Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1

Hnub Chiv 1 / Caij Plaub Caug / Xyoo A

Hauv Paus 2, 7-9; 3, 1-7a

2

7 – HUAB TAIS Tswv Ntuj muab ib thooj av nplaum los puab ua tib neeg. HUAB TAIS Tswv Ntuj tshuab pa rau hauv tib neeg qhov ntswg, ces tib neeg ciaj ua ib tug muaj sia.

8 – HUAB TAIS Tswv Ntuj cog tau ib lub vaj nyob Es Dees, nyob sab hnub tuaj. Nws muab tus txiv neej uas nws tau puab tso rau hauv lub vaj.

9 – HUAB TAIS Tswv Ntuj ua kom txhua yam ntoo uas zoo saib thiab zoo noj tuaj hauv lub vaj thaj av. Tus ntoo muaj txoj sia tuaj nyob hauv nruab nrab lub vaj, thiab tus ntoo uas paub qhov zoo qhov phem.

3

1 -Tus nab yog tus ntse tshaj tastxhua hom tsiaj HUAB TAIS TswvNtuj tau tsim los nyob nruab nrag. Nabhais rau tus poj niam tias : »Li ntawd, Tswv Ntuj hais tias : Nebyuav tsis txhob noj txhua yam txiv ntoohauv lub vaj no puas yog ? »

2 – Tus poj niam teb rau tus nab tias : « Wb noj tau cov txiv txi saum cov ntoo hauv lub vaj no tib si.

3 – Tsuas tshwj cov txiv txi saum tsob ntoo nyob hauv nruab nrab lub vaj, mas Tswv Ntuj hais tias :

“Neb tsis txhob noj, tsis txhob kov, yog neb noj neb kov, mas neb yuav tuag. »

4 – Tus nab teb ntua tus poj niam tias : « Tsis muaj li ntawd ib zaug ! Neb yuav tsis tuag. 5 Vim Tswv Ntuj paub tias, hnub twg neb noj ces neb qhov muag yuav qhib, neb yuav zoo li tej tus tswv ntuj uas paub qhov zoo thiab qhov phem. »

6 -Tus poj niam pom hais tias tus ntoo ntawd yeej zoo noj thiab zoo saib kawg, thiab yog tus ntoo uas yus ntshaw noj kom yus paub qhov zoo thiab qhov phem. Nws de zoj lub txiv ntawm tus ntoo los noj. Nws kuj cev rau nws tus txiv uas nrog nws nyob, ces tus txiv kuj noj thiab.

7 – Ces nkawd ob leeg qhov muag qhib plho, nkawd paub hais tias nkawd liab qab.

Yog Tswv Ntuj lo lus. Nws lub Txiaj Ntsim

Nkauj Paj Nruag 51

3 – Tswv Ntuj, koj lub siab zoo, thov koj khuv leej kuv. 

 Koj lub siab dav tas nrho hlub mos nyoos, 

 koj so kuv qhov txhaum. 

4 – Thov koj ntxuav kuv qhov phem kom tag, 

 yaug kuv qhov txhaum kom kuv huv tuaj. 

5 – Kuv paub kuv qhov txhaum, 

 kuv qhov yuam kev nyob ntawm kuv xub ntiag mus li. 

6 – Kuv ua txhaum rau koj, txhaum koj tib leeg xwb, 

 yam phem ntawm koj qhov muag, kuv tau ua lawm.

13 – Koj txhob ntiab kuv mus deb ntawm koj lub ntsej muag, 

 txhob thau koj lub tswv yim ntshiab ntawm kuv.

14 – Koj ua kom kuv rov zoo siab, vim koj cawm kuv, 

 koj txheem kuv lub tswv yim kom dav. 

15 – Kuv yuav qhia koj txoj kev rau cov ntxeev siab, 

 cov neeg txhaum yuav rov los cuag koj. 

16 – Kuv tus Tswv Ntuj, tus Tswv Ntuj Cawm neeg, 

 thov koj npo kuv dim ntawm ntshav ; 

 kuv tus nplaig yuav cav txog koj txoj kev ncaj ! 

 17 -HUAB TAIS, koj qhib kuv di ncauj, 

 kuv lub ncauj yuav cav lus zoo txog koj.

Zaj nyeem 2

Los Mas 5, 12-19

Ntsiab lus : « Vim As Das ua txhaum, peb thiaj pheej xav ua txhaum. Tab sis nyob hauv Yes Xus peb tau Tswv Ntuj lub txiaj ntsim npo peb ntawm kev txhaum. »

Paj Lug sau ntawv tuaj rau cov ntseeg nyob Los Mas:

12 – Yog vim tib tug neeg xwb, mas kev txhaum tau tshwm los nyob hauv lub ntiaj

teb, ces kev txhaum coj kev tuag los. Txoj kev tuag thiaj raug tas zeej tsoom, vim sawv daws ua txhaum.

13 – Kev txhaum xub tshwm los nyob ntiaj teb ua ntej Txoj Cai, tab sis thaum tsis muaj Txoj Cai, mas yus tsis ris lub txim txhaum. Txij As Das los txog Mais Xes, kev tuag ua vaj kav sawv daws :

14 – tab yog cov neeg tsis tau ua tej yam txhaum zoo nkaus li As Das mas lawv kuj zwm rau kev tuag, vim As Das yog tus duab qhia txog tus yuav tuaj.

15 – Tab sis lub txiaj ntsim tsis zoo li kev txhaum. Vim ib tug xwb ua txhaum mas tas zeej tsoom tuag. Nyem no Tswv Ntuj lub txiaj ntsim thiab cov paj tshab uas Ntuj pub nyob hauv Yes Xus Pleev haj yam ntws los ntau rau zeej tsoom.

16 – Lub txiaj ntsim uas tau coj yam zoo los, tsis zoo li yav thaum ub, uas ib tug neeg xwb ua txhaum : thaud, ib leej tib neeg tau ua ib qho txhaum xwb, mas Ntuj txiav tias neeg yuav raug txim ; hos nyem no neeg tau ua ntau yam txhaum ntev ntev los, tsis kav lub txiaj ntsim ua kom neeg ncaj tuaj.

17 – Vim ib tug neeg tau ua txhaum, ces kev tuag tau ua vaj. Nyem no, cov txais lub txiaj ntsim thiab txais kev ncaj tej paj tshab, mas lawv haj yam yuav ua vaj nyob hauv txoj sia, vim Yes Xus Pleev tib leeg .

18 – Li ntawd, ib tug neeg qhov txhaum pus tas ib zeej tsoom neeg mus rau kev raug txim ; ib tug neeg txoj kev ncaj kuj pub kev ncaj thiab pub txoj sia rau ib tsoom neeg.

19 – Vim ib tug neeg txoj kev tsis mloog lus, ces tas zeej tsoom thiaj ua neeg txhaum ; vim ib tug neeg kev mloog lus, ces tas zeej tsoom yuav tau nce mus ua neeg ncaj.

Yog Tswv Ntuj lo lus. Nws lub Txiaj Ntsim

Ntawv moo zoo

Ntsiab lus : « Yes Xus tsis kam ua hwj huam yees ntxwv raws li Dab Phem ntxias kom nws ua. Yes Xus xaiv txoj kev mloog Tswv Ntuj lus. »

Mas Tais 4, 1-11

1 – Thaum ntawd, Leej Ntuj Plig coj Yes Xus mus rau teb chaws suab puam kom raug dab phem ntxias.

2 – Yes Xus yoo mov tau plaub caug hnub plaub caug hmo, ces nws tshaib plab.

