Auteur

Vous trouverez ci-dessous ce qui a été publié par l'auteur que vous avez sélectionné

Author Archive by Ntsuab-Rwg Thoj

Cov zaj nyeem nyob hauv hnub Lundi

Par Ntsuab-Rwg Thoj

Zaj nyeem 1 : Hauj lwm ( tshooj 2, nqe 14, 22b-33).

Pob Zeb nrog Pab Kaum Ib leeg sawv ntsug, nws hais cov lus no nrov nrov tias : « Cov Yus Das, thiab tas nej cov uas nyob hauv Yes Lus Xas Les, nej yuav tsum paub qhov no, nej tig ntsej los mloog kuv cov lus mog.

Yog Tswv Ntuj pub kom nws ua tau li ntawd. Tus neeg ntawd, luag muab nws muag rau nej, raws nraim li Tswv Ntuj tau teem tseg nyob hauv nws txoj kev paub yav tom ntej.

Nej kom cov neeg tsis hwm txoj cai xuas lawv txhais tes mus tua nws, thiab muab nws ntsia saum ntoo cuam. Tswv Ntuj tsa nws sawv rov los, thiab npo nws ntawm txoj kev mob hauv qhov tuag. Vim tias kev tuag tsis muaj hwj huam tuav tau nws cia.

Das Vis twb hais txog nws tias : Kuv pom Huab Tais nyob ntawm kuv xub ntiag tsis tseg. Huab Tais nyob ntawm kuv sab xis, kom kuv txhob qaij txhob qaug.

Yog vim li ntawd kuv lub plawv thiaj xyiv fab hlo, kuv tus nplaig hom khaj. Kuv cev nqaij muaj sia nyob hauv txoj kev tso siab.. Vim koj yuav tsis tso kuv tus plig pov tseg rau hauv ntuj txias teb tsaus, koj yuav tsis cia koj tus Ntshiab lub cev lwj.

Koj ua kom kuv paub cov kev mus hauv txoj sia. Koj cia kuv pom koj lub ntsej muag kom kuv xyiv fab. Kwv tij sawv daws, kuv thov hais meej rau nej txog tus yawg koob Das Vis tias : nws tuag thiab nws mus zwm av lawm. Nws lub ntxa tseem nyob rau peb pom txog niaj hnub no.

Tiam sis Das Vis yog ib tug yaj saub, mas nws paub tias Tswv Ntuj twb cog lus rau nws yuav cia nws ib tug xeeb ntxwv uas yog nws cov roj ntsha zaum nws lub theej kiab.

Das Vis twb xub pom tias Leej Pleev yuav sawv rov los, ces nws thiaj qhia tias : Ntuj yuav tsis tso nws pov tseg rau hauv tub tuag teb, thiab nws lub cev nqaij yuav tsis lwj.

Tus Yes Xus ntawd, Tswv Ntuj tsa nws sawv rov los lawm. Peb ua taus tim khawv.

Nyem no Tswv Ntuj sab xis tsa Yes Xus nyob siab. Nws tau txais Leej Ntuj Plig Ntshiab ntawm Leej Txiv, vim Leej Txiv yeej tau cog lus li ntawd. Yes Xus thiaj tso Leej Ntuj Plig los rau sawv daws : yog qhov uas nej pom thiab nej hnov.

Mas Tais ntawv moo zoo (tshooj 28, nqe 8-15)

Ob tug poj niam tso plhuav lub ntxa tseg. Nkawd ntshai thiab zoo siab tas nrho. Nkawd khiav mus xa lub moo ntawd rau cov thwj tim.

Yes Xus tuaj tos ob tug poj niam kev, nws hais tias : « Neb nyob kaj lug ». Ces nkawd txav los ze Yes Xus, nkawd puag Yes Xus ko taw, nkawd pe nws.

Yes Xus hais rau nkawd tias : « Neb txhob ntshai mog, neb mus qhia kuv cov kwv tij kom lawv mus lawm Nkas Lis Lais teb, lawv yuav pom kuv nyob ntawd. »

Lub sij hawm ob tug poj niam tab tom rov mus, cov zov keeb ob peb leeg kuj rov mus hauv nroog. Lawv mus qhia tej xwm uas lawv tau pom rau cov thawj leej choj.

Cov thawj leej choj nrog cov txwj laus sib sau tuav xam. Lawv muab nyiaj ntau rau cov zov keeb,

lawv hais tias : « Nej hais li no : ‘Hmo ntuj, thaum peb tsaug zog, Yes Xus cov thwj tim tuaj nyiag nws lub cev.’

Yog tias tej lus no nrov txog tus nom tswj teb chaws pob ntseg, peb yuav npliag kom nej tsis txhob raug dab tsi nyuaj. »

Cov zov keeb khaws cov nyiaj, lawv ua raws li cov hlob qhia lawv. Cov lus no thiaj ri mus hauv cov Yus Das txog niaj hnub no.

Hnub Dimanche ntawm lub Caij Hla.

Par Ntsuab-Rwg Thoj

Daim phiaj qhia cov neeg ntseeg nyob hauv tsev teev ntuj hnub Dimanche ntawm lub Caij Hla.

Thov Ntuj qhib lub txoos :

G : Hnub no, Tswv Ntuj uas yog peb Leej Txiv, koj pub txoj sia nyob mus ib txhis rau peb, los ntawm koj Leej Tub, nws hla dhau txoj kev tuag, thiab peb nco txog hnub nws sawv rov los. Thov kom Leej Ntuj Plig ua kom peb yog ib co neeg tshiab, peb thiab li yuav tau txais lub neej tshiab nrog koj Leej Tub Yes Xus Pleev,nrog Leej Tswv Yim Ntshiab nrog koj nyob mus txog txhiab niaj tim pua xyoo.

Ua Li.

Ntawv Moo Zoo :

Zam : Tshooj 20, nqe 1 rau 9.

Thawj hnub pib lub lis piam, thaum sawv ntxov, ntuj tsis tau kaj, Mab Lias Mas Ntas Las mus tom ntxa. Nws pom daim txiag zeb tshem ntawm lub ntxa lawm.

Mab Liab Mas Ntas Las khiav mus cuag Xis Moos Pob Zeb thiab lwm tus thwj tim, uas yog tus Yes Xus nyiam. Nws hais rau nkawd tias : « Lawv nqa Huab Tais tawm hauv ntxa lawm, peb tsis paub xyov lawv coj nws mus tso qhov twg lawm. »

Pob Zeb tawm plaws mus, lwm tus thwj tim kuj tawm plaws thiab, nkawd mus tom ntxa.

Nkawd ob leeg ua ke khiav mus, tab sis lwm tus thwj tim  khiav nrawm dua Pob Zeb, nws khiav ua ntej, nws xub mus txog tom ntxa.

Nws khoov mus xauj, nws pom tej hlab ntaub nyob ntawd ; tab sis nws tsis chaws mus hauv. 

Ces Xis Moos Pob Zeb lawv tus thwj tim qab mus txog, nws chaws mus hauv lub ntxa. Nws pom cov hlab ntaub nyob ntawd,

hos daim ntaub qhwv taub hau kauv cia nyob lwm qhov, tsis xyaw cov hlab ntaub.

Ces lwm tus thwj tim uas xub mus txog ntawm lub ntxa mam li chaws mus hauv.  Nws pom ces nws ntseeg.

Vim  lawv tseem tsis tau to taub tias Yes Xus yuav sawv hauv cov tuag rov los raws li Ntawv qhia.

Huab Tais Pleev.  Lub qab ntuj neeg cav txog koj.

Yes Xus sawv rov los.

Thaum nws hais rau nws cov phooj ywg.

Yes Xus Sawv rov los tiag tiag.

Hais zaj peb txiv nyob saum ntuj :

Peb txiv nyob saum ntuj,

Koj muaj koob meej nto moo lug mus li.

Koj hwj huam los txog.

Peb xav mloog koj lus nyob ntiaj teb no,

Zoo li nyob saum ntuj.

Hnub no, koj muab mov txaus pub peb noj,

Koj zam rau peb, zoo li peb zam rau luag

Thaum dab phem tuaj ntxias peb siab

Koj txhob tso peb tseg

Ua kom peb dim ntawm tus phem

Ua Li.

Thov ntuj xaus :

Tus txiv tsev los tus niam tsev foom hmoov zoo rau sawv daws.

Thov kom Tswv Ntuj foom ib los lus zoo rau peb sawv daws, thov nws nyob nrog peb ! Tswv Ntuj tig nws lub ntsej muag los saib peb , nws ua peb nyob kaj siab lug, Peb thiaj li yuav yeej txoj kev muaj mob muaj nkeeg.

Alléluia, Yes Xus sawv rov los.

Quaj qu nej txoj kev zoo siab,Yes Xus sawv rov los.

Yes Xus muaj txoj siab nyob mus li ! Alléluia.

Hais zaj koj nyob zoo Mab Liab :

Koj nyob zoo, Mab Liab,

txiaj ntsim puv koj lub siab,

Huab Tais Ntuj nrog koj nyob,

koj tau koob tau hmoov tshaj sawv daws poj Niam tib si,

thiab koj plab lub Txiv Yes Xus tau koob tau hmoov.

Mab Liab, Huab Tais Ntuj tus Niam,

nyem no thiab thaum txog peb lub caij dua,

koj thov pab peb cov neeg txhaum.

UA LI.

Zov Hmo ntawm Lub Caij Hla

Par Ntsuab-Rwg Thoj

Qhia sawv daws tias ua li cas zov hmo Ntshiab ua ntej Yes Xus yug los.

ZOV HMO, HMO ntawm Lub Caij Hla

Qhib lus txoos teev ntuj :

G : Hmo no,peb zov hmo, peb yuav mloog Tswv Ntuj ua li cas pab neeg. << Tswv ntuj tso koj Leej Tswv Yim Ntshiab nqe los rau saum peb, kom nws qhib peb cov pob ntseg, peb tej tswv yim thiab peb lub siab los mloog cov ntaub ntawv piav txog koj Leej Tub Yes Xus Pleev.>>

Zaj nyeem 1 :

  • Hauv paus tshooj.22, nqe : 1 thiab 2 ; 9a ; 10 à 13 ; 15 à 18

Thaum tej xwm no dhau tas lawm, Tswv Ntuj  sim Has Nplas Has siab.  Nws hu tias :  « Has Nplas Has !  Has Nplas Has ! »  Has Nplas Has teb tias :  « Kuv nyob ntawm no ! »  

Tswv Ntuj hais tias : « Coj koj leej tub twm zeej His Xas Has uas koj hlub kawg, koj coj nws mus kom txog lub teb chaws Mos Lis Yas.

Has Nplas Has tsa tes mus nthos rab riam yuav coj los tua nws tus tub. 

Tiam sis HUAB TAIS tus Tshiab hu saum ntuj tuaj rau nws tias :   « Has Nplas Has !  Has Nplas Has ! »   Has Nplas Has teb tias :  « Kuv nyob ntawm no ! » 

Tus Tshiab hais tias : « Txhob tsa koj txhais tes rau saum tus me nyuad ! Txhob ua dab tsi phem rau nws ! Zaum no kuv paub hais tias koj hwm Tswv Ntuj tiag, vim koj tsis yig, koj tseem muab koj leej tub twm zeej los txi rau kuv. » 

Has Nplas Has tsa muag ntsia pom ib tug laug tshis uas ob tug kub daig hauv ib koog pos. Ces nws mus muab tus laug tshis los hlawv txi Ntuj hloov nws tus tub chaw.

