu Es Lis Xais mus noj mov. 

Txij hnub ntawd los, thaum twg Es Lis Xais hla lub zos ntawd mas nws mus so noj mov hauv tus poj niam ntawd lub tsev. 

9 – Tus -poj niam hais rau nws tus txiv —tias : « Koj ntsia saib, tam li kuv xav mas tus niaj zaus tuaj so hauv wb tsev,

nws yeej yog Tswv Ntuj ib tug neeg siab ntshiab xwb. 

10 – Cia wb ua ib kem tsev me me nyob saum ru tsev rau nws tau so.  Wb muab ib lub txaj, ib lub rooj ua hauj lwm,

ib lub rooj zaum thiab ib lub teeb rau hauv kem tsev ntawd. Thaum twg nws tuaj ces cia nws so nyob hauv kem tsev ntawd. »

11 – Muaj ib hnub, Es Lis Xais rov tuaj so ntawd, nws thiaj mus pw nyob saum kem tsev siab. 

14 – Es Lis Xais pom tus poj niam ua zoo rau nws, nws tso nws tus tub txib mus nug tus poj niam Xws Nes tias :

« Kuv yuav pab dab tsi rau koj ? » Tus tub txib Zes Has Xis coj tus poj niam lo lus teb los hais tias :

« Nws tsis muaj tub ki, thiab nws tus txiv twb laus lawm. » 

15 – Es Lis Xais hais tias : « Koj mus hu nws los saib ! » Tus tub txib mus hu tus poj niam los sawv ntawm qhov rooj. 

Es Lis Xais hais rau nws tias : « Lwm xyoo rov txog lub caij no mas koj yuav tau -ib tug tub los puag. » 

Tus -poj niam teb tias : « Tswv Ntuj tus neeg, koj txhob tso dag rau koj tus ntxhais txib mas ! »

16 – Xyoo ntawd tus poj niam xeeb tub,  rov txog lub caij uas Es Lis Xais hais mas nws yug tau ib tug tub.

Yog Tswv Ntuj lo lus. Nws lub Txiaj Ntsim

Nkauj Paj Nruag             KUV HU NKAUJ CAV TXOG HUAB TAIS                  

(NPN 89-1)

Txais: Kuv yuav hu nkauj cav txog Huab Tais lub siab zoo mus ib txhiab ib txhis.

1 – Kuv yuav hu nkauj cav txog Huab Tais txoj kev cog lus mus li! Kuv lub ncauj yuav tshaj rau sawv daws paub tias:

“Koj lub siab ncaj txheej dhau txheej.” Huab Tais hais tias,: “Kuv txoj kev hlub nyob ruaj nreb mus li.”

Nyob saum ntuj, Tswv Ntuj txoj kev ncaj nyob ruaj nreb mus li.

2 – Haiv neeg uas paub cav txog Tswv Ntuj mas lawv txoj hmoov zoo. Koj lub ntsej muag ci ntsa iab kaj lawv txoj kev.

Niaj hnub, lawv hom khaj nyob hauv koj lub npe. Koj txoj kev haum pheej coj lawv ua neej.

3 – Koj yog lawv lub zog, koj lub txiaj ntsim tsa lawv hauv pliaj siab. Peb daim leem phiaj tuaj ntawm Huab Tais tuaj.

Peb tus vaj yog His Xas Lais tus Ntshiab.

ZAJ NYEEM OB

LOS MAS 6 : 3-4, 8-11

LUB NTSIAB LUS : Peb txais lub Cim Ntxuav nyob hauv Yes Xus mas peb nrog Yes Xus muaj txoj sia. Yog peb npuab Yes Xus mas peb lub siab nyiam kev txhaum tuag lawm.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

3 – Peb cov uas tau txais lub Cim Ntxuav nyob hauv Yes Xus Pleev, mas yog peb txais lub Cim Ntxuav nyob hauv Yes Xus txoj kev tuag. 

4 – Thaum peb txais lub Cim Ntxuav peb nrog Yes Xus tuag, peb nrog nws mus hauv nws lub ntxa. 

8 – Tab sis, yog peb nrog Leej Pleev tuag mas peb ntseeg tias peb yuav nrog nws muaj txoj sia. 

9 – Peb paub tias Leej Pleev sawv hauv qhov tuag los lawm, nws yuav tsis rov tuag dua,

txoj kev tuag tsis muaj cuab kav tuaj raug nws ib zaug ntxiv. 

10 – Nws tuag ib zaug kom txoj kev txhaum tuag. Nyem no, nws ciaj rov los nws npuab Tswv Ntuj mus li.   

11 – Nej, mas nej kuj zoo li ntawd thiab : nej yuav saib tias nej tus neeg txhaum tuag lawm,

tshuav nej tus neeg tshiab npuab Tswv Ntuj uas muaj txoj sia nyob hauv Huab Tais Yes Xus Pleev mus li. 

Yog Tswv Ntuj lo lus. Nws lub Txiaj Ntsim

NTAWV MOO ZOO                    

MAS TAIS 10 : 37-42

LUB NTSIAB LUS : Tus nyiam Yes Xus tiag, nws tsa Yes Xus ua tas puas tsav yam ntej. Nws nyiam Yes Xus dua luag tej, nws nyiam Yes Xus dua nws txoj sia.