3 – Ces niag ntxias neeg txav los, nws hais rau Yes Xus tias : « Saib, koj yog Tswv Ntuj Leej Tub no, koj hais kom cov pob zeb no txia ua mov! »

4 – Tab sis Yes Xus teb tias : « Muaj lus sau cia tias : Neeg tsis kawg muab mov xwb los yug

txoj sia, neeg tseem muab txhua lo lus tawm ntawm Tswv Ntuj lub ncauj los yug txoj sia thiab. »

5 – Dab phem tseem coj Yes Xus nrog nws mus hauv lub Nroog Ntshiab. Ces dab phem coj Yes Xus mus tso puag saum lub ruv Tuam Tsev Teev Ntuj,

6 – dab phem hais tias : « Saib, koj yog Tswv Ntuj Leej Tub no, koj dhia lawm puag hauv, vim muaj lus sau cia tias : Ntuj yuav txib nws cov tshiab, kom lawv nqa koj nyob hauv lawv txhais tes, kom koj ko taw txhob dawm ib lub pob zeb li. »

7 – Yes Xus hais rau dab phem tias : “Tseem muaj lus sau cia tias : Koj yuav tsis txhob ntxias koj tus Huab Tais Tswv Ntuj.”

8 – Dab phem tseem coj Yes Xus mus txog saum ib lub roob siab siab. Nws taw cov ceeb tsheej muaj koob meej nyob ntiaj teb rau Yes Xus ntsia.

9 – Nws hais tias : « Yog koj txhos caug pe kuv, mas kuv yuav muab tej ntawd tas huv si rau koj. »

10 – Yes Xus hais rau dab phem tias : « Xas Tas, koj khiav mus ! Vim muaj lus sau cia tias : Tus koj yuav pe, yog koj tus Huab Tais Tswv Ntuj. Koj yuav teev nws tib leeg xwb. »

11 – Dab phem thiaj khiav ntawm Yes Xus mus. Ces cov Tshiab txav los tsob hwb Yes Xus.

  Huab Tais Pleev .  Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1

Les Vis 19. 1-2.17-18

Ntsiab lus : « Koj yuav nyiam tus nyob ze koj ib yam li koj nyiam koj »

Txoj kev ua neeg zoo.

1 – HUAB TAIS hais rau Mais Xes tias :

2 – « Koj yuav hais rau tsoom tub ki His Xas Lais tias : Nej yuav ua neeg ntshiab, vim kuv yog nej tus HUAB TAIS, nej tus Tswv Ntuj, kuv yog Tus Ntshiab.

17 – Koj yuav tsis txhob ntxub koj tus kwv tij nyob hauv koj nruab siab. Koj yuav qhuab qhia tus uas nrog koj ua ib haiv neeg, koj thiaj yuav tsis tau ris nws qhov txhaum.

18 -Koj yuav tsis txhob rob caub thiab yuav tsis txhob chim ntev rau tus uas nws yog koj haiv neeg. Koj yuav nyiam tus nyob ze koj ib yam li koj nyiam koj. Vim kuv yog HUAB TAIS.

                   Yog Tswv Ntuj lo lus. Nws lub Txiaj Ntsim

Nkauj Paj Nruag 103

Cav txog Tswv Ntuj lub siab khuv leej neeg.

Kuv tus plig, koj cav lus zoo txog HUAB TAIS,

kuv tej siab ntsws, nej cav lus zoo txog nws lub npe ntshiab ! 

Kuv tus plig, koj cav lus zoo txog HUAB TAIS,

txhob hnov qab nws tej paj tshab ib qho li ! 

Nws zam koj qhov txhaum tas,

nws kho koj cov mob tas tib si.

Nws txeeb koj txoj sia ntawm qhov ntxa los,

nws lub siab hlub nqee mos nyoos roos koj.

HUAB TAIS hlub mos nyoos, nws khuv leej neeg,

nws npau taws qeeb, nws hlub neeg tas nrho.

Nws tsis nrog neeg ua plaub mus li, nws tsis chib nyeej ntev.

Nws tsis nplua peb xws li peb tau txhaum,

nws tsis pauj rau peb raws li tej txhaum peb ua.

Nws xyeeb peb cov txhaum mus deb peb,

deb cuag li sab hnub tuaj nyob deb sab hnub poob.

HUAB TAIS hlub nqee mos nyoos rau cov hwm nws,

zoo li ib leeg txiv tsev hlub nqee mos nyoos nws cov me nyuam.

Zaj nyeem 2

Kos Lis Nthos 1 zaj 3. 16-23

Ntsiab lus : « Tas txhua yam yog nej tug, nej yog Leej Pleev tug, Leej Pleev yog Tswv Ntuj tug »

Kwv tij,

16 – Nej puas paub tias nej yog Tswv Ntuj ib lub Tuam Tsev ? Nej puas paub tias Tswv Ntuj Leej Ntuj Plig nyob txawm hauv nej ?

17 – Yog muaj ib tug rhuav Tswv Ntuj lub Tuam Tsev, mas Tswv Ntuj yuav rhuav tus ntawd. Vim tias Tswv Ntuj lub Tuam Tsev yog ib yam ntshiab. Lub Tuam Tsev ntawd yog nej.

18 – Nej txhob yuam kev. Nyob hauv nej, yog nej leej twg xav tias nws thoob tsib raws li ntiaj teb kev thoob tsib, mas nws yuav tsum ua neeg vwm, kom nws thoob tsib tuaj.

19 – Vim nyob ntawm Tswv Ntuj xub ntiag, ntiaj teb txoj kev thoob tsib yog ib txog kev vwm. Muaj ib lo lus sau tseg tias : ‘Nws ua kom cov thoob tsib rov mag lawv kev ntse.’ Tseem muaj dua ib los sau tias :

20 – “Huab Tais paub cov neeg thoob tsib xav dab tsi : nws paub tias lawv zaj tswv yim yog ib zaj cuav.”

21 – Li ntawd, nej txhob muaj ib tug nrhiav koob meej nyob hauv neeg.

22 – Vim tas txhia yam yog nej tug. Tsis hais Paj Lug, los As Pos Los, los Kes Fas, los lub ntiaj teb, los txoj sia, los txoj kev tuag, los lub zim txwv no, los yav tom ntej : tas txhua yam ntawd yog nej tug.

23 – Tab sis nej yog Leej Pleev tug, Leej Pleev yog Tswv Ntuj tug.

      Yog Tswv Ntuj lo lus. Nws lub Txiaj Ntsim

Ntawv moo zoo

Mas Tais 5. 38-48

Ntsiab lus : « Nej yuav nyiam nej cov yeeb ncuab »

Lub caij ntawd, Yes Xus hais rau nws cov thwj tim :

38 – Nej hnov tej lus qhia tias : Qhov muag pauj qhov muag, kaus hniav pauj kaus hniav.

39 – Hos kuv hais rau nej : nej tsis txhob nrog tus neeg phem sib cav. Yuav ua li no : leej twg ib ncuav pias rau koj sab plhu xis, tig sab plhu laug rau nws thiab.

40 – Leej twg xav ua plaub rau koj kom tau koj lub tsho, mas koj muab koj lub tsho tshaj sab ntxiv rau nws thiab.

41 – Leej twg thov koj xa nws mus ib ncuas kev, mas koj nrog nws mus ob ncuas.

42 – Leej twg thov koj, mas koj pub rau nws. Leej twg xav txais nyiaj ntawm koj, mas koj txhob tig nraub qaum rau nws.