HUAB TAIS tus Tshiab rov hu zaum ob saum ntuj tuaj rau Has Nplas Has,    

nws hais tias :  « HUAB TAIS hais tias :  Kuv tuav txog kuv lub npe cog lus rau koj tias : vim koj tau ua li ntawd, koj tsis yig, koj tuaj yeem muab koj leej tub twm zeem los txi rau kuv, 

mas kuv yuav foom hmoov zoo ntau rau koj, kuv yuav ua kom koj tsoom xeeb zeej xeeb ntxwv coob npaum cov hnub qub saum ntuj thiab ntau npaum cov xuab zeb uas nyob ntawm ntug hiav txwv. Koj tsoom xeeb zeej xeeb ntxwv yuav ua tswv kav lawv cov yeeb ncuab tej qhov rooj loog. 

Tas txhua haiv neeg nyob ntiaj teb yuav tuav txog koj tsoom xeeb  ntxwv lub npe los sib foom hmoov zoo, vim koj tau mloog kuv lus. »

Yog Tswv Ntuj los lus. Nws lub txiaj ntsim

Zaj nyeem 2 :

  • Kev tsiv tshooj 14, nqe 15 txog rau tshooj 15, nqe 1a

HUAB TAIS hais rau Mais Xes tias : « Vim li cas koj thiaj hu kuv cuag li  ntawd ? Koj hais rau cov His Xas Lais kom lawv rov sawv kev mus ntxiv.  

Koj yuav tsa koj rab pas thiab xyab koj txhais tes rau saum dej ntuj, koj yuav faib dej ua ob sab, kom cov His Xas Lais tau taug kev qhuav qhawv hauv qab thu dej mus. 

Kuv yuav ua kom cov Hais Nkws Tos lub siab tawv qhawv tuaj, lawv yuav caum cov His Xas Lais qab hla hauv qab thu dej mus thiab, ces kuv yuav siv Fas Las Oos thiab nws cov tub rog, nws cov tsheb rog thiab cov tsav tsheb los ua kom kuv nto koob meej. 

Thaum kuv siv Fas Las Oos thiab nws cov tsheb rog thiab cov tsav tsheb ua kom kuv nto koob meej lawd, cov Hais Nkws Tos mam  yuav paub tias kuv yog HUAB TAIS tiag. »  

Tswv Ntuj tus Tshiab uas mus ua tsoom His Xas Lais ntej, hloov chaw mus thaiv tom lawv qab : ces tus ncej huab nyob ntawm lawv hauv ntej txav chaw  mus nyob tom lawv qub qab. 

Nws mus nyob nruab nrab kem tog Hais Nkws Tos ntawm tog His Xas Lais.  Twv huab dub nciab tsaus nti ib hmos thaiv lawv, ces hmo ntawd ib hmos, ib tog txav tsis ti ib tog li. 

Mais Xes tsa tes rau saum dej ntuj, ces HUAB TAIS ua cua hlob hlob ntsawj toob fab tuaj thawb cov dej ib hmos, qab thu dej tawm qhuav qhawv los, hos dej faib ua nyob ob sab.

Cov His Xas Lais nkag hauv hiav txwv, lawv tsuj av qhuav qhawv mus, nyob ntawm lawv sab xis thiab sab laug muaj ob lub phab ntsa dej.

Cov Hais Nkws Tos caum lawv qab : Fas Las Oos cov nees, cov tsheb rog thiab cov tsav tsheb nkag mus hauv dej ntuj caum cov cov His Xas Lais.

Thaum yuav kaj ntug, HUAB TAIS nyob saum tus ncej huab hluav taws, ntsia pom cov Hais Nkws Tos. Nws ua kom cov Hais Nkws Tos tau ntshai kawg.

Nws ua kom lawv cov log tsheb daig thiab ntog qeeb qeeb. Cov Hais Nkws Tos hais   tias : « Peb khiav mus deb ntawm cov His Xas Lais vim HUAB TAIS pab lawv tawm tsam ntaus cov Hais Nkws Tos ! »  

HUAB TAIS hais rau Mais Xes tias : « Koj tsa tes rau saum dej ntuj, kom dej ntws rov los nyab cov Hais Nkws Tos thiab lawv cov tsheb rog thiab cov tsav tsheb tib si. »  

Mais Xes tsa tes rau saum dej ntuj, ces thaum pib kaj ntug, dej ntws rov los nyob qhov qub chaw.  Cov Hais Nkws Tos tig khiav rov qab, tiam sis dej nphau nphwv los npog lawv, HUAB TAIS ua kom lawv ntxeev zom zaws rau hauv dej ntuj. 

Cov dej nphau rov los nyob qhov qub, los npog cov tsheb thiab cov tsav tsheb Hais Nkws Tos uas tau nkag mus hauv qab thu dej caum cov His Xas Lais, tsis dim ib tug li. 

Hos cov His Xas Lais tau taug kev qhuav nyob hauv plawv dej ntuj, cov dej ua ob sab phab ntsa nyob ntawm lawv sab xis thiab  sab laug. 

Hnub ntawd, HUAB TAIS cawm cov His Xas Lais dim ntawm cov Hais Nkws Tos txhais tes.  Cov His Xas Lais pom cov Hais Nkws Tos tuag pawg lug ntawm ntug dej ntuj. 

Cov His Xas Lais pom HUAB TAIS lub peev xwm uas nws siv los tiv yeej cov Hais Nkws Tos. Tsoom pej xeem sawv daws hwm HUAB TAIS. Lawv tso siab rau HUAB TAIS thiab rau  nws tus tub txib Mais Xes.

Ces Mais Xes thiab tsoom tub ki His Xas Lais hu nkauj cav txog HUAB TAIS li no : « Kuv hu nkauj cav txog HUAB TAIS, vim nws yeej thiab nws muaj koob meej, nws tau muab tus nees thiab tus caij nees pov rau hauv hiav txwv.

Yog Tswv Ntuj los lus. Nws lub txiaj ntsim

Zaj nyeem 3 :

  • His Xais Chap.55, versets 1 à 11.

Nej sawv daws uas nej nqhis dej, nej tuaj cuag lub qhov dej. Nej cov uas tsis muaj nyiaj txiag, nej tuaj mas ! Nej muas nplej los ua ncuav mov ! Nej noj, tsis tas yuav them nyiaj. Nej muas cawv txiv ntoo muas mis nyuj, tsis tas yuav them dab tsi.  

Ua cas nej yuav siv nyiaj los muas tej yam tsis yog mov noj ? Ua cas nej siv cov nyiaj nqe zog los muas tej yam tsis ua kom nej tsau plab ? Nej mloog kuv mas ! Ces nej yuav tau noj tej yam qab, nej yuav tau tej yam txhiam xws qab xis nej lub ncauj. 

Nej tig ntsej los mloog kuv mog ! Nej mloog kuv, ces nej tus plig yuav muaj txoj sia nyob.

Kuv yuav nrog nej cog ib lo lus nyob mus ib txhiab ib txhis, raws li cov txiaj ntsim kuv hais ruaj tias kuv yuav muab rau Das Vis.  

Yam li kuv tau tsa Das Vis los ua ib tug tim khawv rau cov haiv neeg, ua ib tug ntaus thawj qhia cov haiv neeg.  

Yog zoo li no, Yes Lus Xas Les, koj yuav hu ib lub kuj cuab uas koj tseem tsis tau paub, ces lub kuj cuab ntawd yuav khiav tuaj cuag koj, yog vim HUAB TAIS koj tus Tswv Ntuj, yog vim His Xas Lais tus Ntshiab, nws ua kom koj nto koob meej.

Nej  nrhiav HUAB TAIS mog ! Nyem no yog lub caij zoo ntsib nws. Nws nyob ze lawm, nej hu txog nws mog !

Tus siab phem, nws yuav tso nws txoj kev phem tseg. Tus siab nkhaus tso nws lub tswv yim lim hiam tseg. Nws yuav tig los cuag HUAB TAIS. HUAB TAIS yuav khuv leej nws. Nws cia li los cuag Tswv Ntuj, vim Tswv Ntuj lub siab zam dav. 

Nej zaj tswv yim tsis zoo li kuv zaj. Nej txoj kev tsis zoo li kuv txoj kev. Yog HUAB TAIS lus ceeb toom.

Lub ntuj nyob siab dua lub ntiaj teb, kuv txoj kev nyob siab dua nej txoj kev npaum li ntawd. Thiab kuv zaj tswv yim nyob siab dua nej zaj tswv yim.

10 Cov nag, cov daus uas poob saum ntuj los, yog lawv tsis tau pub dej rau ntiaj teb haus, mas lawv tsis rov mus saum ntuj. Cov nag thiab cov daus ua kom cov noob lwj thiab nthaw kaus, ua kom lub ntiaj teb txi txiv rau tus tseb, pub mov rau neeg noj, ces cov nag mam rov mus lawm saum ntuj.

Cov lus tawm ntawm kuv lub ncauj los kuj zoo li ntawd thiab. Nws tsis tau ua hauj lwm, mas nws tsis rov los cuag kuv. Kuv lo lus tsis tau leg qhov kuv xav, mas nws tsis rov los cuag kuv. Kuv lo lus tsis tau ua tiav qhov kuv xa nws mus ua, mas nws tsis rov los cuag kuv. »

Yog Tswv Ntuj los lus. Nws lub txiaj ntsim

Zaj nyeem 4 :

  • Los Mas Chap.6, versets 3b à 11

Peb cov uas tau txais lub Cim Ntxuav nyob hauv Yes Xus Pleev, mas yog peb txais lub Cim Ntxuav nyob hauv Yes Xus txoj kev tuag.

Thaum peb txais lub Cim Ntxuav peb nrog Yes Xus tuag, peb nrog nws mus hauv nws lub ntxa.

Ua li mas peb yuav coj ib lub neej tshiab xws li Leej Pleev sawv hauv yeeb ceeb rov los, vim Leej Txiv lub hwj huam tau tsa nws.

Peb nrog Leej Pleev koom. Peb nrog Leej Pleev tuag, peb thiaj yuav nrog nws sawv rov los. Peb paub tseeb tias peb muab peb tus qub neeg nrog Yes Xus ntsia saum ntoo cuam, vim peb xav muab peb lub cev xib rau kev txhaum tua. Mas peb thiaj tsis ua kev txhaum cov qhev ntxiv.

Vim tias tus neeg tuag, tsis zwm rau txoj kev txhaum ntxiv.

Tab sis, yog peb nrog Leej Pleev tuag mas peb ntseeg tias peb yuav nrog nws muaj txoj sia.

Peb paub tias Leej Pleev sawv hauv qhov tuag los lawm, nws yuav tsis rov tuag dua, txoj kev tuag tsis muaj cuab kav tuaj raug nws ib zaug ntxiv.

Nws tuag ib zaug kom txoj kev txhaum tuag. Nyem no, nws ciaj rov los nws npuab Tswv Ntuj mus li.

Nej, mas nej kuj zoo li ntawd thiab : nej yuav saib tias nej tus neeg txhaum tuag lawm, tshuav nej tus neeg tshiab npuab Tswv Ntuj uas muaj txoj sia nyob hauv Huab Tais Yes Xus Pleev mus li.

Yog Tswv Ntuj los lus. Nws lub txiaj ntsim

Zaj ntawv Moo Zoo :

  • Mas Tais chap.28, versets 1 à 10

Dhau hnub Xas Npas Tos lawm, yog thawj hnub hauv lub lis piam, thaum sawv ntxov, Mab Liab Mas Ntas Las thiab lwm tus Mab Liab nkawd mus xyuas lub ntxa.