COV LUS NYOB HAUV MAS TAIS NTAWV MOO ZOO

37 – « Tus nyiam nws niam nws txiv dua kuv, nws tsis tsim nyog nrog kuv. Tus nyiam nws tej tub tej ntxhais dua kuv, mas nws tsis tsim nyog nrog kuv. 

38 – Tus tsis kwv nws tus ntoo cuam thiab tsis raws kuv qab, mas nws tsis tsim nyog nrog kuv. 

39 – Tus nrhiav -nws txoj sia, nws ua nws txoj sia ploj, hos tus ua nws txoj sia ploj vim kuv, mas nws nrhiav tau nws txoj sia lawm.

40 – « Tus txais nej, mas yog nws kuj txais kuv. Tus txais kuv, mas yog nws txais Tus xa kuv tuaj. 

41 – Tus txais ib tug yaj saub, vim tus ntawd yog yaj saub, nws yuav txais koob haum phim tus yaj saub. 

Tus txais ib tug neeg ncaj, vim tus ntawd yog neeg ncaj, mas nws yuav txais koob haum phim tus neeg ncaj.

42 – « Kuv hais tseeb rau nej, leej twg pub dej rau ib tug neeg me me no haus, vim tus no yog ib tug thwj tim,

tab yog ib khob dej txiag xwb, tsis kav, nws yuav tau txais koob haum.

Huab Tais Pleev.      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB            

Yes Les Mias 20 : 10-13

LUB NTSIAB LUS: « Tswv Ntuj tus Yaj Saub hnov sawv daws cem nws thiab thuam nws, vim nws qhuab qhia sawv daws. Tab sis nws tso siab tias Tswv Ntuj yuav pab nws kom nws yeej sawv daws. »

COV LUS NYOB HAUV NTAWV HAUJ LWM.

LUB NTSIAB LUS: « Tswv Ntuj tus Yaj Saub hnov sawv daws cem nws thiab thuam nws, vim nws qhuab qhia sawv daws. Tab sis nws tso siab tias Tswv Ntuj yuav pab nws kom nws yeej sawv daws. »

10 – Kuv hnov ntau leej hais tej yam ntais ntuj txog kuv tias : « Peb kav tsij tso hem thawj rau nws tsis tseg mas ! Peb mus koom nws rau cov nom ! » Cov uas thaud lawv yog kuv cov phooj ywg, lawv nyas saib kuv puas yuav ntog. Lawv hais tias : « Nyaj tej zaum, nws yuav mloog cov neeg ntxias. Ces peb yuav yeej nws, peb yuav tau kev rob caub. »

11 – Tab sis HUAB TAIS tsa kuv cai, HUAB TAIS yog zoo li ib tug peeb zeej zog nchav. Kuv cov yeeb ncuab yuav ntog, lawv yuav tsis yeej. Lawv yuav nco ntsoov ib txhiab ib txhis txog hnub lawv poob ntsej muag.

12 – HUAB TAIS, koj yog tus kav tsoom tub rog, koj tsom tau tus neeg siab ncaj, koj pom nyob hauv neeg nruab siab. Kuv vam tias kuv yuav pom koj rob caub rau lawv, vim kuv tso kuv rooj plaub rau hauv koj tes.

13 – Nej hu nkauj rau HUAB TAIS, nej cav lus zoo txog HUAB TAIS, vim nws npo tus neeg pluag tus plig ntawm cov neeg phem txhais tes los.

Yog Tswv Ntuj Lo Lus.         Nws lus txiaj ntsim

Nkauj Paj Nruag 69                              

8 – Yog vim koj : Kuv thiaj raug luag tsawm, yog vim koj, kuv thiaj tau txaj muag.

9 – Kuv cov kwv tij saib kuv yog ib tug qhua, kuv niam cov tub tsis paub kuv yog leej twg.

10 – Vim kuv kub siab rau koj lub tsev, lawv tsawm koj, lawv tej lus tsawm poob los saum kuv.

14 – HUAB TAIS, kuv zaj teev Ntuj yog zoo li no ; txog zoo sij hawm lawm ; Tswv Ntuj, koj lub siab hlub loj tas nrho, thov koj teb kuv, vim koj yog txoj kev cawm tseem ceeb.

17 – HUAB TAIS, thov koj teb kuv, vim koj hlub thiab koj siab zoo. Thov koj zam rau kuv, koj tig ntsia kuv.

33 – Cov me neeg pom li ntawd, lawv zoo siab : « Nej cov uas nrhiav Tswv Ntuj, « thov kom nej ua neej ntev niaj ntau xyoo. »

34 – HUAB TAIS pub rau cov pluag raws li lawv thov, thaum nws cov neeg raug luag ntes nyob pej kum teb, nws tsis tso lawv pov tseg.

35 – Lub ntuj, lub teb, dej ntuj thiab tsoom tsiaj txhu mus los hauv hiav txwv, nej cav lus zoo rau nws.

ZAJ NYEEM OB   

Los Mas 5 : 12-15

LUB NTSIAB LUS : Ntuj lub txiaj ntsim muaj zog dua neeg cov txhaum. Yes Xus txoj kev them txim txhaum muaj zog dua tas sib zeej tsoom neeg cov txhaum.