43 – « Nej hnov tej lus qhia tias : Koj yuav nyiam tus nyob ze koj, koj yuav ntxub koj tus yeeb ncuab.

44 – Tab sis, kuv hais rau nej tias : nej yuav nyiam nej cov yeeb ncuab, nej yuav thov Ntuj rau cov tsim txom nej ;

45 – nej thiaj yog nej Txiv nyob saum ntuj cov tub ; vim nej Txiv ua kom lub hnub tuaj ziab cov neeg phem thiab cov neeg zoo, nws ua kom nag los rau cov siab ncaj thiab cov siab nkhaus.

46 – Yog nej nyiam cov neeg nyiam nej, mas nej yuav tau koob haum dab tsi ? Tab yog cov sau se, lawv kuj txawj nyiam li ntawd.

47 – Yog nej tshwj zias nej cov lus foom zoo rau nej cov kwv tij xwb, mas nej tau ua dab tsi zoo tshaj luag ? Tab yog cov neeg teev pej kum dab, los lawv kuj txawj ua li ntawd.

48 – Hos nej, mas nej yuav ua neeg zoo tshaj, vim nej Txiv nyob saum ntuj yog tus zoo tshaj.

              Huab Tais Pleev .  Lub qab ntuj neeg cav txog koj.

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1 :

Npes Xis Las, Zaj 15. 15-20

Ntsiab lus: Neeg yuav xaiv txoj kev zoo

15 – Yog koj xav mas koj yeej coj cov lus qhia tau. Koj yuav ua xis Huab Tais siab.
16 – Huab Tais tso dej thiab hluav taws rau ntawm koj xub ntiag. Koj xyab tes
mus kov dej los kov hluav taws tau raws li koj nyiam.

17 – Txoj sia thiab txoj kev tuag nyob ntawm neeg xub ntiag. Ntuj
pub txoj sia thiab txoj kev tuag rau neeg raws li neeg nyiam.
18 – Txoj kev thoob tsib loj tas nrho, nws muaj zog, nws muaj hwj huam. Nws pom
tas ib puas tsav yam.

19 – Huab Tais ntsia ntsoov cov neeg hwm nws. Nws paub
txhua yam neeg ua.

20 – Huab Tais tsis tau kom leej twg mus taug txoj kev tsis
hwm Ntuj, nws tsis tau tso lus rau leej twg ua txhaum.

Yog Tswv Ntuj Lo Lus. Nws Lub Txiaj Ntsim

Nkauj Paj Nruag -119

1 – Cov tau txoj hmoov zoo yog cov neeg coj tus cwj pwm ncaj ncees,
yog cov ua raws nraim HUAB TAIS Txoj Cai.
2 – Cov tau txoj hmoov zoo yog cov ua qhov uas HUAB TAIS
xav kom ua, yog cov nrhiav nws tas siab tas ntsws.

4 – Koj tshaj koj cov lus qhuab qhia tuaj
kom sawv daws khaws cia zoo.
5 – Thov kom kuv coj tus cwj pwm ruaj
kuv thiaj yuav coj tau koj cov lij choj

17 – Thov koj ua zoo rau koj tus tub txib :
kom kuv muaj txoj sia, kuv thiaj yuav khaws koj lo lus.
18 – Koj qhib kuv qhov muag, kuv thiaj yuav pom
yam zoo nkauj tshiab khiv hauv koj Txoj Cai

33 – HUAB TAIS, thov koj qhia txoj kev mus hauv koj cov lij choj
rau kuv kawm,
kuv yuav mus raws nraim koj cov lij choj.
34 – Thov koj ua kom kuv to taub, ces kuv yuav coj koj Txoj Cai,
kuv yuav muab tas kuv lub siab lub ntsws los mloog koj Txoj Cai

Zaj nyeem 2 :

Kos Lis Nthos Tsab 1 zaj 2. 6-10

Ntsiab lus : Tswv Ntuj txoj kev Thoob Tsib ib txwm tshwj zias rau peb txij lub hauv
paus los, kom peb muaj hwj chim.

6 – Kwv tij,

Peb hais txog kev Thoob Tsib rau cov neeg zoo txhij zoo txhua. Txoj kev thoob
tsib no tsis yog ntiaj teb kev thoob tsib, thiab tsis yog ntiaj teb cov vaj tej kev
thoob tsib uas yuav ploj.

7 – Txoj kev thoob tsib uas peb hais txog, mas yog Tswv Ntuj txoj kev Thoob Tsib ;

yog txoj kev Thoob Tsib uas neeg tsis to taub, thiab tseem nyob zais ntshis txog tav no ;
yog kev Thoob Tsib uas Tswv Ntuj ib txwm tshwj zias rau peb txij lub hauv
paus los, kom peb muaj hwj chim.
8 – Yog txoj kev Thoob Tsib uas tsis muaj ib tug vaj nyob ntiaj teb no paub li :

yog lawv paub, mas lawv tsis muab tus Huab Tais muaj hwj chim tua saum ntoo cuam.
9 – Peb ua raws li cov lus sau tseg tias : “Peb tshaj tej yam qhov muag tsis tau
pom dua, tej yam pob ntseg tsis tau hnov dua, tej yam tsis tau nce los txog neeg lub
siab. Peb tshaj txhua yam uas Tswv Ntuj npaj tseg rau cov neeg nyiam nws.”
10 – Tswv Ntuj qhia tej yam ntawd rau peb paub nyob hauv Leej Ntuj Plig : vim Leej
Ntuj Plig tsom tau tas puas tsav yam, nws tsom tau tej yam tob nyob hauv Tswv Ntuj.

Yog Tswv Ntuj Lo Lus. Nws Lub Txiaj Ntsim

Ntawv moo zoo :

Mas Tais 11,25

Ntsiab lus : Qhib lub Moo Zoo rau cov me neeg. Leej Txiv thiab Leej Tub

25 Lub caij ntawd, Yes Xus hais tias :
« Txiv, kuv cav lus zoo txog koj, Huab
Tais kav lub ntuj lub teb, vim koj zais tej
yam ntawd rau cov neeg thoob tsib thiab
cov neeg ntse, koj ho qhib rau cov me
nyuam yaus.

Mas Tais, 5, 20-22a.27-28.33-34a.37)

Ntsiab Lus : « Nej hnov cov lus qhia rau tej laus, Hos kuv, mas kuv hais rau nej

20 – « Kuv hais rau nej : yog nej tsis ua siab ncaj dua cov Kws Ntawv Ntshiab thiab
cov Fas Lis Xais, mas nej yuav mus tsis tau hauv Ntuj lub Ceeb Tsheej.
21 – « Nej hnov cov lus qhia rau tej laus thaud tias : « Koj tsis txhob tua neeg. Tus
twg tua neeg, nws yuav raug luag txiav txim rau nws.

22 – Hos kuv, mas kuv hais rau nej : Leej twg npau taws rau nws tus
kwv, nws yuav raug txim ntawm tsev hais plaub. Yog nws hais rau nws tus kwv tias
« Niag ruam ! » mas nws yuav raug txim ntawm lub rooj txwj laus Xas Nes Nrees.
Yog nws hais rau nws tus kwv tias : « Niag vwm », mas nws yuav raug txim nyob
hauv dab phem cov hluav taws.

27 – Nej hnov tej lus qhia tias : Koj yuav tsis txhob deev luag txij luag nkawm.

28 – Hos kuv, mas kuv hais rau nej : Leej twg ntsia ib tug poj niam vim
ntshaw zes nws, tus ntawd twb deev tus poj niam ntawd hauv nruab siab lawm.