Ib sij huam, av qeeg loj kawg : Huab Tais tus Tshiab nqes saum ntuj los dov daim txiag zeb, nws zaum saud.

Nws ib ce ci li xob laim, nws cev tsoos tsho dawb li daus.

Cov zov keeb pom, lawv ceeb, lawv ntshai tshee na, zoo li lawv tuag lawm.

Tus Tshiab hais rau ob tug poj niam tias : « Neb txhob ntshai mog : kuv paub tias neb nrhiav Yes Xus, tus tuag saum ntoo cuam.

Nws tsis nyob ntawm no lawm, nws sawv rov los raws li nws tau hais. Neb los xyuas qhov chaw lawv tso nws lub cev saib mas !

Neb maj zeeg mus hais rau nws cov thwj tim tias : ‘Nws sawv hauv cov tuag los lawm, nws ua nej ntej mus Nkas Lis Lais ; nej yuav pom nws nyob ped.’  Kuv hais li no rau neb xwb. »

Ob tug poj niam tso plhuav lub ntxa tseg. Nkawd ntshai thiab zoo siab tas nrho. Nkawd khiav mus xa lub moo ntawd rau cov thwj tim.

Yes Xus tuaj tos ob tug poj niam kev, nws hais tias : « Neb nyob kaj lug ».  Ces nkawd txav los ze Yes Xus, nkawd puag Yes Xus ko taw, nkawd pe nws.

Yes Xus hais rau nkawd tias : « Neb txhob ntshai mog, neb mus qhia kuv cov kwv tij kom lawv mus lawm Nkas Lis Lais teb, lawv yuav pom kuv nyob ntawd. »

Txoj kev ntseeg :

G : Koj puas ntseeg Tswv ntuj uas yog Huab Tais Leej Txiv, tus tsim lub ntuj thiab lub ntiaj teb? Kuv ntseeg.

G : Koj puas ntseeg txog Yes Xus, nws Leeg Tub, peb tus Tswv Ntuj, yug los ntawm niam Leej Ntshiab Mab Liab,

tiv kev mob siab, raug faus, sawv hauv qhov tuag rov los, thiab zaum rau ntawm Leej Txiv sab xis ? Kuv ntseeg.

G : Koj puas ntseeg txog Leej Tswv Yim Ntshiab, txog lub Koom Txoos Kas Tos Liv, txog cov Leej Ntshiab, txog txoj kev zam txim ntawm kev txhaum, kev sawv rov los ntawm cev nqaij daim tawv, thiab txoj siab nyob mus ib txhiab ib txhim ? Kuv ntseeg.

Zaj Peb Txiv Nyob saum Ntuj :

Peb txiv nyob saum ntuj,

Koj muaj koob meej nto moo lug mus li.

Koj hwj huam los txog.

Peb xav mloog koj lus nyob ntiaj teb no,

Zoo li nyob saum ntuj.

Hnub no, koj muab mov txaus pub peb noj,

Koj zam rau peb, zoo li peb zam rau luag

Thaum dab phem tuaj ntxias peb siab

Koj txhob tso peb tseg

Ua kom peb dim ntawm tus phem

Ua Li.

Zaj thov ntuj xaus lub txoos :

G-: Peb ua koj tsaug Tswv Ntuj, peb Leej Txiv. Txoj kev sawv rov los ntawm koj Leej Tub Yes Xus ci ntsa iab rau peb lub neej, qhia peb txais tej yam tshiab, peb thiaj li yuav los tau cuag koj. Thov Leej Tswv Yim Ntshiab ua kom peb nyob kaj siab lug ntawm txoj kev sawv rov los thiab ua kom peb yog koj cov tim khawv.

UA LI.

Taug txoj kev ntawm tus Ntoo Khaub Lig thiab

Par Ntsuab-Rwg Thoj

Hawm tus Ntoo Khaub Lig

qhia txog taug txoj kev ntawm tus Ntoo Khaub Lig, kuv tsuas txhais cov npe ntawm lub chaw ua Yes Xus tau raug tsim txom.

Taug txoj kev ntawm tus Ntoo Khaub Lig

1 – Lawv txiav txim tua Yes Xus.

2 – Yes Xus kwv nws tus Ntoo Khaub Lig

3 – Yes Xus ntog zaum ib.

4 – Yes Xus ntsib nws niam Mab Liab

5 – Pob Zeb DE CYRENE pab Yes Xus kwv nus tus Ntoo Khaub Lig

6 – Véronique so Yes Xus lub ntsej muag.

7 – Yes Xus ntog zaum ob.

8 – Yes Xus qhia rau cov poj niam nyob Yes Lus Xas Les.

9 – Yes Xus ntog zaum peb.

10 – Lawv muab Yes Xus cov khaub ncaws los sib faib.

11 -Lawv muab Yes Xus ntsia saum tus Ntoo khaub Lig

12 – Yes Xus tuag saum tus Ntoo Khaub Lig.

13 – Lawv muab Yes Xus nqis ntawm tus Ntoo Khaub Lig.

14 – Lawv muab Yes Xus coj mus tso hauv lub qhov zeb.

Hawm tus Ntoo Khaub Lig, kuv tsuas txhais qhov tseem ceeb xwb

Hawm tus Ntoo Khaub Lig.

Zaj thov ntuj ua ntej:

G : Tswv Ntuj peb paub tias koj hlub neeg, koj thiaj li muab koj leej tub tso los cawm lub ntiaj teb neeg ; niaj hnub no, koj qhia koj txoj kev hlub rau peb, peb xav ua raws li Yes Xus uas taug kev ntawm nws txoj kev tuag. Txhawb peb ib yam li koj tau txhawb nws, ua kom peb dawb huv nyob hauv qhov tsis paub meej ntawm nws hnub sawv rov los. Nws tus ua nrog koj kav thiab nrog Leej Ntuj Plig nyob rau tam sim no mus txog txhiab niaj tim pus xyoo.

Ua li

Txoj ntawv Moo Zoo ntawm kev mob siab ntawm Yes Xus raws lis Zam  : (Tshooj :18 thiab 19)

Yes Xus hais li ntawd tas, ces nws nrog nws cov thwj tim mus rau tus kwj deg Kes Nroos sab tim ub.  Muaj ib lub vaj nyob ntawd.   Yes Xus thiab cov thwj tim mus hauv lub vaj.  

Yus Das, tus uas muab Yes Xus rau luag, kuj paub qhov chaw ntawd thiab, vim Yes Xus thiab cov thwj tim sib sau ntau zaus nyob ntawd. 

Yus Das coj pab peeb zeej thiab ib co zov keeb tuaj.  Yog cov thawj leej choj thiab cov Fas Lis Xais sau cov zov keeb ntawd.  Lawv taws teeb, taws tsau thiab nqa ntaj nqa riam tuaj. 

Yes Xus paub ib puas tsav yam uas yuav tshwm sim tuaj raug nws, ces nws tawm los hais rau lawv tias :  « Nej nrhiav leej twg ? » 

Lawv  teb rau nws tias :  « tus Yes Xus Nas Xas Les. »   Yes Xus hais rau lawv tias :  « Yog kuv. »  Yus Das, tus muab Yes Xus rau luag nrog  lawv sawv ua ke. 

Thaum Yes Xus hais rau lawv tias : « Yog kuv », mas lawv thaub qab thiab lawv ntog pem teb.

Yes Xus rov nug lawv dua tias :  « Nej nrhiav leej twg ? »   Lawv hais tias :  « Yes Xus Nas Xas Les. »  

Yes Xus teb tias :  « Kuv twb hais rau nej tias yog kuv.  Yog nej nrhiav kuv, mas nej cia cov no mus. »  

Qhov no tshwm sim raws li lo lus uas nws xub hais tseg tias :  « Cov uas koj muab rau kuv, mas kuv tsis ua ib tug ploj li. »  

Xis Moos Pob Zeb muaj ib rab ntaj.  Nws rho hlo nws rab ntaj tib ntag rau tus thawj leej choj tus qhev, txiav raug nws sab pob ntseg xis lub qia ntsej tu nrho.  Tus qhev no hu ua Mas Kws.

Yes Xus hais rau Pob Zeb tias :  « Koj ntxig ntaj rau hauv hnab.  Lub ntim uas Leej Txiv muab rau kuv, kuv yuav tsis haus lod ? » 

Pab peeb zeej nrog tus lwm txheeb, thiab cov zov keeb Yus Das ntes Yes Xus.  Lawv muab Yes Xus khi. 

Lawv xub coj nws mus tim As Nas tsev.  As Nas yog Kais Fas yawm txiv.  Xyoo ntawd yog Kais Fas ua tuam leej choj.  

Kais Fas yog tus tau tawm tswv yim rau cov Yus Das hais tias : « Cia ib tug neeg this tsoom pej xeem tuag mas zoo dua. »

Xis Moos Pob Zeb thiab lwm tus thwj tim raws Yes Xus qab.  Tus thwj tim ntawd yog tus tuam leej choj ib tug swm neeg, ces nws tau nrog Yes Xus chaws  mus hauv  tus tuam leej choj lub tshav loog. 

Hos Pob Zeb nyob sab nraud, nws sawv ze ntawm qhov rooj.  Lwm tus thwj tim uas swm tus tuam leej choj tawm los, nws hais lus rau tus ntxhais txib zov qhov rooj, ces nws kom Pob Zeb chaws mus hauv. 

Tus ntxhais txib zov qhov rooj hais rau Pob Zeb tias :  « Koj tsis yog tus neeg ntawd ib tug thwj tim lod ? »   Pob Zeb hais tias :  « Kuv tsis yog. »   

Cov tub qhev thiab cov zov keeb rauv ib cub taws thee, vim lub caij ntawd no no.  Lawv nyob ntawd nte taws.  Pob  Zeb kuj nrog lawv nyob ntawd nte taws thiab.

Tus tuam leej choj nug Yes Xus txog nws cov thwj tim thiab nws cov lus qhia. 

Yes Xus teb rau tus tuam leej choj  tias :  « Kuv tab meeg hais lus rau lub qab ntuj neeg.  Kuv niaj hnub qhia nyob hauv cov tsev txoos thiab hauv lub Tuam Tsev Teev Ntuj uas tas tsoom Yus Das tuaj sib txoos.  Kuv tsis tau nyiag hais ib yam dab tsi. 

Tim li cas koj nug kuv ?  Koj nug cov uas tau hnov tej lus kuv hais rau lawv.  Cov ntawd paub tias kuv tau hais dab tsi. »  

Thaum Yes Xus hais li ntawd, mas cov zov keeb uas sawv ntsug nyob ntawd,  muaj ib tug ib tawg ncuav rau Yes Xus, nws hais rau Yes Xus tias :  « Koj  teb li ntawd  rau tus tuam leej choj lod ! »  

Yes Xus teb rau tus zov keeb tias : « Yog kuv hais lus phem, koj ua pov thawj qhia saib qhov twg phem.  Hos yog kuv hais raug lawm, vim li cas koj thiaj ntaus kuv ?”  

As Nas xa Yes Xus mus rau tuam leej choj Kais Fas.  Yes Xus tseem khi rawv li qub.

Xis Moos Pob Zeb nyob ntawd nte taws.  Lawv hais rau nws tias :  « Koj tsis yog nws ib tug thwj tim lod ? »  Pob Zeb tsis lees, nws hais tias : “Kuv tsis yog.”  