12 – Yog vim tib tug neeg xwb, mas kev txhaum tau tshwm los nyob hauv lub ntiaj teb, ces kev txhaum coj kev tuag los. Txoj kev tuag thiaj raug tas zeej tsoom, vim sawv daws ua txhaum.

13 – Kev txhaum xub tshwm los nyob ntiaj teb ua ntej Txoj Cai, tab sis thaum tsis muaj Txoj Cai, mas yus tsis ris lub txim txhaum. Txij As Das los txog Mais Xes, kev tuag ua vaj kav sawv daws :

14 – tab yog cov neeg tsis tau ua tej yam txhaum zoo nkaus li As Das mas lawv kuj zwm rau kev tuag, vim As Das yog tus duab qhia txog tus yuav tuaj.

15 – Tab sis lub txiaj ntsim tsis zoo li kev txhaum. Vim ib tug xwb ua txhaum mas tas zeej tsoom tuag. Nyem no Tswv Ntuj lub txiaj ntsim thiab cov paj tshab uas Ntuj pub nyob hauv Yes Xus Pleev haj yam ntws los ntau rau zeej tsoom.

Yog Tswv Ntuj Lo Lus.         Nws lus txiaj ntsim

NTAWV MOO ZOO

MAS TAIS 10 : 26-33

LUB NTSIAB LUS : Peb tsis txhob ntshai tshaj Ntuj lus vim Tswv Ntuj pov hwm peb. Yog yus ntshai zeem tseeb txog Yes Xus mas Yes Xus thiaj cev tsis tau yus rau nws Leej Txiv.

COV LUS NYOB HAUV MAS TAIS NTAWV MOO ZOO:

26 – « Nej txhob ntshai luag hem ! Vim tsis muaj ib yam npog rawv uas yuav tsis qhib tawm, tsis muaj ib yam zais ntshis uas yuav tsis tawm los rau sawv daws paub. 

27 – Tej yam uas kuv hais rau nej hauv qhov tsaus ntuj, nej yuav hais tawm nruab hnub nrig. Hos yam nej hnov ntxhi rau hauv nej pob ntseg, mas nej yuav nce mus tshaj saum ruv tsev.

28 – « Nej txhob ntshai cov neeg tua nej lub cev, tab sis lawv tua tsis tau nej tus plig. Nej yuav ntshai tus muaj peev xwm rhuav nej lub cev thiab tus plig hauv hav hluav taws.

29 – Ob tug noog tsig txhuv, luag tsuas muag tau ib npib xwb. Tsis kav, tsis muaj ib tug poob hauv av tau, yog nej Txiv tsis tso lus. 

30 – Nej kuj ib yam li ntawd, tab yog nej cov plaub hau, nej Txiv yeej suav tas huv si lawm. 

31 – Nej tsis txhob ntshai dab tsi mog, nej muaj nqis tshaj tej pab tsig txhuv coob coob ua ke.

32 – « Leej twg lees rau sawv daws tias nws paub kuv, mas kuv kuj lees rau kuv Txiv nyob saum Ntuj tias kuv paub nws. 

33 – Hos tus tsis lees rau sawv daws tias nws paub kuv, kuv kuj yuav tsis lees rau kuv Txiv nyob saum ntuj tias kuv paub nws.

Huab Tais Pleev.      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

ZAJ NYEEM IB             

PHAU TSIB 7 : 6-11

LUB NTSIAB LUS : Tswv Ntuj nyiam peb, tsis yog vim peb muaj nqes. Hos yog vim nws siab zoo. Nws xav pab ntiaj teb neeg xws li ib txwm nws cog lus.

COV LUS NYOB HAUV NTAWV PHAU TSIB HAIS TIAS:

6 – Mais Xes hais rau tsoom His Xas Lais tias : “Cov His Xas Lais, nej yog ib haiv neeg rau nej tus Huab Tais Tswv Ntuj.

Nej yog haiv neeg uas nej tus Huab Tais xaiv nyob hauv tas txhia haiv neeg nyob ntiaj teb los ua nws haiv neeg, ua nws tug.

7 – Tswv Ntuj npuab nej thiab xaiv nej tsis yog vim nej coob dua lwm cov haiv neeg. Nej twb yog haiv neeg tsawg dua cov.

8 – Hos yog vim Tswv Ntuj hlub nej, thiab vim nws xav ua raws li nws tau nrog nej cov yawg koob cog lus,

nws thiaj tau coj nej tawm hauv lub teb chaws ua qhev los, nws npo nej ntawm tus Vaj Hais Nkws Tos Fas Loos lub peev xwm.

9 – Ua li, nej yuav paub tias nej tus Huab Tais Tswv Ntuj yog tus tseem ceeb tiag. Nws yog tus Tswv Ntuj tsis fav xeeb. Nws cog lus ruaj.

Nws hlub cov neeg nyiam nws thiab coj nws cov lus qhia. Nws hlub lawv mus txog txhiab niag tim puas xyoo.

10 – Tab sis Tswv Ntuj muab txim rau cov ntxub nws. Tswv Ntuj ua kom cov ntxub nws lawv tuag sai.

11 – Li ntawd, nej yuav coj tej lus qhia tej kev cai lij choj uas hnub no kuv ceeb toom rau nej.