33 – Nej tseem hnov cov lus qhia rau tej laus thaud tias :
Koj tsis txhob twv ntuj, koj yuav ua raws li cov lus koj tau cog rau Huab Tais.
34 – Tab sis kuv hais rau nej, nej tsis txhob twv ntuj ib zaug li. Txhob muab lub ntuj
los ua tim khawv, vim ntuj yog Tswv Ntuj lub theej kiab

37 – Nej yuav hais li no : Muaj, ces hais tias muaj ; tsis muaj, ces hais tias tsis muaj.
Cov lus hais tshaj, yog tuaj ntawm tus Phem tuaj.

Huab Tais Pleev. Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1 :

His Xais, Zaj 58, 7-10

HUAB TAIS hais li no:

7 – Yog koj muab koj cov mov los faib rau
tus neeg tshaib noj, yog koj cheem cov
txom nyem tsis muaj chaw nkaum kom
lawv nyob hauv koj tsev, yog koj muab
ris tsho rau tus koj pom liab qab hnav,
yog koj tsis tig nraub qaum rau tus muaj
lub cev nqaij zoo li koj.
8 – Yog koj ua li ntawd , mas qhov pom
kev yuav txhawv xws li hnub tuaj. Koj
lub qhov txhab yuav nqawm sai, koj txoj
kev ncaj yuav mus ua koj ntej. HUAB
TAIS lub hwj chim yuav hwj koj.
9 – Yog koj hu mas HUAB TAIS yuav teb,
yog koj qw tias :
« Tsuag tsuag tuaj tsom kwm kuv. »
Nws yuav hais tias :
« Kuv nyob ntawm no. »
Yog koj tshem rab quab ntawm koj tsev
mus, yog koj tsis tsa tes hem luag, yog
koj tsis hais cov lus phem.

10 – Yog koj
faib koj cov mov rau tus neeg tshaib noj,
yog koj pub dej rau tus neeg nqhis haus,
mas koj qhov pom kev yuav sawv nyob
hauv qhov tsaus ntuj. Koj qhov tsaus ntuj
yuav pom kev nrig li lub hnub thaum tav
su

Nkauj Paj Nruag – 112 :

Tus siab ncaj tau txoj hmoov zoo

As les lus yas

Zaj nyeem 2 :

Kos Lis Nthos Tsab Ib, Zaj 2. 1-5

1 Kwv tij sawv daws, ntawm kuv
mas, thaum kuv tuaj tim nej, kuv
tsis tau siv ib co lus muaj hwj chim thiab
ib co lus thoob tsib los tshaj Tswv Ntuj
lub txiaj ntsim rau nej.
2 Thaum kuv nrog nej nyob, kuv tsuas
xav paub Yes Xus Pleev, paub tus Yes
Xus Pleev tuag nyob saum ntoo cuam
xwb. 3 Thaum kuv tuaj cuag nej, kuv
yog tus tsis muaj zog, yog tus neeg
txhawj tshee na. 4 Kuv tej lus, thiab lub
Moo Zoo kuv xa tuaj, tsis zoo li kev
Thoob Tsib cov lus txawj ntxias neeg.
Kuv tej lus yog ib zag txuj tawm hauv
Leej Tswv Yim thiab hauv lub Hwj Huam
los, 5 kom nej txoj kev ntseeg txawb rau
saum Tswv Ntuj lub hwj huam, tsis txhob
txawb rau saum neeg kev thoob tsib.

Ntawv moo zoo :

Cov ntsev las lub ntiaj teb.
Qhov pom kev ci rau ntiaj teb.
5 : 13 – 16.

13 – Nej yog cov ntsev las lub ntiaj teb.
Tab sis yog ntsev tsuag lawm, yuav muab
dab tsi ua kom ntsev rov qab daw tuaj ?
Ntsev tsuag tsis zoo ua dab tsi, tsuas
kawg muab pov tseg nraum zoov rau neeg
tsuj xwb.
14 – Nej yog lub teeb ci rau lub ntiaj teb.
Ib lub nroog txhim rau saum ib lub ncov
roob, yuav muab zais tsis tau.

15 – Hos,
luag kuj tsis taws teeb coj mus zais rau
hauv qab txee, luag muab txawb saum tus
ncej teeb, lub teeb ci rau tas cov neeg
nyob hauv tsev pom kev.

16 – Li ntawd,
nej lub teeb yuav tsum ci nyob ntawm zeej
tsoom xub ntiag, kom lawv pom nej cov
dej num zoo, ces lawv yuav cav txog nej
Txiv nyob saum ntuj.

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1 :

Xas Muas : Tshooj : 5 Nqe : 1 – 3

Lub ntsiab lus : Tsa Das Vis ua vaj. Nws mus nyob Yes Lus Xas Les.

1 Cov xeem His Xas Lais tib si tuaj uag Das Vis nyob Hes Nploos. Lawv hais rau nws tias : « Peb nrog koj koom ib co pob txha ib ce nqaij.

2 Yav thaud, Xas Ws ua vaj, twb yog koj coj His Xas Lais mus los. HUAB TAIS tau hais rau koj tias : koj yuav coj kuv tsoom pej xeem His Xas Lais mus nog zaub. Koj yuav ua His Xas Lais tus tswv. »

3 Tsoom txwj laus His Xas Lais thiaj tuaj cuag Das Vis nyob Hes Nploos. Tus vaj Das Vis nrog lawv cog lus nyob Hes Nploos, nyob ntawm Tswv Ntuj xub ntiag. Lawv pleev roj tsa Das Vis ua vaj His Xas Lais.

Yog Tswv Ntuj Lo Lus. Nws Lub Txiaj Ntsim

Zaj nyeem 2 :

Kos Los Xais : Tshooj : 1 Nqe : 12 – 20

Lub ntsiab lus : Paj Lug ua Ntuj tsaug. Leej Pleev yog tus ntaus thawj.

12 Ua li mas, nej yuav zoo siab ua nej Txiv tsaug, vim nej Txiv hu nej los nrog nws cov ntshiab koom txais ib txog hmoov nyob hauv qhov pom kev.

13 Huab Tais Leej Txiv rho peb ntawm lub Ceeb Tsheej tsaus ntuj los. Nws coj peb los nyob hauv nws Leej Tub lub Ceeb Tsheej.

14 Nyob hauv Leej Tub, peb tau txoj kev cawm, thiab txoj kev zam txhaum.

15 Yes Xus yog tus Tswv Ntuj uas qhov muag pom tsis tau tus duab. Nws yog tus xub yug ntawm txhua tsav txhua yam uas Ntuj tsim los.

16 Nyob hauv Leej Pleev, Ntuj tsim txhua yam nyob saum ntuj thiab nyob ntiaj teb no, tsim txhua yam pom tau thiab pom tsis tau, tsim txhua tus Tshiab zaum saum theej kiab, thiab txhua tus Tshiab ua
Huab Tais, ua Vaj Txheeb, thiab muaj hwj huam. Ntuj tsim tas puas tsav yam nyob hauv Leej Pleev, kom lawv tsob hwb Leej Pleev.

17 Leej Pleev xub nyob dua txhua tsav txhua yam. Tas puas tsav yam muaj txoj sia nyob hauv Leej Pleev.

18 Leej PLeev yog lub Taub Hau nyob saum lub Cev : lub Cev yog lub Koom Txoos. Leej Pleev yog lub Hauv Paus, nws yog tus xub yug hauv cov tub tuag los.