Tus tuam leej choj muaj ib tug qhev, nws yog ib tug txheeb ze tus qhev uas raug Pob Zeb txiav ib sab qia ntsej, nws hais tias :  « Kuv twb pom koj nrog nws nyob hauv lub vaj los tsis sub ? »  

Pob Zeb rov qab tsis lees, ces tam sis ntawd ib tug qaib qua.

Lawv coj Yes Xus tim Kais Fas tsev mus rau hauv lub tsev txiav txim.  Thaum ntawd  kaj ntug lawm.  Tab sis cov Yus Das tsis mus hauv lub tsev txiav txim, kom lawv txhob tsuas yam tsis huv, lawv thiaj yuav noj tau pluas Hla. 

Pis Las Tos thiaj li tawm tuaj cuag lawv, nws hais tias :  « Nej muaj lus dab tsi, nej thiaj tuaj kom tus neeg ntawd ? »  

Lawv teb rau Pis Las Tos hais tias : « Yog tus neeg no txhob yog neeg phem, mas peb yuav tsis coj nws tuaj rau koj. »  

Pis Las Tos hais rau lawv tias :  « Nej coj nws mus, nej txiav txim rau nws raws li nej txoj cai. »   Cov Yus Das hais rau Pis Las Tos tias : « Txoj cai tsis pub peb muab ib tug neeg tua. »  

Qhov no tshwm sim raws li lo lus Yes Xus tau xub hais qhia tias nws yuav tsum tuag zoo li cas. 

Pis Las Tos thiaj rov chaws mus hauv lub tsev txiav txim, nws hu Yes Xus los, nws hais tias :  « Koj puas yog cov Yus Das tus vaj ? »  

Yes Xus teb tias :  « Puas yog koj hais koj, los yog luag tej hais txog kuv li ntawd rau koj ? »  

Pis Las Tos teb tias : « Kuv puas yog ib tug Yus Das ?  Koj haiv neeg thiab cov thawj leej choj coj koj tuaj rau kuv.  Koj tau ua dab tsi ? » 

Yes Xus teb tias :  « Kuv lub Ceeb Tsheej tsis nyob hauv lub qab ntuj no.  Yog kuv lub Ceeb Tsheej nyob hauv lub qab ntuj no, mas kuv cov neeg yuav sawv ntaus rog thaiv kom kuv txhob poob rau hauv cov Yus Das txhais tes.  Tab sis, kuv lub Ceeb Tsheej tsis nyob hauv lub qab ntuj no. »  

Pis Las Tos hais rau Yes Xus tias :  « Ua li koj yog vaj lod ? »   Yes Xus teb hais tias :  « Yog koj hais tias kuv yog vaj.  Yog vim qhov ntawd kuv thiaj yug los, thiab yog vim qhov ntawd kuv thiaj tuaj nyob hauv lub qab ntuj no :  kuv tuaj ua tim khawv txog qhov tseeb.  Leej twg yog txoj kev tseeb tug, mas nws mloog kuv lub suab. »  

Pis Las Tos hais rau Yes Xus tias : « Qhov tseeb yog dab tsi ? » Thaum Pis Las Tos hais li no tas, nws tawm rov mus cuag cov Yus Das, nws hais rau lawv tias :  « Kuv tsis pom ib yam tsim nyog raug txim nyob hauv tus neeg ntawd. 

Tab sis raws li nej kev cai, mas txog lub Ntees Hla kuv tso ib tug neeg mus.  Nej puas xav kom kuv tso cov Yus Das tus vaj ? »  

Lawv rov qab nthe nrov tias :  « Txhob tso nws, tso Npas Las Npas ! »  Npas Las Npas yog ib tug tub sab.

Ces Pis Las Tos coj Yes Xus mus, nws kom lawv nplawm Yes Xus. 

Cov tub rog xuas ib co pos ntxias ua ib lub kauj, lawv muab tso saum Yes Xus taub hau.  Lawv muab ib lub tsho ntev liab tshiab rau Yes Xus hnav.

Lawv txav los ze nws, lawv hais tias : « Nyob kaj lug, cov Yus Das tus vaj, »  ces lawv ntaus nws tej niag teg.

Pis Las Tos rov tawm mus nraum zoov, nws hais rau lawv tias :  « Nej saib, kuv coj tus neeg no tawm los rau nej, kom nej paub tias kuv tsis pom ib yam tsim nyog raug txim nyob hauv nws. »  

Yes Xus tawm los sab nraud, nws ntoo lub kauj pos thiab hnav lub tsho ntev liab tshiab, ces Pis Las Tos hais rau lawv tias :  « Nej ntsia tus neeg no. »  

Thaum cov thawj leej choj thiab cov zov keeb pom Yes Xus, lawv nthe nthe hais tias :  « Muab dai saum ntoo cuam !  Muab dai saum ntoo cuam ! »   Pis Las Tos hais rau lawv tias :  « Nej coj nws mus, nej muab nws dai saum ntoo cuam.  Vim tias kuv tsis pom ib yam tsim nyog raug txim nyob hauv nws. »  

Cov Yus Das teb rau Pis Las Tos tias : « Peb muaj ib Txoj Cai, raws li Txoj Cai ntawd, mas nws yuav tsum tuag, vim nws tsa nws ua Tswv Ntuj Leej Tub. »

Thaum Pis Las Tos hnov lo lus ntawd, mas nws haj yam ntshai. 

Ces nws rov chaws mus hauv lub tsev txiav txim.  Nws hais rau Yes Xus tias :  « Koj nyob qhov twg tuaj ? »   Tab sis Yes Xus tsis teb ib lo lus rau nws li. 

Pis Las Tos thiaj hais rau Yes Xus tias :  « Koj tsis hais lus rau kuv. Koj puas paub hais tias kuv muaj hwj huam tso tau koj mus, thiab muaj hwj huam muab koj dai saum ntoo cuam ? »

Yes Xus teb hais tias : « Yog koj tsis tau txais hwj huam saum ntuj los, mas koj yuav ua tsis tau dab tsi rau kuv.  Vim li ntawd, tus muab kuv rau koj, nws muaj ib qho txhaum loj dua. »  

Txij ntawd los, Pis Las Tos nrhiav kev tso Yes Xus.  Tab sis cov Yus Das nthe nthe hais tias : « Yog koj tso tus neeg ntawd mus, mas koj tsis yog Xes Ntxas phooj ywg.  Leej twg tsa nws ua vaj, mas nws sawv tiv Xes Ntxas. »  

Thaum Pis Las Tos hnov cov lus no, nws kom lawv coj Yes Xus tawm mus sab nraud.  Ces Pis Las Tos mus zaum saum lub theej kiab txiav txim, ntawm qhov chaw hu ua Tshav Txiag Zeb, lus Hes Nplaws hais tias Nkas Npas Thas.  

Hnub ntawd, yog Hnub Npaj ua lub Ntees Hla.  Thaum ntawd kwv yees ze kaum ob teev tav su.  Pis Las Tos hais rau cov Yus Das tias :  « Nej ntsia nej tus vaj. »  

Cov Yus Das nthe nrov nrov tias :  » Muab tua !  Muab tua !  Muab dai saum ntoo cuam !  » Pis Las Tos hais rau lawv tias :  « Kuv yuav muab nej tus vaj dai saum ntoo cuam lod ?  » Cov thawj leej choj teb hais tias : « Peb tsuas muaj Xes Ntxas ua peb tus vaj xwb. »  

Ces Pis Las Tos muab Yes Xus rau lawv, kom lawv coj nws mus dai saum ntoo cuam. Lawv thiaj li coj Yes Xus mus.  

Yes Xus kwv nws tus ntoo cuam.  Nws tawm mus txog qhov chaw hu ua « Khauj Khaum Taub Hau », uas lus Hes Nplaws hu ua « Nkos Nkos Thas. »

Lawv muab nws dai rau saum ntoo cuam nyob ntawd.  Lawv muab ob tug neeg dai saum ntoo cuam xws li nws thiab, ib tug nyob ib sab, Yes Xus nyob nruab nrab. 

Pis Las Tos sau ntawv rau saum ib daim txiag ; nws kom muab tso saum tus ntoo cuam.  Cov npe ntawv saum daim txiag sau hais tias : Yes Xus Nas Xas Les, cov Yus Das tus vaj.  

Coob leej Yus Das nyeem cov lus saum daim txiag, vim qhov chaw uas lawv muab Yes Xus dai saum ntoo cuam nyob ze lub nroog,  thiab lawv sau ua lus Hes Nplaws, lus Las Tis Nas, thiab lus Hes Las. 

Cov thawj leej choj Yus Das hais rau Pis Las Tos tias :  « Koj tsis txhob sau tias :  Cov Yus Das tus vaj, yuav tsum sau tias « Tus ntawd hais tias : Kuv yog cov Yus Das tus vaj. »  

Pis Las Tos teb hais tias :  « Qhov kuv sau, mas twb sau tas lawm. »

Thaum cov tub rog muab Yes Xus dai saum ntoo cuam tas, lawv muab Yes Xus cov ris tsho faib ua plaub tsw, ib tsw rau ib tug tub rog.  Lawv muab lub tsho ntev faib, tab sis lub tsho ntev tsis muaj leej leeg, yog tsho ntos ua ib daig xwb mus rau nram taw. 

Cov tub rog sib tham tias :  « Peb txhob muab lub tsho ntev dua, peb twv saib leej twg yuav tau lub tsho ntawd. »  Ua li mas tshwm sim raws li Ntawv sau cia tias : Lawv sib faib kuv cov khaub ncaws, lawv twv saib leej twg yuav tau kuv cov ris tsho. Cov tub rog tau ua  li ntawd.

Yes Xus niam thiab nws niam tus niam hluas, nrog Mab Liab uas yog Khos Pas poj niam, thiab Mab Liab Mas Ntas Las,  lawv sawv ze tus ntoo cuam.  

Yes Xus pom nws niam, thiab pom tus thwj tim uas nws nyiam sawv ze nws niam, ces nws hais rau nws niam tias :  « Niad, tus ntawd yog koj tus tub. »  

Thiab Yes Xus hais rau tus thwj tim tias :  » Tus ntawd yog koj niam.  » Txij lub sij hawm ntawd los, tus thwj tim coj Mab Liab mus nyob hauv nws tsev.

Ua li ntawd tas, nws paub tias zaum no ib puas tsav yam tiav tas lawm, nws hais tias :  » Kuv nqhis dej », kom xwv muaj raws li Ntawv sau tseg. 

Muaj ib hub kua qaub puv nkaus nyob ntawd.  Lawv muab ib thooj rwb tub kua qaub chob rau ib tug ntsis pas nroj his xaus cev mus rau Yes Xus qhov ncauj. 

Thaum Yes Xus haus qhov kua qaub tas, nws hais tias :  « Ib puas tsav yam tiav tas lawm. »  Ces Yes Xus nyo taub hau, nws tso nws tus ntsuj plig tawm mus.

Hnub ntawd yog Hnub Npaj, mas cov Yus Das tsis xav cia cov tuag lub cev dai saum ntoo cuam hnub Xas Npas Tos, vim tias hnub Xas Npas Tos ntawd yog ib lub hnub nyoog loj. Cov Yus Das thov Pis Las Tos kom muab cov neeg dai saum ntoo cuam ob sab ceg lov thiab muab lawv lub cev txo nqes los.

Cov tub rog thiaj tuaj muab thawj tug ob sab ceg lov, thiab muab lwm tus uas nrog nws dai saum ntoo cuam ob sab ceg lov. 