Yog Tswv Ntuj lo lus. Nws lub Txiaj Ntsim

Nkauj Paj Nruag             HUAB TAIS HLUB COV NEEG HWM NWS               

(NPN 103-1)

Txais: Huab Tais lub siab hlub roos cov neeg hwm nws mus ib txhiab ib txhis.

1 – Kuv tus plig, koj cav lus zoo txog Huab Tais. Kuv tej siab ntsws, nej cav lus zoo txog nws lub npe ntshiab.

Kuv tus plig, koj cav lus zoo txog Huab Tais. Koj txhob mom nws txheej. Koj yuav nco ntsoov nws tej txiaj ntsim.

2 – Nws zam koj cov txhaum, nws kho koj tej mob nkeeg. Nws muab nws lub siab zoo thiab khuv leej neeg roos koj.

Nws cawm koj txoj sia ntawm kev puas tsuaj.

3 – Huab Tais siab zoo, nws khuv leej neeg tas nrho. Nws hlub neeg mus li, nws tsis npau taws sai.

Nws tsis nplua peb raws li peb cov txhaum. Nws tsis pauj kev phem rau tej txhaum peb tau ua.

ZAJ NYEEM OB           

1 ZAM 4 : 7-16

LUB NTSIAB LUS : Cov paub Tswv Ntuj yog cov nyiam Tswv Ntuj. Thiab thawj txoj kev xyaum nyiam Tswv Ntuj yog xyaum nyiam tsoom txheeb ze.

COV LUS NYOB HAUV ZAM TSAB NTAWV IB

7 – Cov zoo nyiam, peb yuav sib nyiam sib hlub mog ! Vim  txoj kev nyiam tuaj ntawm Tswv Ntuj tuaj, ua li mas tus twg nyiam,

tus ntawd yug ntawm Tswv Ntuj los, thiab nws paub Tswv Ntuj. 

8 – Tus tsis txawj nyiam, mas nws tsis paub Tswv Ntuj, vim Tswv Ntuj yog txoj kev nyiam. 

9 – Tswv Ntuj txoj kev nyiam peb tawm los rau qhov muag pom xyeem li no : Tswv Ntuj xa nws Leej Tub Twm Zeej tuaj nyob ntiaj teb no,

kom peb ciaj nyob hauv nws Leej Tub. 

10 – Nws txoj kev nyiam yog zoo li no : tsis yog peb tau nyiam Tswv Ntuj, yog Tswv Ntuj tau nyiam peb,

thiab yog nws xa nws Leej Tub tuaj ua nqi txhiv peb ntawm peb cov txhaum. 

11 – Cov zoo nyiam, yog Tswv Ntuj nyiam peb npaum li ntawd, mas peb kuj yuav sib nyiam sib hlub thiab. 

12 – Tsis muaj leej twg tau ntsia ntsoov Tswv Ntuj ib zaug li. Yog peb sib nyiam sib hlub, mas Tswv Ntuj nyob hauv peb,

thiab nws txoj kev nyiam  uas zoo txhij zoo txhua hlob tiav nyob hauv peb. 

13 – Peb paub tias peb nyob hauv Tswv Ntuj, thiab nws nyob hauv peb vim qhov no : yog qhov nws pub nws Leej Ntuj Plig rau peb. 

14 – Ntawm peb, mas peb tau ntsia ntsoov, ces peb ua tim khawv zeem tias Leej Txiv tau xa Leej Tub tuaj cawm lub qab ntuj neeg. 

15 – Tus lees tias Yes Xus yog Tswv Ntuj Leej Tub, mas Tswv Ntuj nyob txawm hauv nws, thiab nws nyob hauv Tswv Ntuj. 

16 – Peb paub Tswv Ntuj txoj kev nyiam peb lawm, ces peb ntseeg. Tswv Ntuj yog txoj kev nyiam : tus twg nyob hauv txoj kev nyiam,

mas nws kuj nyob hauv Tswv Ntuj, thiab Tswv Ntuj nyob hauv nws. 

Yog Tswv Ntuj lo lus. Nws lub Txiaj Ntsim

NTAWV MOO ZOO             

MAS TAIS 11 : 25-30

LUB NTSIAB LUS : Cov neeg me yuav paub Tswv Ntuj lub siab kuj tau. Yog peb tuaj cuag Yes Xus, mas peb yuav paub Yes Xus lub siab.

COV LUS NYOB HAUV MAS TAIS NTAWV MOO ZOO

25        Lub caij ntawd, Yes Xus hais tias :  

« Txiv, kuv cav lus zoo txog koj, Huab Tais kav lub ntuj lub teb,

vim koj zais tej yam ntawd rau cov neeg thoob tsib thiab cov neeg ntse,

koj ho qhib rau cov me nyuam yaus. 

26        Muaj tseeb tiag, Txiv, koj lub siab nyiam li ntawd. 

27        Kuv Txiv muab tas ib puas tsav yam rau kuv. 

Tsis muaj leej twg paub Leej Tub, tsuas kawg Leej Txiv thiaj paub. 

Kuj tsis muaj leej twg paub Leej Txiv, tsuas kawg Leej Tub thiaj paub,

thiab tus uas Leej Tub pom zoo qhia rau kom paub.

28        « Tas nej sawv daws uas nej  khwv, thiab ris nra hnyav, nej tuaj cuag kuv  mog !

Kuv yuav cia nej so los siav.       