19 Tswv Ntuj muab txhua yam uas zoo tshaj, coj los nyob hauv Leej Pleev.

20 Nyob hauv Leej Pleev, Tswv Ntuj xyiv fab hlo rov nrog tas txhua tsav txhua yam sib haum xeeb. Vim Leej Pleev, mas txhua tsav txhua yam nyob ntiaj teb thiab nyob saum ntuj rov tau nyob thaj yeeb
hauv Leej Pleev cov ntshav uas ntws saum ntoo cuam.

Yog Tswv Ntuj Lo Lus. Nws Lub Txiaj Ntsim

Ntawv moo zoo :

Lus Kas : Tshooj : 23 Nqe : 35 – 43

Lub ntsiab lus : Yes Xus nyob saum ntoo cuam lawv thuam nws.

35 Tsoom pej xeem sawv ntsug ntawd ntsia. Cov thawj coj hnyos Yes Xus, lawv hais tias : »Nws cawm tau luag tej. Yog tias nws yog Tswv Ntuj Leej Pleev thiab tus Xaiv tiag, kom nws rov cawm nws mas ! »

36 Cov tub rog kuj thuam Yes Xus. Lawv txav los, lawv cev ib co dej qaub rau Yes Xus.

37 Lawv hais tias : « Saib koj yog cov Yus Das tus vaj no, koj cia li cawm koj mas ! »

38 Tseem muaj ib co npe ntawv sau nyob siab me ntsis saum Yes Xus taub hau, hais tias : « Tus no yog cov Yus Das tus Vaj. »

39 Ob tug neeg phem dai saum ntoo cuam, muaj ib tug tsawm Yes Xus tias : « Koj tsis yog Leej Pleev lod ? Koj rov cawm koj, thiab cawm wb mas. »

40 Tab sis lwm tus qhib ncauj hais lus, nws cem tias : « Koj tseem tsis ntshai Tswv Ntuj lod ? Koj twb raug tib lub txim zoo li nws thiab !

41 Wb mas, wb lub txim yog txoj kev ncaj, vim wb tau ua tej yam tsim nyog raug txim. Hos nws tsis tau ua dab tsi phem li. »

42 Ces nws hais tias : « Yes Xus, thaum koj mus txog hauv koj lub Ceeb Tsheej, thov koj nco txog kuv. »

43 Ces Yes Xus hais rau nws tias : « Kuv hais tseeb rau koj : Hnub no, koj yuav nrog kuv nyob hauv lub Nras Lom Zem. »

Huab Tais Pleev. Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1 :

Mas Las Kis : Tshooj : 3 Nqe : 19 – 20

Lub ntsiab lus : Txog Huab Tais lub hnub nyoog, Huab Tais yuav xa kev cawm neeg tuaj.

19 Vim nyem no Huab Tais lub Hnub Nyoog tawm tuaj ntaiv cuag li ib lub qhov txog, mas cov neeg siab phem yuav zoo li ib co quav nyab. Lub Hnub Nyoog uas tuaj yuav txog ntawd, yuav hlawv lawv tas huv tib si, kom tsis txhob tshuav ib tug kav los ib tug cag.

20 Tab sis nej cov uas hwm kuv lub npe, thaum lub Hnub Pub Kev Ncaj yuav ci tuaj, mas nws yuav xa txoj kev ncaj tuaj rau nej. Nws cov sab hnub yuav coj kev cawm neeg tuaj rau nej. »

Yog Tswv Ntuj Lo Lus. Nws Lub Txiaj Ntsim

Zaj nyeem 2 :

Tes Xas Los Nis : Tshooj : 3 Nqe : 7 – 12

Lub ntsiab lus : Txhob nyob dag.

7 Vim nej paub zoo tias, nej yuav yoog peb li cas. Thaum peb nyob tim nej, peb tsis tau coj lub neej tsis haum txoj cai.

8 Peb tsis tau kom leej twg pub mov rau peb noj dawb : peb tau ua hauj lwm nruab hnub hmo ntuj ; peb tau khwv iab khwv daw, vim peb tsis xav ua ib lub nra hnyav rau nej leej twg ris.

9 Tsis yog vim peb tsis muaj cai kom nej saib peb hnyav, tab sis, yog vim peb xav muab ib tug piv txwv rau nej yoog.

10 Thaum peb tseem nyob ze nej, peb kuj tau tsa ib txog cai tias, yog muaj ib tug neeg tsis kam ua hauj lwm, mas nws tsis txhob noj mov thiab.

11 Tiam sis nyem no, peb hnov tias, nyob tim nej muaj tej tus coj lub neej tsis haum txoj cai ntawd, lawv tsis ua hauj lwm dab tsi li, lawv tsuas xav kov tas puas tsav yam.

12 Peb thov ntuas cov neeg ntawd nyob hauv Huab Tais Yes Xus Pleev kom lawv ua hauj lwm thiab nyob twj ywm, thiab kom lawv noj cov mov uas lawv tau khwv ua.

Yog Tswv Ntuj Lo Lus. Nws Lub Txiaj Ntsim

Ntawv moo zoo :

Lus Kas : Tshooj : 21 Nqe : 5 – 19

Lub ntsiab lus : Lub Tuam Tsev Teev Ntuj yuav raug xwv txheej. Ntau hom xwv txheej yuav tshwm sim.

5 Thaum ntawd, ib txhia hais tias lub Tuam Tsev Teev Ntuj txhim tau pob zeb zoo nkauj rau thiab muaj paj tshab txi Ntuj zoo saib. Yes Xus hais tias :

6 « Tej uas nej qhov muag ntsia ntawm no, muaj ib hnub luag yuav rhuav tsis tseg ob lub pob zeb txhim sib tshooj sawv ntsug. »

7 Lawv nug Yes Xus tias : « Xib Hwb, thaum twg tej ntawd mam li tshwm sim tuaj, thiab yuav muaj lub cim
dab tsi thaum tej ntawd yuav tshwm sim tuaj ?”

8 Yes Xus hais tias : « Nej ceev faj txhob cia luag ua kom nej yuam kev. Vim yuav muaj coob leej siv kuv lub npe tuaj, lawv yuav hais tias : ‘Yog kuv’, thiab yuav hais tias : ‘Lub zim txwv twb los txog ze ze lawm’. Mas nej txhob mus raws lawv.

9 Thaum nej hnov luag tham txog kev tsov rog thiab kev kub ntxhov, mas nej tsis txhob ntshai. Vim tias tej ntawd yuav tsum tshwm sim tuaj tso, tab sis tsis tau txog lub zim txwv kawg tam sis ntawd. »

10 Yes Xus hais rau lawv tias : « Ib haiv neeg yuav sawv los ntaus lwm haiv neeg, ib lub teb chaws yuav sawv los ntaus lwm lub teb chaws.

11 Lub ntiaj teb yuav qeeg heev kawg. Nyob rau ntau qhov chaw yuav muaj mob aws, thiab muaj kev
tshaib. Yuav muaj tej yam xwm txaus ntshai kawg, thiab tej lub cim loj nyob saum ntuj.

12 Tab sis ua ntej ib puas tsav yam ntawd, luag yuav cev tes ntes nej, luag yuav hiam nej, luag yuav coj nej mus kom rau cov tsev txoos thiab tsev loj faj. Luag yuav coj nej mus rau ntawm cov vaj thiab cov nom tswj teb chaws xub ntiag vim kuv lub npe.