Thaum lawv los txog ntawm Yes Xus, lawv pom nws twb tuag lawm, lawv tsis muab nws ob sab ceg lov, 

tab sis ib tug tub rog xuas nws rab hmuv hno Yes Xus phab tav, tam sis ntawd ib co ntshav thiab ib co dej tawm los.  

Tus uas tau pom qhov ntawd ua pov thawj hais.  Nws ua tim khawv hais qhov tseeb, nws paub tias qhov nws hais muaj tiag. Nws hais tej ntawd kom nej ntseeg. 

Tej xwm no tshwm sim kom muaj raws li Ntawv sau cia tias :  Nws cov pob txha tsis lov ib tug li.

Tseem muaj lwm lo lus hauv Ntawv hais tias :  Lawv yuav ntsia tus uas lawv nkaug.

Thaum tej xwm ntawd tshwm tuaj tas, Yos Xes nyob As Lis Mas Tias tuaj thov Pis Las Tos kom kheev nws txo Yes Xus lub cev.  Pis Las Tos tso lus rau Yos Xes.  Ces Yos Xes mus txo Yes Xus lub cev.  Yos Xes yog Yes Xus ib tug thwj tim, tab sis nws tsis pub luag tej paub vim nws ntshai cov Yus Das. 

Nis Kos Des Mos kuj tuaj thiab.  Nis Kos Des Mos yog tus uas thaum chiv thawj, nws tuaj cuag Yes Xus hmo ntuj.  Nws nqa ib cov tshuaj qhwv tuag tuaj : yog txab txiv yoov xyaw txab xyab phij, kwv yees hnyav li ib puas choj. 

Lawv txo Yes Xus lub cev los, lawv xuas tej pluaj hlab ntaub pleev tshuaj tsw qab los qhwv nws lub cev,  raws li cov Yus Das kev cai tu zam. 

Nyob ntawm thaj chaw uas luag muab Yes Xus dai saum ntoo cuam, muaj ib lub vaj.  Nyob hauv lub vaj ntawd muaj ib lub ntxa tshiab uas tseem tsis tau tso ib tug tuag rau hauv li. 

Vim tias hnub ntawd yog cov Yus Das Hnub Npaj, thiab lub ntxa ntawd  nyob ze, ces lawv muab Yes Xus zwm rau hauv lub ntxa ntawd.

Huab Tais Pleev. Lub qab ntuj neeg cav txog koj.

Thov Ntuj :

1 – Rau lub Koom Txoos Kev Ntseeg

2 – Rau Txiv Vaj Qhia Benoit XVI

3 – Rau cov Leej Choj thiab cov neeg ntseeg

4 – Rau cov neeg tseem tab tam yuav npaj los ua neeg ntseeg ntuj

5 – Rau cov ntseeg sib koom siab nyob thoob ntiaj teb

6 – Rau cov Yus Das

7 – Rau cov ntseeg

8 – au cov neeg tseem tsis tau paub Tswv Ntuj

9 – Rau cov nom tswv, tswj hwm pej xeem

10 – Rau cov neeg ua raug kev txom nyem rau lub sib hawm no, vim muaj ib tug kab mob ua muaj kev sib kis thoob plaws sawv daws.

11 – Rau peb cov neeg muaj kev nyuaj siab

12 – Rau txhua lub teb chaws uas cuam tshuam los ntawm tus kab mob coronavirus.

Thov Tswv Ntuj kawg :

G : Nyob rau saum tus ntoo Khaub Lig, Yes Xus tseem niaj hnub thov Tswv Ntuj Leej Txiv rau peb.Tswv Ntuj sib txuas lus nrog peb vim muaj Leej Ntuj Plig los nrog peb nyob ntawm peb txoj kev sib koom siab vim lis ntawv peb thiaj muaj cuab kav hais zaj thov peb Txiv Tswv Ntuj zoo li Yes Xus qhia rau peb.

Peb txiv nyob saum ntuj,

Koj muaj koob meej nto moo lug mus li.

Koj hwj huam los txog.

Peb xav mloog koj lus nyob ntiaj teb no,

Zoo li nyob saum ntuj.

Hnub no, koj muab mov txaus pub peb noj,

Koj zam rau peb, zoo li peb zam rau luag

Thaum dab phem tuaj ntxias peb siab

Koj txhob tso peb tseg

Ua kom peb dim ntawm tus phem

Ua Li.

G : Tswv Ntuj peb thov koj. Tso nqe los rau saum peb koj cov koob hmoov nplua mias. Peb ntseeg tias peb yuav sawv rov los : muab koj txoj kev zam, thiab txoj kev kaj siab lug rau peb kom peb txoj kev ntseeg tsuas muaj loj zuj zus mus. Peb thov koj ntawm koj Leej Tub Yes Xus Pleev.

Ua Li;

Pawg ntseeg nyob rau As Mes Lis Kas nyob rau lub lav Winsconsin nrog rau tus txiv plig Paul FLISS kuj ua ib qhov qauv rau peb tau saib thiab yog li peb muab tso rau hauv no koj ib tsoom ntseeg pom thiab.

NTOO-CUAM-TXOJ-KEV-1

Teev Ntuj hnub Jeudi Ntshiab

Par Ntsuab-Rwg Thoj

Peb tus txiv plig Jean-Paul HAVARD, ua ib thaj mes xas ua lus fab kis thiab ua lus hmoob rau peb ib tsoom kwv tij hmoob tau nrog nws ua thaj txi ntuj hnub no

Cov nkauj hu nyob hauv thaj txi ntuj no kuv muab tso rau nram no

TSWV NTUJ LUB NTUJ LUB TEB

Kwv tij phooj ywg, peb muab mov los faib rau cov neeg tshaib noj.

Peb txais cov pluag , peb pub rau hnav.

Peb tso tej lus sib cav sib ceg ua plaub ua ntug tseg.

Peb pab luag ris lug lub nra.

  1. Tswv Ntuj lub ntuj lub teb, lub sij hawm plaub caug no peb nquag teev koj. Peb yuam peb lub cev kom txhob taug kev yooj yim. Peb txhob tso peb lub siab mus nrhiav noj nrhiav haus raws txoj kev txhaum.
  • Tswv Ntuj koj pom hauv neeg nruab siab, koj paub tias peb tsis muaj zog ua raws txoj kev zoo. Peb rov xav tig los cuag koj, koj zam rau peb, koj kho peb tus plig kom zoo hlo.

Kwv tij phooj ywg, peb muab mov los faib rau cov neeg tshaib noj.

Peb txais cov pluag , peb pub rau hnav.

Peb tso tej lus sib cav sib ceg ua plaub ua ntug tseg.

Peb pab luag ris lug lub nra.

TUS TUAJ CUAG YES XUS  

Tus tuaj cuag Yes Xus, nws yuav tsis tshaib

Tus vam txog Yes Xus, nws yuav tsis nqhis

Yes Xus lub cev txawj tu neeg

Yes Xus cov ntshav txawj daws nqhis

Yes Xus lub cev txawj tu neeg

Yes Xus cov ntshav txawj daws nqhis 

Yog peb tsis noj Yes Xus lub cev 

Peb yuav tsis muaj Ntuj txoj sia

Yog peb tsis haus Yes Xus cov ntshav

 Peb yuav tsis ciaj rov los

Tus noj Yes Xus lub cev  

Yes Xus yuav tuaj nyob hauv nws lub siab

Tus haus Yes Xus cov ntshav

Yes Xus yuav tuaj nyob hauv nws lub plawv

Tus tuaj cuag Yes Xus nws yuav tsis tshaib

Tus vam txog Yes Xus nws yuav tsis nqhis

Yes Xus lub cev txawj tu neeg

Yes Xus cov ntshav txawj raws nqhis

Yes Xus lub cev txawj tu neeg 

Yes Xus cov ntshav txawj daws nqhis 

Yes Xus cov ntshav txawj daws nqhis.

KOJ LUB SIAB ZOO HUAB TAIS-ZNQ-50 A22

Koj lub siab zoo Huab Tais koj zam rau kuv,

Koj lub siab hlub neeg, Huab Tais koj zam kuv cov txhaum.

  1. Kuv ua txhaum rau koj ibleeg xwb, muaj tej yam koj ntsia yog tsis zoo kuv twb ua lawm.
  • Kuv paub kuv cov txhaum, kuv tsis zais kuv cia li lees.

Kuv cov txhaum nyob ntawm kuv xub ntiag tsis tseg.

  • Koj ntsia txij thaum kuv niam xeeb kuv los kuv siab dub.

Koj saib txij thaum kuv yug los kuv muaj txim.

  • Koj ntxuav kuv kom kuv dawb dua daus.

Koj muaj koj cov dej los yaug kuv kom kuv ntshiab tuaj.

  • Kuv lub siab siab ntxhov nyho, kuv cov pob txha ntsoog li ntsaws.

Koj hais tej lo lus zoo rau kuv,  kuv lub siab yuav kaj.

  • Huab Tais koj tsis txhob ntiav kuv mus deb ntawm koj xub ntiag.

Koj tysim ib lub siab hu li sis los cog rau kuv

Koj lub siab zoo Huab Tais koj zam rau kuv,

Koj lub sia hlub neeg Huab Tais koj zam kuv cov txhaum

Thov Ntuj hauv tsev hnub Jeudi ntshiab

Par Ntsuab-Rwg Thoj

Txhais qhov tseem ceeb rau cov hmoob kom lawv ua li cas thov Ntuj hauv tsev

P.1

  • Lub caij npaj :

Yuav tau npaj ib qho chaw los teev Ntuj. Hnub jeudi Ntshiab no peb los sib sau ncig lub rooj npaj ua thaj txi ntuj. Pua lub rooj nrog ib daim ntaub tshiab, nrog rau ib cov tswm ciab, ib re paj nrog rau phau ntawv Ntshiab los phau ntawv Moo Zoo muab nthuav  tso rau saum rooj. Yog nyob hauv nej tsev neeg, muaj cov txawj hu thiab ntaus nkauj, yeej meem txib lawv, kom lawv npaj ib los ob zaj nkauj.

Cov lus qhia nyob hauv daim ntawv no, sau ua xim liab. Cov zaj hais thiab nyeem rau sawv daws sau ua xim xiav.

  • Lub caij thov Ntuj :

Yog nej muaj ob peb leeg, nej tau nrhiav ib tug los coj zaj thov Ntuj, xws li tus txiv tsev, tus niam tsev los ib tug laus (tus coj ntawd yuav tau los hais cov kab << G >>)

P.2

  • Peb koom siab nrog peb tus tswv qhia thiab cov ntseeg nyob peb lub xeev ntuj Evry ua thaj txi ntuj hmo Jeudi Ntshiab no.

Peb sawv daws ua lub cim Ntoo Cuam :

Hu txog Leej Txiv thiab Leej Tub thiab Leej Ntuj Plig lub npe. Ua Li

  • G : Zaj thov Ntuj :

Peb txiv, hmo no peb nco txog koj Leej Tub Yes Xus thaum nws nrog nws cov thwj tim noj pluas mov ua zaum kawg, thiab nws muab nws lub cev los pub rau lub koom txoos Kev Ntseeg. Peb mus sib sau tsis tau ua ib pab ib pawg, nrog cov neeg ntseeg los ua thaj txi Ntuj, yog li peb thiaj li los sib sau nyob hauv peb tej vaj, tej  tsev kom peb hnov koj cov lus.

Qhib peb lub siab tos txais koj cov lus, qhib peb cov qhov muag  kom peb pom tej yam koj ua rau peb ua ntej koj yuav ncaim peb mus.