29        Nej  txais kuv tus quab.  Nej kawm ntawm kuv mog, vim kuv siab zoo, kuv tsis muab hlob,

nej tus plig yuav nrhiav tau chaw so los siav. 

30        Vim kuv tus quab kwv yooj yim, thiab kuv lub nra sib.

Huab Tais Pleev .  Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Ua hmoov Leej Ntuj Plig nqes los tas, yog hnub chiv ob tom qab.

ZAJ NYEEM IB          

 PHAU TSIB 8 : 2-3, 14-15

LUB NTSIAB LUS : Lub Cim Yug yog cov mov pab hla lub ntiaj teb, pab tiv tas puas tsav yam xwv txheej.

COV LUS NYOB HAUV NTAWV PHAU TSIB.

2 – His Xas Lais, koj nco ntsoov txog txoj kev uas koj tus Tswv Ntuj cia koj taug tau plaub caug xyoo

nyob hauv teb chaws suab puam. Vim Tswv Ntuj xav qhia koj kom koj nyiam ua tus me,

nws xav sim koj, thiab nws xav paub koj lub siab kom thoob. Nws xav saib koj tias koj puas coj nraim nws cov lus qhia los tsis coj.

3 – Tswv Ntuj tau tso koj ua tus me kawg, nws cia koj raug kev tshaib. Nws tau muab cov mov Mas Nas rau koj noj,

yog ib co mov uas koj thiab koj cov yawg koob nej tseem tsis tau paub ib zaug li.

Tswv Ntuj xav qhia koj tias neeg tsis yog noj mov xwb neeg thiaj nyob taus.

Neeg tseem yuav tas puas tsav yam tawm hauv Tswv Ntuj lub ncauj los tiab.

14 – Li ntawd mas koj yuav nco ntsoov tias :

Huab Tais Tswv Ntuj tau coj koj tawm hauv Hais Nkws Tos teb los, tawm hauv lub teb chaws ua qhev los.

15 – Nws coj koj mus hla lub teb chaws suab puam dav thiab txaus ntshai, Yog lub teb chaws muaj cov nab thiab cov laum kiv tshooj.

Yog lub teb chaws tshaib dej. Nyob hauv lub teb chaws qhuav qhawv tsis muaj dej,

yog Tswv Ntuj ua kom dej txhawv los rau nej haus, ua kom dej txhawv saum lub pob tsuas tawv tawm los.

Yog Tswv Ntuj Lo Lus.         Nws lus txiaj ntsim

Nkauj Paj Nruag:             YES LUS XAS LES, KOJ CAV TXOG HUAB TAIS                

(NPN 147-1)

Txais: Yes Lus Xas Les, koj cav txog Huab Tais mas!

1 – Yes Lus Xas Les, koj nqaum paj nqaum nruas rau Huab Tais. Xis Yoos, koj cav txog koj tus Tswv Ntuj

vim nws ua kom koj cov ntsia liaj rooj khov. Nws foom hmoov zoo rau koj tej tub ki hauv tsev.

2 – Nws pub kev thaj yeeb rau koj lub teb chaws; nws pub txhiam laj txhiam xws rau koj noj txaus siab.

Nws txib nws lo lus tuaj rau ntiaj teb ces nws lo lus khiav yeev tuaj.

3 – Nws qhia nws lo lus rau Yas Kos. Nws qhia nws cov cai lij choj thiab cov lus qhia rau haiv His Xas Lais.

Nws tsis tau ua li ntawd rau ib haiv neeg twg li; lwm haiv neeg tsis paub nws cov lus qhia.

ZAJ NYEEM OB

1 KOS LIS NTHOS 10 : 16-17

LUB NTSIAB LUS : Lub Cim Yug yog lub cim tshaj tias peb cov neeg ntseeg koom siab koom ntsw nyob hauv Yes Xus.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

16 – Lub ntim foom hmoov, uas peb cav  txog,

tsis ua kom peb koom siab nyob hauv Leej Pleev cov ntshav lod ? 

Cov mov uas peb muab ntais, tsis ua kom peb koom siab nyob hauv Leej Pleev lub cev lod ? 

17 – Muaj tib lub ncuav mov xwb, peb sawv daws koom ua ib lub cev xwb. 

Peb sawv daws koom ua ib lub cev, vim peb sawv daws txais tib lub ncuav mov. 

Yog Tswv Ntuj Lo Lus.         Nws lus txiaj ntsim

NTAWV MOO ZOO         

ZAM 6 : 51-58

LUB NTSIAB LUS : Lub Cim Yug pub txoj sia rau peb. Yog vim peb niaj hnub tuaj txais lub Cim Yug peb thiaj nyob ruaj nreb hauv kev ntseeg.

COV LUS NYOB HAUV ZAM NTAWV MOO ZOO.

51 – Kuv yog cov mov muaj txoj sia nqes saum ntuj los.  Leej twg noj cov mov no, nws yuav ciaj nyob mus li.

Cov mov uas kuv yuav muab pub rau lub qab ntuj neeg noj kom lawv muaj txoj sia, yog kuv lub cev nqaij. »

52 – Ces cov Yus Das sib cav zom zaws tias :

« Tus neeg ntawd yuav ua li cas muab tau nws cev nqaij los rau peb noj ? » 

53 – Yes Xus thiaj hais rau lawv tias : « Kuv hais qhov tseeb tiag rau nej :

Yog nej tsis noj Neeg Leej Tub lub cev nqaij thiab tsis haus nws cov ntshav, mas nej yuav tsis muaj txoj sia nyob hauv nej. 