13 Tej ntawd yuav pub ib lub zoo sij hawm rau nej ua tim khawv.

14 Nej khaws rau nruab siab tias nej yuav tsis txhob npaj ib co lus teb kom txuag tau nej.

15 Vim kuv yuav muab ib co lus thiab ib txog kev thoob tsib rau nej, ces cov ntxub nej yuav tsis muaj ib tug teb tau thiab cav tau nej cov lus.

16 Tab yog nej niam nej txiv, nej cov kwv tij, cov txheeb ze, thiab cov phooj ywg, los lawv tseem yuav mus kom nej. Luag yuav muab nej ib txhia tua.

17 Luag yuav ntxub nej vim kuv lub npe.

18 Tab sis tsis muaj ib txoj plaub hau saum nej taub hau yuav ploj.

19 Nej ua siab ruaj kom tom thawj, ces nej yuav cawm nej txoj sia. »

Huab Tais Pleev. Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1 :

Mas Kas Npes : Tshooj : 7 Nqe : 1 – 2 + 9 – 14

Lub ntsiab lus : Xya leej kwv tij tuaj yeem nrog lawv niam tuag.

1 Tus Vaj As Nthias Kus ntes tau xya leej kwv tij nrog lawv niam. Tus vaj yuam lawv kom lawv noj nqaij
npuas uas lawv Txoj Cai txwv tsis pub noj. Nws kom xuas pas thiab xuas leeg nyuj plawm lawv.

2 Ib tug tub txawm sawv xya leej kwv tij thiab lawv niam chaw hais rau tus vaj tias : « Koj xav paub saib peb xav li cas. Mas peb yeem tuag zoo dua qhov hla peb cov yawg koob Txoj Cai. »

9 Thaum nws yuav tuag, nws hais tias : « Ib tug neeg siab phem li koj, koj tsis pub peb ua neej nyob. Tab sis tus vaj kav lub ntiaj teb yuav tsa peb sawv rov los kom peb tau ib lub neej tsis txawj kawg, rau qhov peb tuag vim nws Txoj Cai. »

10 Tus ob no tuag tas, lawv coj tus peb los. Lawv kom nws hlev nplaig, ces nws hlev nplaig tam sim ntawd thiab nws xyab nws ob txhais caj npab tam sim rau lawv.

11 Nws tseem muaj cuab kav hais tias :  » Kuv txais kuv ob txhais tes no ntawm Ntuj los, vim nws tej kev cai mas kuv ntxub kuv ob txhais tes. Kuv tso siab tias nws yuav rov muab kuv ob txhais tes no rau kuv. »

12 Tus vaj thiab nws cov neeg sawv daws ceeb tas tias vim li cas tus tub hluas ntawd yuav muaj lub siab loj kawg. Nws saib nws qhov txom nyem zoo li tsis muaj nqis dab tsi.

13 Nws txoj sia tu lawm, lawv kuj coj tus plaub los ua phem li ntawd rau thiab.

14 Thaum tus plaub yuav tuag, nws hais tias : « Kuv yeem tuag nyob hauv neeg txhais tes. Kuv tso siab tias Tswv Ntuj yuav tsa kuv ciaj rov los. Ntawm koj, mas koj yuav tsis tau ciaj rov los muaj txoj sia. »

Yog Tswv Ntuj Lo Lus. Nws Lub Txiaj Ntsim

Zaj nyeem 2 :

Tes Xas Los Nis : Tshooj : 2 Nqe : 16 – 3,5

Lub ntsiab lus : Ntuas kom lawv nyob ruaj nreb.

16 Thov kom peb tus Huab Tais Yes Xus Pleev, thiab peb Txiv Tswv Ntuj nkawd nplij nej siab. Tswv Ntuj yog tus hlub peb, nws pub kev nplij mus li, thiab pub kev tso siab lom zem.

17 Thov kom nkawd nplij nej lub siab thiab nres nej tej hauj lwm, thiab nej tej lus huv tib si kom khov kho.

1 Kwv tij sawv daws, nej thov Ntuj rau peb thiab mog ! Nej thov kom Huab Tais Lo Lus mus taug nws txoj
kev ntxiv, thiab kom Lo Lus nto koob meej ntxiv, ib yam li Lo Lus tau nto koob meej nyob hauv nej.

2 Nej thov Ntuj, kom peb dim ntawm cov neeg siab phem yuam kev : vim Ntuj tsis pub kev ntseeg
rau sawv daws.

3 Tiam sis Huab Tais pheej xeeb : nws yuav nres nej kom ruaj nreb, nws yuav txuag nej ntawm tus phem.

4 Nyob hauv Huab Tais, peb tso siab rau nej kawg. Txhua yam peb qhia, mas nej ua raws, thiab nej yuav ua ntxiv mus.

5 Kuv thov kom Huab Tais coj nej lub siab, mus txog Tswv Ntuj txoj kev nyiam thiab txog Leej Pleev txoj kev ruaj nreb.

Yog Tswv Ntuj Lo Lus. Nws Lub Txiaj Ntsim

Ntawv moo zoo :

Lus Kas : Tshooj : 20 Nqe : 27 – 38

Lub ntsiab lus : Cov tuag yuav sawv rov los.

27 Muaj ob peb tug Xas Dus Kais txav los, lawv yog cov uas hais tias neeg tuag tsis muaj kev sawv rov los.

28 Lawv nug Yes Xus tias : « Mais Xes sau cia rau peb tias : Yog leej twg tus kwv tij tuag lawm, tseg poj niam cia tsis tau muaj me nyuam li, mas tus kwv yuav tsum qaws tus poj ntsuam kom tsa tau tus kwv tij uas tuag lawd lub keeb sawv.

29 Muaj xya leej kwv tij. Thawj tug yuav poj niam, nws tuag tsis tau muaj tub ki.

30 Tus ob kuj tuag ib yam li ntawd.

31 Tus peb qaws tus poj niam. Tas lawv xya leej puav leej tuag tsis muaj tub ki li.

32 Thaum kawg, tus poj niam kuj tuag lawm thiab.

33 Ua li mas lub zim txwv neeg tuag yuav sawv rov los, tus poj niam ntawd yuav yog tus twg poj niam ? Vim lawv xya leej tau yuav nws ua poj niam. »

34 Yes Xus thiaj hais rau lawv tias : « Cov tub ki hauv lub qab ntuj no sib qaws ua txij ua nkawm.

35 Tab sis cov uas Ntuj txiav tias lawv tsim nyog txais ib feem nyob fab lwm tiam, thiab tsim nyog
sawv hauv cov tuag rov los, mas lawv tsis yuav poj niam thiab tsis yuav txiv.

36 Rau qhov lawv yuav tsis txawj tuag ntxiv. Lawv nrog cov Tshiab sib txig. Lawv yog Tswv Ntuj cov tub, vim lawv yog kev sawv rov los cov tub.

37 Hais txog cov tuag sawv rov los, Mais Xes twb qhia txog qhov ntawd nyob hauv zaj hais txog Tsob Pos, thaum nws hu Huab Tais ua Has Nplas Has tus Tswv Ntuj, His Xas Has tus Tswv Ntuj, Yas Kos tus Tswv Ntuj.

38 Ua li mas Tswv Ntuj tsis yog cov tuag tus Tswv Ntuj, yog cov neeg ciaj tus Tswv Ntuj. Tas sawv daws muaj txoj sia kom tau hwm Tswv Ntuj. »

Huab Tais Pleev. Lub qab ntuj neeg cav txog koj

Los nyeem zaj no :

Lus Kas : Tshooj : 20 Nqe : 27. 34 – 38

Lub ntsiab lus : Cov tuag yuav sawv rov los.