Yog vim peb, koj thiaj ua tej yam ntawd, kom peb muaj lub neej mus li, kom peb npaj peb lub neej mus tag ib txhiab ib txhim.

P.3

  • Zaj nyeem 1 : KEV TSIV 12 : 1-8,  11-14.

COV LUS NYOB HAUV NTAWV KEV TSIV

1       HUAB TAIS hais rau Mais Xes thiab As Loos nyob Hais Nkws Tos teb tias : 

2       « Lub hlis no nej yuav muab suav ua thawj lub hlis,

nej yuav muab ua thawj lub hlis qhib lub xyoo. 

3       Neb hais rau ib tsoom pej xeem His Xas Lais tias: 

Lub hlis no xiab kaum, mas txhua yim neeg,

nyias yuav tsum npaj nyias ib tug tsiaj me. 

4       Yog yim  neeg  twg tsawg dhau noj tsis tas ib tug tsiaj me,

mas nej yuav  mus nrog lwm yim neeg uas nyob ze nej dua cov koom noj ib tug tsiaj. 

Nej yuav xaiv ib tug tsiaj kom txaus sawv daws noj tsis seem. 

5       Nej yuav xaiv ib tug tsiaj zoo, tsis muaj chaw xyeej,

yuav yog ib tug thav txiv yaj los thav txiv tshis, hnub nyoog ib xyoos.  

6       Nej yuav ceev rau ib qho tos txog hnub xiab kaum plaub, lub hlis no.

Hmo tim kaum plaub,  tas tsoom His Xas Lais,

nyias yuav tua nyias tus tsiaj thaum tsaus ntuj zuag. 

7       Nej yuav cug cov ntshav coj mus pleev ob tug ncej puab rooj thiab pleev

daim txiag tav saum lub qhov rooj nkag hauv lub tsev uas nej noj tus tsiaj ntawd. 

8       Hmo ntawd, nej yuav noj nqaij txhiab hauv hluav taws,

nej yuav noj ntxuag ib co ncuav mov tsis xyaw poov xab,

thiab ib cov zaub iab.

11      Thaum noj mov nej yuav ua zoo li no : 

Nej sia siv khov kho, nej rau khau, thiab tuav nej rab pas nrig ntawm tes. 

Nej yuav sawv ntsug noj, noj nrawm nroos, vim yog HUAB TAIS hmo hla. 

12     Hmo ntawd, kuv yuav hla mus thoob Hais Nkws Tos teb.  

Kuv yuav ntaus neeg cov tub hlob, thiab tsiaj cov me nyuam hlob, kom ntog tas huv tib si. 

Thiab kuv yuav muab txim rau cov dab Hais Nkws Tos,

vim kuv yog HUAB TAIS. 

13     Cov ntshav yuav yog ib lub cim txuag nej hauv cov tsev uas nej nyob. 

Kuv pom lub cim ntawd, kuv yuav hla plaws mus, 

nej yuav tsis raug qhov xwv txheej loj ntawd, vim kuv yog tus ua rau Hais Nkws Tos teb. 

14     Yav tom ntej, nej yuav cim ntsoov hnub ntawd cia,

nej yuav nqaum paj nqaum nruas cav txog HUAB TAIS.  

Nej yuav muab hnub ntawd los ua ib txog cai nqaum

paj nqaum nruas mus txheej dhau txheej rau nej coj.

YOG TSWV NTUJ LO LUS.        Nws lub txiaj ntsim.

  • NTAWV MOO ZOO.  ZAM (Tshooj 13: nqi :1-15.)

LUB NTSIAB LUS :  Yes Xus ntxuav cov thwj tim kaw taw.

COV LUS NYOB HAUV ZAM NTAW MOO ZOO.

1       Thaum yuav txog lub Ntees Hla,

Yes Xus paub tias txog nws lub caij hla lub ntiaj teb no rov mus cuag Leej Txiv. 

Nws nyiam nws cov thwj tim uas nyob hauv lub qab ntuj no,

mas nws nyiam lawv mus txog thaum kawg. 

2       Thaum lawv tab tom noj ib pluag hmo,

ces dab phem twb nkag mus tshoj Yus Das Kas Lis Yaus,

Xis Moos tus tub lub siab kom muab Yes Xus muag. 

3       Yes Xus paub tias Leej Txiv tso tas ib puas tsav yam

rau hauv nws txhais tes,

nws paub tias nws tuaj ntawm Tswv Ntuj tuaj,

nws yuav rov mus cuag Tswv Ntuj. 

4       Ces nws sawv ntawm lub rooj mov mus, nws hle tsho,

nws muab ib daig ntaub khi rau  ntawm nws duav. 

5       Nws hliv dej rau hauv ib lub phiab, ces nws ntxuav cov thwj tim ko taw. 

Nws muab daim ntaub khi ntawm duav los so lawv ko taw.

6       Yes Xus los txog ntawm Xis Moos Pob Zeb.      

Pob Zeb hais rau Yes Xus tias : 

 » Huab Tais, koj yuav ntxuav kuv ko taw lod ? » 

7       Yes Xus teb rau Pob Zeb tias :

« Qhov uas kuv ua, mas tam sis no koj tsis to taub,

tiam sis yav tom ntej koj yuav to taub. » 

8       Pob Zeb hais rau Yes Xus tias :

« Koj txhob ntxuav kuv ko taw, kuv tsis kam ib zaug li. » 

Yes Xus teb rau Pob Zeb tias :

« Yog kuv tsis ntxuav koj, mas koj yuav tsis tau nrog kuv ua ke. » 

9       Xis Moos Pob Zeb hais rau Yes Xus tias :

« Huab Tais, yog li mas tsis yog ntxuav taw xwb,

koj ntxuav kuv tes thiab kuv taub hau huv si. » 

10     Yes Xus hais rau Pob Zeb tias :

« Tus uas nws da dej lawm mas tsis tas yuav ntxuav ntxiv,

vim nws ib ce huv tas tib si lawm. 

Nej kuj huv lawm thiab, tab sis huv tsis tas txhua leej. » 

11      Yes Xus yeej paub tus twg yog tus yuav muab nws muag. 

Vim li ntawd nws thiaj hais tias :  « Nej huv tsis tas txhua leej. »

12     Thaum Yes Xus ntxuav lawv ko taw tas,

nws rov hnav nws lub tsho txheej nraud, 

nws rov los zaum ntawm rooj mov,

nws mam li hais rau lawv tias :

« Nej  puas  to  taub  qhov  uas  kuv ua rau nej ? 

13     Nej hu kuv ua : Xib Hwb thiab Huab Tais. 

Nej hu raug lawm, vim kuv yeej yog tiag. 

14     Txawm tias kuv yog nej tus Xib Hwb thiab nej tus Huab Tais, tsis kav, 

kuv ntxuav nej ko taw, mas nej ib tug yuav tsum rov ntxuav

ib tug ko taw thiab. 

15     Kuv muab ib tug piv txwv rau nej:

kom nej tau ua raws li kuv tau ua rau nej.

HUAB TAIS PLEEV. Lub qab ntuj neeg cav txog koj.

P.4

Tos ib me ntsis ces ib ob tug hais cov zaj thov Ntuj.

P.5

  • G :Tswv Ntuj tso nws Leej Tswv Yim nqes los rau saum peb. Peb thiaj li hais zaj Peb Txiv nyob saum Ntuj zoo li Yes Xus qhia rau peb.

Peb txiv nyob saum ntuj,

Koj muaj koob meej nto moo lug mus li.

Koj hwj huam los txog.

Peb xav mloog koj lus nyob ntiaj teb no,

Zoo li nyob saum ntuj.

Hnub no, koj muab mov txaus pub peb noj,

Koj zam rau peb, zoo li peb zam rau luag

Thaum dab phem tuaj ntxias peb siab

Koj txhob tso peb tseg

Ua kom peb dim ntawm tus phem

Ua Li.

  • Muaj ib tug hais zaj thov ntuj no :

Huab Tais, peb thov koj npo peb tas txhia yam phem. Koj pub peb nyob thaj yeeb tas peb sid. Koj ua siab zoo nres peb. Peb thiaj yuav dim ntawm txoj kev txhaum, yuav nyob nyab xeeb, tsis raug kev ntxhov, vim peb tso siab tos txog hnub tus cawm peb, Yes Xus Pleev rov tuaj.

  • G : Hmo Jeudi Ntshiab no, peb kuj xav txais Yes Xus lub cev thiab yog li peb thiaj li yuav hais zaj Thov Ntuj no :

Huab Tais Yes Xus, kuv ntseeg tias koj nyob hauv cov mov mog thiab hauv cov cawv no.

Kuv nyiam koj, koj yog tus Tswv Ntuj nyob hauv kuv lub neej.

Kuv xav txais koj lub cev thiab

cov ntshav nyob hauv kuv lub neej.

Tam sim no kuv txais tsis tau koj lub cev thiab cov ntshav.

Tswv Ntuj thov koj los nrog kuv nyob

Kuv tos txais koj txoj kev hlub, txoj sia uas koj muab pub rau kuv lub neej.

Thov kom niaj hnub kuv paub thiab txawj hlub sawv daws, xws li Yes Xus tau qhia rau kuv, kom kuv nyob nrog nraim nws cov lus qhuab qhia, kom Yes Xus nrog nraim kuv mus tag ib sim

P.6

Tus txiv tsev, los tus niam tsev foom hmoov zoo rau cov txhia laj txhia xwm nyob saum rooj uas peb yuav noj :

Hmo ntshiab no, Peb txiv Tswv Ntuj peb thov koj, Yes Xus uas koj muab koj lub cev thiab cov  ntshav los cawm neeg, peb thov koj foom hmoov zoo rau cov txhia laj txhia xwm

ua peb yuav noj, kom nws ua kom peb nyob ua ib pab, ib pawg, kom peb nyob nraim hauv Tswv Ntuj txoj kev nyiam.

Ua li.

Peb ua tus cim Ntoo Cuam

Tas li ntawv peb sawv daws noj mov.

Thov Ntuj hauv tsev rau hnub chiv 5 caij Plaub caug : 29-03-2020

Par Ntsuab-Rwg Thoj

Tswv qhia Mgr Michel PANSARD

Ntawm no yog ib daim phiaj qhia pab thov Ntuj nyob hauv tsev, vim tias lub caij no, txwv tsis pub peb sib sau ua ke txais Yes Xus lub cev. Yog nej nyob twm zeej, xws li nej nyob nej ib leeg xwb. Nej muaj daim phiaj no rov kho kom haum nej los tau.

LUB CAIJ NPAJ :

Yuav tau npaj ib qho chaw los teev Ntuj. Xws li sib sau nyob ntawm ib tug ntoo cuam, los sis puas, ib daim duab ntawm Yes Xus los niam Mab Liab puag tus me nyuam, ib phau ntawv Ntshiab, los phau ntawv Moo Zoo hnub no, nrog ib tug tswm ciab thiab ib res paj… Yog nyob hauv nej tsev neeg, muaj cov txawj hu thiab ntaus nkauj, yeej meem txib lawv, kom lawv npaj ib los ob zaj nkauj.

Cov lus qhia nyob hauv daim ntawv no, sau ua xim liab. Cov zaj hais thiab nyeem rau sawv daws, sau ua xim xiav.