54 – Hos tus noj kuv lub cev nqaij thiab haus kuv cov ntshav, nws muaj txoj sia nyob mus li.  Hnub kawg, kuv yuav tsa nws sawv rov qab los. 

55 – Vim kuv lub cev nqaij yog ib co tseem txhiam xws noj, thiab kuv cov ntshav yog ib yam zoo haus. 

56 – Tus noj kuv cev nqaij thiab haus kuv cov ntshav, nws nyob hauv kuv thiab kuv nyob hauv nws. 

57 – Leej Txiv uas nws muaj txoj sia, nws xa kuv tuaj, ces kuv muaj txoj sia vim Leej Txiv.  Li ntawd, tus noj kuv, nws kuj yuav muaj txoj sia, vim kuv. 

58 – Cov mov nqes saum ntuj los yog zoo li ntawd. Cov mov no tsis zoo li cov uas cov yawg koob tau noj, tab sis lawv tuag tas lawm. 

Hos tus noj cov mov no, mas nws yuav ciaj nyob mus li. »

Huab Tais Pleev.      Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Ua hmoov Leej Ntuj Plig nqes los tas, yog hnub chiv tom qab.

ZAJ NYEEM IB             

KEV TSIV 34 : 4-6, 8-9

LUB NTSIAB LUS : Tswv Ntuj hais rau Mais Xes tias Tswv Ntuj yog ib tug Huab Tais hlub neeg, nws tsis yog ib tug tswv qhia txoj cai nruj nruj.

COV LUS NYOB HAUV NTAWV KEV TSIV

4 – Mais Xes sawv ntxov mus pem lub roob Xis Nais, raws li Tswv Ntuj qhia rau nws. Nws tuav ob daig txiag zeb.

5 – HUAB TAIS nyob hauv ib twv huab nqes los, HUAB TAIS los nrog Mais Xes sawv ua  ke. Mais Xes hu txog HUAB TAIS lub npe. 

6 – HUAB TAIS hla ntawm Mais Xes xub ntiag, ces Mais Xes qw nrov nrov tias: 

« HUAB TAIS, HUAB TAIS, tus Tswv Ntuj uas lub siab hlub mos nyoos, thiab khuv leej neeg, tus npau taws qeeb, tus pub paj tshab ntau,

tus tsis fav xeeb.       

8 – Thooj txhij ntawd, Mais Xes txhos caug ntua pe hauv av pe. 

9 – Ces nws hais tias : « Huab Tais, yog koj saib kuv tsim nyog, thov koj nrog nraim peb mus, txawm tias peb yog ib haiv neeg xwb qwb txhav,

los thov koj zam peb qhov yuam kev thiab zam txhaum rau peb, koj muab peb los ua koj tug. »

Yog Tswv Ntuj lo lus. Nws lub Txiaj Ntsim

Nkauj Paj Nruag            PEB CAV LUS ZOO TXOG KOJ            

(Das Nias 3)

Txais: Lub koob meej thiab lo lus cav yog koj tug mus tas ib txhiab ib txhis.

1 – Huab Tais, peb cov yawg koob tus Tswv Ntuj, koj muaj koob meej nto moo,

tsim nyog peb cav lus zoo txog koj tas ib txhiab ib txhis. Koj lub npe ntshiab nto moo lug,

tsim nyog peb cav lus zoo txog koj tas ib txhiab ib txhis.

2 – Koj muaj koob meej nto moo lug hauv lub tuam tsev uas koj lub hwj chim ntshiab nyob,

tsim nyog peb cav lus zoo txog koj lub koob meej tas ib txhiab ib txhis.

3 – Koj muaj koob meej nto moo lug saum lub theej kiab uas nyob hauv koj lub Ceeb Tsheej,

tsim nyog peb cav lus zoo txog koj tas ib txhiab ib txhis.

4 – Koj muaj koob meej nto moo lug. Koj zaum saum lub theej kiab uas cov Tshiab Kes Lus Npis zov.

Koj tsom pom puag hauv qab tiv txwv,

tsim nyog peb cav lus zoo txog koj tas ib txhiab ib txhis.

ZAJ NYEEM OB         

 2 KOS LIS NTHOS 13 : 11-13

LUB NTSIAB LUS : Peb yuav niaj hnub nyob kaj siab lug nyob hauv peb leeg Huab Tais.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

11 – Kwv tij sawv daws, qhov kawg no, thov kom nej tau nyob kaj siab lug.  Nej yeej meem muab siab rau ua neeg zoo txhij zoo txhua. 

Nej sib yaum ua siab loj. Nej koom ua ib lub siab ib lub ntsws mog.  Nej coj nej lub neej nyob hauv txoj kev thaj yeeb.

Ces tus Tswv Ntuj pub kev nyiam thiab kev thaj yeeb yuav nrog nej nyob. 

12 – Nej rov sib foom lus hmov tshua, nej sib nwj nyob hauv txoj kev ntshiab.  Tas tsoom ntshiab foom lus hmov tshua rau  nej.