27 Muaj ob peb tug Xas Dus Kais txav los, lawv yog cov uas hais tias neeg tuag tsis muaj kev sawv rov los.

34 Yes Xus thiaj hais rau lawv tias : « Cov tub ki hauv lub qab ntuj no sib qaws ua txij ua nkawm.

35 Tab sis cov uas Ntuj txiav tias lawv tsim nyog txais ib feem nyob fab lwm tiam, thiab tsim nyog sawv hauv cov tuag rov los, mas lawv tsis yuav poj niam thiab tsis yuav txiv.

36 Rau qhov lawv yuav tsis txawj tuag ntxiv. Lawv nrog cov Tshiab sib txig. Lawv yog Tswv Ntuj cov tub, vim lawv yog kev sawv rov los cov tub.

37 Hais txog cov tuag sawv rov los, Mais Xes twb qhia txog qhov ntawd nyob hauv zaj hais txog Tsob Pos, thaum nws hu Huab Tais ua Has Nplas Has tus Tswv Ntuj, His Xas Has tus Tswv Ntuj, Yas Kos tus Tswv Ntuj.

38 Ua li mas Tswv Ntuj tsis yog cov tuag tus Tswv Ntuj, yog cov neeg ciaj tus Tswv Ntuj. Tas sawv daws muaj txoj sia kom tau hwm Tswv Ntuj. »

Huab Tais Pleev. Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1 :

Thoob Tsib ; Tshooj : 11 Nqe : 23 – 12, 2

Lub ntsiab lus : Tswv Ntuj hlub txhua yam nws tsim.

23 Tswv Ntuj, koj khuv leej sawv daws, vim koj ua tau tas puas tsav yam. Koj qi muag tsis ntsia neeg cov
txhaum, kom lawv tu siab tiag rau lawv

2 Koj thiaj maj mam qhuab qhia cov neeg ntog. Koj xub ntuas lawv, koj ua kom lawv paub tias lawv ua qhov twg txhaum. Kom lawv nrauj qhov phem ntawd pov tseg, thiab kom lawv los ntseeg txog koj, Huab Tais

Yog Tswv Ntuj Lo Lus. Nws Lub Txiaj Ntsim

Zaj nyeem 2 :

Tes Xas Los Nis : Tshooj : 1 Nqe : 11 – 2, 2

Lub ntsiab lus :Paj Lug ua Ntuj tsaug thiab ntuas kom lawv ua zoo mus ntxiv. Lub caij Huab Tais yuav rov los.

11 Yog vim peb xav txog tej yam li ntawd, mas peb thiaj thov Ntuj rau nej tsis tseg ; Tswv Ntuj yuav ua kom nej tsim nyog Tswv Ntuj hu nej, nws lub hwj huam yuav pab nej ua qhov zoo, thiab pab nej ua cov hauj lwm tawm hauv kev ntseeg los.

2 Luag lam ua Yaj Saub qhia ub qhia no, nej txhob txhawj. Luag khaws tej lo lus los tej tsab ntawv, uas luag dag tias yog kuv sau. Tej lo lus ntawd ua kom nej xav tias twb txog Huab Tais lub Hnub Nyoog lawm.

Yog Tswv Ntuj Lo Lus. Nws Lub Txiaj Ntsim

Ntawv moo zoo :

Lus Kas : Tshooj : 19 Nqe : 1 – 10

Lub ntsiab lus : Ntxas Kais.

1 Yes Xus mus hauv Yes Lis Kos, nws hla lub tsheej.

2 Muaj ib tug neeg lub npe hu ua Ntxas Kais, nws yog ib tug nom hauv cov sau se, nws nplua nuj.

3 Nws nrhiav kom tau kev pom saib Yes Xus yog leej twg, tab sis nws tsis tau kev, vim neeg coob dhau,
thiab nws yog neeg qig taub.

4 Ces nws khiav mus ua ntej, nws nce saum tsob txiv cev kom tau pom Yes Xus, vim Yes Xus yuav hla ntawd mus.

5 Thaum Yes Xus los txog ntawm qhov chaw ntawd, nws tsa muag ntsia, nws hais tias : « Ntxas Kais, koj nqes los sai, vim hnub no kuv yuav tsum mus hauv koj tsev. »

6 Ntxas Kais nqes nrawm nroos los, nws zoo siab txais Yes Xus.

7 Sawv daws pom li ntawd, lawv yws yws hais tias : « Nws mus so hauv ib tug neeg txhaum lub tsev ! »

8 Hos Ntxas Kais sawv ntsug, nws hais rau Huab Tais tias : « Huab Tais, saib, kuv yuav muab kuv tej
cuab yeej cuab tam ib nrab pub rau cov pluag. Yog kuv tau ua tsis ncaj rau leej twg, mas kuv yuav muab plaub npaug pauj rau nws. »

9 Yes Xus hais rau Ntxas Kais tias : « Hnub no, txoj kev cawm los txog hauv lub tsev no, vim tus no kuj yog Has Nplas Has ib leeg tub thiab.

10 Vim tias Neeg Leej Tub tuaj nrhiav thiab tuaj cawm yam uas ploj lawm. »

Huab Tais Pleev. Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1 :

Npes Xis Las : Tshooj : 35 Nqe : 12- 14; 16 – 18

Lub ntsiab lus : Tswv Ntuj txiav txim ncaj, nws nyiam pab cov neeg me.

12 Huab Tais yog ib tug txiav txim tsis kws leej twg cai.

13 Nws tsis kws leej twg cai los muab txim rau tus pluag. Thaum tus raug luag hiam thov Huab Tais mas Huab Tais mloog nws.

14 Huab Tais tsis thuam tus me nyuam ntsuag lo lus thov, nws tsis thuam tus poj ntsuam
nws cov lus ntsaj.

16 Leej twg tsob hwb Huab Tais thiab ua raws li Huab Tais nyiam, mas Huab Tais mloog tus ntawd. Tus ntawd lub suab nrov mus txog txheej huab saud.

17 Tus neeg txheej qis cov lus thov hla mus dhau txheej huab saud. Tus neeg txheej qis zaj thov Ntuj tseem mus tsis tau txog Huab Tais, mas tus neeg txheej qis lub siab nyob tsis tus.

18 Yog tus Nyob Siab Tshaj tseem tsis tau tuaj xyuas tus neeg txheej qis, mas tus neeg txheej qis thov tsis tseg. Nws thov mus txog lub caij tus Nyob Siab Tshaj txiav txim thiab ua ncaj rau cov neeg siab ncaj.

Yog Tswv Ntuj Lo Lus. Nws Lub Txiaj Ntsim

Zaj nyeem 2 :

Tis Mos Tes : Tshooj : 4 Nqe : 6 – 8. 16 – 18

Lub ntsiab lus : Txog lub caij Paj Lug yuav tso ntiaj teb tseg. Cov lus ntuas kawg.

6 Ntawm kuv, mas txog lub caij hliv kuv roj ntsha los txi Ntuj lawm. Txog lub caij kuv yuav mus.

7 Tas kuv sid, kuv tau ua ib ntsug zoo rog. Kuv khiav mus txog chaw lawm. Kuv tau ceev txoj kev ntseeg.

8 Nyem no, Huab Tais twb npaj tau lub kaus mom yeej phim cov neeg ncaj rau kuv lawm. Lub zim txwv kawg, tus Huab Tais txiav txim ncaj yuav muab lub kaus mom ntawd rau kuv. Tsis yog yuav muab rau kuv ib leeg xwb : nws yuav muab rau tas tsoom neeg nyiam nws, thiab rau tas tsoom neeg tos lub Hnub Nyoog nws yuav tawm los rau pom xyeem.