LUB CAIJ THOV NTUJ :

Yog nej muaj ob peb leeg, nej tau nrhiav ib tug los coj zaj thov Ntuj, xws li tus txiv tsev, tus niam tsev los ib tug laus (tus coj ntawd yuav tau los hais cov kab « G »)

G- Peb koom siab nrog peb tus tswv qhia thiab cov ntseeg nyob peb lub xeev ntuj Évry.

Peb sawv daws ua lub cim Ntoo Cuam :

HU TXOG LEEJ TXIV THIAB LEEJ TUB THIAB LEEJ NTUJ PLIG. UA LI

Nej muaj lub txiaj ntsim thiab txoj kev kaj lug tuaj ntawm peb Txiv Tswv Ntuj thiab ntawm Huab Tais Yes Xus Pleev tuaj.

Sawv daws : Peb cav lus zoo txog Tswv Ntuj, peb tus Huab Tais Yes Xus Pleev Leej Txiv.

G- Peb koom siab nrog cov ntseeg uas lub caij no, tseem muaj cai mus teev Ntuj ua ke rau hnub chiv, thiab tag nrho rau cov nyob deb los nyob ze uas tsis muaj lub txoos hnub chiv lawm – lawv kuj tos ntshis txog hnub uas lawv yuav tau rov sib sau dua – peb sawv daws cob peb lub siab rau Tswv Ntuj :

Zaj thov Ntuj rau hnub chiv 5 lub caij Plaub caug :

G- Huab Tais Leej Txiv, thov koj pov hwm peb, kom peb txawj mloog koj Leej Tub Yes Xus, uas nws muab nws txoj sia los cawm ntiaj teb neeg.

Thov kom Tswv Ntuj hlub peb, daws peb cov txhaum thiab coj peb mus txog txoj sia nyob mus li. Ua li.

Ib tug neeg los npaj nyeem Ntawv Moo Zoo : Nyob hauv phau Ntawv Ntshiab mas peb tau hnov tej zaj lus cav txog Yes Xus, uas nws yog Leej Pleev, yog Huab Tais Tswv Ntuj tshwm sim tuaj nyob ntiaj teb no. Nws yog Huab Tais lub suab, nws yog peb lub teeb pom kev, nws yug peb txoj sia ua neej nyob ntiaj teb no. Leej Ntuj Plig, koj los mas. Los qhib peb lub siab, peb lub tswv yim thiab qhia peb txais koj cov lus qhuab qhia kom nws tawg paj txi txiv hauv peb.

COV LUS NYOB HAUV ZAM NTAWV MOO ZOO « Kuv yog Txoj Kev Sawv Rov Los thiab yog Txoj Sia » (Jn 11, 3-7.17.20-27.33b-45)

3- Lub caij ntawd, nkawd ob viv ncaus xa xov mus hais rau Yes Xus tias : « Huab Tais, tus uas koj nyiam, mas nws mob lawm. » 4- Yes Xus hnov li ntawd, Yes Xus hais tias : « Tus mob no tsis coj mus rau qhov tuag, nws yuav ua kom Tswv Ntuj nto koob meej, kom xwv Tswv Ntuj Leej Tub txais koob meej vim tus mob ntawd. »

5- Yes Xus nyiam Mas Tas, thiab nws tus niam hluas, thiab Las Ntxas Los lawv. 6- Tab yog nws hnov hais tias Las Ntxas Los mob lawm, tsis kav nws tseem nyob qhov qub ob hnub ntxiv thiab. 7- Ces Yes Xus mam li hais rau cov thwj tim tias : « Peb rov mus Yus Das teb. » 17- Thaum Yes Xus tuaj txog, nws pom Las Ntxas Los twb zwm ntxa tau plaub hnub lawm. 20- Thaum Mas Tas hnov tias Yes Xus tuaj, ces Mas Tas mus tos Yes Xus, hos Mab Liab zaum nyob hauv tsev. 21- Mas Tas hais rau Yes Xus tias : « Huab Tais, yog koj ntxov tuaj txog ntawm no, mas kuv tus nus yuav tsis tuag. 22- Tsis kav, kuv paub tias nyem no, koj thov yam twg ntawm Tswv Ntuj, mas Tswv Ntuj yuav muab rau koj. » 23- Yes Xus hais rau Mas Tas tias : « Koj tus nus yuav sawv rov los. » 24- Mas Tas hais rau Yes Xus tias : « Kuv paub tias thaum txog hnub kawg, lub caij leej tib neeg lub cev ciaj rov los, mas nws yuav sawv rov los. » 25- Yes Xus hais rau Mas Tas tias : « Kuv yog Txoj Kev Sawv Rov Los thiab yog Txoj Sia : tus ntseeg txog kuv, tab yog nws tuag lawm, nws yuav muaj txoj sia nyob. 26- Leej twg ua neej nyob ntseeg txog kuv, nws yuav tsis tuag ib zaug. Koj puas ntseeg qhov ntawd ? » 27- Mas Tas hais rau Yes Xus tias : « Huab Tais, kuv ntseeg. Kuv ib txwm ntseeg hais tias koj yog Leej Pleev, yog Tswv Ntuj Leej Tub tuaj nyob hauv lub qab ntuj no. » 33-b Yes Xus tu siab kawg nyob hauv nruab siab, nws ib ce qaub thoob tas. 34 Yes Xus hais tias : « Nej muab nws tso qhov twg ? » Lawv teb tias : « Huab Tais, koj los tom no, koj yuav pom. » 35- Yes Xus kua muag poob nthav. 36- Cov Yus Das thiaj hais tias : « Saib, nws nyiam Las Ntxas Los kawg. » 37- Tab sis muaj ib co Yus Das hais tias : « Nws yog tus uas qhib tau neeg dig muag qhov muag, nws ho ua tsis tau kom tus neeg no txhob tuag ? » 38- Ces Yes Xus rov tu siab heev kawg nyob nruab siab, nws mus tom lub ntxa. Yog ib lub qhov tsua, muaj ib daim txiag zeb kaw lub rooj ntxas. 39- Yes Xus hais tias : « Nej tshem daim txiag zeb. » Mas Tas uas yog tus tuag tus muam, hais rau Yes Xus tias : « Huab Tais, nws tuag tau plaub hnub lawm : nws twb tsw lawm. » 40- Yes Xus hais rau Mas Tas tias : « Kuv tsis tau hais rau koj tias yog koj ntseeg, koj yuav pom Tswv Ntuj lub hwj chim lod ? » 41- Ces lawv tshem daim txiag zeb, Yes Xus tsa muag ntsia saum ntuj, nws hais tias : « Txiv, kuv ua koj tsaug vim koj mloog kuv. 42- Kuv paub tias koj yeej ib txwm mloog kuv, tab sis kuv hais cov lus no, kom tsoom neeg uas sawv ncig kuv ntseeg tias yog koj xa kuv tuaj. » 43- Yes Xus hais li ntawd tas, nws hu ib suab nrov nrov tias : « Las Ntxas Los, koj tawm los nraum no ! » 44- Tus tuag tawm los, cov saw tseem pav nws tej tes taw, daim ntaub npog ncauj tseem vov nws lub ntsej muag. Yes Xus hais rau lawv tias : « Nej daws cov saw, nej cia nws mus nws. » 45- Coob tus Yus Das uas tuaj xyuas Mab Liab tau pom qhov uas Yes Xus ua ces lawv ntseeg txog Yes Xus.

– Huab Tais Pleev, Lub qab Ntuj neeg cav txog koj.

Nthuav Ntawv Ntshiab :

Nyob hauv Zam ntawv Moo Zoo mas Yes Xus tau ua 7 lub cim, xws li : Yes Xus muab dej txia ua cawv nyob Kas Nas, Yes Xus kho Vaj ntxwv tus nom tus tub, Yes Xus kho tus neeg tuag ceg, Yes Xus faib cov ncuav mov rau tsoom sid, Yes Xus mus kev saum dej ntuj, Yes Xus kho tus neeg dig muag, Thiab Yes Xus tsa Las Ntxas Los sawv rov los.

Thaum Yes Xus tsa Las Ntxas Los sawv rov los, mas yog zaum 7. Nyob hauv txoj kev ntseeg mas tus lej 7, yog ib tug lej zoo kawg. Thaum Yes Xus ua lub cim no tas ces tsis ntev tom qab, lawv yuav muab Yes Xus ntes. Yog vim li no mas, zaj nyeem hnub no, tseem ceeb heev.

Zaj nyeem no, los kuj ntev hauj sim, peb tau ua siab ntev mloog. Yog muaj me nyuam yau, thaum txog ntu ob, yuav tau maj mam nyeem me ntis.

Zaj nyeem no, kuj phim rau tej lub caij zoo li tam sim no thiab. Vim nws hais txog txoj kev mob, kev tuag, kev quaj ntsuag, kev poob siab thiab kev ntseeg. Las Ntxas Los, Mas Tas thiab Mab Liab puav leej yog Yes Xus cov phooj ywg. Txoj kev ntaus phooj ywg mas tseem ceeb kawg.

Kom peb to taub zoo txog Ntawv Ntshiab mas, peb kuj ua zoo mloog thiab saib cov neeg tshwm nyob hauv tej zaj zoo li no thiab. Nyob hauv zaj hnub no, mas muaj ntau tus neeg : – Thaum pib, muaj Tos Mas, uas nws yog ib tug neeg uas tsis to taub dab tsi li (zoo ib yam li peb thiab). – Ntxiv mus muaj Mas Tas, uas yog tus uas tau muab Yes Xus yws. Tab sis, nws qhov muag tsis tau pom los, nws txoj kev ntseeg ruaj thiab khov. – Muaj Mab Liab, nws yog tus nyob hauv tsev thiab tawm khiav mus ntsib Yes Xus tom kev. – Muaj Las Ntxas Los, uas yog tus tau tuag thiab sawv rov los. – Thiab muaj Yes Xus.

Peb maj mam xav saib nyob hauv zaj Ntawv Moo Zoo no, ib tug hais qhia tau dab tsi rau ib tug.

Muaj ntau yam los sib raws :

  • 1) Thaum Yes Xus tsis nyob ntawd ; nws tus phooj ywg Las Ntxas Los tau tas sim neej lawm.
  • 2) Yes Xus hnov Mas Tas yws nws thiab hnov Mab Lias cov lus hais tias : « Huab Tais, yog koj ntxov tuaj txog ntawm no, mas kuv tus nus yuav tsis tuag ».

Nyob ntawm peb ne, puas muaj tej zaum peb kuj tau hais los xav li ntawd thiab ? Peb cov tau teev Ntuj ua ke ntawm no, puas muaj leej twg xav hais ob peb lo lus : saib nws puas tau ntsib tej lub caij uas thaum nws thov Ntuj, zoo nkaus li Tswv Ntuj kuj tsis nyob ntawd lawm thiab.

  • 3) Mas Tas mob siab npaum li cas los, nws txoj kev ntseeg tsis tu ncua : « Huab Tais, kuv ntseeg. Kuv ib txwm ntseeg hais tias koj yog Leej Pleev, yog Tswv Ntuj Leej Tub tuaj nyob hauv lub qab ntuj no. »

Lub caij no, peb sawv daws tab tom ntsib kev nyuaj siab ntxhov plawv. Ua neej nyob kuj tsis yooj yim kiag li. Peb ua dab tsi, peb thiaj li sib txhawb kom peb txoj kev ntseeg thiab kev tso siab ruaj tuaj ?