13 – Huab Tais Yes Xus Pleev lub txiaj ntsim, Tswv Ntuj txoj kev nyiam, thiab Leej Ntuj Plig Ntshiab txoj kev sib haum xeeb nrog nej sawv daws nyob.

           Yog Tswv Ntuj lo lus. Nws lub Txiaj Ntsim

NTAWV MOO ZOO

ZAM 3 : 16-18

LUB NTSIAB LUS : Peb tus Tswv Ntuj yog ib tug Tswv hlub lub ntiaj teb neeg, nws tso nws leej Tub tuaj pab lub ntiaj teb neeg.

COV LUS NYOB HAUV ZAM NTAWV MOO ZOO.

16 – Vim Tswv Ntuj nyiam lub qab ntuj neeg npaum no : 

nws thiaj muab nws Leej Tub twm zeej rau, kom xwv tus ntseeg txog Leej Tub txhob tuag,

tab sis kom nws muaj txoj sia nyob mus li. 

17 – Tswv Ntuj tsis xa Leej Tub tuaj hauv lub qab ntuj kom nws muab txim rau lub qab ntuj neeg,

nws xa Leej Tub tuaj cawm lub qab ntuj neeg. 

18 – Tus ntseeg txog Leej Tub, nws tsis raug txiav txim. Tus tsis ntseeg, nws twb raug txiav txim lawm,

vim nws tsis ntseeg txog Tswv Ntuj Leej Tub twm zeej lub npe. 

Huab Tais Pleev .  Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Hnub nyoog Leej Ntuj Plig nqes los.

ZAJ NYEEM IB        

HAUJ LWM 2 : 1-11

LUB NTSIAB LUS : Leej Tswv Yim Ntsiab yog zoo li cua : nws ua kom neeg lub siab muaj zog li cua hlob. Kuj yog zoo li hluav taws : nws ua kom neeg pom kev thiab kub siab.

COV LUS NYOB HAUV NTAWV HAUJ LWM.

1 -Thaum txog lub Hnub Nyoog Tsib Caug, tas cov thwj tim huv tib si tuaj sib txoos ua ke. 

2 -Ib sij huam, txawm muaj ib lub suab nrov saum ntuj tuaj xws li ib nthwv cua hlob hlob ntsawj,

lub suab ntawd nrov thoob plaws lub tsev uas lawv nyob. 

3 – Ces lawv pom tej ntshua nplaim zoo li nplaim taws, ncau ua tej tus nplaim me ya tuaj tsaws saum cov thwj tim txhua tus. 

4 – Lawv sawv daws tau txais Leej Ntuj Plig Ntshiab puv hauv lawv, ces lawv pib hais ntau xeem lus raws li Leej Ntuj Plig pub kom lawv hais tau.

5 – Thaum ntawd, muaj ib co Yus Das kub siab ntseeg tuaj ntawm tas cov teb chaws hauv lub qab ntuj khwb tuaj nyob Yes Lus Xas Les. 

6 – Thaum lawv hnov lub suab nrov, tas ib tsoom neeg tuaj ntsauv vij vog. Sawv daws ua siab poob nthav vim tias thaum cov thwj tim hais lus,

mas lawv nyias hnov hais nyias xeem lus.

7 – Lawv ceeb tas nrho, xav tsis thoob, ces lawv hais tias : « Tas cov neeg uas hais lus ntawd, lawv tsis yog ib co Nkas Lis Lais lod ?  

8 -Ua li cas peb thiaj nyias hnov lawv hais nyias xeem lus ? 

9 – Peb yog ib co neeg Pas Tos, Mes Dias, Es Las Mias, peb nyob Mes Xos Pos Tas Mias tuaj, Yus Das, Kas Pas Dos, Poos Tus, As Xias, 

10 – Fis Zias, Pas Fis Lias, nyob Hais Nkws Tos thiab Lis Npias teb chaws uas ze Xis Les Nas, peb yog neeg Los Mas tuaj nyob ntawm no. 

11 – Peb yog ib co Yus Das thiab ib co teev dab txais kev ntseeg, ib co Khes Tas, As Las Npias,

peb puav leej hnov lawv hais peb xeem lus cav txog Tswv Ntuj lub hwj chim. »

Yog Tswv Ntuj Lo Lus       Nws lus txiaj ntsim

Nkauj Paj Nruag :              LEEJ NTUJ PLIG NTSHIAB NQES LOS                      (NPN 104-2)

Txais: Huab Tais, thov koj xa Leej Ntuj Plig Ntshiab nqes los ua kom lub ntiaj teb rov tshiab tuaj.

1 – Kuv tus plig, koj cav lus zoo txog Huab Tais! Kuv tus Huab Tais Tswv Ntuj, koj loj tas nrho.

Koj hnav koob meej ci ntsa iab. Koj hnav qhov pom kev li lub tsho tshaj sab muaj hwj chim.

Koj nthuav lub ntuj zoo li ib chaws ntaub.

2 – Huab Tais, koj cov hauj lwm ntau tas nrho. Koj tsim tas txhua yam raws kev thoob tsib.

Koj tsim txhua yam tsiaj nyob puv ntiaj teb. Kuv tus plig, koj cav lus zoo txog Huab Tais!

3 – Txhua leej txhua tus tos koj yuav pub txhiam xws rau lawv raws caij nyoog. Koj pub rau lawv ces lawv cev tes txais.