16 Thaum cov nom hu kuv tuaj hauv lub tsev txiav txim thawj zaug, mas tsis muaj leej twg nres kuv li. Sawv daws tso kuv pov tseg. Kuv thov kom Ntuj txhob pauj txim rau lawv.

17 Huab Tais tau nrog nraim kuv. Nws tso nws lub zog rau hauv kuv, kom kuv tshaj lub Moo, kom lub Moo nrov mus txog cov neeg teev pej kum dab pob ntseg. Ntuj npo kuv dim ntawm tsov ntxhuav lub ncauj.

18 Huab Tais yuav npo kuv dim ntawm txhua hom kev nkhaus. Huab Tais yuav cawm kuv. Nws yuav txuag kuv rau nws lub Ceeb Tsheej nyob saum Ntuj. Huab Tais nto koob meej mus ib txhiab ib txhis. Ua li.

Yog Tswv Ntuj Lo Lus. Nws Lub Txiaj Ntsim

Ntawv moo zoo :

Lus Kas : Tshooj : 18 Nqe : 9 – 14

Lub ntsiab lus : Tus Fas Lis Xais thiab tus sau se.

9 Yes Xus tseem hais zaj paj lug no ntxiv, nws hais rau ib txhia neeg uas lawv khav tias lawv yog neeg ncaj, ces lawv thuam luag tej.

10 « Muaj ob tug neeg nce mus teev Ntuj pem lub Tuam Tsev Teev Ntuj. Ib tug yog Fas Lis Xais, ib tug yog neeg sau se.

11 Tus Fas Lis Xais sawv ntsug, nws teev Ntuj li no nyob hauv siab : ‘Aub, Tswv Ntuj, kuv ua koj tsaug, vim kuv tsis zoo li zeej tsoom sawv daws. Lawv mas lawv ua tub sab, ua tsis ncaj, deev luag txij luag nkawm, thiab tseem ua zoo li tus sau se ntawd.

12 Ib lis piam, kuv yoo mov ob zaug. Kuv pub ib feem kaum ntawm tas txhia yam uas kuv khwv tau.’

13 Tus sau se nyob deb, tsis muaj cuab kav tsa muag ntsia saum ntuj. Nws ntaus nws hauv siab, nws hais tias : ‘Aub ! Tswv Ntuj, thov koj khuv leej kuv, vim kuv yog neeg txhaum !’

14 Kuv hais rau nej : tus sau se nqes rov mus tsev, nws ntshiab huv lawm, hos tus Fas Lis Xais tsis tau ntshiab huv. Vim tias leej twg tsa nws siab, Ntuj yuav txo nws qis, hos leej twg txo nws qis, Ntuj yuav
tsa nws siab. »

Huab Tais Pleev. Lub qab ntuj neeg cav txog koj

Peb muab cov zaj nyeem ntawm lub site AELF.ORG fab kis los rau peb co ntseeg kom peb paub tias hnub chiv no peb yuav mloog Tswv Ntuj cov lus qhuab qhia

Zaj nyeem 1 :

Kev Tsiv : Tshooj : 17 Nqe : 8 – 13

Lub ntsiab lus : Lawv nrpg cpv As Mas Les tawm tsam.

8 Cov As Mas Les tuaj ntaus cov His Xas Lais, ces lawv sib tawm tsam nyob Les Fis Dis.

9 Mais Xes hais rau Yos Xuas tias : « Koj xaiv ib pab txiv neej nrog koj, tag kis koj tawm mus ntaus cov As Mas Les; hos kuv, mas kuv yuav mus nyob saum lub ncov roob, tuav rawv Tswv Ntuj rab pas ntawm tes. »

10 Yos Xuas ua raws li Mais Xes hais rau nws, nws tawm mus ntaus cov As Mas Les, hos Mais Xes, As Loos thiab Hwm lawv nce mus saum lub ncov roob.

11 Yog tias Mais Xes tsa nws ob txhais tes twj ywm, ces tog His Xas Lais yeej, yog nws tso nws ob txhais tes dauv, ces tog As Mas Les yeej.

12 Thaum Mais Xes tsaug leeg npab lawm, lawv muab ib lub pob zeb los rau Mais Xes zaum. Mais Xes zaum saum lub pob zeb, hos As Loos thiab Hwm nkawd txheem nws ob txhais tes, ib leeg nyob ib sab. Lawv ua li ntawd ces nws ob txhais tes thiaj tsa tas mus li txog thaum hnub poob qho.

13 Ces Yos Xuas xuas ntaj los ntaus yeej As Mas Les thiab nws haiv neeg.

Yog Tswv Ntuj Lo Lus. Nws Lub Txiaj Ntsim

Zaj nyeem 2 :

Tis Mos Tes : Tshooj : 3 Nqe : 14 – 4, 2

Lub ntsiab lus : Thaum txog lub zim txwv kawg, sawv daws yuav ceev faj. Paj Lug ntsuas Tis Mos Tes.

14 Ntawm koj, mas koj nyob twj ywm hauv txoj kev koj tau kawm, vim koj paub tias yog qhov tseeb. Koj paub tias koj tau txais tej yam ntawd ntawm cov xib hwb twg.

2 koj tshaj Lo Lus mog ! Koj qhia Lo Lus tsis tseg, tsis muaj caij muaj thaum. Koj tiv cov neeg dag, koj hem lawv. Koj ua siab ntev qhuab qhia, txhob nkees txhob sab. Koj kub siab qhia sawv daws.

Yog Tswv Ntuj Lo Lus. Nws Lub Txiaj Ntsim

Ntawv moo zoo :

Lus Kas : Tshooj : 18 Nqe : 1 – 8

Lub ntsiab lus : Thov Ntuj xws li tus poj ntsuam taij kom luag ua ncaj rau nws.

1 Yes Xus hais ib zag paj lug rau lawv, nws qhia lawv tias yuav tsum teev Ntuj tsis tseg, txhob ntaus siab
yau. Yes Xus hais tias :

2 Nyob hauv ib lub nroog, muaj ib tug txwj laus txiav txim, nws tsis ntshai Tswv Ntuj thiab tsis hwm leej twg li.

3 Muaj ib tug poj ntsuam nyob hauv lub nroog ntawd tuaj cuag tus txwj laus txiav txim, nws hais tias : « Thov koj pab tsa kuv cai tiv tus neeg ntxub kuv. »

4 Tus txwj laus tsis quav ntsej, nws ncua ntev ntev. Tab sis ntev mus nws xav tias : « Tab yog kuv tsis hwm Tswv Ntuj thiab tsis ntshai ib tug neeg li,

5 tsis kav tus poj ntsuam ntawd txob kuv dhau, kuv yuav tsa nws cai tiv tus ntxub nws, kom xwv nws txhob tuaj txob kuv thiab txhob ua kuv dias taub hau ntxiv. »

6 Ces Huab Tais hais tias : « Nej mloog tus txwj laus txiav txim siab tsis ncaj cov lus saib.

7 Thaum Tswv Ntuj cov xaiv ua hnub ua hmo hu txog nws tsis tseg, Tswv Ntuj yuav tsis tsa lawv cai lod ? Nws yeej ua siab ntev rau lawv.

8 Kuv hais rau nej, Tswv Ntuj yuav tsa lawv cai sai sai. Tab sis thaum Neeg Leej Tub rov los, nws puas yuav pom neeg ntseeg nyob ntiaj teb ? »

Huab Tais Pleev. Lub qab ntuj neeg cav txog koj