  • 4) Thaum ntawd, Yes Xus kuj tau nrog sawv daws quaj thiab (tsis txwv txoj kev quaj, yog pes tau tias muaj siab thiab mob siab tiag tiag). Tab sis, yuav tsum txob tso txoj kev mob siab, ua hmab dawm tes hlua dawm taw. Ntawm Yes Xus, nws thiaj li sawv tsa suab.
  • 5) Las Ntxas Los tuag tiag tiag : «Nws tuag tau plaub hnub lawm : nws twb tsw lawm. » Niaj hnub no, tej zaum peb kuj muaj kev poob siab rau peb lub neej thiab… rau tej yam uas peb tsis tau npaj ua ntej ! Ua li, peb puas yuav nyob quaj tos xwb lod ? Nej hnub no, peb tej lus qhuab qhia yog dab tsi ?
  • 6) Yes Xus tsa Las Ntxas Los sawv rov los : « Las Ntxas Los, koj tawm los nraum no ! ». Yes Xus ua tau tej yam uas tsis tau muaj ib tug neeg ua li. Lo lus « Tsa sawv rov los » yog dab tsi ? Puas yog txoj kev tuag thiab sawv rov los xwb lod ? Yus xav hauv yus tug kheej saib, niaj hnub ntawm no, Yes Xus qhia tau dab tsi rau yus ? (Xws li, kev nyuaj siab, kev ntshai, kev txhaum, kev hiam, kev khib…) Peb puas thov kom Yes Xus pab peb tshem tej pob zeb ua nra, uas peb niaj hnub ris nyob hauv peb lub neej ?
  • 7) Thaum kawg, Yes Xus kom peb pab Las Ntxas Los : « Nej daws cov saw, nej cia nws mus nws. » Ntawm kuv ne, kuv yuav ua tau dab tsi los pab lwm tus neeg, kom nws tawm hauv nws « lub ntxa » ? Rau cov me nyuam yau, peb qhia lawv ua yeeb yam tes taw piav txog zaj nyeem no ; los sis puas kom lawv teeb ib daim duab cav tias « Yes Xus yog txoj sia ».

Thaum peb mloog cov lus no tas lawm, peb tau nyob twj ywm thiab ua ke npaj cov zaj thov Ntuj. (Mus xyuas cov nyob hauv « CCFD Terre Solidaire du secteur de Massy – Verrières », los lwv cov) :

Pib Thov Ntuj Peb tso siab tias « tus Cawm Seej, nws yuav tsis tso peb tseg », nws yuav tsi tig rov qab nyob hauv « nws txoj kev hlub peb ». Peb yuav cev peb cov lus thov nws rau lub Koom Txoos thiab rau lub ntiaj teb neeg. Txais : Peb thov Koj, Huab Tais Leej Txiv siab zoo. « Ô kuv cov neeg ! Kuv yuav tso kuv Leej Ntuj Plig tuaj nplij nej, ces nej yuav muaj txoj sia nyob mus li » Huab Tais Tswv Ntuj, koj yog tus tsim lub qab ntuj khwb, peb thov koj rau lub Koom Txoos kev ntseeg, rau cov tuav koj Leej tub Yes Xus lub npe, kom lawv muaj lub tswv yim los pab peb ua neej nyob, kom lawv txawj tshaj koj cov lus qhuab qhia sib zam sib hlub, kom sawv daws txawj txuag lub ntiaj teb uas koj tau tsim tseg thiab kom peb txawj tso siab rau koj. Txais

« Kwv tij sawv daws, cov neeg uas tsuas nyiam lub cev xwb, yuav ua tsi tau Tswv Ntuj cov tub txib ». Huab Tais Tswv Ntuj, peb yuav thov koj rau cov nom tswv, cov tuav qav tuav num kom lawv pab txuag lub ntiaj teb no, uas yog peb sawv daws lub tsev ; txhawj xeeb txog cov neeg txom nyem. Ua li mas peb thiaj li yuav tsim tau txoj kev thaj yeeb nyab xeeb nyob mus li. Txais

« Mas Tas, khiav mus ntxhi twj ywm rau nws niam hluas Mab Liab hais tias : « Xib Hwb tuaj txog tod lawm, nws hu koj ». Huab Tais Tswv Ntuj, koj yog tus tsim lub ntiaj teb no, peb thov koj kom cov neeg nyob thoob ntiaj teb pab txuag tus hlob tus yau kom sawv daws tau nyob huv sib npaug zos, kom muaj kev kho mob, kev kawm, kev nrhiav noj nrhiav haus, raws li siab xav. Txais

« Tab sis Leej Pleev lub Tswv Yim muaj txoj sia, vim kev ncaj. » Huab Tais Tswv Ntuj, peb thov koj rau peb tsoom neeg uas tab tom raug tus mob Kos Los Nas ntawm no. Kom peb sawv daws txawj txuag peb, thiab txawj pab cov neeg nyob twm zeem, cov neeg tau txais kev ntsoj kev ntsuag, thiab cov yuav tau los txais lub Cim Ntxuav rau tom qab lub caij Hla tuaj no. Txais

Txuas ntxiv no mus, nyias hais nyiaj zaj los kuj tau thiab…

G- Huab Tais, koj nco txog koj cov neeg, uas tau sib sau, koom siab koom ntsws, thov txog koj hnub no. Thov koj mloog peb cov lus vam khom koj : Kom txoj kev mob kev nkeeg txhob nphav peb, kom peb txoj kev ntseeg hlob tuaj, kom peb muaj zog thiab muaj peev xwm sib pab, sib hlub mus lawm yav tom ntej, Koj yog peb tus Huab Tais Yes Xus Pleev, khuv leej neeg thiab pub kev thaj yeeb rau tas txhua yim, uas tau ntsib kev txom nyem lub caij no thiab lawm yav tom ntej, mus tas ib txhiab ib txhis. Ua li. Hnub no, yog hnub chiv nyob hauv lub caij plaub caug, peb nco ntsoov pab cov koos haum xws li lub CCFD (Comité Catholique contre la Faim et pour le Développement) thiab lwm cov.

G- Yog vim tus cawm peb, nws qhia rau peb. Peb thiaj li muaj cuab kav hais tias :

Peb Txiv nyob saum ntuj, Koj muaj koob meej nto moo lug mus li, Koj hwj huam los txog. Peb xav mloog koj lus nyob ntiaj teb no zoo li nyob saum ntuj. Hnub no koj muab mov txaus pub peb noj ; Koj zam rau peb zoo li peb zam rau luag. Thaum dab phem tuaj ntxias peb siab, Koj txhob tso peb tseg, ua kom peb dim ntawm tus phem. Ua li

Ib tug hais zaj thov Ntuj ntawm no : Huab Tais, peb thov koj npo peb ntawm txhia yam phem. Koj pub peb nyob thaj yeeb tas peb sid ; koj ua siab zoo nres peb, peb thiaj yuav dim ntawm txoj kev txhaum, yuav nyob nyab xeeb tsis raug kev ntxov, vim peb tso siab tos txog hnub tus cawm peb, Yes Xus Pleev, rov tuaj.

G : Caw sawv daws koom siab hais zaj thov Ntuj ntawm no : Huab Tais Yes Xus, kuv ntseeg tseeb tias koj tuaj nyob hauv cov mov mog thiab cov ntshav peb txais ntawm koj los. Kuv nyiam koj, koj yog tus caw kuv txoj sia. Kuv zoo siab txais koj tuaj nyob hauv kuv lub siab lub plawv. Koj tuaj coj kuv lub neej kom ntshiab tuaj. Tas kuv sim neej, koj hlub kuv, koj tuaj yug kuv txoj sia, kom kuv paub khaws koj cov lus qhuab qhia ua neej nyob. Kev ua Vaj, kev muaj Hwj Huam, kev nto Koob Meej yog koj tug mus tas ib txhiab ib txhis. Ua li.

Hais zaj thov Ntuj no tas, peb nyob twj ywm, txhob hais lus. Ces mam li hu ib zaj nkauj ua ke.

Thaum kawg, ib tug laus mam li pov dej ntshiab rau sawv daws :

Thov kom Huab Tais Tswv Ntuj pom fwm peb ! Thov kom nws dauv muag los ntsia peb, thiab pub nws txoj kev thaj yeeb nyab xeeb rau peb… Tau ob peb hnub tas los no, peb tau ua lub hmoov cav txog Tswv Ntuj tuaj qhia Niam Mab Liab. Yes Xus tau cob nws niam rau peb, zoov nkaus peb sawv daws leej niam thiab. Peb muaj cai thov nws rau peb txhua tus.

Peb hu zaj :

Koj nyob zoo Mab~ Liab, txiaj ntsim pub koj lub siab. Huab Tais Ntuj nrog koj nyob~, koj tau koob tau hmoov tshaj sawv daws poj~ niam~ tib~ si, thiab koj plab lub~ txiv Yes~ Xus tau koob tau hmoov. Mab Liab, Huab Tais Ntuj leej~ niam, nyem no t hiab thaum txog peb lub caij dua. Koj thov pab peb cov neeg txhaum. Ua li.

XTY – Zaj thov Ntuj rau hnub Chiv 5 – Caij Plaub caug Xyoo A : Txiv Tswv Qhia Michel PANSARD

Tshaj moo qaij qaug nyob xeev 91

Par Ntsuab-Rwg Thoj

Tshaj tawm rau peb ib tsoom ntseeg sawv daws paub tias niam Nchaiv-Yis Xyooj (npe hluas nkauj Diav Xyooj) yug hnub tim 01/01/1927 tau tas sim neej rau hnub tim 13/03/2020. Nws muaj li 93 xyoo.

Tsev xyom cuab yuav npaj nws lub pag lub xau nyob rau lub chav tsev : 

Pompe Funèbre

2 Impasse du rondeau

91080 Courcouronnes

Vendredi 20 Mars 2020 :

  • 14h00 : Kab ke Xa Plig
  • 16h00 : Coj tus qauv mus sam sab

Muaj dab tsi noog tau rau :

  • Mr Xyooj Txiaj-Vwj : 06-52-76-88-87
  • Mr Vwj Neej-Zoo : 06-41-04-94-85

Peb ib tsoom ntseeg pab thov ntuj rau tsev xyom cuab Thiab rau niam Nchaiv-Yis Xyooj tus ntsuj plig

Caij nyoog teev ntuj nyob Rennes xyoo 2019-2020

Par Ntsuab-Rwg Thoj

Dimanche 06 Octobre 2019

  • 11h00 : teev ntuj ntawm lub tsev teev ntuj St Joseph nyob rau 27 Rue Monsieur Vincent 35200 Rennes

Dimanche 29 Décembre 2019

  • 11h00 : teev ntuj ntawm lub tsev teev ntuj St Joseph nyob rau 27 Rue Monsieur Vincent 35200 Rennes (thaum teev ntuj tas pawg ntseeg yuav noj ib pluag mov ua ke nram qab lub tsev teev ntuj)

Dimanche 09 Février 2020

  • 11h00 : teev ntuj ntawm lub tsev teev ntuj St Joseph nyob rau 27 Rue Monsieur Vincent 35200 Rennes

Dimanche 22 Mars 2020

  • 11h00 : teev ntuj ntawm lub tsev teev ntuj St Joseph nyob rau 27 Rue Monsieur Vincent 35200 Rennes

Dimanche 26 Avril 2020

  • 11h00 : teev ntuj ntawm lub tsev teev ntuj St Joseph nyob rau 27 Rue Monsieur Vincent 35200 Rennes

Dimanche 07 Juin 2020

  • 11h00 : teev ntuj ntawm lub tsev teev ntuj St Joseph nyob rau 27 Rue Monsieur Vincent 35200 Rennes