Koj nthuav koj txhais tes ces lawv tau txais txhua yam zoo.

4 – Yog koj rho txoj pa ntawm leej twg mas lawv txoj sia tu, lawv rov mus ua av luaj.

Thaum koj xa koj lub tswv yim tuaj mas lawv rov tsheej xeeb muaj txoj sia.

Koj ua kom lub ntiaj teb rov tshiab tuaj.

ZAJ NYEEM OB         

1 KOS LIS NTHOS 12 : 3-13

LUB NTSIAB LUS : Leej Tswv Yim Ntshiab pab sawv daws kom nyias txawj ua nyias txoj hauj lwm nyob hauv lub Koom Txoos.

COV LUS PAJ LUG SAU TUAJ RAU COV NTSEEG NYOB KOS LIS NTHOS.

3 – Vim li ntawd, kuv thiaj li hais rau nej tias :

Tswv Ntuj Leej Ntuj Plig tsis qhib ib tug qhov ncauj kom hais tias : ‘Muab Yes Xus rhuav pov tseg.’ Yog ib tug neeg tsis muaj Leej Ntuj Plig qhia nws, mas nws hais tsis tau tias : ‘Yes Xus yog Huab Tais.’

4 – Ntuj pub ntau yam txiaj ntsim, tiam sis yog tuaj ntawm Leej Ntuj Plig tib leeg tuaj xwb. 

5 – Muaj ntau txoj kab xwm, tab sis yog tuaj ntawm tib tug Huab Tais tuaj. 

6 – Muaj ntau txoj hauj lwm, tab sis yog tib tug Tswv Ntuj ua cov hauj lwm ntawd nyob hauv txhua leej tib neeg. 

7 – Ntuj pub Leej Ntuj Plig rau peb kom peb pab tau tsoom sid. 

8 – Ib txhia, Leej Ntuj Plig pub ib zaj lus thoob tsib rau lawv. Ib txhia, Leej Ntuj Plig pub ib zag txuj ci rau lawv. 

9 – Ib txhia, Leej Ntuj Plig pub kom lawv muaj ib lub siab ntseeg.  Ib txhia, Leej Ntuj Plig pub kom lawv txawj kho mob. 

10 – Ib txhia, Leej Ntuj Plig pub kom lawv txawj ua hwj huam yees ntxwv. Ib txhia, Leej Ntuj Plig pub kom lawv txawj ua Yaj Saub.

Ib txhia, Leej Ntuj Plig pub kom lawv txawj pom tias puas yog dab. Ib txhia, Leej Ntuj Plig pub kom lawv txawj hais ntau xeem lus.

Ib txhia, Leej Ntuj Plig pub kom lawv txawj txhais ntau xeem lus. 

11 – Tas ib puas tsav yam ntawd, yog Leej Ntuj Plig tib leeg ua, yog Leej Ntuj Plig tib leeg muab faib rau zeej tsoom sawv daws, raws li nws nyiam.

12 – Ib yam li neeg lub cev : neeg muaj tib lub cev xwb : tab sis muaj tes, muaj taw, muaj ntau yam :

txhua yam yog lub cev, txawm tias muaj ntau ces, los yeej yog tib lub cev xwb.  Nyob hauv Leej Pleev kuj zoo li ntawd. 

13 – Vim tias peb sawv daws tau txais lub Cim Ntxuav nyob hauv Leej Ntuj Plig tib leeg, thiab nyob hauv tib lub cev xwb. 

Tsis hais cov Yus Das los cov Hes Las, cov qhev los cov twj lij, peb sawv daws puav leej tau haus txaus siab ntawm Leej Ntuj Plig tib leeg. 

Yog Tswv Ntuj Lo Lus.         Nws lus txiaj ntsim

NTAWV MOO ZOO             

ZAM 20 : 19-23            

LUB NTSIAB LUS : Leej Tswv Yim Ntshiab yog tus tuaj tshoj neeg lub siab kom paub tias yam twg zoo, yam twg txhaum.

COV LUS NYOB HAUV ZAM NTAWV MOO ZOO.

19 – Tib hnub ntawd thaum tsaus ntuj, uas yog thawj hnub pib lub lis piam,  cov qhov rooj hauv qhov chaw cov thwj tim nyob kaw tas, vim lawv ntshai cov Yus Das.  Yes Xus los sawv hauv nruab nrab, nws hais rau lawv tias : « Nej nyob kaj lug. » 

20 – Thaum Yes Xus hais lo lus ntawd tas, nws muab nws ob txhais tes thiab nws phab tav rau lawv saib.  Cov thwj tim pom Huab Tais, lawv zoo siab kawg. 

21 – Yes Xus rov hais rau lawv tias : « Nej nyob kaj lug ! Kuv xa nej mus xws li Leej Txiv xa kuv tuaj. » 

22 – Yes Xus hais li tas, nws tshuab pa rau lawv, nws hais rau lawv tias : « Nej txais Leej Ntuj Plig Ntshiab. 

23 – Nej daws txhaum rau leej twg, mas nws cov txhaum yuav daws.  Nej tsis daws leej twg cov txhaum, mas nws cov txhaum yuav nyob. »

Huab Tais Pleev.      Lub qab ntuj neeg cav txog koj